| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༤. ཨདྷིཀརཎཔཙྩཡཱཔཏྟི
4. Adhikaraṇapaccayāpatti
༣༤༤. ཝིཝཱདཱདྷིཀརཎཾ ཨཱཔཏྟཱནཱཔཏྟཱིཏི? ཝིཝཱདཱདྷིཀརཎཾ ན ཨཱཔཏྟི། ཀིཾ པན ཝིཝཱདཱདྷིཀརཎཔཙྩཡཱ ཨཱཔཏྟིཾ ཨཱཔཛྫེཡྻཱཏི? ཨཱམ, ཝིཝཱདཱདྷིཀརཎཔཙྩཡཱ ཨཱཔཏྟིཾ ཨཱཔཛྫེཡྻ། ཝིཝཱདཱདྷིཀརཎཔཙྩཡཱ ཀཏི ཨཱཔཏྟིཡོ ཨཱཔཛྫཏི? ཝིཝཱདཱདྷིཀརཎཔཙྩཡཱ དྭེ ཨཱཔཏྟིཡོ ཨཱཔཛྫཏི། ཨུཔསམྤནྣཾ ཨོམསཏི, ཨཱཔཏྟི པཱཙིཏྟིཡསྶ; ཨནུཔསམྤནྣཾ ཨོམསཏི, ཨཱཔཏྟི དུཀྐཊསྶ – ཝིཝཱདཱདྷིཀརཎཔཙྩཡཱ ཨིམཱ དྭེ ཨཱཔཏྟིཡོ ཨཱཔཛྫཏི།
344. Vivādādhikaraṇaṃ āpattānāpattīti? Vivādādhikaraṇaṃ na āpatti. Kiṃ pana vivādādhikaraṇapaccayā āpattiṃ āpajjeyyāti? Āma, vivādādhikaraṇapaccayā āpattiṃ āpajjeyya. Vivādādhikaraṇapaccayā kati āpattiyo āpajjati? Vivādādhikaraṇapaccayā dve āpattiyo āpajjati. Upasampannaṃ omasati, āpatti pācittiyassa; anupasampannaṃ omasati, āpatti dukkaṭassa – vivādādhikaraṇapaccayā imā dve āpattiyo āpajjati.
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི? ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ? སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ? ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛནྟི? ཀཏིཧི ཨདྷིཀརཎེཧི ཀཏིསུ ཋཱནེསུ ཀཏིཧི སམཐེཧི སམྨནྟི?
Tā āpattiyo catunnaṃ vipattīnaṃ kati vipattiyo bhajanti? Catunnaṃ adhikaraṇānaṃ katamaṃ adhikaraṇaṃ? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Katihi adhikaraṇehi katisu ṭhānesu katihi samathehi sammanti?
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཨེཀཾ ཝིཔཏྟིཾ བྷཛནྟི – ཨཱཙཱརཝིཔཏྟིཾ། ཙཏུནྣཾ ཨདྷིཀརཎཱནཾ , ཨཱཔཏྟཱདྷིཀརཎཾ། སཏྟནྣཾ ཨཱཔཏྟིཀྑནྡྷཱནཾ དྭཱིཧི ཨཱཔཏྟིཀྑནྡྷེཧི སངྒཧིཏཱ – སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཏཱིཧི སམུཊྛཱནེཧི སམུཊྛནྟི། ཨེཀེན ཨདྷིཀརཎེན – ཀིཙྩཱདྷིཀརཎེན; ཏཱིསུ ཋཱནེསུ – སངྒྷམཛ྄ཛྷེ, གཎམཛ྄ཛྷེ, པུགྒལསྶ སནྟིཀེ; ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ།
Tā āpattiyo catunnaṃ vipattīnaṃ ekaṃ vipattiṃ bhajanti – ācāravipattiṃ. Catunnaṃ adhikaraṇānaṃ , āpattādhikaraṇaṃ. Sattannaṃ āpattikkhandhānaṃ dvīhi āpattikkhandhehi saṅgahitā – siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ tīhi samuṭṭhānehi samuṭṭhanti. Ekena adhikaraṇena – kiccādhikaraṇena; tīsu ṭhānesu – saṅghamajjhe, gaṇamajjhe, puggalassa santike; tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
༣༤༥. ཨནུཝཱདཱདྷིཀརཎཾ ཨཱཔཏྟཱནཱཔཏྟཱིཏི? ཨནུཝཱདཱདྷིཀརཎཾ ན ཨཱཔཏྟི། ཀིཾ པན ཨནུཝཱདཱདྷིཀརཎཔཙྩཡཱ ཨཱཔཏྟིཾ ཨཱཔཛྫེཡྻཱཏི? ཨཱམ, ཨནུཝཱདཱདྷིཀརཎཔཙྩཡཱ ཨཱཔཏྟིཾ ཨཱཔཛྫེཡྻ། ཨནུཝཱདཱདྷིཀརཎཔཙྩཡཱ, ཀཏི ཨཱཔཏྟིཡོ ཨཱཔཛྫཏི? ཨནུཝཱདཱདྷིཀརཎཔཙྩཡཱ ཏིསྶོ ཨཱཔཏྟིཡོ ཨཱཔཛྫཏི། བྷིཀྑུཾ ཨམཱུལཀེན པཱརཱཛིཀེན དྷམྨེན ཨནུདྡྷཾསེཏི, ཨཱཔཏྟི སངྒྷཱདིསེསསྶ; ཨམཱུལཀེན སངྒྷཱདིསེསེན ཨནུདྡྷཾསེཏི, ཨཱཔཏྟི པཱཙིཏྟིཡསྶ; ཨམཱུལིཀཱཡ ཨཱཙཱརཝིཔཏྟིཡཱ ཨནུདྡྷཾསེཏི, ཨཱཔཏྟི དུཀྐཊསྶ – ཨནུཝཱདཱདྷིཀརཎཔཙྩཡཱ ཨིམཱ ཏིསྶོ ཨཱཔཏྟིཡོ ཨཱཔཛྫཏི།
345. Anuvādādhikaraṇaṃ āpattānāpattīti? Anuvādādhikaraṇaṃ na āpatti. Kiṃ pana anuvādādhikaraṇapaccayā āpattiṃ āpajjeyyāti? Āma, anuvādādhikaraṇapaccayā āpattiṃ āpajjeyya. Anuvādādhikaraṇapaccayā, kati āpattiyo āpajjati? Anuvādādhikaraṇapaccayā tisso āpattiyo āpajjati. Bhikkhuṃ amūlakena pārājikena dhammena anuddhaṃseti, āpatti saṅghādisesassa; amūlakena saṅghādisesena anuddhaṃseti, āpatti pācittiyassa; amūlikāya ācāravipattiyā anuddhaṃseti, āpatti dukkaṭassa – anuvādādhikaraṇapaccayā imā tisso āpattiyo āpajjati.
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི? ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ? སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ? ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛནྟི? ཀཏིཧི ཨདྷིཀརཎེཧི ཀཏིསུ ཋཱནེསུ ཀཏིཧི སམཐེཧི སམྨནྟི?
Tā āpattiyo catunnaṃ vipattīnaṃ kati vipattiyo bhajanti? Catunnaṃ adhikaraṇānaṃ katamaṃ adhikaraṇaṃ? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Katihi adhikaraṇehi katisu ṭhānesu katihi samathehi sammanti?
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ དྭེ ཝིཔཏྟིཡོ བྷཛནྟི – སིཡཱ སཱིལཝིཔཏྟིཾ, སིཡཱ ཨཱཙཱརཝིཔཏྟིཾ། ཙཏུནྣཾ ཨདྷིཀརཎཱནཾ, ཨཱཔཏྟཱདྷིཀརཎཾ། སཏྟནྣཾ ཨཱཔཏྟིཀྑནྡྷཱནཾ ཏཱིཧི ཨཱཔཏྟིཀྑནྡྷེཧི སངྒཧིཏཱ – སིཡཱ སངྒྷཱདིསེསཱཔཏྟིཀྑནྡྷེན, སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཏཱིཧི སམུཊྛཱནེཧི སམུཊྛནྟི། ཡཱ ཏཱ ཨཱཔཏྟིཡོ གརུཀཱ ཏཱ ཨཱཔཏྟིཡོ ཨེཀེན ཨདྷིཀརཎེན – ཀིཙྩཱདྷིཀརཎེན; ཨེཀམྷི ཋཱནེ – སངྒྷམཛ྄ཛྷེ; དྭཱིཧི སམཐེཧི སམྨནྟི – སམྨུཁཱཝིནཡེན ཙ པཊིཉྙཱཏཀརཎེན ཙ། ཡཱ ཏཱ ཨཱཔཏྟིཡོ ལཧུཀཱ ཏཱ ཨཱཔཏྟིཡོ ཨེཀེན ཨདྷིཀརཎེན – ཀིཙྩཱདྷིཀརཎེན; ཏཱིསུ ཋཱནེསུ – སངྒྷམཛ྄ཛྷེ གཎམཛ྄ཛྷེ པུགྒལསྶ སནྟིཀེ; ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ , སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ།
Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Catunnaṃ adhikaraṇānaṃ, āpattādhikaraṇaṃ. Sattannaṃ āpattikkhandhānaṃ tīhi āpattikkhandhehi saṅgahitā – siyā saṅghādisesāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ tīhi samuṭṭhānehi samuṭṭhanti. Yā tā āpattiyo garukā tā āpattiyo ekena adhikaraṇena – kiccādhikaraṇena; ekamhi ṭhāne – saṅghamajjhe; dvīhi samathehi sammanti – sammukhāvinayena ca paṭiññātakaraṇena ca. Yā tā āpattiyo lahukā tā āpattiyo ekena adhikaraṇena – kiccādhikaraṇena; tīsu ṭhānesu – saṅghamajjhe gaṇamajjhe puggalassa santike; tīhi samathehi sammanti – siyā sammukhāvinayena ca paṭiññātakaraṇena ca , siyā sammukhāvinayena ca tiṇavatthārakena ca.
༣༤༦. ཨཱཔཏྟཱདྷིཀརཎཾ ཨཱཔཏྟཱནཱཔཏྟཱིཏི? ཨཱཔཏྟཱདྷིཀརཎཾ ཨཱཔཏྟི། ཀིཾ པན ཨཱཔཏྟཱདྷིཀརཎཔཙྩཡཱ ཨཱཔཏྟིཾ ཨཱཔཛྫེཡྻཱཏི? ཨཱམ, ཨཱཔཏྟཱདྷིཀརཎཔཙྩཡཱ ཨཱཔཏྟིཾ ཨཱཔཛྫེཡྻ། ཨཱཔཏྟཱདྷིཀརཎཔཙྩཡཱ ཀཏི ཨཱཔཏྟིཡོ ཨཱཔཛྫཏི? ཨཱཔཏྟཱདྷིཀརཎཔཙྩཡཱ ཙཏསྶོ ཨཱཔཏྟིཡོ ཨཱཔཛྫཏི། བྷིཀྑུནཱི ཛཱནཾ པཱརཱཛིཀཾ དྷམྨཾ 1 པཊིཙྪཱདེཏི, ཨཱཔཏྟི པཱརཱཛིཀསྶ; ཝེམཏིཀཱ པཊིཙྪཱདེཏི, ཨཱཔཏྟི ཐུལླཙྩཡསྶ; བྷིཀྑུ སངྒྷཱདིསེསཾ པཊིཙྪཱདེཏི, ཨཱཔཏྟི པཱཙིཏྟིཡསྶ; ཨཱཙཱརཝིཔཏྟིཾ པཊིཙྪཱདེཏི, ཨཱཔཏྟི དུཀྐཊསྶ – ཨཱཔཏྟཱདྷིཀརཎཔཙྩཡཱ ཨིམཱ ཙཏསྶོ ཨཱཔཏྟིཡོ ཨཱཔཛྫཏི།
346. Āpattādhikaraṇaṃ āpattānāpattīti? Āpattādhikaraṇaṃ āpatti. Kiṃ pana āpattādhikaraṇapaccayā āpattiṃ āpajjeyyāti? Āma, āpattādhikaraṇapaccayā āpattiṃ āpajjeyya. Āpattādhikaraṇapaccayā kati āpattiyo āpajjati? Āpattādhikaraṇapaccayā catasso āpattiyo āpajjati. Bhikkhunī jānaṃ pārājikaṃ dhammaṃ 2 paṭicchādeti, āpatti pārājikassa; vematikā paṭicchādeti, āpatti thullaccayassa; bhikkhu saṅghādisesaṃ paṭicchādeti, āpatti pācittiyassa; ācāravipattiṃ paṭicchādeti, āpatti dukkaṭassa – āpattādhikaraṇapaccayā imā catasso āpattiyo āpajjati.
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི? ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ? སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ? ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛནྟི ? ཀཏིཧི ཨདྷིཀརཎེཧི ཀཏིསུ ཋཱནེསུ ཀཏིཧི སམཐེཧི སམྨནྟི?
Tā āpattiyo catunnaṃ vipattīnaṃ kati vipattiyo bhajanti? Catunnaṃ adhikaraṇānaṃ katamaṃ adhikaraṇaṃ? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti ? Katihi adhikaraṇehi katisu ṭhānesu katihi samathehi sammanti?
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ དྭེ ཝིཔཏྟིཡོ བྷཛནྟི – སིཡཱ སཱིལཝིཔཏྟིཾ སིཡཱ ཨཱཙཱརཝིཔཏྟིཾ། ཙཏུནྣཾ ཨདྷིཀརཎཱནཾ – ཨཱཔཏྟཱདྷིཀརཎཾ། སཏྟནྣཾ ཨཱཔཏྟིཀྑནྡྷཱནཾ ཙཏཱུཧི ཨཱཔཏྟིཀྑནྡྷེཧི སངྒཧིཏཱ – སིཡཱ པཱརཱཛིཀཱཔཏྟིཀྑནྡྷེན, སིཡཱ ཐུལླཙྩཡཱཔཏྟིཀྑནྡྷེན, སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛནྟི – ཀཱཡཏོ ཙ ཝཱཙཏོ ཙ ཙིཏྟཏོ ཙ སམུཊྛནྟི། ཡཱ སཱ ཨཱཔཏྟི ཨནཝསེསཱ སཱ ཨཱཔཏྟི ན ཀཏམེན ཨདྷིཀརཎེན, ན ཀཏམམྷི ཋཱནེ, ན ཀཏམེན སམཐེན སམྨཏི། ཡཱ ཏཱ ཨཱཔཏྟིཡོ ལཧུཀཱ ཏཱ ཨཱཔཏྟིཡོ ཨེཀེན ཨདྷིཀརཎེན – ཀིཙྩཱདྷིཀརཎེན; ཏཱིསུ ཋཱནེསུ – སངྒྷམཛ྄ཛྷེ, གཎམཛ྄ཛྷེ, པུགྒལསྶ སནྟིཀེ; ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ།
Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ siyā ācāravipattiṃ. Catunnaṃ adhikaraṇānaṃ – āpattādhikaraṇaṃ. Sattannaṃ āpattikkhandhānaṃ catūhi āpattikkhandhehi saṅgahitā – siyā pārājikāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca vācato ca cittato ca samuṭṭhanti. Yā sā āpatti anavasesā sā āpatti na katamena adhikaraṇena, na katamamhi ṭhāne, na katamena samathena sammati. Yā tā āpattiyo lahukā tā āpattiyo ekena adhikaraṇena – kiccādhikaraṇena; tīsu ṭhānesu – saṅghamajjhe, gaṇamajjhe, puggalassa santike; tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
༣༤༧. ཀིཙྩཱདྷིཀརཎཾ ཨཱཔཏྟཱནཱཔཏྟཱིཏི? ཀིཙྩཱདྷིཀརཎཾ ན ཨཱཔཏྟི། ཀིཾ པན ཀིཙྩཱདྷིཀརཎཔཙྩཡཱ ཨཱཔཏྟིཾ ཨཱཔཛྫེཡྻཱཏི? ཨཱམ, ཀིཙྩཱདྷིཀརཎཔཙྩཡཱ ཨཱཔཏྟིཾ ཨཱཔཛྫེཡྻ། ཀིཙྩཱདྷིཀརཎཔཙྩཡཱ ཀཏི ཨཱཔཏྟིཡོ ཨཱཔཛྫཏི? ཀིཙྩཱདྷིཀརཎཔཙྩཡཱ པཉྩ ཨཱཔཏྟིཡོ ཨཱཔཛྫཏི། ཨུཀྑིཏྟཱནུཝཏྟིཀཱ བྷིཀྑུནཱི ཡཱཝཏཏིཡཾ སམནུབྷཱསནཱཡ ན པཊིནིསྶཛྫཏི, ཉཏྟིཡཱ དུཀྐཊཾ; དྭཱིཧི ཀམྨཝཱཙཱཧི ཐུལླཙྩཡཱ; ཀམྨཝཱཙཱཔརིཡོསཱནེ ཨཱཔཏྟི པཱརཱཛིཀསྶ; བྷེདཀཱནུཝཏྟཀཱ བྷིཀྑཱུ ཡཱཝཏཏིཡཾ སམནུབྷཱསནཱཡ ན པཊིནིསྶཛྫནྟི, ཨཱཔཏྟི སངྒྷཱདིསེསསྶ; པཱཔིཀཱཡ དིཊྛིཡཱ ཡཱཝཏཏིཡཾ སམནུབྷཱསནཱཡ ན པཊིནིསྶཛྫནྟི, ཨཱཔཏྟི པཱཙིཏྟིཡསྶ – ཀིཙྩཱདྷིཀརཎཔཙྩཡཱ ཨིམཱ པཉྩ ཨཱཔཏྟིཡོ ཨཱཔཛྫཏི།
347. Kiccādhikaraṇaṃ āpattānāpattīti? Kiccādhikaraṇaṃ na āpatti. Kiṃ pana kiccādhikaraṇapaccayā āpattiṃ āpajjeyyāti? Āma, kiccādhikaraṇapaccayā āpattiṃ āpajjeyya. Kiccādhikaraṇapaccayā kati āpattiyo āpajjati? Kiccādhikaraṇapaccayā pañca āpattiyo āpajjati. Ukkhittānuvattikā bhikkhunī yāvatatiyaṃ samanubhāsanāya na paṭinissajjati, ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti pārājikassa; bhedakānuvattakā bhikkhū yāvatatiyaṃ samanubhāsanāya na paṭinissajjanti, āpatti saṅghādisesassa; pāpikāya diṭṭhiyā yāvatatiyaṃ samanubhāsanāya na paṭinissajjanti, āpatti pācittiyassa – kiccādhikaraṇapaccayā imā pañca āpattiyo āpajjati.
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི? ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ? སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ? ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛནྟི? ཀཏིཧི ཨདྷིཀརཎེཧི ཀཏིསུ ཋཱནེསུ ཀཏིཧི སམཐེཧི སམྨནྟི?
Tā āpattiyo catunnaṃ vipattīnaṃ kati vipattiyo bhajanti? Catunnaṃ adhikaraṇānaṃ katamaṃ adhikaraṇaṃ? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Katihi adhikaraṇehi katisu ṭhānesu katihi samathehi sammanti?
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ དྭེ ཝིཔཏྟིཡོ བྷཛནྟི – སིཡཱ སཱིལཝིཔཏྟིཾ སིཡཱ ཨཱཙཱརཝིཔཏྟིཾ། ཙཏུནྣཾ ཨདྷིཀརཎཱནཾ – ཨཱཔཏྟཱདྷིཀརཎཾ། སཏྟནྣཾ ཨཱཔཏྟིཀྑནྡྷཱནཾ པཉྩཧི ཨཱཔཏྟིཀྑནྡྷེཧི སངྒཧིཏཱ – སིཡཱ པཱརཱཛིཀཱཔཏྟིཀྑནྡྷེན, སིཡཱ སངྒྷཱདིསེསཱཔཏྟིཀྑནྡྷེན, སིཡཱ ཐུལླཙྩཡཱཔཏྟིཀྑནྡྷེན, སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛནྟི – ཀཱཡཏོ ཙ ཝཱཙཏོ ཙ ཙིཏྟཏོ ཙ སམུཊྛནྟི། ཡཱ སཱ ཨཱཔཏྟི ཨནཝསེསཱ སཱ ཨཱཔཏྟི ན ཀཏམེན ཨདྷིཀརཎེན, ན ཀཏམམྷི ཋཱནེ, ན ཀཏམེན སམཐེན སམྨཏི། ཡཱ སཱ ཨཱཔཏྟི གརུཀཱ སཱ ཨཱཔཏྟི ཨེཀེན ཨདྷིཀརཎེན – ཀིཙྩཱདྷིཀརཎེན; ཨེཀམྷི ཋཱནེ – སངྒྷམཛ྄ཛྷེ; དྭཱིཧི སམཐེཧི སམྨཏི – སམྨུཁཱཝིནཡེན ཙ པཊིཉྙཱཏཀརཎེན ཙ། ཡཱ ཏཱ ཨཱཔཏྟིཡོ ལཧུཀཱ ཏཱ ཨཱཔཏྟིཡོ ཨེཀེན ཨདྷིཀརཎེན – ཀིཙྩཱདྷིཀརཎེན; ཏཱིསུ ཋཱནེསུ – སངྒྷམཛ྄ཛྷེ, གཎམཛ྄ཛྷེ, པུགྒལསྶ སནྟིཀེ; ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ།
Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ siyā ācāravipattiṃ. Catunnaṃ adhikaraṇānaṃ – āpattādhikaraṇaṃ. Sattannaṃ āpattikkhandhānaṃ pañcahi āpattikkhandhehi saṅgahitā – siyā pārājikāpattikkhandhena, siyā saṅghādisesāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca vācato ca cittato ca samuṭṭhanti. Yā sā āpatti anavasesā sā āpatti na katamena adhikaraṇena, na katamamhi ṭhāne, na katamena samathena sammati. Yā sā āpatti garukā sā āpatti ekena adhikaraṇena – kiccādhikaraṇena; ekamhi ṭhāne – saṅghamajjhe; dvīhi samathehi sammati – sammukhāvinayena ca paṭiññātakaraṇena ca. Yā tā āpattiyo lahukā tā āpattiyo ekena adhikaraṇena – kiccādhikaraṇena; tīsu ṭhānesu – saṅghamajjhe, gaṇamajjhe, puggalassa santike; tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཨདྷིཀརཎནིདཱནཱདིཝཎྞནཱ • Adhikaraṇanidānādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨདྷིཀརཎབྷེདཝཎྞནཱ • Adhikaraṇabhedavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨདྷིཀརཎནིདཱནཱདིཝཎྞནཱ • Adhikaraṇanidānādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨདྷིཀརཎནིདཱནཱདིཝཎྞནཱ • Adhikaraṇanidānādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨདྷིཀརཎནིདཱནཱདིཝཎྞནཱ • Adhikaraṇanidānādivaṇṇanā
