| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
9. அதி⁴கரணவூபஸமனஸமத²கதா²
9. Adhikaraṇavūpasamanasamathakathā
228. சதுவக்³க³கரணே கம்மேதி ஸீமஸம்முதிஆதி³கம்மே. பஞ்சவக்³க³கரணேதி பச்சந்திமேஸு ஜனபதே³ஸு உபஸம்பதா³தி³கம்மே. த³ஸவக்³க³கரணேதி மஜ்ஜி²மேஸு ஜனபதே³ஸு உபஸம்பத³கம்மே. வீஸதிவக்³க³கரணேதி அப்³பா⁴னகம்மே. கம்மப்பத்தாதி கம்மஸ்ஸ பத்தா யுத்தா அனுரூபா.
228.Catuvaggakaraṇe kammeti sīmasammutiādikamme. Pañcavaggakaraṇeti paccantimesu janapadesu upasampadādikamme. Dasavaggakaraṇeti majjhimesu janapadesu upasampadakamme. Vīsativaggakaraṇeti abbhānakamme. Kammappattāti kammassa pattā yuttā anurūpā.
230. ஸம்படிச்சி²தப்³ப³ந்தி படிக்³க³ண்ஹிதப்³ப³ங். ஸம்படிச்சி²த்வா ச பன அதிக்காமேதப்³ப³ந்தி ஸம்ப³ந்தோ⁴. ப⁴ண்ட³கந்தி சீவராதி³ப⁴ண்ட³கங். மானநிக்³க³ஹத்தா²யாதி ப⁴ண்ட³னஜாதானங் மானஸ்ஸ நிக்³க³ஹத்தா²ய. கதிபாஹந்தி கதிபயாஹங், த்³வீஹதீஹந்தி அத்தோ².
230.Sampaṭicchitabbanti paṭiggaṇhitabbaṃ. Sampaṭicchitvā ca pana atikkāmetabbanti sambandho. Bhaṇḍakanti cīvarādibhaṇḍakaṃ. Mānaniggahatthāyāti bhaṇḍanajātānaṃ mānassa niggahatthāya. Katipāhanti katipayāhaṃ, dvīhatīhanti attho.
231. அனந்தானி சேவ ப⁴ஸ்ஸானீதி எத்த² அனந்தஸத்³தோ³ அபரிமாணஸத்³தே³ன அத்த²தோ ஏகோதி ஆஹ ‘‘அபரிமாணானீ’’தி. ‘‘வசனானீ’’தி இமினா ப⁴ஸ்ஸஸத்³தோ³ வசனபரியாயோதி த³ஸ்ஸேதி. உப்³பா³ஹிகாய ஸம்மனிதப்³போ³தி கேன ஸம்மனிதப்³போ³தி ஆஹ ‘‘அபலோகெத்வா வா’’திஆதி³. இமினா அபலோகனகம்மேன வா ஞத்திது³தியகம்மேன வா ஸம்மனிதப்³போ³தி த³ஸ்ஸேதி. அனந்தானி ப⁴ஸ்ஸானி த⁴ம்மகதி²கங் உத்³த⁴ரித்வா பா³ஹதி படிஸேதே⁴தி இமாய ஸம்முதியாதி உப்³பா³ஹிகா, தாய. ஏவங் ஸம்மதேஹி பன பி⁴க்கூ²ஹி வினிச்சி²தப்³ப³ந்தி ஸம்ப³ந்தோ⁴. விஸுங் நிஸீதி³த்வா தஸ்ஸாயேவ பரிஸாய நிஸீதி³த்வா வாதி யோஜனா. அஞ்ஞேஹீதி ஸம்மதபி⁴க்கூ²ஹி அஞ்ஞேஹி.
231.Anantāni ceva bhassānīti ettha anantasaddo aparimāṇasaddena atthato ekoti āha ‘‘aparimāṇānī’’ti. ‘‘Vacanānī’’ti iminā bhassasaddo vacanapariyāyoti dasseti. Ubbāhikāya sammanitabboti kena sammanitabboti āha ‘‘apaloketvā vā’’tiādi. Iminā apalokanakammena vā ñattidutiyakammena vā sammanitabboti dasseti. Anantāni bhassāni dhammakathikaṃ uddharitvā bāhati paṭisedheti imāya sammutiyāti ubbāhikā, tāya. Evaṃ sammatehi pana bhikkhūhi vinicchitabbanti sambandho. Visuṃ nisīditvā tassāyeva parisāya nisīditvā vāti yojanā. Aññehīti sammatabhikkhūhi aññehi.
233. தத்ரஸ்ஸாதி எத்த² தத்ர அஸ்ஸாதி பத³விபா⁴க³ங் கத்வா தஸத்³தோ³ பரிஸவிஸயோ பஸித்³த⁴விஸயோ, அஸ்ஸஸத்³தோ³ ஆக்²யாதிகோதி ஆஹ ‘‘தஸ்ஸங் பரிஸதி ப⁴வெய்யா’’தி. ‘‘நேவ ஸுத்தங் ஆக³த’’ந்தி ஸாமஞ்ஞதோ வுத்தேபி ‘‘நோ ஸுத்தவிப⁴ங்கோ³’’தி வக்க²மானத்தா மாதிகங் ஸந்தா⁴ய வுத்தந்தி ஆஹ ‘‘ந மாதிகா ஆக³தா’’தி. வினயோபீதி க²ந்த⁴கவினயோபி. பிஸத்³தே³ன ஸுத்தவிப⁴ங்க³ங் அபெக்க²தி. ப்³யஞ்ஜனச்சா²யாயாதி எத்த² சா²யாஸத்³தோ³ படிபி³ம்பே³ ச பபா⁴ய ச ஹோதீதி ஆஹ ‘‘ப்³யஞ்ஜனமத்தமேவா’’தி, ப்³யஞ்ஜனபடிபி³ம்பி³கப்³யஞ்ஜனபபா⁴வந்தபூ⁴தங் அத்த²ங் அக்³க³ஹெத்வா ப்³யஞ்ஜனபடிபி³ம்ப³ப்³யஞ்ஜனபபா⁴மத்தமேவ க³ஹெத்வாதி அதி⁴ப்பாயோ. ‘‘படிஸேதே⁴தீ’’தி இமினா படிபா³ஹஸத்³தோ³ படிஸேத⁴த்தோ²யேவ, ந மத்³த³னத்தோ²தி த³ஸ்ஸேதி. படிபா³ஹனாகாரங் த³ஸ்ஸெந்தோ ஆஹ ‘‘ஜாதரூபரஜதகெ²த்தவத்து²படிக்³க³ஹணாதீ³ஸூ’’திஆதி³. கிந்தி கேன காரணேன, கஸ்மா காரணா வா. இமேதி ஜாதரூபாதி³படிக்³கா³ஹகே பி⁴க்கூ². காரேதா²தி தும்ஹே காரெய்யாத². எய்யாத²ஸ்ஸ ஹி ஏதா²தே³ஸோ. புச்சா²யங் ஸத்தமீவிப⁴த்தி ஹோதி. ஸுத்தேதி ஸுத்தந்தபிடகே. அபரோ த⁴ம்மகதி²கோ வத³தீதி ஸம்ப³ந்தோ⁴. இமேஸந்தி ஓலம்பெ³த்வா நிவாஸெந்தானங். எத்தா²தி ஓலம்பெ³த்வா நிவாஸனே.
233.Tatrassāti ettha tatra assāti padavibhāgaṃ katvā tasaddo parisavisayo pasiddhavisayo, assasaddo ākhyātikoti āha ‘‘tassaṃ parisati bhaveyyā’’ti. ‘‘Neva suttaṃ āgata’’nti sāmaññato vuttepi ‘‘no suttavibhaṅgo’’ti vakkhamānattā mātikaṃ sandhāya vuttanti āha ‘‘na mātikā āgatā’’ti. Vinayopīti khandhakavinayopi. Pisaddena suttavibhaṅgaṃ apekkhati. Byañjanacchāyāyāti ettha chāyāsaddo paṭibimbe ca pabhāya ca hotīti āha ‘‘byañjanamattamevā’’ti, byañjanapaṭibimbikabyañjanapabhāvantabhūtaṃ atthaṃ aggahetvā byañjanapaṭibimbabyañjanapabhāmattameva gahetvāti adhippāyo. ‘‘Paṭisedhetī’’ti iminā paṭibāhasaddo paṭisedhatthoyeva, na maddanatthoti dasseti. Paṭibāhanākāraṃ dassento āha ‘‘jātarūparajatakhettavatthupaṭiggahaṇādīsū’’tiādi. Kinti kena kāraṇena, kasmā kāraṇā vā. Imeti jātarūpādipaṭiggāhake bhikkhū. Kārethāti tumhe kāreyyātha. Eyyāthassa hi ethādeso. Pucchāyaṃ sattamīvibhatti hoti. Sutteti suttantapiṭake. Aparo dhammakathiko vadatīti sambandho. Imesanti olambetvā nivāsentānaṃ. Etthāti olambetvā nivāsane.
234. ப³ஹுதரா பி⁴க்கூ²தி எத்த² த்³விகு³ணதிகு³ணாதி³னா அதி⁴கா ஏவ ப³ஹுதரா நாமாதி ஆஹ ‘‘ஏகேனபி அதி⁴கா ப³ஹுதராவா’’தி. ‘‘கோ பன வாதோ³’’திஆதி³னா ‘‘ஏகேனபீ’’தி எத்த² பிஸத்³த³ஸ்ஸ க³ரஹத்த²ங் த³ஸ்ஸேதி.
234.Bahutarā bhikkhūti ettha dviguṇatiguṇādinā adhikā eva bahutarā nāmāti āha ‘‘ekenapi adhikā bahutarāvā’’ti. ‘‘Ko pana vādo’’tiādinā ‘‘ekenapī’’ti ettha pisaddassa garahatthaṃ dasseti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
ஸம்முகா²வினயோ • Sammukhāvinayo
உப்³பா³ஹிகாயவூபஸமனங் • Ubbāhikāyavūpasamanaṃ
யேபு⁴ய்யஸிகாவினயோ • Yebhuyyasikāvinayo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / அதி⁴கரணவூபஸமனஸமத²கதா² • Adhikaraṇavūpasamanasamathakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அதி⁴கரணவூபஸமனஸமத²கதா²வண்ணனா • Adhikaraṇavūpasamanasamathakathāvaṇṇanā
