| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၇. အဓိကရဏသမထာ (ဘိက္ခုနီဝိဘင္ဂော)
7. Adhikaraṇasamathā (bhikkhunīvibhaṅgo)
ဣမေ ခော ပနာယ္ယာယော သတ္တ အဓိကရဏသမထာ
Ime kho panāyyāyo satta adhikaraṇasamathā
ဓမ္မာ ဥဒ္ဒေသံ အာဂစ္ဆန္တိ။
Dhammā uddesaṃ āgacchanti.
၁၂၄၂. ဥပ္ပန္နုပ္ပန္နာနံ အဓိကရဏာနံ သမထာယ ဝူပသမာယ သမ္မုခာဝိနယော ဒာတဗ္ဗော, သတိဝိနယော ဒာတဗ္ဗော, အမူဠ္ဟဝိနယော ဒာတဗ္ဗော, ပဋိညာယ ကာရေတဗ္ဗံ, ယေဘုယ္ယသိကာ, တသ္သပာပိယသိကာ, တိဏဝတ္ထာရကောတိ။
1242. Uppannuppannānaṃ adhikaraṇānaṃ samathāya vūpasamāya sammukhāvinayo dātabbo, sativinayo dātabbo, amūḷhavinayo dātabbo, paṭiññāya kāretabbaṃ, yebhuyyasikā, tassapāpiyasikā, tiṇavatthārakoti.
ဥဒ္ဒိဋ္ဌာ ခော, အယ္ယာယော, သတ္တ အဓိကရဏသမထာ ဓမ္မာ။ တတ္ထာယ္ယာယော ပုစ္ဆာမိ – ‘‘ကစ္စိတ္ထ ပရိသုဒ္ဓာ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓာ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓာ’’? ပရိသုဒ္ဓေတ္ထာယ္ယာယော, တသ္မာ တုဏ္ဟီ, ဧဝမေတံ ဓာရယာမီတိ။
Uddiṭṭhā kho, ayyāyo, satta adhikaraṇasamathā dhammā. Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
အဓိကရဏသမထာ နိဋ္ဌိတာ။
Adhikaraṇasamathā niṭṭhitā.
ဥဒ္ဒိဋ္ဌံ ခော, အယ္ယာယော, နိဒာနံ။ ဥဒ္ဒိဋ္ဌာ အဋ္ဌ ပာရာဇိကာ ဓမ္မာ။ ဥဒ္ဒိဋ္ဌာ သတ္တရသ သင္ဃာဒိသေသာ ဓမ္မာ။ ဥဒ္ဒိဋ္ဌာ တိံသ နိသ္သဂ္ဂိယာ ပာစိတ္တိယာ ဓမ္မာ။ ဥဒ္ဒိဋ္ဌာ ဆသဋ္ဌိသတာ ပာစိတ္တိယာ ဓမ္မာ။ ဥဒ္ဒိဋ္ဌာ အဋ္ဌ ပာဋိဒေသနီယာ ဓမ္မာ။ ဥဒ္ဒိဋ္ဌာ သေခိယာ ဓမ္မာ။ ဥဒ္ဒိဋ္ဌာ သတ္တ အဓိကရဏသမထာ ဓမ္မာ။ ဧတ္တကံ တသ္သ ဘဂဝတော သုတ္တာဂတံ သုတ္တပရိယာပန္နံ အန္ဝဒ္ဓမာသံ ဥဒ္ဒေသံ အာဂစ္ဆတိ။ တတ္ထ သဗ္ဗာဟေဝ သမဂ္ဂာဟိ သမ္မောဒမာနာဟိ အဝိဝဒမာနာဟိ သိက္ခိတဗ္ဗန္တိ။
Uddiṭṭhaṃ kho, ayyāyo, nidānaṃ. Uddiṭṭhā aṭṭha pārājikā dhammā. Uddiṭṭhā sattarasa saṅghādisesā dhammā. Uddiṭṭhā tiṃsa nissaggiyā pācittiyā dhammā. Uddiṭṭhā chasaṭṭhisatā pācittiyā dhammā. Uddiṭṭhā aṭṭha pāṭidesanīyā dhammā. Uddiṭṭhā sekhiyā dhammā. Uddiṭṭhā satta adhikaraṇasamathā dhammā. Ettakaṃ tassa bhagavato suttāgataṃ suttapariyāpannaṃ anvaddhamāsaṃ uddesaṃ āgacchati. Tattha sabbāheva samaggāhi sammodamānāhi avivadamānāhi sikkhitabbanti.
ဘိက္ခုနိဝိဘင္ဂော နိဋ္ဌိတော။
Bhikkhunivibhaṅgo niṭṭhito.
ပာစိတ္တိယပာဠိ နိဋ္ဌိတာ။
Pācittiyapāḷi niṭṭhitā.
