| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
2. ад̇хигаран̣аваг̇г̇аван̣н̣анаа
2. Adhikaraṇavaggavaṇṇanā
11. д̣̇уд̇ияасса батамз б̣алаанийд̇и гзнадтзна б̣алаани. агамбияадтзна б̣алаани наама, д̇ат̇аа д̣̇урабхибхаванадтзна анаж̇жхомад̣̇д̣̇анадтзна жа. бадисан̇каанаб̣аланд̇и бажжавзгкан̣аб̣алам̣. бхааванааб̣аланд̇и б̣рууханаб̣алам̣ вад̣дханаб̣алам̣. суд̣̇д̇хам̣ ад̇д̇аананд̇и ид̣̇ам̣ хздтаа вуд̇д̇анаязнзва взд̣̇ид̇аб̣б̣ам̣. д̇ад̇раад̇и д̇зсу д̣̇вийсу б̣алзсу. яамид̣̇анд̇и яам̣ ид̣̇ам̣. сзкаанамзд̇ам̣ б̣аланд̇и сад̇д̇аннам̣ сзкаанам̣ н̃аан̣аб̣аламзд̇ам̣. сзкан̃хи со, бхигкавз, б̣алам̣ ааг̇аммаад̇и сад̇д̇аннам̣ сзкаанам̣ н̃аан̣аб̣алам̣ аараб̣бха санд̇хааяа бадижжа. баж̇ахад̇ийд̇и маг̇г̇зна баж̇ахад̇и. бахааяаад̇и иминаа бана палам̣ гат̇ид̇ам̣. яам̣ баабанд̇и яам̣ баабагам̣ лаамагам̣. яасмаа банзд̇аани д̣̇взби вад̣дхзд̇ваа арахад̇д̇ам̣ баабун̣аад̇и, д̇асмаа зд̇т̇а зд̇ад̣̇аг̇г̇ам̣ нааг̇ад̇анд̇и взд̣̇ид̇аб̣б̣ам̣.
11. Dutiyassa paṭhame balānīti kenaṭṭhena balāni. Akampiyaṭṭhena balāni nāma, tathā durabhibhavanaṭṭhena anajjhomaddanaṭṭhena ca. Paṭisaṅkhānabalanti paccavekkhaṇabalaṃ. Bhāvanābalanti brūhanabalaṃ vaḍḍhanabalaṃ. Suddhaṃ attānanti idaṃ heṭṭhā vuttanayeneva veditabbaṃ. Tatrāti tesu dvīsu balesu. Yamidanti yaṃ idaṃ. Sekhānametaṃ balanti sattannaṃ sekhānaṃ ñāṇabalametaṃ. Sekhañhi so, bhikkhave, balaṃ āgammāti sattannaṃ sekhānaṃ ñāṇabalaṃ ārabbha sandhāya paṭicca. Pajahatīti maggena pajahati. Pahāyāti iminā pana phalaṃ kathitaṃ. Yaṃ pāpanti yaṃ pāpakaṃ lāmakaṃ. Yasmā panetāni dvepi vaḍḍhetvā arahattaṃ pāpuṇāti, tasmā ettha etadaggaṃ nāgatanti veditabbaṃ.
12. д̣̇уд̇ияз сад̇исамб̣ож̇жхан̇г̇ам̣ бхаавзд̇ийд̇иаад̣̇ийсу аяам̣ хздтаа анааг̇ад̇аанам̣ бад̣̇аанам̣ васзна ад̇т̇аван̣н̣анаа – вивзганиссид̇анд̇и вивзгам̣ ниссид̇ам̣. вивзгод̇и вивид̇д̇ад̇аа. свааяам̣ д̇ад̣̇ан̇г̇авивзго вигкамбхана-самужчзд̣̇а-бадиббассад̣̇д̇хи-ниссаран̣авивзгод̇и бан̃жавид̇хо. д̇асмим̣ бан̃жавид̇хз вивзгз. вивзганиссид̇анд̇и д̇ад̣̇ан̇г̇авивзганиссид̇ам̣, самужчзд̣̇авивзганиссид̇ам̣, ниссаран̣авивзганиссид̇ан̃жа сад̇исамб̣ож̇жхан̇г̇ам̣ бхаавзд̇ийд̇и аяамад̇т̇о взд̣̇ид̇аб̣б̣о. д̇ат̇аа хи сад̇исамб̣ож̇жхан̇г̇абхааванаануяуд̇д̇о яог̇ий вибассанаагкан̣з гижжад̇о д̇ад̣̇ан̇г̇авивзганиссид̇ам̣, аж̇жхаасаяад̇о ниссаран̣авивзганиссид̇ам̣, маг̇г̇агаалз бана гижжад̇о самужчзд̣̇авивзганиссид̇ам̣, аарамман̣ад̇о ниссаран̣авивзганиссид̇ам̣ сад̇исамб̣ож̇жхан̇г̇ам̣ бхаавзд̇и. бан̃жавид̇хавивзганиссид̇амбийд̇и згз. д̇з хи на гзвалам̣ б̣алававибассанаамаг̇г̇апалагкан̣зсуязва б̣ож̇жхан̇г̇з уд̣̇д̇харанд̇и, вибассанаабаад̣̇агагасин̣аж̇жхаанааанаабаанаасубхаб̣рахмавихаараж̇жхаанзсуби уд̣̇д̇харанд̇и, на жа бадисид̣̇д̇хаа адтагат̇аажариязхи. д̇асмаа д̇зсам̣ мад̇зна зд̇зсам̣ жхаанаанам̣ бавад̇д̇игкан̣з гижжад̇о зва вигкамбханавивзганиссид̇ам̣. яат̇аа жа ‘‘вибассанаагкан̣з аж̇жхаасаяад̇о ниссаран̣авивзганиссид̇а’’нд̇и вуд̇д̇ам̣, звам̣ ‘‘бадиббассад̣̇д̇хививзганиссид̇амби бхаавзд̇ий’’д̇и вад̇д̇ум̣ ваддад̇и. зса наяо вирааг̇аниссид̇анд̇иаад̣̇ийсу. вивзгад̇т̇аа зва хи вирааг̇аад̣̇аяо.
12. Dutiye satisambojjhaṅgaṃ bhāvetītiādīsu ayaṃ heṭṭhā anāgatānaṃ padānaṃ vasena atthavaṇṇanā – vivekanissitanti vivekaṃ nissitaṃ. Vivekoti vivittatā. Svāyaṃ tadaṅgaviveko vikkhambhana-samuccheda-paṭippassaddhi-nissaraṇavivekoti pañcavidho. Tasmiṃ pañcavidhe viveke. Vivekanissitanti tadaṅgavivekanissitaṃ, samucchedavivekanissitaṃ, nissaraṇavivekanissitañca satisambojjhaṅgaṃ bhāvetīti ayamattho veditabbo. Tathā hi satisambojjhaṅgabhāvanānuyutto yogī vipassanākkhaṇe kiccato tadaṅgavivekanissitaṃ, ajjhāsayato nissaraṇavivekanissitaṃ, maggakāle pana kiccato samucchedavivekanissitaṃ, ārammaṇato nissaraṇavivekanissitaṃ satisambojjhaṅgaṃ bhāveti. Pañcavidhavivekanissitampīti eke. Te hi na kevalaṃ balavavipassanāmaggaphalakkhaṇesuyeva bojjhaṅge uddharanti, vipassanāpādakakasiṇajjhānaānāpānāsubhabrahmavihārajjhānesupi uddharanti, na ca paṭisiddhā aṭṭhakathācariyehi. Tasmā tesaṃ matena etesaṃ jhānānaṃ pavattikkhaṇe kiccato eva vikkhambhanavivekanissitaṃ. Yathā ca ‘‘vipassanākkhaṇe ajjhāsayato nissaraṇavivekanissita’’nti vuttaṃ, evaṃ ‘‘paṭippassaddhivivekanissitampi bhāvetī’’ti vattuṃ vaṭṭati. Esa nayo virāganissitantiādīsu. Vivekatthā eva hi virāgādayo.
гзвалам̣ хзд̇т̇а воссаг̇г̇о д̣̇увид̇хо барижжааг̇авоссаг̇г̇о жа багканд̣̇анавоссаг̇г̇о жаад̇и. д̇ад̇т̇а барижжааг̇авоссаг̇г̇од̇и вибассанаагкан̣з жа д̇ад̣̇ан̇г̇авасзна, маг̇г̇агкан̣з жа самужчзд̣̇авасзна гилзсаббахаанам̣. багканд̣̇анавоссаг̇г̇од̇и вибассанаагкан̣з д̇анниннабхаавзна, маг̇г̇агкан̣з бана аарамман̣агаран̣зна ниб̣б̣аанабагканд̣̇анам̣. д̇ад̣̇убхаяамби имасмим̣ логияалогуд̇д̇арамиссагз ад̇т̇аван̣н̣анаанаяз ваддад̇и. д̇ат̇аа хи аяам̣ сад̇исамб̣ож̇жхан̇г̇о яат̇аавуд̇д̇зна багаарзна гилзсз барижжаж̇ад̇и, ниб̣б̣аанан̃жа багканд̣̇ад̇и. воссаг̇г̇абарин̣ааминд̇и иминаа бана сагалзна важанзна воссаг̇г̇ад̇т̇ам̣ барин̣аманд̇ам̣ барин̣ад̇ан̃жа, барибажжанд̇ам̣ барибагган̃жаад̇и ид̣̇ам̣ вуд̇д̇ам̣ ход̇и. аяан̃хи б̣ож̇жхан̇г̇абхааванаануяуд̇д̇о бхигку яат̇аа сад̇исамб̣ож̇жхан̇г̇о гилзсабарижжааг̇авоссаг̇г̇ад̇т̇ам̣ ниб̣б̣аанабагканд̣̇анавоссаг̇г̇ад̇т̇ан̃жа барибажжад̇и, яат̇аа жа барибагго ход̇и, д̇ат̇аа нам̣ бхаавзд̇ийд̇и. зса наяо сзсаб̣ож̇жхан̇г̇зсу.
Kevalaṃ hettha vossaggo duvidho pariccāgavossaggo ca pakkhandanavossaggo cāti. Tattha pariccāgavossaggoti vipassanākkhaṇe ca tadaṅgavasena, maggakkhaṇe ca samucchedavasena kilesappahānaṃ. Pakkhandanavossaggoti vipassanākkhaṇe tanninnabhāvena, maggakkhaṇe pana ārammaṇakaraṇena nibbānapakkhandanaṃ. Tadubhayampi imasmiṃ lokiyalokuttaramissake atthavaṇṇanānaye vaṭṭati. Tathā hi ayaṃ satisambojjhaṅgo yathāvuttena pakārena kilese pariccajati, nibbānañca pakkhandati. Vossaggapariṇāminti iminā pana sakalena vacanena vossaggatthaṃ pariṇamantaṃ pariṇatañca, paripaccantaṃ paripakkañcāti idaṃ vuttaṃ hoti. Ayañhi bojjhaṅgabhāvanānuyutto bhikkhu yathā satisambojjhaṅgo kilesapariccāgavossaggatthaṃ nibbānapakkhandanavossaggatthañca paripaccati, yathā ca paripakko hoti, tathā naṃ bhāvetīti. Esa nayo sesabojjhaṅgesu.
ид̇ха бана ниб̣б̣аанам̣язва саб̣б̣асан̇кад̇зхи вивид̇д̇ад̇д̇аа вивзго, саб̣б̣зсам̣ вирааг̇абхаавад̇о вирааг̇о, нирод̇хабхаавад̇о нирод̇ход̇и вуд̇д̇ам̣. маг̇г̇о зва жа воссаг̇г̇абарин̣аамий, д̇асмаа сад̇исамб̣ож̇жхан̇г̇ам̣ бхаавзд̇и вивзгам̣ аарамман̣ам̣ гад̇ваа бавад̇д̇ияаа вивзганиссид̇ам̣, д̇ат̇аа вирааг̇аниссид̇ам̣ нирод̇ханиссид̇ам̣. д̇ан̃жа ко арияамаг̇г̇агкан̣уббад̇д̇ияаа гилзсаанам̣ самужчзд̣̇ад̇о барижжааг̇абхаавзна жа ниб̣б̣аанабагканд̣̇анабхаавзна жа барин̣ад̇ам̣ барибагганд̇и аяамзва ад̇т̇о д̣̇адтаб̣б̣о. зса наяо сзсаб̣ож̇жхан̇г̇зсу. ид̇и имз сад̇д̇а б̣ож̇жхан̇г̇аа логияалогуд̇д̇арамиссагаа гат̇ид̇аа. имзсуби д̣̇вийсу б̣алзсу зд̇ад̣̇аг̇г̇абхааво вуд̇д̇анаязнзва взд̣̇ид̇аб̣б̣о.
Idha pana nibbānaṃyeva sabbasaṅkhatehi vivittattā viveko, sabbesaṃ virāgabhāvato virāgo, nirodhabhāvato nirodhoti vuttaṃ. Maggo eva ca vossaggapariṇāmī, tasmā satisambojjhaṅgaṃ bhāveti vivekaṃ ārammaṇaṃ katvā pavattiyā vivekanissitaṃ, tathā virāganissitaṃ nirodhanissitaṃ. Tañca kho ariyamaggakkhaṇuppattiyā kilesānaṃ samucchedato pariccāgabhāvena ca nibbānapakkhandanabhāvena ca pariṇataṃ paripakkanti ayameva attho daṭṭhabbo. Esa nayo sesabojjhaṅgesu. Iti ime satta bojjhaṅgā lokiyalokuttaramissakā kathitā. Imesupi dvīsu balesu etadaggabhāvo vuttanayeneva veditabbo.
13. д̇ад̇ияз вивижжзва гаамзхийд̇иаад̣̇ийнам̣ жад̇уннам̣ жхаанаанам̣ баал̣иад̇т̇о жа бхааванаанаяо жа саб̣б̣о саб̣б̣аагаарзна висуд̣̇д̇химаг̇г̇з (висуд̣̇д̇хи. 1.69-70) вид̇т̇аарид̇оязва. имаани бана жад̇д̇аари жхаанаани зго бхигку жид̇д̇згаг̇г̇ад̇т̇ааяа бхаавзд̇и, зго вибассанаабаад̣̇агад̇т̇ааяа, зго абхин̃н̃аабаад̣̇агад̇т̇ааяа, зго нирод̇хабаад̣̇агад̇т̇ааяа, зго бхавависзсад̇т̇ааяа. ид̇ха бана д̇ааниби вибассанаабаад̣̇агаани ад̇хиббзд̇аани. аяам̣ хи бхигку имаани жхаанаани самаабаж̇ж̇ид̇ваа самаабад̇д̇ид̇о вудтааяа сан̇каарз саммасид̇ваа хзд̇убажжаяабариг̇г̇ахам̣ гад̇ваа саббажжаяам̣ наамаруубан̃жа вавад̇т̇абзд̇ваа инд̣̇рияаб̣алаб̣ож̇жхан̇г̇аани самод̇хаанзд̇ваа арахад̇д̇ам̣ баабун̣аад̇и. звамзд̇аани жхаанаани логияалогуд̇д̇арамиссагаанзва гат̇ид̇аани. имасмимби б̣алад̣̇ваяз зд̇ад̣̇аг̇г̇абхааво вуд̇д̇анаязнзва взд̣̇ид̇аб̣б̣о.
13. Tatiye vivicceva kāmehītiādīnaṃ catunnaṃ jhānānaṃ pāḷiattho ca bhāvanānayo ca sabbo sabbākārena visuddhimagge (visuddhi. 1.69-70) vitthāritoyeva. Imāni pana cattāri jhānāni eko bhikkhu cittekaggatthāya bhāveti, eko vipassanāpādakatthāya, eko abhiññāpādakatthāya, eko nirodhapādakatthāya, eko bhavavisesatthāya. Idha pana tānipi vipassanāpādakāni adhippetāni. Ayaṃ hi bhikkhu imāni jhānāni samāpajjitvā samāpattito vuṭṭhāya saṅkhāre sammasitvā hetupaccayapariggahaṃ katvā sappaccayaṃ nāmarūpañca vavatthapetvā indriyabalabojjhaṅgāni samodhānetvā arahattaṃ pāpuṇāti. Evametāni jhānāni lokiyalokuttaramissakāneva kathitāni. Imasmimpi baladvaye etadaggabhāvo vuttanayeneva veditabbo.
14. жад̇уд̇т̇з сам̣кид̇д̇зна жа вид̇т̇аарзна жаад̇и сам̣кид̇д̇ад̇хаммад̣̇зсанаа вид̇т̇аарад̇хаммад̣̇зсанаа жаад̇и д̣̇взязва д̇хаммад̣̇зсанаад̇и д̣̇ассзд̇и. д̇ад̇т̇а маад̇игам̣ уд̣̇д̣̇исид̇ваа гат̇ид̇аа д̣̇зсанаа сам̣кид̇д̇ад̣̇зсанаа наама. д̇амзва маад̇игам̣ вид̇т̇аарад̇о вибхаж̇ид̇ваа гат̇ид̇аа вид̇т̇аарад̣̇зсанаа наама. маад̇игам̣ ваа табзд̇вааби адтабзд̇вааби вид̇т̇аарад̇о вибхаж̇ид̇ваа гат̇ид̇аа вид̇т̇аарад̣̇зсанаа наама . д̇аасу сам̣кид̇д̇ад̣̇зсанаа наама махаабан̃н̃асса буг̇г̇аласса васзна гат̇ид̇аа, вид̇т̇аарад̣̇зсанаа наама манд̣̇абан̃н̃асса. махаабан̃н̃асса хи вид̇т̇аарад̣̇зсанаа ад̇ибабан̃жо вияа ход̇и. манд̣̇абан̃н̃асса сан̇кзбад̣̇зсанаа сасагасса уббад̇анам̣ вияа ход̇и, нзва анд̇ам̣ на годим̣ баабун̣ид̇ум̣ саггод̇и. сан̇кзбад̣̇зсанаа жа уг̇гхадид̇ан̃н̃усса васзна гат̇ид̇аа, вид̇т̇аарад̣̇зсанаа ид̇арзсам̣ д̇ин̣н̣ам̣ васзна. сагаламби хи д̇збидагам̣ сан̇кзбад̣̇зсанаа вид̇т̇аарад̣̇зсанаад̇и зд̇т̇зва сан̇кам̣ г̇ажчад̇и.
14. Catutthe saṃkhittena ca vitthārena cāti saṃkhittadhammadesanā vitthāradhammadesanā cāti dveyeva dhammadesanāti dasseti. Tattha mātikaṃ uddisitvā kathitā desanā saṃkhittadesanā nāma. Tameva mātikaṃ vitthārato vibhajitvā kathitā vitthāradesanā nāma. Mātikaṃ vā ṭhapetvāpi aṭṭhapetvāpi vitthārato vibhajitvā kathitā vitthāradesanā nāma . Tāsu saṃkhittadesanā nāma mahāpaññassa puggalassa vasena kathitā, vitthāradesanā nāma mandapaññassa. Mahāpaññassa hi vitthāradesanā atipapañco viya hoti. Mandapaññassa saṅkhepadesanā sasakassa uppatanaṃ viya hoti, neva antaṃ na koṭiṃ pāpuṇituṃ sakkoti. Saṅkhepadesanā ca ugghaṭitaññussa vasena kathitā, vitthāradesanā itaresaṃ tiṇṇaṃ vasena. Sakalampi hi tepiṭakaṃ saṅkhepadesanā vitthāradesanāti ettheva saṅkhaṃ gacchati.
15. бан̃жамз яасмим̣, бхигкавз, ад̇хигаран̣зд̇и виваад̣̇аад̇хигаран̣ам̣, ануваад̣̇аад̇хигаран̣ам̣, аабад̇д̇аад̇хигаран̣ам̣, гижжаад̇хигаран̣анд̇и имзсам̣ жад̇уннам̣ ад̇хигаран̣аанам̣ яасмим̣ ад̇хигаран̣з. аабанно жа бхигкууд̇и аабад̇д̇им̣ аабанно бхигку жа. д̇асмзд̇анд̇и д̇асмим̣ зд̇ам̣. д̣̇ийгхад̇д̇ааяаад̇и д̣̇ийгхам̣ ад̣̇д̇хаанам̣ д̇идтанад̇т̇ааяа. карад̇д̇ааяаад̇и д̣̇ааса-гон̣д̣а-жан̣д̣аала-взнаад̇и звам̣ караваажаабавад̇д̇анад̇т̇ааяа. ваал̣ад̇д̇ааяаад̇и баан̣и лзд̣д̣уд̣̇ан̣д̣аад̣̇ийхи бахаран̣авасзна гагкал̣абхаавад̇т̇ааяа. бхигкуу жа на паасум̣ вихариссанд̇ийд̇и ан̃н̃аман̃н̃ам̣ виваад̣̇аабаннз бхигкусан̇гхз язби уд̣̇д̣̇зсам̣ ваа барибужчам̣ ваа г̇ахзд̇угаамаа бад̇хаанам̣ ваа ануяун̃ж̇ид̇угаамаа, д̇з паасум̣ на вихариссанд̇и. бхигкусан̇гхасмим̣ хи убосат̇абавааран̣ааяа тид̇ааяа уд̣̇д̣̇зсаад̣̇ийхи ад̇т̇игаа уд̣̇д̣̇зсаад̣̇ийни г̇ахзд̇ум̣ на саггонд̇и, вибассагаанам̣ жид̇д̇уббаад̣̇о на згаг̇г̇о ход̇и, д̇ад̇о висзсам̣ ниб̣б̣ад̇д̇зд̇ум̣ на саггонд̇и. звам̣ бхигкуу жа на паасум̣ вихариссанд̇и. на д̣̇ийгхад̇д̇ааяаад̇иаад̣̇ийсу вуд̇д̇абадибагканаязна ад̇т̇о взд̣̇ид̇аб̣б̣о.
15. Pañcame yasmiṃ, bhikkhave, adhikaraṇeti vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇanti imesaṃ catunnaṃ adhikaraṇānaṃ yasmiṃ adhikaraṇe. Āpanno ca bhikkhūti āpattiṃ āpanno bhikkhu ca. Tasmetanti tasmiṃ etaṃ. Dīghattāyāti dīghaṃ addhānaṃ tiṭṭhanatthāya. Kharattāyāti dāsa-koṇḍa-caṇḍāla-venāti evaṃ kharavācāpavattanatthāya. Vāḷattāyāti pāṇi leḍḍudaṇḍādīhi paharaṇavasena kakkhaḷabhāvatthāya. Bhikkhū ca na phāsuṃ viharissantīti aññamaññaṃ vivādāpanne bhikkhusaṅghe yepi uddesaṃ vā paripucchaṃ vā gahetukāmā padhānaṃ vā anuyuñjitukāmā, te phāsuṃ na viharissanti. Bhikkhusaṅghasmiṃ hi uposathapavāraṇāya ṭhitāya uddesādīhi atthikā uddesādīni gahetuṃ na sakkonti, vipassakānaṃ cittuppādo na ekaggo hoti, tato visesaṃ nibbattetuṃ na sakkonti. Evaṃ bhikkhū ca na phāsuṃ viharissanti. Na dīghattāyātiādīsu vuttapaṭipakkhanayena attho veditabbo.
ид̇хаад̇и имасмим̣ саасанз. ид̇и бадисан̃жигкад̇ийд̇и звам̣ бажжавзгкад̇и. агусалам̣ аабаннод̇и зд̇т̇а агусаланд̇и аабад̇д̇и ад̇хиббзд̇аа, аабад̇д̇им̣ аабаннод̇и ад̇т̇о. ган̃жид̣̇зва д̣̇зсанд̇и на саб̣б̣амзва аабад̇д̇им̣, аабад̇д̇ияаа бана ган̃жид̣̇зва д̣̇зсам̣ ан̃н̃ад̇арам̣ аабад̇д̇инд̇и ад̇т̇о. гааязнаад̇и гараж̇агааязна. анад̇д̇аманод̇и ад̇удтажид̇д̇о. анад̇д̇аманаваажанд̇и ад̇удтаваажам̣. мамзваад̇и мам̣язва. д̇ад̇т̇аад̇и д̇асмим̣ ад̇хигаран̣з. ажжаяо ажжаг̇амаад̇и абараад̇хо ад̇иггамид̇ваа мад̣̇д̣̇ид̇ваа г̇ад̇о, ахамзвзд̇т̇а абараад̇хиго. сун̇гад̣̇ааяагам̣ва бхан̣д̣асминд̇и яат̇аа сун̇гадтаанам̣ барихарид̇ваа нийд̇з бхан̣д̣асмим̣ сун̇гад̣̇ааяагам̣ абараад̇хо абхибхавад̇и, со жа д̇ад̇т̇а абараад̇хиго ход̇и, на рааж̇аано на рааж̇абурисаад̇и ад̇т̇о.
Idhāti imasmiṃ sāsane. Iti paṭisañcikkhatīti evaṃ paccavekkhati. Akusalaṃ āpannoti ettha akusalanti āpatti adhippetā, āpattiṃ āpannoti attho. Kañcideva desanti na sabbameva āpattiṃ, āpattiyā pana kañcideva desaṃ aññataraṃ āpattinti attho. Kāyenāti karajakāyena. Anattamanoti atuṭṭhacitto. Anattamanavācanti atuṭṭhavācaṃ. Mamevāti maṃyeva. Tatthāti tasmiṃ adhikaraṇe. Accayo accagamāti aparādho atikkamitvā madditvā gato, ahamevettha aparādhiko. Suṅkadāyakaṃva bhaṇḍasminti yathā suṅkaṭṭhānaṃ pariharitvā nīte bhaṇḍasmiṃ suṅkadāyakaṃ aparādho abhibhavati, so ca tattha aparādhiko hoti, na rājāno na rājapurisāti attho.
ид̣̇ам̣ вуд̇д̇ам̣ ход̇и – яо хи ран̃н̃аа табид̇ам̣ сун̇гадтаанам̣ барихарид̇ваа бхан̣д̣ам̣ харад̇и, д̇ам̣ саха бхан̣д̣асагадзна аанзд̇ваа ран̃н̃о д̣̇ассзнд̇и. д̇ад̇т̇а нзва сун̇гадтаанасса д̣̇осо ад̇т̇и, на ран̃н̃о на рааж̇абурисаанам̣, барихарид̇ваа г̇ад̇ассзва бана д̣̇осо, звамзвам̣ яам̣ со бхигку аабад̇д̇им̣ аабанно, д̇ад̇т̇а нзва аабад̇д̇ияаа д̣̇осо, на жод̣̇агасса. д̇ийхи бана гааран̣зхи д̇ассзва бхигкуно д̣̇осо. д̇асса хи аабад̇д̇им̣ аабаннабхаавзнаби д̣̇осо, жод̣̇агз анад̇д̇аманад̇ааяаби д̣̇осо, анад̇д̇аманасса сад̇о барзсам̣ аарожанзнаби д̣̇осо. жод̣̇агасса бана яам̣ со д̇ам̣ аабад̇д̇им̣ аабаж̇ж̇анд̇ам̣ ад̣̇д̣̇аса, д̇ад̇т̇а д̣̇осо над̇т̇и. анад̇д̇аманад̇ааяа жод̣̇анааяа бана д̣̇осо. д̇амби аманасигарид̇ваа аяам̣ бхигку ад̇д̇анова д̣̇осам̣ бажжавзгканд̇о ‘‘ид̇и мамзва д̇ад̇т̇а ажжаяо ажжаг̇амаа сун̇гад̣̇ааяагам̣ва бхан̣д̣асми’’нд̇и звам̣ бадисан̃жигкад̇ийд̇и ад̇т̇о. д̣̇уд̇ияаваарз жод̣̇агасса анад̇д̇аманад̇аа жа анад̇д̇аманад̇ааяа жод̣̇ид̇абхааво жаад̇и д̣̇вз д̣̇осаа, д̇зсам̣ васзна ‘‘ажжаяо ажжаг̇амаа’’д̇и зд̇т̇а яож̇анаа гаад̇аб̣б̣аа. сзсамзд̇т̇а уд̇д̇аанамзваад̇и.
Idaṃ vuttaṃ hoti – yo hi raññā ṭhapitaṃ suṅkaṭṭhānaṃ pariharitvā bhaṇḍaṃ harati, taṃ saha bhaṇḍasakaṭena ānetvā rañño dassenti. Tattha neva suṅkaṭṭhānassa doso atthi, na rañño na rājapurisānaṃ, pariharitvā gatasseva pana doso, evamevaṃ yaṃ so bhikkhu āpattiṃ āpanno, tattha neva āpattiyā doso, na codakassa. Tīhi pana kāraṇehi tasseva bhikkhuno doso. Tassa hi āpattiṃ āpannabhāvenapi doso, codake anattamanatāyapi doso, anattamanassa sato paresaṃ ārocanenapi doso. Codakassa pana yaṃ so taṃ āpattiṃ āpajjantaṃ addasa, tattha doso natthi. Anattamanatāya codanāya pana doso. Tampi amanasikaritvā ayaṃ bhikkhu attanova dosaṃ paccavekkhanto ‘‘iti mameva tattha accayo accagamā suṅkadāyakaṃva bhaṇḍasmi’’nti evaṃ paṭisañcikkhatīti attho. Dutiyavāre codakassa anattamanatā ca anattamanatāya coditabhāvo cāti dve dosā, tesaṃ vasena ‘‘accayo accagamā’’ti ettha yojanā kātabbā. Sesamettha uttānamevāti.
16. чадтз ан̃н̃ад̇арод̇и зго абаагаданаамо б̣раахман̣о. язна бхаг̇аваа д̇знубасан̇гамийд̇и язнаад̇и бхуммад̇т̇з гаран̣аважанам̣. д̇асмаа яад̇т̇а бхаг̇аваа, д̇ад̇т̇а убасан̇гамийд̇и звамзд̇т̇а ад̇т̇о взд̣̇ид̇аб̣б̣о. язна ваа гааран̣зна бхаг̇аваа д̣̇звамануссзхи убасан̇гамид̇аб̣б̣о, д̇зна гааран̣зна убасан̇гамийд̇и звамзд̇т̇а ад̇т̇о д̣̇адтаб̣б̣о. гзна жа гааран̣зна бхаг̇аваа убасан̇гамид̇аб̣б̣о ? наанаббагаараг̇ун̣ависзсаад̇хиг̇амаад̇хиббааязна, саад̣̇упалуубабхог̇аад̇хиббааязна д̣̇иж̇аг̇ан̣зхи нижжапалид̇амахааругко вияа. убасан̇гамийд̇и г̇ад̇од̇и вуд̇д̇ам̣ ход̇и. убасан̇гамид̇ваад̇и убасан̇гаманабарияосаанад̣̇ийбанам̣. ат̇а ваа звам̣ г̇ад̇о д̇ад̇о аасаннад̇арам̣ таанам̣ бхаг̇авад̇о самийбасан̇каад̇ам̣ г̇анд̇ваад̇иби вуд̇д̇ам̣ ход̇и.
16. Chaṭṭhe aññataroti eko apākaṭanāmo brāhmaṇo. Yena bhagavā tenupasaṅkamīti yenāti bhummatthe karaṇavacanaṃ. Tasmā yattha bhagavā, tattha upasaṅkamīti evamettha attho veditabbo. Yena vā kāraṇena bhagavā devamanussehi upasaṅkamitabbo, tena kāraṇena upasaṅkamīti evamettha attho daṭṭhabbo. Kena ca kāraṇena bhagavā upasaṅkamitabbo ? Nānappakāraguṇavisesādhigamādhippāyena, sāduphalūpabhogādhippāyena dijagaṇehi niccaphalitamahārukkho viya. Upasaṅkamīti gatoti vuttaṃ hoti. Upasaṅkamitvāti upasaṅkamanapariyosānadīpanaṃ. Atha vā evaṃ gato tato āsannataraṃ ṭhānaṃ bhagavato samīpasaṅkhātaṃ gantvātipi vuttaṃ hoti.
бхаг̇авад̇аа сад̣̇д̇хим̣ саммод̣̇ийд̇и яат̇аа жа каманийяаад̣̇ийни бужчанд̇о бхаг̇аваа д̇зна, звам̣ соби бхаг̇авад̇аа сад̣̇д̇хим̣ самаббавад̇д̇амод̣̇о ахоси, сийд̇од̣̇агам̣ вияа ун̣ход̣̇агзна саммод̣̇ид̇ам̣ згийбхаавам̣ аг̇амааси. яааяа жа ‘‘гажжи, бхо г̇од̇ама, каманийяам̣, гажжи яаабанийяам̣, гажжи бход̇о г̇од̇амасса жа саавагаанан̃жа аббааб̣аад̇хам̣ аббаад̇ан̇гам̣ лахудтаанам̣ б̣алам̣ паасувихааро’’д̇иаад̣̇игааяа гат̇ааяа саммод̣̇и, д̇ам̣ бийд̇ибаамож̇ж̇асан̇каад̇асса саммод̣̇асса ж̇ананад̇о саммод̣̇ид̇ум̣ яуд̇д̇абхаавад̇о жа саммод̣̇анийяам̣, ад̇т̇аб̣яан̃ж̇анамад̇хурад̇ааяа сужирамби гаалам̣ саарзд̇ум̣ ниранд̇арам̣ бавад̇д̇зд̇ум̣ арахаруубад̇о сарид̇аб̣б̣абхаавад̇о жа сааран̣ийяам̣. суяяамаанасукад̇о ваа саммод̣̇анийяам̣, ануссарияамаанасукад̇о сааран̣ийяам̣, д̇ат̇аа б̣яан̃ж̇анабарисуд̣̇д̇хад̇ааяа саммод̣̇анийяам̣, ад̇т̇абарисуд̣̇д̇хад̇ааяа сааран̣ийяанд̇и звам̣ анзгзхи барияааязхи саммод̣̇анийяам̣ сааран̣ийяам̣ гат̇ам̣ вийд̇исаарзд̇ваа барияосаабзд̇ваа нидтабзд̇ваа язнад̇т̇зна ааг̇ад̇о, д̇ам̣ бужчид̇угаамо згаманд̇ам̣ нисийд̣̇и.
Bhagavatā saddhiṃ sammodīti yathā ca khamanīyādīni pucchanto bhagavā tena, evaṃ sopi bhagavatā saddhiṃ samappavattamodo ahosi, sītodakaṃ viya uṇhodakena sammoditaṃ ekībhāvaṃ agamāsi. Yāya ca ‘‘kacci, bho gotama, khamanīyaṃ, kacci yāpanīyaṃ, kacci bhoto gotamassa ca sāvakānañca appābādhaṃ appātaṅkaṃ lahuṭṭhānaṃ balaṃ phāsuvihāro’’tiādikāya kathāya sammodi, taṃ pītipāmojjasaṅkhātassa sammodassa jananato sammodituṃ yuttabhāvato ca sammodanīyaṃ, atthabyañjanamadhuratāya sucirampi kālaṃ sāretuṃ nirantaraṃ pavattetuṃ araharūpato saritabbabhāvato ca sāraṇīyaṃ. Suyyamānasukhato vā sammodanīyaṃ, anussariyamānasukhato sāraṇīyaṃ, tathā byañjanaparisuddhatāya sammodanīyaṃ, atthaparisuddhatāya sāraṇīyanti evaṃ anekehi pariyāyehi sammodanīyaṃ sāraṇīyaṃ kathaṃ vītisāretvā pariyosāpetvā niṭṭhapetvā yenatthena āgato, taṃ pucchitukāmo ekamantaṃ nisīdi.
згаманд̇анд̇и бхааванабум̣саганид̣̇д̣̇зсо ‘‘висамам̣ жанд̣̇имасуурияаа баривад̇д̇анд̇ий’’д̇иаад̣̇ийсу (а. ни. 4.70) вияа. д̇асмаа яат̇аа нисинно згаманд̇ам̣ нисинно ход̇и, д̇ат̇аа нисийд̣̇ийд̇и звамзд̇т̇а ад̇т̇о д̣̇адтаб̣б̣о. бхуммад̇т̇з ваа зд̇ам̣ убаяог̇аважанам̣. нисийд̣̇ийд̇и убаависи. бан̣д̣ид̇аа хи бурисаа г̇арудтаанийяам̣ убасан̇гамид̇ваа аасанагусалад̇ааяа згаманд̇ам̣ нисийд̣̇анд̇и. аяан̃жа нзсам̣ ан̃н̃ад̇аро, д̇асмаа згаманд̇ам̣ нисийд̣̇и.
Ekamantanti bhāvanapuṃsakaniddeso ‘‘visamaṃ candimasūriyā parivattantī’’tiādīsu (a. ni. 4.70) viya. Tasmā yathā nisinno ekamantaṃ nisinno hoti, tathā nisīdīti evamettha attho daṭṭhabbo. Bhummatthe vā etaṃ upayogavacanaṃ. Nisīdīti upāvisi. Paṇḍitā hi purisā garuṭṭhānīyaṃ upasaṅkamitvā āsanakusalatāya ekamantaṃ nisīdanti. Ayañca nesaṃ aññataro, tasmā ekamantaṃ nisīdi.
гат̇ам̣ нисинно бана згаманд̇ам̣ нисинно ход̇ийд̇и? ча нисаж̇ж̇ад̣̇осз важ̇ж̇зд̇ваа. сзяяат̇ид̣̇ам̣ – ад̇ид̣̇уурам̣, ажжаасаннам̣, убариваад̇ам̣, уннад̇аббад̣̇зсам̣, ад̇исаммукам̣ ад̇ибажчаад̇и. ад̇ид̣̇уурз нисинно хи сажз гат̇зд̇угаамо ход̇и, ужжаасад̣̇д̣̇зна гат̇зд̇аб̣б̣ам̣ ход̇и. ажжаасаннз нисинно сан̇гхадданам̣ гарод̇и . убариваад̇з нисинно сарийраг̇анд̇хзна б̣аад̇хад̇и. уннад̇аббад̣̇зсз нисинно аг̇ааравам̣ багаасзд̇и. ад̇исаммукаа нисинно сажз д̣̇адтугаамо ход̇и, жагкунаа жагкум̣ аахажжа д̣̇адтаб̣б̣ам̣ ход̇и. ад̇ибажчаа нисинно сажз д̣̇адтугаамо ход̇и, г̇ийвам̣ басаарзд̇ваа д̣̇адтаб̣б̣ам̣ ход̇и. д̇асмаа аяамби зд̇з ча нисаж̇ж̇ад̣̇осз важ̇ж̇зд̇ваа нисийд̣̇и. д̇зна вуд̇д̇ам̣ ‘‘згаманд̇ам̣ нисийд̣̇ий’’д̇и.
Kathaṃ nisinno pana ekamantaṃ nisinno hotīti? Cha nisajjadose vajjetvā. Seyyathidaṃ – atidūraṃ, accāsannaṃ, uparivātaṃ, unnatappadesaṃ, atisammukhaṃ atipacchāti. Atidūre nisinno hi sace kathetukāmo hoti, uccāsaddena kathetabbaṃ hoti. Accāsanne nisinno saṅghaṭṭanaṃ karoti . Uparivāte nisinno sarīragandhena bādhati. Unnatappadese nisinno agāravaṃ pakāseti. Atisammukhā nisinno sace daṭṭhukāmo hoti, cakkhunā cakkhuṃ āhacca daṭṭhabbaṃ hoti. Atipacchā nisinno sace daṭṭhukāmo hoti, gīvaṃ pasāretvā daṭṭhabbaṃ hoti. Tasmā ayampi ete cha nisajjadose vajjetvā nisīdi. Tena vuttaṃ ‘‘ekamantaṃ nisīdī’’ti.
зд̇ад̣̇авожаад̇и д̣̇увид̇хаа хи бужчаа – аг̇ааригабужчаа, анаг̇ааригабужчаа жа. д̇ад̇т̇а ‘‘гим̣, бханд̇з, гусалам̣, гим̣ агусала’’нд̇и (ма. ни. 3.296) иминаа наязна аг̇ааригабужчаа ааг̇ад̇аа. ‘‘имз ну ко, бханд̇з, бан̃жубаад̣̇аанагканд̇хаа’’д̇и (ма. ни. 3.86) иминаа наязна анаг̇ааригабужчаа. аяам̣ бана ад̇д̇ано ануруубам̣ аг̇ааригабужчам̣ бужчанд̇о зд̇ам̣ ‘‘го ну ко, бхо г̇од̇ама, хзд̇у го бажжаяо’’д̇иаад̣̇иважанам̣ авожа. д̇ад̇т̇а хзд̇у бажжаяод̇и убхаяамбзд̇ам̣ гааран̣авзважанамзва. ад̇хаммажарияаависамажарияаахзд̇ууд̇и ад̇хаммажарияаасан̇каад̇ааяа висамажарияааяа хзд̇у, д̇ам̣гааран̣аа д̇аббажжаяаад̇и ад̇т̇о . д̇ад̇рааяам̣ бад̣̇ад̇т̇о – ад̇хаммасса жарияаа ад̇хаммажарияаа, ад̇хаммагааран̣анд̇и ад̇т̇о. висамам̣ жарияаа, висамасса ваа гаммасса жарияаад̇и висамажарияаа. ад̇хаммажарияаа жа саа висамажарияаа жаад̇и ад̇хаммажарияаависамажарияаа. зд̇знубааязна суггабагкзби ад̇т̇о взд̣̇ид̇аб̣б̣о. ад̇т̇ад̇о банзд̇т̇а ад̇хаммажарияаависамажарияаа наама д̣̇аса агусалагаммабат̇аа, д̇хаммажарияаасамажарияаа наама д̣̇аса гусалагаммабат̇аад̇и взд̣̇ид̇аб̣б̣аа.
Etadavocāti duvidhā hi pucchā – agārikapucchā, anagārikapucchā ca. Tattha ‘‘kiṃ, bhante, kusalaṃ, kiṃ akusala’’nti (ma. ni. 3.296) iminā nayena agārikapucchā āgatā. ‘‘Ime nu kho, bhante, pañcupādānakkhandhā’’ti (ma. ni. 3.86) iminā nayena anagārikapucchā. Ayaṃ pana attano anurūpaṃ agārikapucchaṃ pucchanto etaṃ ‘‘ko nu kho, bho gotama, hetu ko paccayo’’tiādivacanaṃ avoca. Tattha hetu paccayoti ubhayampetaṃ kāraṇavevacanameva. Adhammacariyāvisamacariyāhetūti adhammacariyāsaṅkhātāya visamacariyāya hetu, taṃkāraṇā tappaccayāti attho . Tatrāyaṃ padattho – adhammassa cariyā adhammacariyā, adhammakāraṇanti attho. Visamaṃ cariyā, visamassa vā kammassa cariyāti visamacariyā. Adhammacariyā ca sā visamacariyā cāti adhammacariyāvisamacariyā. Etenupāyena sukkapakkhepi attho veditabbo. Atthato panettha adhammacariyāvisamacariyā nāma dasa akusalakammapathā, dhammacariyāsamacariyā nāma dasa kusalakammapathāti veditabbā.
абхигганд̇ам̣, бхо г̇од̇амаад̇и зд̇т̇а аяам̣ абхигганд̇асад̣̇д̣̇о каяасунд̣̇араабхируубааб̣бханумод̣̇анзсу д̣̇иссад̇и. ‘‘абхигганд̇аа, бханд̇з, рад̇д̇и, нигканд̇о батамо яаамо, жиранисинно бхигкусан̇гхо’’д̇иаад̣̇ийсу (уд̣̇аа. 45; жуул̣ава. 383; а. ни. 8.20) хи каяз д̣̇иссад̇и. ‘‘аяам̣ имзсам̣ жад̇уннам̣ буг̇г̇алаанам̣ абхигганд̇ад̇аро жа бан̣ийд̇ад̇аро жаа’’д̇иаад̣̇ийсу (а. ни. 4.100) сунд̣̇арз.
Abhikkantaṃ, bho gotamāti ettha ayaṃ abhikkantasaddo khayasundarābhirūpaabbhanumodanesu dissati. ‘‘Abhikkantā, bhante, ratti, nikkhanto paṭhamo yāmo, ciranisinno bhikkhusaṅgho’’tiādīsu (udā. 45; cūḷava. 383; a. ni. 8.20) hi khaye dissati. ‘‘Ayaṃ imesaṃ catunnaṃ puggalānaṃ abhikkantataro ca paṇītataro cā’’tiādīsu (a. ni. 4.100) sundare.
‘‘го мз ванд̣̇ад̇и баад̣̇аани, ид̣̇д̇хияаа яасасаа ж̇алам̣;
‘‘Ko me vandati pādāni, iddhiyā yasasā jalaṃ;
абхигганд̇зна ван̣н̣зна, саб̣б̣аа обхаасаяам̣ д̣̇исаа’’д̇и. –
Abhikkantena vaṇṇena, sabbā obhāsayaṃ disā’’ti. –
аад̣̇ийсу (ви. ва. 857) абхируубз. ‘‘абхигганд̇ам̣, бханд̇з’’д̇иаад̣̇ийсу (д̣̇ий. ни. 1.250; баараа. 15) аб̣бханумод̣̇анз. ид̇хааби аб̣бханумод̣̇анзязва. яасмаа жа аб̣бханумод̣̇анз, д̇асмаа саад̇ху саад̇ху, бхо г̇од̇амаад̇и вуд̇д̇ам̣ ход̇ийд̇и взд̣̇ид̇аб̣б̣ам̣.
Ādīsu (vi. va. 857) abhirūpe. ‘‘Abhikkantaṃ, bhante’’tiādīsu (dī. ni. 1.250; pārā. 15) abbhanumodane. Idhāpi abbhanumodaneyeva. Yasmā ca abbhanumodane, tasmā sādhu sādhu, bho gotamāti vuttaṃ hotīti veditabbaṃ.
‘‘бхаяз год̇хз басам̣сааяам̣, д̇урид̇з год̇уухалажчарз;
‘‘Bhaye kodhe pasaṃsāyaṃ, turite kotūhalacchare;
хаасз согз басаад̣̇з жа, гарз аамзд̣ид̇ам̣ б̣уд̇хо’’д̇и. –
Hāse soke pasāde ca, kare āmeḍitaṃ budho’’ti. –
иминаа жа лагкан̣зна ид̇ха басаад̣̇авасзна басам̣саавасзна жааяам̣ д̣̇вигкад̇д̇ум̣ вуд̇д̇од̇и взд̣̇ид̇аб̣б̣о. ат̇а ваа абхигганд̇анд̇и абхигганд̇ам̣ ад̇иидтам̣ ад̇иманаабам̣, ад̇исунд̣̇аранд̇и вуд̇д̇ам̣ ход̇и.
Iminā ca lakkhaṇena idha pasādavasena pasaṃsāvasena cāyaṃ dvikkhattuṃ vuttoti veditabbo. Atha vā abhikkantanti abhikkantaṃ atiiṭṭhaṃ atimanāpaṃ, atisundaranti vuttaṃ hoti.
д̇ад̇т̇а згзна абхигганд̇асад̣̇д̣̇зна д̣̇зсанам̣ т̇омзд̇и, згзна ад̇д̇ано басаад̣̇ам̣. аяан̃хзд̇т̇а ад̇хиббааяо – абхигганд̇ам̣, бхо г̇од̇ама, яад̣̇ид̣̇ам̣ бход̇о г̇од̇амасса д̇хаммад̣̇зсанаа, абхигганд̇ам̣ яад̣̇ид̣̇ам̣ бход̇о г̇од̇амасса д̇хаммад̣̇зсанам̣ ааг̇амма мама басаад̣̇од̇и. бхаг̇авад̇оязва ваа важанам̣ д̣̇вз д̣̇вз ад̇т̇з санд̇хааяа т̇омзд̇и – бход̇о г̇од̇амасса важанам̣ абхигганд̇ам̣ д̣̇осанаасанад̇о, абхигганд̇ам̣ г̇ун̣аад̇хиг̇аманад̇о , д̇ат̇аа сад̣̇д̇хааж̇ананад̇о, бан̃н̃ааж̇ананад̇о, саад̇т̇ад̇о, саб̣яан̃ж̇анад̇о, уд̇д̇аанабад̣̇ад̇о, г̇амбхийрад̇т̇ад̇о, ган̣н̣асукад̇о, хад̣̇аяан̇г̇амад̇о, анад̇д̇уггам̣санад̇о, абаравамбханад̇о, гарун̣аасийд̇алад̇о, бан̃н̃аавад̣̇аад̇ад̇о, аабаат̇араман̣ийяад̇о, вимад̣̇д̣̇агкамад̇о, суяяамаанасукад̇о, виймам̣сияамаанахид̇ад̇од̇и звамаад̣̇ийхи яож̇зд̇аб̣б̣ам̣.
Tattha ekena abhikkantasaddena desanaṃ thometi, ekena attano pasādaṃ. Ayañhettha adhippāyo – abhikkantaṃ, bho gotama, yadidaṃ bhoto gotamassa dhammadesanā, abhikkantaṃ yadidaṃ bhoto gotamassa dhammadesanaṃ āgamma mama pasādoti. Bhagavatoyeva vā vacanaṃ dve dve atthe sandhāya thometi – bhoto gotamassa vacanaṃ abhikkantaṃ dosanāsanato, abhikkantaṃ guṇādhigamanato , tathā saddhājananato, paññājananato, sātthato, sabyañjanato, uttānapadato, gambhīratthato, kaṇṇasukhato, hadayaṅgamato, anattukkaṃsanato, aparavambhanato, karuṇāsītalato, paññāvadātato, āpātharamaṇīyato, vimaddakkhamato, suyyamānasukhato, vīmaṃsiyamānahitatoti evamādīhi yojetabbaṃ.
д̇ад̇о барамби жад̇уухи убамаахи д̣̇зсанам̣язва т̇омзд̇и. д̇ад̇т̇а ниггуж̇ж̇ид̇анд̇и ад̇хомукатабид̇ам̣, хздтаамукаж̇аад̇ам̣ ваа. уггуж̇ж̇зяяаад̇и убаримукам̣ гарзяяа. бадижчаннанд̇и д̇ин̣абан̣н̣аад̣̇ичаад̣̇ид̇ам̣. виварзяяаад̇и уг̇гхаадзяяа. муул̣хассаад̇и д̣̇исаамуул̣хасса. маг̇г̇ам̣ аажигкзяяаад̇и хад̇т̇з г̇ахзд̇ваа ‘‘зса маг̇г̇о’’д̇и вад̣̇зяяа. анд̇хагаарзд̇и гаал̣абагкажаад̇уд̣̇д̣̇асийад̣дхарад̇д̇агханаванасан̣д̣амзгхабадалзхи жад̇уран̇г̇з д̇амз. аяам̣ д̇аава ануд̇д̇аанабад̣̇ад̇т̇о.
Tato parampi catūhi upamāhi desanaṃyeva thometi. Tattha nikkujjitanti adhomukhaṭhapitaṃ, heṭṭhāmukhajātaṃ vā. Ukkujjeyyāti uparimukhaṃ kareyya. Paṭicchannanti tiṇapaṇṇādichāditaṃ. Vivareyyāti ugghāṭeyya. Mūḷhassāti disāmūḷhassa. Maggaṃ ācikkheyyāti hatthe gahetvā ‘‘esa maggo’’ti vadeyya. Andhakāreti kāḷapakkhacātuddasīaḍḍharattaghanavanasaṇḍameghapaṭalehi caturaṅge tame. Ayaṃ tāva anuttānapadattho.
аяам̣ бана ад̇хиббааяаяож̇анаа – яат̇аа гожи ниггуж̇ж̇ид̇ам̣ уггуж̇ж̇зяяа, звам̣ сад̣̇д̇хаммавимукам̣ асад̣̇д̇хаммз бад̇ид̇ам̣ мам̣ асад̣̇д̇хаммаа вудтаабзнд̇зна, яат̇аа бадижчаннам̣ виварзяяа, звам̣ гассабасса бхаг̇авад̇о саасананд̇арад̇хаанад̇о бабхуд̇и мижчаад̣̇идтиг̇аханабадижчаннам̣ саасанам̣ виваранд̇зна, яат̇аа муул̣хасса маг̇г̇ам̣ аажигкзяяа, звам̣ гуммаг̇г̇амижчаамаг̇г̇аббадибаннасса мз саг̇г̇амогкамаг̇г̇ам̣ аавигаронд̇зна, яат̇аа анд̇хагаарз д̇злабаж̇ж̇од̇ам̣ д̇хаарзяяа, звам̣ моханд̇хагаарз нимуг̇г̇асса мз б̣уд̣̇д̇хаад̣̇ирад̇анаруубаани абассад̇о д̇аббадижчаад̣̇агамоханд̇хагааравид̣̇д̇хам̣сагад̣̇зсанаабаж̇ж̇од̇ад̇хааран̣зна маяхам̣ бход̇аа г̇од̇амзна зд̇зхи барияааязхи багаасид̇ад̇д̇аа анзгабарияааязна д̇хаммо багаасид̇од̇и.
Ayaṃ pana adhippāyayojanā – yathā koci nikkujjitaṃ ukkujjeyya, evaṃ saddhammavimukhaṃ asaddhamme patitaṃ maṃ asaddhammā vuṭṭhāpentena, yathā paṭicchannaṃ vivareyya, evaṃ kassapassa bhagavato sāsanantaradhānato pabhuti micchādiṭṭhigahanapaṭicchannaṃ sāsanaṃ vivarantena, yathā mūḷhassa maggaṃ ācikkheyya, evaṃ kummaggamicchāmaggappaṭipannassa me saggamokkhamaggaṃ āvikarontena, yathā andhakāre telapajjotaṃ dhāreyya, evaṃ mohandhakāre nimuggassa me buddhādiratanarūpāni apassato tappaṭicchādakamohandhakāraviddhaṃsakadesanāpajjotadhāraṇena mayhaṃ bhotā gotamena etehi pariyāyehi pakāsitattā anekapariyāyena dhammo pakāsitoti.
звам̣ д̣̇зсанам̣ т̇омзд̇ваа имааяа д̣̇зсанааяа рад̇анад̇д̇аяз басаннажид̇д̇о басаннаагаарам̣ гаронд̇о зсааханд̇иаад̣̇имааха. д̇ад̇т̇а зсааханд̇и зсо ахам̣. бхаванд̇ам̣ г̇од̇амам̣ саран̣ам̣ г̇ажчаамийд̇и бхавам̣ мз г̇од̇амо саран̣ам̣ барааяан̣ам̣ агхасса д̇аад̇аа хид̇асса жа вид̇хаад̇аад̇и иминаа ад̇хиббааязна бхаванд̇ам̣ г̇од̇амам̣ г̇ажчаами бхаж̇аами сзваами баяирубаасаами, звам̣ ваа ж̇аанаами б̣уж̇жхаамийд̇и. язсан̃хи д̇хаад̇уунам̣ г̇ад̇и ад̇т̇о, б̣уд̣̇д̇хиби д̇зсам̣ ад̇т̇о. д̇асмаа г̇ажчаамийд̇и имасса ж̇аанаами б̣уж̇жхаамийд̇и аяамад̇т̇о вуд̇д̇о. д̇хамман̃жа бхигкусан̇гхан̃жаад̇и зд̇т̇а бана ад̇хиг̇ад̇амаг̇г̇з сажчигад̇анирод̇хз яат̇аанусидтам̣ бадибаж̇ж̇амаанз жа жад̇уусу абааязсу абад̇амаанз д̇хаарзд̇ийд̇и д̇хаммо. со ад̇т̇ад̇о арияамаг̇г̇о жзва ниб̣б̣аанан̃жа. вуд̇д̇ан̃хзд̇ам̣ – ‘‘яаавад̇аа, бхигкавз, д̇хаммаа сан̇кад̇аа, арияо адтан̇г̇иго маг̇г̇о д̇зсам̣ аг̇г̇амагкааяад̇ий’’д̇и (а. ни. 4.34) вид̇т̇ааро. на гзвалан̃жа арияамаг̇г̇о жзва ниб̣б̣аанан̃жа , абижа ко арияапалзхи сад̣̇д̇хим̣ барияад̇д̇ид̇хаммоби. вуд̇д̇ан̃хзд̇ам̣ чад̇д̇амаан̣авагавимаанз –
Evaṃ desanaṃ thometvā imāya desanāya ratanattaye pasannacitto pasannākāraṃ karonto esāhantiādimāha. Tattha esāhanti eso ahaṃ. Bhavantaṃ gotamaṃ saraṇaṃ gacchāmīti bhavaṃ me gotamo saraṇaṃ parāyaṇaṃ aghassa tātā hitassa ca vidhātāti iminā adhippāyena bhavantaṃ gotamaṃ gacchāmi bhajāmi sevāmi payirupāsāmi, evaṃ vā jānāmi bujjhāmīti. Yesañhi dhātūnaṃ gati attho, buddhipi tesaṃ attho. Tasmā gacchāmīti imassa jānāmi bujjhāmīti ayamattho vutto. Dhammañca bhikkhusaṅghañcāti ettha pana adhigatamagge sacchikatanirodhe yathānusiṭṭhaṃ paṭipajjamāne ca catūsu apāyesu apatamāne dhāretīti dhammo. So atthato ariyamaggo ceva nibbānañca. Vuttañhetaṃ – ‘‘yāvatā, bhikkhave, dhammā saṅkhatā, ariyo aṭṭhaṅgiko maggo tesaṃ aggamakkhāyatī’’ti (a. ni. 4.34) vitthāro. Na kevalañca ariyamaggo ceva nibbānañca , apica kho ariyaphalehi saddhiṃ pariyattidhammopi. Vuttañhetaṃ chattamāṇavakavimāne –
‘‘рааг̇авирааг̇аманзж̇амасогам̣, д̇хаммамасан̇кад̇амаббадигуулам̣;
‘‘Rāgavirāgamanejamasokaṃ, dhammamasaṅkhatamappaṭikūlaṃ;
мад̇хурамимам̣ баг̇ун̣ам̣ сувибхад̇д̇ам̣, д̇хаммамимам̣ саран̣ад̇т̇амубзхий’’д̇и. (ви. ва. 887);
Madhuramimaṃ paguṇaṃ suvibhattaṃ, dhammamimaṃ saraṇatthamupehī’’ti. (vi. va. 887);
зд̇т̇а рааг̇авирог̇од̇и маг̇г̇о гат̇ид̇о. анож̇амасоганд̇и палам̣. д̇хаммамасан̇кад̇анд̇и ниб̣б̣аанам̣. аббадигуулам̣ мад̇хурамимам̣ баг̇ун̣ам̣ сувибхад̇д̇анд̇и бидагад̇д̇аязна вибхад̇д̇аа саб̣б̣ад̇хаммагканд̇хаад̇и. д̣̇идтисийласан̇гхаад̇зна сам̣хад̇од̇и сан̇гхо. со ад̇т̇ад̇о адтаарияабуг̇г̇аласамуухо. вуд̇д̇ан̃хзд̇ам̣ д̇асмиязва вимаанз –
Ettha rāgavirogoti maggo kathito. Anojamasokanti phalaṃ. Dhammamasaṅkhatanti nibbānaṃ. Appaṭikūlaṃ madhuramimaṃpaguṇaṃ suvibhattanti piṭakattayena vibhattā sabbadhammakkhandhāti. Diṭṭhisīlasaṅghātena saṃhatoti saṅgho. So atthato aṭṭhaariyapuggalasamūho. Vuttañhetaṃ tasmiyeva vimāne –
‘‘яад̇т̇а жа д̣̇иннамахабпаламааху, жад̇уусу сужийсу бурисаяуг̇зсу;
‘‘Yattha ca dinnamahapphalamāhu, catūsu sucīsu purisayugesu;
адта жа буг̇г̇алад̇хаммад̣̇асаа д̇з, сан̇гхамимам̣ саран̣ад̇т̇амубзхий’’д̇и. (ви. ва. 888);
Aṭṭha ca puggaladhammadasā te, saṅghamimaṃ saraṇatthamupehī’’ti. (vi. va. 888);
бхигкуунам̣ сан̇гхо бхигкусан̇гхо. зд̇д̇аавад̇аа б̣раахман̣о д̇ийн̣и саран̣аг̇аманаани бадивзд̣̇зси.
Bhikkhūnaṃ saṅgho bhikkhusaṅgho. Ettāvatā brāhmaṇo tīṇi saraṇagamanāni paṭivedesi.
ид̣̇аани д̇зсу саран̣аг̇аманзсу госаллад̇т̇ам̣ саран̣ам̣, саран̣аг̇аманам̣, яо жа саран̣ам̣ г̇ажчад̇и, саран̣аг̇аманаббабхзд̣̇о, саран̣аг̇аманапалам̣, сам̣гилзсо, бхзд̣̇од̇и аяам̣ вид̇хи взд̣̇ид̇аб̣б̣о.
Idāni tesu saraṇagamanesu kosallatthaṃ saraṇaṃ, saraṇagamanaṃ, yo ca saraṇaṃ gacchati, saraṇagamanappabhedo, saraṇagamanaphalaṃ, saṃkileso, bhedoti ayaṃ vidhi veditabbo.
сзяяат̇ид̣̇ам̣ – бад̣̇ад̇т̇ад̇о д̇аава хим̣сад̇ийд̇и саран̣ам̣, саран̣аг̇ад̇аанам̣ д̇знзва саран̣аг̇аманзна бхаяам̣ санд̇аасам̣ д̣̇угкам̣ д̣̇уг̇г̇ад̇ибаригилзсам̣ ханад̇и винаасзд̇ийд̇и ад̇т̇о, рад̇анад̇д̇аяассзвзд̇ам̣ ад̇хиважанам̣. ат̇а ваа хид̇з бавад̇д̇анзна ахид̇аа жа нивад̇д̇анзна сад̇д̇аанам̣ бхаяам̣ хим̣сад̇ийд̇и б̣уд̣̇д̇хо, бхаваганд̇аараа уд̇д̇ааран̣зна логасса ассаасад̣̇аанзна жа д̇хаммо, аббагаанамби гаараанам̣ вибулапалабадилаабхагаран̣зна сан̇гхо. д̇асмаа иминааби барияааязна рад̇анад̇д̇аяам̣ саран̣ам̣. д̇аббасаад̣̇ад̇аг̇г̇аруд̇аахи вихад̇агилзсо д̇аббарааяан̣ад̇аагаараббавад̇д̇о жид̇д̇уббаад̣̇о саран̣аг̇аманам̣. д̇ам̣саман̇г̇ийсад̇д̇о саран̣ам̣ г̇ажчад̇и, вуд̇д̇аббагаарзна жид̇д̇уббаад̣̇зна ‘‘зд̇аани мз д̇ийн̣и рад̇анаани саран̣ам̣, зд̇аани барааяан̣а’’нд̇и звам̣ убзд̇ийд̇и ад̇т̇о. звам̣ д̇аава саран̣ам̣ саран̣аг̇аманам̣ яо жа саран̣ам̣ г̇ажчад̇и ид̣̇ам̣ д̇аяам̣ взд̣̇ид̇аб̣б̣ам̣.
Seyyathidaṃ – padatthato tāva hiṃsatīti saraṇaṃ, saraṇagatānaṃ teneva saraṇagamanena bhayaṃ santāsaṃ dukkhaṃ duggatiparikilesaṃ hanati vināsetīti attho, ratanattayassevetaṃ adhivacanaṃ. Atha vā hite pavattanena ahitā ca nivattanena sattānaṃ bhayaṃ hiṃsatīti buddho, bhavakantārā uttāraṇena lokassa assāsadānena ca dhammo, appakānampi kārānaṃ vipulaphalapaṭilābhakaraṇena saṅgho. Tasmā imināpi pariyāyena ratanattayaṃ saraṇaṃ. Tappasādataggarutāhi vihatakileso tapparāyaṇatākārappavatto cittuppādo saraṇagamanaṃ. Taṃsamaṅgīsatto saraṇaṃ gacchati, vuttappakārena cittuppādena ‘‘etāni me tīṇi ratanāni saraṇaṃ, etāni parāyaṇa’’nti evaṃ upetīti attho. Evaṃ tāva saraṇaṃ saraṇagamanaṃ yo ca saraṇaṃ gacchati idaṃ tayaṃ veditabbaṃ.
саран̣аг̇аманаббабхзд̣̇з бана д̣̇увид̇хам̣ саран̣аг̇аманам̣ логуд̇д̇арам̣ логияан̃жаад̇и. д̇ад̇т̇а логуд̇д̇арам̣ д̣̇идтасажжаанам̣ маг̇г̇агкан̣з саран̣аг̇аманубаггилзсасамужчзд̣̇зна аарамман̣ад̇о ниб̣б̣аанаарамман̣ам̣ худ̇ваа гижжад̇о сагалзби рад̇анад̇д̇аяз иж̇жхад̇и. логияам̣ бут̇уж̇ж̇анаанам̣ саран̣аг̇аманубаггилзсавигкамбханзна аарамман̣ад̇о б̣уд̣̇д̇хаад̣̇иг̇ун̣аарамман̣ам̣ худ̇ваа иж̇жхад̇и. д̇ам̣ ад̇т̇ад̇о б̣уд̣̇д̇хаад̣̇ийсу вад̇т̇уусу сад̣̇д̇хаабадилаабхо, сад̣̇д̇хаамуулигаа жа саммаад̣̇идти д̣̇асасу бун̃н̃агирияаавад̇т̇уусу д̣̇идтиж̇угамманд̇и вужжад̇и.
Saraṇagamanappabhede pana duvidhaṃ saraṇagamanaṃ lokuttaraṃ lokiyañcāti. Tattha lokuttaraṃ diṭṭhasaccānaṃ maggakkhaṇe saraṇagamanupakkilesasamucchedena ārammaṇato nibbānārammaṇaṃ hutvā kiccato sakalepi ratanattaye ijjhati. Lokiyaṃ puthujjanānaṃ saraṇagamanupakkilesavikkhambhanena ārammaṇato buddhādiguṇārammaṇaṃ hutvā ijjhati. Taṃ atthato buddhādīsu vatthūsu saddhāpaṭilābho, saddhāmūlikā ca sammādiṭṭhi dasasu puññakiriyāvatthūsu diṭṭhijukammanti vuccati.
д̇аяид̣̇ам̣ жад̇уд̇хаа бавад̇д̇ад̇и ад̇д̇асаннияяаад̇анзна д̇аббарааяан̣ад̇ааяа сиссабхаавуубаг̇аманзна бан̣ибаад̇знаад̇и. д̇ад̇т̇а ад̇д̇асаннияяаад̇анам̣ наама ‘‘аж̇ж̇а аад̣̇им̣ гад̇ваа ахам̣ ад̇д̇аанам̣ б̣уд̣̇д̇хасса нияяаад̇зми, д̇хаммасса, сан̇гхассаа’’д̇и звам̣ б̣уд̣̇д̇хаад̣̇ийнам̣ ад̇д̇абарижжаж̇анам̣. д̇аббарааяан̣ад̇аа наама ‘‘аж̇ж̇а аад̣̇им̣ гад̇ваа ахам̣ б̣уд̣̇д̇хабарааяан̣о, д̇хаммабарааяан̣о, сан̇гхабарааяан̣о ид̇и мам̣ д̇хаарзт̇аа’’д̇и звам̣ д̇аббарааяан̣абхааво. сиссабхаавуубаг̇аманам̣ наама ‘‘аж̇ж̇а аад̣̇им̣ гад̇ваа ахам̣ б̣уд̣̇д̇хасса анд̇зваасиго, д̇хаммасса, сан̇гхасса ид̇и мам̣ д̇хаарзт̇аа’’д̇и звам̣ сиссабхаавуубаг̇амо. бан̣ибаад̇о наама ‘‘аж̇ж̇а аад̣̇им̣ гад̇ваа ахам̣ абхиваад̣̇ана-бажжудтаана-ан̃ж̇алигамма-саамийжигаммам̣ б̣уд̣̇д̇хаад̣̇ийнам̣язва д̇ин̣н̣ам̣ вад̇т̇уунам̣ гароми ид̇и мам̣ д̇хаарзт̇аа’’д̇и звам̣ б̣уд̣̇д̇хаад̣̇ийсу бараманибажжагааро. имзсан̃хи жад̇уннамби аагаараанам̣ ан̃н̃ад̇арамби гаронд̇зна г̇ахид̇ам̣язва ход̇и саран̣аг̇аманам̣.
Tayidaṃ catudhā pavattati attasanniyyātanena tapparāyaṇatāya sissabhāvūpagamanena paṇipātenāti. Tattha attasanniyyātanaṃ nāma ‘‘ajja ādiṃ katvā ahaṃ attānaṃ buddhassa niyyātemi, dhammassa, saṅghassā’’ti evaṃ buddhādīnaṃ attapariccajanaṃ. Tapparāyaṇatā nāma ‘‘ajja ādiṃ katvā ahaṃ buddhaparāyaṇo, dhammaparāyaṇo, saṅghaparāyaṇo iti maṃ dhārethā’’ti evaṃ tapparāyaṇabhāvo. Sissabhāvūpagamanaṃ nāma ‘‘ajja ādiṃ katvā ahaṃ buddhassa antevāsiko, dhammassa, saṅghassa iti maṃ dhārethā’’ti evaṃ sissabhāvūpagamo. Paṇipāto nāma ‘‘ajja ādiṃ katvā ahaṃ abhivādana-paccuṭṭhāna-añjalikamma-sāmīcikammaṃ buddhādīnaṃyeva tiṇṇaṃ vatthūnaṃ karomi iti maṃ dhārethā’’ti evaṃ buddhādīsu paramanipaccakāro. Imesañhi catunnampi ākārānaṃ aññatarampi karontena gahitaṃyeva hoti saraṇagamanaṃ.
абижа ‘‘бхаг̇авад̇о ад̇д̇аанам̣ барижжаж̇аами, д̇хаммасса, сан̇гхасса ад̇д̇аанам̣ барижжаж̇аами, ж̇ийвид̇ам̣ барижжаж̇аами, барижжад̇д̇оязва мз ад̇д̇аа, барижжад̇д̇ам̣язва мз ж̇ийвид̇ам̣, ж̇ийвид̇абарияанд̇игам̣ б̣уд̣̇д̇хам̣ саран̣ам̣ г̇ажчаами, б̣уд̣̇д̇хо мз саран̣ам̣ лзн̣ам̣ д̇аан̣а’’нд̇и звамби ад̇д̇асаннияяаад̇анам̣ взд̣̇ид̇аб̣б̣ам̣. ‘‘сад̇т̇ааран̃жа вад̇аахам̣ бассзяяам̣, бхаг̇аванд̇амзва бассзяяам̣, суг̇ад̇ан̃жа вад̇аахам̣ бассзяяам̣, бхаг̇аванд̇амзва бассзяяам̣, саммаасамб̣уд̣̇д̇хан̃жа вад̇аахам̣ бассзяяам̣, бхаг̇аванд̇амзва бассзяяа’’нд̇и (сам̣. ни. 2.154) звамби махаагассабасса саран̣аг̇аманз вияа сиссабхаавуубаг̇аманам̣ д̣̇адтаб̣б̣ам̣.
Apica ‘‘bhagavato attānaṃ pariccajāmi, dhammassa, saṅghassa attānaṃ pariccajāmi, jīvitaṃ pariccajāmi, pariccattoyeva me attā, pariccattaṃyeva me jīvitaṃ, jīvitapariyantikaṃ buddhaṃ saraṇaṃ gacchāmi, buddho me saraṇaṃ leṇaṃ tāṇa’’nti evampi attasanniyyātanaṃ veditabbaṃ. ‘‘Satthārañca vatāhaṃ passeyyaṃ, bhagavantameva passeyyaṃ, sugatañca vatāhaṃ passeyyaṃ, bhagavantameva passeyyaṃ, sammāsambuddhañca vatāhaṃ passeyyaṃ, bhagavantameva passeyya’’nti (saṃ. ni. 2.154) evampi mahākassapassa saraṇagamane viya sissabhāvūpagamanaṃ daṭṭhabbaṃ.
‘‘со ахам̣ вижариссаами, г̇аамаа г̇аамам̣ бураа бурам̣;
‘‘So ahaṃ vicarissāmi, gāmā gāmaṃ purā puraṃ;
намассамаано самб̣уд̣̇д̇хам̣, д̇хаммасса жа суд̇хаммад̇а’’нд̇и. (су. ни. 194; сам̣. ни. 1.246);
Namassamāno sambuddhaṃ, dhammassa ca sudhammata’’nti. (su. ni. 194; saṃ. ni. 1.246);
звамби аал̣авагаад̣̇ийнам̣ саран̣аг̇аманам̣ вияа д̇аббарааяан̣ад̇аа взд̣̇ид̇аб̣б̣аа. ‘‘ат̇а ко б̣рахмааяу б̣раахман̣о удтааяаасанаа згам̣сам̣ уд̇д̇араасан̇г̇ам̣ гарид̇ваа бхаг̇авад̇о баад̣̇зсу сирасаа нибад̇ид̇ваа бхаг̇авад̇о баад̣̇аани мукзна жа барижумб̣ад̇и, баан̣ийхи жа барисамб̣аахад̇и, нааман̃жа саавзд̇и – ‘б̣рахмааяу ахам̣, бхо г̇од̇ама, б̣раахман̣о; б̣рахмааяу ахам̣, бхо г̇од̇ама, б̣раахман̣о’’’д̇и (ма. ни. 2.394) звамби бан̣ибаад̇о взд̣̇ид̇аб̣б̣о.
Evampi āḷavakādīnaṃ saraṇagamanaṃ viya tapparāyaṇatā veditabbā. ‘‘Atha kho brahmāyu brāhmaṇo uṭṭhāyāsanā ekaṃsaṃ uttarāsaṅgaṃ karitvā bhagavato pādesu sirasā nipatitvā bhagavato pādāni mukhena ca paricumbati, pāṇīhi ca parisambāhati, nāmañca sāveti – ‘brahmāyu ahaṃ, bho gotama, brāhmaṇo; brahmāyu ahaṃ, bho gotama, brāhmaṇo’’’ti (ma. ni. 2.394) evampi paṇipāto veditabbo.
со банзса н̃аад̇ибхаяаажарияад̣̇агкин̣зяяавасзна жад̇уб̣б̣ид̇хо ход̇и. д̇ад̇т̇а д̣̇агкин̣зяяабан̣ибаад̇зна саран̣аг̇аманам̣ ход̇и, на ид̇арзхи. сздтавасзнзва хи саран̣ам̣ г̇ан̣хаад̇и, сздтавасзна жа бхиж̇ж̇ад̇и. д̇асмаа яо саагияо ваа голияо ваа ‘‘б̣уд̣̇д̇хо амхаагам̣ н̃аад̇аго’’д̇и ванд̣̇ад̇и, аг̇г̇ахид̇амзва ход̇и саран̣ам̣. яо ваа ‘‘саман̣о г̇од̇амо рааж̇абууж̇ид̇о махаанубхааво аванд̣̇ияамаано анад̇т̇амби гарзяяаа’’д̇и бхаязна ванд̣̇ад̇и, аг̇г̇ахид̇амзва ход̇и саран̣ам̣. яо ваа б̣од̇хисад̇д̇агаалз бхаг̇авад̇о санд̇игз гин̃жи уг̇г̇ахид̇ам̣ сарамаано б̣уд̣̇д̇хагаалз ваа –
So panesa ñātibhayācariyadakkhiṇeyyavasena catubbidho hoti. Tattha dakkhiṇeyyapaṇipātena saraṇagamanaṃ hoti, na itarehi. Seṭṭhavaseneva hi saraṇaṃ gaṇhāti, seṭṭhavasena ca bhijjati. Tasmā yo sākiyo vā koliyo vā ‘‘buddho amhākaṃ ñātako’’ti vandati, aggahitameva hoti saraṇaṃ. Yo vā ‘‘samaṇo gotamo rājapūjito mahānubhāvo avandiyamāno anatthampi kareyyā’’ti bhayena vandati, aggahitameva hoti saraṇaṃ. Yo vā bodhisattakāle bhagavato santike kiñci uggahitaṃ saramāno buddhakāle vā –
‘‘згзна бхог̇з бхун̃ж̇зяяа, д̣̇вийхи гаммам̣ баяож̇аяз;
‘‘Ekena bhoge bhuñjeyya, dvīhi kammaṃ payojaye;
жад̇уд̇т̇ан̃жа нид̇хаабзяяа, аабад̣̇аасу бхависсад̇ий’’д̇и. (д̣̇ий. ни. 3.265) –
Catutthañca nidhāpeyya, āpadāsu bhavissatī’’ti. (dī. ni. 3.265) –
зваруубам̣ анусаасаним̣ уг̇г̇ахзд̇ваа ‘‘аажарияо мз’’д̇и ванд̣̇ад̇и, аг̇г̇ахид̇амзва ход̇и саран̣ам̣. яо бана ‘‘аяам̣ логз аг̇г̇ад̣̇агкин̣зяяо’’д̇и ванд̣̇ад̇и, д̇знзва г̇ахид̇ам̣ ход̇и саран̣ам̣.
Evarūpaṃ anusāsaniṃ uggahetvā ‘‘ācariyo me’’ti vandati, aggahitameva hoti saraṇaṃ. Yo pana ‘‘ayaṃ loke aggadakkhiṇeyyo’’ti vandati, teneva gahitaṃ hoti saraṇaṃ.
звам̣ г̇ахид̇асаран̣асса жа убаасагасса ваа убаасигааяа ваа ан̃н̃ад̇ид̇т̇иязсу баб̣б̣аж̇ид̇амби н̃аад̇им̣ ‘‘н̃аад̇аго мз аяа’’нд̇и ванд̣̇ад̇о саран̣аг̇аманам̣ на бхиж̇ж̇ад̇и, баг̇зва абаб̣б̣аж̇ид̇ам̣. д̇ат̇аа рааж̇аанам̣ бхаяавасзна ванд̣̇ад̇о. со хи радтабууж̇ид̇ад̇д̇аа аванд̣̇ияамаано анад̇т̇амби гарзяяаад̇и. д̇ат̇аа яам̣ гин̃жи сиббам̣ сигкаабагам̣ д̇ид̇т̇ияам̣ ‘‘аажарияо мз аяа’’нд̇и ванд̣̇ад̇оби на бхиж̇ж̇ад̇ийд̇и звам̣ саран̣аг̇аманаббабхзд̣̇о взд̣̇ид̇аб̣б̣о.
Evaṃ gahitasaraṇassa ca upāsakassa vā upāsikāya vā aññatitthiyesu pabbajitampi ñātiṃ ‘‘ñātako me aya’’nti vandato saraṇagamanaṃ na bhijjati, pageva apabbajitaṃ. Tathā rājānaṃ bhayavasena vandato. So hi raṭṭhapūjitattā avandiyamāno anatthampi kareyyāti. Tathā yaṃ kiñci sippaṃ sikkhāpakaṃ titthiyaṃ ‘‘ācariyo me aya’’nti vandatopi na bhijjatīti evaṃ saraṇagamanappabhedo veditabbo.
зд̇т̇а жа логуд̇д̇арасса саран̣аг̇аманасса жад̇д̇аари сааман̃н̃апалаани вибаагапалам̣, саб̣б̣ад̣̇угкагкаяо аанисам̣сапалам̣. вуд̇д̇ан̃хзд̇ам̣ –
Ettha ca lokuttarassa saraṇagamanassa cattāri sāmaññaphalāni vipākaphalaṃ, sabbadukkhakkhayo ānisaṃsaphalaṃ. Vuttañhetaṃ –
‘‘яо жа б̣уд̣̇д̇хан̃жа д̇хамман̃жа, сан̇гхан̃жа саран̣ам̣ г̇ад̇о;
‘‘Yo ca buddhañca dhammañca, saṅghañca saraṇaṃ gato;
жад̇д̇аари арияасажжаани, саммаббан̃н̃ааяа бассад̇и. (д̇ха. ба. 190);
Cattāri ariyasaccāni, sammappaññāya passati. (dha. pa. 190);
‘‘д̣̇угкам̣ д̣̇угкасамуббаад̣̇ам̣, д̣̇угкасса жа ад̇иггамам̣;
‘‘Dukkhaṃ dukkhasamuppādaṃ, dukkhassa ca atikkamaṃ;
арияан̃жадтан̇г̇игам̣ маг̇г̇ам̣, д̣̇угкуубасамаг̇ааминам̣. (д̇ха. ба. 191);
Ariyañcaṭṭhaṅgikaṃ maggaṃ, dukkhūpasamagāminaṃ. (dha. pa. 191);
‘‘зд̇ам̣ ко саран̣ам̣ кзмам̣, зд̇ам̣ саран̣амуд̇д̇амам̣;
‘‘Etaṃ kho saraṇaṃ khemaṃ, etaṃ saraṇamuttamaṃ;
зд̇ам̣ саран̣амааг̇амма, саб̣б̣ад̣̇угкаа бамужжад̇ий’’д̇и. (д̇ха. ба. 192);
Etaṃ saraṇamāgamma, sabbadukkhā pamuccatī’’ti. (dha. pa. 192);
абижа нижжад̇о анубаг̇аманаад̣̇ивасзнабзд̇асса аанисам̣сапалам̣ взд̣̇ид̇аб̣б̣ам̣. вуд̇д̇ан̃хзд̇ам̣ –
Apica niccato anupagamanādivasenapetassa ānisaṃsaphalaṃ veditabbaṃ. Vuttañhetaṃ –
‘‘адтаанамзд̇ам̣, бхигкавз, анавагаасо, яам̣ д̣̇идтисамбанно буг̇г̇ало ган̃жи сан̇каарам̣ нижжад̇о убаг̇ажчзяяа, сукад̇о убаг̇ажчзяяа, ган̃жи д̇хаммам̣ ад̇д̇ад̇о убаг̇ажчзяяа, маад̇арам̣ ж̇ийвид̇аа воробзяяа, бид̇арам̣, араханд̇ам̣ ж̇ийвид̇аа воробзяяа, бад̣̇удтажид̇д̇о д̇ат̇ааг̇ад̇асса лохид̇ам̣ уббаад̣̇зяяа, сан̇гхам̣ бхинд̣̇зяяа, ан̃н̃ам̣ сад̇т̇аарам̣ уд̣̇д̣̇исзяяа, нзд̇ам̣ таанам̣ виж̇ж̇ад̇ий’’д̇и (ма. ни. 3.128-130; а. ни. 1.272-277).
‘‘Aṭṭhānametaṃ, bhikkhave, anavakāso, yaṃ diṭṭhisampanno puggalo kañci saṅkhāraṃ niccato upagaccheyya, sukhato upagaccheyya, kañci dhammaṃ attato upagaccheyya, mātaraṃ jīvitā voropeyya, pitaraṃ, arahantaṃ jīvitā voropeyya, paduṭṭhacitto tathāgatassa lohitaṃ uppādeyya, saṅghaṃ bhindeyya, aññaṃ satthāraṃ uddiseyya, netaṃ ṭhānaṃ vijjatī’’ti (ma. ni. 3.128-130; a. ni. 1.272-277).
логияасса бана саран̣аг̇аманасса бхавасамбад̣̇ааби бхог̇асамбад̣̇ааби паламзва. вуд̇д̇ан̃хзд̇ам̣ –
Lokiyassa pana saraṇagamanassa bhavasampadāpi bhogasampadāpi phalameva. Vuttañhetaṃ –
‘‘яз гзжи б̣уд̣̇д̇хам̣ саран̣ам̣ г̇ад̇аасз,
‘‘Ye keci buddhaṃ saraṇaṃ gatāse,
на д̇з г̇амиссанд̇и абааяабхуумим̣;
Na te gamissanti apāyabhūmiṃ;
бахааяа маанусам̣ д̣̇зхам̣,
Pahāya mānusaṃ dehaṃ,
д̣̇звагааяам̣ барибуурзссанд̇ий’’д̇и. (сам̣. ни. 1.37);
Devakāyaṃ paripūressantī’’ti. (saṃ. ni. 1.37);
абарамби вуд̇д̇ам̣ –
Aparampi vuttaṃ –
‘‘ат̇а ко сагго д̣̇зваанаминд̣̇о асийд̇ияаа д̣̇звад̇аасахассзхи сад̣̇д̇хим̣ язнааяасмаа махаамог̇г̇аллаано д̇знубасан̇гами…бз… згаманд̇ам̣ тид̇ам̣ ко саггам̣ д̣̇зваанаминд̣̇ам̣ ааяасмаа махаамог̇г̇аллаано зд̇ад̣̇авожа – ‘саад̇ху ко, д̣̇зваанаминд̣̇а, б̣уд̣̇д̇хасаран̣аг̇аманам̣ ход̇и. б̣уд̣̇д̇хасаран̣аг̇аманахзд̇у ко д̣̇зваанаминд̣̇а звамид̇хзгажжз сад̇д̇аа гааяасса бхзд̣̇аа барам̣ маран̣аа суг̇ад̇им̣ саг̇г̇ам̣ логам̣ убабаж̇ж̇анд̇и. д̇з ан̃н̃з д̣̇звз д̣̇асахи таанзхи ад̇хиг̇ан̣ханд̇и д̣̇иб̣б̣зна ааяунаа д̣̇иб̣б̣зна ван̣н̣зна сукзна яасзна аад̇хибад̇зяязна д̣̇иб̣б̣зхи руубзхи сад̣̇д̣̇зхи г̇анд̇хзхи расзхи подтаб̣б̣зхий’’’д̇и (сам̣. ни. 4.341).
‘‘Atha kho sakko devānamindo asītiyā devatāsahassehi saddhiṃ yenāyasmā mahāmoggallāno tenupasaṅkami…pe… ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca – ‘sādhu kho, devānaminda, buddhasaraṇagamanaṃ hoti. Buddhasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. Te aññe deve dasahi ṭhānehi adhigaṇhanti dibbena āyunā dibbena vaṇṇena sukhena yasena ādhipateyyena dibbehi rūpehi saddehi gandhehi rasehi phoṭṭhabbehī’’’ti (saṃ. ni. 4.341).
зсзва наяо д̇хаммз сан̇гхз жа. абижа взлаамасуд̇д̇аад̣̇ивасзнааби (а. ни. 9.20 аад̣̇аяо) саран̣аг̇аманасса палависзсо взд̣̇ид̇аб̣б̣о. звам̣ саран̣аг̇аманапалам̣ взд̣̇ид̇аб̣б̣ам̣.
Eseva nayo dhamme saṅghe ca. Apica velāmasuttādivasenāpi (a. ni. 9.20 ādayo) saraṇagamanassa phalaviseso veditabbo. Evaṃ saraṇagamanaphalaṃ veditabbaṃ.
д̇ад̇т̇а логияасаран̣аг̇аманам̣ д̇ийсу вад̇т̇уусу ан̃н̃аан̣асам̣саяамижчаан̃аан̣аад̣̇ийхи сам̣гилиссад̇и, на махааж̇уд̇игам̣ ход̇и на махаавибпаарам̣. логуд̇д̇арасса над̇т̇и сам̣гилзсо. логияасса жа саран̣аг̇аманасса д̣̇увид̇хо бхзд̣̇о сааваж̇ж̇о анаваж̇ж̇о жа. д̇ад̇т̇а сааваж̇ж̇о ан̃н̃асад̇т̇аараад̣̇ийсу ад̇д̇асаннияяаад̇анаад̣̇ийхи ход̇и, со анидтапало. анаваж̇ж̇о гаалагирияааяа, со авибаагад̇д̇аа апало. логуд̇д̇арасса бана нзвад̇т̇и бхзд̣̇о. бхаванд̇арзби хи арияасааваго ан̃н̃ам̣ сад̇т̇аарам̣ на уд̣̇д̣̇исад̇ийд̇и звам̣ саран̣аг̇аманасса сам̣гилзсо жа бхзд̣̇о жа взд̣̇ид̇аб̣б̣о.
Tattha lokiyasaraṇagamanaṃ tīsu vatthūsu aññāṇasaṃsayamicchāñāṇādīhi saṃkilissati, na mahājutikaṃ hoti na mahāvipphāraṃ. Lokuttarassa natthi saṃkileso. Lokiyassa ca saraṇagamanassa duvidho bhedo sāvajjo anavajjo ca. Tattha sāvajjo aññasatthārādīsu attasanniyyātanādīhi hoti, so aniṭṭhaphalo. Anavajjo kālakiriyāya, so avipākattā aphalo. Lokuttarassa pana nevatthi bhedo. Bhavantarepi hi ariyasāvako aññaṃ satthāraṃ na uddisatīti evaṃ saraṇagamanassa saṃkileso ca bhedo ca veditabbo.
убаасагам̣ мам̣ бхавам̣ г̇од̇амо д̇хаарзд̇ууд̇и мам̣ бхавам̣ г̇од̇амо ‘‘убаасаго аяа’’нд̇и звам̣ д̇хаарзд̇у, ж̇аанаад̇ууд̇и ад̇т̇о. убаасагавид̇хигосаллад̇т̇ам̣ банзд̇т̇а го убаасаго, гасмаа убаасагод̇и вужжад̇и, гимасса сийлам̣, го ааж̇ийво, гаа вибад̇д̇и, гаа самбад̇д̇ийд̇и ид̣̇ам̣ багин̣н̣агам̣ взд̣̇ид̇аб̣б̣ам̣.
Upāsakaṃmaṃ bhavaṃ gotamo dhāretūti maṃ bhavaṃ gotamo ‘‘upāsako aya’’nti evaṃ dhāretu, jānātūti attho. Upāsakavidhikosallatthaṃ panettha ko upāsako, kasmā upāsakoti vuccati, kimassa sīlaṃ, ko ājīvo, kā vipatti, kā sampattīti idaṃ pakiṇṇakaṃ veditabbaṃ.
д̇ад̇т̇а го убаасагод̇и яо гожи саран̣аг̇ад̇о г̇ахадто. вуд̇д̇ан̃хзд̇ам̣ –
Tattha ko upāsakoti yo koci saraṇagato gahaṭṭho. Vuttañhetaṃ –
‘‘яад̇о ко, махаанаама, убаасаго б̣уд̣̇д̇хам̣ саран̣ам̣ г̇ад̇о ход̇и, д̇хаммам̣ саран̣ам̣ г̇ад̇о, сан̇гхам̣ саран̣ам̣ г̇ад̇о ход̇и. зд̇д̇аавад̇аа ко, махаанаама, убаасаго ход̇ий’’д̇и (сам̣. ни. 5.1033).
‘‘Yato kho, mahānāma, upāsako buddhaṃ saraṇaṃ gato hoti, dhammaṃ saraṇaṃ gato, saṅghaṃ saraṇaṃ gato hoti. Ettāvatā kho, mahānāma, upāsako hotī’’ti (saṃ. ni. 5.1033).
гасмаа убаасагод̇и. рад̇анад̇д̇аяасса убаасанад̇о. со хи б̣уд̣̇д̇хам̣ убаасад̇ийд̇и убаасаго. д̇хаммам̣, сан̇гхам̣ убаасад̇ийд̇и убаасагод̇и.
Kasmāupāsakoti. Ratanattayassa upāsanato. So hi buddhaṃ upāsatīti upāsako. Dhammaṃ, saṅghaṃ upāsatīti upāsakoti.
гимасса сийланд̇и. бан̃жа взраман̣ияо. яат̇ааха –
Kimassa sīlanti. Pañca veramaṇiyo. Yathāha –
‘‘яад̇о ко, махаанаама, убаасаго баан̣аад̇ибаад̇аа бадивирад̇о ход̇и, ад̣̇иннаад̣̇аанаа, гаамзсумижчаажаараа, мусааваад̣̇аа, сураамзраяамаж̇ж̇аббамаад̣̇адтаанаа бадивирад̇о ход̇и. зд̇д̇аавад̇аа ко, махаанаама, убаасаго сийлаваа ход̇ий’’д̇и (сам̣. ни. 5.1033).
‘‘Yato kho, mahānāma, upāsako pāṇātipātā paṭivirato hoti, adinnādānā, kāmesumicchācārā, musāvādā, surāmerayamajjappamādaṭṭhānā paṭivirato hoti. Ettāvatā kho, mahānāma, upāsako sīlavā hotī’’ti (saṃ. ni. 5.1033).
го ааж̇ийвод̇и. бан̃жа мижчааван̣иж̇ж̇аа бахааяа д̇хаммзна самзна ж̇ийвигагаббанам̣. вуд̇д̇ан̃хзд̇ам̣ –
Ko ājīvoti. Pañca micchāvaṇijjā pahāya dhammena samena jīvikakappanaṃ. Vuttañhetaṃ –
‘‘бан̃жимаа, бхигкавз, ван̣иж̇ж̇аа убаасагзна агаран̣ийяаа. гад̇амаа бан̃жа. сад̇т̇аван̣иж̇ж̇аа, сад̇д̇аван̣иж̇ж̇аа, мам̣саван̣иж̇ж̇аа, маж̇ж̇аван̣иж̇ж̇аа, висаван̣иж̇ж̇аа. имаа ко, бхигкавз, бан̃жа ван̣иж̇ж̇аа убаасагзна агаран̣ийяаа’’д̇и (а. ни. 5.177).
‘‘Pañcimā, bhikkhave, vaṇijjā upāsakena akaraṇīyā. Katamā pañca. Satthavaṇijjā, sattavaṇijjā, maṃsavaṇijjā, majjavaṇijjā, visavaṇijjā. Imā kho, bhikkhave, pañca vaṇijjā upāsakena akaraṇīyā’’ti (a. ni. 5.177).
гаа вибад̇д̇ийд̇и. яаа д̇ассзва сийласса жа ааж̇ийвасса жа вибад̇д̇и, аяамасса вибад̇д̇и. абижа яааяа зса жан̣д̣аало жзва ход̇и малан̃жа бад̇игудто жа, сааби д̇асса вибад̇д̇ийд̇и взд̣̇ид̇аб̣б̣аа. д̇з жа ад̇т̇ад̇о ассад̣̇д̇хияаад̣̇аяо бан̃жа д̇хаммаа хонд̇и. яат̇ааха –
Kā vipattīti. Yā tasseva sīlassa ca ājīvassa ca vipatti, ayamassa vipatti. Apica yāya esa caṇḍālo ceva hoti malañca patikuṭṭho ca, sāpi tassa vipattīti veditabbā. Te ca atthato assaddhiyādayo pañca dhammā honti. Yathāha –
‘‘бан̃жахи , бхигкавз, д̇хаммзхи саманнааг̇ад̇о убаасаго убаасагажан̣д̣аало жа ход̇и убаасагамалан̃жа убаасагабад̇игудто жа. гад̇амзхи бан̃жахи? ассад̣̇д̇хо ход̇и, д̣̇уссийло ход̇и, год̇уухаламан̇г̇алиго ход̇и, ман̇г̇алам̣ бажжзд̇и но гаммам̣, ид̇о жа б̣ахид̣̇д̇хаа д̣̇агкин̣зяяам̣ бариязсад̇и, д̇ад̇т̇а жа буб̣б̣агаарам̣ гарод̇ий’’д̇и (а. ни. 5.175).
‘‘Pañcahi , bhikkhave, dhammehi samannāgato upāsako upāsakacaṇḍālo ca hoti upāsakamalañca upāsakapatikuṭṭho ca. Katamehi pañcahi? Assaddho hoti, dussīlo hoti, kotūhalamaṅgaliko hoti, maṅgalaṃ pacceti no kammaṃ, ito ca bahiddhā dakkhiṇeyyaṃ pariyesati, tattha ca pubbakāraṃ karotī’’ti (a. ni. 5.175).
гаа самбад̇д̇ийд̇и. яаа жасса сийласамбад̣̇аа жа ааж̇ийвасамбад̣̇аа жа, саа самбад̇д̇и. яз жасса рад̇анабхааваад̣̇игараа сад̣̇д̇хаад̣̇аяо бан̃жа д̇хаммаа. яат̇ааха –
Kā sampattīti. Yā cassa sīlasampadā ca ājīvasampadā ca, sā sampatti. Ye cassa ratanabhāvādikarā saddhādayo pañca dhammā. Yathāha –
‘‘бан̃жахи , бхигкавз, д̇хаммзхи саманнааг̇ад̇о убаасаго убаасагарад̇анан̃жа ход̇и убаасагабад̣̇уман̃жа убаасагабун̣д̣арийган̃жа. гад̇амзхи бан̃жахи? сад̣̇д̇хо ход̇и, сийлаваа ход̇и, на год̇уухаламан̇г̇алиго ход̇и, гаммам̣ бажжзд̇и но ман̇г̇алам̣, на ид̇о б̣ахид̣̇д̇хаа д̣̇агкин̣зяяам̣ г̇авзсад̇и, ид̇ха жа буб̣б̣агаарам̣ гарод̇ий’’д̇и (а. ни. 5.175).
‘‘Pañcahi , bhikkhave, dhammehi samannāgato upāsako upāsakaratanañca hoti upāsakapadumañca upāsakapuṇḍarīkañca. Katamehi pañcahi? Saddho hoti, sīlavā hoti, na kotūhalamaṅgaliko hoti, kammaṃ pacceti no maṅgalaṃ, na ito bahiddhā dakkhiṇeyyaṃ gavesati, idha ca pubbakāraṃ karotī’’ti (a. ni. 5.175).
аж̇ж̇ад̇аг̇г̇зд̇и зд̇т̇а аяам̣ аг̇г̇асад̣̇д̣̇о аад̣̇игодигодтаасасздтзсу д̣̇иссад̇и. ‘‘аж̇ж̇ад̇аг̇г̇з самма, д̣̇оваарига, аавараами д̣̇ваарам̣ ниг̇ан̣таанам̣ ниг̇ан̣тийна’’нд̇иаад̣̇ийсу (ма. ни. 2.70) хи аад̣̇имхи д̣̇иссад̇и. ‘‘д̇знзва ан̇г̇улаг̇г̇зна д̇ам̣ ан̇г̇улаг̇г̇ам̣ бараамасзяяа (гат̇аа. 441). ужчаг̇г̇ам̣ взл̣аг̇г̇а’’нд̇иаад̣̇ийсу годияам̣. ‘‘амб̣илаг̇г̇ам̣ ваа мад̇хураг̇г̇ам̣ ваа д̇ид̇д̇агаг̇г̇ам̣ ваа (сам̣. ни. 5.374), ануж̇аанаами, бхигкавз, вихаараг̇г̇зна ваа баривзн̣аг̇г̇зна ваа бхааж̇зд̇у’’нд̇иаад̣̇ийсу (жуул̣ава. 318) годтаасз. ‘‘яаавад̇аа, бхигкавз, сад̇д̇аа абад̣̇аа ваа…бз… д̇ат̇ааг̇ад̇о д̇зсам̣ аг̇г̇амагкааяад̇ий’’д̇иаад̣̇ийсу (а. ни. 4.34) сздтз. ид̇ха банааяам̣ аад̣̇имхи д̣̇адтаб̣б̣о. д̇асмаа аж̇ж̇ад̇аг̇г̇зд̇и аж̇ж̇ад̇ам̣ аад̣̇им̣ гад̇ваад̇и звамзд̇т̇а ад̇т̇о взд̣̇ид̇аб̣б̣о. аж̇ж̇ад̇анд̇и аж̇ж̇абхаавам̣. аж̇ж̇ад̣̇аг̇г̇зд̇и ваа баато, д̣̇агааро бад̣̇асанд̇хигаро, аж̇ж̇а аг̇г̇ам̣ гад̇ваад̇и ад̇т̇о.
Ajjataggeti ettha ayaṃ aggasaddo ādikoṭikoṭṭhāsaseṭṭhesu dissati. ‘‘Ajjatagge samma, dovārika, āvarāmi dvāraṃ nigaṇṭhānaṃ nigaṇṭhīna’’ntiādīsu (ma. ni. 2.70) hi ādimhi dissati. ‘‘Teneva aṅgulaggena taṃ aṅgulaggaṃ parāmaseyya (kathā. 441). Ucchaggaṃ veḷagga’’ntiādīsu koṭiyaṃ. ‘‘Ambilaggaṃ vā madhuraggaṃ vā tittakaggaṃ vā (saṃ. ni. 5.374), anujānāmi, bhikkhave, vihāraggena vā pariveṇaggena vā bhājetu’’ntiādīsu (cūḷava. 318) koṭṭhāse. ‘‘Yāvatā, bhikkhave, sattā apadā vā…pe… tathāgato tesaṃ aggamakkhāyatī’’tiādīsu (a. ni. 4.34) seṭṭhe. Idha panāyaṃ ādimhi daṭṭhabbo. Tasmā ajjataggeti ajjataṃ ādiṃ katvāti evamettha attho veditabbo. Ajjatanti ajjabhāvaṃ. Ajjadaggeti vā pāṭho, dakāro padasandhikaro, ajja aggaṃ katvāti attho.
баан̣убзд̇анд̇и баан̣зхи убзд̇ам̣, яаава мз ж̇ийвид̇ам̣ бавад̇д̇ад̇и, д̇аава убзд̇ам̣, анан̃н̃асад̇т̇угам̣ д̇ийхи саран̣аг̇аманзхи саран̣ам̣ г̇ад̇ам̣ убаасагам̣ габбияагаарагам̣ мам̣ бхавам̣ г̇од̇амо д̇хаарзд̇у ж̇аанаад̇у. ахан̃хи сажзби мз д̇икин̣зна асинаа сийсам̣ чинд̣̇зяяа, нзва б̣уд̣̇д̇хам̣ ‘‘на б̣уд̣̇д̇хо’’д̇и ваа д̇хаммам̣ ‘‘на д̇хаммо’’д̇и ваа сан̇гхам̣ ‘‘на сан̇гхо’’д̇и ваа вад̣̇зяяанд̇и звам̣ ад̇д̇асаннияяаад̇анзна саран̣ам̣ г̇анд̇ваа жад̇уухи жа бажжаязхи баваарзд̇ваа удтааяаасанаа бхаг̇аванд̇ам̣ абхиваад̣̇зд̇ваа д̇игкад̇д̇ум̣ бад̣̇агкин̣ам̣ гад̇ваа баггаамийд̇и.
Pāṇupetanti pāṇehi upetaṃ, yāva me jīvitaṃ pavattati, tāva upetaṃ, anaññasatthukaṃ tīhi saraṇagamanehi saraṇaṃ gataṃ upāsakaṃ kappiyakārakaṃ maṃ bhavaṃ gotamo dhāretu jānātu. Ahañhi sacepi me tikhiṇena asinā sīsaṃ chindeyya, neva buddhaṃ ‘‘na buddho’’ti vā dhammaṃ ‘‘na dhammo’’ti vā saṅghaṃ ‘‘na saṅgho’’ti vā vadeyyanti evaṃ attasanniyyātanena saraṇaṃ gantvā catūhi ca paccayehi pavāretvā uṭṭhāyāsanā bhagavantaṃ abhivādetvā tikkhattuṃ padakkhiṇaṃ katvā pakkāmīti.
17. сад̇д̇амз ж̇аан̣уссон̣ийд̇и ж̇аан̣уссон̣итаананд̇арам̣ гира наамзгам̣ таананд̇арам̣, д̇ам̣ язна гулзна лад̣̇д̇хам̣, д̇ам̣ ж̇аан̣уссон̣игуланд̇и вужжад̇и. аяам̣ д̇асмим̣ гулз ж̇аад̇ад̇д̇аа ран̃н̃о санд̇игз жа лад̣̇д̇хаж̇аан̣уссон̣исаггаарад̇д̇аа ж̇аан̣уссон̣ийд̇и вужжад̇и. д̇знубасан̇гамийд̇и ‘‘саман̣о гира г̇од̇амо бан̣д̣ид̇о б̣яад̇д̇о б̣ахуссуд̇о’’д̇и суд̇ваа ‘‘сажз со лин̇г̇авибхад̇д̇игаарагаад̣̇ибхзд̣̇ам̣ ж̇ааниссад̇и, амхзхи н̃аад̇амзва ж̇ааниссад̇и, ан̃н̃аад̇ам̣ гим̣ ж̇ааниссад̇и. н̃аад̇амзва гат̇зссад̇и, ан̃н̃аад̇ам̣ гим̣ гат̇зссад̇ий’’д̇и жинд̇зд̇ваа маанад̣̇д̇хаж̇ам̣ баг̇г̇аяха син̇г̇ам̣ угкибид̇ваа махаабариваарзхи баривуд̇о язна бхаг̇аваа д̇знубасан̇гами. гад̇ад̇д̇аа жа, б̣раахман̣а, агад̇ад̇д̇аа жаад̇и сад̇т̇аа д̇асса важанам̣ суд̇ваа ‘‘аяам̣ б̣раахман̣о ид̇ха ааг̇ажчанд̇о на ж̇аанид̇угаамо ад̇т̇аг̇авзсий худ̇ваа ааг̇ад̇о, маанам̣ бана баг̇г̇аяха син̇г̇ам̣ угкибид̇ваа ааг̇ад̇о. гим̣ ну квасса яат̇аа бан̃хасса ад̇т̇ам̣ ж̇аанаад̇и, звам̣ гат̇ид̇з вад̣дхи бхависсад̇и, уд̣̇ааху яат̇аа на ж̇аанаад̇ий’’д̇и жинд̇зд̇ваа ‘‘яат̇аа на ж̇аанаад̇и, звам̣ гат̇ид̇з вад̣дхи бхависсад̇ий’’д̇и н̃ад̇ваа ‘‘гад̇ад̇д̇аа жа, б̣раахман̣а, агад̇ад̇д̇аа жаа’’д̇и ааха.
17. Sattame jāṇussoṇīti jāṇussoṇiṭhānantaraṃ kira nāmekaṃ ṭhānantaraṃ, taṃ yena kulena laddhaṃ, taṃ jāṇussoṇikulanti vuccati. Ayaṃ tasmiṃ kule jātattā rañño santike ca laddhajāṇussoṇisakkārattā jāṇussoṇīti vuccati. Tenupasaṅkamīti ‘‘samaṇo kira gotamo paṇḍito byatto bahussuto’’ti sutvā ‘‘sace so liṅgavibhattikārakādibhedaṃ jānissati, amhehi ñātameva jānissati, aññātaṃ kiṃ jānissati. Ñātameva kathessati, aññātaṃ kiṃ kathessatī’’ti cintetvā mānaddhajaṃ paggayha siṅgaṃ ukkhipitvā mahāparivārehi parivuto yena bhagavā tenupasaṅkami. Katattā ca, brāhmaṇa, akatattā cāti satthā tassa vacanaṃ sutvā ‘‘ayaṃ brāhmaṇo idha āgacchanto na jānitukāmo atthagavesī hutvā āgato, mānaṃ pana paggayha siṅgaṃ ukkhipitvā āgato. Kiṃ nu khvassa yathā pañhassa atthaṃ jānāti, evaṃ kathite vaḍḍhi bhavissati, udāhu yathā na jānātī’’ti cintetvā ‘‘yathā na jānāti, evaṃ kathite vaḍḍhi bhavissatī’’ti ñatvā ‘‘katattā ca, brāhmaṇa, akatattā cā’’ti āha.
б̣раахман̣о д̇ам̣ суд̇ваа ‘‘саман̣о г̇од̇амо гад̇ад̇д̇ааби агад̇ад̇д̇ааби нираяз ниб̣б̣ад̇д̇им̣ вад̣̇ад̇и, ид̣̇ам̣ убхаяагааран̣знааби згадтаанз ниб̣б̣ад̇д̇ияаа гат̇ид̇ад̇д̇аа д̣̇уж̇ж̇аанам̣ маханд̇хагаарам̣, над̇т̇и маяхам̣ зд̇т̇а бад̇идтаа. сажз банаахам̣ зд̇д̇агзнзва д̇ун̣хий бхавзяяам̣, б̣раахман̣аанам̣ маж̇жхз гат̇анагаалзби мам̣ звам̣ вад̣̇зяяум̣ – ‘д̇вам̣ саман̣асса г̇од̇амасса санд̇игам̣ маанам̣ баг̇г̇аяха син̇г̇ам̣ угкибид̇ваа г̇ад̇оси, згаважанзнзва д̇ун̣хий худ̇ваа гин̃жи вад̇д̇ум̣ наасагки, имасмим̣ таанз гасмаа гат̇зсий’д̇и. д̇асмаа барааж̇ид̇оби абарааж̇ид̇асад̣̇исо худ̇ваа буна саг̇г̇аг̇аманабан̃хам̣ бужчиссаамий’’д̇и жинд̇зд̇ваа го ну ко, бхо г̇од̇амаад̇и имам̣ д̣̇уд̇ияабан̃хам̣ аарабхи.
Brāhmaṇo taṃ sutvā ‘‘samaṇo gotamo katattāpi akatattāpi niraye nibbattiṃ vadati, idaṃ ubhayakāraṇenāpi ekaṭṭhāne nibbattiyā kathitattā dujjānaṃ mahandhakāraṃ, natthi mayhaṃ ettha patiṭṭhā. Sace panāhaṃ ettakeneva tuṇhī bhaveyyaṃ, brāhmaṇānaṃ majjhe kathanakālepi maṃ evaṃ vadeyyuṃ – ‘tvaṃ samaṇassa gotamassa santikaṃ mānaṃ paggayha siṅgaṃ ukkhipitvā gatosi, ekavacaneneva tuṇhī hutvā kiñci vattuṃ nāsakkhi, imasmiṃ ṭhāne kasmā kathesī’ti. Tasmā parājitopi aparājitasadiso hutvā puna saggagamanapañhaṃ pucchissāmī’’ti cintetvā ko nu kho, bho gotamāti imaṃ dutiyapañhaṃ ārabhi.
звамби д̇асса ахоси – ‘‘убарибан̃хзна хздтаабан̃хам̣ ж̇ааниссаами, хздтаабан̃хзна убарибан̃ха’’нд̇и. д̇асмааби имам̣ бан̃хам̣ бужчи. сад̇т̇аа буриманаязнзва жинд̇зд̇ваа яат̇аа на ж̇аанаад̇и, звамзва гат̇знд̇о бунаби ‘‘гад̇ад̇д̇аа жа, б̣раахман̣а, агад̇ад̇д̇аа жаа’’д̇и ааха. б̣раахман̣о д̇асмимби бад̇идтаад̇ум̣ асаггонд̇о ‘‘алам̣, бхо, на ийд̣̇исасса бурисасса санд̇игам̣ ааг̇ад̇зна аж̇аанид̇ваа г̇анд̇ум̣ ваддад̇и, сагаваад̣̇ам̣ бахааяа саман̣ам̣ г̇од̇амам̣ анувад̇д̇ид̇ваа маяхам̣ ад̇т̇ам̣ г̇авзсиссаами, баралогамаг̇г̇ам̣ сод̇хзссаамий’’д̇и саннидтаанам̣ гад̇ваа сад̇т̇аарам̣ ааяаажанд̇о на ко аханд̇иаад̣̇имааха. ат̇асса нихад̇амаанад̇ам̣ н̃ад̇ваа сад̇т̇аа убари д̣̇зсанам̣ вад̣дхзнд̇о д̇зна хи, б̣раахман̣аад̇иаад̣̇имааха. д̇ад̇т̇а д̇зна хийд̇и гааран̣анид̣̇д̣̇зсо. яасмаа сам̣кид̇д̇зна бхаасид̇асса ад̇т̇ам̣ аж̇аананд̇о вид̇т̇аарад̣̇зсанам̣ яаажаси, д̇асмаад̇и ад̇т̇о. сзсамзд̇т̇а уд̇д̇аанад̇т̇амзваад̇и.
Evampi tassa ahosi – ‘‘uparipañhena heṭṭhāpañhaṃ jānissāmi, heṭṭhāpañhena uparipañha’’nti. Tasmāpi imaṃ pañhaṃ pucchi. Satthā purimanayeneva cintetvā yathā na jānāti, evameva kathento punapi ‘‘katattā ca, brāhmaṇa, akatattā cā’’ti āha. Brāhmaṇo tasmimpi patiṭṭhātuṃ asakkonto ‘‘alaṃ, bho, na īdisassa purisassa santikaṃ āgatena ajānitvā gantuṃ vaṭṭati, sakavādaṃ pahāya samaṇaṃ gotamaṃ anuvattitvā mayhaṃ atthaṃ gavesissāmi, paralokamaggaṃ sodhessāmī’’ti sanniṭṭhānaṃ katvā satthāraṃ āyācanto na kho ahantiādimāha. Athassa nihatamānataṃ ñatvā satthā upari desanaṃ vaḍḍhento tena hi, brāhmaṇātiādimāha. Tattha tena hīti kāraṇaniddeso. Yasmā saṃkhittena bhāsitassa atthaṃ ajānanto vitthāradesanaṃ yācasi, tasmāti attho. Sesamettha uttānatthamevāti.
18. адтамз ааяасмаад̇и бияаважанамзд̇ам̣. аананд̣̇од̇и д̇асса т̇зрасса наамам̣. згам̣сзнаад̇и зганд̇зна. анувижжаад̇и анубависид̇ваа. вин̃н̃ууд̇и бан̣д̣ид̇аа. г̇араханд̇ийд̇и нинд̣̇анд̇и, аван̣н̣ам̣ бхаасанд̇и. сзсамзд̇т̇а навамз жа саб̣б̣ам̣ уд̇д̇аанад̇т̇амзва.
18. Aṭṭhame āyasmāti piyavacanametaṃ. Ānandoti tassa therassa nāmaṃ. Ekaṃsenāti ekantena. Anuviccāti anupavisitvā. Viññūti paṇḍitā. Garahantīti nindanti, avaṇṇaṃ bhāsanti. Sesamettha navame ca sabbaṃ uttānatthameva.
20. д̣̇асамз д̣̇уннигкид̇д̇ан̃жа бад̣̇аб̣яан̃ж̇ананд̇и уббадибаадияаа г̇ахид̇абаал̣ибад̣̇амзва хи ад̇т̇асса б̣яан̃ж̇анад̇д̇аа б̣яан̃ж̇ананд̇и вужжад̇и. убхаяамзд̇ам̣ баал̣ияаава наамам̣. ад̇т̇о жа д̣̇уннийд̇од̇и баривад̇д̇зд̇ваа уббадибаадияаа г̇ахид̇аа адтагат̇аа. д̣̇уннигкид̇д̇асса, бхигкавз, бад̣̇аб̣яан̃ж̇анасса ад̇т̇оби д̣̇уннаяо ход̇ийд̇и баривад̇д̇зд̇ваа уббадибаадияаа г̇ахид̇ааяа баал̣ияаа адтагат̇аа наама д̣̇уннаяаа д̣̇уннийхаараа д̣̇уггат̇аа наама ход̇и. згаад̣̇асамз вуд̇д̇абадибагканаязна ад̇т̇о взд̣̇ид̇аб̣б̣од̇и.
20. Dasame dunnikkhittañca padabyañjananti uppaṭipāṭiyā gahitapāḷipadameva hi atthassa byañjanattā byañjananti vuccati. Ubhayametaṃ pāḷiyāva nāmaṃ. Attho ca dunnītoti parivattetvā uppaṭipāṭiyā gahitā aṭṭhakathā. Dunnikkhittassa, bhikkhave, padabyañjanassa atthopi dunnayo hotīti parivattetvā uppaṭipāṭiyā gahitāya pāḷiyā aṭṭhakathā nāma dunnayā dunnīhārā dukkathā nāma hoti. Ekādasame vuttapaṭipakkhanayena attho veditabboti.
ад̇хигаран̣аваг̇г̇о д̣̇уд̇ияо.
Adhikaraṇavaggo dutiyo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 2. ад̇хигаран̣аваг̇г̇о • 2. Adhikaraṇavaggo
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 2. ад̇хигаран̣аваг̇г̇аван̣н̣анаа • 2. Adhikaraṇavaggavaṇṇanā
