| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၄. အဓိကရဏပစ္စယာပတ္တိ
4. Adhikaraṇapaccayāpatti
၃၄၄. ဝိဝာဒာဓိကရဏံ အာပတ္တာနာပတ္တီတိ? ဝိဝာဒာဓိကရဏံ န အာပတ္တိ။ ကိံ ပန ဝိဝာဒာဓိကရဏပစ္စယာ အာပတ္တိံ အာပဇ္ဇေယ္ယာတိ? အာမ, ဝိဝာဒာဓိကရဏပစ္စယာ အာပတ္တိံ အာပဇ္ဇေယ္ယ။ ဝိဝာဒာဓိကရဏပစ္စယာ ကတိ အာပတ္တိယော အာပဇ္ဇတိ? ဝိဝာဒာဓိကရဏပစ္စယာ ဒ္ဝေ အာပတ္တိယော အာပဇ္ဇတိ။ ဥပသမ္ပန္နံ ဩမသတိ, အာပတ္တိ ပာစိတ္တိယသ္သ; အနုပသမ္ပန္နံ ဩမသတိ, အာပတ္တိ ဒုက္ကဋသ္သ – ဝိဝာဒာဓိကရဏပစ္စယာ ဣမာ ဒ္ဝေ အာပတ္တိယော အာပဇ္ဇတိ။
344. Vivādādhikaraṇaṃ āpattānāpattīti? Vivādādhikaraṇaṃ na āpatti. Kiṃ pana vivādādhikaraṇapaccayā āpattiṃ āpajjeyyāti? Āma, vivādādhikaraṇapaccayā āpattiṃ āpajjeyya. Vivādādhikaraṇapaccayā kati āpattiyo āpajjati? Vivādādhikaraṇapaccayā dve āpattiyo āpajjati. Upasampannaṃ omasati, āpatti pācittiyassa; anupasampannaṃ omasati, āpatti dukkaṭassa – vivādādhikaraṇapaccayā imā dve āpattiyo āpajjati.
တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? ကတိဟိ အဓိကရဏေဟိ ကတိသု ဌာနေသု ကတိဟိ သမထေဟိ သမ္မန္တိ?
Tā āpattiyo catunnaṃ vipattīnaṃ kati vipattiyo bhajanti? Catunnaṃ adhikaraṇānaṃ katamaṃ adhikaraṇaṃ? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Katihi adhikaraṇehi katisu ṭhānesu katihi samathehi sammanti?
တာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ။ စတုန္နံ အဓိကရဏာနံ , အာပတ္တာဓိကရဏံ။ သတ္တန္နံ အာပတ္တိက္ခန္ဓာနံ ဒ္ဝီဟိ အာပတ္တိက္ခန္ဓေဟိ သင္ဂဟိတာ – သိယာ ပာစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌန္တိ။ ဧကေန အဓိကရဏေန – ကိစ္စာဓိကရဏေန; တီသု ဌာနေသု – သင္ဃမဇ္ဈေ, ဂဏမဇ္ဈေ, ပုဂ္ဂလသ္သ သန္တိကေ; တီဟိ သမထေဟိ သမ္မန္တိ – သိယာ သမ္မုခာဝိနယေန စ ပဋိညာတကရဏေန စ, သိယာ သမ္မုခာဝိနယေန စ တိဏဝတ္ထာရကေန စ။
Tā āpattiyo catunnaṃ vipattīnaṃ ekaṃ vipattiṃ bhajanti – ācāravipattiṃ. Catunnaṃ adhikaraṇānaṃ , āpattādhikaraṇaṃ. Sattannaṃ āpattikkhandhānaṃ dvīhi āpattikkhandhehi saṅgahitā – siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ tīhi samuṭṭhānehi samuṭṭhanti. Ekena adhikaraṇena – kiccādhikaraṇena; tīsu ṭhānesu – saṅghamajjhe, gaṇamajjhe, puggalassa santike; tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
၃၄၅. အနုဝာဒာဓိကရဏံ အာပတ္တာနာပတ္တီတိ? အနုဝာဒာဓိကရဏံ န အာပတ္တိ။ ကိံ ပန အနုဝာဒာဓိကရဏပစ္စယာ အာပတ္တိံ အာပဇ္ဇေယ္ယာတိ? အာမ, အနုဝာဒာဓိကရဏပစ္စယာ အာပတ္တိံ အာပဇ္ဇေယ္ယ။ အနုဝာဒာဓိကရဏပစ္စယာ, ကတိ အာပတ္တိယော အာပဇ္ဇတိ? အနုဝာဒာဓိကရဏပစ္စယာ တိသ္သော အာပတ္တိယော အာပဇ္ဇတိ။ ဘိက္ခုံ အမူလကေန ပာရာဇိကေန ဓမ္မေန အနုဒ္ဓံသေတိ, အာပတ္တိ သင္ဃာဒိသေသသ္သ; အမူလကေန သင္ဃာဒိသေသေန အနုဒ္ဓံသေတိ, အာပတ္တိ ပာစိတ္တိယသ္သ; အမူလိကာယ အာစာရဝိပတ္တိယာ အနုဒ္ဓံသေတိ, အာပတ္တိ ဒုက္ကဋသ္သ – အနုဝာဒာဓိကရဏပစ္စယာ ဣမာ တိသ္သော အာပတ္တိယော အာပဇ္ဇတိ။
345. Anuvādādhikaraṇaṃ āpattānāpattīti? Anuvādādhikaraṇaṃ na āpatti. Kiṃ pana anuvādādhikaraṇapaccayā āpattiṃ āpajjeyyāti? Āma, anuvādādhikaraṇapaccayā āpattiṃ āpajjeyya. Anuvādādhikaraṇapaccayā, kati āpattiyo āpajjati? Anuvādādhikaraṇapaccayā tisso āpattiyo āpajjati. Bhikkhuṃ amūlakena pārājikena dhammena anuddhaṃseti, āpatti saṅghādisesassa; amūlakena saṅghādisesena anuddhaṃseti, āpatti pācittiyassa; amūlikāya ācāravipattiyā anuddhaṃseti, āpatti dukkaṭassa – anuvādādhikaraṇapaccayā imā tisso āpattiyo āpajjati.
တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? ကတိဟိ အဓိကရဏေဟိ ကတိသု ဌာနေသု ကတိဟိ သမထေဟိ သမ္မန္တိ?
Tā āpattiyo catunnaṃ vipattīnaṃ kati vipattiyo bhajanti? Catunnaṃ adhikaraṇānaṃ katamaṃ adhikaraṇaṃ? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Katihi adhikaraṇehi katisu ṭhānesu katihi samathehi sammanti?
တာ အာပတ္တိယော စတုန္နံ ဝိပတ္တီနံ ဒ္ဝေ ဝိပတ္တိယော ဘဇန္တိ – သိယာ သီလဝိပတ္တိံ, သိယာ အာစာရဝိပတ္တိံ။ စတုန္နံ အဓိကရဏာနံ, အာပတ္တာဓိကရဏံ။ သတ္တန္နံ အာပတ္တိက္ခန္ဓာနံ တီဟိ အာပတ္တိက္ခန္ဓေဟိ သင္ဂဟိတာ – သိယာ သင္ဃာဒိသေသာပတ္တိက္ခန္ဓေန, သိယာ ပာစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌန္တိ။ ယာ တာ အာပတ္တိယော ဂရုကာ တာ အာပတ္တိယော ဧကေန အဓိကရဏေန – ကိစ္စာဓိကရဏေန; ဧကမ္ဟိ ဌာနေ – သင္ဃမဇ္ဈေ; ဒ္ဝီဟိ သမထေဟိ သမ္မန္တိ – သမ္မုခာဝိနယေန စ ပဋိညာတကရဏေန စ။ ယာ တာ အာပတ္တိယော လဟုကာ တာ အာပတ္တိယော ဧကေန အဓိကရဏေန – ကိစ္စာဓိကရဏေန; တီသု ဌာနေသု – သင္ဃမဇ္ဈေ ဂဏမဇ္ဈေ ပုဂ္ဂလသ္သ သန္တိကေ; တီဟိ သမထေဟိ သမ္မန္တိ – သိယာ သမ္မုခာဝိနယေန စ ပဋိညာတကရဏေန စ , သိယာ သမ္မုခာဝိနယေန စ တိဏဝတ္ထာရကေန စ။
Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Catunnaṃ adhikaraṇānaṃ, āpattādhikaraṇaṃ. Sattannaṃ āpattikkhandhānaṃ tīhi āpattikkhandhehi saṅgahitā – siyā saṅghādisesāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ tīhi samuṭṭhānehi samuṭṭhanti. Yā tā āpattiyo garukā tā āpattiyo ekena adhikaraṇena – kiccādhikaraṇena; ekamhi ṭhāne – saṅghamajjhe; dvīhi samathehi sammanti – sammukhāvinayena ca paṭiññātakaraṇena ca. Yā tā āpattiyo lahukā tā āpattiyo ekena adhikaraṇena – kiccādhikaraṇena; tīsu ṭhānesu – saṅghamajjhe gaṇamajjhe puggalassa santike; tīhi samathehi sammanti – siyā sammukhāvinayena ca paṭiññātakaraṇena ca , siyā sammukhāvinayena ca tiṇavatthārakena ca.
၃၄၆. အာပတ္တာဓိကရဏံ အာပတ္တာနာပတ္တီတိ? အာပတ္တာဓိကရဏံ အာပတ္တိ။ ကိံ ပန အာပတ္တာဓိကရဏပစ္စယာ အာပတ္တိံ အာပဇ္ဇေယ္ယာတိ? အာမ, အာပတ္တာဓိကရဏပစ္စယာ အာပတ္တိံ အာပဇ္ဇေယ္ယ။ အာပတ္တာဓိကရဏပစ္စယာ ကတိ အာပတ္တိယော အာပဇ္ဇတိ? အာပတ္တာဓိကရဏပစ္စယာ စတသ္သော အာပတ္တိယော အာပဇ္ဇတိ။ ဘိက္ခုနီ ဇာနံ ပာရာဇိကံ ဓမ္မံ 1 ပဋိစ္ဆာဒေတိ, အာပတ္တိ ပာရာဇိကသ္သ; ဝေမတိကာ ပဋိစ္ဆာဒေတိ, အာပတ္တိ ထုလ္လစ္စယသ္သ; ဘိက္ခု သင္ဃာဒိသေသံ ပဋိစ္ဆာဒေတိ, အာပတ္တိ ပာစိတ္တိယသ္သ; အာစာရဝိပတ္တိံ ပဋိစ္ဆာဒေတိ, အာပတ္တိ ဒုက္ကဋသ္သ – အာပတ္တာဓိကရဏပစ္စယာ ဣမာ စတသ္သော အာပတ္တိယော အာပဇ္ဇတိ။
346. Āpattādhikaraṇaṃ āpattānāpattīti? Āpattādhikaraṇaṃ āpatti. Kiṃ pana āpattādhikaraṇapaccayā āpattiṃ āpajjeyyāti? Āma, āpattādhikaraṇapaccayā āpattiṃ āpajjeyya. Āpattādhikaraṇapaccayā kati āpattiyo āpajjati? Āpattādhikaraṇapaccayā catasso āpattiyo āpajjati. Bhikkhunī jānaṃ pārājikaṃ dhammaṃ 2 paṭicchādeti, āpatti pārājikassa; vematikā paṭicchādeti, āpatti thullaccayassa; bhikkhu saṅghādisesaṃ paṭicchādeti, āpatti pācittiyassa; ācāravipattiṃ paṭicchādeti, āpatti dukkaṭassa – āpattādhikaraṇapaccayā imā catasso āpattiyo āpajjati.
တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ ? ကတိဟိ အဓိကရဏေဟိ ကတိသု ဌာနေသု ကတိဟိ သမထေဟိ သမ္မန္တိ?
Tā āpattiyo catunnaṃ vipattīnaṃ kati vipattiyo bhajanti? Catunnaṃ adhikaraṇānaṃ katamaṃ adhikaraṇaṃ? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti ? Katihi adhikaraṇehi katisu ṭhānesu katihi samathehi sammanti?
တာ အာပတ္တိယော စတုန္နံ ဝိပတ္တီနံ ဒ္ဝေ ဝိပတ္တိယော ဘဇန္တိ – သိယာ သီလဝိပတ္တိံ သိယာ အာစာရဝိပတ္တိံ။ စတုန္နံ အဓိကရဏာနံ – အာပတ္တာဓိကရဏံ။ သတ္တန္နံ အာပတ္တိက္ခန္ဓာနံ စတူဟိ အာပတ္တိက္ခန္ဓေဟိ သင္ဂဟိတာ – သိယာ ပာရာဇိကာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ပာစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ ဝာစတော စ စိတ္တတော စ သမုဋ္ဌန္တိ။ ယာ သာ အာပတ္တိ အနဝသေသာ သာ အာပတ္တိ န ကတမေန အဓိကရဏေန, န ကတမမ္ဟိ ဌာနေ, န ကတမေန သမထေန သမ္မတိ။ ယာ တာ အာပတ္တိယော လဟုကာ တာ အာပတ္တိယော ဧကေန အဓိကရဏေန – ကိစ္စာဓိကရဏေန; တီသု ဌာနေသု – သင္ဃမဇ္ဈေ, ဂဏမဇ္ဈေ, ပုဂ္ဂလသ္သ သန္တိကေ; တီဟိ သမထေဟိ သမ္မန္တိ – သိယာ သမ္မုခာဝိနယေန စ ပဋိညာတကရဏေန စ, သိယာ သမ္မုခာဝိနယေန စ တိဏဝတ္ထာရကေန စ။
Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ siyā ācāravipattiṃ. Catunnaṃ adhikaraṇānaṃ – āpattādhikaraṇaṃ. Sattannaṃ āpattikkhandhānaṃ catūhi āpattikkhandhehi saṅgahitā – siyā pārājikāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca vācato ca cittato ca samuṭṭhanti. Yā sā āpatti anavasesā sā āpatti na katamena adhikaraṇena, na katamamhi ṭhāne, na katamena samathena sammati. Yā tā āpattiyo lahukā tā āpattiyo ekena adhikaraṇena – kiccādhikaraṇena; tīsu ṭhānesu – saṅghamajjhe, gaṇamajjhe, puggalassa santike; tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
၃၄၇. ကိစ္စာဓိကရဏံ အာပတ္တာနာပတ္တီတိ? ကိစ္စာဓိကရဏံ န အာပတ္တိ။ ကိံ ပန ကိစ္စာဓိကရဏပစ္စယာ အာပတ္တိံ အာပဇ္ဇေယ္ယာတိ? အာမ, ကိစ္စာဓိကရဏပစ္စယာ အာပတ္တိံ အာပဇ္ဇေယ္ယ။ ကိစ္စာဓိကရဏပစ္စယာ ကတိ အာပတ္တိယော အာပဇ္ဇတိ? ကိစ္စာဓိကရဏပစ္စယာ ပဉ္စ အာပတ္တိယော အာပဇ္ဇတိ။ ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိသ္သဇ္ဇတိ, ဉတ္တိယာ ဒုက္ကဋံ; ဒ္ဝီဟိ ကမ္မဝာစာဟိ ထုလ္လစ္စယာ; ကမ္မဝာစာပရိယောသာနေ အာပတ္တိ ပာရာဇိကသ္သ; ဘေဒကာနုဝတ္တကာ ဘိက္ခူ ယာဝတတိယံ သမနုဘာသနာယ န ပဋိနိသ္သဇ္ဇန္တိ, အာပတ္တိ သင္ဃာဒိသေသသ္သ; ပာပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိသ္သဇ္ဇန္တိ, အာပတ္တိ ပာစိတ္တိယသ္သ – ကိစ္စာဓိကရဏပစ္စယာ ဣမာ ပဉ္စ အာပတ္တိယော အာပဇ္ဇတိ။
347. Kiccādhikaraṇaṃ āpattānāpattīti? Kiccādhikaraṇaṃ na āpatti. Kiṃ pana kiccādhikaraṇapaccayā āpattiṃ āpajjeyyāti? Āma, kiccādhikaraṇapaccayā āpattiṃ āpajjeyya. Kiccādhikaraṇapaccayā kati āpattiyo āpajjati? Kiccādhikaraṇapaccayā pañca āpattiyo āpajjati. Ukkhittānuvattikā bhikkhunī yāvatatiyaṃ samanubhāsanāya na paṭinissajjati, ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti pārājikassa; bhedakānuvattakā bhikkhū yāvatatiyaṃ samanubhāsanāya na paṭinissajjanti, āpatti saṅghādisesassa; pāpikāya diṭṭhiyā yāvatatiyaṃ samanubhāsanāya na paṭinissajjanti, āpatti pācittiyassa – kiccādhikaraṇapaccayā imā pañca āpattiyo āpajjati.
တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? ကတိဟိ အဓိကရဏေဟိ ကတိသု ဌာနေသု ကတိဟိ သမထေဟိ သမ္မန္တိ?
Tā āpattiyo catunnaṃ vipattīnaṃ kati vipattiyo bhajanti? Catunnaṃ adhikaraṇānaṃ katamaṃ adhikaraṇaṃ? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Katihi adhikaraṇehi katisu ṭhānesu katihi samathehi sammanti?
တာ အာပတ္တိယော စတုန္နံ ဝိပတ္တီနံ ဒ္ဝေ ဝိပတ္တိယော ဘဇန္တိ – သိယာ သီလဝိပတ္တိံ သိယာ အာစာရဝိပတ္တိံ။ စတုန္နံ အဓိကရဏာနံ – အာပတ္တာဓိကရဏံ။ သတ္တန္နံ အာပတ္တိက္ခန္ဓာနံ ပဉ္စဟိ အာပတ္တိက္ခန္ဓေဟိ သင္ဂဟိတာ – သိယာ ပာရာဇိကာပတ္တိက္ခန္ဓေန, သိယာ သင္ဃာဒိသေသာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ပာစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ ဝာစတော စ စိတ္တတော စ သမုဋ္ဌန္တိ။ ယာ သာ အာပတ္တိ အနဝသေသာ သာ အာပတ္တိ န ကတမေန အဓိကရဏေန, န ကတမမ္ဟိ ဌာနေ, န ကတမေန သမထေန သမ္မတိ။ ယာ သာ အာပတ္တိ ဂရုကာ သာ အာပတ္တိ ဧကေန အဓိကရဏေန – ကိစ္စာဓိကရဏေန; ဧကမ္ဟိ ဌာနေ – သင္ဃမဇ္ဈေ; ဒ္ဝီဟိ သမထေဟိ သမ္မတိ – သမ္မုခာဝိနယေန စ ပဋိညာတကရဏေန စ။ ယာ တာ အာပတ္တိယော လဟုကာ တာ အာပတ္တိယော ဧကေန အဓိကရဏေန – ကိစ္စာဓိကရဏေန; တီသု ဌာနေသု – သင္ဃမဇ္ဈေ, ဂဏမဇ္ဈေ, ပုဂ္ဂလသ္သ သန္တိကေ; တီဟိ သမထေဟိ သမ္မန္တိ – သိယာ သမ္မုခာဝိနယေန စ ပဋိညာတကရဏေန စ, သိယာ သမ္မုခာဝိနယေန စ တိဏဝတ္ထာရကေန စ။
Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ siyā ācāravipattiṃ. Catunnaṃ adhikaraṇānaṃ – āpattādhikaraṇaṃ. Sattannaṃ āpattikkhandhānaṃ pañcahi āpattikkhandhehi saṅgahitā – siyā pārājikāpattikkhandhena, siyā saṅghādisesāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca vācato ca cittato ca samuṭṭhanti. Yā sā āpatti anavasesā sā āpatti na katamena adhikaraṇena, na katamamhi ṭhāne, na katamena samathena sammati. Yā sā āpatti garukā sā āpatti ekena adhikaraṇena – kiccādhikaraṇena; ekamhi ṭhāne – saṅghamajjhe; dvīhi samathehi sammati – sammukhāvinayena ca paṭiññātakaraṇena ca. Yā tā āpattiyo lahukā tā āpattiyo ekena adhikaraṇena – kiccādhikaraṇena; tīsu ṭhānesu – saṅghamajjhe, gaṇamajjhe, puggalassa santike; tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / အဓိကရဏနိဒာနာဒိဝဏ္ဏနာ • Adhikaraṇanidānādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အဓိကရဏဘေဒဝဏ္ဏနာ • Adhikaraṇabhedavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အဓိကရဏနိဒာနာဒိဝဏ္ဏနာ • Adhikaraṇanidānādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အဓိကရဏနိဒာနာဒိဝဏ္ဏနာ • Adhikaraṇanidānādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / အဓိကရဏနိဒာနာဒိဝဏ္ဏနာ • Adhikaraṇanidānādivaṇṇanā
