| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༩. ཨདྷིཀརཎཝཱུཔསམནསམཐཀཐཱ
9. Adhikaraṇavūpasamanasamathakathā
༢༢༨. ཙཏུཝགྒཀརཎེ ཀམྨེཏི སཱིམསམྨུཏིཨཱདིཀམྨེ། པཉྩཝགྒཀརཎེཏི པཙྩནྟིམེསུ ཛནཔདེསུ ཨུཔསམྤདཱདིཀམྨེ། དསཝགྒཀརཎེཏི མཛ྄ཛྷིམེསུ ཛནཔདེསུ ཨུཔསམྤདཀམྨེ། ཝཱིསཏིཝགྒཀརཎེཏི ཨབྦྷཱནཀམྨེ། ཀམྨཔྤཏྟཱཏི ཀམྨསྶ པཏྟཱ ཡུཏྟཱ ཨནུརཱུཔཱ།
228.Catuvaggakaraṇe kammeti sīmasammutiādikamme. Pañcavaggakaraṇeti paccantimesu janapadesu upasampadādikamme. Dasavaggakaraṇeti majjhimesu janapadesu upasampadakamme. Vīsativaggakaraṇeti abbhānakamme. Kammappattāti kammassa pattā yuttā anurūpā.
༢༣༠. སམྤཊིཙྪིཏབྦནྟི པཊིགྒཎྷིཏབྦཾ། སམྤཊིཙྪིཏྭཱ ཙ པན ཨཏིཀྐཱམེཏབྦནྟི སམྦནྡྷོ། བྷཎྜཀནྟི ཙཱིཝརཱདིབྷཎྜཀཾ། མཱནནིགྒཧཏྠཱཡཱཏི བྷཎྜནཛཱཏཱནཾ མཱནསྶ ནིགྒཧཏྠཱཡ། ཀཏིཔཱཧནྟི ཀཏིཔཡཱཧཾ, དྭཱིཧཏཱིཧནྟི ཨཏྠོ།
230.Sampaṭicchitabbanti paṭiggaṇhitabbaṃ. Sampaṭicchitvā ca pana atikkāmetabbanti sambandho. Bhaṇḍakanti cīvarādibhaṇḍakaṃ. Mānaniggahatthāyāti bhaṇḍanajātānaṃ mānassa niggahatthāya. Katipāhanti katipayāhaṃ, dvīhatīhanti attho.
༢༣༡. ཨནནྟཱནི ཙེཝ བྷསྶཱནཱིཏི ཨེཏྠ ཨནནྟསདྡོ ཨཔརིམཱཎསདྡེན ཨཏྠཏོ ཨེཀོཏི ཨཱཧ ‘‘ཨཔརིམཱཎཱནཱི’’ཏི། ‘‘ཝཙནཱནཱི’’ཏི ཨིམིནཱ བྷསྶསདྡོ ཝཙནཔརིཡཱཡོཏི དསྶེཏི། ཨུབྦཱཧིཀཱཡ སམྨནིཏབྦོཏི ཀེན སམྨནིཏབྦོཏི ཨཱཧ ‘‘ཨཔལོཀེཏྭཱ ཝཱ’’ཏིཨཱདི། ཨིམིནཱ ཨཔལོཀནཀམྨེན ཝཱ ཉཏྟིདུཏིཡཀམྨེན ཝཱ སམྨནིཏབྦོཏི དསྶེཏི། ཨནནྟཱནི བྷསྶཱནི དྷམྨཀཐིཀཾ ཨུདྡྷརིཏྭཱ བཱཧཏི པཊིསེདྷེཏི ཨིམཱཡ སམྨུཏིཡཱཏི ཨུབྦཱཧིཀཱ, ཏཱཡ། ཨེཝཾ སམྨཏེཧི པན བྷིཀྑཱུཧི ཝིནིཙྪིཏབྦནྟི སམྦནྡྷོ། ཝིསུཾ ནིསཱིདིཏྭཱ ཏསྶཱཡེཝ པརིསཱཡ ནིསཱིདིཏྭཱ ཝཱཏི ཡོཛནཱ། ཨཉྙེཧཱིཏི སམྨཏབྷིཀྑཱུཧི ཨཉྙེཧི།
231.Anantāni ceva bhassānīti ettha anantasaddo aparimāṇasaddena atthato ekoti āha ‘‘aparimāṇānī’’ti. ‘‘Vacanānī’’ti iminā bhassasaddo vacanapariyāyoti dasseti. Ubbāhikāya sammanitabboti kena sammanitabboti āha ‘‘apaloketvā vā’’tiādi. Iminā apalokanakammena vā ñattidutiyakammena vā sammanitabboti dasseti. Anantāni bhassāni dhammakathikaṃ uddharitvā bāhati paṭisedheti imāya sammutiyāti ubbāhikā, tāya. Evaṃ sammatehi pana bhikkhūhi vinicchitabbanti sambandho. Visuṃ nisīditvā tassāyeva parisāya nisīditvā vāti yojanā. Aññehīti sammatabhikkhūhi aññehi.
༢༣༣. ཏཏྲསྶཱཏི ཨེཏྠ ཏཏྲ ཨསྶཱཏི པདཝིབྷཱགཾ ཀཏྭཱ ཏསདྡོ པརིསཝིསཡོ པསིདྡྷཝིསཡོ, ཨསྶསདྡོ ཨཱཁྱཱཏིཀོཏི ཨཱཧ ‘‘ཏསྶཾ པརིསཏི བྷཝེཡྻཱ’’ཏི། ‘‘ནེཝ སུཏྟཾ ཨཱགཏ’’ནྟི སཱམཉྙཏོ ཝུཏྟེཔི ‘‘ནོ སུཏྟཝིབྷངྒོ’’ཏི ཝཀྑམཱནཏྟཱ མཱཏིཀཾ སནྡྷཱཡ ཝུཏྟནྟི ཨཱཧ ‘‘ན མཱཏིཀཱ ཨཱགཏཱ’’ཏི། ཝིནཡོཔཱིཏི ཁནྡྷཀཝིནཡོཔི། པིསདྡེན སུཏྟཝིབྷངྒཾ ཨཔེཀྑཏི། བྱཉྫནཙྪཱཡཱཡཱཏི ཨེཏྠ ཚཱཡཱསདྡོ པཊིབིམྦེ ཙ པབྷཱཡ ཙ ཧོཏཱིཏི ཨཱཧ ‘‘བྱཉྫནམཏྟམེཝཱ’’ཏི, བྱཉྫནཔཊིབིམྦིཀབྱཉྫནཔབྷཱཝནྟབྷཱུཏཾ ཨཏྠཾ ཨགྒཧེཏྭཱ བྱཉྫནཔཊིབིམྦབྱཉྫནཔབྷཱམཏྟམེཝ གཧེཏྭཱཏི ཨདྷིཔྤཱཡོ། ‘‘པཊིསེདྷེཏཱི’’ཏི ཨིམིནཱ པཊིབཱཧསདྡོ པཊིསེདྷཏྠོཡེཝ, ན མདྡནཏྠོཏི དསྶེཏི། པཊིབཱཧནཱཀཱརཾ དསྶེནྟོ ཨཱཧ ‘‘ཛཱཏརཱུཔརཛཏཁེཏྟཝཏྠུཔཊིགྒཧཎཱདཱིསཱུ’’ཏིཨཱདི། ཀིནྟི ཀེན ཀཱརཎེན, ཀསྨཱ ཀཱརཎཱ ཝཱ། ཨིམེཏི ཛཱཏརཱུཔཱདིཔཊིགྒཱཧཀེ བྷིཀྑཱུ། ཀཱརེཐཱཏི ཏུམྷེ ཀཱརེཡྻཱཐ། ཨེཡྻཱཐསྶ ཧི ཨེཐཱདེསོ། པུཙྪཱཡཾ སཏྟམཱིཝིབྷཏྟི ཧོཏི། སུཏྟེཏི སུཏྟནྟཔིཊཀེ། ཨཔརོ དྷམྨཀཐིཀོ ཝདཏཱིཏི སམྦནྡྷོ། ཨིམེསནྟི ཨོལམྦེཏྭཱ ནིཝཱསེནྟཱནཾ། ཨེཏྠཱཏི ཨོལམྦེཏྭཱ ནིཝཱསནེ།
233.Tatrassāti ettha tatra assāti padavibhāgaṃ katvā tasaddo parisavisayo pasiddhavisayo, assasaddo ākhyātikoti āha ‘‘tassaṃ parisati bhaveyyā’’ti. ‘‘Neva suttaṃ āgata’’nti sāmaññato vuttepi ‘‘no suttavibhaṅgo’’ti vakkhamānattā mātikaṃ sandhāya vuttanti āha ‘‘na mātikā āgatā’’ti. Vinayopīti khandhakavinayopi. Pisaddena suttavibhaṅgaṃ apekkhati. Byañjanacchāyāyāti ettha chāyāsaddo paṭibimbe ca pabhāya ca hotīti āha ‘‘byañjanamattamevā’’ti, byañjanapaṭibimbikabyañjanapabhāvantabhūtaṃ atthaṃ aggahetvā byañjanapaṭibimbabyañjanapabhāmattameva gahetvāti adhippāyo. ‘‘Paṭisedhetī’’ti iminā paṭibāhasaddo paṭisedhatthoyeva, na maddanatthoti dasseti. Paṭibāhanākāraṃ dassento āha ‘‘jātarūparajatakhettavatthupaṭiggahaṇādīsū’’tiādi. Kinti kena kāraṇena, kasmā kāraṇā vā. Imeti jātarūpādipaṭiggāhake bhikkhū. Kārethāti tumhe kāreyyātha. Eyyāthassa hi ethādeso. Pucchāyaṃ sattamīvibhatti hoti. Sutteti suttantapiṭake. Aparo dhammakathiko vadatīti sambandho. Imesanti olambetvā nivāsentānaṃ. Etthāti olambetvā nivāsane.
༢༣༤. བཧུཏརཱ བྷིཀྑཱུཏི ཨེཏྠ དྭིགུཎཏིགུཎཱདིནཱ ཨདྷིཀཱ ཨེཝ བཧུཏརཱ ནཱམཱཏི ཨཱཧ ‘‘ཨེཀེནཔི ཨདྷིཀཱ བཧུཏརཱཝཱ’’ཏི། ‘‘ཀོ པན ཝཱདོ’’ཏིཨཱདིནཱ ‘‘ཨེཀེནཔཱི’’ཏི ཨེཏྠ པིསདྡསྶ གརཧཏྠཾ དསྶེཏི།
234.Bahutarā bhikkhūti ettha dviguṇatiguṇādinā adhikā eva bahutarā nāmāti āha ‘‘ekenapi adhikā bahutarāvā’’ti. ‘‘Ko pana vādo’’tiādinā ‘‘ekenapī’’ti ettha pisaddassa garahatthaṃ dasseti.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi
སམྨུཁཱཝིནཡོ • Sammukhāvinayo
ཨུབྦཱཧིཀཱཡཝཱུཔསམནཾ • Ubbāhikāyavūpasamanaṃ
ཡེབྷུཡྻསིཀཱཝིནཡོ • Yebhuyyasikāvinayo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཨདྷིཀརཎཝཱུཔསམནསམཐཀཐཱ • Adhikaraṇavūpasamanasamathakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨདྷིཀརཎཝཱུཔསམནསམཐཀཐཱཝཎྞནཱ • Adhikaraṇavūpasamanasamathakathāvaṇṇanā
