| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
அதி⁴கரணவூபஸமவக்³க³வண்ணனா
Adhikaraṇavūpasamavaggavaṇṇanā
457. அதி⁴கரணவூபஸமவக்³கே³ – புக்³க³லக³ரு ஹோதீதி ‘‘அயங் மே உபஜ்ஜா²யோ, அயங் மே ஆசரியோ’’திஆதீ³னி சிந்தெத்வா தஸ்ஸ ஜயங் ஆகங்க²மானோ ‘‘அத⁴ம்மங் த⁴ம்மோ’’தி தீ³பேதி. ஸங்க⁴க³ரு ஹோதீதி த⁴ம்மஞ்ச வினயஞ்ச அமுஞ்சித்வா வினிச்சி²னந்தோ ஸங்க⁴க³ருகோ நாம ஹோதி. சீவராதீ³னி க³ஹெத்வா வினிச்சி²னந்தோ ஆமிஸக³ருகோ நாம ஹோதி, தானி அக்³க³ஹெத்வா யதா²த⁴ம்மங் வினிச்சி²னந்தோ ஸத்³த⁴ம்மக³ருகோ நாம ஹோதி.
457. Adhikaraṇavūpasamavagge – puggalagaru hotīti ‘‘ayaṃ me upajjhāyo, ayaṃ me ācariyo’’tiādīni cintetvā tassa jayaṃ ākaṅkhamāno ‘‘adhammaṃ dhammo’’ti dīpeti. Saṅghagaru hotīti dhammañca vinayañca amuñcitvā vinicchinanto saṅghagaruko nāma hoti. Cīvarādīni gahetvā vinicchinanto āmisagaruko nāma hoti, tāni aggahetvā yathādhammaṃ vinicchinanto saddhammagaruko nāma hoti.
458. பஞ்சஹுபாலி ஆகாரேஹீதி பஞ்சஹி காரணேஹி ஸங்கோ⁴ பி⁴ஜ்ஜதி – கம்மேன, உத்³தே³ஸேன, வோஹரந்தோ, அனுஸ்ஸாவனேன, ஸலாகக்³கா³ஹேனாதி. எத்த² கம்மேனாதி அபலோகனாதீ³ஸு சதூஸு கம்மேஸு அஞ்ஞதரேன கம்மேன. உத்³தே³ஸேனாதி பஞ்சஸு பாதிமொக்கு²த்³தே³ஸேஸு அஞ்ஞதரேன உத்³தே³ஸேன. வோஹரந்தோதி கத²யந்தோ; தாஹி தாஹி உபபத்தீஹி ‘‘அத⁴ம்மங் த⁴ம்மோ’’திஆதீ³னி அட்டா²ரஸ பே⁴த³கரவத்தூ²னி தீ³பெந்தோ . அனுஸ்ஸாவனேனாதி ‘‘நனு தும்ஹே ஜானாத² மய்ஹங் உச்சாகுலா பப்³ப³ஜிதபா⁴வங் ப³ஹுஸ்ஸுதபா⁴வஞ்ச, மாதி³ஸோ நாம உத்³த⁴ம்மங் உப்³பி³னயங் ஸத்து² ஸாஸனங் கா³ஹெய்யாதி சித்தம்பி உப்பாதே³துங் தும்ஹாகங் யுத்தங், கிங் மய்ஹங் அவீசி நீலுப்பலவனமிவ ஸீதலோ, கிமஹங் அபாயதோ ந பா⁴யாமீ’’திஆதி³னா நயேன கண்ணமூலே வசீபே⁴த³ங் கத்வா அனுஸ்ஸாவனேன. ஸலாகக்³கா³ஹேனாதி ஏவங் அனுஸ்ஸாவெத்வா தேஸங் சித்தங் உபத்த²ம்பெ⁴த்வா அனிவத்தித⁴ம்மே கத்வா ‘‘க³ண்ஹத² இமங் ஸலாக’’ந்தி ஸலாகக்³கா³ஹேன.
458.Pañcahupāli ākārehīti pañcahi kāraṇehi saṅgho bhijjati – kammena, uddesena, voharanto, anussāvanena, salākaggāhenāti. Ettha kammenāti apalokanādīsu catūsu kammesu aññatarena kammena. Uddesenāti pañcasu pātimokkhuddesesu aññatarena uddesena. Voharantoti kathayanto; tāhi tāhi upapattīhi ‘‘adhammaṃ dhammo’’tiādīni aṭṭhārasa bhedakaravatthūni dīpento . Anussāvanenāti ‘‘nanu tumhe jānātha mayhaṃ uccākulā pabbajitabhāvaṃ bahussutabhāvañca, mādiso nāma uddhammaṃ ubbinayaṃ satthu sāsanaṃ gāheyyāti cittampi uppādetuṃ tumhākaṃ yuttaṃ, kiṃ mayhaṃ avīci nīluppalavanamiva sītalo, kimahaṃ apāyato na bhāyāmī’’tiādinā nayena kaṇṇamūle vacībhedaṃ katvā anussāvanena. Salākaggāhenāti evaṃ anussāvetvā tesaṃ cittaṃ upatthambhetvā anivattidhamme katvā ‘‘gaṇhatha imaṃ salāka’’nti salākaggāhena.
எத்த² ச கம்மமேவ உத்³தே³ஸோ வா பமாணங், வோஹாரானுஸ்ஸாவனஸலாகக்³கா³ஹா பன புப்³ப³பா⁴கா³. அட்டா²ரஸவத்து²தீ³பனவஸேன ஹி வோஹரந்தே தத்த² ருசிஜனநத்த²ங் அனுஸ்ஸாவெத்வா ஸலாகாய கா³ஹிதாயபி அபி⁴ன்னோவ ஹோதி ஸங்கோ⁴. யதா³ பன ஏவங் சத்தாரோ வா அதிரேகே வா ஸலாகங் கா³ஹெத்வா ஆவேணிகங் கம்மங் வா உத்³தே³ஸங் வா கரோதி, ததா³ ஸங்கோ⁴ பி⁴ன்னோ நாம ஹோதி. இதி யங் ஸங்க⁴பே⁴த³கக்க²ந்த⁴கவண்ணனாயங் அவோசும்ஹா ‘‘ஏவங் அட்டா²ரஸஸு வத்தூ²ஸு யங்கிஞ்சி ஏகம்பி வத்து²ங் தீ³பெத்வா தேன தேன காரணேன ‘இமங் க³ண்ஹத², இமங் ரோசேதா²’தி ஸஞ்ஞாபெத்வா ஸலாகங் கா³ஹெத்வா விஸுங் ஸங்க⁴கம்மே கதே ஸங்கோ⁴ பி⁴ன்னோ ஹோதி. பரிவாரே பன ‘பஞ்சஹி, உபாலி, ஆகாரேஹி ஸங்கோ⁴ பி⁴ஜ்ஜதீ’திஆதி³ வுத்தங். தஸ்ஸ இமினா இத⁴ வுத்தேன ஸங்க⁴பே⁴த³லக்க²ணேன அத்த²தோ நானாகரணங் நத்தி². தங் பனஸ்ஸ நானாகரணாபா⁴வங் தத்தே²வ பகாஸயிஸ்ஸாமா’’தி, ஸ்வாயங் பகாஸிதோ ஹோதி.
Ettha ca kammameva uddeso vā pamāṇaṃ, vohārānussāvanasalākaggāhā pana pubbabhāgā. Aṭṭhārasavatthudīpanavasena hi voharante tattha rucijananatthaṃ anussāvetvā salākāya gāhitāyapi abhinnova hoti saṅgho. Yadā pana evaṃ cattāro vā atireke vā salākaṃ gāhetvā āveṇikaṃ kammaṃ vā uddesaṃ vā karoti, tadā saṅgho bhinno nāma hoti. Iti yaṃ saṅghabhedakakkhandhakavaṇṇanāyaṃ avocumhā ‘‘evaṃ aṭṭhārasasu vatthūsu yaṃkiñci ekampi vatthuṃ dīpetvā tena tena kāraṇena ‘imaṃ gaṇhatha, imaṃ rocethā’ti saññāpetvā salākaṃ gāhetvā visuṃ saṅghakamme kate saṅgho bhinno hoti. Parivāre pana ‘pañcahi, upāli, ākārehi saṅgho bhijjatī’tiādi vuttaṃ. Tassa iminā idha vuttena saṅghabhedalakkhaṇena atthato nānākaraṇaṃ natthi. Taṃ panassa nānākaraṇābhāvaṃ tattheva pakāsayissāmā’’ti, svāyaṃ pakāsito hoti.
பஞ்ஞத்தேதந்தி பஞ்ஞத்தங் ஏதங். க்வ பஞ்ஞத்தங்? வத்தக்க²ந்த⁴கே. தத்ர ஹி சுத்³த³ஸ க²ந்த⁴கவத்தானி பஞ்ஞத்தானி. தேனாஹ – ‘‘பஞ்ஞத்தேதங், உபாலி, மயா ஆக³ந்துகானங் பி⁴க்கூ²னங் ஆக³ந்துகவத்த’’ந்திஆதி³. ஏவம்பி கோ² உபாலி ஸங்க⁴ராஜி ஹோதி, நோ ச ஸங்க⁴பே⁴தோ³தி எத்தாவதா ஹி ஸங்க⁴ராஜிமத்தமேவ ஹோதி, ந தாவ ஸங்க⁴பே⁴தோ³; அனுபுப்³பே³ன பன அயங் ஸங்க⁴ராஜி வட்³ட⁴மானா ஸங்க⁴பே⁴தா³ய ஸங்வத்ததீதி அத்தோ². யதா²ரத்தந்தி ரத்திபரிமாணானுரூபங்; யதா²தே²ரந்தி அத்தோ². ஆவேனிபா⁴வங் கரித்வாதி விஸுங் வவத்தா²னங் கரித்வா. கம்மாகம்மானி கரொந்தீதி அபராபரங் ஸங்க⁴கம்மங் உபாதா³ய கு²த்³த³கானி சேவ மஹந்தானி ச கம்மானி கரொந்தி. ஸேஸமெத்தா²பி அதி⁴கரணவூபஸமவக்³கே³ உத்தானமேவ.
Paññattetanti paññattaṃ etaṃ. Kva paññattaṃ? Vattakkhandhake. Tatra hi cuddasa khandhakavattāni paññattāni. Tenāha – ‘‘paññattetaṃ, upāli, mayā āgantukānaṃ bhikkhūnaṃ āgantukavatta’’ntiādi. Evampi kho upāli saṅgharāji hoti, no ca saṅghabhedoti ettāvatā hi saṅgharājimattameva hoti, na tāva saṅghabhedo; anupubbena pana ayaṃ saṅgharāji vaḍḍhamānā saṅghabhedāya saṃvattatīti attho. Yathārattanti rattiparimāṇānurūpaṃ; yathātheranti attho. Āvenibhāvaṃ karitvāti visuṃ vavatthānaṃ karitvā. Kammākammāni karontīti aparāparaṃ saṅghakammaṃ upādāya khuddakāni ceva mahantāni ca kammāni karonti. Sesametthāpi adhikaraṇavūpasamavagge uttānameva.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 10. அதி⁴கரணவூபஸமவக்³கோ³ • 10. Adhikaraṇavūpasamavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அதி⁴கரணவூபஸமவக்³க³வண்ணனா • Adhikaraṇavūpasamavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அதி⁴கரணவூபஸமவக்³க³வண்ணனா • Adhikaraṇavūpasamavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வோஹாரவக்³கா³தி³வண்ணனா • Vohāravaggādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அதி⁴கரணவூபஸமவக்³க³வண்ணனா • Adhikaraṇavūpasamavaggavaṇṇanā
