| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၁၀. အဓိကရဏသမထသုတ္တဝဏ္ဏနာ
10. Adhikaraṇasamathasuttavaṇṇanā
၈၄. ဒသမေ အဓိကရီယန္တိ ဧတ္ထာတိ အဓိကရဏာနိ။ ကေ အဓိကရီယန္တိ? သမထာ။ ကထံ အဓိကရီယန္တိ? သမနဝသေန။ တသ္မာ တေ တေသံ သမနဝသေန ပဝတ္တန္တီတိ အာဟ ‘‘အဓိကရဏာနိ သမေန္တီ’’တိအာဒိ။ ဥပ္ပန္နာနံ ဥပ္ပနာနန္တိ ဥဋ္ဌိတာနံ ဥဋ္ဌိတာနံ။ သမထတ္ထန္တိ သမနတ္ထံ။ ဒီဃနိကာယေ သင္ဂီတိသုတ္တဝဏ္ဏနာယမ္ပိ (ဒီ. နိ. အဋ္ဌ. ၃.၃၃၁) ဝိတ္ထာရတောယေဝာတိ ဧတ္ထာယံ ဝိတ္ထာရနယော – အဓိကရဏေသု တာဝ ဓမ္မောတိ ဝာ အဓမ္မောတိ ဝာ အဋ္ဌာရသဟိ ဝတ္ထူဟိ ဝိဝဒန္တာနံ ဘိက္ခူနံ ယော ဝိဝာဒော, ဣဒံ ဝိဝာဒာဓိကရဏံ နာမ။ သီလဝိပတ္တိယာ ဝာ အာစာရဒိဋ္ဌိအာဇီဝဝိပတ္တိယာ ဝာ အနုဝဒန္တာနံ ယော အနုဝာဒော ဥပဝဒနာ စေဝ စောဒနာ စ, ဣဒံ အနုဝာဒာဓိကရဏံ နာမ။ မာတိကာယံ အာဂတာ ပဉ္စ, ဝိဘင္ဂေ ဒ္ဝေတိ သတ္တပိ အာပတ္တိက္ခန္ဓာ, ဣဒံ အာပတ္တာဓိကရဏံ နာမ။ ယံ သင္ဃသ္သ အပလောကနာဒီနံ စတုန္နံ ကမ္မာနံ ကရဏံ, ဣဒံ ကိစ္စာဓိကရဏံ နာမ။
84. Dasame adhikarīyanti etthāti adhikaraṇāni. Ke adhikarīyanti? Samathā. Kathaṃ adhikarīyanti? Samanavasena. Tasmā te tesaṃ samanavasena pavattantīti āha ‘‘adhikaraṇāni samentī’’tiādi. Uppannānaṃ uppanānanti uṭṭhitānaṃ uṭṭhitānaṃ. Samathatthanti samanatthaṃ. Dīghanikāye saṅgītisuttavaṇṇanāyampi (dī. ni. aṭṭha. 3.331) vitthāratoyevāti etthāyaṃ vitthāranayo – adhikaraṇesu tāva dhammoti vā adhammoti vā aṭṭhārasahi vatthūhi vivadantānaṃ bhikkhūnaṃ yo vivādo, idaṃ vivādādhikaraṇaṃ nāma. Sīlavipattiyā vā ācāradiṭṭhiājīvavipattiyā vā anuvadantānaṃ yo anuvādo upavadanā ceva codanā ca, idaṃ anuvādādhikaraṇaṃ nāma. Mātikāyaṃ āgatā pañca, vibhaṅge dveti sattapi āpattikkhandhā, idaṃ āpattādhikaraṇaṃ nāma. Yaṃ saṅghassa apalokanādīnaṃ catunnaṃ kammānaṃ karaṇaṃ, idaṃ kiccādhikaraṇaṃ nāma.
တတ္ထ ဝိဝာဒာဓိကရဏံ ဒ္ဝီဟိ သမထေဟိ သမ္မတိ သမ္မုခာဝိနယေန စ ယေဘုယ္ယသိကာယ စ။ သမ္မုခာဝိနယေနေဝ သမ္မမာနံ ယသ္မိံ ဝိဟာရေ ဥပ္ပန္နံ တသ္မိံယေဝ ဝာ, အညတ္ရ ဝူပသမေတုံ ဂစ္ဆန္တာနံ အန္တရာမဂ္ဂေ ဝာ, ယတ္ထ ဂန္တ္ဝာ သင္ဃသ္သ နိယ္ယာတိတံ, တတ္ထ သင္ဃေန ဝာ, သင္ဃေ ဝူပသမေတုံ အသက္ကောန္တေ တတ္ထေဝ ဥဗ္ဗာဟိကာယ သမ္မတပုဂ္ဂလေဟိ ဝာ ဝိနိစ္ဆိတံ သမ္မတိ။ ဧဝံ သမ္မမာနေ စ ပနေတသ္မိံ ယာ သင္ဃသမ္မုခတော ဓမ္မသမ္မုခတော ဝိနယသမ္မုခတာ ပုဂ္ဂလသမ္မုခတာ, အယံ သမ္မုခာဝိနယော နာမ။ တတ္ထ စ ကာရကသင္ဃသ္သ သင္ဃသာမဂ္ဂိဝသေန သမ္မုခိဘာဝော သင္ဃသမ္မုခတာ။ သမေတဗ္ဗသ္သ ဝတ္ထုနော ဘူတတ္တာ ဓမ္မသမ္မုခတာ။ ယထာ တံ သမေတဗ္ဗံ, တထေဝသ္သ သမနံ ဝိနယသမ္မုခတာ။ ယော စ ဝိဝဒတိ, ယေန စ ဝိဝဒတိ, တေသံ ဥဘိန္နံ အတ္ထပစ္စတ္ထိကာနံ သမ္မုခီဘာဝော ပုဂ္ဂလသမ္မုခတာ။ ဥဗ္ဗာဟိကာယ ဝူပသမေ ပနေတ္ထ သင္ဃသမ္မုခတာ ပရိဟာယတိ။ ဧဝံ တာဝ သမ္မုခာဝိနယေနေဝ သမ္မတိ။
Tattha vivādādhikaraṇaṃ dvīhi samathehi sammati sammukhāvinayena ca yebhuyyasikāya ca. Sammukhāvinayeneva sammamānaṃ yasmiṃ vihāre uppannaṃ tasmiṃyeva vā, aññatra vūpasametuṃ gacchantānaṃ antarāmagge vā, yattha gantvā saṅghassa niyyātitaṃ, tattha saṅghena vā, saṅghe vūpasametuṃ asakkonte tattheva ubbāhikāya sammatapuggalehi vā vinicchitaṃ sammati. Evaṃ sammamāne ca panetasmiṃ yā saṅghasammukhato dhammasammukhato vinayasammukhatā puggalasammukhatā, ayaṃ sammukhāvinayo nāma. Tattha ca kārakasaṅghassa saṅghasāmaggivasena sammukhibhāvo saṅghasammukhatā. Sametabbassa vatthuno bhūtattā dhammasammukhatā. Yathā taṃ sametabbaṃ, tathevassa samanaṃ vinayasammukhatā. Yo ca vivadati, yena ca vivadati, tesaṃ ubhinnaṃ atthapaccatthikānaṃ sammukhībhāvo puggalasammukhatā. Ubbāhikāya vūpasame panettha saṅghasammukhatā parihāyati. Evaṃ tāva sammukhāvinayeneva sammati.
သစေ ပနေဝမ္ပိ န သမ္မတိ, အထ နံ ဥဗ္ဗာဟိကာယ သမ္မတာ ဘိက္ခူ ‘‘န မယံ သက္ကောမ ဝူပသမေတု’’န္တိ သင္ဃသ္သေဝ နိယ္ယာတေန္တိ။ တတော သင္ဃော ပဉ္စင္ဂသမန္နာဂတံ ဘိက္ခုံ သလာကဂ္ဂာဟာပကံ သမ္မန္နတိ, တေန ဂုဠ္ဟကဝိဝဋကသကဏ္ဏဇပ္ပကေသု တီသု သလာကဂ္ဂာဟကေသု အညတရဝသေန သလာကံ ဂာဟာပေတ္ဝာ သန္နိပတိတာယ ပရိသာယ ဓမ္မဝာဒီနံ ယေဘုယ္ယတာယ ယထာ တေ ဓမ္မဝာဒိနော ဝဒန္တိ, ဧဝံ ဝူပသန္တံ အဓိကရဏံ သမ္မုခာဝိနယေန စ ယေဘုယ္ယသိကာယ စ ဝူပသန္တံ ဟောတိ။ တတ္ထ သမ္မုခာဝိနယော ဝုတ္တနယော ဧဝ။ ယံ ပန ယေဘုယ္ယသိကာကမ္မသ္သ ကရဏံ, အယံ ယေဘုယ္ယသိကာ နာမ။ ဧဝံ ဝိဝာဒာဓိကရဏံ ဒ္ဝီဟိ သမထေဟိ သမ္မတိ။
Sace panevampi na sammati, atha naṃ ubbāhikāya sammatā bhikkhū ‘‘na mayaṃ sakkoma vūpasametu’’nti saṅghasseva niyyātenti. Tato saṅgho pañcaṅgasamannāgataṃ bhikkhuṃ salākaggāhāpakaṃ sammannati, tena guḷhakavivaṭakasakaṇṇajappakesu tīsu salākaggāhakesu aññataravasena salākaṃ gāhāpetvā sannipatitāya parisāya dhammavādīnaṃ yebhuyyatāya yathā te dhammavādino vadanti, evaṃ vūpasantaṃ adhikaraṇaṃ sammukhāvinayena ca yebhuyyasikāya ca vūpasantaṃ hoti. Tattha sammukhāvinayo vuttanayo eva. Yaṃ pana yebhuyyasikākammassa karaṇaṃ, ayaṃ yebhuyyasikā nāma. Evaṃ vivādādhikaraṇaṃ dvīhi samathehi sammati.
အနုဝာဒာဓိကရဏံ စတူဟိ သမထေဟိ သမ္မတိ သမ္မုခာဝိနယေန စ သတိဝိနယေန စ အမူဠ္ဟဝိနယေန စ တသ္သပာပိယသိကာယ စ။ သမ္မုခာဝိနယေနေဝ သမ္မမာနံ ယော စ အနုဝဒတိ, ယဉ္စ အနုဝဒတိ, တေသံ ဝစနံ သုတ္ဝာ သစေ ကာစိ အာပတ္တိ နတ္ထိ, ဥဘော ခမာပေတ္ဝာ, သစေ အတ္ထိ အယံ နာမေတ္ထ အာပတ္တီတိ ဧဝံ ဝိနိစ္ဆိတံ ဝူပသမ္မတိ။ တတ္ထ သမ္မုခာဝိနယလက္ခဏံ ဝုတ္တနယမေဝ။
Anuvādādhikaraṇaṃ catūhi samathehi sammati sammukhāvinayena ca sativinayena ca amūḷhavinayena ca tassapāpiyasikāya ca. Sammukhāvinayeneva sammamānaṃ yo ca anuvadati, yañca anuvadati, tesaṃ vacanaṃ sutvā sace kāci āpatti natthi, ubho khamāpetvā, sace atthi ayaṃ nāmettha āpattīti evaṃ vinicchitaṃ vūpasammati. Tattha sammukhāvinayalakkhaṇaṃ vuttanayameva.
ယဒာ ပန ခီဏာသဝသ္သ ဘိက္ခုနော အမူလိကာယ သီလဝိပတ္တိယာ အနုဒ္ဓံသိတသ္သ သတိဝိနယံ ယာစမာနသ္သ သင္ဃော ဉတ္တိစတုတ္ထေန ကမ္မေန သတိဝိနယံ ဒေတိ, တဒာ သမ္မုခာဝိနယေန စ သတိဝိနယေန စ ဝူပသန္တံ ဟောတိ။ ဒိန္နေ ပန သတိဝိနယေ ပုန တသ္မိံ ပုဂ္ဂလေ ကသ္သစိ အနုဝာဒော န ရုဟတိ။ ယဒာ ဥမ္မတ္တကော ဘိက္ခု ဥမ္မာဒဝသေန ကတေ အသ္သာမဏကေ အဇ္ဈာစာရေ ‘‘သရတာယသ္မာ ဧဝရူပိံ အာပတ္တိ’’န္တိ ဘိက္ခူဟိ စောဒိယမာနော ‘‘ဥမ္မတ္တကေန မေ, အာဝုသော, ဧတံ ကတံ, နာဟံ တံ သရာမီ’’တိ ဘဏန္တောပိ ဘိက္ခူဟိ စောဒိယမာနောဝ ပုန အစောဒနတ္ထာယ အမူဠ္ဟဝိနယံ ယာစတိ, သင္ဃော စသ္သ ဉတ္တိစတုတ္ထေန ကမ္မေန အမူဠ္ဟဝိနယံ ဒေတိ။ တဒာ သမ္မုခာဝိနယေန စ အမူဠ္ဟဝိနယေန စ ဝူပသန္တံ ဟောတိ။ ဒိန္နေ ပန အမူဠ္ဟဝိနယေ ပုန တသ္မိံ ပုဂ္ဂလေ ကသ္သစိ တပ္ပစ္စယာ အနုဝာဒော န ရုဟတိ။ ယဒာ ပန ပာရာဇိကေန ဝာ ပာရာဇိကသာမန္တေန ဝာ စောဒိယမာနသ္သ အညေနညံ ပဋိစရတော ပာပုသ္သန္နတာယ ပာပိယသ္သ ပုဂ္ဂလသ္သ ‘‘သစာယံ အစ္ဆိန္နမူလော ဘဝိသ္သတိ, သမ္မာ ဝတ္တိတ္ဝာ ဩသာရဏံ လဘိသ္သတိ။ သစေ ဆိန္နမူလော, အယမေဝသ္သ နာသနာ ဘဝိသ္သတီ’’တိ မညမာနော သင္ဃော ဉတ္တိစတုတ္ထေန ကမ္မေန တသ္သပာပိယသိကံ ကရောတိ, တဒာ သမ္မုခာဝိနယေန စ တသ္သပာပိယသိကာယ စ ဝူပသန္တံ ဟောတီတိ။ ဧဝံ အနုဝာဒာဓိကရဏံ စတူဟိ သမထေဟိ သမ္မတိ။
Yadā pana khīṇāsavassa bhikkhuno amūlikāya sīlavipattiyā anuddhaṃsitassa sativinayaṃ yācamānassa saṅgho ñatticatutthena kammena sativinayaṃ deti, tadā sammukhāvinayena ca sativinayena ca vūpasantaṃ hoti. Dinne pana sativinaye puna tasmiṃ puggale kassaci anuvādo na ruhati. Yadā ummattako bhikkhu ummādavasena kate assāmaṇake ajjhācāre ‘‘saratāyasmā evarūpiṃ āpatti’’nti bhikkhūhi codiyamāno ‘‘ummattakena me, āvuso, etaṃ kataṃ, nāhaṃ taṃ sarāmī’’ti bhaṇantopi bhikkhūhi codiyamānova puna acodanatthāya amūḷhavinayaṃ yācati, saṅgho cassa ñatticatutthena kammena amūḷhavinayaṃ deti. Tadā sammukhāvinayena ca amūḷhavinayena ca vūpasantaṃ hoti. Dinne pana amūḷhavinaye puna tasmiṃ puggale kassaci tappaccayā anuvādo na ruhati. Yadā pana pārājikena vā pārājikasāmantena vā codiyamānassa aññenaññaṃ paṭicarato pāpussannatāya pāpiyassa puggalassa ‘‘sacāyaṃ acchinnamūlo bhavissati, sammā vattitvā osāraṇaṃ labhissati. Sace chinnamūlo, ayamevassa nāsanā bhavissatī’’ti maññamāno saṅgho ñatticatutthena kammena tassapāpiyasikaṃ karoti, tadā sammukhāvinayena ca tassapāpiyasikāya ca vūpasantaṃ hotīti. Evaṃ anuvādādhikaraṇaṃ catūhi samathehi sammati.
အာပတ္တာဓိကရဏံ တီဟိ သမထေဟိ သမ္မတိ သမ္မုခာဝိနယေန စ ပဋိညာတကရဏေန စ တိဏဝတ္ထာရကေန စ။ တသ္သ သမ္မုခာဝိနယေနေဝ ဝူပသမော နတ္ထိ။ ယဒာ ပန ဧကသ္သ ဝာ ဘိက္ခုနော သန္တိကေ သင္ဃဂဏမဇ္ဈေသု ဝာ ဘိက္ခု လဟုကံ အာပတ္တိံ ဒေသေတိ, တဒာ အာပတ္တာဓိကရဏံ သမ္မုခာဝိနယေန စ ပဋိညာတကရဏေန စ ဝူပသမ္မတိ။ တတ္ထ သမ္မုခာဝိနယေ တာဝ ယော စ ဒေသေတိ, ယသ္သ စ ဒေသေတိ, တေသံ သမ္မုခီဘာဝော ပုဂ္ဂလသမ္မုခတော။ သေသံ ဝုတ္တနယမေဝ။
Āpattādhikaraṇaṃ tīhi samathehi sammati sammukhāvinayena ca paṭiññātakaraṇena ca tiṇavatthārakena ca. Tassa sammukhāvinayeneva vūpasamo natthi. Yadā pana ekassa vā bhikkhuno santike saṅghagaṇamajjhesu vā bhikkhu lahukaṃ āpattiṃ deseti, tadā āpattādhikaraṇaṃ sammukhāvinayena ca paṭiññātakaraṇena ca vūpasammati. Tattha sammukhāvinaye tāva yo ca deseti, yassa ca deseti, tesaṃ sammukhībhāvo puggalasammukhato. Sesaṃ vuttanayameva.
ပုဂ္ဂလသ္သ စ ဂဏသ္သ စ ဒေသနာကာလေ သင္ဃသမ္မုခတော ပရိဟာယတိ။ ယံ ပနေတ္ထ ‘‘အဟံ, ဘန္တေ, ဣတ္ထန္နာမံ အာပတ္တိံ အာပန္နော’’တိ စ ‘‘ပသ္သသီ’’တိ စ ‘‘အာမ, ပသ္သာမီ’’တိ စ ပဋိညာတာယ ‘‘အာယတိံ သံဝရေယ္ယာသီ’’တိ ကရဏံ, တံ ပဋိညာတကရဏံ နာမ။ သင္ဃာဒိသေသေ ပရိဝာသာဒိယာစနာ ပဋိညာ, ပရိဝာသာဒီနံ ဒာနံ ပဋိညာတကရဏံ နာမ။
Puggalassa ca gaṇassa ca desanākāle saṅghasammukhato parihāyati. Yaṃ panettha ‘‘ahaṃ, bhante, itthannāmaṃ āpattiṃ āpanno’’ti ca ‘‘passasī’’ti ca ‘‘āma, passāmī’’ti ca paṭiññātāya ‘‘āyatiṃ saṃvareyyāsī’’ti karaṇaṃ, taṃ paṭiññātakaraṇaṃ nāma. Saṅghādisese parivāsādiyācanā paṭiññā, parivāsādīnaṃ dānaṃ paṭiññātakaraṇaṃ nāma.
ဒ္ဝေပက္ခဇာတာ ပန ဘဏ္ဍနကာရကာ ဘိက္ခူ ဗဟုံ အသ္သာမဏကံ အဇ္ဈာစာရံ စရိတ္ဝာ ပုန လဇ္ဇိဓမ္မေ ဥပ္ပန္နေ ‘‘သစေ မယံ ဣမာဟိ အာပတ္တီဟိ အညမညံ ကာရေသ္သာမ, သိယာပိ တံ အဓိကရဏံ ကက္ခဠတ္တာယ ဝာဠတ္တာယ သံဝတ္တေယ္ယာ’’တိ အညမညံ အာပတ္တိယာ ကာရာပနေ ဒောသံ ဒိသ္ဝာ ယဒာ ဘိက္ခူ တိဏဝတ္ထာရကကမ္မံ ကရောန္တိ, တဒာ အာပတ္တာဓိကရဏံ သမ္မုခာဝိနယေန စ တိဏဝတ္ထာရကေန စ သမ္မတိ။ တတ္ရ ဟိ ယတ္တကာ ဟတ္ထပာသူပဂတာ ‘‘န မေတံ ခမတီ’’တိ ဧဝံ ဒိဋ္ဌာဝိကမ္မံ အကတ္ဝာ ‘‘ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ န ဥက္ကောဋေန္တိ, နိဒ္ဒမ္ပိ ဩက္ကန္တာ ဟောန္တိ, သဗ္ဗေသံ ဌပေတ္ဝာ ထုလ္လဝဇ္ဇဉ္စ ဂိဟိပဋိသံယုတ္တဉ္စ သဗ္ဗာပတ္တိယော ဝုဋ္ဌဟန္တိ။ ဧဝံ အာပတ္တာဓိကရဏံ တီဟိ သမထေဟိ သမ္မတိ။
Dvepakkhajātā pana bhaṇḍanakārakā bhikkhū bahuṃ assāmaṇakaṃ ajjhācāraṃ caritvā puna lajjidhamme uppanne ‘‘sace mayaṃ imāhi āpattīhi aññamaññaṃ kāressāma, siyāpi taṃ adhikaraṇaṃ kakkhaḷattāya vāḷattāya saṃvatteyyā’’ti aññamaññaṃ āpattiyā kārāpane dosaṃ disvā yadā bhikkhū tiṇavatthārakakammaṃ karonti, tadā āpattādhikaraṇaṃ sammukhāvinayena ca tiṇavatthārakena ca sammati. Tatra hi yattakā hatthapāsūpagatā ‘‘na metaṃ khamatī’’ti evaṃ diṭṭhāvikammaṃ akatvā ‘‘dukkaṭaṃ kammaṃ puna kātabbaṃ kamma’’nti na ukkoṭenti, niddampi okkantā honti, sabbesaṃ ṭhapetvā thullavajjañca gihipaṭisaṃyuttañca sabbāpattiyo vuṭṭhahanti. Evaṃ āpattādhikaraṇaṃ tīhi samathehi sammati.
ကိစ္စာဓိကရဏံ ဧကေန သမထေန သမ္မတိ သမ္မုခာဝိနယေနေဝ။ ဣတိ ဣမာနိ စတ္တာရိ အဓိကရဏာနိ ယထာနုရူပံ ဣမေဟိ သတ္တဟိ သမထေဟိ သမ္မန္တိ။ တေန ဝုတ္တံ – ‘‘ဥပ္ပန္နုပ္ပန္နာနံ အဓိကရဏာနံ သမထာယ ဝူပသမာယ သမ္မုခာဝိနယော ဒာတဗ္ဗော။ပေ.။ တိဏဝတ္ထာရကော’’တိ။ သေသံ သဗ္ဗတ္ထ ဥတ္တာနမေဝ။
Kiccādhikaraṇaṃ ekena samathena sammati sammukhāvinayeneva. Iti imāni cattāri adhikaraṇāni yathānurūpaṃ imehi sattahi samathehi sammanti. Tena vuttaṃ – ‘‘uppannuppannānaṃ adhikaraṇānaṃ samathāya vūpasamāya sammukhāvinayo dātabbo…pe… tiṇavatthārako’’ti. Sesaṃ sabbattha uttānameva.
အဓိကရဏသမထသုတ္တဝဏ္ဏနာ နိဋ္ဌိတာ။
Adhikaraṇasamathasuttavaṇṇanā niṭṭhitā.
ဝိနယဝဂ္ဂဝဏ္ဏနာ နိဋ္ဌိတာ။
Vinayavaggavaṇṇanā niṭṭhitā.
ဣတိ မနောရထပူရဏိယာ အင္ဂုတ္တရနိကာယ-အဋ္ဌကထာယ
Iti manorathapūraṇiyā aṅguttaranikāya-aṭṭhakathāya
သတ္တကနိပာတဝဏ္ဏနာယ အနုတ္တာနတ္ထဒီပနာ သမတ္တာ။
Sattakanipātavaṇṇanāya anuttānatthadīpanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. အဓိကရဏသမထသုတ္တံ • 10. Adhikaraṇasamathasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. အဓိကရဏသမထသုတ္တဝဏ္ဏနာ • 10. Adhikaraṇasamathasuttavaṇṇanā
