| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
10. අධිකරණවූපසමවග්‌ගො
10. Adhikaraṇavūpasamavaggo
457. ‘‘කතිහි නු ඛො, භන්‌තෙ, අඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතු’’න්‌ති? ‘‘පඤ්‌චහුපාලි, අඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. කතමෙහි පඤ්‌චහි? ආපත්‌තිං න ජානාති, ආපත්‌තිසමුට්‌ඨානං න ජානාති, ආපත්‌තියා පයොගං න ජානාති, ආපත්‌තියා වූපසමං න ජානාති, ආපත්‌තියා න විනිච්‌ඡයකුසලො හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. පඤ්‌චහුපාලි, අඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං. කතමෙහි පඤ්‌චහි? ආපත්‌තිං ජානාති, ආපත්‌තිසමුට්‌ඨානං ජානාති, ආපත්‌තියා පයොගං ජානාති, ආපත්‌තියා වූපසමං ජානාති, ආපත්‌තියා විනිච්‌ඡයකුසලො හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං.
457. ‘‘Katihi nu kho, bhante, aṅgehi samannāgato bhikkhu nālaṃ adhikaraṇaṃ vūpasametu’’nti? ‘‘Pañcahupāli, aṅgehi samannāgato bhikkhu nālaṃ adhikaraṇaṃ vūpasametuṃ. Katamehi pañcahi? Āpattiṃ na jānāti, āpattisamuṭṭhānaṃ na jānāti, āpattiyā payogaṃ na jānāti, āpattiyā vūpasamaṃ na jānāti, āpattiyā na vinicchayakusalo hoti – imehi kho, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Pañcahupāli, aṅgehi samannāgato bhikkhu alaṃ adhikaraṇaṃ vūpasametuṃ. Katamehi pañcahi? Āpattiṃ jānāti, āpattisamuṭṭhānaṃ jānāti, āpattiyā payogaṃ jānāti, āpattiyā vūpasamaṃ jānāti, āpattiyā vinicchayakusalo hoti – imehi kho, upāli, pañcahaṅgehi samannāgato bhikkhu alaṃ adhikaraṇaṃ vūpasametuṃ.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. කතමෙහි පඤ්‌චහි? අධිකරණං න ජානාති, අධිකරණසමුට්‌ඨානං න ජානාති, අධිකරණස්‌ස පයොගං න ජානාති, අධිකරණස්‌ස වූපසමං න ජානාති, අධිකරණස්‌ස න විනිච්‌ඡයකුසලො හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං.
‘‘Aparehipi, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Katamehi pañcahi? Adhikaraṇaṃ na jānāti, adhikaraṇasamuṭṭhānaṃ na jānāti, adhikaraṇassa payogaṃ na jānāti, adhikaraṇassa vūpasamaṃ na jānāti, adhikaraṇassa na vinicchayakusalo hoti – imehi kho, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ.
‘‘පඤ්‌චහුපාලි, අඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං. කතමෙහි පඤ්‌චහි? අධිකරණං ජානාති, අධිකරණසමුට්‌ඨානං ජානාති, අධිකරණස්‌ස පයොගං ජානාති, අධිකරණස්‌ස වූපසමං ජානාති, අධිකරණස්‌ස විනිච්‌ඡයකුසලො හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං.
‘‘Pañcahupāli, aṅgehi samannāgato bhikkhu alaṃ adhikaraṇaṃ vūpasametuṃ. Katamehi pañcahi? Adhikaraṇaṃ jānāti, adhikaraṇasamuṭṭhānaṃ jānāti, adhikaraṇassa payogaṃ jānāti, adhikaraṇassa vūpasamaṃ jānāti, adhikaraṇassa vinicchayakusalo hoti – imehi kho, upāli, pañcahaṅgehi samannāgato bhikkhu alaṃ adhikaraṇaṃ vūpasametuṃ.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. කතමෙහි පඤ්‌චහි? ඡන්‌දාගතිං ගච්‌ඡති, දොසාගතිං ගච්‌ඡති, මොහාගතිං ගච්‌ඡති, භයාගතිං ගච්‌ඡති, අලජ්‌ජී ච හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. පඤ්‌චහුපාලි, අඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං. කතමෙහි පඤ්‌චහි? න ඡන්‌දාගතිං ගච්‌ඡති, න දොසාගතිං ගච්‌ඡති, න මොහාගතිං ගච්‌ඡති, න භයාගතිං ගච්‌ඡති, ලජ්‌ජී ච හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං.
‘‘Aparehipi, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Katamehi pañcahi? Chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati, alajjī ca hoti – imehi kho, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Pañcahupāli, aṅgehi samannāgato bhikkhu alaṃ adhikaraṇaṃ vūpasametuṃ. Katamehi pañcahi? Na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati, lajjī ca hoti – imehi kho, upāli, pañcahaṅgehi samannāgato bhikkhu alaṃ adhikaraṇaṃ vūpasametuṃ.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. කතමෙහි පඤ්‌චහි? ඡන්‌දාගතිං ගච්‌ඡති, දොසාගතිං ගච්‌ඡති, මොහාගතිං ගච්‌ඡති, භයාගතිං ගච්‌ඡති , අප්‌පස්‌සුතො ච හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. පඤ්‌චහුපාලි, අඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං. කතමෙහි පඤ්‌චහි? න ඡන්‌දාගතිං ගච්‌ඡති, න දොසාගතිං ගච්‌ඡති, න මොහාගතිං ගච්‌ඡති, න භයාගතිං ගච්‌ඡති, බහුස්‌සුතො ච හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං.
‘‘Aparehipi, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Katamehi pañcahi? Chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati , appassuto ca hoti – imehi kho, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Pañcahupāli, aṅgehi samannāgato bhikkhu alaṃ adhikaraṇaṃ vūpasametuṃ. Katamehi pañcahi? Na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati, bahussuto ca hoti – imehi kho, upāli, pañcahaṅgehi samannāgato bhikkhu alaṃ adhikaraṇaṃ vūpasametuṃ.
‘‘අපරෙහිපි , උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. කතමෙහි පඤ්‌චහි? වත්‌ථුං න ජානාති, නිදානං න ජානාති, පඤ්‌ඤත්‌තිං න ජානාති, පදපච්‌චාභට්‌ඨං න ජානාති, අනුසන්‌ධිවචනපථං න ජානාති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. පඤ්‌චහුපාලි, අඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං. කතමෙහි පඤ්‌චහි? වත්‌ථුං ජානාති, නිදානං ජානාති, පඤ්‌ඤත්‌තිං ජානාති, පදපච්‌චාභට්‌ඨං ජානාති, අනුසන්‌ධිවචනපථං ජානාති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං.
‘‘Aparehipi , upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Katamehi pañcahi? Vatthuṃ na jānāti, nidānaṃ na jānāti, paññattiṃ na jānāti, padapaccābhaṭṭhaṃ na jānāti, anusandhivacanapathaṃ na jānāti – imehi kho, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Pañcahupāli, aṅgehi samannāgato bhikkhu alaṃ adhikaraṇaṃ vūpasametuṃ. Katamehi pañcahi? Vatthuṃ jānāti, nidānaṃ jānāti, paññattiṃ jānāti, padapaccābhaṭṭhaṃ jānāti, anusandhivacanapathaṃ jānāti – imehi kho, upāli, pañcahaṅgehi samannāgato bhikkhu alaṃ adhikaraṇaṃ vūpasametuṃ.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. කතමෙහි පඤ්‌චහි? ඡන්‌දාගතිං ගච්‌ඡති, දොසාගතිං ගච්‌ඡති, මොහාගතිං ගච්‌ඡති, භයාගතිං ගච්‌ඡති, අකුසලො ච හොති විනයෙ – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. පඤ්‌චහුපාලි, අඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං. කතමෙහි පඤ්‌චහි? න ඡන්‌දාගතිං ගච්‌ඡති, න දොසාගතිං ගච්‌ඡති, න මොහාගතිං ගච්‌ඡති, න භයාගතිං ගච්‌ඡති, කුසලො ච හොති විනයෙ – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං.
‘‘Aparehipi, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Katamehi pañcahi? Chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati, akusalo ca hoti vinaye – imehi kho, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Pañcahupāli, aṅgehi samannāgato bhikkhu alaṃ adhikaraṇaṃ vūpasametuṃ. Katamehi pañcahi? Na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati, kusalo ca hoti vinaye – imehi kho, upāli, pañcahaṅgehi samannāgato bhikkhu alaṃ adhikaraṇaṃ vūpasametuṃ.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. කතමෙහි පඤ්‌චහි? ඡන්‌දාගතිං ගච්‌ඡති, දොසාගතිං ගච්‌ඡති, මොහාගතිං ගච්‌ඡති, භයාගතිං ගච්‌ඡති, පුග්‌ගලගරු හොති නො සඞ්‌ඝගරු – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. පඤ්‌චහුපාලි , අඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං . කතමෙහි පඤ්‌චහි? න ඡන්‌දාගතිං ගච්‌ඡති, න දොසාගතිං ගච්‌ඡති, න මොහාගතිං ගච්‌ඡති, න භයාගතිං ගච්‌ඡති, සඞ්‌ඝගරු හොති නො පුග්‌ගලගරු – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං.
‘‘Aparehipi, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Katamehi pañcahi? Chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati, puggalagaru hoti no saṅghagaru – imehi kho, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Pañcahupāli , aṅgehi samannāgato bhikkhu alaṃ adhikaraṇaṃ vūpasametuṃ . Katamehi pañcahi? Na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati, saṅghagaru hoti no puggalagaru – imehi kho, upāli, pañcahaṅgehi samannāgato bhikkhu alaṃ adhikaraṇaṃ vūpasametuṃ.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. කතමෙහි පඤ්‌චහි? ඡන්‌දාගතිං ගච්‌ඡති, දොසාගතිං ගච්‌ඡති, මොහාගතිං ගච්‌ඡති, භයාගතිං ගච්‌ඡති, ආමිසගරු හොති නො සද්‌ධම්‌මගරු – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු නාලං අධිකරණං වූපසමෙතුං. පඤ්‌චහුපාලි, අඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතුං. කතමෙහි පඤ්‌චහි? න ඡන්‌දාගතිං ගච්‌ඡති, න දොසාගතිං ගච්‌ඡති, න මොහාගතිං ගච්‌ඡති, න භයාගතිං ගච්‌ඡති, සද්‌ධම්‌මගරු හොති නො ආමිසගරු – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු අලං අධිකරණං වූපසමෙතු’’න්‌ති.
‘‘Aparehipi, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Katamehi pañcahi? Chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati, āmisagaru hoti no saddhammagaru – imehi kho, upāli, pañcahaṅgehi samannāgato bhikkhu nālaṃ adhikaraṇaṃ vūpasametuṃ. Pañcahupāli, aṅgehi samannāgato bhikkhu alaṃ adhikaraṇaṃ vūpasametuṃ. Katamehi pañcahi? Na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati, saddhammagaru hoti no āmisagaru – imehi kho, upāli, pañcahaṅgehi samannāgato bhikkhu alaṃ adhikaraṇaṃ vūpasametu’’nti.
458. ‘‘කතිහි නු ඛො, භන්‌තෙ, ආකාරෙහි සඞ්‌ඝො භිජ්‌ජතී’’ති? ‘‘පඤ්‌චහුපාලි, ආකාරෙහි සඞ්‌ඝො භිජ්‌ජති. කතමෙහි පඤ්‌චහි? කම්‌මෙන, උද්‌දෙසෙන, වොහරන්‌තො, අනුස්‌සාවනෙන, සලාකග්‌ගාහෙන – ඉමෙහි ඛො, උපාලි, පඤ්‌චහාකාරෙහි සඞ්‌ඝො භිජ්‌ජතී’’ති.
458. ‘‘Katihi nu kho, bhante, ākārehi saṅgho bhijjatī’’ti? ‘‘Pañcahupāli, ākārehi saṅgho bhijjati. Katamehi pañcahi? Kammena, uddesena, voharanto, anussāvanena, salākaggāhena – imehi kho, upāli, pañcahākārehi saṅgho bhijjatī’’ti.
‘‘සඞ්‌ඝරාජි සඞ්‌ඝරාජීති, භන්‌තෙ, වුච්‌චති. කිත්‌තාවතා නු ඛො, භන්‌තෙ, සඞ්‌ඝරාජි හොති නො ච සඞ්‌ඝභෙදො? කිත්‌තාවතා ච පන සඞ්‌ඝරාජි චෙව හොති සඞ්‌ඝභෙදො චා’’ති? ‘‘පඤ්‌ඤත්‌තෙතං, උපාලි, මයා ආගන්‌තුකානං භික්‌ඛූනං ආගන්‌තුකවත්‌තං. එවං සුපඤ්‌ඤත්‌තෙ ඛො, උපාලි, මයා සික්‌ඛාපදෙ ආගන්‌තුකා භික්‌ඛූ ආගන්‌තුකවත්‌තෙ න වත්‌තන්‌ති. එවම්‌පි ඛො, උපාලි, සඞ්‌ඝරාජි හොති නො ච සඞ්‌ඝභෙදො. පඤ්‌ඤත්‌තෙතං, උපාලි, මයා ආවාසිකානං භික්‌ඛූනං ආවාසිකවත්‌තං. එවං සුපඤ්‌ඤත්‌තෙ ඛො, උපාලි, මයා සික්‌ඛාපදෙ ආවාසිකා භික්‌ඛූ ආවාසිකවත්‌තෙ න වත්‌තන්‌ති. එවම්‌පි ඛො, උපාලි, සඞ්‌ඝරාජි හොති නො ච සඞ්‌ඝභෙදො. පඤ්‌ඤත්‌තෙතං උපාලි මයා භික්‌ඛූනං භත්‌තග්‌ගෙ භත්‌තග්‌ගවත්‌තං – යථාවුඩ්‌ඪං යථාරත්‌තං යථාපතිරූපං අග්‌ගාසනං අග්‌ගොදකං අග්‌ගපිණ්‌ඩං. එවං සුපඤ්‌ඤත්‌තෙ ඛො, උපාලි, මයා සික්‌ඛාපදෙ නවා භික්‌ඛූ භත්‌තග්‌ගෙ ථෙරානං භික්‌ඛූනං ආසනං පටිබාහන්‌ති. එවම්‌පි ඛො, උපාලි, සඞ්‌ඝරාජි හොති නො ච සඞ්‌ඝභෙදො. පඤ්‌ඤත්‌තෙතං, උපාලි, මයා භික්‌ඛූනං සෙනාසනෙ සෙනාසනවත්‌තං – යථාවුඩ්‌ඪං යථාරත්‌තං යථාපතිරූපං. එවං සුපඤ්‌ඤත්‌තෙ ඛො, උපාලි, මයා සික්‌ඛාපදෙ නවා භික්‌ඛූ ථෙරානං භික්‌ඛූනං සෙනාසනං පටිබාහන්‌ති. එවම්‌පි ඛො, උපාලි, සඞ්‌ඝරාජි හොති නො ච සඞ්‌ඝභෙදො. පඤ්‌ඤත්‌තෙතං, උපාලි, මයා භික්‌ඛූනං අන්‌තොසීමාය එකං උපොසථං එකං පවාරණං එකං සඞ්‌ඝකම්‌මං එකං කම්‌මාකම්‌මං. එවං සුපඤ්‌ඤත්‌තෙ ඛො, උපාලි, මයා සික්‌ඛාපදෙ තත්‌ථෙව අන්‌තොසීමාය ආවෙනිභාවං 1 කරිත්‌වා ගණං බන්‌ධිත්‌වා ආවෙනිං 2 උපොසථං කරොන්‌ති ආවෙනිං පවාරණං කරොන්‌ති ආවෙනිං සඞ්‌ඝකම්‌මං කරොන්‌ති ආවෙනිං කම්‌මාකම්‌මානි කරොන්‌ති. එවං ඛො, උපාලි, සඞ්‌ඝරාජි චෙව හොති සඞ්‌ඝභෙදො චා’’ති.
‘‘Saṅgharāji saṅgharājīti, bhante, vuccati. Kittāvatā nu kho, bhante, saṅgharāji hoti no ca saṅghabhedo? Kittāvatā ca pana saṅgharāji ceva hoti saṅghabhedo cā’’ti? ‘‘Paññattetaṃ, upāli, mayā āgantukānaṃ bhikkhūnaṃ āgantukavattaṃ. Evaṃ supaññatte kho, upāli, mayā sikkhāpade āgantukā bhikkhū āgantukavatte na vattanti. Evampi kho, upāli, saṅgharāji hoti no ca saṅghabhedo. Paññattetaṃ, upāli, mayā āvāsikānaṃ bhikkhūnaṃ āvāsikavattaṃ. Evaṃ supaññatte kho, upāli, mayā sikkhāpade āvāsikā bhikkhū āvāsikavatte na vattanti. Evampi kho, upāli, saṅgharāji hoti no ca saṅghabhedo. Paññattetaṃ upāli mayā bhikkhūnaṃ bhattagge bhattaggavattaṃ – yathāvuḍḍhaṃ yathārattaṃ yathāpatirūpaṃ aggāsanaṃ aggodakaṃ aggapiṇḍaṃ. Evaṃ supaññatte kho, upāli, mayā sikkhāpade navā bhikkhū bhattagge therānaṃ bhikkhūnaṃ āsanaṃ paṭibāhanti. Evampi kho, upāli, saṅgharāji hoti no ca saṅghabhedo. Paññattetaṃ, upāli, mayā bhikkhūnaṃ senāsane senāsanavattaṃ – yathāvuḍḍhaṃ yathārattaṃ yathāpatirūpaṃ. Evaṃ supaññatte kho, upāli, mayā sikkhāpade navā bhikkhū therānaṃ bhikkhūnaṃ senāsanaṃ paṭibāhanti. Evampi kho, upāli, saṅgharāji hoti no ca saṅghabhedo. Paññattetaṃ, upāli, mayā bhikkhūnaṃ antosīmāya ekaṃ uposathaṃ ekaṃ pavāraṇaṃ ekaṃ saṅghakammaṃ ekaṃ kammākammaṃ. Evaṃ supaññatte kho, upāli, mayā sikkhāpade tattheva antosīmāya āvenibhāvaṃ 3 karitvā gaṇaṃ bandhitvā āveniṃ 4 uposathaṃ karonti āveniṃ pavāraṇaṃ karonti āveniṃ saṅghakammaṃ karonti āveniṃ kammākammāni karonti. Evaṃ kho, upāli, saṅgharāji ceva hoti saṅghabhedo cā’’ti.
අධිකරණවූපසමවග්‌ගො නිට්‌ඨිතො දසමො.
Adhikaraṇavūpasamavaggo niṭṭhito dasamo.
තස්‌සුද්‌දානං –
Tassuddānaṃ –
ආපත්‌තිං අධිකරණං, ඡන්‌දා අප්‌පස්‌සුතෙන ච;
Āpattiṃ adhikaraṇaṃ, chandā appassutena ca;
වත්‌ථුඤ්‌ච අකුසලො ච, පුග්‌ගලො ආමිසෙන ච;
Vatthuñca akusalo ca, puggalo āmisena ca;
භිජ්‌ජති සඞ්‌ඝරාජි ච, සඞ්‌ඝභෙදො තථෙව චාති.
Bhijjati saṅgharāji ca, saṅghabhedo tatheva cāti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / අධිකරණවූපසමවග්‌ගවණ්‌ණනා • Adhikaraṇavūpasamavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අධිකරණවූපසමවග්‌ගවණ්‌ණනා • Adhikaraṇavūpasamavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අධිකරණවූපසමවග්‌ගවණ්‌ණනා • Adhikaraṇavūpasamavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහාරවග්‌ගාදිවණ්‌ණනා • Vohāravaggādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / අධිකරණවූපසමවග්‌ගවණ්‌ණනා • Adhikaraṇavūpasamavaggavaṇṇanā
