| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
অধিকরণৰূপসমনসমথকথা
Adhikaraṇavūpasamanasamathakathā
২২৮. যাৰতিকা চ ভিক্খূ কম্মপ্পত্তাতি এত্থ চতুৰগ্গকরণে কম্মে চত্তারো, পঞ্চৰগ্গকরণে পঞ্চ, দসৰগ্গকরণে দস, ৰীসতিৰগ্গকরণে ৰীসতি ভিক্খূ কম্মপ্পত্তাতি ৰেদিতব্বা।
228.Yāvatikā ca bhikkhū kammappattāti ettha catuvaggakaraṇe kamme cattāro, pañcavaggakaraṇe pañca, dasavaggakaraṇe dasa, vīsativaggakaraṇe vīsati bhikkhū kammappattāti veditabbā.
২৩০. সুপরিগ্গহিতন্তি সুট্ঠু পরিগ্গহিতং কত্ৰা সম্পটিচ্ছিতব্বং। সম্পটিচ্ছিত্ৰা চ পন ‘‘অজ্জ ভণ্ডকং ধোৰাম, অজ্জ পত্তং পচাম, অজ্জেকো পলিবোধো অত্থী’’তি মাননিগ্গহত্থায কতিপাহং অতিক্কামেতব্বং।
230.Supariggahitanti suṭṭhu pariggahitaṃ katvā sampaṭicchitabbaṃ. Sampaṭicchitvā ca pana ‘‘ajja bhaṇḍakaṃ dhovāma, ajja pattaṃ pacāma, ajjeko palibodho atthī’’ti mānaniggahatthāya katipāhaṃ atikkāmetabbaṃ.
২৩১. অনন্তানি চেৰ ভস্সানি জাযন্তীতি অপরিমাণানি ইতো চিতো চ ৰচনানি উপ্পজ্জন্তি। ‘‘ভাসানী’’তিপি পাঠো, অযমেৰত্থো। উব্বাহিকায সম্মন্নিতব্বোতি অপলোকেত্ৰা ৰা সম্মন্নিতব্বো পরতো ৰুত্তায ঞত্তিদুতিযায ৰা কম্মৰাচায। এৰং সম্মতেহি পন ভিক্খূহি ৰিসুং ৰা নিসীদিত্ৰা তস্সাযেৰ ৰা পরিসায ‘‘অঞ্ঞেহি অসম্মতেহি ন কিঞ্চি কথেতব্ব’’ন্তি সাৰেত্ৰা তং অধিকরণং ৰিনিচ্ছিতব্বং।
231.Anantāni ceva bhassāni jāyantīti aparimāṇāni ito cito ca vacanāni uppajjanti. ‘‘Bhāsānī’’tipi pāṭho, ayamevattho. Ubbāhikāya sammannitabboti apaloketvā vā sammannitabbo parato vuttāya ñattidutiyāya vā kammavācāya. Evaṃ sammatehi pana bhikkhūhi visuṃ vā nisīditvā tassāyeva vā parisāya ‘‘aññehi asammatehi na kiñci kathetabba’’nti sāvetvā taṃ adhikaraṇaṃ vinicchitabbaṃ.
২৩৩. তত্রাস্সাতি তস্সং পরিসতি ভৰেয্য। নেৰ সুত্তং আগতন্তি ন মাতিকা আগতা। নো সুত্তৰিভঙ্গোতি ৰিনযোপি ন পগুণো। ব্যঞ্জনচ্ছাযায অত্থং পটিবাহতীতি ব্যঞ্জনমত্তমেৰ গহেত্ৰা অত্থং পটিসেধেতি। জাতরূপরজতখেত্তৰত্থুপটিগ্গহণাদীসু ৰিনযধরেহি ভিক্খূহি আপত্তিযা কারিযমানে দিস্ৰা ‘‘কিং ইমে আপত্তিযা কারেথ, ‘ননু জাতরূপরজতপটিগ্গহণা পটিৰিরতো হোতী’তি এৰং সুত্তে পটিৰিরতিমত্তমেৰ ৰুত্তং, নত্থি এত্থ আপত্তী’’তি ৰদতি। অপরো ধম্মকথিকো সুত্তস্স আগতত্তা ওলম্বেত্ৰা নিৰাসেন্তানং আপত্তিযা আরোপিযমানায ‘‘কিং ইমেসং আপত্তিং রোপেথ, ‘ননু পরিমণ্ডলং নিৰাসেস্সামীতি সিক্খা করণীযা’তি এৰং সিক্খাকরণমত্তমেৰেত্থ ৰুত্তং, নত্থি এত্থ আপত্তী’’তি ৰদতি।
233.Tatrāssāti tassaṃ parisati bhaveyya. Neva suttaṃ āgatanti na mātikā āgatā. No suttavibhaṅgoti vinayopi na paguṇo. Byañjanacchāyāya atthaṃ paṭibāhatīti byañjanamattameva gahetvā atthaṃ paṭisedheti. Jātarūparajatakhettavatthupaṭiggahaṇādīsu vinayadharehi bhikkhūhi āpattiyā kāriyamāne disvā ‘‘kiṃ ime āpattiyā kāretha, ‘nanu jātarūparajatapaṭiggahaṇā paṭivirato hotī’ti evaṃ sutte paṭiviratimattameva vuttaṃ, natthi ettha āpattī’’ti vadati. Aparo dhammakathiko suttassa āgatattā olambetvā nivāsentānaṃ āpattiyā āropiyamānāya ‘‘kiṃ imesaṃ āpattiṃ ropetha, ‘nanu parimaṇḍalaṃ nivāsessāmīti sikkhā karaṇīyā’ti evaṃ sikkhākaraṇamattamevettha vuttaṃ, natthi ettha āpattī’’ti vadati.
২৩৪. যথা বহুতরা ভিক্খূতি এত্থ একেনপি অধিকা বহুতরাৰ কো পন ৰাদো দ্ৰীহি তীহীতি।
234.Yathā bahutarā bhikkhūti ettha ekenapi adhikā bahutarāva ko pana vādo dvīhi tīhīti.
অধিকরণৰূপসমনসমথকথা নিট্ঠিতা।
Adhikaraṇavūpasamanasamathakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
সম্মুখাৰিনযো • Sammukhāvinayo
উব্বাহিকাযৰূপসমনং • Ubbāhikāyavūpasamanaṃ
যেভুয্যসিকাৰিনযো • Yebhuyyasikāvinayo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণৰূপসমনসমথকথাৰণ্ণনা • Adhikaraṇavūpasamanasamathakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধিকরণকথাৰণ্ণনা • Adhikaraṇakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধিকরণৰূপসমনসমথকথাদিৰণ্ণনা • Adhikaraṇavūpasamanasamathakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৯. অধিকরণৰূপসমনসমথকথা • 9. Adhikaraṇavūpasamanasamathakathā
