| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
அதி⁴கரணஸமத²வண்ணனா
Adhikaraṇasamathavaṇṇanā
க³ணனபரிச்சே²தோ³தி ஸங்க்²யாபரிச்சே²தோ³. அதி⁴கரீயந்தி எத்தா²தி அதி⁴கரணானி. கே அதி⁴கரீயந்தி? ஸமதா². கத²ங் அதி⁴கரீயந்தி? ஸமனவஸேன. தஸ்மா தே தேஸங் ஸமனவஸேன பவத்தந்தீதி ஆஹ ‘‘அதி⁴கரணானி ஸமெந்தீ’’திஆதி³. உப்பன்னானங் உப்பன்னானந்தி உட்டி²தானங் உட்டி²தானங். கிஞ்சாபி அதி⁴கரணட்டே²ன ஏகவித⁴ங், ததா²பி வத்து²வஸேன நானா ஹோதீதி ‘‘அதி⁴கரணான’’ந்தி ப³ஹுவசனங் கதங். இதா³னி தஸ்ஸ நானாத்தங் த³ஸ்ஸெத்வா விவரிதுங் ‘‘விவாதா³தி⁴கரண’’ந்திஆதி³மாஹ. விவாதோ³யேவ அதி⁴கரணங் விவாதா³தி⁴கரணங். ஏஸ நயோ ஸேஸேஸுபி. ஸமத²த்த²ந்தி ஸமனத்த²ங்.
Gaṇanaparicchedoti saṅkhyāparicchedo. Adhikarīyanti etthāti adhikaraṇāni. Ke adhikarīyanti? Samathā. Kathaṃ adhikarīyanti? Samanavasena. Tasmā te tesaṃ samanavasena pavattantīti āha ‘‘adhikaraṇāni samentī’’tiādi. Uppannānaṃ uppannānanti uṭṭhitānaṃ uṭṭhitānaṃ. Kiñcāpi adhikaraṇaṭṭhena ekavidhaṃ, tathāpi vatthuvasena nānā hotīti ‘‘adhikaraṇāna’’nti bahuvacanaṃ kataṃ. Idāni tassa nānāttaṃ dassetvā vivarituṃ ‘‘vivādādhikaraṇa’’ntiādimāha. Vivādoyeva adhikaraṇaṃ vivādādhikaraṇaṃ. Esa nayo sesesupi. Samathatthanti samanatthaṃ.
அதி⁴கரணஸ்ஸ ஸம்முகா² வினயனதோ ஸம்முகா²வினயோ. த³ப்³ப³மல்லபுத்தத்தே²ரஸதி³ஸஸ்ஸ ஸதிவேபுல்லப்பத்தஸ்ஸ கீ²ணாஸவஸ்ஸேவ தா³தப்³போ³ வினயோ ஸதிவினயோ. ஸம்மூள்ஹஸ்ஸ க³க்³க³பி⁴க்கு²ஸதி³ஸஸ்ஸ உம்மத்தகஸ்ஸ தா³தப்³போ³ வினயோ அமூள்ஹவினயோ. படிஞ்ஞாதேன கரணபூ⁴தேன கரணங் படிஞ்ஞாதகரணங். அத² வா படிஞ்ஞாதே ஆபன்னபா⁴வாதி³கே கரணங் கிரியா, ‘‘ஆயதிங் ஸங்வரெய்யாஸீ’’தி பரிவாஸதா³னாதி³வஸேன ச பவத்தங் வசீகம்மங் படிஞ்ஞாதகரணங். யஸ்ஸா கிரியாய த⁴ம்மவாதி³னோ ப³ஹுதரா, ஏஸா யேபு⁴ய்யஸிகா நாம. யோ பாபுஸ்ஸன்னதாய பாபியோ, புக்³க³லோ, தஸ்ஸ உபவாளபி⁴க்கு²ஸதி³ஸஸ்ஸ கத்தப்³ப³தோ தஸ்ஸபாபியஸிகா, அலுத்தஸமாஸோயங். திணவத்தா²ரகஸதி³ஸத்தா திணவத்தா²ரகோ. யதா² (சூளவ॰ அட்ட²॰ 212) ஹி கூ³த²ங் வா முத்தங் வா க⁴ட்டியமானங் து³க்³க³ந்த⁴தாய பா³த⁴தி, திணேஹி அவத்த²ரித்வா ஸுப்படிச்சா²தி³தஸ்ஸ பனஸ்ஸ க³ந்தோ⁴ ந பா³த⁴தி, ஏவமேவ யங் அதி⁴கரணங் மூலானுமூலங் க³ந்த்வா வூபஸமியமானங் கக்க²ளத்தாய வாளத்தாய பே⁴தா³ய ஸங்வத்ததி, தங் இமினா கம்மேன வூபஸந்தங் கூ³த²ங் விய திணவத்தா²ரகேன படிச்ச²ன்னங் ஸுவூபஸந்தங் ஹோதி. தேன வுத்தங் ‘‘திணவத்தா²ரகஸதி³ஸத்தா திணவத்தா²ரகோ’’தி.
Adhikaraṇassa sammukhā vinayanato sammukhāvinayo. Dabbamallaputtattherasadisassa sativepullappattassa khīṇāsavasseva dātabbo vinayo sativinayo. Sammūḷhassa gaggabhikkhusadisassa ummattakassa dātabbo vinayo amūḷhavinayo. Paṭiññātena karaṇabhūtena karaṇaṃ paṭiññātakaraṇaṃ. Atha vā paṭiññāte āpannabhāvādike karaṇaṃ kiriyā, ‘‘āyatiṃ saṃvareyyāsī’’ti parivāsadānādivasena ca pavattaṃ vacīkammaṃ paṭiññātakaraṇaṃ. Yassā kiriyāya dhammavādino bahutarā, esā yebhuyyasikā nāma. Yo pāpussannatāya pāpiyo, puggalo, tassa upavāḷabhikkhusadisassa kattabbato tassapāpiyasikā, aluttasamāsoyaṃ. Tiṇavatthārakasadisattā tiṇavatthārako. Yathā (cūḷava. aṭṭha. 212) hi gūthaṃ vā muttaṃ vā ghaṭṭiyamānaṃ duggandhatāya bādhati, tiṇehi avattharitvā suppaṭicchāditassa panassa gandho na bādhati, evameva yaṃ adhikaraṇaṃ mūlānumūlaṃ gantvā vūpasamiyamānaṃ kakkhaḷattāya vāḷattāya bhedāya saṃvattati, taṃ iminā kammena vūpasantaṃ gūthaṃ viya tiṇavatthārakena paṭicchannaṃ suvūpasantaṃ hoti. Tena vuttaṃ ‘‘tiṇavatthārakasadisattā tiṇavatthārako’’ti.
தத்ராதி தேஸு ஸத்தஸு அதி⁴கரணஸமதே²ஸு. ‘‘அட்டா²ரஸஹி வத்தூ²ஹீ’’தி லக்க²ணவசனமேதங் ‘‘யதி³ மே ப்³யாதி⁴கா ப⁴வெய்யுங், தா³தப்³ப³மித³மோஸத⁴’’ந்திஆதி³னா (ஸங்॰ நி॰ டீ॰ 2.3.39-42) விய. தஸ்மா தேஸு அஞ்ஞதரேன விவத³ந்தா அட்டா²ரஸஹி வத்தூ²ஹி விவத³ந்தீதி வுச்சதி. விவாதோ³தி விபச்சனீகவாதோ³. உபவத³னாதி அக்கோஸோ. சோத³னாதி அனுயோகோ³. த்³வேதி து²ல்லச்சயது³ப்³பா⁴ஸிதாபத்தியோ த்³வே. சதுன்னங் கம்மானங் கரணந்தி சதுன்னங் கம்மானங் அந்தரே யஸ்ஸ கஸ்ஸசி கம்மஸ்ஸ கரணங்.
Tatrāti tesu sattasu adhikaraṇasamathesu. ‘‘Aṭṭhārasahi vatthūhī’’ti lakkhaṇavacanametaṃ ‘‘yadi me byādhikā bhaveyyuṃ, dātabbamidamosadha’’ntiādinā (saṃ. ni. ṭī. 2.3.39-42) viya. Tasmā tesu aññatarena vivadantā aṭṭhārasahi vatthūhi vivadantīti vuccati. Vivādoti vipaccanīkavādo. Upavadanāti akkoso. Codanāti anuyogo. Dveti thullaccayadubbhāsitāpattiyo dve. Catunnaṃ kammānaṃ karaṇanti catunnaṃ kammānaṃ antare yassa kassaci kammassa karaṇaṃ.
ஏவங் அதி⁴கரணானி த³ஸ்ஸெத்வா இதா³னி தேஸு இத³ங் அதி⁴கரணங் எத்தகேஹி ஸமதே²ஹி ஸம்மதீதி த³ஸ்ஸேதுங் ‘‘தத்தா²’’திஆதி³ வுத்தங். யஸ்மிங் விஹாரே உப்பன்னங் , தஸ்மிங்யேவ வா ஸம்மதீதி ஸம்ப³ந்தோ⁴. ஏவங் ஸேஸேஸுபி. தத்த² யஸ்மிங் விஹாரே உப்பன்னந்தி ‘‘யஸ்மிங் விஹாரே மய்ஹங் இமினா பத்தோ க³ஹிதோ, சீவரங் க³ஹித’’ந்திஆதி³னா (பரி॰ அட்ட²॰ 341) நயேன பத்தசீவராதீ³னங் அத்தா²ய விவாதா³தி⁴கரணங் உப்பன்னங் ஹோதி. தஸ்மிங்யேவ வா ஸம்மதீதி தஸ்மிங் விஹாரேயேவ ஆவாஸிகேஹி ஸன்னிபதித்வா ‘‘அலங், ஆவுஸோ’’தி அத்த²பச்சத்தி²கே ஸஞ்ஞாபெத்வா பாளிமுத்தகவினிச்ச²யேனேவ வூபஸமெந்தேஹி ஸம்மதி. ஸசே பன தங் அதி⁴கரணங் நேவாஸிகா வூபஸமேதுங் ந ஸக்கொந்தி, அத²ஞ்ஞோ வினயத⁴ரோ ஆக³ந்த்வா ‘‘கிங், ஆவுஸோ, இமஸ்மிங் விஹாரே உபோஸதோ² வா பவாரணா வா டி²தா’’தி புச்ச²தி, தேஹி ச தஸ்மிங் காரணே கதி²தே தங் அதி⁴கரணங் க²ந்த⁴கதோ ச பரிவாரதோ ச ஸுத்தேன வினிச்சி²னித்வா வூபஸமேதி. ஏவம்பி ஏதஸ்மிங்யேவ ஸம்மதீதி த³ட்ட²ப்³ப³ங்.
Evaṃ adhikaraṇāni dassetvā idāni tesu idaṃ adhikaraṇaṃ ettakehi samathehi sammatīti dassetuṃ ‘‘tatthā’’tiādi vuttaṃ. Yasmiṃ vihāre uppannaṃ , tasmiṃyeva vā sammatīti sambandho. Evaṃ sesesupi. Tattha yasmiṃ vihāre uppannanti ‘‘yasmiṃ vihāre mayhaṃ iminā patto gahito, cīvaraṃ gahita’’ntiādinā (pari. aṭṭha. 341) nayena pattacīvarādīnaṃ atthāya vivādādhikaraṇaṃ uppannaṃ hoti. Tasmiṃyeva vā sammatīti tasmiṃ vihāreyeva āvāsikehi sannipatitvā ‘‘alaṃ, āvuso’’ti atthapaccatthike saññāpetvā pāḷimuttakavinicchayeneva vūpasamentehi sammati. Sace pana taṃ adhikaraṇaṃ nevāsikā vūpasametuṃ na sakkonti, athañño vinayadharo āgantvā ‘‘kiṃ, āvuso, imasmiṃ vihāre uposatho vā pavāraṇā vā ṭhitā’’ti pucchati, tehi ca tasmiṃ kāraṇe kathite taṃ adhikaraṇaṃ khandhakato ca parivārato ca suttena vinicchinitvā vūpasameti. Evampi etasmiṃyeva sammatīti daṭṭhabbaṃ.
அஞ்ஞத்த² வூபஸமேதுங் க³ச்ச²ந்தானங் அந்தராமக்³கே³ வா ஸம்மதீதி ‘‘ந மயங் ஏதஸ்ஸ வினிச்ச²யே திட்டா²ம, நாயங் வினயே குஸலோ, அமுகஸ்மிங் நாம கா³மே வினயத⁴ரா தே²ரா வஸந்தி, தத்த² க³ந்த்வா வினிச்சி²னிஸ்ஸாமா’’தி க³ச்ச²ந்தானங் அந்தராமக்³கே³ வா காரணங் ஸல்லக்கெ²த்வா அஞ்ஞமஞ்ஞங் ஸஞ்ஞாபெந்தேஹி, அஞ்ஞேஹி வா தே பி⁴க்கூ² நிஜ்ஜா²பெந்தேஹி ஸம்மதி. ந ஹேவ கோ² பன அஞ்ஞமஞ்ஞஸஞ்ஞத்தியா வா ஸபா⁴க³பி⁴க்கு²னிஜ்ஜா²பனேன வா வூபஸந்தங் ஹோதி, அபிச கோ² படிபத²ங் ஆக³ச்ச²ந்தோ ஏகோ வினயத⁴ரோ தி³ஸ்வா ‘‘கத்தா²வுஸோ, க³ச்ச²தா²’’தி புச்சி²த்வா ‘‘அமுகங் நாம கா³மங் இமினா நாம கரணேனா’’தி வுத்தே ‘‘அலங், ஆவுஸோ, கிங் தத்த² க³தேனா’’தி தத்தே²வ த⁴ம்மேன வினயேன தங் அதி⁴கரணங் வூபஸமேதி. ஏவம்பி அந்தராமக்³கே³ வூபஸம்மதி நாம.
Aññattha vūpasametuṃ gacchantānaṃ antarāmagge vā sammatīti ‘‘na mayaṃ etassa vinicchaye tiṭṭhāma, nāyaṃ vinaye kusalo, amukasmiṃ nāma gāme vinayadharā therā vasanti, tattha gantvā vinicchinissāmā’’ti gacchantānaṃ antarāmagge vā kāraṇaṃ sallakkhetvā aññamaññaṃ saññāpentehi, aññehi vā te bhikkhū nijjhāpentehi sammati. Na heva kho pana aññamaññasaññattiyā vā sabhāgabhikkhunijjhāpanena vā vūpasantaṃ hoti, apica kho paṭipathaṃ āgacchanto eko vinayadharo disvā ‘‘katthāvuso, gacchathā’’ti pucchitvā ‘‘amukaṃ nāma gāmaṃ iminā nāma karaṇenā’’ti vutte ‘‘alaṃ, āvuso, kiṃ tattha gatenā’’ti tattheva dhammena vinayena taṃ adhikaraṇaṃ vūpasameti. Evampi antarāmagge vūpasammati nāma.
யத்த² க³ந்த்வா ஸங்க⁴ஸ்ஸ நிய்யாதிதங், தத்த² ஸங்கே⁴ன வாதி ஸசே பன ‘‘அலங், ஆவுஸோ, கிங் தத்த² க³தேனா’’தி வுச்சமானாபி ‘‘மயங் தத்தே²வ க³ந்த்வா வினிச்ச²யங் பாபெஸ்ஸாமா’’தி (பரி॰ அட்ட²॰ 341) வினயத⁴ரஸ்ஸ வசனங் அனாதி³யித்வா யத்த² க³ந்த்வா ஸபா⁴க³பி⁴க்கு²ஸங்க⁴ஸ்ஸ அதி⁴கரணங் நிய்யாதிதங், தத்த² ஸங்கே⁴ன ‘‘அலங், ஆவுஸோ, ஸங்க⁴ஸன்னிபாதங் நாம க³ருக’’ந்தி தத்தே²வ நிஸீதி³த்வா வினிச்சி²தங் ஸம்மதி. ந ஹேவ கோ² பன ஸபா⁴க³பி⁴க்கூ²னங் ஸஞ்ஞத்தியா வூபஸந்தங் ஹோதி, அபிச கோ² ஸங்க⁴ங் ஸன்னிபாதெத்வா ஆரோசிதங் ஸங்க⁴மஜ்ஜே² வினயத⁴ரா வூபஸமெந்தி. ஏவம்பி தத்த² ஸங்கே⁴ன வினிச்சி²தங் ஸம்மதி நாம.
Yattha gantvā saṅghassa niyyātitaṃ, tattha saṅghena vāti sace pana ‘‘alaṃ, āvuso, kiṃ tattha gatenā’’ti vuccamānāpi ‘‘mayaṃ tattheva gantvā vinicchayaṃ pāpessāmā’’ti (pari. aṭṭha. 341) vinayadharassa vacanaṃ anādiyitvā yattha gantvā sabhāgabhikkhusaṅghassa adhikaraṇaṃ niyyātitaṃ, tattha saṅghena ‘‘alaṃ, āvuso, saṅghasannipātaṃ nāma garuka’’nti tattheva nisīditvā vinicchitaṃ sammati. Na heva kho pana sabhāgabhikkhūnaṃ saññattiyā vūpasantaṃ hoti, apica kho saṅghaṃ sannipātetvā ārocitaṃ saṅghamajjhe vinayadharā vūpasamenti. Evampi tattha saṅghena vinicchitaṃ sammati nāma.
உப்³பா³ஹிகாய ஸம்மதபுக்³க³லேஹி வா வினிச்சி²தந்தி அபலோகெத்வா வா க²ந்த⁴கே வுத்தாய வா ஞத்திது³தியகம்மவாசாய ஸம்மதேஹி புக்³க³லேஹி விஸுங் வா நிஸீதி³த்வா, தஸ்ஸாயேவ வா பரிஸாய ‘‘அஞ்ஞேன ந கிஞ்சி கதே²தப்³ப³’’ந்தி (சூளவ॰ அட்ட²॰ 231) ஸாவெத்வா வினிச்சி²தங். அயந்தி அயங் யதா²வுத்தா சதுப்³பி³தா⁴ ஸம்முக²தா.
Ubbāhikāyasammatapuggalehi vā vinicchitanti apaloketvā vā khandhake vuttāya vā ñattidutiyakammavācāya sammatehi puggalehi visuṃ vā nisīditvā, tassāyeva vā parisāya ‘‘aññena na kiñci kathetabba’’nti (cūḷava. aṭṭha. 231) sāvetvā vinicchitaṃ. Ayanti ayaṃ yathāvuttā catubbidhā sammukhatā.
காரகஸங்க⁴ஸ்ஸாதி வூபஸமேதுங் ஸன்னிபதிதஸ்ஸ காரகஸங்க⁴ஸ்ஸ. ஸங்க⁴ஸாமக்³கி³வஸேன ஸம்முகீ²பா⁴வோதி ‘‘யாவதிகா பி⁴க்கூ² கம்மப்பத்தா, தே ஆக³தா ஹொந்தி, ச²ந்தா³ரஹானங் ச²ந்தோ³ ஆஹடோ ஹோதி, ஸம்முகீ²பூ⁴தா ந படிக்கோஸந்தீ’’தி (சூளவ॰ 228) ஏவங் வுத்தஸங்க⁴ஸாமக்³கி³வஸேன ஸம்முகீ²பா⁴வோ, ஏதேன யதா² ததா² பதா⁴னகாரகபுக்³க³லானங் ஸம்முக²தாமத்தங் ஸங்க⁴ஸம்முக²தா நாம ந ஹோதீதி த³ஸ்ஸேதி. பூ⁴ததாதி தச்ச²தா. ஸச்சபரியாயோ ஹி இத⁴ த⁴ம்மஸத்³தோ³ ‘‘த⁴ம்மவாதீ³’’திஆதீ³ஸு (தீ³॰ நி॰ 1.9, 194) விய. வினேதி ஏதேனாதி வினயோ, தஸ்ஸ தஸ்ஸ அதி⁴கரணஸ்ஸ வூபஸமனாய ப⁴க³வதா வுத்தவிதி⁴, தஸ்ஸ வினயஸ்ஸ ஸம்முக²தா வினயஸம்முக²தா. தேனாஹ ‘‘யதா² தங்…பே॰… வினயஸம்முக²தா’’தி. யேனாதி யேன புக்³க³லேன. அத்த²பச்சத்தி²கானந்தி (ஸாரத்த²॰ டீ॰ சூளவக்³க³ 3.228) விவாத³வத்து²ஸங்கா²தே அத்தே² பச்சத்தி²கானங். ஸங்க⁴ஸம்முக²தா பரிஹாயதி ஸம்மதபுக்³க³லேஹேவ வூபஸமனதோ.
Kārakasaṅghassāti vūpasametuṃ sannipatitassa kārakasaṅghassa. Saṅghasāmaggivasena sammukhībhāvoti ‘‘yāvatikā bhikkhū kammappattā, te āgatā honti, chandārahānaṃ chando āhaṭo hoti, sammukhībhūtā na paṭikkosantī’’ti (cūḷava. 228) evaṃ vuttasaṅghasāmaggivasena sammukhībhāvo, etena yathā tathā padhānakārakapuggalānaṃ sammukhatāmattaṃ saṅghasammukhatā nāma na hotīti dasseti. Bhūtatāti tacchatā. Saccapariyāyo hi idha dhammasaddo ‘‘dhammavādī’’tiādīsu (dī. ni. 1.9, 194) viya. Vineti etenāti vinayo, tassa tassa adhikaraṇassa vūpasamanāya bhagavatā vuttavidhi, tassa vinayassa sammukhatā vinayasammukhatā. Tenāha ‘‘yathā taṃ…pe… vinayasammukhatā’’ti. Yenāti yena puggalena. Atthapaccatthikānanti (sārattha. ṭī. cūḷavagga 3.228) vivādavatthusaṅkhāte atthe paccatthikānaṃ. Saṅghasammukhatā parihāyati sammatapuggaleheva vūpasamanato.
நந்தி விவாதா³தி⁴கரணங். பஞ்சங்க³ஸமன்னாக³தந்தி (சூளவ॰ 234) ‘‘ந ச²ந்தா³க³திங் க³ச்ச²தி, ந தோ³ஸாக³திங் க³ச்ச²தி, ந மோஹாக³திங் க³ச்ச²தி, ந ப⁴யாக³திங் க³ச்ச²தி, க³ஹிதாக³ஹிதங் ஜானாதீ’’தி வுத்தேஹி பஞ்சஹங்கே³ஹி ஸமன்னாக³தங். கூ³ள்ஹகவிவடகஸகண்ணஜப்பகேஸு தீஸு ஸலாகக்³கா³ஹேஸூதி ‘‘அனுஜானாமி, பி⁴க்க²வே, தேஸங் பி⁴க்கூ²னங் ஸஞ்ஞத்தியா தயோ ஸலாகக்³கா³ஹகே கூ³ள்ஹகங், விவடகங், ஸகண்ணஜப்பக’’ந்தி (சூளவ॰ 235) ஸமத²க்க²ந்த⁴கே வுத்தேஸு தீஸு ஸலாகக்³கா³ஹேஸு. ஸலாகங் கா³ஹெத்வாதி த⁴ம்மவாதீ³னஞ்ச அத⁴ம்மவாதீ³னஞ்ச ஸலாகாயோ நிமித்தஸஞ்ஞங் ஆரோபெத்வா சீவரபோ⁴கே³ கத்வா ஸமத²க்க²ந்த⁴கே வுத்தனயேன கா³ஹாபெத்வா. ஏவஞ்ஹி தத்த² வுத்தங் –
Nanti vivādādhikaraṇaṃ. Pañcaṅgasamannāgatanti (cūḷava. 234) ‘‘na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati, gahitāgahitaṃ jānātī’’ti vuttehi pañcahaṅgehi samannāgataṃ. Gūḷhakavivaṭakasakaṇṇajappakesu tīsu salākaggāhesūti ‘‘anujānāmi, bhikkhave, tesaṃ bhikkhūnaṃ saññattiyā tayo salākaggāhake gūḷhakaṃ, vivaṭakaṃ, sakaṇṇajappaka’’nti (cūḷava. 235) samathakkhandhake vuttesu tīsu salākaggāhesu. Salākaṃ gāhetvāti dhammavādīnañca adhammavādīnañca salākāyo nimittasaññaṃ āropetvā cīvarabhoge katvā samathakkhandhake vuttanayena gāhāpetvā. Evañhi tattha vuttaṃ –
‘‘கத²ஞ்ச, பி⁴க்க²வே, கூ³ள்ஹகோ ஸலாகக்³கா³ஹோ ஹோதி? தேன ஸலாகக்³கா³ஹாபகேன பி⁴க்கு²னா ஸலாகாயோ வண்ணாவண்ணாயோ கத்வா ஏகமேகோ பி⁴க்கு² உபஸங்கமித்வா ஏவமஸ்ஸ வசனீயோ ‘அயங் ஏவங்வாதி³ஸ்ஸ ஸலாகா, அயங் ஏவங்வாதி³ஸ்ஸ ஸலாகா, யங் இச்ச²ஸி, தங் க³ண்ஹாஹீ’தி. க³ஹிதே வத்தப்³போ³ ‘மா ச கஸ்ஸசி த³ஸ்ஸேஹீ’தி. ஸசே ஜானாதி ‘அத⁴ம்மவாதீ³ ப³ஹுதரா’தி, ‘து³க்³க³ஹோ’தி பச்சுக்கட்³டி⁴தப்³ப³ங். ஸசே ஜானாதி ‘த⁴ம்மவாதீ³ ப³ஹுதரா’தி , ‘ஸுக்³க³ஹோ’தி ஸாவேதப்³ப³ங். ஏவங் கோ², பி⁴க்க²வே, கூ³ள்ஹகோ ஸலாகக்³கா³ஹோ ஹோதி.
‘‘Kathañca, bhikkhave, gūḷhako salākaggāho hoti? Tena salākaggāhāpakena bhikkhunā salākāyo vaṇṇāvaṇṇāyo katvā ekameko bhikkhu upasaṅkamitvā evamassa vacanīyo ‘ayaṃ evaṃvādissa salākā, ayaṃ evaṃvādissa salākā, yaṃ icchasi, taṃ gaṇhāhī’ti. Gahite vattabbo ‘mā ca kassaci dassehī’ti. Sace jānāti ‘adhammavādī bahutarā’ti, ‘duggaho’ti paccukkaḍḍhitabbaṃ. Sace jānāti ‘dhammavādī bahutarā’ti , ‘suggaho’ti sāvetabbaṃ. Evaṃ kho, bhikkhave, gūḷhako salākaggāho hoti.
‘‘கத²ஞ்ச, பி⁴க்க²வே, விவடகோ ஸலாகக்³கா³ஹோ ஹோதி? ஸசே ஜானாதி ‘த⁴ம்மவாதீ³ ப³ஹுதரா’தி, விஸ்ஸட்டே²னேவ விவடேன கா³ஹேதப்³போ³. ஏவங் கோ², பி⁴க்க²வே, விவடகோ ஸலாகக்³கா³ஹோ ஹோதி.
‘‘Kathañca, bhikkhave, vivaṭako salākaggāho hoti? Sace jānāti ‘dhammavādī bahutarā’ti, vissaṭṭheneva vivaṭena gāhetabbo. Evaṃ kho, bhikkhave, vivaṭako salākaggāho hoti.
‘‘கத²ஞ்ச, பி⁴க்க²வே, ஸகண்ணஜப்பகோ ஸலாகக்³கா³ஹோ ஹோதி? தேன ஸலாகக்³கா³ஹாபகேன பி⁴க்கு²னா ஏகமேகஸ்ஸ பி⁴க்கு²னோ உபகண்ணகே ஆரோசேதப்³ப³ங் ‘அயங் ஏவங்வாதி³ஸ்ஸ ஸலாகா, அயங் ஏவவாதி³ஸ்ஸ ஸலாகா, யங் இச்ச²ஸி, தங் க³ண்ஹாஹீ’தி. க³ஹிதே வத்தப்³போ³ ‘மா ச கஸ்ஸசி ஆரோசேஹீ’தி. ஸசே ஜானாதி ‘அத⁴ம்மவாதீ³ ப³ஹுதரா’தி, ‘து³க்³க³ஹோ’தி பச்சுக்கட்³டி⁴தப்³ப³ங். ஸசே ஜானாதி ‘த⁴ம்மவாதீ³ ப³ஹுதரா’தி, ‘ஸுக்³க³ஹோ’தி ஸாவேதப்³ப³ங். ஏவங் கோ², பி⁴க்க²வே, ஸகண்ணஜப்பகோ ஸலாகக்³கா³ஹோ ஹோதீ’’தி.
‘‘Kathañca, bhikkhave, sakaṇṇajappako salākaggāho hoti? Tena salākaggāhāpakena bhikkhunā ekamekassa bhikkhuno upakaṇṇake ārocetabbaṃ ‘ayaṃ evaṃvādissa salākā, ayaṃ evavādissa salākā, yaṃ icchasi, taṃ gaṇhāhī’ti. Gahite vattabbo ‘mā ca kassaci ārocehī’ti. Sace jānāti ‘adhammavādī bahutarā’ti, ‘duggaho’ti paccukkaḍḍhitabbaṃ. Sace jānāti ‘dhammavādī bahutarā’ti, ‘suggaho’ti sāvetabbaṃ. Evaṃ kho, bhikkhave, sakaṇṇajappako salākaggāho hotī’’ti.
எத்த² ச அலஜ்ஜுஸ்ஸன்னாய (சூளவ॰ அட்ட²॰ 235) பரிஸாய கூ³ள்ஹகோ ஸலாகக்³கா³ஹோ காதப்³போ³, லஜ்ஜுஸ்ஸன்னாய விவடகோ, பா³லுஸ்ஸன்னாய ஸகண்ணஜப்பகோதி வேதி³தப்³போ³. த⁴ம்மவாதீ³னங் யேபு⁴ய்யதாயாதி த⁴ம்மவாதீ³னங் ஏகேனபி அதி⁴கதாய, கோ பன வாதோ³ த்³வீஹி தீஹி.
Ettha ca alajjussannāya (cūḷava. aṭṭha. 235) parisāya gūḷhako salākaggāho kātabbo, lajjussannāya vivaṭako, bālussannāya sakaṇṇajappakoti veditabbo. Dhammavādīnaṃ yebhuyyatāyāti dhammavādīnaṃ ekenapi adhikatāya, ko pana vādo dvīhi tīhi.
‘‘சதூஹி ஸமதே²ஹி ஸம்மதீ’’தி இத³ங் ஸப்³ப³ஸங்கா³ஹகவஸேன வுத்தங், தத்த² பன த்³வீஹி ஏவ வூபஸமனங் த³ட்ட²ப்³ப³ங். ஏவங் வினிச்சி²தந்தி ஸசே ஆபத்தி நத்தி², உபோ⁴ க²மாபெத்வா, அத² அத்தி², ஆபத்திங் த³ஸ்ஸெத்வா ரோபனவஸேன வினிச்சி²தங். படிகம்மங் பன ஆபத்தாதி⁴கரணஸமதே² பரதோ ஆக³மிஸ்ஸதீதி. ந ஸமணஸாருப்பங் அஸ்ஸாமணகங், ஸமணேஹி அகத்தப்³ப³ங், தஸ்மிங். அஜ்ஜா²சாரே வீதிக்கமே ஸதி.
‘‘Catūhi samathehi sammatī’’ti idaṃ sabbasaṅgāhakavasena vuttaṃ, tattha pana dvīhi eva vūpasamanaṃ daṭṭhabbaṃ. Evaṃ vinicchitanti sace āpatti natthi, ubho khamāpetvā, atha atthi, āpattiṃ dassetvā ropanavasena vinicchitaṃ. Paṭikammaṃ pana āpattādhikaraṇasamathe parato āgamissatīti. Na samaṇasāruppaṃ assāmaṇakaṃ, samaṇehi akattabbaṃ, tasmiṃ. Ajjhācāre vītikkame sati.
பாராஜிகஸாமந்தேன வாதி து³க்கடேன வா து²ல்லச்சயேன வா. மேது²னத⁴ம்மே ஹி பாராஜிகஸாமந்தா நாம து³க்கடங் ஹோதி, அதி³ன்னாதா³னாதீ³ஸு து²ல்லச்சயங். படிசரதோதி படிச்சா²தெ³ந்தஸ்ஸ. அச்சி²ன்னமூலோ ப⁴விஸ்ஸதீதி பாராஜிகங் அனாபன்னோ ப⁴விஸ்ஸதி, ஸீலவா ப⁴விஸ்ஸதீதி வுத்தங் ஹோதி. ஸம்மா வத்தித்வாதி வத்தங் பூரெத்வா. ஓஸாரணங் லபி⁴ஸ்ஸதீதி கம்மப்படிப்பஸ்ஸத்³தி⁴ங் லபி⁴ஸ்ஸதி.
Pārājikasāmantenavāti dukkaṭena vā thullaccayena vā. Methunadhamme hi pārājikasāmantā nāma dukkaṭaṃ hoti, adinnādānādīsu thullaccayaṃ. Paṭicaratoti paṭicchādentassa. Acchinnamūlo bhavissatīti pārājikaṃ anāpanno bhavissati, sīlavā bhavissatīti vuttaṃ hoti. Sammā vattitvāti vattaṃ pūretvā. Osāraṇaṃ labhissatīti kammappaṭippassaddhiṃ labhissati.
தஸ்ஸாதி ஆபத்தாதி⁴கரணஸ்ஸ. ஸம்முகா²வினயேனேவ வூபஸமோ நத்தி² படிஞ்ஞாய, ததா²ரூபாய க²ந்தியா வா வினா அவூபஸமனதோ. யா பன படிஞ்ஞாதி ஸம்ப³ந்தோ⁴.
Tassāti āpattādhikaraṇassa. Sammukhāvinayeneva vūpasamo natthi paṭiññāya, tathārūpāya khantiyā vā vinā avūpasamanato. Yā pana paṭiññāti sambandho.
எத்தா²தி ஆபத்திதே³ஸனாயங். ஸியாதி அவஸ்ஸங். கக்க²ளத்தாய வாளத்தாயாதி கக்க²ளபா⁴வாய சேவ வாளபா⁴வாய ச. து²ல்லவஜ்ஜந்தி பாராஜிகஞ்சேவ ஸங்கா⁴தி³ஸேஸஞ்ச. கி³ஹிப்படிஸங்யுத்தந்தி கி³ஹீனங் ஹீனேன கு²ங்ஸனவம்ப⁴னத⁴ம்மிகப்படிஸ்ஸவேஸு ஆபன்னங் ஆபத்திங்.
Etthāti āpattidesanāyaṃ. Siyāti avassaṃ. Kakkhaḷattāya vāḷattāyāti kakkhaḷabhāvāya ceva vāḷabhāvāya ca. Thullavajjanti pārājikañceva saṅghādisesañca. Gihippaṭisaṃyuttanti gihīnaṃ hīnena khuṃsanavambhanadhammikappaṭissavesu āpannaṃ āpattiṃ.
யதா²னுரூபந்தி ‘‘த்³வீஹி ஸமதே²ஹி, தீஹி, சதூஹி, ஏகேனா’’தி ஏவங் வுத்தனயேனேவ யதா²னுரூபங். எத்தா²தி இமஸ்மிங் ஸமதா²தி⁴காரே. வினிச்ச²யனயோதி வினிச்ச²யனயமத்தங். தேனாஹ ‘‘வித்தா²ரோ பனா’’திஆதி³. அஸ்ஸாதி வித்தா²ரஸ்ஸ. ஸமந்தபாஸாதி³காயங் வுத்தோதி ஸமந்தபாஸாதி³காய நாம வினயட்ட²கதா²யங் வுத்தோ. தஸ்மா தத்த² வுத்தனயேனேவ வேதி³தப்³போ³தி அதி⁴ப்பாயோ.
Yathānurūpanti ‘‘dvīhi samathehi, tīhi, catūhi, ekenā’’ti evaṃ vuttanayeneva yathānurūpaṃ. Etthāti imasmiṃ samathādhikāre. Vinicchayanayoti vinicchayanayamattaṃ. Tenāha ‘‘vitthāro panā’’tiādi. Assāti vitthārassa. Samantapāsādikāyaṃ vuttoti samantapāsādikāya nāma vinayaṭṭhakathāyaṃ vutto. Tasmā tattha vuttanayeneva veditabboti adhippāyo.
எத்தகந்தி ஏதங்பரமங், ந இதோ பி⁴ய்யோ.
Ettakanti etaṃparamaṃ, na ito bhiyyo.
அதி⁴கரணஸமத²வண்ணனா நிட்டி²தா.
Adhikaraṇasamathavaṇṇanā niṭṭhitā.
இதி கங்கா²விதரணியா பாதிமொக்க²வண்ணனாய
Iti kaṅkhāvitaraṇiyā pātimokkhavaṇṇanāya
வினயத்த²மஞ்ஜூஸாயங் லீனத்த²ப்பகாஸனியங்
Vinayatthamañjūsāyaṃ līnatthappakāsaniyaṃ
பி⁴க்கு²பாதிமொக்க²வண்ணனா நிட்டி²தா.
Bhikkhupātimokkhavaṇṇanā niṭṭhitā.
