| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
ཨདྷིཀརཎཝཱུཔསམཝགྒཝཎྞནཱ
Adhikaraṇavūpasamavaggavaṇṇanā
༤༥༧. ཨདྷིཀརཎཝཱུཔསམཝགྒེ སངྒྷགརུ ནཱམ ཀོཏི ཨཱཧ ‘‘དྷམྨཉྩ…པེ॰… སངྒྷགརུ ནཱམ ཧོཏཱི’’ཏི། ཏཱནཱིཏི ཙཱིཝརཱདཱིནི།
457. Adhikaraṇavūpasamavagge saṅghagaru nāma koti āha ‘‘dhammañca…pe… saṅghagaru nāma hotī’’ti. Tānīti cīvarādīni.
༤༥༨. པཉྩཧུཔཱལི ཨཱཀཱརེཧཱིཏི ཨེཏྠ ཨཱཀཱརསདྡོ ཀཱརཎཏྠོཏི ཨཱཧ ‘‘པཉྩཧི ཀཱརཎེཧཱི’’ཏི། ཀམྨེནཱཏིཨཱདཱིསུ ཀམྨཱདཱིནཾ སརཱུཔཾ དསྶེནྟོ ཨཱཧ ‘‘ཨཔལོཀནཱདཱིསཱུ’’ཏིཨཱདི། ཨུཔཔཏྟཱིཧཱིཏི ཡུཏྟཱིཧི། མཡ྄ཧཾ ཨུཙྩཱཀུལཱ པབྦཛིཏབྷཱཝཉྩ བཧུསྶུཏབྷཱཝཉྩ ཏུམྷེ ཛཱནཱཐཱཏི ཡོཛནཱ། མཱདིསོ ནཱམ…པེ॰… ཏུམྷཱཀཾ ཡུཏྟཾ ནནཱུཏི ཡོཛནཱ། ཀཎྞམཱུལེཏི ཀཎྞསམཱིཔེ། ཨནུསྶཱཝནེནཱཏི ཨནུསམཱིཔེ སཱཝཱཔནེན། ཏེསནྟི བྷིཀྑཱུནཾ། ཨནིཝཏྟིདྷམྨེཏི ཨནིཝཏྟནསབྷཱཝེ། སལཱཀགྒཱཧེནཱཏི ཨཏྟནོ སལཱཀཱཡ གཱཧཱཔནེན།
458.Pañcahupāliākārehīti ettha ākārasaddo kāraṇatthoti āha ‘‘pañcahi kāraṇehī’’ti. Kammenātiādīsu kammādīnaṃ sarūpaṃ dassento āha ‘‘apalokanādīsū’’tiādi. Upapattīhīti yuttīhi. Mayhaṃ uccākulā pabbajitabhāvañca bahussutabhāvañca tumhe jānāthāti yojanā. Mādiso nāma…pe… tumhākaṃ yuttaṃ nanūti yojanā. Kaṇṇamūleti kaṇṇasamīpe. Anussāvanenāti anusamīpe sāvāpanena. Tesanti bhikkhūnaṃ. Anivattidhammeti anivattanasabhāve. Salākaggāhenāti attano salākāya gāhāpanena.
ཨེཏྠཱཏི ཀམྨཱདཱིསུ། པམཱཎནྟི སངྒྷབྷེདསྶ ཀཱརཎཾ། པུབྦབྷཱགཱཏི སངྒྷབྷེདཏོ པུབྦབྷཱགེ པཝཏྟཱ། པུབྦབྷཱགབྷཱཝཾ ཨཱཝིཀརོནྟོ ཨཱཧ ‘‘ཨཊྛཱརསཝཏྠུདཱིཔནཝསེན ཧཱི’’ཏིཨཱདི། ཝོཧརནྟེཔཱིཏི ཡོཛནཱ། ཏཏྠཱཏི ཝོཧཱརེ། ཀདཱ པན སངྒྷོ བྷིནྣོཏི ཨཱཧ ‘‘ཡདཱ པནཱ’’ཏིཨཱདི། ཡདཱ པན ཀརོཏཱིཏི སམྦནྡྷོ། ཀམྨནྟི ཨུཔོསཐཀམྨཏོ ཨཉྙཾ ཀམྨཾ གཧེཏབྦཾ། ཨུདྡེསནྟི ཨུཔོསཐཀམྨཾ། ཨིཏཱིཏི ཨེཝཾ། སངྒྷབྷེདཀཀྑནྡྷཀཝཎྞནཱཡཾ ‘‘ཨེཝཾ…པེ॰… པཀཱསཡིསྶཱམཱ’’ཏི (ཙཱུལ༹ཝ॰ ཨཊྛ॰ ༣༥༡) ཡཾ ཝཙནཾ ཨཝོཙུམྷཱཏི ཡོཛནཱ། ཏསྶ ཝཙནསྶཱཏི པཱཋཾ ཨཛ྄ཛྷཱཧརིཏྭཱ ‘‘སྭཱཡཾ ཨཏྠོ’’ཏི པདེན སམྦནྡྷིཏབྦོ།
Etthāti kammādīsu. Pamāṇanti saṅghabhedassa kāraṇaṃ. Pubbabhāgāti saṅghabhedato pubbabhāge pavattā. Pubbabhāgabhāvaṃ āvikaronto āha ‘‘aṭṭhārasavatthudīpanavasena hī’’tiādi. Voharantepīti yojanā. Tatthāti vohāre. Kadā pana saṅgho bhinnoti āha ‘‘yadā panā’’tiādi. Yadā pana karotīti sambandho. Kammanti uposathakammato aññaṃ kammaṃ gahetabbaṃ. Uddesanti uposathakammaṃ. Itīti evaṃ. Saṅghabhedakakkhandhakavaṇṇanāyaṃ ‘‘evaṃ…pe… pakāsayissāmā’’ti (cūḷava. aṭṭha. 351) yaṃ vacanaṃ avocumhāti yojanā. Tassa vacanassāti pāṭhaṃ ajjhāharitvā ‘‘svāyaṃ attho’’ti padena sambandhitabbo.
པཉྙཏྟེཏནྟི ཨེཏྠ ནིགྒཧིཏལོཔསནྡྷཱིཏི ཨཱཧ ‘‘པཉྙཏྟཾ ཨེཏ’’ནྟི། ཀྭཱཏི ཀིསྨིཾ ཁནྡྷཀེ། ཏཏྲཱཏི ཝཏྟཀྑནྡྷཀེ། ཨེཏྟཱཝཏཱཏི ཨེཏྟཀེན ཨཱགནྟུཀཝཏྟཱདིཨཀརཎམཏྟེན། ཨནུཔུབྦེནཱཏི ཨནུཀྐམེན། ཡཐཱརཏྟནྟི ཨེཏྠ ཡཐཱསདྡོ ཨནུརཱུཔཏྠཝཱཙཀོ, རཏྟིསདྡེན རཏྟིཔྤམཱཎཾ གཧེཏབྦནྟི དསྶེནྟོ ཨཱཧ ‘‘རཏྟིཔརིམཱཎཱནུརཱུཔ’’ནྟི། ཨིམིནཱ རཏྟིཡཱ ཨནུརཱུཔཾ ཡཐཱརཏྟནྟི ནིབྦཙནཾ དསྶེཏི། ‘‘རཏྟིཔརིམཱཎཱནུརཱུཔ’’ནྟི ཝུཏྟེ རཏྟིཔརིམཱཎསྶ ཨཏིཀྐནྟཏྟཱ ཨཏྠཏོ ཐེརོཏི ཨཱཧ ‘‘ཡཐཱཐེརནྟི ཨཏྠོ’’ཏི། ཝཝཏྠཱནནྟི པརིཙྪེདོ། སོ ཧི ཝིསུཾ ཨཝཧིཏོ ཧུཏྭཱ ཏིཊྛཏཱིཏི ཝཝཏྠཱནནྟི ཝུཙྩཏི། ཀམྨཱཀམྨཱནཱིཏི ཨེཏྠ ཀམྨཾ ཨཀམྨཱནཱིཏི པདཝིབྷཱགཾ ཀཏྭཱ ཨཀཱརོ ཝུདྡྷཏྠོཏི ཨཱཧ ‘‘ཁུདྡཀཱནི ཙེཝ མཧནྟཱནི ཙ ཀམྨཱནཱི’’ཏི། སཏི ཙ ཨཀམྨསྶ མཧནྟབྷཱཝེ ཀམྨཾ ནཱམ ཁུདྡཀནྟི ཨཏྠཏོ སིདྡྷཾ ཧོཏི། ཏེན ཝུཏྟཾ ‘‘ཁུདྡཀཱནི ཙེཝཱ’’ཏི། ཨཀཱརསྶ ཨཔྤཏྠཾ གཧེཏྭཱ ‘‘མཧནྟཱནི ཙེཝ ཁུདྡཀཱནི ཙ ཀམྨཱནཱི’’ཏི ཨཏྠོཔི ཡུཛྫཏེཝ། སོ པན ཨིདྷ ན གཧིཏོ, ཨཉྙཏྠ པན དིསྶཏི། ‘‘ཨུཙྩཱཝཙཱནི ཀམྨཱནཱི’’ཏི ཧི ཝཱཀྱཝསེན ཝུཏྟཊྛཱནེ ཨུཙྩསདྡེན མཧནྟཏྠཾ དསྶེཏི, ཨཝཙསདྡེན ཁུདྡཀཏྠཾ དསྶེཏི། ཏསྨཱ མཧནྟཁུདྡཀཱནི ཀམྨཱནཱིཏི ཨཏྠོ ཝེདིཏབྦོ། སཏི ཙ ཨཀམྨསྶ ཁུདྡཀབྷཱཝེ ཀམྨཾ ནཱམ མཧནྟནྟི ཨཏྠཏོཔི སིདྡྷནྟི དཊྛབྦཾ།
Paññattetanti ettha niggahitalopasandhīti āha ‘‘paññattaṃ eta’’nti. Kvāti kismiṃ khandhake. Tatrāti vattakkhandhake. Ettāvatāti ettakena āgantukavattādiakaraṇamattena. Anupubbenāti anukkamena. Yathārattanti ettha yathāsaddo anurūpatthavācako, rattisaddena rattippamāṇaṃ gahetabbanti dassento āha ‘‘rattiparimāṇānurūpa’’nti. Iminā rattiyā anurūpaṃ yathārattanti nibbacanaṃ dasseti. ‘‘Rattiparimāṇānurūpa’’nti vutte rattiparimāṇassa atikkantattā atthato theroti āha ‘‘yathātheranti attho’’ti. Vavatthānanti paricchedo. So hi visuṃ avahito hutvā tiṭṭhatīti vavatthānanti vuccati. Kammākammānīti ettha kammaṃ akammānīti padavibhāgaṃ katvā akāro vuddhatthoti āha ‘‘khuddakāni ceva mahantāni ca kammānī’’ti. Sati ca akammassa mahantabhāve kammaṃ nāma khuddakanti atthato siddhaṃ hoti. Tena vuttaṃ ‘‘khuddakāni cevā’’ti. Akārassa appatthaṃ gahetvā ‘‘mahantāni ceva khuddakāni ca kammānī’’ti atthopi yujjateva. So pana idha na gahito, aññattha pana dissati. ‘‘Uccāvacāni kammānī’’ti hi vākyavasena vuttaṭṭhāne uccasaddena mahantatthaṃ dasseti, avacasaddena khuddakatthaṃ dasseti. Tasmā mahantakhuddakāni kammānīti attho veditabbo. Sati ca akammassa khuddakabhāve kammaṃ nāma mahantanti atthatopi siddhanti daṭṭhabbaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༡༠. ཨདྷིཀརཎཝཱུཔསམཝགྒོ • 10. Adhikaraṇavūpasamavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཨདྷིཀརཎཝཱུཔསམཝགྒཝཎྞནཱ • Adhikaraṇavūpasamavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨདྷིཀརཎཝཱུཔསམཝགྒཝཎྞནཱ • Adhikaraṇavūpasamavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨདྷིཀརཎཝཱུཔསམཝགྒཝཎྞནཱ • Adhikaraṇavūpasamavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཝོཧཱརཝགྒཱདིཝཎྞནཱ • Vohāravaggādivaṇṇanā
