| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
সমথভেদং
Samathabhedaṃ
অধিকরণপরিযাযৰারকথাৰণ্ণনা
Adhikaraṇapariyāyavārakathāvaṇṇanā
২৯৩. লোভো পুব্বঙ্গমোতিআদীসু পন লোভহেতু ৰিৰদনতো ‘‘লোভো পুব্বঙ্গমো’’তি ৰুত্তং। এৰং সেসেসুপি। ঠানানীতি কারণানি। তিট্ঠন্তি এত্থাতি ঠানং। কে তিট্ঠন্তি? ৰিৰাদাধিকরণাদযো। ৰসন্তি এত্থাতি ৰত্থু। ভৰন্তি এত্থাতি ভূমি। কুসলাকুসলাব্যাকতচিত্তসমঙ্গিনো ৰিৰদনতো ‘‘নৰ হেতূ’’তি ৰুত্তং। দ্ৰাদস মূলানীতি ‘‘কোধনো হোতি উপনাহী’’তিআদীনি দ্ৰাদস মূলানি।
293.Lobhopubbaṅgamotiādīsu pana lobhahetu vivadanato ‘‘lobho pubbaṅgamo’’ti vuttaṃ. Evaṃ sesesupi. Ṭhānānīti kāraṇāni. Tiṭṭhanti etthāti ṭhānaṃ. Ke tiṭṭhanti? Vivādādhikaraṇādayo. Vasanti etthāti vatthu. Bhavanti etthāti bhūmi. Kusalākusalābyākatacittasamaṅgino vivadanato ‘‘nava hetū’’ti vuttaṃ. Dvādasa mūlānīti ‘‘kodhano hoti upanāhī’’tiādīni dvādasa mūlāni.
২৯৪-২৯৫. ইমানেৰ দ্ৰাদস কাযৰাচাহি সদ্ধিং ‘‘চুদ্দস মূলানী’’তি ৰুত্তানি। সত্ত আপত্তিক্খন্ধা ঠানানীতি এত্থ আপত্তিং আপজ্জিত্ৰা পটিচ্ছাদেন্তস্স যা আপত্তি, তস্সা পুব্বে আপন্না আপত্তিযো ঠানানীতি ৰেদিতব্বং। ‘‘নত্থি আপত্তাধিকরণং কুসল’’ন্তি ৰচনতো আপত্তাধিকরণে অকুসলাব্যাকতৰসেন ছ হেতূ ৰুত্তা। কুসলচিত্তং পন অঙ্গং হোতি, ন হেতু।
294-295. Imāneva dvādasa kāyavācāhi saddhiṃ ‘‘cuddasa mūlānī’’ti vuttāni. Satta āpattikkhandhā ṭhānānīti ettha āpattiṃ āpajjitvā paṭicchādentassa yā āpatti, tassā pubbe āpannā āpattiyo ṭhānānīti veditabbaṃ. ‘‘Natthi āpattādhikaraṇaṃ kusala’’nti vacanato āpattādhikaraṇe akusalābyākatavasena cha hetū vuttā. Kusalacittaṃ pana aṅgaṃ hoti, na hetu.
২৯৬. চত্তারি কম্মানি ঠানানীতি এত্থ ‘‘এৰং কত্তব্ব’’ন্তি ইতিকত্তব্বতাদস্সনৰসেন পৰত্তপাল়ি কম্মং নাম, যথাঠিতপাল়িৰসেন করোন্তানং কিরিযা কিচ্চাধিকরণং নাম। ঞত্তিঞত্তিদুতিযঞত্তিচতুত্থকম্মানি ঞত্তিতো জাযন্তি, অপলোকনকম্মং অপলোকনতোৰাতি আহ ‘‘ঞত্তিতো ৰা অপলোকনতো ৰা’’তি। কিচ্চাধিকরণং একেন সমথেন সম্মতি, সম্পজ্জতীতি অত্থো। তেহি সমেতব্বত্তা ‘‘ৰিৰাদাধিকরণস্স সাধারণা’’তি ৰুত্তং।
296.Cattāri kammāni ṭhānānīti ettha ‘‘evaṃ kattabba’’nti itikattabbatādassanavasena pavattapāḷi kammaṃ nāma, yathāṭhitapāḷivasena karontānaṃ kiriyā kiccādhikaraṇaṃ nāma. Ñattiñattidutiyañatticatutthakammāni ñattito jāyanti, apalokanakammaṃ apalokanatovāti āha ‘‘ñattito vā apalokanato vā’’ti. Kiccādhikaraṇaṃ ekena samathena sammati, sampajjatīti attho. Tehi sametabbattā ‘‘vivādādhikaraṇassa sādhāraṇā’’ti vuttaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৬. অধিকরণপরিযাযৰারো • 6. Adhikaraṇapariyāyavāro
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধিকরণপরিযাযৰারাদিৰণ্ণনা • Adhikaraṇapariyāyavārādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধিকরণপরিযাযৰারৰণ্ণনা • Adhikaraṇapariyāyavāravaṇṇanā
