| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
সমথভেদো
Samathabhedo
৬. অধিকরণপরিযাযৰারো
6. Adhikaraṇapariyāyavāro
২৯২. ৰিৰাদাধিকরণস্স – কিং পুব্বঙ্গমং? কতি ঠানানি? কতি ৰত্থূনি? কতি ভূমিযো? কতি হেতূ? কতি মূলানি? কতিহাকারেহি ৰিৰদতি? ৰিৰাদাধিকরণং কতিহি সমথেহি সম্মতি?
292. Vivādādhikaraṇassa – kiṃ pubbaṅgamaṃ? Kati ṭhānāni? Kati vatthūni? Kati bhūmiyo? Kati hetū? Kati mūlāni? Katihākārehi vivadati? Vivādādhikaraṇaṃ katihi samathehi sammati?
অনুৰাদাধিকরণস্স – কিং পুব্বঙ্গমং? কতি ঠানানি? কতি ৰত্থূনি? কতি ভূমিযো? কতি হেতূ? কতি মূলানি? কতিহাকারেহি অনুৰদতি? অনুৰাদাধিকরণং কতিহি সমথেহি সম্মতি?
Anuvādādhikaraṇassa – kiṃ pubbaṅgamaṃ? Kati ṭhānāni? Kati vatthūni? Kati bhūmiyo? Kati hetū? Kati mūlāni? Katihākārehi anuvadati? Anuvādādhikaraṇaṃ katihi samathehi sammati?
আপত্তাধিকরণস্স – কিং পুব্বঙ্গমং? কতি ঠানানি? কতি ৰত্থূনি? কতি ভূমিযো? কতি হেতূ? কতি মূলানি? কতিহাকারেহি আপত্তিং আপজ্জতি? আপত্তাধিকরণং কতিহি সমথেহি সম্মতি?
Āpattādhikaraṇassa – kiṃ pubbaṅgamaṃ? Kati ṭhānāni? Kati vatthūni? Kati bhūmiyo? Kati hetū? Kati mūlāni? Katihākārehi āpattiṃ āpajjati? Āpattādhikaraṇaṃ katihi samathehi sammati?
কিচ্চাধিকরণস্স – কিং পুব্বঙ্গমং? কতি ঠানানি? কতি ৰত্থূনি? কতি ভূমিযো? কতি হেতূ? কতি মূলানি? কতিহাকারেহি কিচ্চং জাযতি? কিচ্চাধিকরণং কতিহি সমথেহি সম্মতি?
Kiccādhikaraṇassa – kiṃ pubbaṅgamaṃ? Kati ṭhānāni? Kati vatthūni? Kati bhūmiyo? Kati hetū? Kati mūlāni? Katihākārehi kiccaṃ jāyati? Kiccādhikaraṇaṃ katihi samathehi sammati?
২৯৩. ৰিৰাদাধিকরণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো। কতি ঠানানীতি? অট্ঠারস ভেদকরৰত্থূনি ঠানানি। কতি ৰত্থূনীতি? অট্ঠারস ভেদকরৰত্থূনি। কতি ভূমিযোতি? অট্ঠারস ভেদকরৰত্থূনি ভূমিযো। কতি হেতূতি? নৰ হেতূ – তযো কুসলহেতূ , তযো অকুসলহেতূ, তযো অব্যাকতহেতূ। কতি মূলানীতি? দ্ৰাদস মূলানি। কতিহাকারেহি ৰিৰদতীতি? দ্ৰীহাকারেহি ৰিৰদতি – ধম্মদিট্ঠি ৰা অধম্মদিট্ঠি ৰা। 1 ৰিৰাদাধিকরণং কতিহি সমথেহি সম্মতীতি? ৰিৰাদাধিকরণং দ্ৰীহি সমথেহি সম্মতি – সম্মুখাৰিনযেন চ যেভুয্যসিকায চ।
293. Vivādādhikaraṇassa kiṃ pubbaṅgamanti? Lobho pubbaṅgamo, doso pubbaṅgamo, moho pubbaṅgamo, alobho pubbaṅgamo, adoso pubbaṅgamo, amoho pubbaṅgamo. Kati ṭhānānīti? Aṭṭhārasa bhedakaravatthūni ṭhānāni. Kati vatthūnīti? Aṭṭhārasa bhedakaravatthūni. Kati bhūmiyoti? Aṭṭhārasa bhedakaravatthūni bhūmiyo. Kati hetūti? Nava hetū – tayo kusalahetū , tayo akusalahetū, tayo abyākatahetū. Kati mūlānīti? Dvādasa mūlāni. Katihākārehi vivadatīti? Dvīhākārehi vivadati – dhammadiṭṭhi vā adhammadiṭṭhi vā. 2 Vivādādhikaraṇaṃ katihi samathehi sammatīti? Vivādādhikaraṇaṃ dvīhi samathehi sammati – sammukhāvinayena ca yebhuyyasikāya ca.
২৯৪. অনুৰাদাধিকরণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো। কতি ঠানানীতি? চতস্সো ৰিপত্তিযো ঠানানি। কতি ৰত্থূনীতি? চতস্সো ৰিপত্তিযো ৰত্থূনি। কতি ভূমিযোতি? চতস্সো ৰিপত্তিযো ভূমিযো। কতি হেতূতি? নৰ হেতূ – তযো কুসলহেতূ, তযো অকুসলহেতূ, তযো অব্যাকতহেতূ। কতি মূলানীতি? চুদ্দস মূলানি। কতিহাকারেহি অনুৰদতীতি? দ্ৰীহাকারেহি অনুৰদতি – ৰত্থুতো ৰা আপত্তিতো ৰা। 3 অনুৰাদাধিকরণং কতিহি সমথেহি সম্মতীতি? অনুৰাদাধিকরণং চতূহি সমথেহি সম্মতি – সম্মুখাৰিনযেন চ সতিৰিনযেন চ অমূল়্হৰিনযেন চ তস্সপাপিযসিকায চ।
294. Anuvādādhikaraṇassa kiṃ pubbaṅgamanti? Lobho pubbaṅgamo, doso pubbaṅgamo, moho pubbaṅgamo, alobho pubbaṅgamo, adoso pubbaṅgamo, amoho pubbaṅgamo. Kati ṭhānānīti? Catasso vipattiyo ṭhānāni. Kati vatthūnīti? Catasso vipattiyo vatthūni. Kati bhūmiyoti? Catasso vipattiyo bhūmiyo. Kati hetūti? Nava hetū – tayo kusalahetū, tayo akusalahetū, tayo abyākatahetū. Kati mūlānīti? Cuddasa mūlāni. Katihākārehi anuvadatīti? Dvīhākārehi anuvadati – vatthuto vā āpattito vā. 4 Anuvādādhikaraṇaṃ katihi samathehi sammatīti? Anuvādādhikaraṇaṃ catūhi samathehi sammati – sammukhāvinayena ca sativinayena ca amūḷhavinayena ca tassapāpiyasikāya ca.
২৯৫. আপত্তাধিকরণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো। কতি ঠানানীতি? সত্ত আপত্তিক্খন্ধা ঠানানি। কতি ৰত্থূনীতি? সত্ত আপত্তিক্খন্ধা ৰত্থূনি। কতি ভূমিযোতি? সত্ত আপত্তিক্খন্ধা ভূমিযো। কতি হেতূতি? ছ হেতূ 5 – তযো অকুসলহেতূ, তযো অব্যাকতহেতূ। কতি মূলানীতি? ছ আপত্তিসমুট্ঠানানি মূলানি । কতিহাকারেহি আপত্তিং আপজ্জতীতি? ছহাকারেহি আপত্তিং আপজ্জতি – অলজ্জিতা, অঞ্ঞাণতা, কুক্কুচ্চপকততা, অকপ্পিযে কপ্পিযসঞ্ঞিতা, কপ্পিযে অকপ্পিযসঞ্ঞিতা, সতিসম্মোসা। 6 আপত্তাধিকরণং কতিহি সমথেহি সম্মতীতি? আপত্তাধিকরণং তীহি সমথেহি সম্মতি – সম্মুখাৰিনযেন চ পটিঞ্ঞাতকরণেন চ, সম্মুখাৰিনযেন চ তিণৰত্থারকেন চ।
295. Āpattādhikaraṇassa kiṃ pubbaṅgamanti? Lobho pubbaṅgamo, doso pubbaṅgamo, moho pubbaṅgamo, alobho pubbaṅgamo, adoso pubbaṅgamo, amoho pubbaṅgamo. Kati ṭhānānīti? Satta āpattikkhandhā ṭhānāni. Kati vatthūnīti? Satta āpattikkhandhā vatthūni. Kati bhūmiyoti? Satta āpattikkhandhā bhūmiyo. Kati hetūti? Cha hetū 7 – tayo akusalahetū, tayo abyākatahetū. Kati mūlānīti? Cha āpattisamuṭṭhānāni mūlāni . Katihākārehi āpattiṃ āpajjatīti? Chahākārehi āpattiṃ āpajjati – alajjitā, aññāṇatā, kukkuccapakatatā, akappiye kappiyasaññitā, kappiye akappiyasaññitā, satisammosā. 8 Āpattādhikaraṇaṃ katihi samathehi sammatīti? Āpattādhikaraṇaṃ tīhi samathehi sammati – sammukhāvinayena ca paṭiññātakaraṇena ca, sammukhāvinayena ca tiṇavatthārakena ca.
২৯৬. কিচ্চাধিকরণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো। কতি ঠানানীতি? চত্তারি কম্মানি ঠানানি। কতি ৰত্থূনীতি? চত্তারি কম্মানি ৰত্থূনি। কতি ভূমিযোতি? চত্তারি কম্মানি ভূমিযো। কতি হেতূতি? নৰ হেতূ – তযো কুসলহেতূ, তযো অকুসলহেতূ, তযো অব্যাকতহেতূ। কতি মূলানীতি? একং মূলং – সঙ্ঘো। কতিহাকারেহি কিচ্চং জাযতীতি ? দ্ৰীহাকারেহি কিচ্চং জাযতি – ঞত্তিতো ৰা অপলোকনতো ৰা। 9 কিচ্চাধিকরণং কতিহি সমথেহি সম্মতীতি? কিচ্চাধিকরণং একেন সমথেন সম্মতি – সম্মুখাৰিনযেন।
296. Kiccādhikaraṇassa kiṃ pubbaṅgamanti? Lobho pubbaṅgamo, doso pubbaṅgamo, moho pubbaṅgamo, alobho pubbaṅgamo, adoso pubbaṅgamo, amoho pubbaṅgamo. Kati ṭhānānīti? Cattāri kammāni ṭhānāni. Kati vatthūnīti? Cattāri kammāni vatthūni. Kati bhūmiyoti? Cattāri kammāni bhūmiyo. Kati hetūti? Nava hetū – tayo kusalahetū, tayo akusalahetū, tayo abyākatahetū. Kati mūlānīti? Ekaṃ mūlaṃ – saṅgho. Katihākārehi kiccaṃ jāyatīti ? Dvīhākārehi kiccaṃ jāyati – ñattito vā apalokanato vā. 10 Kiccādhikaraṇaṃ katihi samathehi sammatīti? Kiccādhikaraṇaṃ ekena samathena sammati – sammukhāvinayena.
কতি সমথা? সত্ত সমথা। সম্মুখাৰিনযো, সতিৰিনযো, অমূল়্হৰিনযো, পটিঞ্ঞাতকরণং, যেভুয্যসিকা, তস্সপাপিযসিকা, তিণৰত্থারকো – ইমে সত্ত সমথা।
Kati samathā? Satta samathā. Sammukhāvinayo, sativinayo, amūḷhavinayo, paṭiññātakaraṇaṃ, yebhuyyasikā, tassapāpiyasikā, tiṇavatthārako – ime satta samathā.
সিযা ইমে সত্ত সমথা দস সমথা হোন্তি, দস সমথা সত্ত সমথা হোন্তি ৰত্থুৰসেন পরিযাযেন সিযাতি।
Siyā ime satta samathā dasa samathā honti, dasa samathā satta samathā honti vatthuvasena pariyāyena siyāti.
কথঞ্চ সিযা? ৰিৰাদাধিকরণস্স দ্ৰে সমথা , অনুৰাদাধিকরণস্স চত্তারো সমথা, আপত্তাধিকরণস্স তযো সমথা, কিচ্চাধিকরণস্স একো সমথো। এৰং ইমে সত্ত সমথা দস সমথা হোন্তি, দস সমথা সত্ত সমথা হোন্তি ৰত্থুৰসেন পরিযাযেন।
Kathañca siyā? Vivādādhikaraṇassa dve samathā , anuvādādhikaraṇassa cattāro samathā, āpattādhikaraṇassa tayo samathā, kiccādhikaraṇassa eko samatho. Evaṃ ime satta samathā dasa samathā honti, dasa samathā satta samathā honti vatthuvasena pariyāyena.
পরিযাযৰারো নিট্ঠিতো ছট্ঠো।
Pariyāyavāro niṭṭhito chaṭṭho.
Footnotes:
Related texts:
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণপরিযাযৰারকথাৰণ্ণনা • Adhikaraṇapariyāyavārakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধিকরণপরিযাযৰারাদিৰণ্ণনা • Adhikaraṇapariyāyavārādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধিকরণপরিযাযৰারৰণ্ণনা • Adhikaraṇapariyāyavāravaṇṇanā
