| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
សមថភេទោ
Samathabhedo
៦. អធិករណបរិយាយវារោ
6. Adhikaraṇapariyāyavāro
២៩២. វិវាទាធិករណស្ស – កិំ បុព្ពង្គមំ? កតិ ឋានានិ? កតិ វត្ថូនិ? កតិ ភូមិយោ? កតិ ហេតូ? កតិ មូលានិ? កតិហាការេហិ វិវទតិ? វិវាទាធិករណំ កតិហិ សមថេហិ សម្មតិ?
292. Vivādādhikaraṇassa – kiṃ pubbaṅgamaṃ? Kati ṭhānāni? Kati vatthūni? Kati bhūmiyo? Kati hetū? Kati mūlāni? Katihākārehi vivadati? Vivādādhikaraṇaṃ katihi samathehi sammati?
អនុវាទាធិករណស្ស – កិំ បុព្ពង្គមំ? កតិ ឋានានិ? កតិ វត្ថូនិ? កតិ ភូមិយោ? កតិ ហេតូ? កតិ មូលានិ? កតិហាការេហិ អនុវទតិ? អនុវាទាធិករណំ កតិហិ សមថេហិ សម្មតិ?
Anuvādādhikaraṇassa – kiṃ pubbaṅgamaṃ? Kati ṭhānāni? Kati vatthūni? Kati bhūmiyo? Kati hetū? Kati mūlāni? Katihākārehi anuvadati? Anuvādādhikaraṇaṃ katihi samathehi sammati?
អាបត្តាធិករណស្ស – កិំ បុព្ពង្គមំ? កតិ ឋានានិ? កតិ វត្ថូនិ? កតិ ភូមិយោ? កតិ ហេតូ? កតិ មូលានិ? កតិហាការេហិ អាបត្តិំ អាបជ្ជតិ? អាបត្តាធិករណំ កតិហិ សមថេហិ សម្មតិ?
Āpattādhikaraṇassa – kiṃ pubbaṅgamaṃ? Kati ṭhānāni? Kati vatthūni? Kati bhūmiyo? Kati hetū? Kati mūlāni? Katihākārehi āpattiṃ āpajjati? Āpattādhikaraṇaṃ katihi samathehi sammati?
កិច្ចាធិករណស្ស – កិំ បុព្ពង្គមំ? កតិ ឋានានិ? កតិ វត្ថូនិ? កតិ ភូមិយោ? កតិ ហេតូ? កតិ មូលានិ? កតិហាការេហិ កិច្ចំ ជាយតិ? កិច្ចាធិករណំ កតិហិ សមថេហិ សម្មតិ?
Kiccādhikaraṇassa – kiṃ pubbaṅgamaṃ? Kati ṭhānāni? Kati vatthūni? Kati bhūmiyo? Kati hetū? Kati mūlāni? Katihākārehi kiccaṃ jāyati? Kiccādhikaraṇaṃ katihi samathehi sammati?
២៩៣. វិវាទាធិករណស្ស កិំ បុព្ពង្គមន្តិ? លោភោ បុព្ពង្គមោ, ទោសោ បុព្ពង្គមោ, មោហោ បុព្ពង្គមោ, អលោភោ បុព្ពង្គមោ, អទោសោ បុព្ពង្គមោ, អមោហោ បុព្ពង្គមោ។ កតិ ឋានានីតិ? អដ្ឋារស ភេទករវត្ថូនិ ឋានានិ។ កតិ វត្ថូនីតិ? អដ្ឋារស ភេទករវត្ថូនិ។ កតិ ភូមិយោតិ? អដ្ឋារស ភេទករវត្ថូនិ ភូមិយោ។ កតិ ហេតូតិ? នវ ហេតូ – តយោ កុសលហេតូ , តយោ អកុសលហេតូ, តយោ អព្យាកតហេតូ។ កតិ មូលានីតិ? ទ្វាទស មូលានិ។ កតិហាការេហិ វិវទតីតិ? ទ្វីហាការេហិ វិវទតិ – ធម្មទិដ្ឋិ វា អធម្មទិដ្ឋិ វា។ 1 វិវាទាធិករណំ កតិហិ សមថេហិ សម្មតីតិ? វិវាទាធិករណំ ទ្វីហិ សមថេហិ សម្មតិ – សម្មុខាវិនយេន ច យេភុយ្យសិកាយ ច។
293. Vivādādhikaraṇassa kiṃ pubbaṅgamanti? Lobho pubbaṅgamo, doso pubbaṅgamo, moho pubbaṅgamo, alobho pubbaṅgamo, adoso pubbaṅgamo, amoho pubbaṅgamo. Kati ṭhānānīti? Aṭṭhārasa bhedakaravatthūni ṭhānāni. Kati vatthūnīti? Aṭṭhārasa bhedakaravatthūni. Kati bhūmiyoti? Aṭṭhārasa bhedakaravatthūni bhūmiyo. Kati hetūti? Nava hetū – tayo kusalahetū , tayo akusalahetū, tayo abyākatahetū. Kati mūlānīti? Dvādasa mūlāni. Katihākārehi vivadatīti? Dvīhākārehi vivadati – dhammadiṭṭhi vā adhammadiṭṭhi vā. 2 Vivādādhikaraṇaṃ katihi samathehi sammatīti? Vivādādhikaraṇaṃ dvīhi samathehi sammati – sammukhāvinayena ca yebhuyyasikāya ca.
២៩៤. អនុវាទាធិករណស្ស កិំ បុព្ពង្គមន្តិ? លោភោ បុព្ពង្គមោ, ទោសោ បុព្ពង្គមោ, មោហោ បុព្ពង្គមោ, អលោភោ បុព្ពង្គមោ, អទោសោ បុព្ពង្គមោ, អមោហោ បុព្ពង្គមោ។ កតិ ឋានានីតិ? ចតស្សោ វិបត្តិយោ ឋានានិ។ កតិ វត្ថូនីតិ? ចតស្សោ វិបត្តិយោ វត្ថូនិ។ កតិ ភូមិយោតិ? ចតស្សោ វិបត្តិយោ ភូមិយោ។ កតិ ហេតូតិ? នវ ហេតូ – តយោ កុសលហេតូ, តយោ អកុសលហេតូ, តយោ អព្យាកតហេតូ។ កតិ មូលានីតិ? ចុទ្ទស មូលានិ។ កតិហាការេហិ អនុវទតីតិ? ទ្វីហាការេហិ អនុវទតិ – វត្ថុតោ វា អាបត្តិតោ វា។ 3 អនុវាទាធិករណំ កតិហិ សមថេហិ សម្មតីតិ? អនុវាទាធិករណំ ចតូហិ សមថេហិ សម្មតិ – សម្មុខាវិនយេន ច សតិវិនយេន ច អមូឡ្ហវិនយេន ច តស្សបាបិយសិកាយ ច។
294. Anuvādādhikaraṇassa kiṃ pubbaṅgamanti? Lobho pubbaṅgamo, doso pubbaṅgamo, moho pubbaṅgamo, alobho pubbaṅgamo, adoso pubbaṅgamo, amoho pubbaṅgamo. Kati ṭhānānīti? Catasso vipattiyo ṭhānāni. Kati vatthūnīti? Catasso vipattiyo vatthūni. Kati bhūmiyoti? Catasso vipattiyo bhūmiyo. Kati hetūti? Nava hetū – tayo kusalahetū, tayo akusalahetū, tayo abyākatahetū. Kati mūlānīti? Cuddasa mūlāni. Katihākārehi anuvadatīti? Dvīhākārehi anuvadati – vatthuto vā āpattito vā. 4 Anuvādādhikaraṇaṃ katihi samathehi sammatīti? Anuvādādhikaraṇaṃ catūhi samathehi sammati – sammukhāvinayena ca sativinayena ca amūḷhavinayena ca tassapāpiyasikāya ca.
២៩៥. អាបត្តាធិករណស្ស កិំ បុព្ពង្គមន្តិ? លោភោ បុព្ពង្គមោ, ទោសោ បុព្ពង្គមោ, មោហោ បុព្ពង្គមោ, អលោភោ បុព្ពង្គមោ, អទោសោ បុព្ពង្គមោ, អមោហោ បុព្ពង្គមោ។ កតិ ឋានានីតិ? សត្ត អាបត្តិក្ខន្ធា ឋានានិ។ កតិ វត្ថូនីតិ? សត្ត អាបត្តិក្ខន្ធា វត្ថូនិ។ កតិ ភូមិយោតិ? សត្ត អាបត្តិក្ខន្ធា ភូមិយោ។ កតិ ហេតូតិ? ឆ ហេតូ 5 – តយោ អកុសលហេតូ, តយោ អព្យាកតហេតូ។ កតិ មូលានីតិ? ឆ អាបត្តិសមុដ្ឋានានិ មូលានិ ។ កតិហាការេហិ អាបត្តិំ អាបជ្ជតីតិ? ឆហាការេហិ អាបត្តិំ អាបជ្ជតិ – អលជ្ជិតា, អញ្ញាណតា, កុក្កុច្ចបកតតា, អកប្បិយេ កប្បិយសញ្ញិតា, កប្បិយេ អកប្បិយសញ្ញិតា, សតិសម្មោសា។ 6 អាបត្តាធិករណំ កតិហិ សមថេហិ សម្មតីតិ? អាបត្តាធិករណំ តីហិ សមថេហិ សម្មតិ – សម្មុខាវិនយេន ច បដិញ្ញាតករណេន ច, សម្មុខាវិនយេន ច តិណវត្ថារកេន ច។
295. Āpattādhikaraṇassa kiṃ pubbaṅgamanti? Lobho pubbaṅgamo, doso pubbaṅgamo, moho pubbaṅgamo, alobho pubbaṅgamo, adoso pubbaṅgamo, amoho pubbaṅgamo. Kati ṭhānānīti? Satta āpattikkhandhā ṭhānāni. Kati vatthūnīti? Satta āpattikkhandhā vatthūni. Kati bhūmiyoti? Satta āpattikkhandhā bhūmiyo. Kati hetūti? Cha hetū 7 – tayo akusalahetū, tayo abyākatahetū. Kati mūlānīti? Cha āpattisamuṭṭhānāni mūlāni . Katihākārehi āpattiṃ āpajjatīti? Chahākārehi āpattiṃ āpajjati – alajjitā, aññāṇatā, kukkuccapakatatā, akappiye kappiyasaññitā, kappiye akappiyasaññitā, satisammosā. 8 Āpattādhikaraṇaṃ katihi samathehi sammatīti? Āpattādhikaraṇaṃ tīhi samathehi sammati – sammukhāvinayena ca paṭiññātakaraṇena ca, sammukhāvinayena ca tiṇavatthārakena ca.
២៩៦. កិច្ចាធិករណស្ស កិំ បុព្ពង្គមន្តិ? លោភោ បុព្ពង្គមោ, ទោសោ បុព្ពង្គមោ, មោហោ បុព្ពង្គមោ, អលោភោ បុព្ពង្គមោ, អទោសោ បុព្ពង្គមោ, អមោហោ បុព្ពង្គមោ។ កតិ ឋានានីតិ? ចត្តារិ កម្មានិ ឋានានិ។ កតិ វត្ថូនីតិ? ចត្តារិ កម្មានិ វត្ថូនិ។ កតិ ភូមិយោតិ? ចត្តារិ កម្មានិ ភូមិយោ។ កតិ ហេតូតិ? នវ ហេតូ – តយោ កុសលហេតូ, តយោ អកុសលហេតូ, តយោ អព្យាកតហេតូ។ កតិ មូលានីតិ? ឯកំ មូលំ – សង្ឃោ។ កតិហាការេហិ កិច្ចំ ជាយតីតិ ? ទ្វីហាការេហិ កិច្ចំ ជាយតិ – ញត្តិតោ វា អបលោកនតោ វា។ 9 កិច្ចាធិករណំ កតិហិ សមថេហិ សម្មតីតិ? កិច្ចាធិករណំ ឯកេន សមថេន សម្មតិ – សម្មុខាវិនយេន។
296. Kiccādhikaraṇassa kiṃ pubbaṅgamanti? Lobho pubbaṅgamo, doso pubbaṅgamo, moho pubbaṅgamo, alobho pubbaṅgamo, adoso pubbaṅgamo, amoho pubbaṅgamo. Kati ṭhānānīti? Cattāri kammāni ṭhānāni. Kati vatthūnīti? Cattāri kammāni vatthūni. Kati bhūmiyoti? Cattāri kammāni bhūmiyo. Kati hetūti? Nava hetū – tayo kusalahetū, tayo akusalahetū, tayo abyākatahetū. Kati mūlānīti? Ekaṃ mūlaṃ – saṅgho. Katihākārehi kiccaṃ jāyatīti ? Dvīhākārehi kiccaṃ jāyati – ñattito vā apalokanato vā. 10 Kiccādhikaraṇaṃ katihi samathehi sammatīti? Kiccādhikaraṇaṃ ekena samathena sammati – sammukhāvinayena.
កតិ សមថា? សត្ត សមថា។ សម្មុខាវិនយោ, សតិវិនយោ, អមូឡ្ហវិនយោ, បដិញ្ញាតករណំ, យេភុយ្យសិកា, តស្សបាបិយសិកា, តិណវត្ថារកោ – ឥមេ សត្ត សមថា។
Kati samathā? Satta samathā. Sammukhāvinayo, sativinayo, amūḷhavinayo, paṭiññātakaraṇaṃ, yebhuyyasikā, tassapāpiyasikā, tiṇavatthārako – ime satta samathā.
សិយា ឥមេ សត្ត សមថា ទស សមថា ហោន្តិ, ទស សមថា សត្ត សមថា ហោន្តិ វត្ថុវសេន បរិយាយេន សិយាតិ។
Siyā ime satta samathā dasa samathā honti, dasa samathā satta samathā honti vatthuvasena pariyāyena siyāti.
កថញ្ច សិយា? វិវាទាធិករណស្ស ទ្វេ សមថា , អនុវាទាធិករណស្ស ចត្តារោ សមថា, អាបត្តាធិករណស្ស តយោ សមថា, កិច្ចាធិករណស្ស ឯកោ សមថោ។ ឯវំ ឥមេ សត្ត សមថា ទស សមថា ហោន្តិ, ទស សមថា សត្ត សមថា ហោន្តិ វត្ថុវសេន បរិយាយេន។
Kathañca siyā? Vivādādhikaraṇassa dve samathā , anuvādādhikaraṇassa cattāro samathā, āpattādhikaraṇassa tayo samathā, kiccādhikaraṇassa eko samatho. Evaṃ ime satta samathā dasa samathā honti, dasa samathā satta samathā honti vatthuvasena pariyāyena.
បរិយាយវារោ និដ្ឋិតោ ឆដ្ឋោ។
Pariyāyavāro niṭṭhito chaṭṭho.
Footnotes:
Related texts:
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / អធិករណបរិយាយវារកថាវណ្ណនា • Adhikaraṇapariyāyavārakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / អធិករណបរិយាយវារាទិវណ្ណនា • Adhikaraṇapariyāyavārādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អធិករណបរិយាយវារវណ្ណនា • Adhikaraṇapariyāyavāravaṇṇanā
