| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
2. ад̇хигаран̣аваг̇г̇аван̣н̣анаа
2. Adhikaraṇavaggavaṇṇanā
11. д̣̇уд̇ияаваг̇г̇асса батамз аббадисан̇каанз на гамбад̇ийд̇и бадисан̇каанаб̣алам̣, убабаригканабан̃н̃ааязд̇ам̣ наамам̣. вийрияасийсзна сад̇д̇а б̣ож̇жхан̇г̇з бхаавзнд̇асса уббаннам̣ б̣алам̣ бхааванааб̣алам̣. вийрияубад̇т̇амбхзна хи гусалабхааванаа б̣алавад̇ий т̇ираа уббаж̇ж̇ад̇и, д̇ат̇аа уббаннаа б̣алавад̇ий гусалабхааванаа б̣алаванд̇о сад̇д̇а б̣ож̇жхан̇г̇аад̇иби вужжанд̇и. ад̇т̇ад̇о вийрияасамб̣ож̇жхан̇г̇асийсзна сад̇д̇а б̣ож̇жхан̇г̇аа хонд̇и. вуд̇д̇амби жзд̇ам̣ – ‘‘д̇ад̇т̇а гад̇амам̣ бхааванааб̣алам̣? яаа гусалаанам̣ д̇хаммаанам̣ аасзванаа бхааванаа б̣ахулийгаммам̣, ид̣̇ам̣ вужжад̇и бхааванааб̣алам̣. сад̇д̇аби б̣ож̇жхан̇г̇аа бхааванааб̣ала’’нд̇и (д̇ха. са. 1361).
11. Dutiyavaggassa paṭhame appaṭisaṅkhāne na kampatīti paṭisaṅkhānabalaṃ, upaparikkhanapaññāyetaṃ nāmaṃ. Vīriyasīsena satta bojjhaṅge bhāventassa uppannaṃ balaṃ bhāvanābalaṃ. Vīriyupatthambhena hi kusalabhāvanā balavatī thirā uppajjati, tathā uppannā balavatī kusalabhāvanā balavanto satta bojjhaṅgātipi vuccanti. Atthato vīriyasambojjhaṅgasīsena satta bojjhaṅgā honti. Vuttampi cetaṃ – ‘‘tattha katamaṃ bhāvanābalaṃ? Yā kusalānaṃ dhammānaṃ āsevanā bhāvanā bahulīkammaṃ, idaṃ vuccati bhāvanābalaṃ. Sattapi bojjhaṅgā bhāvanābala’’nti (dha. sa. 1361).
агамбияадтзнаад̇и бадибагкзхи агамбанийяадтзна. д̣̇урабхибхаванадтзнаад̇и д̣̇урабхибхаванийяадтзна. анаж̇жхомад̣̇д̣̇анадтзнаад̇и ад̇хибхавид̇ваа анавамад̣̇д̣̇анадтзна. зд̇аанийд̇и зд̇аани яат̇аавуд̇д̇аани д̣̇взби б̣алаани. зд̇ад̣̇аг̇г̇ам̣ нааг̇ад̇анд̇и ‘‘зд̇ад̣̇аг̇г̇ам̣, бхигкавз, д̣̇виннам̣ б̣алаанам̣ яад̣̇ид̣̇ам̣ бхааванааб̣ала’’нд̇и звамзд̇т̇а зд̇ад̣̇аг̇г̇ам̣ нааг̇ад̇анд̇и ад̇т̇о.
Akampiyaṭṭhenāti paṭipakkhehi akampanīyaṭṭhena. Durabhibhavanaṭṭhenāti durabhibhavanīyaṭṭhena. Anajjhomaddanaṭṭhenāti adhibhavitvā anavamaddanaṭṭhena. Etānīti etāni yathāvuttāni dvepi balāni. Etadaggaṃ nāgatanti ‘‘etadaggaṃ, bhikkhave, dvinnaṃ balānaṃ yadidaṃ bhāvanābala’’nti evamettha etadaggaṃ nāgatanti attho.
12. д̣̇уд̇ияз вивзгам̣ ниссид̇анд̇и вивзганиссид̇ам̣, яат̇аа ваа вивзгавасзна бавад̇д̇ам̣ жхаанам̣ ‘‘вивзгаж̇а’’нд̇и вуд̇д̇ам̣, звам̣ вивзгавасзна бавад̇д̇о сад̇исамб̣ож̇жхан̇г̇о ‘‘вивзганиссид̇о’’д̇и д̣̇адтаб̣б̣о. ниссаяадто жа вибассанаамаг̇г̇аанам̣ васзна маг̇г̇апалаанам̣ взд̣̇ид̇аб̣б̣о, асад̇иби ваа буб̣б̣аабарабхаавз ‘‘бадижжасамуббаад̣̇о’’д̇и зд̇т̇а бажжаязна самуббаад̣̇анам̣ вияа авинаабхаавид̇хаммаб̣яаабаараа ниссаяанабхааванаа самбхаванд̇ийд̇и. ‘‘д̇ад̣̇ан̇г̇асамужчзд̣̇аниссаран̣авивзганиссид̇а’’нд̇и вад̇ваа бадиббассад̣̇д̇хививзганиссид̇асса аважанам̣ ‘‘сад̇исамб̣ож̇жхан̇г̇ам̣ бхаавзд̇ий’’д̇иаад̣̇инаа ид̇ха бхаавзд̇аб̣б̣аанам̣ самб̣ож̇жхан̇г̇аанам̣ вуд̇д̇ад̇д̇аа. бхаавид̇аб̣ож̇жхан̇г̇асса хи сажчигаад̇аб̣б̣аа б̣алаб̣ож̇жхан̇г̇аа, д̇зсам̣ гижжам̣ бадиббассад̣̇д̇хививзго. аж̇жхаасаяад̇од̇и ‘‘ниб̣б̣аанам̣ сажчигариссаамий’’д̇и бавад̇д̇ааж̇жхаасаяад̇о. яад̣̇иби хи вибассанаагкан̣з сан̇каараарамман̣ам̣ жид̇д̇ам̣, сан̇каарзсу бана аад̣̇ийнавам̣ д̣̇исваа д̇аббадибагкз ниб̣б̣аанз ниннад̇ааяа аж̇жхаасаяад̇о ниссаран̣авивзганиссид̇о ход̇и ун̣хаабхибхууд̇асса буг̇г̇аласса сийд̇аниннажид̇д̇ад̇аа вияа.
12. Dutiye vivekaṃ nissitanti vivekanissitaṃ, yathā vā vivekavasena pavattaṃ jhānaṃ ‘‘vivekaja’’nti vuttaṃ, evaṃ vivekavasena pavatto satisambojjhaṅgo ‘‘vivekanissito’’ti daṭṭhabbo. Nissayaṭṭho ca vipassanāmaggānaṃ vasena maggaphalānaṃ veditabbo, asatipi vā pubbāparabhāve ‘‘paṭiccasamuppādo’’ti ettha paccayena samuppādanaṃ viya avinābhāvidhammabyāpārā nissayanabhāvanā sambhavantīti. ‘‘Tadaṅgasamucchedanissaraṇavivekanissita’’nti vatvā paṭippassaddhivivekanissitassa avacanaṃ ‘‘satisambojjhaṅgaṃ bhāvetī’’tiādinā idha bhāvetabbānaṃ sambojjhaṅgānaṃ vuttattā. Bhāvitabojjhaṅgassa hi sacchikātabbā balabojjhaṅgā, tesaṃ kiccaṃ paṭippassaddhiviveko. Ajjhāsayatoti ‘‘nibbānaṃ sacchikarissāmī’’ti pavattaajjhāsayato. Yadipi hi vipassanākkhaṇe saṅkhārārammaṇaṃ cittaṃ, saṅkhāresu pana ādīnavaṃ disvā tappaṭipakkhe nibbāne ninnatāya ajjhāsayato nissaraṇavivekanissito hoti uṇhābhibhūtassa puggalassa sītaninnacittatā viya.
‘‘бан̃жавид̇хавивзганиссид̇амбийд̇и згз’’д̇и вад̇ваа д̇ад̇т̇а яат̇аавуд̇д̇авивзгад̇д̇аяад̇о ан̃н̃ам̣ вивзгад̣̇ваяам̣ уд̣̇д̇харид̇ваа д̣̇ассзд̇ум̣ ‘‘д̇з хий’’д̇иаад̣̇и вуд̇д̇ам̣. д̇ад̇т̇а жхаанагкан̣з д̇аава гижжад̇о вигкамбханавивзганиссид̇ам̣, вибассанаагкан̣з аж̇жхаасаяад̇о бадиббассад̣̇д̇хививзганиссид̇ам̣ бхаавзд̇ийд̇и вад̇д̇аб̣б̣ам̣ ‘‘зваахам̣ ануд̇д̇арам̣ вимогкам̣ убасамбаж̇ж̇а вихариссаамий’’д̇и д̇ад̇т̇а ниннаж̇жхаасаяад̇ааяа. д̇знааха ‘‘д̇асмаа д̇зсам̣ мад̇знаа’’д̇иаад̣̇и. хздтаа гасин̣аж̇жхаанаг̇г̇ахан̣зна ааруббаанамби г̇ахан̣ам̣ д̣̇адтаб̣б̣ам̣, д̇асмаа ‘‘зд̇зсам̣ жхаанаана’’нд̇и иминааби д̇зсам̣ сан̇г̇ахо взд̣̇ид̇аб̣б̣о. яасмаа бахаанавинаяо вияа вирааг̇анирод̇хааби ид̇хаад̇хиббзд̇авивзгзна ад̇т̇ад̇о ниб̣б̣исидтаа, д̇асмаа вуд̇д̇ам̣ ‘‘зса наяо вирааг̇аниссид̇анд̇иаад̣̇ийсуу’’д̇и. д̇знааха ‘‘вивзгад̇т̇аа зва хи вирааг̇аад̣̇аяо’’д̇и.
‘‘Pañcavidhavivekanissitampīti eke’’ti vatvā tattha yathāvuttavivekattayato aññaṃ vivekadvayaṃ uddharitvā dassetuṃ ‘‘te hī’’tiādi vuttaṃ. Tattha jhānakkhaṇe tāva kiccato vikkhambhanavivekanissitaṃ, vipassanākkhaṇe ajjhāsayato paṭippassaddhivivekanissitaṃ bhāvetīti vattabbaṃ ‘‘evāhaṃ anuttaraṃ vimokkhaṃ upasampajja viharissāmī’’ti tattha ninnajjhāsayatāya. Tenāha ‘‘tasmā tesaṃ matenā’’tiādi. Heṭṭhā kasiṇajjhānaggahaṇena āruppānampi gahaṇaṃ daṭṭhabbaṃ, tasmā ‘‘etesaṃ jhānāna’’nti imināpi tesaṃ saṅgaho veditabbo. Yasmā pahānavinayo viya virāganirodhāpi idhādhippetavivekena atthato nibbisiṭṭhā, tasmā vuttaṃ ‘‘esa nayo virāganissitantiādīsū’’ti. Tenāha ‘‘vivekatthā eva hi virāgādayo’’ti.
воссаг̇г̇а-сад̣̇д̣̇о барижжааг̇ад̇т̇о багканд̣̇анад̇т̇о жаад̇и воссаг̇г̇асса д̣̇увид̇хад̇аа вуд̇д̇аа. воссаж̇ж̇анан̃хи бахаанам̣ виссадтабхаавзна нирод̇ханабагканд̣̇анамби жа . д̇асмаа вибассанаагкан̣з д̇ад̣̇ан̇г̇авасзна маг̇г̇агкан̣з самужчзд̣̇авасзна бадибагкасса бахаанам̣ воссаг̇г̇о, д̇ат̇аа вибассанаагкан̣з д̇анниннабхаавзна, маг̇г̇агкан̣з аарамман̣агаран̣зна виссадтасабхаавад̇аа воссаг̇г̇од̇и взд̣̇ид̇аб̣б̣ам̣. д̇знзвааха ‘‘д̇ад̇т̇а барижжааг̇авоссаг̇г̇о’’д̇иаад̣̇и. аяам̣ сад̇исамб̣ож̇жхан̇г̇од̇и аяам̣ миссагавасзна вуд̇д̇о сад̇исамб̣ож̇жхан̇г̇о. яат̇аавуд̇д̇зна багаарзнаад̇и д̇ад̣̇ан̇г̇аббахаанасамужчзд̣̇аббахаанаббагаарзна д̇анниннад̇ад̣̇аарамман̣аббагаарзна жа. буб̣б̣з воссаг̇г̇аважанассзва ад̇т̇асса вуд̇д̇ад̇д̇аа ааха ‘‘сагалзна важанзнаа’’д̇и. барин̣аманд̇анд̇и вибассанаагкан̣з д̇ад̣̇ан̇г̇ад̇анниннаббагаарзна барин̣аманд̇ам̣. барин̣ад̇анд̇и маг̇г̇агкан̣з самужчзд̣̇ад̇ад̣̇аарамман̣аббагаарзна барин̣ад̇ам̣. барин̣аамо наама ид̇ха барибаагод̇и ааха ‘‘барибажжанд̇ам̣ барибагган̃жаа’’д̇и. барибааго жа аасзваналаабхзна лад̣̇д̇хасаамад̇т̇ияасса гилзсз барижжаж̇ид̇ум̣ ниб̣б̣аанам̣ багканд̣̇ид̇ум̣ д̇игкависад̣̇абхааво. д̇знааха ‘‘аяан̃хий’’д̇иаад̣̇и. зса наяод̇и явааяам̣ наяо ‘‘вивзганиссид̇а’’нд̇иаад̣̇инаа сад̇исамб̣ож̇жхан̇г̇з вуд̇д̇о, сзсзсу д̇хаммавижаяасамб̣ож̇жхан̇г̇аад̣̇ийсуби зсзва наяо, звам̣ д̇ад̇т̇а нзд̇аб̣б̣анд̇и ад̇т̇о.
Vossagga-saddo pariccāgattho pakkhandanattho cāti vossaggassa duvidhatā vuttā. Vossajjanañhi pahānaṃ vissaṭṭhabhāvena nirodhanapakkhandanampi ca . Tasmā vipassanākkhaṇe tadaṅgavasena maggakkhaṇe samucchedavasena paṭipakkhassa pahānaṃ vossaggo, tathā vipassanākkhaṇe tanninnabhāvena, maggakkhaṇe ārammaṇakaraṇena vissaṭṭhasabhāvatā vossaggoti veditabbaṃ. Tenevāha ‘‘tattha pariccāgavossaggo’’tiādi. Ayaṃ satisambojjhaṅgoti ayaṃ missakavasena vutto satisambojjhaṅgo. Yathāvuttena pakārenāti tadaṅgappahānasamucchedappahānappakārena tanninnatadārammaṇappakārena ca. Pubbe vossaggavacanasseva atthassa vuttattā āha ‘‘sakalena vacanenā’’ti. Pariṇamantanti vipassanākkhaṇe tadaṅgatanninnappakārena pariṇamantaṃ. Pariṇatanti maggakkhaṇe samucchedatadārammaṇappakārena pariṇataṃ. Pariṇāmo nāma idha paripākoti āha ‘‘paripaccantaṃ paripakkañcā’’ti. Paripāko ca āsevanalābhena laddhasāmatthiyassa kilese pariccajituṃ nibbānaṃ pakkhandituṃ tikkhavisadabhāvo. Tenāha ‘‘ayañhī’’tiādi. Esa nayoti yvāyaṃ nayo ‘‘vivekanissita’’ntiādinā satisambojjhaṅge vutto, sesesu dhammavicayasambojjhaṅgādīsupi eseva nayo, evaṃ tattha netabbanti attho.
‘‘вивзганиссид̇а’’нд̇иаад̣̇ийсу лаб̣бхамаанамад̇т̇ам̣ сааман̃н̃ад̇о д̣̇ассзд̇ваа ид̣̇аани ид̇хаад̇хиббзд̇амад̇т̇ам̣ д̣̇ассзнд̇о ‘‘ид̇ха банаа’’д̇иаад̣̇имааха. д̇ад̇т̇а саб̣б̣асан̇кад̇зхийд̇и саб̣б̣зхи бажжаяасамуббаннад̇хаммзхи. саб̣б̣зсанд̇и сан̇кад̇ад̇хаммаанам̣. вивзгам̣ аарамман̣ам̣ гад̇ваад̇и ниб̣б̣аанасан̇каад̇ам̣ вивзгам̣ аарамман̣ам̣ гад̇ваа. д̇ан̃жа код̇и д̇ад̣̇зва сад̇исамб̣ож̇жхан̇г̇ам̣.
‘‘Vivekanissita’’ntiādīsu labbhamānamatthaṃ sāmaññato dassetvā idāni idhādhippetamatthaṃ dassento ‘‘idha panā’’tiādimāha. Tattha sabbasaṅkhatehīti sabbehi paccayasamuppannadhammehi. Sabbesanti saṅkhatadhammānaṃ. Vivekaṃ ārammaṇaṃ katvāti nibbānasaṅkhātaṃ vivekaṃ ārammaṇaṃ katvā. Tañca khoti tadeva satisambojjhaṅgaṃ.
13. д̇ад̇ияз жид̇д̇згаг̇г̇ад̇т̇ааяаад̇и жид̇д̇асамаад̇хаанад̇т̇ааяа, д̣̇идтад̇хаммз сукавихаарааяаад̇и ад̇т̇о. жид̇д̇згаг̇г̇ад̇аасийсзна хи д̣̇идтад̇хаммасукавихааро вуд̇д̇о. сугкавибассагакийн̣аасаваанам̣ васзна хзд̇ам̣ вуд̇д̇ам̣. д̇з хи самаабаж̇ж̇ид̇ваа ‘‘згаг̇г̇ажид̇д̇аа сукам̣ д̣̇ивасам̣ вихариссаамаа’’д̇и ижжзва гасин̣абаригаммам̣ гад̇ваа адта самаабад̇д̇ияо ниб̣б̣ад̇д̇знд̇и. вибассанаабаад̣̇агад̇т̇ааяаад̇иаад̣̇ийсу бана сзгкабут̇уж̇ж̇анаа ‘‘самаабад̇д̇ид̇о вудтааяа самаахид̇зна жид̇д̇зна вибассаамаа’’д̇и ниб̣б̣ад̇д̇знд̇аа вибассанаабаад̣̇агад̇т̇ааяа бхаавзнд̇и.
13. Tatiye cittekaggatthāyāti cittasamādhānatthāya, diṭṭhadhamme sukhavihārāyāti attho. Cittekaggatāsīsena hi diṭṭhadhammasukhavihāro vutto. Sukkhavipassakakhīṇāsavānaṃ vasena hetaṃ vuttaṃ. Te hi samāpajjitvā ‘‘ekaggacittā sukhaṃ divasaṃ viharissāmā’’ti icceva kasiṇaparikammaṃ katvā aṭṭha samāpattiyo nibbattenti. Vipassanāpādakatthāyātiādīsu pana sekkhaputhujjanā ‘‘samāpattito vuṭṭhāya samāhitena cittena vipassāmā’’ti nibbattentā vipassanāpādakatthāya bhāventi.
яз бана адта самаабад̇д̇ияо ниб̣б̣ад̇д̇зд̇ваа абхин̃н̃аабаад̣̇агаж̇жхаанам̣ самаабаж̇ж̇ид̇ваа самаабад̇д̇ид̇о вудтааяа ‘‘згоби худ̇ваа б̣ахуд̇хаа ход̇ий’’д̇и (д̣̇ий. ни. 1.238; ма. ни. 1.147; сам̣. ни. 2.70; 5.834, 842) вуд̇д̇анаяаа абхин̃н̃ааяо бад̇т̇знд̇аа ниб̣б̣ад̇д̇знд̇и, д̇з абхин̃н̃аабаад̣̇агад̇т̇ааяа бхаавзнд̇и. яз адта самаабад̇д̇ияо ниб̣б̣ад̇д̇зд̇ваа нирод̇хасамаабад̇д̇им̣ самаабаж̇ж̇ид̇ваа ‘‘сад̇д̇аахам̣ ажид̇д̇аа худ̇ваа д̣̇идтзва д̇хаммз нирод̇хам̣ ниб̣б̣аанам̣ бад̇ваа сукам̣ вихариссаамаа’’д̇и ниб̣б̣ад̇д̇знд̇и, д̇з нирод̇хабаад̣̇агад̇т̇ааяа бхаавзнд̇и. яз бана адта самаабад̇д̇ияо ниб̣б̣ад̇д̇зд̇ваа ‘‘абарихийнаж̇жхаанаа б̣рахмалогз уббаж̇ж̇иссаамаа’’д̇и ниб̣б̣ад̇д̇знд̇и, д̇з бхавависзсад̇т̇ааяа бхаавзнд̇и.
Ye pana aṭṭha samāpattiyo nibbattetvā abhiññāpādakajjhānaṃ samāpajjitvā samāpattito vuṭṭhāya ‘‘ekopi hutvā bahudhā hotī’’ti (dī. ni. 1.238; ma. ni. 1.147; saṃ. ni. 2.70; 5.834, 842) vuttanayā abhiññāyo patthentā nibbattenti, te abhiññāpādakatthāya bhāventi. Ye aṭṭha samāpattiyo nibbattetvā nirodhasamāpattiṃ samāpajjitvā ‘‘sattāhaṃ acittā hutvā diṭṭheva dhamme nirodhaṃ nibbānaṃ patvā sukhaṃ viharissāmā’’ti nibbattenti, te nirodhapādakatthāya bhāventi. Ye pana aṭṭha samāpattiyo nibbattetvā ‘‘aparihīnajjhānā brahmaloke uppajjissāmā’’ti nibbattenti, te bhavavisesatthāya bhāventi.
яуд̇д̇ам̣ д̇аава жид̇д̇згаг̇г̇ад̇ааяа бхавависзсад̇т̇ад̇аа вияа вибассанаабаад̣̇агад̇т̇ад̇ааби жад̇уггаж̇жхаанасаад̇хааран̣аад̇и д̇зсам̣ васзна ‘‘жад̇д̇аари жхаанааний’’д̇и важанам̣, абхин̃н̃аабаад̣̇агад̇т̇ад̇аа бана нирод̇хабаад̣̇агад̇т̇ад̇аа жа жад̇уд̇т̇ассзва жхаанасса аавзн̣игаа, саа гат̇ам̣ жад̇уггаж̇жхаанасаад̇хааран̣аа вуд̇д̇аад̇и? барамбараад̇хидтаанабхаавад̇о. бад̣̇адтаанабад̣̇адтаанамби хи бад̣̇адтаананд̇и вужжад̇и гааран̣агааран̣анд̇и яат̇аа ‘‘д̇ин̣зхи бхад̇д̇ам̣ сид̣̇д̇ха’’нд̇и.
Yuttaṃ tāva cittekaggatāya bhavavisesatthatā viya vipassanāpādakatthatāpi catukkajjhānasādhāraṇāti tesaṃ vasena ‘‘cattāri jhānānī’’ti vacanaṃ, abhiññāpādakatthatā pana nirodhapādakatthatā ca catutthasseva jhānassa āveṇikā, sā kathaṃ catukkajjhānasādhāraṇā vuttāti? Paramparādhiṭṭhānabhāvato. Padaṭṭhānapadaṭṭhānampi hi padaṭṭhānanti vuccati kāraṇakāraṇanti yathā ‘‘tiṇehi bhattaṃ siddha’’nti.
14. жад̇уд̇т̇з сасагасса уббад̇анам̣ вияа ход̇ийд̇и бат̇авиж̇иг̇ужчанасасагасса уббад̇анам̣ вияа ход̇и. д̇ад̇т̇ааяам̣ ад̇т̇асаллаабигаа убамаа – бат̇авий гира сасагам̣ ааха – ‘‘хз сасагаа’’д̇и. сасаго ааха – ‘‘го зсо’’д̇и. гасмаа мамзва убари саб̣б̣аирияаабат̇з габбзнд̇о ужжаарабассаавам̣ гаронд̇о мам̣ на ж̇аанаасийд̇и? судту д̇аяаа ахам̣ д̣̇идто, маяаа агганд̇адтаанан̃хи ан̇г̇улаг̇г̇зхи пудтадтаанам̣ вияа ход̇и, виссадтауд̣̇агам̣ аббамад̇д̇агам̣, гарийсам̣ гадагапаламад̇д̇ам̣, хад̇т̇иассаад̣̇ийхи бана агганд̇адтаанамби маханд̇ам̣, бассаавоби нзсам̣ гхадамад̇д̇о, ужжаароби бажчимад̇д̇о ход̇и, алам̣ маяхам̣ д̇аяаад̇и уббад̇ид̇ваа ан̃н̃асмим̣ таанз бад̇ид̇о. д̇ад̇о нам̣ бат̇авий ааха – ‘‘ахо д̣̇уурам̣ г̇ад̇оби нану маяхам̣язва убари бад̇ид̇осий’’д̇и? со буна д̇ам̣ ж̇иг̇ужчанд̇о уббад̇ид̇ваа ан̃н̃ад̇т̇а бад̇ид̇о. звам̣ вассасахассамби уббад̇ид̇ваа уббад̇ид̇ваа бад̇амаано сасаго нзва бат̇авияаа анд̇ам̣ баабун̣ид̇ум̣ саггод̇и. на годинд̇и на буб̣б̣агодим̣. ид̇арзсанд̇и вибан̃жид̇ан̃н̃унзяяабад̣̇абарамаанам̣.
14. Catutthe sasakassa uppatanaṃ viya hotīti pathavijigucchanasasakassa uppatanaṃ viya hoti. Tatthāyaṃ atthasallāpikā upamā – pathavī kira sasakaṃ āha – ‘‘he sasakā’’ti. Sasako āha – ‘‘ko eso’’ti. Kasmā mameva upari sabbairiyāpathe kappento uccārapassāvaṃ karonto maṃ na jānāsīti? Suṭṭhu tayā ahaṃ diṭṭho, mayā akkantaṭṭhānañhi aṅgulaggehi phuṭṭhaṭṭhānaṃ viya hoti, vissaṭṭhaudakaṃ appamattakaṃ, karīsaṃ kaṭakaphalamattaṃ, hatthiassādīhi pana akkantaṭṭhānampi mahantaṃ, passāvopi nesaṃ ghaṭamatto, uccāropi pacchimatto hoti, alaṃ mayhaṃ tayāti uppatitvā aññasmiṃ ṭhāne patito. Tato naṃ pathavī āha – ‘‘aho dūraṃ gatopi nanu mayhaṃyeva upari patitosī’’ti? So puna taṃ jigucchanto uppatitvā aññattha patito. Evaṃ vassasahassampi uppatitvā uppatitvā patamāno sasako neva pathaviyā antaṃ pāpuṇituṃ sakkoti. Na koṭinti na pubbakoṭiṃ. Itaresanti vipañcitaññuneyyapadaparamānaṃ.
15. бан̃жамз самат̇зхи ад̇хигарийяад̇и вуубасаммад̇ийд̇и ад̇хигаран̣ам̣, адтаараса бхзд̣̇агаравад̇т̇ууни ниссааяа уббанно виваад̣̇оязва виваад̣̇аад̇хигаран̣ам̣. ‘‘ид̇ха бхигкуу бхигкум̣ анувад̣̇анд̇и сийлавибад̇д̇ияаа ваа’’д̇иаад̣̇инаа (жуул̣ава. 215) жад̇ассо вибад̇д̇ияо ниссааяа уббанно ануваад̣̇оязва ануваад̣̇аад̇хигаран̣ам̣. бан̃жаби аабад̇д̇игканд̇хаа аабад̇д̇аад̇хигаран̣ам̣. ‘‘сад̇д̇аби аабад̇д̇игканд̇хаа аабад̇д̇аад̇хигаран̣а’’нд̇и (жуул̣ава. 215) важанад̇о аабад̇д̇иязва аабад̇д̇аад̇хигаран̣ам̣. ‘‘яаа сан̇гхасса гижжаяад̇аа гаран̣ийяад̇аа абалоганагаммам̣ н̃ад̇д̇игаммам̣ н̃ад̇д̇ид̣̇уд̇ияагаммам̣ н̃ад̇д̇ижад̇уд̇т̇агамма’’нд̇и (жуул̣ава. 215) звамааг̇ад̇ам̣ жад̇уб̣б̣ид̇хам̣ сан̇гхагижжам̣ гижжаад̇хигаран̣анд̇и взд̣̇ид̇аб̣б̣ам̣. сзсамзд̇т̇а уд̇д̇аанамзва.
15. Pañcame samathehi adhikarīyati vūpasammatīti adhikaraṇaṃ, aṭṭhārasa bhedakaravatthūni nissāya uppanno vivādoyeva vivādādhikaraṇaṃ. ‘‘Idha bhikkhū bhikkhuṃ anuvadanti sīlavipattiyā vā’’tiādinā (cūḷava. 215) catasso vipattiyo nissāya uppanno anuvādoyeva anuvādādhikaraṇaṃ. Pañcapi āpattikkhandhā āpattādhikaraṇaṃ. ‘‘Sattapi āpattikkhandhā āpattādhikaraṇa’’nti (cūḷava. 215) vacanato āpattiyeva āpattādhikaraṇaṃ. ‘‘Yā saṅghassa kiccayatā karaṇīyatā apalokanakammaṃ ñattikammaṃ ñattidutiyakammaṃ ñatticatutthakamma’’nti (cūḷava. 215) evamāgataṃ catubbidhaṃ saṅghakiccaṃ kiccādhikaraṇanti veditabbaṃ. Sesamettha uttānameva.
16. чадтз абаагаданаамод̇и ‘‘сзло, гуудад̣̇анд̇о’’д̇иаад̣̇инаа анабхин̃н̃аад̇о. язна ваа гааран̣знаад̇и хзд̇умхи ид̣̇ам̣ гаран̣аважанам̣. хзд̇уад̇т̇о хи гирияаагааран̣ам̣, на гаран̣ам̣ вияа гирияад̇т̇о, д̇асмаа наанаббагаараг̇ун̣ависзсаад̇хиг̇амад̇т̇аа ид̇ха убасан̇гаманагирияаад̇и ‘‘аннзна васад̇и, аж̇жхзнзна васад̇ий’’д̇иаад̣̇ийсу вияа хзд̇уад̇т̇амзвзд̇ам̣ гаран̣аважанам̣ яуд̇д̇ам̣, на гаран̣ад̇т̇ам̣ д̇асса аяуж̇ж̇амаанад̇д̇аад̇и вуд̇д̇ам̣ ‘‘язна ваа гааран̣знаа’’д̇и. авибхааг̇ад̇о сад̇ад̇ам̣ бавад̇д̇ид̇анирад̇исаяасаад̣̇увибулаамад̇арасасад̣̇д̇хаммапалад̇ааяа саад̣̇упаланижжапалид̇амахааругкзна бхаг̇аваа убамид̇о. саад̣̇упалуубабхог̇аад̇хиббааяаг̇г̇ахан̣знзва хи ругкасса саад̣̇упалад̇аа г̇ахид̇аад̇и. убасан̇гамийд̇и убасан̇ганд̇о. самбад̇д̇агаамад̇ааяа хи гин̃жи таанам̣ г̇ажчанд̇о д̇ам̣д̇ам̣бад̣̇зсаад̇иггаманзна убасан̇гами, убасан̇ганд̇од̇и жа вад̇д̇аб̣б̣ад̇ам̣ лабхад̇и. д̇знааха ‘‘г̇ад̇од̇и вуд̇д̇ам̣ ход̇ий’’д̇и, убаг̇ад̇од̇и ад̇т̇о. убасан̇гамид̇ваад̇и буб̣б̣агаалагирияаанид̣̇д̣̇зсод̇и ааха ‘‘убасан̇гаманабарияосаанад̣̇ийбана’’нд̇и. д̇ад̇од̇и яам̣ таанам̣ бад̇д̇о ‘‘убасан̇гамий’’д̇и вуд̇д̇о, д̇ад̇о убаг̇ад̇адтаанад̇о.
16. Chaṭṭhe apākaṭanāmoti ‘‘selo, kūṭadanto’’tiādinā anabhiññāto. Yena vā kāraṇenāti hetumhi idaṃ karaṇavacanaṃ. Hetuattho hi kiriyākāraṇaṃ, na karaṇaṃ viya kiriyattho, tasmā nānappakāraguṇavisesādhigamatthā idha upasaṅkamanakiriyāti ‘‘annena vasati, ajjhenena vasatī’’tiādīsu viya hetuatthamevetaṃ karaṇavacanaṃ yuttaṃ, na karaṇatthaṃ tassa ayujjamānattāti vuttaṃ ‘‘yena vā kāraṇenā’’ti. Avibhāgato satataṃ pavattitaniratisayasāduvipulāmatarasasaddhammaphalatāya sāduphalaniccaphalitamahārukkhena bhagavā upamito. Sāduphalūpabhogādhippāyaggahaṇeneva hi rukkhassa sāduphalatā gahitāti. Upasaṅkamīti upasaṅkanto. Sampattakāmatāya hi kiñci ṭhānaṃ gacchanto taṃtaṃpadesātikkamanena upasaṅkami, upasaṅkantoti ca vattabbataṃ labhati. Tenāha ‘‘gatoti vuttaṃ hotī’’ti, upagatoti attho. Upasaṅkamitvāti pubbakālakiriyāniddesoti āha ‘‘upasaṅkamanapariyosānadīpana’’nti. Tatoti yaṃ ṭhānaṃ patto ‘‘upasaṅkamī’’ti vutto, tato upagataṭṭhānato.
яат̇аа каманийяаад̣̇ийни бужчанд̇од̇и яат̇аа бхаг̇аваа ‘‘гажжи д̇з, б̣раахман̣а, каманийяам̣, гажжи яаабанийяа’’нд̇иаад̣̇инаа каманийяаад̣̇ийни бужчанд̇о д̇зна б̣раахман̣зна сад̣̇д̇хим̣ самаббавад̇д̇амод̣̇о ахоси буб̣б̣абхаасид̇ааяа, звам̣ соби б̣раахман̣о д̇ад̣̇анугаран̣зна бхаг̇авад̇аа сад̣̇д̇хим̣ самаббавад̇д̇амод̣̇о ахосийд̇и яож̇анаа. д̇ам̣ бана самаббавад̇д̇амод̣̇ад̇ам̣ убамааяа д̣̇ассзд̇ум̣ ‘‘сийд̇од̣̇агам̣ вияаа’’д̇иаад̣̇и вуд̇д̇ам̣. д̇ад̇т̇а саммод̣̇ид̇анд̇и сам̣санд̣̇ид̇ам̣. згийбхааванд̇и саммод̣̇анагирияааяа самаанад̇ам̣. каманийяанд̇и ‘‘ид̣̇ам̣ жад̇ужаггам̣ навад̣̇ваарам̣ сарийраяанд̇ам̣ д̣̇угкаб̣ахулад̇ааяа сабхаавад̇о д̣̇уссахам̣, гажжи камид̇ум̣ саггун̣зяяа’’нд̇и бужчад̇и. яаабанийяанд̇и аахаараад̣̇иббадиб̣ад̣̇д̇хавуд̇д̇игам̣ жираббаб̣анд̇хасан̇каад̇ааяа яаабанааяа гажжи яаабзд̇ум̣ саггун̣зяяам̣. сийсарог̇аад̣̇иааб̣аад̇хаабхаавзна гажжи аббааб̣аад̇хам̣. д̣̇угкаж̇ийвигаабхаавзна гажжи аббаад̇ан̇гам̣. д̇ам̣д̇ам̣гижжагаран̣з удтаанасукад̇ааяа гажжи лахудтаанам̣. д̇ад̣̇ануруубаб̣алаяог̇ад̇о гажжи б̣алам̣ . сукавихаарасамбхавзна гажжи паасувихааро ад̇т̇ийд̇и саб̣б̣ад̇т̇а гажжи-сад̣̇д̣̇ам̣ яож̇зд̇ваа ад̇т̇о взд̣̇ид̇аб̣б̣о.
Yathā khamanīyādīni pucchantoti yathā bhagavā ‘‘kacci te, brāhmaṇa, khamanīyaṃ, kacci yāpanīya’’ntiādinā khamanīyādīni pucchanto tena brāhmaṇena saddhiṃ samappavattamodo ahosi pubbabhāsitāya, evaṃ sopi brāhmaṇo tadanukaraṇena bhagavatā saddhiṃ samappavattamodo ahosīti yojanā. Taṃ pana samappavattamodataṃ upamāya dassetuṃ ‘‘sītodakaṃ viyā’’tiādi vuttaṃ. Tattha sammoditanti saṃsanditaṃ. Ekībhāvanti sammodanakiriyāya samānataṃ. Khamanīyanti ‘‘idaṃ catucakkaṃ navadvāraṃ sarīrayantaṃ dukkhabahulatāya sabhāvato dussahaṃ, kacci khamituṃ sakkuṇeyya’’nti pucchati. Yāpanīyanti āhārādippaṭibaddhavuttikaṃ cirappabandhasaṅkhātāya yāpanāya kacci yāpetuṃ sakkuṇeyyaṃ. Sīsarogādiābādhābhāvena kacci appābādhaṃ. Dukkhajīvikābhāvena kacci appātaṅkaṃ. Taṃtaṃkiccakaraṇe uṭṭhānasukhatāya kacci lahuṭṭhānaṃ. Tadanurūpabalayogato kacci balaṃ. Sukhavihārasambhavena kacci phāsuvihāro atthīti sabbattha kacci-saddaṃ yojetvā attho veditabbo.
б̣алаббад̇д̇аа бийд̇и бийд̇иязва. д̇арун̣абийд̇и баамож̇ж̇ам̣. саммод̣̇ам̣ ж̇анзд̇и гарод̇ийд̇и саммод̣̇анийгам̣, д̇ад̣̇зва саммод̣̇анийяам̣. саммод̣̇ид̇аб̣б̣ад̇о саммод̣̇анийяанд̇и имам̣ бана ад̇т̇ам̣ д̣̇ассзд̇ум̣ ‘‘саммод̣̇ид̇ум̣ яуд̇д̇абхаавад̇о’’д̇и ааха. сарид̇аб̣б̣абхаавад̇од̇и ануссарид̇аб̣б̣абхаавад̇о. ‘‘саран̣ийяа’’нд̇и вад̇д̇аб̣б̣з д̣̇ийгхам̣ гад̇ваа ‘‘сааран̣ийяа’’нд̇и вуд̇д̇ам̣. суяяамаанасукад̇од̇и аабаат̇аг̇ад̇амад̇хурад̇ам̣ ааха, ануссарияамаанасукад̇од̇и вимад̣̇д̣̇араман̣ийяад̇ам̣. б̣яан̃ж̇анабарисуд̣̇д̇хад̇ааяаад̇и сабхааванируд̇д̇ибхаавзна д̇ассаа гат̇ааяа важанажаад̇урияамааха. ад̇т̇абарисуд̣̇д̇хад̇ааяаад̇и ад̇т̇асса нирубаггилзсад̇ам̣. анзгзхи барияааязхийд̇и анзгзхи гааран̣зхи.
Balappattā pīti pītiyeva. Taruṇapīti pāmojjaṃ. Sammodaṃ janeti karotīti sammodanīkaṃ, tadeva sammodanīyaṃ. Sammoditabbato sammodanīyanti imaṃ pana atthaṃ dassetuṃ ‘‘sammodituṃ yuttabhāvato’’ti āha. Saritabbabhāvatoti anussaritabbabhāvato. ‘‘Saraṇīya’’nti vattabbe dīghaṃ katvā ‘‘sāraṇīya’’nti vuttaṃ. Suyyamānasukhatoti āpāthagatamadhurataṃ āha, anussariyamānasukhatoti vimaddaramaṇīyataṃ. Byañjanaparisuddhatāyāti sabhāvaniruttibhāvena tassā kathāya vacanacāturiyamāha. Atthaparisuddhatāyāti atthassa nirupakkilesataṃ. Anekehi pariyāyehīti anekehi kāraṇehi.
ад̇ид̣̇уураажжаасаннаббадигкзбзна наад̇ид̣̇уурам̣ нажжаасаннам̣ наама г̇ахид̇ам̣, д̇ам̣ бана авагам̣сад̇о убхиннам̣ басаарид̇ахад̇т̇аасан̇гхадданзна д̣̇адтаб̣б̣ам̣. г̇ийвам̣ басаарзд̇ваад̇и г̇ийвам̣ баривадданавасзна басаарзд̇ваа.
Atidūraaccāsannappaṭikkhepena nātidūraṃ naccāsannaṃ nāma gahitaṃ, taṃ pana avakaṃsato ubhinnaṃ pasāritahatthāsaṅghaṭṭanena daṭṭhabbaṃ. Gīvaṃ pasāretvāti gīvaṃ parivaṭṭanavasena pasāretvā.
зд̇ад̣̇авожаад̇и зд̇ам̣ ‘‘го ну ко, бханд̇з, хзд̇уу’’д̇иаад̣̇ибужчааважанам̣ авожа. д̇знзва ‘‘зд̇ад̣̇авожаа’’д̇и бад̣̇ам̣ уд̣̇д̇харид̇ваа д̣̇увид̇хаа хи бужчаад̇иаад̣̇инаа бужчаавибхааг̇ам̣ д̣̇ассзд̇и. д̇ад̇т̇а аг̇аарз нияуд̇д̇о аг̇аариго, д̇асса бужчаа аг̇ааригабужчаа. аг̇ааригад̇о ан̃н̃о анаг̇аариго баб̣б̣аж̇ж̇уубаг̇ад̇о, д̇асса бужчаа анаг̇ааригабужчаа. гин̃жааби ан̃н̃ад̇т̇а ‘‘ж̇анаго хзд̇у, баг̇г̇аахаго бажжаяо. асаад̇хааран̣о хзд̇у, саад̇хааран̣о бажжаяо. сабхааг̇о хзд̇у, асабхааг̇о бажжаяо. буб̣б̣агаалиго хзд̇у, сахабавад̇д̇о бажжаяо’’д̇иаад̣̇инаа хзд̇убажжаяаа вибхаж̇ж̇а вужжанд̇и. ид̇ха бана ‘‘жад̇д̇ааро ко, бхигкавз, махаабхууд̇аа хзд̇у жад̇д̇ааро махаабхууд̇аа бажжаяо руубагканд̇хасса бан̃н̃аабанааяаа’’д̇иаад̣̇ийсу (ма. ни. 3.86) вияа хзд̇убажжаяасад̣̇д̣̇аа самаанад̇т̇аад̇и д̣̇ассзнд̇о ‘‘убхаяамбзд̇ам̣ гааран̣авзважанамзваа’’д̇и ааха. висамажарияаад̇и бхааванабум̣саганид̣̇д̣̇зсо.
Etadavocāti etaṃ ‘‘ko nu kho, bhante, hetū’’tiādipucchāvacanaṃ avoca. Teneva ‘‘etadavocā’’ti padaṃ uddharitvā duvidhā hi pucchātiādinā pucchāvibhāgaṃ dasseti. Tattha agāre niyutto agāriko, tassa pucchā agārikapucchā. Agārikato añño anagāriko pabbajjūpagato, tassa pucchā anagārikapucchā. Kiñcāpi aññattha ‘‘janako hetu, paggāhako paccayo. Asādhāraṇo hetu, sādhāraṇo paccayo. Sabhāgo hetu, asabhāgo paccayo. Pubbakāliko hetu, sahapavatto paccayo’’tiādinā hetupaccayā vibhajja vuccanti. Idha pana ‘‘cattāro kho, bhikkhave, mahābhūtā hetu cattāro mahābhūtā paccayo rūpakkhandhassa paññāpanāyā’’tiādīsu (ma. ni. 3.86) viya hetupaccayasaddā samānatthāti dassento ‘‘ubhayampetaṃ kāraṇavevacanamevā’’ti āha. Visamacariyāti bhāvanapuṃsakaniddeso.
абхигганд̇аад̇и ад̇игганд̇аа, виг̇ад̇аад̇и ад̇т̇од̇и ааха ‘‘каяз д̣̇иссад̇ий’’д̇и. д̇ат̇аа хи ‘‘нигканд̇о батамо яаамо’’д̇и убари вуд̇д̇ам̣. абхигганд̇ад̇арод̇и ад̇ивияа ганд̇ад̇аро манорамо, д̇аад̣̇исо жа сунд̣̇аро бхад̣̇д̣̇аго наама ход̇ийд̇и ааха ‘‘сунд̣̇арз д̣̇иссад̇ий’’д̇и. год̇и д̣̇званааг̇аяагкаг̇анд̇хаб̣б̣аад̣̇ийсу го гад̇амо? мзд̇и мама. баад̣̇аанийд̇и баад̣̇з. ид̣̇д̇хияаад̇и имааяа зваруубааяа д̣̇звид̣̇д̇хияаа. яасасаад̇и иминаа зд̣̇исзна бариваарзна барижчзд̣̇зна жа. ж̇аланд̇и виж̇ж̇од̇амаано. абхигганд̇знаад̇и ад̇ивияа ганд̇зна гаманийязна абхируубзна. ван̣н̣знаад̇и чавиван̣н̣зна сарийраван̣н̣анибхааяа. саб̣б̣аа обхаасаяам̣ д̣̇исаад̇и д̣̇аса д̣̇исаа бабхаасзнд̇о, жанд̣̇о вияа суурияо вияа жа згобхаасам̣ згаалогам̣ гаронд̇од̇и г̇аат̇ааяа ад̇т̇о. абхируубзд̇и ул̣аараруубз самбаннаруубз.
Abhikkantāti atikkantā, vigatāti atthoti āha ‘‘khaye dissatī’’ti. Tathā hi ‘‘nikkhanto paṭhamo yāmo’’ti upari vuttaṃ. Abhikkantataroti ativiya kantataro manoramo, tādiso ca sundaro bhaddako nāma hotīti āha ‘‘sundare dissatī’’ti. Koti devanāgayakkhagandhabbādīsu ko katamo? Meti mama. Pādānīti pāde. Iddhiyāti imāya evarūpāya deviddhiyā. Yasasāti iminā edisena parivārena paricchedena ca. Jalanti vijjotamāno. Abhikkantenāti ativiya kantena kamanīyena abhirūpena. Vaṇṇenāti chavivaṇṇena sarīravaṇṇanibhāya. Sabbā obhāsayaṃ disāti dasa disā pabhāsento, cando viya sūriyo viya ca ekobhāsaṃ ekālokaṃ karontoti gāthāya attho. Abhirūpeti uḷārarūpe sampannarūpe.
‘‘жоро, жоро; саббо, саббо’’д̇иаад̣̇ийсу бхаяз аамзд̣ид̇ам̣. ‘‘виж̇жха, виж̇жха; бахара, бахараа’’д̇иаад̣̇ийсу год̇хз. ‘‘саад̇ху, саад̇хуу’’д̇иаад̣̇ийсу (ма. ни. 327.сам̣. ни. 2.127; 3.35; 5.1085) басам̣сааяам̣. ‘‘г̇ажча, г̇ажча; лунаахи, лунаахий’’д̇иаад̣̇ийсу д̇урид̇з. ‘‘ааг̇ажча, ааг̇ажчаа’’д̇иаад̣̇ийсу год̇уухалз. ‘‘б̣уд̣̇д̇хо, б̣уд̣̇д̇ход̇и жинд̇знд̇о’’д̇иаад̣̇ийсу (б̣у. вам̣. 2.44) ажчарз. ‘‘абхиггамат̇ааяасманд̇о, абхиггамат̇ааяасманд̇о’’д̇иаад̣̇ийсу хаасз. ‘‘гахам̣ згабуд̇д̇ага, гахам̣ згабуд̇д̇агаа’’д̇иаад̣̇ийсу (ма. ни. 2.353; сам̣. ни. 2.63) согз. ‘‘ахо сукам̣, ахо сука’’нд̇иаад̣̇ийсу (уд̣̇аа. 20; д̣̇ий. ни. 3.305; жуул̣ава. 332) басаад̣̇з. жа-сад̣̇д̣̇о авуд̇д̇асамужжаяад̇д̇о. д̇зна г̇арахааасаммаанаад̣̇ийнам̣ сан̇г̇ахо д̣̇адтаб̣б̣о. д̇ад̇т̇а ‘‘баабо, баабо’’д̇иаад̣̇ийсу г̇арахааяам̣. ‘‘абхируубага, абхируубагаа’’д̇иаад̣̇ийсу асаммаанз д̣̇адтаб̣б̣ам̣.
‘‘Coro, coro; sappo, sappo’’tiādīsu bhaye āmeḍitaṃ. ‘‘Vijjha, vijjha; pahara, paharā’’tiādīsu kodhe. ‘‘Sādhu, sādhū’’tiādīsu (ma. ni. 327.saṃ. ni. 2.127; 3.35; 5.1085) pasaṃsāyaṃ. ‘‘Gaccha, gaccha; lunāhi, lunāhī’’tiādīsu turite. ‘‘Āgaccha, āgacchā’’tiādīsu kotūhale. ‘‘Buddho, buddhoti cintento’’tiādīsu (bu. vaṃ. 2.44) acchare. ‘‘Abhikkamathāyasmanto, abhikkamathāyasmanto’’tiādīsu hāse. ‘‘Kahaṃ ekaputtaka, kahaṃ ekaputtakā’’tiādīsu (ma. ni. 2.353; saṃ. ni. 2.63) soke. ‘‘Aho sukhaṃ, aho sukha’’ntiādīsu (udā. 20; dī. ni. 3.305; cūḷava. 332) pasāde. Ca-saddo avuttasamuccayatto. Tena garahāasammānādīnaṃ saṅgaho daṭṭhabbo. Tattha ‘‘pāpo, pāpo’’tiādīsu garahāyaṃ. ‘‘Abhirūpaka, abhirūpakā’’tiādīsu asammāne daṭṭhabbaṃ.
наяид̣̇ам̣ аамзд̣ид̇авасзна д̣̇вигкад̇д̇ум̣ вуд̇д̇ам̣, ат̇а ко ад̇т̇ад̣̇ваяавасзнаад̇и д̣̇ассзнд̇о ‘‘ат̇а ваа’’д̇иаад̣̇имааха. ‘‘абхигганд̇а’’нд̇и важанам̣ абзгкид̇ваа набум̣сагавасзна вуд̇д̇ам̣, д̇ам̣ бана бхаг̇авад̇о важанам̣ д̇хаммасса д̣̇зсанаад̇и гад̇ваа д̇ат̇аа вуд̇д̇ам̣ ‘‘бход̇о г̇од̇амасса д̇хаммад̣̇зсанаа’’д̇и. д̣̇уд̇ияабад̣̇зби зсзва наяо. д̣̇осанаасанад̇од̇и рааг̇аад̣̇игилзсавид̇хаманад̇о. г̇ун̣аад̇хиг̇аманад̇од̇и сийлаад̣̇иг̇ун̣аанам̣ самбаабанад̇о. яз г̇ун̣з д̣̇зсанаа ад̇хиг̇амзд̇и, д̇зсу бад̇хаанабхууд̇з д̇аава д̣̇ассзд̇ум̣ ‘‘сад̣̇д̇хааж̇ананад̇о бан̃н̃ааж̇ананад̇о’’д̇и вуд̇д̇ам̣. сад̣̇д̇хаабамукаа хи логияаа г̇ун̣аа, бан̃н̃аабамукаа логуд̇д̇араа .
Nayidaṃ āmeḍitavasena dvikkhattuṃ vuttaṃ, atha kho atthadvayavasenāti dassento ‘‘atha vā’’tiādimāha. ‘‘Abhikkanta’’nti vacanaṃ apekkhitvā napuṃsakavasena vuttaṃ, taṃ pana bhagavato vacanaṃ dhammassa desanāti katvā tathā vuttaṃ ‘‘bhoto gotamassa dhammadesanā’’ti. Dutiyapadepi eseva nayo. Dosanāsanatoti rāgādikilesavidhamanato. Guṇādhigamanatoti sīlādiguṇānaṃ sampāpanato. Ye guṇe desanā adhigameti, tesu padhānabhūte tāva dassetuṃ ‘‘saddhājananato paññājananato’’ti vuttaṃ. Saddhāpamukhā hi lokiyā guṇā, paññāpamukhā lokuttarā .
сийлаад̣̇иад̇т̇асамбад̇д̇ияаа саад̇т̇ад̇о, сабхааванируд̇д̇исамбад̇д̇ияаа саб̣яан̃ж̇анад̇о. сувин̃н̃зяяасад̣̇д̣̇аббаяог̇ад̇ааяа уд̇д̇аанабад̣̇ад̇о, сан̣хасукумабхаавзна д̣̇увин̃н̃зяяад̇т̇ад̇ааяа г̇амбхийрад̇т̇ад̇о. синид̣̇д̇хамуд̣̇умад̇хурасад̣̇д̣̇аббаяог̇ад̇ааяа ган̣н̣асукад̇о, вибулависуд̣̇д̇хабзманийяад̇т̇ад̇ааяа хад̣̇аяан̇г̇амад̇о. маанаад̇имаанавид̇хаманзна анад̇д̇уггам̣санад̇о, т̇амбхасаарамбханиммад̣̇д̣̇анзна абаравамбханад̇о. хид̇аад̇хиббааяаббавад̇д̇ияаа барзсам̣ рааг̇абарил̣аахаад̣̇ивуубасаманзна гарун̣аасийд̇алад̇о, гилзсанд̇хагааравид̇хаманзна бан̃н̃аавад̣̇аад̇ад̇о. гаравийгаруд̇аман̃ж̇уд̇ааяа аабаат̇араман̣ийяад̇о, буб̣б̣аабараавируд̣̇д̇хасувисуд̣̇д̇хад̇т̇ад̇ааяа вимад̣̇д̣̇агкамад̇о. аабаат̇араман̣ийяад̇ааяа звам̣ суяяамаанасукад̇о, вимад̣̇д̣̇агкамад̇ааяа хид̇аж̇жхаасаяаббавад̇д̇ид̇ад̇ааяа жа виймам̣сияамаанахид̇ад̇о . звамаад̣̇ийхийд̇и аад̣̇и-сад̣̇д̣̇зна сам̣сааражагганивад̇д̇анад̇о, сад̣̇д̇хаммажаггаббавад̇д̇анад̇о, мижчааваад̣̇авиг̇аманад̇о, саммааваад̣̇абад̇идтаабанад̇о, агусаламууласамуд̣̇д̇харан̣ад̇о, гусаламууласам̣робанад̇о, абааяад̣̇ваарабид̇хаанад̇о, саг̇г̇амогкад̣̇вааравиваран̣ад̇о, барияудтаанавуубасаманад̇о, анусаяасамуг̇гхаад̇анад̇од̇и звамаад̣̇ийнам̣ сан̇г̇ахо д̣̇адтаб̣б̣о.
Sīlādiatthasampattiyā sātthato, sabhāvaniruttisampattiyā sabyañjanato. Suviññeyyasaddappayogatāya uttānapadato, saṇhasukhumabhāvena duviññeyyatthatāya gambhīratthato. Siniddhamudumadhurasaddappayogatāya kaṇṇasukhato, vipulavisuddhapemanīyatthatāya hadayaṅgamato. Mānātimānavidhamanena anattukkaṃsanato, thambhasārambhanimmaddanena aparavambhanato. Hitādhippāyappavattiyā paresaṃ rāgapariḷāhādivūpasamanena karuṇāsītalato, kilesandhakāravidhamanena paññāvadātato. Karavīkarutamañjutāya āpātharamaṇīyato, pubbāparāviruddhasuvisuddhatthatāya vimaddakkhamato. Āpātharamaṇīyatāya evaṃ suyyamānasukhato, vimaddakkhamatāya hitajjhāsayappavattitatāya ca vīmaṃsiyamānahitato. Evamādīhīti ādi-saddena saṃsāracakkanivattanato, saddhammacakkappavattanato, micchāvādavigamanato, sammāvādapatiṭṭhāpanato, akusalamūlasamuddharaṇato, kusalamūlasaṃropanato, apāyadvārapidhānato, saggamokkhadvāravivaraṇato, pariyuṭṭhānavūpasamanato, anusayasamugghātanatoti evamādīnaṃ saṅgaho daṭṭhabbo.
ад̇хомукадтабид̇анд̇и гзнажи ад̇хомукам̣ табид̇ам̣. хздтаамукаж̇аад̇анд̇и сабхаавзнзва хздтаамукаж̇аад̇ам̣. убаримуканд̇и уд̣̇д̇хам̣мукам̣. уг̇гхаадзяяаад̇и вивадам̣ гарзяяа. хад̇т̇з г̇ахзд̇ваад̇и ‘‘бурад̇т̇аабхимуко уд̇д̇араабхимуко ваа г̇ажчаа’’д̇иаад̣̇ийни авад̇ваа хад̇т̇з г̇ахзд̇ваа ‘‘ниссанд̣̇зхам̣ зса маг̇г̇о, звам̣ г̇ажчзяяаа’’д̇и вад̣̇зяяа. гаал̣абагкажаад̇уд̣̇д̣̇асийд̇и гаал̣абагкз жаад̇уд̣̇д̣̇асий.
Adhomukhaṭṭhapitanti kenaci adhomukhaṃ ṭhapitaṃ. Heṭṭhāmukhajātanti sabhāveneva heṭṭhāmukhajātaṃ. Uparimukhanti uddhaṃmukhaṃ. Ugghāṭeyyāti vivaṭaṃ kareyya. Hatthe gahetvāti ‘‘puratthābhimukho uttarābhimukho vā gacchā’’tiādīni avatvā hatthe gahetvā ‘‘nissandehaṃ esa maggo, evaṃ gaccheyyā’’ti vadeyya. Kāḷapakkhacātuddasīti kāḷapakkhe cātuddasī.
ниггуж̇ж̇ид̇ам̣ аад̇хзяяасса анаад̇хаарабхууд̇ам̣ бхааж̇анам̣ аад̇хаарабхааваабаад̣̇анавасзна уггуж̇ж̇зяяа. хздтаамукаж̇аад̇ад̇ааяа сад̣̇д̇хаммавимукам̣, ад̇хомукатабид̇ад̇ааяа асад̣̇д̇хаммз бад̇ид̇анд̇и звам̣ бад̣̇ад̣̇ваяам̣ яат̇аарахам̣ яож̇зд̇аб̣б̣ам̣, на яат̇аасан̇кяам̣. гаамам̣ гаамажчанд̣̇аад̣̇аяоби бадижчаад̣̇агаа нийваран̣абхаавад̇о, мижчаад̣̇идти бана сависзсам̣ бадижчаад̣̇игаа сад̇д̇з мижчаабхинивзсанавасзнаад̇и ааха ‘‘мижчаад̣̇идтиг̇аханабадижчанна’’нд̇и. д̇знааха бхаг̇аваа ‘‘мижчаад̣̇идтибарамаахам̣, бхигкавз, важ̇ж̇ам̣ вад̣̇аамий’’д̇и (а. ни. 1.310). саб̣б̣о абааяаг̇аамимаг̇г̇о гуммаг̇г̇о ‘‘гужчид̇о маг̇г̇о’’д̇и гад̇ваа. саммаад̣̇идтиаад̣̇ийнам̣ уж̇убадибагкад̇ааяа мижчаад̣̇идтиаад̣̇аяо адта мижчад̇д̇ад̇хаммаа мижчаамаг̇г̇о. д̇знзва хи д̇ад̣̇убхаяаббадибагкад̇ам̣ санд̇хааяа ‘‘саг̇г̇амогкамаг̇г̇ам̣ аавигаронд̇знаа’’д̇и вуд̇д̇ам̣. саббиаад̣̇исанниссаяо бад̣̇ийбо на д̇ат̇аа уж̇ж̇ало, яат̇аа д̇зласанниссаяод̇и д̇злабаж̇ж̇од̇аг̇г̇ахан̣ам̣. зд̇зхи барияааязхийд̇и зд̇зхи ниггуж̇ж̇ид̇уггуж̇ж̇анаббадижчаннавиваран̣аад̣̇иубамобамид̇аб̣б̣аагаарзхи.
Nikkujjitaṃ ādheyyassa anādhārabhūtaṃ bhājanaṃ ādhārabhāvāpādanavasena ukkujjeyya. Heṭṭhāmukhajātatāya saddhammavimukhaṃ, adhomukhaṭhapitatāya asaddhamme patitanti evaṃ padadvayaṃ yathārahaṃ yojetabbaṃ, na yathāsaṅkhyaṃ. Kāmaṃ kāmacchandādayopi paṭicchādakā nīvaraṇabhāvato, micchādiṭṭhi pana savisesaṃ paṭicchādikā satte micchābhinivesanavasenāti āha ‘‘micchādiṭṭhigahanapaṭicchanna’’nti. Tenāha bhagavā ‘‘micchādiṭṭhiparamāhaṃ, bhikkhave, vajjaṃ vadāmī’’ti (a. ni. 1.310). Sabbo apāyagāmimaggo kummaggo ‘‘kucchito maggo’’ti katvā. Sammādiṭṭhiādīnaṃ ujupaṭipakkhatāya micchādiṭṭhiādayo aṭṭha micchattadhammā micchāmaggo. Teneva hi tadubhayappaṭipakkhataṃ sandhāya ‘‘saggamokkhamaggaṃ āvikarontenā’’ti vuttaṃ. Sappiādisannissayo padīpo na tathā ujjalo, yathā telasannissayoti telapajjotaggahaṇaṃ.Etehi pariyāyehīti etehi nikkujjitukkujjanappaṭicchannavivaraṇādiupamopamitabbākārehi.
басаннагааранд̇и басаннзхи гаад̇аб̣б̣ам̣ саггаарам̣. саран̣анд̇и бадисаран̣ам̣. д̇знааха ‘‘барааяан̣а’’нд̇и. барааяан̣абхааво жа анад̇т̇анисзд̇ханзна ад̇т̇асамбадибаад̣̇анзна жа ход̇ийд̇и ааха ‘‘агхасса, д̇аад̇аа, хид̇асса жа вид̇хаад̇аа’’д̇и. агхассаад̇и д̣̇угкад̇од̇и вад̣̇анд̇и, баабад̇од̇и бана ад̇т̇о яуд̇д̇о. ниссаггз жзд̇ам̣ саамиважанам̣. зд̇т̇а жа нааяам̣ г̇ами-сад̣̇д̣̇о ний-сад̣̇д̣̇аад̣̇аяо вияа д̣̇вигаммаго, д̇асмаа яат̇аа ‘‘аж̇ам̣ г̇аамам̣ нзд̇ий’’д̇и вужжад̇и, звам̣ ‘‘бхаг̇аванд̇ам̣ саран̣ам̣ г̇ажчаамий’’д̇и вад̇д̇ум̣ на саггаа. ‘‘саран̣анд̇и г̇ажчаамий’’д̇и бана вад̇д̇аб̣б̣ам̣. ид̇и-сад̣̇д̣̇о жзд̇т̇а луд̇д̇анид̣̇д̣̇идто. д̇асса жааяамад̇т̇о – г̇аманан̃жа д̇ад̣̇ад̇хиббааязна бхаж̇анам̣ ж̇аананам̣ ваад̇и д̣̇ассзнд̇о ‘‘ид̇и иминаа ад̇хиббааязнаа’’д̇иаад̣̇имааха. д̇ад̇т̇а бхаж̇аамийд̇иаад̣̇ийсу буримасса буримасса бажчимам̣ бажчимам̣ ад̇т̇аважанам̣. бхаж̇анам̣ ваа саран̣аад̇хиббааязна убасан̇гаманам̣. сзванам̣ санд̇игааважарад̇аа. баяирубаасанам̣ вад̇д̇аббадивад̇д̇агаран̣зна убадтаананд̇и звам̣ саб̣б̣ат̇ааби анан̃н̃асаран̣ад̇ам̣язва д̣̇ийбзд̇и. ‘‘г̇ажчаамий’’д̇и бад̣̇асса б̣уж̇жхаамийд̇и аяамад̇т̇о гат̇ам̣ лаб̣бхад̇ийд̇и ааха ‘‘язсам̣ хий’’д̇иаад̣̇и.
Pasannakāranti pasannehi kātabbaṃ sakkāraṃ. Saraṇanti paṭisaraṇaṃ. Tenāha ‘‘parāyaṇa’’nti. Parāyaṇabhāvo ca anatthanisedhanena atthasampaṭipādanena ca hotīti āha ‘‘aghassa, tātā, hitassa ca vidhātā’’ti. Aghassāti dukkhatoti vadanti, pāpatoti pana attho yutto. Nissakke cetaṃ sāmivacanaṃ. Ettha ca nāyaṃ gami-saddo nī-saddādayo viya dvikammako, tasmā yathā ‘‘ajaṃ gāmaṃ netī’’ti vuccati, evaṃ ‘‘bhagavantaṃ saraṇaṃ gacchāmī’’ti vattuṃ na sakkā. ‘‘Saraṇanti gacchāmī’’ti pana vattabbaṃ. Iti-saddo cettha luttaniddiṭṭho. Tassa cāyamattho – gamanañca tadadhippāyena bhajanaṃ jānanaṃ vāti dassento ‘‘iti iminā adhippāyenā’’tiādimāha. Tattha bhajāmītiādīsu purimassa purimassa pacchimaṃ pacchimaṃ atthavacanaṃ. Bhajanaṃ vā saraṇādhippāyena upasaṅkamanaṃ. Sevanaṃ santikāvacaratā. Payirupāsanaṃ vattappaṭivattakaraṇena upaṭṭhānanti evaṃ sabbathāpi anaññasaraṇataṃyeva dīpeti. ‘‘Gacchāmī’’ti padassa bujjhāmīti ayamattho kathaṃ labbhatīti āha ‘‘yesaṃ hī’’tiādi.
ад̇хиг̇ад̇амаг̇г̇з сажчигад̇анирод̇хзд̇и бад̣̇ад̣̇ваязнаби паладтаа зва д̣̇ассид̇аа, на маг̇г̇адтаад̇и д̇з д̣̇ассзнд̇о ‘‘яат̇аанусидтам̣ бадибаж̇ж̇амаанз жаа’’д̇и ааха. нану жа галяаан̣абут̇уж̇ж̇аноби яат̇аанусидтам̣ бадибаж̇ж̇ад̇ийд̇и вужжад̇ийд̇и? гин̃жааби вужжад̇и, ниббарияааязна бана маг̇г̇адтаа зва д̇ат̇аа вад̇д̇аб̣б̣аа, на ид̇арз саммад̇д̇анияаамоггаманаабхаавад̇о. д̇ат̇аа хи д̇з зва вуд̇д̇аа ‘‘абааязсу абад̇амаанз д̇хаарзд̇ий’’д̇и. саммад̇д̇анияаамоггаманзна хи абааяавинимуд̇д̇исамбхаво. агкааяад̇ийд̇и зд̇т̇а ид̇и-сад̣̇д̣̇о аад̣̇яад̇т̇о, багаарад̇т̇о ваа. д̇зна ‘‘яаавад̇аа, бхигкавз, д̇хаммаа сан̇кад̇аа ваа асан̇кад̇аа ваа, вирааг̇о д̇зсам̣ аг̇г̇амагкааяад̇ий’’д̇и (ид̇иву. 90; а. ни. 4.34) суд̇д̇абад̣̇ам̣ сан̇г̇ан̣хаад̇и, ‘‘вид̇т̇ааро’’д̇и ваа иминаа. зд̇т̇а жа арияамаг̇г̇о нияяаанигад̇ааяа, ниб̣б̣аанам̣ д̇асса д̇ад̣̇ад̇т̇асид̣̇д̇хихзд̇уд̇ааяаад̇и убхаяамзва ниббарияааязна д̇хаммод̇и вуд̇д̇о. ниб̣б̣аанан̃хи аарамман̣абажжаяабхууд̇ам̣ лабхид̇ваа арияамаг̇г̇о д̇ад̣̇ад̇т̇асид̣̇д̇хияаа сам̣вад̇д̇ад̇и, д̇ат̇ааби яасмаа арияапалаанам̣ ‘‘д̇ааяа сад̣̇д̇хааяа авуубасанд̇ааяаа’’д̇иаад̣̇иважанад̇о маг̇г̇зна самужчиннаанам̣ гилзсаанам̣ бадиббассад̣̇д̇хиббахаанагижжад̇ааяа нияяаанаануг̇ун̣ад̇ааяа нияяаанабарияосаанад̇ааяа жа. барияад̇д̇ид̇хаммасса бана нияяаанигад̇хаммасамад̇хиг̇амахзд̇уд̇ааяаад̇и иминаа барияааязна вуд̇д̇анаязна д̇хаммабхааво лаб̣бхад̇и зва. свааяамад̇т̇о баатаарул̣хо зваад̇и д̣̇ассзнд̇о ‘‘на гзвала’’нд̇иаад̣̇имааха.
Adhigatamagge sacchikatanirodheti padadvayenapi phalaṭṭhā eva dassitā, na maggaṭṭhāti te dassento ‘‘yathānusiṭṭhaṃ paṭipajjamāne cā’’ti āha. Nanu ca kalyāṇaputhujjanopi yathānusiṭṭhaṃ paṭipajjatīti vuccatīti? Kiñcāpi vuccati, nippariyāyena pana maggaṭṭhā eva tathā vattabbā, na itare sammattaniyāmokkamanābhāvato. Tathā hi te eva vuttā ‘‘apāyesu apatamāne dhāretī’’ti. Sammattaniyāmokkamanena hi apāyavinimuttisambhavo. Akkhāyatīti ettha iti-saddo ādyattho, pakārattho vā. Tena ‘‘yāvatā, bhikkhave, dhammā saṅkhatā vā asaṅkhatā vā, virāgo tesaṃ aggamakkhāyatī’’ti (itivu. 90; a. ni. 4.34) suttapadaṃ saṅgaṇhāti, ‘‘vitthāro’’ti vā iminā. Ettha ca ariyamaggo niyyānikatāya, nibbānaṃ tassa tadatthasiddhihetutāyāti ubhayameva nippariyāyena dhammoti vutto. Nibbānañhi ārammaṇapaccayabhūtaṃ labhitvā ariyamaggo tadatthasiddhiyā saṃvattati, tathāpi yasmā ariyaphalānaṃ ‘‘tāya saddhāya avūpasantāyā’’tiādivacanato maggena samucchinnānaṃ kilesānaṃ paṭippassaddhippahānakiccatāya niyyānānuguṇatāya niyyānapariyosānatāya ca. Pariyattidhammassa pana niyyānikadhammasamadhigamahetutāyāti iminā pariyāyena vuttanayena dhammabhāvo labbhati eva. Svāyamattho pāṭhāruḷho evāti dassento ‘‘na kevala’’ntiādimāha.
гаамарааг̇о бхаварааг̇од̇и звамаад̣̇ибхзд̣̇о саб̣б̣оби рааг̇о вираж̇ж̇ад̇и бахийяад̇и зд̇знаад̇и рааг̇авирааг̇од̇и маг̇г̇о гат̇ид̇о. зж̇аасан̇каад̇ааяа д̇ан̣хааяа анд̇ониж̇жхааналагкан̣асса согасса жа д̇ад̣̇уббад̇д̇ияам̣ саб̣б̣асо баригкийн̣ад̇д̇аа анзж̇амасоганд̇и палам̣ гат̇ид̇ам̣. аббадигууланд̇и авирод̇хад̣̇ийбанад̇о гзнажи авируд̣̇д̇хам̣, идтам̣ бан̣ийд̇анд̇и ваа ад̇т̇о. баг̇ун̣аруубзна бавад̇д̇ид̇ад̇д̇аа, багадтаг̇ун̣авибхааванад̇о ваа баг̇ун̣ам̣. саб̣б̣ад̇хаммагканд̇хаа гат̇ид̇аад̇и яож̇анаа.
Kāmarāgo bhavarāgoti evamādibhedo sabbopi rāgo virajjati pahīyati etenāti rāgavirāgoti maggo kathito. Ejāsaṅkhātāya taṇhāya antonijjhānalakkhaṇassa sokassa ca taduppattiyaṃ sabbaso parikkhīṇattā anejamasokanti phalaṃ kathitaṃ. Appaṭikūlanti avirodhadīpanato kenaci aviruddhaṃ, iṭṭhaṃ paṇītanti vā attho. Paguṇarūpena pavattitattā, pakaṭṭhaguṇavibhāvanato vā paguṇaṃ. Sabbadhammakkhandhā kathitāti yojanā.
д̣̇идтисийласан̇гхаад̇знаад̇и ‘‘яааяам̣ д̣̇идти арияаа нияяаанигаа нияяаад̇и д̇аггарасса саммаа д̣̇угкагкаяааяа, д̇ат̇ааруубааяа д̣̇идтияаа д̣̇идтисааман̃н̃аг̇ад̇о вихарад̇ий’’д̇и (д̣̇ий. ни. 3.324, 357; ма. ни. 1.492; 3.54; а. ни. 6.12; бари. 274) звам̣ вуд̇д̇ааяа д̣̇идтияаа, ‘‘яаани д̇аани сийлаани акан̣д̣аани ажчид̣̇д̣̇аани асаб̣алаани агаммаасаани бхуж̇иссаани вин̃н̃уббасад̇т̇аани абараамадтаани самаад̇хисам̣вад̇д̇анигаани, д̇ат̇ааруубзхи сийлзхи сийласааман̃н̃аг̇ад̇о вихарад̇ий’’д̇и (д̣̇ий. ни. 3.324; ма. ни. 1.492; 3.54; а. ни. 6.12; бари. 274) жа звам̣ вуд̇д̇аанам̣ сийлаанан̃жа сам̣хад̇абхаавзна, д̣̇идтисийласааман̃н̃знаад̇и ад̇т̇о. сам̣хад̇од̇и гхадид̇о, самзд̇од̇и ад̇т̇о. арияабуг̇г̇алаа хи яад̇т̇а гад̇т̇ажи д̣̇уурз тид̇ааби ад̇д̇ано г̇ун̣асаамаг̇г̇ияаа сам̣хад̇аа зва. адта жа буг̇г̇ала д̇хаммад̣̇асаа д̇зд̇и д̇з бурисаяуг̇авасзна жад̇д̇аароби буг̇г̇алавасзна адтзва арияад̇хаммасса бажжагкад̣̇ассаавид̇ааяа д̇хаммад̣̇асаа. д̇ийн̣и вад̇т̇ууни саран̣анд̇и г̇аманзна д̇игкад̇д̇ум̣ г̇аманзна жа д̇ийн̣и саран̣аг̇аманаани. бадивзд̣̇зсийд̇и ад̇д̇ано хад̣̇аяаг̇ад̇ам̣ ваажааяа бавзд̣̇зси.
Diṭṭhisīlasaṅghātenāti ‘‘yāyaṃ diṭṭhi ariyā niyyānikā niyyāti takkarassa sammā dukkhakkhayāya, tathārūpāya diṭṭhiyā diṭṭhisāmaññagato viharatī’’ti (dī. ni. 3.324, 357; ma. ni. 1.492; 3.54; a. ni. 6.12; pari. 274) evaṃ vuttāya diṭṭhiyā, ‘‘yāni tāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṃvattanikāni, tathārūpehi sīlehi sīlasāmaññagato viharatī’’ti (dī. ni. 3.324; ma. ni. 1.492; 3.54; a. ni. 6.12; pari. 274) ca evaṃ vuttānaṃ sīlānañca saṃhatabhāvena, diṭṭhisīlasāmaññenāti attho. Saṃhatoti ghaṭito, sametoti attho. Ariyapuggalā hi yattha katthaci dūre ṭhitāpi attano guṇasāmaggiyā saṃhatā eva. Aṭṭha ca puggala dhammadasā teti te purisayugavasena cattāropi puggalavasena aṭṭheva ariyadhammassa paccakkhadassāvitāya dhammadasā. Tīṇi vatthūni saraṇanti gamanena tikkhattuṃ gamanena ca tīṇi saraṇagamanāni. Paṭivedesīti attano hadayagataṃ vācāya pavedesi.
саран̣аг̇аманасса висаяаббабхзд̣̇апаласам̣гилзсабхзд̣̇аанам̣ вияа гад̇д̇увибхааванаа д̇ад̇т̇а госаллааяа ход̇ийд̇и саран̣аг̇аманзсу ад̇т̇агосаллад̇т̇ам̣ ‘‘саран̣ам̣, саран̣аг̇аманам̣, яо жа саран̣ам̣ г̇ажчад̇и, саран̣аг̇аманаббабхзд̣̇о, саран̣аг̇аманапалам̣, сам̣гилзсо, бхзд̣̇од̇и аяам̣ вид̇хи взд̣̇ид̇аб̣б̣о’’д̇и вуд̇д̇ам̣ д̇зна винаа саран̣аг̇аманассзва асамбхавад̇о. гасмаа банзд̇т̇а вод̣̇аанам̣ на г̇ахид̇ам̣, нану вод̣̇аанавибхааванааби д̇ад̇т̇а госаллааяа ход̇ийд̇и? сажжамзд̇ам̣, д̇ам̣ бана сам̣гилзсаг̇г̇ахан̣зна ад̇т̇ад̇о д̣̇ийбид̇ам̣ ход̇ийд̇и на г̇ахид̇ам̣. яаани хи нзсам̣ сам̣гилзсагааран̣аани ан̃н̃аан̣аад̣̇ийни, д̇зсам̣ саб̣б̣зна саб̣б̣ам̣ ануббаннаанам̣ ануббаад̣̇анзна, уббаннаанан̃жа бахаанзна вод̣̇аанам̣ ход̇ийд̇и.
Saraṇagamanassa visayappabhedaphalasaṃkilesabhedānaṃ viya kattuvibhāvanā tattha kosallāya hotīti saraṇagamanesu atthakosallatthaṃ ‘‘saraṇaṃ, saraṇagamanaṃ, yo ca saraṇaṃ gacchati, saraṇagamanappabhedo, saraṇagamanaphalaṃ, saṃkileso, bhedoti ayaṃ vidhi veditabbo’’ti vuttaṃ tena vinā saraṇagamanasseva asambhavato. Kasmā panettha vodānaṃ na gahitaṃ, nanu vodānavibhāvanāpi tattha kosallāya hotīti? Saccametaṃ, taṃ pana saṃkilesaggahaṇena atthato dīpitaṃ hotīti na gahitaṃ. Yāni hi nesaṃ saṃkilesakāraṇāni aññāṇādīni, tesaṃ sabbena sabbaṃ anuppannānaṃ anuppādanena, uppannānañca pahānena vodānaṃ hotīti.
хим̣сад̇т̇асса д̇хаад̇усад̣̇д̣̇асса васзнзд̇ам̣ бад̣̇ам̣ д̣̇адтаб̣б̣анд̇и ‘‘хим̣сад̇ийд̇и саран̣а’’нд̇и вад̇ваа д̇ам̣ бана хим̣санам̣ гзсам̣, гат̇ам̣, гасса ваад̇и жод̣̇анам̣ сод̇хзнд̇о ‘‘саран̣аг̇ад̇аана’’нд̇иаад̣̇имааха. д̇ад̇т̇а бхаяанд̇и ваддабхаяам̣. санд̇аасанд̇и жид̇д̇уд̇раасам̣. д̇знзва жзд̇асигад̣̇угкасса г̇ахид̇ад̇д̇аа д̣̇угканд̇и гааяигам̣ д̣̇угкам̣. д̣̇уг̇г̇ад̇ибаригилзсанд̇и д̣̇уг̇г̇ад̇ибарияаабаннам̣ саб̣б̣амби д̣̇угкам̣. д̇аяид̣̇ам̣ саб̣б̣ам̣ барад̇о палагат̇ааяа аави бхависсад̇и. зд̇анд̇и саран̣анд̇и бад̣̇ам̣. звам̣ ависзсад̇о саран̣асад̣̇д̣̇асса бад̣̇ад̇т̇ам̣ д̣̇ассзд̇ваа ид̣̇аани висзсад̇о д̣̇ассзд̇ум̣ ‘‘ат̇а ваа’’д̇иаад̣̇и вуд̇д̇ам̣. хид̇з бавад̇д̇анзнаад̇и ‘‘самбаннасийлаа, бхигкавз, вихарат̇аа’’д̇иаад̣̇инаа (ма. ни. 1.64, 69) ад̇т̇з нияож̇анзна. ахид̇аа нивад̇д̇анзнаад̇и ‘‘баан̣аад̇ибаад̇асса ко баабаго вибааго абхисамбарааяа’’нд̇иаад̣̇инаа аад̣̇ийнавад̣̇ассанаад̣̇имукзна анад̇т̇ад̇о нивад̇д̇анзна. бхаяам̣ хим̣сад̇ийд̇и хид̇аахид̇зсу аббавад̇д̇иббавад̇д̇ихзд̇угам̣ б̣яасанам̣ аббавад̇д̇игаран̣зна винаасзд̇и б̣уд̣̇д̇хо. бхаваганд̇аараа уд̇д̇ааран̣зна маг̇г̇асан̇каад̇о д̇хаммо. ид̇аро ассаасад̣̇аанзна сад̇д̇аанам̣ бхаяам̣ хим̣сад̇ийд̇и яож̇анаа. гаараананд̇и д̣̇аанавасзна бууж̇аавасзна жа убанийд̇аанам̣ саггаараанам̣. вибулапалаббадилаабхагаран̣зна сад̇д̇аанам̣ бхаяам̣ хим̣сад̇и сан̇гхо ануд̇д̇арад̣̇агкин̣зяяабхаавад̇од̇и ад̇хиббааяо. иминааби барияааязнаад̇и иминааби вибхаж̇ид̇ваа вуд̇д̇зна гааран̣зна.
Hiṃsatthassa dhātusaddassa vasenetaṃ padaṃ daṭṭhabbanti ‘‘hiṃsatīti saraṇa’’nti vatvā taṃ pana hiṃsanaṃ kesaṃ, kathaṃ, kassa vāti codanaṃ sodhento ‘‘saraṇagatāna’’ntiādimāha. Tattha bhayanti vaṭṭabhayaṃ. Santāsanti cittutrāsaṃ. Teneva cetasikadukkhassa gahitattā dukkhanti kāyikaṃ dukkhaṃ. Duggatiparikilesanti duggatipariyāpannaṃ sabbampi dukkhaṃ. Tayidaṃ sabbaṃ parato phalakathāya āvi bhavissati. Etanti saraṇanti padaṃ. Evaṃ avisesato saraṇasaddassa padatthaṃ dassetvā idāni visesato dassetuṃ ‘‘atha vā’’tiādi vuttaṃ. Hite pavattanenāti ‘‘sampannasīlā, bhikkhave, viharathā’’tiādinā (ma. ni. 1.64, 69) atthe niyojanena. Ahitā nivattanenāti ‘‘pāṇātipātassa kho pāpako vipāko abhisamparāya’’ntiādinā ādīnavadassanādimukhena anatthato nivattanena. Bhayaṃ hiṃsatīti hitāhitesu appavattippavattihetukaṃ byasanaṃ appavattikaraṇena vināseti buddho. Bhavakantārā uttāraṇena maggasaṅkhāto dhammo. Itaro assāsadānena sattānaṃ bhayaṃ hiṃsatīti yojanā. Kārānanti dānavasena pūjāvasena ca upanītānaṃ sakkārānaṃ. Vipulaphalappaṭilābhakaraṇena sattānaṃ bhayaṃ hiṃsati saṅgho anuttaradakkhiṇeyyabhāvatoti adhippāyo. Imināpi pariyāyenāti imināpi vibhajitvā vuttena kāraṇena.
‘‘саммаасамб̣уд̣̇д̇хо бхаг̇аваа, сваагкаад̇о д̇хаммо, суббадибанно сан̇гхо’’д̇и звам̣ бавад̇д̇о д̇ад̇т̇а рад̇анад̇д̇аяз басаад̣̇о д̇аббасаад̣̇о, д̇ад̣̇зва рад̇д̇анад̇д̇аяам̣ г̇ару зд̇ассаад̇и д̇аг̇г̇ару, д̇аб̣бхааво д̇аг̇г̇аруд̇аа, д̇аббасаад̣̇о жа д̇аг̇г̇аруд̇аа жа д̇аббасаад̣̇ад̇аг̇г̇аруд̇аа. д̇аахи д̇аббасаад̣̇ад̇аг̇г̇аруд̇аахи. вид̇худ̇ад̣̇идтивижигижчаасаммохаассад̣̇д̇хияаад̣̇ид̇ааяа вихад̇агилзсо. д̇ад̣̇зва рад̇анад̇д̇аяам̣ барааяан̣ам̣ г̇ад̇и д̇аан̣ам̣ лзн̣анд̇и звам̣ бавад̇д̇ияаа д̇аббарааяан̣ад̇аагаараббавад̇д̇о жид̇д̇уббаад̣̇о саран̣аг̇аманам̣ саран̣анд̇и г̇ажчад̇и зд̇знаад̇и. д̇ам̣саман̇г̇ийд̇и д̇зна яат̇аавуд̇д̇ажид̇д̇уббаад̣̇зна саманнааг̇ад̇о. звам̣ убзд̇ийд̇и звам̣ бхаж̇ад̇и сзвад̇и баяирубаасад̇и, звам̣ ваа ж̇аанаад̇и б̣уж̇жхад̇ийд̇и звамад̇т̇о взд̣̇ид̇аб̣б̣о.
‘‘Sammāsambuddho bhagavā, svākkhāto dhammo, suppaṭipanno saṅgho’’ti evaṃ pavatto tattha ratanattaye pasādo tappasādo, tadeva rattanattayaṃ garu etassāti taggaru, tabbhāvo taggarutā, tappasādo ca taggarutā ca tappasādataggarutā. Tāhi tappasādataggarutāhi. Vidhutadiṭṭhivicikicchāsammohaassaddhiyāditāya vihatakileso. Tadeva ratanattayaṃ parāyaṇaṃ gati tāṇaṃ leṇanti evaṃ pavattiyā tapparāyaṇatākārappavatto cittuppādosaraṇagamanaṃ saraṇanti gacchati etenāti. Taṃsamaṅgīti tena yathāvuttacittuppādena samannāgato. Evaṃ upetīti evaṃ bhajati sevati payirupāsati, evaṃ vā jānāti bujjhatīti evamattho veditabbo.
зд̇т̇а жа басаад̣̇аг̇г̇ахан̣зна логияасаран̣аг̇аманамааха. д̇ан̃хи басаад̣̇аббад̇хаанам̣. г̇аруд̇ааг̇ахан̣зна логуд̇д̇арам̣. арияаа хи рад̇анад̇д̇аяаг̇ун̣аабхин̃н̃ад̇ааяа баасаан̣ажчад̇д̇ам̣ бияа г̇арум̣ гад̇ваа бассанд̇и, д̇асмаа д̇аббасаад̣̇зна вигкамбханавасзна вихад̇агилзсо, д̇аг̇г̇аруд̇ааяа самужчзд̣̇авасзнаад̇и яож̇зд̇аб̣б̣ам̣ аг̇ааравагаран̣ахзд̇уунам̣ самужчинд̣̇анад̇о. д̇аббарааяан̣ад̇аа банзд̇т̇а д̇аг̇г̇ад̇игад̇аад̇и д̇ааяа жад̇уб̣б̣ид̇хамби вагкамаанам̣ саран̣аг̇аманам̣ г̇ахид̇анд̇и д̣̇адтаб̣б̣ам̣. ависзсзна ваа басаад̣̇аг̇аруд̇аа ж̇од̇ид̇аад̇и басаад̣̇аг̇г̇ахан̣зна авзжжаббасаад̣̇асса ид̇арасса жа г̇ахан̣ам̣, д̇ат̇аа г̇аруд̇ааг̇ахан̣знаад̇и убхаязнаби убхаяам̣ саран̣аг̇аманам̣ яож̇зд̇аб̣б̣ам̣.
Ettha ca pasādaggahaṇena lokiyasaraṇagamanamāha. Tañhi pasādappadhānaṃ. Garutāgahaṇena lokuttaraṃ. Ariyā hi ratanattayaguṇābhiññatāya pāsāṇacchattaṃ piya garuṃ katvā passanti, tasmā tappasādena vikkhambhanavasena vihatakileso, taggarutāya samucchedavasenāti yojetabbaṃ agāravakaraṇahetūnaṃ samucchindanato. Tapparāyaṇatā panettha taggatikatāti tāya catubbidhampi vakkhamānaṃ saraṇagamanaṃ gahitanti daṭṭhabbaṃ. Avisesena vā pasādagarutā jotitāti pasādaggahaṇena aveccappasādassa itarassa ca gahaṇaṃ, tathā garutāgahaṇenāti ubhayenapi ubhayaṃ saraṇagamanaṃ yojetabbaṃ.
маг̇г̇агкан̣з иж̇жхад̇ийд̇и яож̇анаа. ниб̣б̣аанаарамман̣ам̣ худ̇ваад̇и зд̇зна ад̇т̇ад̇о жад̇усажжаад̇хиг̇амо зва логуд̇д̇арасаран̣аг̇амананд̇и д̣̇ассзд̇и. д̇ад̇т̇а хи ниб̣б̣аанад̇хаммо сажчигирияаабхисамаяавасзна, маг̇г̇ад̇хаммо бхааванаабхисамаяавасзна бадивиж̇жхияамааноязва саран̣аг̇аманад̇д̇ам̣ саад̇хзд̇и, б̣уд̣̇д̇хаг̇ун̣аа бана саавагаг̇ожарабхууд̇аа барин̃н̃аабхисамаяавасзна, д̇ат̇аа арияасан̇гхаг̇ун̣аа. д̇знааха ‘‘гижжад̇о сагалзби рад̇анад̇д̇аяз иж̇жхад̇ий’’д̇и. иж̇жханд̇ан̃жа сахзва иж̇жхад̇и, на логияам̣ вияа бадибаадияаа асаммохаббадивзд̇хзна бадивид̣̇д̇хад̇д̇аад̇и ад̇хиббааяо. яз бана вад̣̇анд̇и ‘‘на саран̣аг̇аманам̣ ниб̣б̣аанаарамман̣ам̣ худ̇ваа бавад̇д̇ад̇и, маг̇г̇асса ад̇хиг̇ад̇ад̇д̇аа бана ад̇хиг̇ад̇амзва ход̇и згажжаанам̣ д̇звиж̇ж̇аад̣̇ийнам̣ логияавиж̇ж̇аад̣̇аяо вияаа’’д̇и, д̇зсам̣ логияамзва саран̣аг̇аманам̣ сияаа, на логуд̇д̇арам̣, д̇ан̃жа аяуд̇д̇ам̣ д̣̇увид̇хассаби ижчид̇аб̣б̣ад̇д̇аа.
Maggakkhaṇe ijjhatīti yojanā. Nibbānārammaṇaṃ hutvāti etena atthato catusaccādhigamo eva lokuttarasaraṇagamananti dasseti. Tattha hi nibbānadhammo sacchikiriyābhisamayavasena, maggadhammo bhāvanābhisamayavasena paṭivijjhiyamānoyeva saraṇagamanattaṃ sādheti, buddhaguṇā pana sāvakagocarabhūtā pariññābhisamayavasena, tathā ariyasaṅghaguṇā. Tenāha ‘‘kiccato sakalepi ratanattaye ijjhatī’’ti. Ijjhantañca saheva ijjhati, na lokiyaṃ viya paṭipāṭiyā asammohappaṭivedhena paṭividdhattāti adhippāyo. Ye pana vadanti ‘‘na saraṇagamanaṃ nibbānārammaṇaṃ hutvā pavattati, maggassa adhigatattā pana adhigatameva hoti ekaccānaṃ tevijjādīnaṃ lokiyavijjādayo viyā’’ti, tesaṃ lokiyameva saraṇagamanaṃ siyā, na lokuttaraṃ, tañca ayuttaṃ duvidhassapi icchitabbattā.
д̇анд̇и логияасаран̣аг̇аманам̣. сад̣̇д̇хаабадилаабхо ‘‘саммаасамб̣уд̣̇д̇хо бхаг̇аваа’’д̇иаад̣̇инаа. сад̣̇д̇хаамуулигаад̇и яат̇аавуд̇д̇асад̣̇д̇хаабуб̣б̣ан̇г̇амаа. саммаад̣̇идти б̣уд̣̇д̇хасуб̣уд̣̇д̇хад̇ам̣, д̇хаммасуд̇хаммад̇ам̣, сан̇гхасуббадибад̇д̇ин̃жа логияааваб̣од̇хавасзнзва саммаа н̃ааязна д̣̇ассанад̇о. сад̣̇д̇хаамуулигаа жа саммаад̣̇идтийд̇и зд̇зна сад̣̇д̇хуубаниссаяаа яат̇аавуд̇д̇алагкан̣аа бан̃н̃аа логияасаран̣аг̇амананд̇и д̣̇ассзд̇и. д̇знааха ‘‘д̣̇идтиж̇угамманд̇и вужжад̇ий’’д̇и. д̣̇идтиязва ад̇д̇ано бажжаязхи уж̇у гарийяад̇ийд̇и гад̇ваа , д̣̇идти ваа уж̇у гарийяад̇и зд̇знаад̇и д̣̇идтиж̇угаммам̣, д̇ат̇аабавад̇д̇о жид̇д̇уббаад̣̇о. зван̃жа гад̇ваа ‘‘д̇аббарааяан̣ад̇аагаараббавад̇д̇о жид̇д̇уббаад̣̇о’’д̇и ид̣̇ан̃жа важанам̣ самад̇т̇ид̇ам̣ ход̇и, сад̣̇д̇хаабуб̣б̣ан̇г̇амасаммаад̣̇идтиг̇г̇ахан̣ам̣ бана жид̇д̇уббаад̣̇асса д̇аббад̇хаанад̇ааяаад̇и д̣̇адтаб̣б̣ам̣. сад̣̇д̇хаабадилаабход̇и иминаа маад̇аад̣̇ийхи уссаахид̇ад̣̇аарагаад̣̇ийнам̣ вияа н̃аан̣авиббаяуд̇д̇ам̣ саран̣аг̇аманам̣ д̣̇ассзд̇и, саммаад̣̇идтийд̇и иминаа н̃аан̣асамбаяуд̇д̇ам̣ саран̣аг̇аманам̣.
Tanti lokiyasaraṇagamanaṃ. Saddhāpaṭilābho ‘‘sammāsambuddho bhagavā’’tiādinā. Saddhāmūlikāti yathāvuttasaddhāpubbaṅgamā. Sammādiṭṭhi buddhasubuddhataṃ, dhammasudhammataṃ, saṅghasuppaṭipattiñca lokiyāvabodhavaseneva sammā ñāyena dassanato. Saddhāmūlikā ca sammādiṭṭhīti etena saddhūpanissayā yathāvuttalakkhaṇā paññā lokiyasaraṇagamananti dasseti. Tenāha ‘‘diṭṭhijukammanti vuccatī’’ti. Diṭṭhiyeva attano paccayehi uju karīyatīti katvā , diṭṭhi vā uju karīyati etenāti diṭṭhijukammaṃ, tathāpavatto cittuppādo. Evañca katvā ‘‘tapparāyaṇatākārappavatto cittuppādo’’ti idañca vacanaṃ samatthitaṃ hoti, saddhāpubbaṅgamasammādiṭṭhiggahaṇaṃ pana cittuppādassa tappadhānatāyāti daṭṭhabbaṃ. Saddhāpaṭilābhoti iminā mātādīhi ussāhitadārakādīnaṃ viya ñāṇavippayuttaṃ saraṇagamanaṃ dasseti, sammādiṭṭhīti iminā ñāṇasampayuttaṃ saraṇagamanaṃ.
д̇аяид̣̇ам̣ логияам̣ саран̣аг̇аманам̣. ад̇д̇аа саннияяаад̇ийяад̇и аббийяад̇и барижжаж̇ийяад̇и зд̇знаад̇и ад̇д̇асаннияяаад̇анам̣, яат̇аавуд̇д̇ам̣ д̣̇идтиж̇угаммам̣. д̇ам̣ рад̇анад̇д̇аяам̣ барааяан̣ам̣ бадисаран̣ам̣ зд̇ассаад̇и д̇аббарааяан̣о, буг̇г̇ало жид̇д̇уббаад̣̇о ваа, д̇асса бхааво д̇аббарааяан̣ад̇аа, яат̇аавуд̇д̇ам̣ д̣̇идтиж̇угаммамзва. саран̣анд̇и ад̇хиббааязна сиссабхаавам̣ анд̇зваасигабхаавам̣ убаг̇ажчад̇и зд̇знаад̇и сиссабхаавуубаг̇аманам̣. саран̣аг̇аманаад̇хиббааязнзва бан̣ибад̇ад̇и зд̇знаад̇и бан̣ибаад̇о. саб̣б̣ад̇т̇а яат̇аавуд̇д̇ад̣̇идтиж̇угаммавасзнзва ад̇т̇о взд̣̇ид̇аб̣б̣о. ад̇д̇абарижжаж̇ананд̇и сам̣саарад̣̇угканиссаран̣ад̇т̇ам̣ ад̇д̇ано ад̇т̇абхаавасса барижжаж̇анам̣. зса наяо сзсзсуби. б̣уд̣̇д̇хаад̣̇ийнам̣язваад̇и авад̇хааран̣ам̣ ад̇д̇асаннияяаад̇анаад̣̇ийсуби д̇ад̇т̇а д̇ад̇т̇а вад̇д̇аб̣б̣ам̣. зван̃хи д̇ад̣̇ан̃н̃анивад̇д̇анам̣ гад̇ам̣ ход̇и.
Tayidaṃ lokiyaṃ saraṇagamanaṃ. Attā sanniyyātīyati appīyati pariccajīyati etenāti attasanniyyātanaṃ, yathāvuttaṃ diṭṭhijukammaṃ. Taṃ ratanattayaṃ parāyaṇaṃ paṭisaraṇaṃ etassāti tapparāyaṇo, puggalo cittuppādo vā, tassa bhāvo tapparāyaṇatā, yathāvuttaṃ diṭṭhijukammameva. Saraṇanti adhippāyena sissabhāvaṃ antevāsikabhāvaṃ upagacchati etenāti sissabhāvūpagamanaṃ. Saraṇagamanādhippāyeneva paṇipatati etenāti paṇipāto. Sabbattha yathāvuttadiṭṭhijukammavaseneva attho veditabbo. Attapariccajananti saṃsāradukkhanissaraṇatthaṃ attano atthabhāvassa pariccajanaṃ. Esa nayo sesesupi. Buddhādīnaṃyevāti avadhāraṇaṃ attasanniyyātanādīsupi tattha tattha vattabbaṃ. Evañhi tadaññanivattanaṃ kataṃ hoti.
звам̣ ад̇д̇асаннияяаад̇анаад̣̇ийни згзна багаарзна д̣̇ассзд̇ваа ид̣̇аани абарзхиби багаарзхи д̣̇ассзд̇ум̣ ‘‘абижаа’’д̇иаад̣̇и аарад̣̇д̇хам̣. д̇зна барияааяанд̇арзхиби ад̇д̇асаннияяаад̇анам̣ гад̇амзва ход̇и ад̇т̇асса абхиннад̇д̇аад̇и д̣̇ассзд̇и. аал̣авагаад̣̇ийнанд̇и аад̣̇и-сад̣̇д̣̇зна саад̇ааг̇ирихзмавад̇аад̣̇ийнам̣ сан̇г̇ахо д̣̇адтаб̣б̣о. нану жзд̇з аал̣авагаад̣̇аяо маг̇г̇знзва ааг̇ад̇асаран̣аг̇аманаа, гат̇ам̣ д̇зсам̣ д̇аббарааяан̣ад̇аасаран̣аг̇аманам̣ вуд̇д̇анд̇и? маг̇г̇знааг̇ад̇асаран̣аг̇аманзхиби ‘‘со ахам̣ вижариссаами…бз… суд̇хаммад̇ам̣ (сам̣. ни. 1.246; су. ни. 194). д̇з маяам̣ вижариссаама, г̇аамаа г̇аамам̣ наг̇аа наг̇ам̣…бз… суд̇хаммад̇а’’нд̇и (су. ни. 182) жа д̇зхи д̇аббарааяан̣ад̇аагаарасса бавзд̣̇ид̇ад̇д̇аа д̇ат̇аа вуд̇д̇ам̣.
Evaṃ attasanniyyātanādīni ekena pakārena dassetvā idāni aparehipi pakārehi dassetuṃ ‘‘apicā’’tiādi āraddhaṃ. Tena pariyāyantarehipi attasanniyyātanaṃ katameva hoti atthassa abhinnattāti dasseti. Āḷavakādīnanti ādi-saddena sātāgirihemavatādīnaṃ saṅgaho daṭṭhabbo. Nanu cete āḷavakādayo maggeneva āgatasaraṇagamanā, kathaṃ tesaṃ tapparāyaṇatāsaraṇagamanaṃ vuttanti? Maggenāgatasaraṇagamanehipi ‘‘so ahaṃ vicarissāmi…pe… sudhammataṃ (saṃ. ni. 1.246; su. ni. 194). Te mayaṃ vicarissāma, gāmā gāmaṃ nagā nagaṃ…pe… sudhammata’’nti (su. ni. 182) ca tehi tapparāyaṇatākārassa paveditattā tathā vuttaṃ.
со банзса н̃аад̇и…бз… васзнаад̇и зд̇т̇а н̃аад̇ивасзна, бхаяавасзна, аажарияавасзна, д̣̇агкин̣зяяавасзнаад̇и бажжзгам̣ ‘‘васзнаа’’д̇и бад̣̇ам̣ яож̇зд̇аб̣б̣ам̣. д̇ад̇т̇а н̃аад̇ивасзнаад̇и н̃аад̇ибхаававасзна. звам̣ сзсзсуби . д̣̇агкин̣зяяабан̣ибаад̇знаад̇и д̣̇агкин̣зяяад̇аахзд̇угзна бан̣ибад̇анзнаад̇и ад̇т̇о. ид̇арзхийд̇и н̃аад̇ибхааваад̣̇ивасаббавад̇д̇зхи д̇ийхи бан̣ибаад̇зхи. ид̇арзхийд̇иаад̣̇инаа сан̇кзбад̇о вуд̇д̇амад̇т̇ам̣ вид̇т̇аарад̇о д̣̇ассзд̇ум̣ ‘‘д̇асмаа’’д̇иаад̣̇и вуд̇д̇ам̣. ванд̣̇ад̇ийд̇и бан̣ибаад̇асса лагкан̣аважанам̣ . зваруубанд̇и д̣̇идтад̇хаммигам̣ санд̇хааяа вад̣̇ад̇и. самбарааяиган̃хи нияяаанигам̣ ваа анияяаанигам̣ ваа анусаасаним̣ бажжаасийсанд̇о д̣̇агкин̣зяяабан̣ибаад̇амзва гарод̇ийд̇и ад̇хиббааяо. саран̣аг̇аманаббабхзд̣̇од̇и саран̣аг̇аманавибхааг̇о.
So panesa ñāti…pe… vasenāti ettha ñātivasena, bhayavasena, ācariyavasena, dakkhiṇeyyavasenāti paccekaṃ ‘‘vasenā’’ti padaṃ yojetabbaṃ. Tattha ñātivasenāti ñātibhāvavasena. Evaṃ sesesupi . Dakkhiṇeyyapaṇipātenāti dakkhiṇeyyatāhetukena paṇipatanenāti attho. Itarehīti ñātibhāvādivasappavattehi tīhi paṇipātehi. Itarehītiādinā saṅkhepato vuttamatthaṃ vitthārato dassetuṃ ‘‘tasmā’’tiādi vuttaṃ. Vandatīti paṇipātassa lakkhaṇavacanaṃ . Evarūpanti diṭṭhadhammikaṃ sandhāya vadati. Samparāyikañhi niyyānikaṃ vā aniyyānikaṃ vā anusāsaniṃ paccāsīsanto dakkhiṇeyyapaṇipātameva karotīti adhippāyo. Saraṇagamanappabhedoti saraṇagamanavibhāgo.
арияамаг̇г̇о зва логуд̇д̇арам̣ саран̣аг̇амананд̇и ааха ‘‘жад̇д̇аари сааман̃н̃апалаани вибаагапала’’нд̇и. саб̣б̣ад̣̇угкагкаяод̇и сагаласса ваддад̣̇угкасса ануббаад̣̇анирод̇хо. зд̇анд̇и ‘‘жад̇д̇аари арияасажжаани, саммаббан̃н̃ааяа бассад̇ий’’д̇и (д̇ха. ба. 190) звам̣ вуд̇д̇ам̣ арияасажжаанам̣ д̣̇ассанам̣.
Ariyamaggo eva lokuttaraṃ saraṇagamananti āha ‘‘cattāri sāmaññaphalāni vipākaphala’’nti. Sabbadukkhakkhayoti sakalassa vaṭṭadukkhassa anuppādanirodho. Etanti ‘‘cattāri ariyasaccāni, sammappaññāya passatī’’ti (dha. pa. 190) evaṃ vuttaṃ ariyasaccānaṃ dassanaṃ.
нижжад̇о анубаг̇аманаад̣̇ивасзнаад̇и нижжанд̇и аг̇г̇ахан̣аад̣̇ивасзна. адтаананд̇и хзд̇уббадигкзбо. анавагаасод̇и бажжаяаббадигкзбо. убхаязнаби гааран̣амзва бадигкибад̇и. яанд̇и язна гааран̣зна. д̣̇идтисамбаннод̇и маг̇г̇ад̣̇идтияаа саманнааг̇ад̇о сод̇аабанно. ган̃жи сан̇кааранд̇и жад̇убхуумагзсу сан̇кад̇асан̇каарзсу згасан̇каарамби. нижжад̇о убаг̇ажчзяяаад̇и нижжод̇и г̇ан̣хзяяа. сукад̇о убаг̇ажчзяяаад̇и ‘‘зганд̇асукий ад̇д̇аа ход̇и арог̇о барам̣ маран̣аа’’д̇и (д̣̇ий. ни. 1.76, 79) звам̣ ад̇д̇ад̣̇идтивасзна сукад̇о г̇аахам̣ санд̇хааязд̇ам̣ вуд̇д̇ам̣. д̣̇идтивиббаяуд̇д̇ажид̇д̇зна бана арияасааваго барил̣аахавуубасаманад̇т̇ам̣ мад̇д̇ахад̇т̇ибарид̇аасид̇о вияа жогкаб̣раахман̣о уггаарабхуумим̣ ган̃жи сан̇каарам̣ сукад̇о убаг̇ажчад̇и. ад̇д̇аваарз гасин̣аад̣̇ибан̃н̃ад̇д̇исан̇г̇ахад̇т̇ам̣ ‘‘сан̇каара’’нд̇и авад̇ваа ‘‘ган̃жи д̇хамма’’нд̇и вуд̇д̇ам̣. имзсуби таанзсу жад̇убхуумагавасзнзва барижчзд̣̇о взд̣̇ид̇аб̣б̣о д̇збхуумагавасзнзва ваа. яам̣ яан̃хи бут̇уж̇ж̇ано г̇аахавасзна г̇ан̣хаад̇и, д̇ад̇о д̇ад̇о арияасааваго г̇аахам̣ винивзтзд̇и.
Niccato anupagamanādivasenāti niccanti aggahaṇādivasena. Aṭṭhānanti hetuppaṭikkhepo. Anavakāsoti paccayappaṭikkhepo. Ubhayenapi kāraṇameva paṭikkhipati. Yanti yena kāraṇena. Diṭṭhisampannoti maggadiṭṭhiyā samannāgato sotāpanno. Kañci saṅkhāranti catubhūmakesu saṅkhatasaṅkhāresu ekasaṅkhārampi. Niccato upagaccheyyāti niccoti gaṇheyya. Sukhato upagaccheyyāti ‘‘ekantasukhī attā hoti arogo paraṃ maraṇā’’ti (dī. ni. 1.76, 79) evaṃ attadiṭṭhivasena sukhato gāhaṃ sandhāyetaṃ vuttaṃ. Diṭṭhivippayuttacittena pana ariyasāvako pariḷāhavūpasamanatthaṃ mattahatthiparitāsito viya cokkhabrāhmaṇo ukkārabhūmiṃ kañci saṅkhāraṃ sukhato upagacchati. Attavāre kasiṇādipaññattisaṅgahatthaṃ ‘‘saṅkhāra’’nti avatvā ‘‘kañci dhamma’’nti vuttaṃ. Imesupi ṭhānesu catubhūmakavaseneva paricchedo veditabbo tebhūmakavaseneva vā. Yaṃ yañhi puthujjano gāhavasena gaṇhāti, tato tato ariyasāvako gāhaṃ viniveṭheti.
маад̇аранд̇иаад̣̇ийсу ж̇анигаа маад̇аа, ж̇анаго бид̇аа, мануссабхууд̇о кийн̣аасаво арахаад̇и ад̇хиббзд̇о. гим̣ бана арияасааваго ан̃н̃ам̣ ж̇ийвид̇аа воробзяяаад̇и? зд̇амби адтаанам̣, бут̇уж̇ж̇анабхаавасса бана махаасааваж̇ж̇абхаавад̣̇ассанад̇т̇ам̣ арияабхаавасса жа палад̣̇ассанад̇т̇ам̣ звам̣ вуд̇д̇ам̣. бад̣̇удтажид̇д̇од̇и вад̇хагажид̇д̇зна бад̣̇удтажид̇д̇о. лохид̇ам̣ уббаад̣̇зяяаад̇и ж̇ийвамаанагасарийрз куд̣̇д̣̇агамагкигааяа биванамад̇д̇амби лохид̇ам̣ уббаад̣̇зяяа. сан̇гхам̣ бхинд̣̇зяяаад̇и самаанасам̣ваасагам̣ самаанасиймааяам̣ тид̇ам̣ сан̇гхам̣ ‘‘гаммзна уд̣̇д̣̇зсзна вохаранд̇о ануссааванзна салаагаг̇г̇аахзнаа’’д̇и (бари. 458) звам̣ вуд̇д̇зхи бан̃жахи гааран̣зхи бхинд̣̇зяяа. ан̃н̃ам̣ сад̇т̇ааранд̇и ан̃н̃ам̣ д̇ид̇т̇агарам̣ ‘‘аяам̣ мз сад̇т̇аа’’д̇и звам̣ г̇ан̣хзяяаад̇и нзд̇ам̣ таанам̣ виж̇ж̇ад̇ийд̇и ад̇т̇о.
Mātarantiādīsu janikā mātā, janako pitā, manussabhūto khīṇāsavo arahāti adhippeto. Kiṃ pana ariyasāvako aññaṃ jīvitā voropeyyāti? Etampi aṭṭhānaṃ, puthujjanabhāvassa pana mahāsāvajjabhāvadassanatthaṃ ariyabhāvassa ca phaladassanatthaṃ evaṃ vuttaṃ. Paduṭṭhacittoti vadhakacittena paduṭṭhacitto. Lohitaṃ uppādeyyāti jīvamānakasarīre khuddakamakkhikāya pivanamattampi lohitaṃ uppādeyya. Saṅghaṃ bhindeyyāti samānasaṃvāsakaṃ samānasīmāyaṃ ṭhitaṃ saṅghaṃ ‘‘kammena uddesena voharanto anussāvanena salākaggāhenā’’ti (pari. 458) evaṃ vuttehi pañcahi kāraṇehi bhindeyya. Aññaṃ satthāranti aññaṃ titthakaraṃ ‘‘ayaṃ me satthā’’ti evaṃ gaṇheyyāti netaṃ ṭhānaṃ vijjatīti attho.
на д̇з г̇амиссанд̇и абааяанд̇и д̇з б̣уд̣̇д̇хам̣ саран̣ам̣ г̇ад̇аа д̇аннимид̇д̇ам̣ абааяам̣ на г̇амиссанд̇и, д̣̇звагааяам̣ бана барибуурзссанд̇ийд̇и ад̇т̇о. д̣̇асахи таанзхийд̇и д̣̇асахи гааран̣зхи. ад̇хиг̇ан̣ханд̇ийд̇и ад̇хибхаванд̇и.
Na tegamissanti apāyanti te buddhaṃ saraṇaṃ gatā tannimittaṃ apāyaṃ na gamissanti, devakāyaṃ pana paripūressantīti attho. Dasahi ṭhānehīti dasahi kāraṇehi. Adhigaṇhantīti adhibhavanti.
взлаамасуд̇д̇аад̣̇ивасзнаад̇и зд̇т̇а ‘‘гарийсасса жад̇уд̇т̇абхааг̇аббамаан̣аанам̣ жад̇ураасийд̇исахассасан̇каанам̣ суван̣н̣абаад̇ируубияабаад̇игам̣сабаад̇ийнам̣ яат̇ааггамам̣ руубияасуван̣н̣ахиран̃н̃абуураанам̣ саб̣б̣аалан̇гаараббадиман̣д̣ид̇аанам̣ жад̇ураасийд̇ияаа хад̇т̇исахассаанам̣, жад̇ураасийд̇ияаа ассасахассаанам̣, жад̇ураасийд̇ияаа рат̇асахассаанам̣, жад̇ураасийд̇ияаа д̇хзнусахассаанам̣, жад̇ураасийд̇ияаа ган̃н̃аасахассаанам̣, жад̇ураасийд̇ияаа баллан̇гасахассаанам̣, жад̇ураасийд̇ияаа вад̇т̇агодисахассаанам̣, абаримаан̣асса жа каж̇ж̇абхож̇ж̇аад̣̇ибхзд̣̇асса аахаарасса барижжаж̇анавасзна сад̇д̇амаасаад̇хигаани сад̇д̇а сам̣важчараани ниранд̇арам̣ бавад̇д̇авзлаамамахаад̣̇аанад̇о згасса сод̇аабаннасса д̣̇иннад̣̇аанам̣ махабпалад̇арам̣. д̇ад̇о сад̇ам̣ сод̇аабаннаанам̣ д̣̇иннад̣̇аанад̇о згасса сагад̣̇ааг̇аамино, д̇ад̇о згасса анааг̇аамино, д̇ад̇о згасса арахад̇о, д̇ад̇о згасса бажжзгаб̣уд̣̇д̇хасса, д̇ад̇о саммаасамб̣уд̣̇д̇хасса, д̇ад̇о б̣уд̣̇д̇хаббамукасса сан̇гхасса д̣̇иннад̣̇аанам̣ махабпалад̇арам̣, д̇ад̇о жаад̇уд̣̇д̣̇исам̣ сан̇гхам̣ уд̣̇д̣̇исса вихаарагаран̣ам̣, д̇ад̇о саран̣аг̇аманам̣ махабпалад̇ара’’нд̇и имамад̇т̇ам̣ багаасзнд̇асса взлаамасуд̇д̇асса (а. ни. 9.20) васзна. вуд̇д̇ан̃хзд̇ам̣ ‘‘яам̣, г̇ахабад̇и, взлаамо б̣раахман̣о д̣̇аанам̣ ад̣̇ааси махаад̣̇аанам̣, яо згам̣ д̣̇идтисамбаннам̣ бхож̇зяяа, ид̣̇ам̣ д̇ад̇о махабпалад̇ара’’нд̇иаад̣̇и (а. ни. 9.20). взлаамасуд̇д̇аад̣̇ийд̇и аад̣̇и-сад̣̇д̣̇зна аг̇г̇аббасаад̣̇асуд̇д̇аад̣̇ийнам̣ (а. ни. 4.34; ид̇иву. 90) сан̇г̇ахо д̣̇адтаб̣б̣о.
Velāmasuttādivasenāti ettha ‘‘karīsassa catutthabhāgappamāṇānaṃ caturāsītisahassasaṅkhānaṃ suvaṇṇapātirūpiyapātikaṃsapātīnaṃ yathākkamaṃ rūpiyasuvaṇṇahiraññapūrānaṃ sabbālaṅkārappaṭimaṇḍitānaṃ caturāsītiyā hatthisahassānaṃ, caturāsītiyā assasahassānaṃ, caturāsītiyā rathasahassānaṃ, caturāsītiyā dhenusahassānaṃ, caturāsītiyā kaññāsahassānaṃ, caturāsītiyā pallaṅkasahassānaṃ, caturāsītiyā vatthakoṭisahassānaṃ, aparimāṇassa ca khajjabhojjādibhedassa āhārassa pariccajanavasena sattamāsādhikāni satta saṃvaccharāni nirantaraṃ pavattavelāmamahādānato ekassa sotāpannassa dinnadānaṃ mahapphalataraṃ. Tato sataṃ sotāpannānaṃ dinnadānato ekassa sakadāgāmino, tato ekassa anāgāmino, tato ekassa arahato, tato ekassa paccekabuddhassa, tato sammāsambuddhassa, tato buddhappamukhassa saṅghassa dinnadānaṃ mahapphalataraṃ, tato cātuddisaṃ saṅghaṃ uddissa vihārakaraṇaṃ, tato saraṇagamanaṃ mahapphalatara’’nti imamatthaṃ pakāsentassa velāmasuttassa (a. ni. 9.20) vasena. Vuttañhetaṃ ‘‘yaṃ, gahapati, velāmo brāhmaṇo dānaṃ adāsi mahādānaṃ, yo ekaṃ diṭṭhisampannaṃ bhojeyya, idaṃ tato mahapphalatara’’ntiādi (a. ni. 9.20). Velāmasuttādīti ādi-saddena aggappasādasuttādīnaṃ (a. ni. 4.34; itivu. 90) saṅgaho daṭṭhabbo.
ан̃н̃аан̣ам̣ вад̇т̇уд̇д̇аяасса г̇ун̣аанам̣ аж̇аананам̣ д̇ад̇т̇а саммохо, ‘‘б̣уд̣̇д̇хо ну ко, на ну ко’’д̇иаад̣̇инаа вижигижчаа сам̣саяо. мижчаан̃аан̣ам̣ д̇асса г̇ун̣аанам̣ аг̇ун̣абхаавабаригаббанзна вибарийд̇аг̇г̇аахо. аад̣̇и-сад̣̇д̣̇зна анаад̣̇арааг̇аараваад̣̇ийнам̣ сан̇г̇ахо. на махааж̇уд̇иганд̇и на уж̇ж̇алам̣, абарисуд̣̇д̇хам̣ абарияод̣̇аад̇анд̇и ад̇т̇о. на махаавибпааранд̇и анул̣аарам̣. сааваж̇ж̇од̇и д̣̇идтид̇ан̣хаад̣̇ивасзна сад̣̇осо. логияам̣ саран̣аг̇аманам̣ сигкаасамаад̣̇аанам̣ вияа аг̇г̇ахид̇агаалабарижчзд̣̇ам̣ ж̇ийвид̇абарияанд̇амзва ход̇и, д̇асмаа д̇асса канд̇хабхзд̣̇зна бхзд̣̇од̇и ааха ‘‘анаваж̇ж̇о гаалагирияааяаа’’д̇и. сод̇и анаваж̇ж̇о саран̣аг̇аманабхзд̣̇о. сад̇иби анаваж̇ж̇ад̇д̇з идтапалоби на ход̇ийд̇и ааха ‘‘апало’’д̇и. гасмаа? авибаагад̇д̇аа. на хи д̇ам̣ агусаланд̇и.
Aññāṇaṃ vatthuttayassa guṇānaṃ ajānanaṃ tattha sammoho, ‘‘buddho nu kho, na nu kho’’tiādinā vicikicchā saṃsayo. Micchāñāṇaṃ tassa guṇānaṃ aguṇabhāvaparikappanena viparītaggāho. Ādi-saddena anādarāgāravādīnaṃ saṅgaho. Na mahājutikanti na ujjalaṃ, aparisuddhaṃ apariyodātanti attho. Na mahāvipphāranti anuḷāraṃ. Sāvajjoti diṭṭhitaṇhādivasena sadoso. Lokiyaṃ saraṇagamanaṃ sikkhāsamādānaṃ viya aggahitakālaparicchedaṃ jīvitapariyantameva hoti, tasmā tassa khandhabhedena bhedoti āha ‘‘anavajjo kālakiriyāyā’’ti. Soti anavajjo saraṇagamanabhedo. Satipi anavajjatte iṭṭhaphalopi na hotīti āha ‘‘aphalo’’ti. Kasmā? Avipākattā. Na hi taṃ akusalanti.
го убаасагод̇и саруубабужчаа, д̇асмаа ‘‘гим̣лагкан̣о убаасаго’’д̇и вуд̇д̇ам̣ ход̇и. гасмаад̇и хзд̇убужчаа. д̇зна гзна бавад̇д̇инимид̇д̇зна убаасагасад̣̇д̣̇о д̇асмим̣ буг̇г̇алз нирул̣ход̇и д̣̇ассзд̇и . д̇знааха ‘‘гасмаа убаасагод̇и вужжад̇ий’’д̇и. сад̣̇д̣̇асса абхид̇хзяяо бавад̇д̇инимид̇д̇ам̣ д̇ад̣̇ад̇т̇асса д̇аб̣бхаавагааран̣ам̣. гимасса сийланд̇и гийд̣̇исам̣ асса убаасагасса сийлам̣, гид̇д̇агзна сийлзнааяам̣ сийласамбанно наама ход̇ийд̇и ад̇т̇о. го ааж̇ийвод̇и го асса саммааааж̇ийво? со бана мижчааж̇ийвасса бариваж̇ж̇анзна ход̇ийд̇и соби вибхаж̇ийяад̇ийд̇и. гаа вибад̇д̇ийд̇и гаа сийласса, ааж̇ийвасса ваа вибад̇д̇и. ананд̇арасса хи вид̇хи ваа бадисзд̇хо ваад̇и. гаа самбад̇ийд̇и зд̇т̇ааби зсзва наяо.
Ko upāsakoti sarūpapucchā, tasmā ‘‘kiṃlakkhaṇo upāsako’’ti vuttaṃ hoti. Kasmāti hetupucchā. Tena kena pavattinimittena upāsakasaddo tasmiṃ puggale niruḷhoti dasseti . Tenāha ‘‘kasmā upāsakoti vuccatī’’ti. Saddassa abhidheyyo pavattinimittaṃ tadatthassa tabbhāvakāraṇaṃ. Kimassa sīlanti kīdisaṃ assa upāsakassa sīlaṃ, kittakena sīlenāyaṃ sīlasampanno nāma hotīti attho. Ko ājīvoti ko assa sammāājīvo? So pana micchājīvassa parivajjanena hotīti sopi vibhajīyatīti. Kā vipattīti kā sīlassa, ājīvassa vā vipatti. Anantarassa hi vidhi vā paṭisedho vāti. Kā sampatīti etthāpi eseva nayo.
яо гожийд̇и кад̇д̇ияаад̣̇ийсу яо гожи. д̇зна саран̣аг̇аманамзвзд̇т̇а гааран̣ам̣, на ж̇аад̇иаад̣̇ивисзсод̇и д̣̇ассзд̇и. убаасанад̇од̇и д̇знзва саран̣аг̇аманзна д̇ад̇т̇а жа саггажжагирияааяа аад̣̇араг̇аараваб̣ахумаанаад̣̇ияог̇зна баяирубаасанад̇о. взраман̣ияод̇и взрам̣ вужжад̇и баан̣аад̇ибаад̇аад̣̇ид̣̇уссийляам̣, д̇асса ман̣анад̇о хананад̇о винаасанад̇о взраман̣ияо, бан̃жа вирад̇ияо вирад̇иббад̇хаанад̇д̇аа д̇асса сийласса. д̇знзвааха ‘‘бадивирад̇о ход̇ий’’д̇и.
Yo kocīti khattiyādīsu yo koci. Tena saraṇagamanamevettha kāraṇaṃ, na jātiādivisesoti dasseti. Upāsanatoti teneva saraṇagamanena tattha ca sakkaccakiriyāya ādaragāravabahumānādiyogena payirupāsanato. Veramaṇiyoti veraṃ vuccati pāṇātipātādidussīlyaṃ, tassa maṇanato hananato vināsanato veramaṇiyo, pañca viratiyo viratippadhānattā tassa sīlassa. Tenevāha ‘‘paṭivirato hotī’’ti.
мижчааван̣иж̇ж̇аад̇и на саммааван̣иж̇ж̇аа аяуд̇д̇аван̣иж̇ж̇аа асааруббаван̣иж̇ж̇аа. бахааяаад̇и агаран̣знзва баж̇ахид̇ваа. д̇хаммзнаад̇и д̇хаммад̇о анабзд̇зна. д̇зна ан̃н̃амби ад̇хаммигам̣ ж̇ийвигам̣ бадигкибад̇и. самзнаад̇и ависамзна. д̇зна гааяависамаад̣̇ид̣̇ужжарид̇ам̣ важ̇ж̇зд̇ваа гааяасамаад̣̇инаа сужарид̇зна ааж̇ийвам̣ д̣̇ассзд̇и. сад̇т̇аван̣иж̇ж̇аад̇и ааяуд̇хабхан̣д̣ам̣ гад̇ваа ваа гаарзд̇ваа ваа яат̇аагад̇ам̣ ваа бадилабхид̇ваа д̇асса виггаяо. сад̇д̇аван̣иж̇ж̇аад̇и мануссавиггаяо. мам̣саван̣иж̇ж̇аад̇и суунагаараад̣̇аяо вияа миг̇асуугараад̣̇игз босзд̇ваа мам̣сам̣ самбаад̣̇зд̇ваа виггаяо. маж̇ж̇аван̣иж̇ж̇аад̇и яам̣ гин̃жи маж̇ж̇ам̣ яож̇зд̇ваа д̇асса виггаяо. висаван̣иж̇ж̇аад̇и висам̣ яож̇зд̇ваа висам̣ г̇ахзд̇ваа ваа д̇асса виггаяо. д̇ад̇т̇а сад̇т̇аван̣иж̇ж̇аа баробарод̇ханимид̇д̇ад̇ааяа агаран̣ийяаа вуд̇д̇аа. сад̇д̇аван̣иж̇ж̇аа абхуж̇иссабхаавагаран̣ад̇о, мам̣сависаван̣иж̇ж̇аа вад̇хахзд̇уд̇о, маж̇ж̇аван̣иж̇ж̇аа бамаад̣̇адтаанад̇о.
Micchāvaṇijjāti na sammāvaṇijjā ayuttavaṇijjā asāruppavaṇijjā. Pahāyāti akaraṇeneva pajahitvā. Dhammenāti dhammato anapetena. Tena aññampi adhammikaṃ jīvikaṃ paṭikkhipati. Samenāti avisamena. Tena kāyavisamādiduccaritaṃ vajjetvā kāyasamādinā sucaritena ājīvaṃ dasseti. Satthavaṇijjāti āyudhabhaṇḍaṃ katvā vā kāretvā vā yathākataṃ vā paṭilabhitvā tassa vikkayo. Sattavaṇijjāti manussavikkayo. Maṃsavaṇijjāti sūnakārādayo viya migasūkarādike posetvā maṃsaṃ sampādetvā vikkayo. Majjavaṇijjāti yaṃ kiñci majjaṃ yojetvā tassa vikkayo. Visavaṇijjāti visaṃ yojetvā visaṃ gahetvā vā tassa vikkayo. Tattha satthavaṇijjā paroparodhanimittatāya akaraṇīyā vuttā. Sattavaṇijjā abhujissabhāvakaraṇato, maṃsavisavaṇijjā vadhahetuto, majjavaṇijjā pamādaṭṭhānato.
д̇ассзваад̇и бан̃жавзраман̣илагкан̣асса сийласса жзва бан̃жамижчааван̣иж̇ж̇аалагкан̣асса ааж̇ийвасса жа. вибад̇д̇ийд̇и бхзд̣̇о багобо жа. яааяаад̇и яааяа бадибад̇д̇ияаа. жан̣д̣аалод̇и убаасагажан̣д̣аало. маланд̇и убаасагамалам̣. бадигудтод̇и убаасаганихийно. б̣уд̣̇д̇хаад̣̇ийсу гаммагаммапалзсу жа сад̣̇д̇хаавибарияааяо ассад̣̇д̇хияам̣ мижчаад̇химогко, яат̇аавуд̇д̇зна ассад̣̇д̇хиязна саманнааг̇ад̇о ассад̣̇д̇хо. яат̇аавуд̇д̇асийлавибад̇д̇иааж̇ийвавибад̇д̇ивасзна д̣̇уссийло. ‘‘иминаа д̣̇идтаад̣̇инаа ид̣̇ам̣ наама ман̇г̇алам̣ ход̇ий’’д̇и – звам̣ б̣аалаж̇анабаригаббид̇агод̇уухаласан̇каад̇зна д̣̇идтасуд̇амуд̇аман̇г̇алзна саманнааг̇ад̇о год̇уухаламан̇г̇алиго. ман̇г̇алам̣ бажжзд̇ийд̇и д̣̇идтаман̇г̇алаад̣̇ибхзд̣̇ам̣ ман̇г̇аламзва бад̇д̇ияааяад̇и. но гамманд̇и гаммассагад̇ам̣ но бад̇д̇ияааяад̇и. ид̇о б̣ахид̣̇д̇хаад̇и ид̇о саб̣б̣ан̃н̃уб̣уд̣̇д̇хасаасанад̇о б̣ахид̣̇д̇хаа б̣аахирагасамаяз. д̣̇агкин̣зяяам̣ бариязсад̇ийд̇и д̣̇уббадибаннам̣ д̣̇агкин̣аарахасан̃н̃ий г̇авзсад̇и. буб̣б̣агаарам̣ гарод̇ийд̇и д̣̇аанамаананаад̣̇игам̣ гусалагирияам̣ батамад̇арам̣ гарод̇и. зд̇т̇а жа д̣̇агкин̣зяяабариязсанабуб̣б̣агаарз згам̣ гад̇ваа бан̃жа д̇хаммаа взд̣̇ид̇аб̣б̣аа.
Tassevāti pañcaveramaṇilakkhaṇassa sīlassa ceva pañcamicchāvaṇijjālakkhaṇassa ājīvassa ca. Vipattīti bhedo pakopo ca. Yāyāti yāya paṭipattiyā. Caṇḍāloti upāsakacaṇḍālo. Malanti upāsakamalaṃ. Paṭikuṭṭhoti upāsakanihīno. Buddhādīsu kammakammaphalesu ca saddhāvipariyāyo assaddhiyaṃ micchādhimokkho, yathāvuttena assaddhiyena samannāgato assaddho. Yathāvuttasīlavipattiājīvavipattivasena dussīlo. ‘‘Iminā diṭṭhādinā idaṃ nāma maṅgalaṃ hotī’’ti – evaṃ bālajanaparikappitakotūhalasaṅkhātena diṭṭhasutamutamaṅgalena samannāgato kotūhalamaṅgaliko. Maṅgalaṃ paccetīti diṭṭhamaṅgalādibhedaṃ maṅgalameva pattiyāyati. No kammanti kammassakataṃ no pattiyāyati. Ito bahiddhāti ito sabbaññubuddhasāsanato bahiddhā bāhirakasamaye. Dakkhiṇeyyaṃ pariyesatīti duppaṭipannaṃ dakkhiṇārahasaññī gavesati. Pubbakāraṃ karotīti dānamānanādikaṃ kusalakiriyaṃ paṭhamataraṃ karoti. Ettha ca dakkhiṇeyyapariyesanapubbakāre ekaṃ katvā pañca dhammā veditabbā.
вибад̇д̇ияам̣ вуд̇д̇авибарияааязна самбад̇д̇и взд̣̇ид̇аб̣б̣аа. аяам̣ бана висзсо – жад̇уннамби барисаанам̣ рад̇иж̇ананадтзна убаасагова рад̇анам̣ убаасагарад̇анам̣. г̇ун̣асобхаагид̇д̇исад̣̇д̣̇асуг̇анд̇хад̇аахи убаасагова бад̣̇умам̣ убаасагабад̣̇умам̣. д̇ат̇аа убаасагабун̣д̣арийго.
Vipattiyaṃ vuttavipariyāyena sampatti veditabbā. Ayaṃ pana viseso – catunnampi parisānaṃ ratijananaṭṭhena upāsakova ratanaṃ upāsakaratanaṃ. Guṇasobhākittisaddasugandhatāhi upāsakova padumaṃ upāsakapadumaṃ. Tathā upāsakapuṇḍarīko.
аад̣̇имхийд̇и аад̣̇иад̇т̇з. годияанд̇и барияанд̇агодияам̣. вихаараг̇г̇знаад̇и оварагагодтаасзна, ‘‘имасмим̣ г̇аб̣бхз васанд̇аанам̣ ид̣̇ам̣ наама палам̣ баабун̣аад̇ий’’д̇иаад̣̇ийнаа д̇ам̣ д̇ам̣ васанадтаанагодтаасзнаад̇и ад̇т̇о. аж̇ж̇ад̇анд̇и аж̇ж̇а ижжзва ад̇т̇о.
Ādimhīti ādiatthe. Koṭiyanti pariyantakoṭiyaṃ. Vihāraggenāti ovarakakoṭṭhāsena, ‘‘imasmiṃ gabbhe vasantānaṃ idaṃ nāma phalaṃ pāpuṇātī’’tiādīnā taṃ taṃ vasanaṭṭhānakoṭṭhāsenāti attho. Ajjatanti ajja icceva attho.
баан̣зхи убзд̇анд̇и иминаа д̇асса саран̣аг̇аманасса аабаан̣агодигад̇ам̣ д̣̇ассзнд̇о ‘‘яаава мз ж̇ийвид̇ам̣ бавад̇д̇ад̇ий’’д̇иаад̣̇ийни вад̇ваа буна ж̇ийвид̇знаби д̇ам̣ вад̇т̇уд̇д̇аяам̣ бадибууж̇знд̇о саран̣аг̇аманам̣ рагкаамийд̇и уббаннам̣ д̇асса б̣раахман̣асса ад̇хиббааяам̣ вибхаавзнд̇о ‘‘ахан̃хий’’д̇иаад̣̇имааха. баан̣зхи убзд̇анд̇и хи яаава мз баан̣аа д̇харанд̇и, д̇аава саран̣ам̣ убзд̇ам̣. убзнд̇о жа на ваажаамад̇д̇зна на згаваарам̣ жид̇д̇уббаад̣̇амад̇д̇зна, ат̇а ко баан̣аанам̣ барижжаж̇анавасзнаби яааваж̇ийвам̣ убзд̇анд̇и звамзд̇т̇а ад̇т̇о взд̣̇ид̇аб̣б̣о.
Pāṇehiupetanti iminā tassa saraṇagamanassa āpāṇakoṭikataṃ dassento ‘‘yāva me jīvitaṃ pavattatī’’tiādīni vatvā puna jīvitenapi taṃ vatthuttayaṃ paṭipūjento saraṇagamanaṃ rakkhāmīti uppannaṃ tassa brāhmaṇassa adhippāyaṃ vibhāvento ‘‘ahañhī’’tiādimāha. Pāṇehi upetanti hi yāva me pāṇā dharanti, tāva saraṇaṃ upetaṃ. Upento ca na vācāmattena na ekavāraṃ cittuppādamattena, atha kho pāṇānaṃ pariccajanavasenapi yāvajīvaṃ upetanti evamettha attho veditabbo.
17-19. сад̇д̇амз ж̇аан̣уссон̣ийд̇и нзд̇ам̣ д̇асса маад̇аабид̇уухи гад̇ам̣ наамам̣, абижа ко таананд̇араббадилаабхалад̣̇д̇ханд̇и д̣̇ассзнд̇о ааха ‘‘ж̇аан̣уссон̣ийд̇и таананд̇арам̣ гираа’’д̇иаад̣̇и. згам̣ таананд̇аранд̇и згам̣ бурохид̇адтаанам̣. ун̣хийсааад̣̇игагуд̇хабхан̣д̣зхи сад̣̇д̇хим̣ лад̣̇д̇хам̣ д̇ат̇аа жасса ран̃н̃аа д̣̇иннанд̇и вад̣̇анд̇и. д̇знааха ‘‘ран̃н̃о санд̇игз жа лад̣̇д̇хаж̇аан̣уссон̣исаггаарад̇д̇аа’’д̇и. сзсамзд̇т̇а уд̇д̇аанамзва. адтаманавамзсу над̇т̇и вад̇д̇аб̣б̣ам̣.
17-19. Sattame jāṇussoṇīti netaṃ tassa mātāpitūhi kataṃ nāmaṃ, apica kho ṭhānantarappaṭilābhaladdhanti dassento āha ‘‘jāṇussoṇīti ṭhānantaraṃ kirā’’tiādi. Ekaṃ ṭhānantaranti ekaṃ purohitaṭṭhānaṃ. Uṇhīsaādikakudhabhaṇḍehi saddhiṃ laddhaṃ tathā cassa raññā dinnanti vadanti. Tenāha ‘‘rañño santike ca laddhajāṇussoṇisakkārattā’’ti. Sesamettha uttānameva. Aṭṭhamanavamesu natthi vattabbaṃ.
20-21. д̣̇асамз д̣̇уннигкид̇д̇анд̇и д̣̇удту нигкид̇д̇ам̣ бад̣̇абажжаабхадтам̣ гад̇ваа манаси табид̇ам̣. баж̇ж̇ад̇и н̃ааяад̇и ад̇т̇о зд̇знаад̇и бад̣̇ам̣, ад̇т̇ам̣ б̣яан̃ж̇аяад̇и багаасзд̇ийд̇и б̣яан̃ж̇анам̣, бад̣̇амзва. д̇знзвааха ‘‘уббадибаадияаа…бз… б̣яан̃ж̇ананд̇и вужжад̇ий’’д̇и. бад̣̇асамуд̣̇ааяаб̣яад̇ирзгзна висум̣ баал̣и наама над̇т̇ийд̇и ааха ‘‘убхаяамзд̇ам̣ баал̣ияаава наама’’нд̇и. багадтаанан̃хи важанаббаб̣анд̇хаанам̣ аал̣иязва баал̣ийд̇и вужжад̇и. сзсамзд̇т̇а згаад̣̇асаман̃жа уд̇д̇аанад̇т̇амзва.
20-21. Dasame dunnikkhittanti duṭṭhu nikkhittaṃ padapaccābhaṭṭhaṃ katvā manasi ṭhapitaṃ. Pajjati ñāyati attho etenāti padaṃ, atthaṃ byañjayati pakāsetīti byañjanaṃ, padameva. Tenevāha ‘‘uppaṭipāṭiyā…pe… byañjananti vuccatī’’ti. Padasamudāyabyatirekena visuṃ pāḷi nāma natthīti āha ‘‘ubhayametaṃ pāḷiyāva nāma’’nti. Pakaṭṭhānañhi vacanappabandhānaṃ āḷiyeva pāḷīti vuccati. Sesamettha ekādasamañca uttānatthameva.
ад̇хигаран̣аваг̇г̇аван̣н̣анаа нидтид̇аа.
Adhikaraṇavaggavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 2. ад̇хигаран̣аваг̇г̇о • 2. Adhikaraṇavaggo
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 2. ад̇хигаран̣аваг̇г̇аван̣н̣анаа • 2. Adhikaraṇavaggavaṇṇanā
