| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
ад̇хигаран̣асамат̇аван̣н̣анаа
Adhikaraṇasamathavaṇṇanā
г̇ан̣анабарижчзд̣̇од̇и сан̇кяаабарижчзд̣̇о. ад̇хигарийяанд̇и зд̇т̇аад̇и ад̇хигаран̣аани. гз ад̇хигарийяанд̇и? самат̇аа. гат̇ам̣ ад̇хигарийяанд̇и? саманавасзна. д̇асмаа д̇з д̇зсам̣ саманавасзна бавад̇д̇анд̇ийд̇и ааха ‘‘ад̇хигаран̣аани самзнд̇ий’’д̇иаад̣̇и. уббаннаанам̣ уббаннаананд̇и удтид̇аанам̣ удтид̇аанам̣. гин̃жааби ад̇хигаран̣адтзна згавид̇хам̣, д̇ат̇ааби вад̇т̇увасзна наанаа ход̇ийд̇и ‘‘ад̇хигаран̣аана’’нд̇и б̣ахуважанам̣ гад̇ам̣. ид̣̇аани д̇асса наанаад̇д̇ам̣ д̣̇ассзд̇ваа виварид̇ум̣ ‘‘виваад̣̇аад̇хигаран̣а’’нд̇иаад̣̇имааха. виваад̣̇оязва ад̇хигаран̣ам̣ виваад̣̇аад̇хигаран̣ам̣. зса наяо сзсзсуби. самат̇ад̇т̇анд̇и саманад̇т̇ам̣.
Gaṇanaparicchedoti saṅkhyāparicchedo. Adhikarīyanti etthāti adhikaraṇāni. Ke adhikarīyanti? Samathā. Kathaṃ adhikarīyanti? Samanavasena. Tasmā te tesaṃ samanavasena pavattantīti āha ‘‘adhikaraṇāni samentī’’tiādi. Uppannānaṃ uppannānanti uṭṭhitānaṃ uṭṭhitānaṃ. Kiñcāpi adhikaraṇaṭṭhena ekavidhaṃ, tathāpi vatthuvasena nānā hotīti ‘‘adhikaraṇāna’’nti bahuvacanaṃ kataṃ. Idāni tassa nānāttaṃ dassetvā vivarituṃ ‘‘vivādādhikaraṇa’’ntiādimāha. Vivādoyeva adhikaraṇaṃ vivādādhikaraṇaṃ. Esa nayo sesesupi. Samathatthanti samanatthaṃ.
ад̇хигаран̣асса саммукаа винаяанад̇о саммукаавинаяо. д̣̇аб̣б̣амаллабуд̇д̇ад̇т̇зрасад̣̇исасса сад̇ивзбуллаббад̇д̇асса кийн̣аасавассзва д̣̇аад̇аб̣б̣о винаяо сад̇ивинаяо. саммуул̣хасса г̇аг̇г̇абхигкусад̣̇исасса уммад̇д̇агасса д̣̇аад̇аб̣б̣о винаяо амуул̣хавинаяо. бадин̃н̃аад̇зна гаран̣абхууд̇зна гаран̣ам̣ бадин̃н̃аад̇агаран̣ам̣. ат̇а ваа бадин̃н̃аад̇з аабаннабхааваад̣̇игз гаран̣ам̣ гирияаа, ‘‘ааяад̇им̣ сам̣варзяяаасий’’д̇и бариваасад̣̇аанаад̣̇ивасзна жа бавад̇д̇ам̣ важийгаммам̣ бадин̃н̃аад̇агаран̣ам̣. яассаа гирияааяа д̇хаммаваад̣̇ино б̣ахуд̇араа, зсаа язбхуяяасигаа наама. яо баабуссаннад̇ааяа баабияо, буг̇г̇ало, д̇асса убаваал̣абхигкусад̣̇исасса гад̇д̇аб̣б̣ад̇о д̇ассабаабияасигаа, алуд̇д̇асамаасояам̣. д̇ин̣авад̇т̇аарагасад̣̇исад̇д̇аа д̇ин̣авад̇т̇аараго. яат̇аа (жуул̣ава. адта. 212) хи г̇уут̇ам̣ ваа муд̇д̇ам̣ ваа гхаддияамаанам̣ д̣̇уг̇г̇анд̇хад̇ааяа б̣аад̇хад̇и, д̇ин̣зхи авад̇т̇арид̇ваа суббадижчаад̣̇ид̇асса банасса г̇анд̇хо на б̣аад̇хад̇и, звамзва яам̣ ад̇хигаран̣ам̣ муулаанумуулам̣ г̇анд̇ваа вуубасамияамаанам̣ гагкал̣ад̇д̇ааяа ваал̣ад̇д̇ааяа бхзд̣̇ааяа сам̣вад̇д̇ад̇и, д̇ам̣ иминаа гаммзна вуубасанд̇ам̣ г̇уут̇ам̣ вияа д̇ин̣авад̇т̇аарагзна бадижчаннам̣ сувуубасанд̇ам̣ ход̇и. д̇зна вуд̇д̇ам̣ ‘‘д̇ин̣авад̇т̇аарагасад̣̇исад̇д̇аа д̇ин̣авад̇т̇аараго’’д̇и.
Adhikaraṇassa sammukhā vinayanato sammukhāvinayo. Dabbamallaputtattherasadisassa sativepullappattassa khīṇāsavasseva dātabbo vinayo sativinayo. Sammūḷhassa gaggabhikkhusadisassa ummattakassa dātabbo vinayo amūḷhavinayo. Paṭiññātena karaṇabhūtena karaṇaṃ paṭiññātakaraṇaṃ. Atha vā paṭiññāte āpannabhāvādike karaṇaṃ kiriyā, ‘‘āyatiṃ saṃvareyyāsī’’ti parivāsadānādivasena ca pavattaṃ vacīkammaṃ paṭiññātakaraṇaṃ. Yassā kiriyāya dhammavādino bahutarā, esā yebhuyyasikā nāma. Yo pāpussannatāya pāpiyo, puggalo, tassa upavāḷabhikkhusadisassa kattabbato tassapāpiyasikā, aluttasamāsoyaṃ. Tiṇavatthārakasadisattā tiṇavatthārako. Yathā (cūḷava. aṭṭha. 212) hi gūthaṃ vā muttaṃ vā ghaṭṭiyamānaṃ duggandhatāya bādhati, tiṇehi avattharitvā suppaṭicchāditassa panassa gandho na bādhati, evameva yaṃ adhikaraṇaṃ mūlānumūlaṃ gantvā vūpasamiyamānaṃ kakkhaḷattāya vāḷattāya bhedāya saṃvattati, taṃ iminā kammena vūpasantaṃ gūthaṃ viya tiṇavatthārakena paṭicchannaṃ suvūpasantaṃ hoti. Tena vuttaṃ ‘‘tiṇavatthārakasadisattā tiṇavatthārako’’ti.
д̇ад̇раад̇и д̇зсу сад̇д̇асу ад̇хигаран̣асамат̇зсу. ‘‘адтаарасахи вад̇т̇уухий’’д̇и лагкан̣аважанамзд̇ам̣ ‘‘яад̣̇и мз б̣яаад̇хигаа бхавзяяум̣, д̣̇аад̇аб̣б̣амид̣̇амосад̇ха’’нд̇иаад̣̇инаа (сам̣. ни. дий. 2.3.39-42) вияа. д̇асмаа д̇зсу ан̃н̃ад̇арзна вивад̣̇анд̇аа адтаарасахи вад̇т̇уухи вивад̣̇анд̇ийд̇и вужжад̇и. виваад̣̇од̇и вибажжанийгаваад̣̇о. убавад̣̇анаад̇и аггосо. жод̣̇анаад̇и ануяог̇о. д̣̇взд̇и т̇уллажжаяад̣̇уб̣бхаасид̇аабад̇д̇ияо д̣̇вз. жад̇уннам̣ гаммаанам̣ гаран̣анд̇и жад̇уннам̣ гаммаанам̣ анд̇арз яасса гассажи гаммасса гаран̣ам̣.
Tatrāti tesu sattasu adhikaraṇasamathesu. ‘‘Aṭṭhārasahi vatthūhī’’ti lakkhaṇavacanametaṃ ‘‘yadi me byādhikā bhaveyyuṃ, dātabbamidamosadha’’ntiādinā (saṃ. ni. ṭī. 2.3.39-42) viya. Tasmā tesu aññatarena vivadantā aṭṭhārasahi vatthūhi vivadantīti vuccati. Vivādoti vipaccanīkavādo. Upavadanāti akkoso. Codanāti anuyogo. Dveti thullaccayadubbhāsitāpattiyo dve. Catunnaṃ kammānaṃ karaṇanti catunnaṃ kammānaṃ antare yassa kassaci kammassa karaṇaṃ.
звам̣ ад̇хигаран̣аани д̣̇ассзд̇ваа ид̣̇аани д̇зсу ид̣̇ам̣ ад̇хигаран̣ам̣ зд̇д̇агзхи самат̇зхи саммад̇ийд̇и д̣̇ассзд̇ум̣ ‘‘д̇ад̇т̇аа’’д̇иаад̣̇и вуд̇д̇ам̣. яасмим̣ вихаарз уббаннам̣ , д̇асмим̣язва ваа саммад̇ийд̇и самб̣анд̇хо. звам̣ сзсзсуби. д̇ад̇т̇а яасмим̣ вихаарз уббаннанд̇и ‘‘яасмим̣ вихаарз маяхам̣ иминаа бад̇д̇о г̇ахид̇о, жийварам̣ г̇ахид̇а’’нд̇иаад̣̇инаа (бари. адта. 341) наязна бад̇д̇ажийвараад̣̇ийнам̣ ад̇т̇ааяа виваад̣̇аад̇хигаран̣ам̣ уббаннам̣ ход̇и. д̇асмим̣язва ваа саммад̇ийд̇и д̇асмим̣ вихаарзязва ааваасигзхи саннибад̇ид̇ваа ‘‘алам̣, аавусо’’д̇и ад̇т̇абажжад̇т̇игз сан̃н̃аабзд̇ваа баал̣имуд̇д̇агавинижчаязнзва вуубасамзнд̇зхи саммад̇и. сажз бана д̇ам̣ ад̇хигаран̣ам̣ нзваасигаа вуубасамзд̇ум̣ на саггонд̇и, ат̇ан̃н̃о винаяад̇харо ааг̇анд̇ваа ‘‘гим̣, аавусо, имасмим̣ вихаарз убосат̇о ваа бавааран̣аа ваа тид̇аа’’д̇и бужчад̇и, д̇зхи жа д̇асмим̣ гааран̣з гат̇ид̇з д̇ам̣ ад̇хигаран̣ам̣ канд̇хагад̇о жа бариваарад̇о жа суд̇д̇зна винижчинид̇ваа вуубасамзд̇и. звамби зд̇асмим̣язва саммад̇ийд̇и д̣̇адтаб̣б̣ам̣.
Evaṃ adhikaraṇāni dassetvā idāni tesu idaṃ adhikaraṇaṃ ettakehi samathehi sammatīti dassetuṃ ‘‘tatthā’’tiādi vuttaṃ. Yasmiṃ vihāre uppannaṃ , tasmiṃyeva vā sammatīti sambandho. Evaṃ sesesupi. Tattha yasmiṃ vihāre uppannanti ‘‘yasmiṃ vihāre mayhaṃ iminā patto gahito, cīvaraṃ gahita’’ntiādinā (pari. aṭṭha. 341) nayena pattacīvarādīnaṃ atthāya vivādādhikaraṇaṃ uppannaṃ hoti. Tasmiṃyeva vā sammatīti tasmiṃ vihāreyeva āvāsikehi sannipatitvā ‘‘alaṃ, āvuso’’ti atthapaccatthike saññāpetvā pāḷimuttakavinicchayeneva vūpasamentehi sammati. Sace pana taṃ adhikaraṇaṃ nevāsikā vūpasametuṃ na sakkonti, athañño vinayadharo āgantvā ‘‘kiṃ, āvuso, imasmiṃ vihāre uposatho vā pavāraṇā vā ṭhitā’’ti pucchati, tehi ca tasmiṃ kāraṇe kathite taṃ adhikaraṇaṃ khandhakato ca parivārato ca suttena vinicchinitvā vūpasameti. Evampi etasmiṃyeva sammatīti daṭṭhabbaṃ.
ан̃н̃ад̇т̇а вуубасамзд̇ум̣ г̇ажчанд̇аанам̣ анд̇араамаг̇г̇з ваа саммад̇ийд̇и ‘‘на маяам̣ зд̇асса винижчаяз д̇идтаама, нааяам̣ винаяз гусало, амугасмим̣ наама г̇аамз винаяад̇хараа т̇зраа васанд̇и, д̇ад̇т̇а г̇анд̇ваа винижчиниссаамаа’’д̇и г̇ажчанд̇аанам̣ анд̇араамаг̇г̇з ваа гааран̣ам̣ саллагкзд̇ваа ан̃н̃аман̃н̃ам̣ сан̃н̃аабзнд̇зхи, ан̃н̃зхи ваа д̇з бхигкуу ниж̇жхаабзнд̇зхи саммад̇и. на хзва ко бана ан̃н̃аман̃н̃асан̃н̃ад̇д̇ияаа ваа сабхааг̇абхигкуниж̇жхаабанзна ваа вуубасанд̇ам̣ ход̇и, абижа ко бадибат̇ам̣ ааг̇ажчанд̇о зго винаяад̇харо д̣̇исваа ‘‘гад̇т̇аавусо, г̇ажчат̇аа’’д̇и бужчид̇ваа ‘‘амугам̣ наама г̇аамам̣ иминаа наама гаран̣знаа’’д̇и вуд̇д̇з ‘‘алам̣, аавусо, гим̣ д̇ад̇т̇а г̇ад̇знаа’’д̇и д̇ад̇т̇зва д̇хаммзна винаязна д̇ам̣ ад̇хигаран̣ам̣ вуубасамзд̇и. звамби анд̇араамаг̇г̇з вуубасаммад̇и наама.
Aññattha vūpasametuṃ gacchantānaṃ antarāmagge vā sammatīti ‘‘na mayaṃ etassa vinicchaye tiṭṭhāma, nāyaṃ vinaye kusalo, amukasmiṃ nāma gāme vinayadharā therā vasanti, tattha gantvā vinicchinissāmā’’ti gacchantānaṃ antarāmagge vā kāraṇaṃ sallakkhetvā aññamaññaṃ saññāpentehi, aññehi vā te bhikkhū nijjhāpentehi sammati. Na heva kho pana aññamaññasaññattiyā vā sabhāgabhikkhunijjhāpanena vā vūpasantaṃ hoti, apica kho paṭipathaṃ āgacchanto eko vinayadharo disvā ‘‘katthāvuso, gacchathā’’ti pucchitvā ‘‘amukaṃ nāma gāmaṃ iminā nāma karaṇenā’’ti vutte ‘‘alaṃ, āvuso, kiṃ tattha gatenā’’ti tattheva dhammena vinayena taṃ adhikaraṇaṃ vūpasameti. Evampi antarāmagge vūpasammati nāma.
яад̇т̇а г̇анд̇ваа сан̇гхасса нияяаад̇ид̇ам̣, д̇ад̇т̇а сан̇гхзна ваад̇и сажз бана ‘‘алам̣, аавусо, гим̣ д̇ад̇т̇а г̇ад̇знаа’’д̇и вужжамаанааби ‘‘маяам̣ д̇ад̇т̇зва г̇анд̇ваа винижчаяам̣ баабзссаамаа’’д̇и (бари. адта. 341) винаяад̇харасса важанам̣ анаад̣̇ияид̇ваа яад̇т̇а г̇анд̇ваа сабхааг̇абхигкусан̇гхасса ад̇хигаран̣ам̣ нияяаад̇ид̇ам̣, д̇ад̇т̇а сан̇гхзна ‘‘алам̣, аавусо, сан̇гхасаннибаад̇ам̣ наама г̇аруга’’нд̇и д̇ад̇т̇зва нисийд̣̇ид̇ваа винижчид̇ам̣ саммад̇и. на хзва ко бана сабхааг̇абхигкуунам̣ сан̃н̃ад̇д̇ияаа вуубасанд̇ам̣ ход̇и, абижа ко сан̇гхам̣ саннибаад̇зд̇ваа аарожид̇ам̣ сан̇гхамаж̇жхз винаяад̇хараа вуубасамзнд̇и. звамби д̇ад̇т̇а сан̇гхзна винижчид̇ам̣ саммад̇и наама.
Yattha gantvā saṅghassa niyyātitaṃ, tattha saṅghena vāti sace pana ‘‘alaṃ, āvuso, kiṃ tattha gatenā’’ti vuccamānāpi ‘‘mayaṃ tattheva gantvā vinicchayaṃ pāpessāmā’’ti (pari. aṭṭha. 341) vinayadharassa vacanaṃ anādiyitvā yattha gantvā sabhāgabhikkhusaṅghassa adhikaraṇaṃ niyyātitaṃ, tattha saṅghena ‘‘alaṃ, āvuso, saṅghasannipātaṃ nāma garuka’’nti tattheva nisīditvā vinicchitaṃ sammati. Na heva kho pana sabhāgabhikkhūnaṃ saññattiyā vūpasantaṃ hoti, apica kho saṅghaṃ sannipātetvā ārocitaṃ saṅghamajjhe vinayadharā vūpasamenti. Evampi tattha saṅghena vinicchitaṃ sammati nāma.
уб̣б̣аахигааяа саммад̇абуг̇г̇алзхи ваа винижчид̇анд̇и абалогзд̇ваа ваа канд̇хагз вуд̇д̇ааяа ваа н̃ад̇д̇ид̣̇уд̇ияагаммаваажааяа саммад̇зхи буг̇г̇алзхи висум̣ ваа нисийд̣̇ид̇ваа, д̇ассааязва ваа барисааяа ‘‘ан̃н̃зна на гин̃жи гат̇зд̇аб̣б̣а’’нд̇и (жуул̣ава. адта. 231) саавзд̇ваа винижчид̇ам̣. аяанд̇и аяам̣ яат̇аавуд̇д̇аа жад̇уб̣б̣ид̇хаа саммукад̇аа.
Ubbāhikāyasammatapuggalehi vā vinicchitanti apaloketvā vā khandhake vuttāya vā ñattidutiyakammavācāya sammatehi puggalehi visuṃ vā nisīditvā, tassāyeva vā parisāya ‘‘aññena na kiñci kathetabba’’nti (cūḷava. aṭṭha. 231) sāvetvā vinicchitaṃ. Ayanti ayaṃ yathāvuttā catubbidhā sammukhatā.
гаарагасан̇гхассаад̇и вуубасамзд̇ум̣ саннибад̇ид̇асса гаарагасан̇гхасса. сан̇гхасаамаг̇г̇ивасзна саммукийбхаавод̇и ‘‘яаавад̇игаа бхигкуу гаммаббад̇д̇аа, д̇з ааг̇ад̇аа хонд̇и, чанд̣̇аарахаанам̣ чанд̣̇о аахадо ход̇и, саммукийбхууд̇аа на бадиггосанд̇ий’’д̇и (жуул̣ава. 228) звам̣ вуд̇д̇асан̇гхасаамаг̇г̇ивасзна саммукийбхааво, зд̇зна яат̇аа д̇ат̇аа бад̇хаанагаарагабуг̇г̇алаанам̣ саммукад̇аамад̇д̇ам̣ сан̇гхасаммукад̇аа наама на ход̇ийд̇и д̣̇ассзд̇и. бхууд̇ад̇аад̇и д̇ажчад̇аа. сажжабарияааяо хи ид̇ха д̇хаммасад̣̇д̣̇о ‘‘д̇хаммаваад̣̇ий’’д̇иаад̣̇ийсу (д̣̇ий. ни. 1.9, 194) вияа. винзд̇и зд̇знаад̇и винаяо, д̇асса д̇асса ад̇хигаран̣асса вуубасаманааяа бхаг̇авад̇аа вуд̇д̇авид̇хи, д̇асса винаяасса саммукад̇аа винаяасаммукад̇аа. д̇знааха ‘‘яат̇аа д̇ам̣…бз… винаяасаммукад̇аа’’д̇и. язнаад̇и язна буг̇г̇алзна. ад̇т̇абажжад̇т̇игаананд̇и (саарад̇т̇а. дий. жуул̣аваг̇г̇а 3.228) виваад̣̇авад̇т̇усан̇каад̇з ад̇т̇з бажжад̇т̇игаанам̣. сан̇гхасаммукад̇аа барихааяад̇и саммад̇абуг̇г̇алзхзва вуубасаманад̇о.
Kārakasaṅghassāti vūpasametuṃ sannipatitassa kārakasaṅghassa. Saṅghasāmaggivasena sammukhībhāvoti ‘‘yāvatikā bhikkhū kammappattā, te āgatā honti, chandārahānaṃ chando āhaṭo hoti, sammukhībhūtā na paṭikkosantī’’ti (cūḷava. 228) evaṃ vuttasaṅghasāmaggivasena sammukhībhāvo, etena yathā tathā padhānakārakapuggalānaṃ sammukhatāmattaṃ saṅghasammukhatā nāma na hotīti dasseti. Bhūtatāti tacchatā. Saccapariyāyo hi idha dhammasaddo ‘‘dhammavādī’’tiādīsu (dī. ni. 1.9, 194) viya. Vineti etenāti vinayo, tassa tassa adhikaraṇassa vūpasamanāya bhagavatā vuttavidhi, tassa vinayassa sammukhatā vinayasammukhatā. Tenāha ‘‘yathā taṃ…pe… vinayasammukhatā’’ti. Yenāti yena puggalena. Atthapaccatthikānanti (sārattha. ṭī. cūḷavagga 3.228) vivādavatthusaṅkhāte atthe paccatthikānaṃ. Saṅghasammukhatā parihāyati sammatapuggaleheva vūpasamanato.
нанд̇и виваад̣̇аад̇хигаран̣ам̣. бан̃жан̇г̇асаманнааг̇ад̇анд̇и (жуул̣ава. 234) ‘‘на чанд̣̇ааг̇ад̇им̣ г̇ажчад̇и, на д̣̇осааг̇ад̇им̣ г̇ажчад̇и, на мохааг̇ад̇им̣ г̇ажчад̇и, на бхаяааг̇ад̇им̣ г̇ажчад̇и, г̇ахид̇ааг̇ахид̇ам̣ ж̇аанаад̇ий’’д̇и вуд̇д̇зхи бан̃жахан̇г̇зхи саманнааг̇ад̇ам̣. г̇уул̣хагавивадагасаган̣н̣аж̇аббагзсу д̇ийсу салаагаг̇г̇аахзсууд̇и ‘‘ануж̇аанаами, бхигкавз, д̇зсам̣ бхигкуунам̣ сан̃н̃ад̇д̇ияаа д̇аяо салаагаг̇г̇аахагз г̇уул̣хагам̣, вивадагам̣, саган̣н̣аж̇аббага’’нд̇и (жуул̣ава. 235) самат̇агканд̇хагз вуд̇д̇зсу д̇ийсу салаагаг̇г̇аахзсу. салаагам̣ г̇аахзд̇ваад̇и д̇хаммаваад̣̇ийнан̃жа ад̇хаммаваад̣̇ийнан̃жа салаагааяо нимид̇д̇асан̃н̃ам̣ ааробзд̇ваа жийварабхог̇з гад̇ваа самат̇агканд̇хагз вуд̇д̇анаязна г̇аахаабзд̇ваа. зван̃хи д̇ад̇т̇а вуд̇д̇ам̣ –
Nanti vivādādhikaraṇaṃ. Pañcaṅgasamannāgatanti (cūḷava. 234) ‘‘na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati, gahitāgahitaṃ jānātī’’ti vuttehi pañcahaṅgehi samannāgataṃ. Gūḷhakavivaṭakasakaṇṇajappakesu tīsu salākaggāhesūti ‘‘anujānāmi, bhikkhave, tesaṃ bhikkhūnaṃ saññattiyā tayo salākaggāhake gūḷhakaṃ, vivaṭakaṃ, sakaṇṇajappaka’’nti (cūḷava. 235) samathakkhandhake vuttesu tīsu salākaggāhesu. Salākaṃ gāhetvāti dhammavādīnañca adhammavādīnañca salākāyo nimittasaññaṃ āropetvā cīvarabhoge katvā samathakkhandhake vuttanayena gāhāpetvā. Evañhi tattha vuttaṃ –
‘‘гат̇ан̃жа, бхигкавз, г̇уул̣хаго салаагаг̇г̇аахо ход̇и? д̇зна салаагаг̇г̇аахаабагзна бхигкунаа салаагааяо ван̣н̣ааван̣н̣ааяо гад̇ваа згамзго бхигку убасан̇гамид̇ваа звамасса важанийяо ‘аяам̣ звам̣ваад̣̇исса салаагаа, аяам̣ звам̣ваад̣̇исса салаагаа, яам̣ ижчаси, д̇ам̣ г̇ан̣хаахий’д̇и. г̇ахид̇з вад̇д̇аб̣б̣о ‘маа жа гассажи д̣̇ассзхий’д̇и. сажз ж̇аанаад̇и ‘ад̇хаммаваад̣̇ий б̣ахуд̇араа’д̇и, ‘д̣̇уг̇г̇ахо’д̇и бажжуггад̣дхид̇аб̣б̣ам̣. сажз ж̇аанаад̇и ‘д̇хаммаваад̣̇ий б̣ахуд̇араа’д̇и , ‘суг̇г̇ахо’д̇и саавзд̇аб̣б̣ам̣. звам̣ ко, бхигкавз, г̇уул̣хаго салаагаг̇г̇аахо ход̇и.
‘‘Kathañca, bhikkhave, gūḷhako salākaggāho hoti? Tena salākaggāhāpakena bhikkhunā salākāyo vaṇṇāvaṇṇāyo katvā ekameko bhikkhu upasaṅkamitvā evamassa vacanīyo ‘ayaṃ evaṃvādissa salākā, ayaṃ evaṃvādissa salākā, yaṃ icchasi, taṃ gaṇhāhī’ti. Gahite vattabbo ‘mā ca kassaci dassehī’ti. Sace jānāti ‘adhammavādī bahutarā’ti, ‘duggaho’ti paccukkaḍḍhitabbaṃ. Sace jānāti ‘dhammavādī bahutarā’ti , ‘suggaho’ti sāvetabbaṃ. Evaṃ kho, bhikkhave, gūḷhako salākaggāho hoti.
‘‘гат̇ан̃жа, бхигкавз, вивадаго салаагаг̇г̇аахо ход̇и? сажз ж̇аанаад̇и ‘д̇хаммаваад̣̇ий б̣ахуд̇араа’д̇и, виссадтзнзва вивадзна г̇аахзд̇аб̣б̣о. звам̣ ко, бхигкавз, вивадаго салаагаг̇г̇аахо ход̇и.
‘‘Kathañca, bhikkhave, vivaṭako salākaggāho hoti? Sace jānāti ‘dhammavādī bahutarā’ti, vissaṭṭheneva vivaṭena gāhetabbo. Evaṃ kho, bhikkhave, vivaṭako salākaggāho hoti.
‘‘гат̇ан̃жа, бхигкавз, саган̣н̣аж̇аббаго салаагаг̇г̇аахо ход̇и? д̇зна салаагаг̇г̇аахаабагзна бхигкунаа згамзгасса бхигкуно убаган̣н̣агз аарожзд̇аб̣б̣ам̣ ‘аяам̣ звам̣ваад̣̇исса салаагаа, аяам̣ зваваад̣̇исса салаагаа, яам̣ ижчаси, д̇ам̣ г̇ан̣хаахий’д̇и. г̇ахид̇з вад̇д̇аб̣б̣о ‘маа жа гассажи аарожзхий’д̇и. сажз ж̇аанаад̇и ‘ад̇хаммаваад̣̇ий б̣ахуд̇араа’д̇и, ‘д̣̇уг̇г̇ахо’д̇и бажжуггад̣дхид̇аб̣б̣ам̣. сажз ж̇аанаад̇и ‘д̇хаммаваад̣̇ий б̣ахуд̇араа’д̇и, ‘суг̇г̇ахо’д̇и саавзд̇аб̣б̣ам̣. звам̣ ко, бхигкавз, саган̣н̣аж̇аббаго салаагаг̇г̇аахо ход̇ий’’д̇и.
‘‘Kathañca, bhikkhave, sakaṇṇajappako salākaggāho hoti? Tena salākaggāhāpakena bhikkhunā ekamekassa bhikkhuno upakaṇṇake ārocetabbaṃ ‘ayaṃ evaṃvādissa salākā, ayaṃ evavādissa salākā, yaṃ icchasi, taṃ gaṇhāhī’ti. Gahite vattabbo ‘mā ca kassaci ārocehī’ti. Sace jānāti ‘adhammavādī bahutarā’ti, ‘duggaho’ti paccukkaḍḍhitabbaṃ. Sace jānāti ‘dhammavādī bahutarā’ti, ‘suggaho’ti sāvetabbaṃ. Evaṃ kho, bhikkhave, sakaṇṇajappako salākaggāho hotī’’ti.
зд̇т̇а жа алаж̇ж̇уссаннааяа (жуул̣ава. адта. 235) барисааяа г̇уул̣хаго салаагаг̇г̇аахо гаад̇аб̣б̣о, лаж̇ж̇уссаннааяа вивадаго, б̣аалуссаннааяа саган̣н̣аж̇аббагод̇и взд̣̇ид̇аб̣б̣о. д̇хаммаваад̣̇ийнам̣ язбхуяяад̇ааяаад̇и д̇хаммаваад̣̇ийнам̣ згзнаби ад̇хигад̇ааяа, го бана ваад̣̇о д̣̇вийхи д̇ийхи.
Ettha ca alajjussannāya (cūḷava. aṭṭha. 235) parisāya gūḷhako salākaggāho kātabbo, lajjussannāya vivaṭako, bālussannāya sakaṇṇajappakoti veditabbo. Dhammavādīnaṃ yebhuyyatāyāti dhammavādīnaṃ ekenapi adhikatāya, ko pana vādo dvīhi tīhi.
‘‘жад̇уухи самат̇зхи саммад̇ий’’д̇и ид̣̇ам̣ саб̣б̣асан̇г̇аахагавасзна вуд̇д̇ам̣, д̇ад̇т̇а бана д̣̇вийхи зва вуубасаманам̣ д̣̇адтаб̣б̣ам̣. звам̣ винижчид̇анд̇и сажз аабад̇д̇и над̇т̇и, убхо камаабзд̇ваа, ат̇а ад̇т̇и, аабад̇д̇им̣ д̣̇ассзд̇ваа робанавасзна винижчид̇ам̣. бадигаммам̣ бана аабад̇д̇аад̇хигаран̣асамат̇з барад̇о ааг̇амиссад̇ийд̇и. на саман̣асааруббам̣ ассааман̣агам̣, саман̣зхи агад̇д̇аб̣б̣ам̣, д̇асмим̣. аж̇жхаажаарз вийд̇иггамз сад̇и.
‘‘Catūhi samathehi sammatī’’ti idaṃ sabbasaṅgāhakavasena vuttaṃ, tattha pana dvīhi eva vūpasamanaṃ daṭṭhabbaṃ. Evaṃ vinicchitanti sace āpatti natthi, ubho khamāpetvā, atha atthi, āpattiṃ dassetvā ropanavasena vinicchitaṃ. Paṭikammaṃ pana āpattādhikaraṇasamathe parato āgamissatīti. Na samaṇasāruppaṃ assāmaṇakaṃ, samaṇehi akattabbaṃ, tasmiṃ. Ajjhācāre vītikkame sati.
баарааж̇игасааманд̇зна ваад̇и д̣̇уггадзна ваа т̇уллажжаязна ваа. мзт̇унад̇хаммз хи баарааж̇игасааманд̇аа наама д̣̇уггадам̣ ход̇и, ад̣̇иннаад̣̇аанаад̣̇ийсу т̇уллажжаяам̣. бадижарад̇од̇и бадижчаад̣̇знд̇асса. ажчиннамууло бхависсад̇ийд̇и баарааж̇игам̣ анаабанно бхависсад̇и, сийлаваа бхависсад̇ийд̇и вуд̇д̇ам̣ ход̇и. саммаа вад̇д̇ид̇ваад̇и вад̇д̇ам̣ буурзд̇ваа. осааран̣ам̣ лабхиссад̇ийд̇и гаммаббадиббассад̣̇д̇хим̣ лабхиссад̇и.
Pārājikasāmantenavāti dukkaṭena vā thullaccayena vā. Methunadhamme hi pārājikasāmantā nāma dukkaṭaṃ hoti, adinnādānādīsu thullaccayaṃ. Paṭicaratoti paṭicchādentassa. Acchinnamūlo bhavissatīti pārājikaṃ anāpanno bhavissati, sīlavā bhavissatīti vuttaṃ hoti. Sammā vattitvāti vattaṃ pūretvā. Osāraṇaṃ labhissatīti kammappaṭippassaddhiṃ labhissati.
д̇ассаад̇и аабад̇д̇аад̇хигаран̣асса. саммукаавинаязнзва вуубасамо над̇т̇и бадин̃н̃ааяа, д̇ат̇ааруубааяа канд̇ияаа ваа винаа авуубасаманад̇о. яаа бана бадин̃н̃аад̇и самб̣анд̇хо.
Tassāti āpattādhikaraṇassa. Sammukhāvinayeneva vūpasamo natthi paṭiññāya, tathārūpāya khantiyā vā vinā avūpasamanato. Yā pana paṭiññāti sambandho.
зд̇т̇аад̇и аабад̇д̇ид̣̇зсанааяам̣. сияаад̇и авассам̣. гагкал̣ад̇д̇ааяа ваал̣ад̇д̇ааяаад̇и гагкал̣абхаавааяа жзва ваал̣абхаавааяа жа. т̇уллаваж̇ж̇анд̇и баарааж̇иган̃жзва сан̇гхаад̣̇исзсан̃жа. г̇ихиббадисам̣яуд̇д̇анд̇и г̇ихийнам̣ хийнзна кум̣санавамбханад̇хаммигаббадиссавзсу аабаннам̣ аабад̇д̇им̣.
Etthāti āpattidesanāyaṃ. Siyāti avassaṃ. Kakkhaḷattāya vāḷattāyāti kakkhaḷabhāvāya ceva vāḷabhāvāya ca. Thullavajjanti pārājikañceva saṅghādisesañca. Gihippaṭisaṃyuttanti gihīnaṃ hīnena khuṃsanavambhanadhammikappaṭissavesu āpannaṃ āpattiṃ.
яат̇аануруубанд̇и ‘‘д̣̇вийхи самат̇зхи, д̇ийхи, жад̇уухи, згзнаа’’д̇и звам̣ вуд̇д̇анаязнзва яат̇аануруубам̣. зд̇т̇аад̇и имасмим̣ самат̇аад̇хигаарз. винижчаяанаяод̇и винижчаяанаяамад̇д̇ам̣. д̇знааха ‘‘вид̇т̇ааро банаа’’д̇иаад̣̇и. ассаад̇и вид̇т̇аарасса. саманд̇абаасаад̣̇игааяам̣ вуд̇д̇од̇и саманд̇абаасаад̣̇игааяа наама винаяадтагат̇ааяам̣ вуд̇д̇о. д̇асмаа д̇ад̇т̇а вуд̇д̇анаязнзва взд̣̇ид̇аб̣б̣од̇и ад̇хиббааяо.
Yathānurūpanti ‘‘dvīhi samathehi, tīhi, catūhi, ekenā’’ti evaṃ vuttanayeneva yathānurūpaṃ. Etthāti imasmiṃ samathādhikāre. Vinicchayanayoti vinicchayanayamattaṃ. Tenāha ‘‘vitthāro panā’’tiādi. Assāti vitthārassa. Samantapāsādikāyaṃ vuttoti samantapāsādikāya nāma vinayaṭṭhakathāyaṃ vutto. Tasmā tattha vuttanayeneva veditabboti adhippāyo.
зд̇д̇аганд̇и зд̇ам̣барамам̣, на ид̇о бхияяо.
Ettakanti etaṃparamaṃ, na ito bhiyyo.
ад̇хигаран̣асамат̇аван̣н̣анаа нидтид̇аа.
Adhikaraṇasamathavaṇṇanā niṭṭhitā.
ид̇и ган̇каавид̇аран̣ияаа баад̇имогкаван̣н̣анааяа
Iti kaṅkhāvitaraṇiyā pātimokkhavaṇṇanāya
винаяад̇т̇аман̃ж̇уусааяам̣ лийнад̇т̇аббагаасанияам̣
Vinayatthamañjūsāyaṃ līnatthappakāsaniyaṃ
бхигкубаад̇имогкаван̣н̣анаа нидтид̇аа.
Bhikkhupātimokkhavaṇṇanā niṭṭhitā.
