Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi

    ༥. ཨདྷིཀརཎཔཙྩཡཝཱརོ

    5. Adhikaraṇapaccayavāro

    ༢༨༨. ཝིཝཱདཱདྷིཀརཎཔཙྩཡཱ ཀཏི ཨཱཔཏྟིཡོ ཨཱཔཛྫཏི? ཝིཝཱདཱདྷིཀརཎཔཙྩཡཱ དྭེ ཨཱཔཏྟིཡོ ཨཱཔཛྫཏི – ཨུཔསམྤནྣཾ ཨོམསཏི, ཨཱཔཏྟི པཱཙིཏྟིཡསྶ; ཨནུཔསམྤནྣཾ ཨོམསཏི, ཨཱཔཏྟི དུཀྐཊསྶ – ཝིཝཱདཱདྷིཀརཎཔཙྩཡཱ ཨིམཱ དྭེ ཨཱཔཏྟིཡོ ཨཱཔཛྫཏི།

    288. Vivādādhikaraṇapaccayā kati āpattiyo āpajjati? Vivādādhikaraṇapaccayā dve āpattiyo āpajjati – upasampannaṃ omasati, āpatti pācittiyassa; anupasampannaṃ omasati, āpatti dukkaṭassa – vivādādhikaraṇapaccayā imā dve āpattiyo āpajjati.

    ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི…པེ॰… སཏྟནྣཾ སམཐཱནཾ ཀཏིཧི སམཐེཧི སམྨནྟི? ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཨེཀཾ ཝིཔཏྟིཾ བྷཛནྟི – ཨཱཙཱརཝིཔཏྟིཾ། སཏྟནྣཾ ཨཱཔཏྟིཀྑནྡྷཱནཾ དྭཱིཧི ཨཱཔཏྟིཀྑནྡྷེཧི སངྒཧིཏཱ – སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཏཱིཧི སམུཊྛཱནེཧི སམུཊྛནྟི – སིཡཱ ཀཱཡཏོ ཙ ཙིཏྟཏོ ཙ སམུཊྛནྟི, ན ཝཱཙཏོ; སིཡཱ ཝཱཙཏོ ཙ ཙིཏྟཏོ ཙ སམུཊྛནྟི, ན ཀཱཡཏོ; སིཡཱ ཀཱཡཏོ ཙ ཝཱཙཏོ ཙ ཙིཏྟཏོ ཙ སམུཊྛནྟི། ཙཏུནྣཾ ཨདྷིཀརཎཱནཾ, ཨཱཔཏྟཱདྷིཀརཎཾ། སཏྟནྣཾ སམཐཱནཾ ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ།

    Tā āpattiyo catunnaṃ vipattīnaṃ kati vipattiyo bhajanti…pe… sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ ekaṃ vipattiṃ bhajanti – ācāravipattiṃ. Sattannaṃ āpattikkhandhānaṃ dvīhi āpattikkhandhehi saṅgahitā – siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ tīhi samuṭṭhānehi samuṭṭhanti – siyā kāyato ca cittato ca samuṭṭhanti, na vācato; siyā vācato ca cittato ca samuṭṭhanti, na kāyato; siyā kāyato ca vācato ca cittato ca samuṭṭhanti. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.

    ༢༨༩. ཨནུཝཱདཱདྷིཀརཎཔཙྩཡཱ ཀཏི ཨཱཔཏྟིཡོ ཨཱཔཛྫཏི? ཨནུཝཱདཱདྷིཀརཎཔཙྩཡཱ ཏིསྶོ ཨཱཔཏྟིཡོ ཨཱཔཛྫཏི། བྷིཀྑུཾ ཨམཱུལཀེན པཱརཱཛིཀེན དྷམྨེན ཨནུདྡྷཾསེཏི, ཨཱཔཏྟི སངྒྷཱདིསེསསྶ; ཨམཱུལཀེན སངྒྷཱདིསེསེན ཨནུདྡྷཾསེཏི, ཨཱཔཏྟི པཱཙིཏྟིཡསྶ; ཨམཱུལིཀཱཡ ཨཱཙཱརཝིཔཏྟིཡཱ ཨནུདྡྷཾསེཏི, ཨཱཔཏྟི དུཀྐཊསྶ – ཨནུཝཱདཱདྷིཀརཎཔཙྩཡཱ ཨིམཱ ཏིསྶོ ཨཱཔཏྟིཡོ ཨཱཔཛྫཏི།

    289. Anuvādādhikaraṇapaccayā kati āpattiyo āpajjati? Anuvādādhikaraṇapaccayā tisso āpattiyo āpajjati. Bhikkhuṃ amūlakena pārājikena dhammena anuddhaṃseti, āpatti saṅghādisesassa; amūlakena saṅghādisesena anuddhaṃseti, āpatti pācittiyassa; amūlikāya ācāravipattiyā anuddhaṃseti, āpatti dukkaṭassa – anuvādādhikaraṇapaccayā imā tisso āpattiyo āpajjati.

    ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི…པེ॰… སཏྟནྣཾ སམཐཱནཾ ཀཏིཧི སམཐེཧི སམྨནྟི? ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ དྭེ ཝིཔཏྟིཡོ བྷཛནྟི – སིཡཱ སཱིལཝིཔཏྟིཾ, སིཡཱ ཨཱཙཱརཝིཔཏྟིཾ། སཏྟནྣཾ ཨཱཔཏྟིཀྑནྡྷཱནཾ ཏཱིཧི ཨཱཔཏྟིཀྑནྡྷེཧི སངྒཧིཏཱ – སིཡཱ སངྒྷཱདིསེསཱཔཏྟིཀྑནྡྷེན, སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན ། ཚནྣཾ ཨཱཔཏྟིསམུཊྛཱནཱནཾ ཏཱིཧི སམུཊྛཱནེཧི སམུཊྛནྟི – སིཡཱ ཀཱཡཏོ ཙ ཙིཏྟཏོ ཙ སམུཊྛནྟི, ན ཝཱཙཏོ; སིཡཱ ཝཱཙཏོ ཙ ཙིཏྟཏོ ཙ སམུཊྛནྟི, ན ཀཱཡཏོ; སིཡཱ ཀཱཡཏོ ཙ ཝཱཙཏོ ཙ ཙིཏྟཏོ ཙ སམུཊྛནྟི། ཙཏུནྣཾ ཨདྷིཀརཎཱནཾ, ཨཱཔཏྟཱདྷིཀརཎཾ། སཏྟནྣཾ སམཐཱནཾ ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ།

    Tā āpattiyo catunnaṃ vipattīnaṃ kati vipattiyo bhajanti…pe… sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Sattannaṃ āpattikkhandhānaṃ tīhi āpattikkhandhehi saṅgahitā – siyā saṅghādisesāpattikkhandhena, siyā pācittiyāpattikkhandhena, siyā dukkaṭāpattikkhandhena . Channaṃ āpattisamuṭṭhānānaṃ tīhi samuṭṭhānehi samuṭṭhanti – siyā kāyato ca cittato ca samuṭṭhanti, na vācato; siyā vācato ca cittato ca samuṭṭhanti, na kāyato; siyā kāyato ca vācato ca cittato ca samuṭṭhanti. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.

    ༢༩༠. ཨཱཔཏྟཱདྷིཀརཎཔཙྩཡཱ ཀཏི ཨཱཔཏྟིཡོ ཨཱཔཛྫཏི? ཨཱཔཏྟཱདྷིཀརཎཔཙྩཡཱ ཙཏསྶོ ཨཱཔཏྟིཡོ ཨཱཔཛྫཏི། བྷིཀྑུནཱི ཛཱནཾ པཱརཱཛིཀཾ དྷམྨཾ པཊིཙྪཱདེཏི, ཨཱཔཏྟི པཱརཱཛིཀསྶ; ཝེམཏིཀཱ པཊིཙྪཱདེཏི, ཨཱཔཏྟི ཐུལླཙྩཡསྶ; བྷིཀྑུ སངྒྷཱདིསེསཾ པཊིཙྪཱདེཏི; ཨཱཔཏྟི པཱཙིཏྟིཡསྶ; ཨཱཙཱརཝིཔཏྟིཾ པཊིཙྪཱདེཏི, ཨཱཔཏྟི དུཀྐཊསྶ – ཨཱཔཏྟཱདྷིཀརཎཔཙྩཡཱ ཨིམཱ ཙཏསྶོ ཨཱཔཏྟིཡོ ཨཱཔཛྫཏི།

    290. Āpattādhikaraṇapaccayā kati āpattiyo āpajjati? Āpattādhikaraṇapaccayā catasso āpattiyo āpajjati. Bhikkhunī jānaṃ pārājikaṃ dhammaṃ paṭicchādeti, āpatti pārājikassa; vematikā paṭicchādeti, āpatti thullaccayassa; bhikkhu saṅghādisesaṃ paṭicchādeti; āpatti pācittiyassa; ācāravipattiṃ paṭicchādeti, āpatti dukkaṭassa – āpattādhikaraṇapaccayā imā catasso āpattiyo āpajjati.

    ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི…པེ॰… སཏྟནྣཾ སམཐཱནཾ ཀཏིཧི སམཐེཧི སམྨནྟི? ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ དྭེ ཝིཔཏྟིཡོ བྷཛནྟི – སིཡཱ སཱིལཝིཔཏྟིཾ, སིཡཱ ཨཱཙཱརཝིཔཏྟིཾ། སཏྟནྣཾ ཨཱཔཏྟིཀྑནྡྷཱནཾ ཙཏཱུཧི ཨཱཔཏྟིཀྑནྡྷེཧི སངྒཧིཏཱ – སིཡཱ པཱརཱཛིཀཱཔཏྟིཀྑནྡྷེན, སིཡཱ ཐུལླཙྩཡཱཔཏྟིཀྑནྡྷེན, སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛནྟི – ཀཱཡཏོ ཙ ཝཱཙཏོ ཙ ཙིཏྟཏོ ཙ སམུཊྛནྟི། ཙཏུནྣཾ ཨདྷིཀརཎཱནཾ, ཨཱཔཏྟཱདྷིཀརཎཾ། སཏྟནྣཾ སམཐཱནཾ ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ།

    Tā āpattiyo catunnaṃ vipattīnaṃ kati vipattiyo bhajanti…pe… sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Sattannaṃ āpattikkhandhānaṃ catūhi āpattikkhandhehi saṅgahitā – siyā pārājikāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca vācato ca cittato ca samuṭṭhanti. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.

    ༢༩༡. ཀིཙྩཱདྷིཀརཎཔཙྩཡཱ ཀཏི ཨཱཔཏྟིཡོ ཨཱཔཛྫཏི? ཀིཙྩཱདྷིཀརཎཔཙྩཡཱ པཉྩ ཨཱཔཏྟིཡོ ཨཱཔཛྫཏི། ཨུཀྑིཏྟཱནུཝཏྟིཀཱ བྷིཀྑུནཱི ཡཱཝཏཏིཡཾ སམནུབྷཱསནཱཡ ན པཊིནིསྶཛྫཏི, ཉཏྟིཡཱ དུཀྐཊཾ; དྭཱིཧི ཀམྨཝཱཙཱཧི ཐུལླཙྩཡཱ; ཀམྨཝཱཙཱཔརིཡོསཱནེ ཨཱཔཏྟི པཱརཱཛིཀསྶ། བྷེདཀཱནུཝཏྟཀཱ བྷིཀྑཱུ ཡཱཝཏཏིཡཾ སམནུབྷཱསནཱཡ ན པཊིནིསྶཛྫནྟི, ཨཱཔཏྟི སངྒྷཱདིསེསསྶ; པཱཔིཀཱཡ དིཊྛིཡཱ ཡཱཝཏཏིཡཾ སམནུབྷཱསནཱཡ ན པཊིནིསྶཛྫཏི, ཨཱཔཏྟི པཱཙིཏྟིཡསྶ – ཀིཙྩཱདྷིཀརཎཔཙྩཡཱ ཨིམཱ པཉྩ ཨཱཔཏྟིཡོ ཨཱཔཛྫཏི།

    291. Kiccādhikaraṇapaccayā kati āpattiyo āpajjati? Kiccādhikaraṇapaccayā pañca āpattiyo āpajjati. Ukkhittānuvattikā bhikkhunī yāvatatiyaṃ samanubhāsanāya na paṭinissajjati, ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti pārājikassa. Bhedakānuvattakā bhikkhū yāvatatiyaṃ samanubhāsanāya na paṭinissajjanti, āpatti saṅghādisesassa; pāpikāya diṭṭhiyā yāvatatiyaṃ samanubhāsanāya na paṭinissajjati, āpatti pācittiyassa – kiccādhikaraṇapaccayā imā pañca āpattiyo āpajjati.

    ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི…པེ॰… སཏྟནྣཾ སམཐཱནཾ ཀཏིཧི སམཐེཧི སམྨནྟི? ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ དྭེ ཝིཔཏྟིཡོ བྷཛནྟི – སིཡཱ སཱིལཝིཔཏྟིཾ, སིཡཱ ཨཱཙཱརཝིཔཏྟིཾ། སཏྟནྣཾ ཨཱཔཏྟིཀྑནྡྷཱནཾ པཉྩཧི ཨཱཔཏྟིཀྑནྡྷེཧི སངྒཧིཏཱ – སིཡཱ པཱརཱཛིཀཱཔཏྟིཀྑནྡྷེན, སིཡཱ སངྒྷཱདིསེསཱཔཏྟིཀྑནྡྷེན, སིཡཱ ཐུལླཙྩཡཱཔཏྟིཀྑནྡྷེན, སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛནྟི – ཀཱཡཏོ ཙ ཝཱཙཏོ ཙ ཙིཏྟཏོ ཙ སམུཊྛནྟི ། ཙཏུནྣཾ ཨདྷིཀརཎཱནཾ, ཨཱཔཏྟཱདྷིཀརཎཾ། སཏྟནྣཾ སམཐཱནཾ ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ།

    Tā āpattiyo catunnaṃ vipattīnaṃ kati vipattiyo bhajanti…pe… sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Sattannaṃ āpattikkhandhānaṃ pañcahi āpattikkhandhehi saṅgahitā – siyā pārājikāpattikkhandhena, siyā saṅghādisesāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca vācato ca cittato ca samuṭṭhanti . Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.

    ཋཔེཏྭཱ སཏྟ ཨཱཔཏྟིཡོ སཏྟ ཨཱཔཏྟིཀྑནྡྷེ, ཨཝསེསཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི? སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ? ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛནྟི? ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ? སཏྟནྣཾ སམཐཱནཾ ཀཏིཧི སམཐེཧི སམྨནྟི? ཋཔེཏྭཱ སཏྟ ཨཱཔཏྟིཡོ སཏྟ ཨཱཔཏྟིཀྑནྡྷེ ཨཝསེསཱ ཨཱཔཏྟིཡོ ཙཏུནྣཾ ཝིཔཏྟཱིནཾ ན ཀཏམཾ ཝིཔཏྟིཾ བྷཛནྟི? སཏྟནྣཾ ཨཱཔཏྟིཀྑནྡྷཱནཾ ན ཀཏམེན ཨཱཔཏྟིཀྑནྡྷེན སངྒཧིཏཱ། ཚནྣཾ ཨཱཔཏྟིསམུཊྛཱནཱནཾ ན ཀཏམེན ཨཱཔཏྟིསམུཊྛཱནེན སམུཊྛནྟི། ཙཏུནྣཾ ཨདྷིཀརཎཱནཾ ན ཀཏམཾ ཨདྷིཀརཎཾ། སཏྟནྣཾ སམཐཱནཾ ན ཀཏམེན སམཐེན སམྨནྟི། ཏཾ ཀིསྶ ཧེཏུ? ཋཔེཏྭཱ སཏྟ ཨཱཔཏྟིཡོ སཏྟ ཨཱཔཏྟིཀྑནྡྷེ, ནཏྠཉྙཱ ཨཱཔཏྟིཡོཏི།

    Ṭhapetvā satta āpattiyo satta āpattikkhandhe, avasesā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammanti? Ṭhapetvā satta āpattiyo satta āpattikkhandhe avasesā āpattiyo catunnaṃ vipattīnaṃ na katamaṃ vipattiṃ bhajanti? Sattannaṃ āpattikkhandhānaṃ na katamena āpattikkhandhena saṅgahitā. Channaṃ āpattisamuṭṭhānānaṃ na katamena āpattisamuṭṭhānena samuṭṭhanti. Catunnaṃ adhikaraṇānaṃ na katamaṃ adhikaraṇaṃ. Sattannaṃ samathānaṃ na katamena samathena sammanti. Taṃ kissa hetu? Ṭhapetvā satta āpattiyo satta āpattikkhandhe, natthaññā āpattiyoti.

    ཨདྷིཀརཎཔཙྩཡཝཱརོ ནིཊྛིཏོ པཉྩམོ།

    Adhikaraṇapaccayavāro niṭṭhito pañcamo.

    ཨནྟརཔེཡྻཱལཾ 1 ནིཊྛིཏཾ།

    Antarapeyyālaṃ 2 niṭṭhitaṃ.

    ཏསྶུདྡཱནཾ –

    Tassuddānaṃ –

    ཀཏིཔུཙྪཱ སམུཊྛཱནཱ, ཀཏཱཔཏྟི ཏཐེཝ ཙ།

    Katipucchā samuṭṭhānā, katāpatti tatheva ca;

    སམུཊྛཱནཱ ཝིཔཏྟི ཙ, ཏཐཱདྷིཀརཎེན ཙཱཏི༎

    Samuṭṭhānā vipatti ca, tathādhikaraṇena cāti.




    Next: སམཐབྷེདོ • Samathabhedo




    Footnotes:
    1. ཨནནྟརཔེཡྻཱལཾ (སཱི॰ སྱཱ॰)
    2. anantarapeyyālaṃ (sī. syā.)



    Related texts:



    ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཚཨཱཔཏྟིསམུཊྛཱནཝཱརཱདིཝཎྞནཱ • Chaāpattisamuṭṭhānavārādivaṇṇanā

    ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨདྷིཀརཎཔཙྩཡཝཱརཝཎྞནཱ • Adhikaraṇapaccayavāravaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact