| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
அதி⁴கரணவூபஸமனஸமத²கதா²
Adhikaraṇavūpasamanasamathakathā
228. யாவதிகா ச பி⁴க்கூ² கம்மப்பத்தாதி எத்த² சதுவக்³க³கரணே கம்மே சத்தாரோ, பஞ்சவக்³க³கரணே பஞ்ச, த³ஸவக்³க³கரணே த³ஸ, வீஸதிவக்³க³கரணே வீஸதி பி⁴க்கூ² கம்மப்பத்தாதி வேதி³தப்³பா³.
228.Yāvatikā ca bhikkhū kammappattāti ettha catuvaggakaraṇe kamme cattāro, pañcavaggakaraṇe pañca, dasavaggakaraṇe dasa, vīsativaggakaraṇe vīsati bhikkhū kammappattāti veditabbā.
230. ஸுபரிக்³க³ஹிதந்தி ஸுட்டு² பரிக்³க³ஹிதங் கத்வா ஸம்படிச்சி²தப்³ப³ங். ஸம்படிச்சி²த்வா ச பன ‘‘அஜ்ஜ ப⁴ண்ட³கங் தோ⁴வாம, அஜ்ஜ பத்தங் பசாம, அஜ்ஜேகோ பலிபோ³தோ⁴ அத்தீ²’’தி மானநிக்³க³ஹத்தா²ய கதிபாஹங் அதிக்காமேதப்³ப³ங்.
230.Supariggahitanti suṭṭhu pariggahitaṃ katvā sampaṭicchitabbaṃ. Sampaṭicchitvā ca pana ‘‘ajja bhaṇḍakaṃ dhovāma, ajja pattaṃ pacāma, ajjeko palibodho atthī’’ti mānaniggahatthāya katipāhaṃ atikkāmetabbaṃ.
231. அனந்தானி சேவ ப⁴ஸ்ஸானி ஜாயந்தீதி அபரிமாணானி இதோ சிதோ ச வசனானி உப்பஜ்ஜந்தி. ‘‘பா⁴ஸானீ’’திபி பாடோ², அயமேவத்தோ². உப்³பா³ஹிகாய ஸம்மன்னிதப்³போ³தி அபலோகெத்வா வா ஸம்மன்னிதப்³போ³ பரதோ வுத்தாய ஞத்திது³தியாய வா கம்மவாசாய. ஏவங் ஸம்மதேஹி பன பி⁴க்கூ²ஹி விஸுங் வா நிஸீதி³த்வா தஸ்ஸாயேவ வா பரிஸாய ‘‘அஞ்ஞேஹி அஸம்மதேஹி ந கிஞ்சி கதே²தப்³ப³’’ந்தி ஸாவெத்வா தங் அதி⁴கரணங் வினிச்சி²தப்³ப³ங்.
231.Anantāni ceva bhassāni jāyantīti aparimāṇāni ito cito ca vacanāni uppajjanti. ‘‘Bhāsānī’’tipi pāṭho, ayamevattho. Ubbāhikāya sammannitabboti apaloketvā vā sammannitabbo parato vuttāya ñattidutiyāya vā kammavācāya. Evaṃ sammatehi pana bhikkhūhi visuṃ vā nisīditvā tassāyeva vā parisāya ‘‘aññehi asammatehi na kiñci kathetabba’’nti sāvetvā taṃ adhikaraṇaṃ vinicchitabbaṃ.
233. தத்ராஸ்ஸாதி தஸ்ஸங் பரிஸதி ப⁴வெய்ய. நேவ ஸுத்தங் ஆக³தந்தி ந மாதிகா ஆக³தா. நோ ஸுத்தவிப⁴ங்கோ³தி வினயோபி ந பகு³ணோ. ப்³யஞ்ஜனச்சா²யாய அத்த²ங் படிபா³ஹதீதி ப்³யஞ்ஜனமத்தமேவ க³ஹெத்வா அத்த²ங் படிஸேதே⁴தி. ஜாதரூபரஜதகெ²த்தவத்து²படிக்³க³ஹணாதீ³ஸு வினயத⁴ரேஹி பி⁴க்கூ²ஹி ஆபத்தியா காரியமானே தி³ஸ்வா ‘‘கிங் இமே ஆபத்தியா காரேத², ‘நனு ஜாதரூபரஜதபடிக்³க³ஹணா படிவிரதோ ஹோதீ’தி ஏவங் ஸுத்தே படிவிரதிமத்தமேவ வுத்தங், நத்தி² எத்த² ஆபத்தீ’’தி வத³தி. அபரோ த⁴ம்மகதி²கோ ஸுத்தஸ்ஸ ஆக³தத்தா ஓலம்பெ³த்வா நிவாஸெந்தானங் ஆபத்தியா ஆரோபியமானாய ‘‘கிங் இமேஸங் ஆபத்திங் ரோபேத², ‘நனு பரிமண்ட³லங் நிவாஸெஸ்ஸாமீதி ஸிக்கா² கரணீயா’தி ஏவங் ஸிக்கா²கரணமத்தமேவெத்த² வுத்தங், நத்தி² எத்த² ஆபத்தீ’’தி வத³தி.
233.Tatrāssāti tassaṃ parisati bhaveyya. Neva suttaṃ āgatanti na mātikā āgatā. No suttavibhaṅgoti vinayopi na paguṇo. Byañjanacchāyāya atthaṃ paṭibāhatīti byañjanamattameva gahetvā atthaṃ paṭisedheti. Jātarūparajatakhettavatthupaṭiggahaṇādīsu vinayadharehi bhikkhūhi āpattiyā kāriyamāne disvā ‘‘kiṃ ime āpattiyā kāretha, ‘nanu jātarūparajatapaṭiggahaṇā paṭivirato hotī’ti evaṃ sutte paṭiviratimattameva vuttaṃ, natthi ettha āpattī’’ti vadati. Aparo dhammakathiko suttassa āgatattā olambetvā nivāsentānaṃ āpattiyā āropiyamānāya ‘‘kiṃ imesaṃ āpattiṃ ropetha, ‘nanu parimaṇḍalaṃ nivāsessāmīti sikkhā karaṇīyā’ti evaṃ sikkhākaraṇamattamevettha vuttaṃ, natthi ettha āpattī’’ti vadati.
234. யதா² ப³ஹுதரா பி⁴க்கூ²தி எத்த² ஏகேனபி அதி⁴கா ப³ஹுதராவ கோ பன வாதோ³ த்³வீஹி தீஹீதி.
234.Yathā bahutarā bhikkhūti ettha ekenapi adhikā bahutarāva ko pana vādo dvīhi tīhīti.
அதி⁴கரணவூபஸமனஸமத²கதா² நிட்டி²தா.
Adhikaraṇavūpasamanasamathakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
ஸம்முகா²வினயோ • Sammukhāvinayo
உப்³பா³ஹிகாயவூபஸமனங் • Ubbāhikāyavūpasamanaṃ
யேபு⁴ய்யஸிகாவினயோ • Yebhuyyasikāvinayo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அதி⁴கரணவூபஸமனஸமத²கதா²வண்ணனா • Adhikaraṇavūpasamanasamathakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அதி⁴கரணகதா²வண்ணனா • Adhikaraṇakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அதி⁴கரணவூபஸமனஸமத²கதா²தி³வண்ணனா • Adhikaraṇavūpasamanasamathakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 9. அதி⁴கரணவூபஸமனஸமத²கதா² • 9. Adhikaraṇavūpasamanasamathakathā
