| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
১৬. ৰীসতিনিপাতো
16. Vīsatinipāto
১. অধিমুত্তত্থেরগাথাৰণ্ণনা
1. Adhimuttattheragāthāvaṇṇanā
ৰীসতিনিপাতে যঞ্ঞত্থং ৰাতিআদিকা আযস্মতো অপরস্স অধিমুত্তত্থেরস্স গাথা। কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো অত্থদস্সিস্স ভগৰতো কালে ৰিভৰসম্পন্নে কুলে নিব্বত্তিত্ৰা ৰিঞ্ঞুতং পত্তো সত্থরি পরিনিব্বুতে ভিক্খুসঙ্ঘং উপট্ঠহন্তো মহাদানানি পৰত্তেসি। সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে আযস্মতো সংকিচ্চত্থেরস্স ভগিনিযা কুচ্ছিম্হি নিব্বত্তি, অধিমুত্তোতিস্স নামং অহোসি। সো ৰযপ্পত্তো মাতুলত্থেরস্স সন্তিকে পব্বজিত্ৰা ৰিপস্সনায কম্মং করোন্তো সামণেরভূমিযংযেৰ ঠিতো অরহত্তং পাপুণি। তেন ৰুত্তং অপদানে (অপ॰ থের ১.৪.৮৪-৮৮) –
Vīsatinipāte yaññatthaṃ vātiādikā āyasmato aparassa adhimuttattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinanto atthadassissa bhagavato kāle vibhavasampanne kule nibbattitvā viññutaṃ patto satthari parinibbute bhikkhusaṅghaṃ upaṭṭhahanto mahādānāni pavattesi. So tena puññakammena devamanussesu saṃsaranto imasmiṃ buddhuppāde āyasmato saṃkiccattherassa bhaginiyā kucchimhi nibbatti, adhimuttotissa nāmaṃ ahosi. So vayappatto mātulattherassa santike pabbajitvā vipassanāya kammaṃ karonto sāmaṇerabhūmiyaṃyeva ṭhito arahattaṃ pāpuṇi. Tena vuttaṃ apadāne (apa. thera 1.4.84-88) –
‘‘নিব্বুতে লোকনাথম্হি, অত্থদস্সীনরুত্তমে।
‘‘Nibbute lokanāthamhi, atthadassīnaruttame;
উপট্ঠহিং ভিক্খুসঙ্ঘং, ৰিপ্পসন্নেন চেতসা॥
Upaṭṭhahiṃ bhikkhusaṅghaṃ, vippasannena cetasā.
‘‘নিমন্তেত্ৰা ভিক্খুসঙ্ঘং, উজুভূতং সমাহিতং।
‘‘Nimantetvā bhikkhusaṅghaṃ, ujubhūtaṃ samāhitaṃ;
উচ্ছুনা মণ্ডপং কত্ৰা, ভোজেসিং সঙ্ঘমুত্তমং॥
Ucchunā maṇḍapaṃ katvā, bhojesiṃ saṅghamuttamaṃ.
‘‘যং যং যোনুপপজ্জামি, দেৰত্তং অথমানুসং।
‘‘Yaṃ yaṃ yonupapajjāmi, devattaṃ athamānusaṃ;
সব্বে সত্তে অভিভোমি, পুঞ্ঞকম্মস্সিদং ফলং॥
Sabbe satte abhibhomi, puññakammassidaṃ phalaṃ.
‘‘অট্ঠারসে কপ্পসতে, যং দানমদদিং তদা।
‘‘Aṭṭhārase kappasate, yaṃ dānamadadiṃ tadā;
দুগ্গতিং নাভিজানামি, উচ্ছুদানস্সিদং ফলং॥
Duggatiṃ nābhijānāmi, ucchudānassidaṃ phalaṃ.
‘‘পটিসম্ভিদা চতস্সো…পে॰… কতং বুদ্ধস্স সাসন’’ন্তি॥
‘‘Paṭisambhidā catasso…pe… kataṃ buddhassa sāsana’’nti.
অরহত্তং পন পত্ৰা সমাপত্তিসুখেন ৰীতিনামেন্তো উপসম্পজ্জিতুকামো ‘‘মাতরং আপুচ্ছিস্সামী’’তি মাতু সন্তিকং গচ্ছন্তো অন্তরামগ্গে দেৰতায বলিকম্মকরণত্থং মংসপরিযেসনং চরন্তেহি পঞ্চসতেহি চোরেহি সমাগচ্ছি। চোরা চ তং অগ্গহেসুং ‘‘দেৰতায বলি ভৰিস্সতী’’তি। সো চোরেহি গহিতোপি অভীতো অচ্ছম্ভী ৰিপ্পসন্নমুখোৰ অট্ঠাসি। তং দিস্ৰা চোরগামণিঅচ্ছরিযব্ভুতচিত্তজাতো পসংসন্তো –
Arahattaṃ pana patvā samāpattisukhena vītināmento upasampajjitukāmo ‘‘mātaraṃ āpucchissāmī’’ti mātu santikaṃ gacchanto antarāmagge devatāya balikammakaraṇatthaṃ maṃsapariyesanaṃ carantehi pañcasatehi corehi samāgacchi. Corā ca taṃ aggahesuṃ ‘‘devatāya bali bhavissatī’’ti. So corehi gahitopi abhīto acchambhī vippasannamukhova aṭṭhāsi. Taṃ disvā coragāmaṇiacchariyabbhutacittajāto pasaṃsanto –
৭০৫.
705.
‘‘যঞ্ঞত্থং ৰা ধনত্থং ৰা, যে হনাম মযং পুরে।
‘‘Yaññatthaṃ vā dhanatthaṃ vā, ye hanāma mayaṃ pure;
অৰসেসং ভযং হোতি, ৰেধন্তি ৰিলপন্তি চ॥
Avasesaṃ bhayaṃ hoti, vedhanti vilapanti ca.
৭০৬.
706.
‘‘তস্স তে নত্থি ভীতত্তং, ভিয্যো ৰণ্ণো পসীদতি।
‘‘Tassa te natthi bhītattaṃ, bhiyyo vaṇṇo pasīdati;
কস্মা ন পরিদেৰেসি, এৰরূপে মহব্ভযে’’তি॥ – দ্ৰে গাথা অভাসি।
Kasmā na paridevesi, evarūpe mahabbhaye’’ti. – dve gāthā abhāsi;
তত্থ যঞ্ঞত্থন্তি যজনত্থং দেৰতানং বলিকম্মকরণত্থং ৰা। ৰা-সদ্দো ৰিকপ্পনত্থো। ধনত্থন্তি সাপতেয্যহরণত্থং। যে হনাম মযং পুরেতি যে সত্তে মযং পুব্বে হনিম্হ। অতীতত্থে হি ইদং ৰত্তমানৰচনং। অৰসেতি অৰসে অসেরিকে কত্ৰা। তন্তি তেসং। ‘‘অৰসেসন্তি’’পি পঠন্তি। অম্হেহি গহিতেসু তং একং ঠপেত্ৰা অৰসেসানং; অযমেৰ ৰা পাঠো। ভযং হোতীতি মরণভযং হোতি। যেন তে ৰেধন্তি ৰিলপন্তি,চিত্তুত্রাসেন ৰেধন্তি , ‘‘সামি, তুম্হাকং ইদঞ্চিদঞ্চ দস্সাম, দাসা ভৰিস্সামা’’তিআদিকং ৰদন্তা ৰিলপন্তি।
Tattha yaññatthanti yajanatthaṃ devatānaṃ balikammakaraṇatthaṃ vā. Vā-saddo vikappanattho. Dhanatthanti sāpateyyaharaṇatthaṃ. Ye hanāma mayaṃ pureti ye satte mayaṃ pubbe hanimha. Atītatthe hi idaṃ vattamānavacanaṃ. Avaseti avase aserike katvā. Tanti tesaṃ. ‘‘Avasesanti’’pi paṭhanti. Amhehi gahitesu taṃ ekaṃ ṭhapetvā avasesānaṃ; ayameva vā pāṭho. Bhayaṃ hotīti maraṇabhayaṃ hoti. Yena te vedhanti vilapanti,cittutrāsena vedhanti , ‘‘sāmi, tumhākaṃ idañcidañca dassāma, dāsā bhavissāmā’’tiādikaṃ vadantā vilapanti.
তস্স তেতি যো ত্ৰং অম্হেহি দেৰতায বলিকম্মত্থং জীৰিতা ৰোরোপেতুকামেহি উক্খিত্তাসিকেহি সন্তজ্জিতো, তস্স তে। ভীতত্তন্তি ভীতভাৰো, ভযন্তি অত্থো। ভিয্যো ৰণ্ণো পসীদতীতি পকতিৰণ্ণতো উপরিপি তে মুখৰণ্ণো ৰিপ্পসীদতি। থেরস্স কির তদা ‘‘সচে ইমে মারেস্সন্তি, ইদানেৰাহং অনুপাদায পরিনিব্বাযিস্সামি, দুক্খভারো ৰিগচ্ছিস্সতী’’তি উল়ারং পীতিসোমনস্সং উপ্পজ্জি। এৰরূপে মহব্ভযেতি এদিসে মহতি মরণভযে উপট্ঠিতে। হেতুঅত্থে ৰা এতং ভুম্মৰচনং।
Tassa teti yo tvaṃ amhehi devatāya balikammatthaṃ jīvitā voropetukāmehi ukkhittāsikehi santajjito, tassa te. Bhītattanti bhītabhāvo, bhayanti attho. Bhiyyo vaṇṇo pasīdatīti pakativaṇṇato uparipi te mukhavaṇṇo vippasīdati. Therassa kira tadā ‘‘sace ime māressanti, idānevāhaṃ anupādāya parinibbāyissāmi, dukkhabhāro vigacchissatī’’ti uḷāraṃ pītisomanassaṃ uppajji. Evarūpe mahabbhayeti edise mahati maraṇabhaye upaṭṭhite. Hetuatthe vā etaṃ bhummavacanaṃ.
ইদানি থেরো চোরগামণিস্স পটিৰচনদানমুখেন ধম্মং দেসেন্তো –
Idāni thero coragāmaṇissa paṭivacanadānamukhena dhammaṃ desento –
৭০৭.
707.
‘‘নত্থি চেতসিকং দুক্খং, অনপেক্খস্স গামণি।
‘‘Natthi cetasikaṃ dukkhaṃ, anapekkhassa gāmaṇi;
অতিক্কন্তা ভযা সব্বে, খীণসংযোজনস্স ৰে॥
Atikkantā bhayā sabbe, khīṇasaṃyojanassa ve.
৭০৮.
708.
‘‘খীণায ভৰনেত্তিযা, দিট্ঠে ধম্মে যথাতথে।
‘‘Khīṇāya bhavanettiyā, diṭṭhe dhamme yathātathe;
ন ভযং মরণে হোতি, ভারনিক্খেপনে যথা॥
Na bhayaṃ maraṇe hoti, bhāranikkhepane yathā.
৭০৯.
709.
‘‘সুচিণ্ণং ব্রহ্মচরিযং মে, মগ্গো চাপি সুভাৰিতো।
‘‘Suciṇṇaṃ brahmacariyaṃ me, maggo cāpi subhāvito;
মরণে মে ভযং নত্থি, রোগানমিৰ সঙ্খযে॥
Maraṇe me bhayaṃ natthi, rogānamiva saṅkhaye.
৭১০.
710.
‘‘সুচিণ্ণং ব্রহ্মচরিযং মে, মগ্গো চাপি সুভাৰিতো।
‘‘Suciṇṇaṃ brahmacariyaṃ me, maggo cāpi subhāvito;
নিরস্সাদা ভৰা দিট্ঠা, ৰিসং পিত্ৰাৰ ছড্ডিতং॥
Nirassādā bhavā diṭṭhā, visaṃ pitvāva chaḍḍitaṃ.
৭১১.
711.
‘‘পারগূ অনুপাদানো, কতকিচ্চো অনাসৰো।
‘‘Pāragū anupādāno, katakicco anāsavo;
তুট্ঠো আযুক্খযা হোতি, মুত্তো আঘাতনা যথা॥
Tuṭṭho āyukkhayā hoti, mutto āghātanā yathā.
৭১২.
712.
‘‘উত্তমং ধম্মতং পত্তো, সব্বলোকে অনত্থিকো।
‘‘Uttamaṃ dhammataṃ patto, sabbaloke anatthiko;
আদিত্তাৰ ঘরা মুত্তো, মরণস্মিং ন সোচতি॥
Ādittāva gharā mutto, maraṇasmiṃ na socati.
৭১৩.
713.
‘‘যদত্থি সঙ্গতং কিঞ্চি, ভৰো ৰা যত্থ লব্ভতি।
‘‘Yadatthi saṅgataṃ kiñci, bhavo vā yattha labbhati;
সব্বং অনিস্সরং এতং, ইতি ৰুত্তং মহেসিনা॥
Sabbaṃ anissaraṃ etaṃ, iti vuttaṃ mahesinā.
৭১৪.
714.
‘‘যো তং তথা পজানাতি, যথা বুদ্ধেন দেসিতং।
‘‘Yo taṃ tathā pajānāti, yathā buddhena desitaṃ;
ন গণ্হাতি ভৰং কিঞ্চি, সুতত্তংৰ অযোগুল়ং॥
Na gaṇhāti bhavaṃ kiñci, sutattaṃva ayoguḷaṃ.
৭১৫.
715.
‘‘ন মে হোতি ‘অহোসি’ন্তি, ‘ভৰিস্স’ন্তি ন হোতি মে।
‘‘Na me hoti ‘ahosi’nti, ‘bhavissa’nti na hoti me;
সঙ্খারা ৰিগমিস্সন্তি, তত্থ কা পরিদেৰনা॥
Saṅkhārā vigamissanti, tattha kā paridevanā.
৭১৬.
716.
‘‘সুদ্ধং ধম্মসমুপ্পাদং, সুদ্ধং সঙ্খারসন্ততিং।
‘‘Suddhaṃ dhammasamuppādaṃ, suddhaṃ saṅkhārasantatiṃ;
পস্সন্তস্স যথাভূতং, ন ভযং হোতি গামণি॥
Passantassa yathābhūtaṃ, na bhayaṃ hoti gāmaṇi.
৭১৭.
717.
‘‘তিণকট্ঠসমং লোকং, যদা পঞ্ঞায পস্সতি।
‘‘Tiṇakaṭṭhasamaṃ lokaṃ, yadā paññāya passati;
মমত্তং সো অসংৰিন্দং, ‘নত্থি মে’তি ন সোচতি॥
Mamattaṃ so asaṃvindaṃ, ‘natthi me’ti na socati.
৭১৮.
718.
‘‘উক্কণ্ঠামি সরীরেন, ভৰেনম্হি অনত্থিকো।
‘‘Ukkaṇṭhāmi sarīrena, bhavenamhi anatthiko;
সোযং ভিজ্জিস্সতি কাযো, অঞ্ঞো চ ন ভৰিস্সতি॥
Soyaṃ bhijjissati kāyo, añño ca na bhavissati.
৭১৯.
719.
‘‘যং ৰো কিচ্চং সরীরেন, তং করোথ যদিচ্ছথ।
‘‘Yaṃ vo kiccaṃ sarīrena, taṃ karotha yadicchatha;
ন মে তপ্পচ্চযা তত্থ, দোসো পেমঞ্চ হেহিতী’’তি॥ –
Na me tappaccayā tattha, doso pemañca hehitī’’ti. –
ইমা গাথা অভাসি।
Imā gāthā abhāsi.
৭২০.
720.
‘‘তস্স তং ৰচনং সুত্ৰা, অব্ভুতং লোমহংসনং।
‘‘Tassa taṃ vacanaṃ sutvā, abbhutaṃ lomahaṃsanaṃ;
সত্থানি নিক্খিপিত্ৰান, মাণৰা এতদব্রৰু’’ন্তি॥ –
Satthāni nikkhipitvāna, māṇavā etadabravu’’nti. –
অযং সঙ্গীতিকারেহি ৰুত্তগাথা। ইতো অপরা তিস্সো চোরানং, থেরস্স চ ৰচনপটিৰচনগাথা –
Ayaṃ saṅgītikārehi vuttagāthā. Ito aparā tisso corānaṃ, therassa ca vacanapaṭivacanagāthā –
৭২১.
721.
‘‘কিং ভদন্তে করিত্ৰান, কো ৰা আচরিযো তৰ।
‘‘Kiṃ bhadante karitvāna, ko vā ācariyo tava;
কস্স সাসনমাগম্ম, লব্ভতে তং অসোকতা॥
Kassa sāsanamāgamma, labbhate taṃ asokatā.
৭২২.
722.
‘‘সব্বঞ্ঞূ সব্বদস্সাৰী, জিনো আচরিযো মম।
‘‘Sabbaññū sabbadassāvī, jino ācariyo mama;
মহাকারুণিকো সত্থা, সব্বলোকতিকিচ্ছকো॥
Mahākāruṇiko satthā, sabbalokatikicchako.
৭২৩.
723.
‘‘তেনাযং দেসিতো ধম্মো, খযগামী অনুত্তরো।
‘‘Tenāyaṃ desito dhammo, khayagāmī anuttaro;
তস্স সাসনমাগম্ম, লব্ভতে তং অসোকতা॥
Tassa sāsanamāgamma, labbhate taṃ asokatā.
৭২৪.
724.
‘‘সুত্ৰান চোরা ইসিনো সুভাসিতং, নিক্খিপ্প সত্থানি চ আৰুধানি চ।
‘‘Sutvāna corā isino subhāsitaṃ, nikkhippa satthāni ca āvudhāni ca;
তম্হা চ কম্মা ৰিরমিংসু একে, একে চ পব্বজ্জমরোচযিংসু॥
Tamhā ca kammā viramiṃsu eke, eke ca pabbajjamarocayiṃsu.
৭২৫.
725.
‘‘তে পব্বজিত্ৰা সুগতস্স সাসনে, ভাৰেত্ৰ বোজ্ঝঙ্গবলানি পণ্ডিতা।
‘‘Te pabbajitvā sugatassa sāsane, bhāvetva bojjhaṅgabalāni paṇḍitā;
উদগ্গচিত্তা সুমনা কতিন্দ্রিযা, ফুসিংসু নিব্বানপদং অসঙ্খত’’ন্তি॥ –
Udaggacittā sumanā katindriyā, phusiṃsu nibbānapadaṃ asaṅkhata’’nti. –
ইমাপি সঙ্গীতিকারেহি ৰুত্তগাথা।
Imāpi saṅgītikārehi vuttagāthā.
তত্থ নত্থি চেতসিকং দুক্খং, অনপেক্খস্স, গামণীতি গামণি, অপেক্খায, তণ্হায, অভাৰেন অনপেক্খস্স মাদিসস্স, লোহিতসভাৰো পুব্বো ৰিয, চেতসিকং দুক্খং দোমনস্সং নত্থি, দোমনস্সাভাৰাপদেসেন ভযাভাৰং ৰদতি। তেনাহ ‘‘অতিক্কন্তা ভযা সব্বে’’তি। অতিক্কন্তা ভযা সব্বেতি খীণসংযোজনস্স অরহতো পঞ্চৰীসতি মহাভযা, অঞ্ঞে চ সব্বেপি ভযা একংসেন অতিক্কন্তা অতীতা, অপগতাতি অত্থো।
Tattha natthi cetasikaṃ dukkhaṃ, anapekkhassa, gāmaṇīti gāmaṇi, apekkhāya, taṇhāya, abhāvena anapekkhassa mādisassa, lohitasabhāvo pubbo viya, cetasikaṃ dukkhaṃ domanassaṃ natthi, domanassābhāvāpadesena bhayābhāvaṃ vadati. Tenāha ‘‘atikkantā bhayā sabbe’’ti. Atikkantā bhayā sabbeti khīṇasaṃyojanassa arahato pañcavīsati mahābhayā, aññe ca sabbepi bhayā ekaṃsena atikkantā atītā, apagatāti attho.
দিট্ঠে ধম্মে যথাতথেতি চতুসচ্চধম্মে পরিঞ্ঞাপহানসচ্ছিকিরিযভাৰনাৰসেন মগ্গপঞ্ঞায যথাভূতং দিট্ঠে। মরণেতি মরণহেতু। ভারনিক্খেপনে যথাতি যথা কোচি পুরিসো সীসে ঠিতেন মহতা গরুভারেন সংসীদন্তো তস্স নিক্খেপনে, অপনযনে ন ভাযতি, এৰং সম্পদমিদন্তি অত্থো। ৰুত্তঞ্হেতং ভগৰতা –
Diṭṭhe dhamme yathātatheti catusaccadhamme pariññāpahānasacchikiriyabhāvanāvasena maggapaññāya yathābhūtaṃ diṭṭhe. Maraṇeti maraṇahetu. Bhāranikkhepane yathāti yathā koci puriso sīse ṭhitena mahatā garubhārena saṃsīdanto tassa nikkhepane, apanayane na bhāyati, evaṃ sampadamidanti attho. Vuttañhetaṃ bhagavatā –
‘‘ভারা হৰে পঞ্চক্খন্ধা, ভারহারো চ পুগ্গলো।
‘‘Bhārā have pañcakkhandhā, bhārahāro ca puggalo;
ভারাদানং দুখং লোকে, ভারনিক্খেপনং সুখ’’ন্তি॥ (সং॰ নি॰ ৩.২২)।
Bhārādānaṃ dukhaṃ loke, bhāranikkhepanaṃ sukha’’nti. (saṃ. ni. 3.22);
সুচিণ্ণন্তি সুট্ঠু চরিতং। ব্রহ্মচরিযন্তি, সিক্খত্তযসঙ্গহং সাসনব্রহ্মচরিযং। ততো এৰ মগ্গো চাপি সুভাৰিতো অট্ঠঙ্গিকো অরিযমগ্গোপি সম্মদেৰ ভাৰিতো। রোগানমিৰ সঙ্খযেতি যথা বহূহি রোগেহি অভিভূতস্স আতুরস্স রোগানং সঙ্খযে পীতিসোমনস্সমেৰ হোতি, এৰং খন্ধরোগসঙ্খযে মরণে মাদিসস্স ভযং নত্থি।
Suciṇṇanti suṭṭhu caritaṃ. Brahmacariyanti, sikkhattayasaṅgahaṃ sāsanabrahmacariyaṃ. Tato eva maggo cāpi subhāvito aṭṭhaṅgiko ariyamaggopi sammadeva bhāvito. Rogānamiva saṅkhayeti yathā bahūhi rogehi abhibhūtassa āturassa rogānaṃ saṅkhaye pītisomanassameva hoti, evaṃ khandharogasaṅkhaye maraṇe mādisassa bhayaṃ natthi.
নিরস্সাদা ভৰা দিট্ঠাতি তীহি দুক্খতাহি অভিভূতা, একাদসহি অগ্গীহি আদিত্তা, তযো ভৰা নিরস্সাদা, অস্সাদরহিতা, মযা দিট্ঠা। ৰিসং পিত্ৰাৰ ছড্ডিতন্তি পমাদৰসেন ৰিসং পিৰিত্ৰা তাদিসেন পযোগেন ছড্ডিতং ৰিয মরণে মে ভযং নত্থীতি অত্থো।
Nirassādā bhavā diṭṭhāti tīhi dukkhatāhi abhibhūtā, ekādasahi aggīhi ādittā, tayo bhavā nirassādā, assādarahitā, mayā diṭṭhā. Visaṃ pitvāva chaḍḍitanti pamādavasena visaṃ pivitvā tādisena payogena chaḍḍitaṃ viya maraṇe me bhayaṃ natthīti attho.
মুত্তো আঘাতনা যথাতি যথা চোরেহি মারণত্থং আঘাতনং নীতো কেনচি উপাযেন ততো মুত্তো হট্ঠতুট্ঠো হোতি, এৰং সংসারপারং, নিব্বানং, গতত্তা পারগূ, চতূহিপি উপাদানেহি অনুপাদানো, পরিঞ্ঞাদীনং সোল়সন্নং কিচ্চানং কতত্তা কতকিচ্চো কামাসৰাদীহি অনাসৰো, আযুক্খযা আযুক্খযহেতু তুট্ঠো সোমনস্সিকো হোতি।
Muttoāghātanā yathāti yathā corehi māraṇatthaṃ āghātanaṃ nīto kenaci upāyena tato mutto haṭṭhatuṭṭho hoti, evaṃ saṃsārapāraṃ, nibbānaṃ, gatattā pāragū, catūhipi upādānehi anupādāno, pariññādīnaṃ soḷasannaṃ kiccānaṃ katattā katakicco kāmāsavādīhi anāsavo, āyukkhayā āyukkhayahetu tuṭṭho somanassiko hoti.
উত্তমন্তি সেট্ঠং। ধম্মতন্তি, ধম্মসভাৰং। অরহত্তে সিদ্ধে সিজ্ঝনহেতু ইট্ঠাদীসু তাদিভাৰং। সব্বলোকেতি সব্বলোকস্মিম্পি, দীঘাযুকসুখবহুলতাদিৰসেন সংযুত্তেপি লোকে। অনত্থিকোতি, অনপেক্খো। আদিত্তাৰ ঘরা মুত্তোতি যথা কোচি পুরিসো সমন্ততো আদিত্ততো পজ্জলিততো গেহতো নিস্সটো, ততো নিস্সরণনিমিত্তং ন সোচতি, এৰং খীণাসৰো মরণনিমিত্তং ন সোচতি।
Uttamanti seṭṭhaṃ. Dhammatanti, dhammasabhāvaṃ. Arahatte siddhe sijjhanahetu iṭṭhādīsu tādibhāvaṃ. Sabbaloketi sabbalokasmimpi, dīghāyukasukhabahulatādivasena saṃyuttepi loke. Anatthikoti, anapekkho. Ādittāva gharā muttoti yathā koci puriso samantato ādittato pajjalitato gehato nissaṭo, tato nissaraṇanimittaṃ na socati, evaṃ khīṇāsavo maraṇanimittaṃ na socati.
যদত্থি সঙ্গতং কিঞ্চীতি যংকিঞ্চি ইমস্মিং লোকে অত্থি, ৰিজ্জতি, উপলব্ভতি সঙ্গতং, সত্তেহি সঙ্খারেহি ৰা সমাগমো, সমোধানং। ‘‘সঙ্খত’’ন্তিপি পাঠো, তস্স যংকিঞ্চি পচ্চযেহি সমচ্চ সম্ভুয্য কতং, পটিচ্চসমুপ্পন্নন্তি অত্থো। ভৰো ৰা যত্থ লব্ভতীতি যস্মিং সত্তনিকাযে যো উপপত্তিভৰো লব্ভতি। সব্বং অনিস্সরং এতন্তি সব্বমেতং ইস্সররহিতং, ন এত্থ কেনচি ‘‘এৰং হোতূ’’তি ইস্সরিযং ৰত্তেতুং সক্কা। ইতি ৰুত্তং মহেসিনাতি ‘‘সব্বে ধম্মা অনত্তা’’তি এৰং ৰুত্তং মহেসিনা সম্মাসম্বুদ্ধেন। তস্মা ‘‘অনিস্সরং এত’’ন্তি পজানন্তো মরণস্মিং ন সোচতীতি যোজনা।
Yadatthi saṅgataṃ kiñcīti yaṃkiñci imasmiṃ loke atthi, vijjati, upalabbhati saṅgataṃ, sattehi saṅkhārehi vā samāgamo, samodhānaṃ. ‘‘Saṅkhata’’ntipi pāṭho, tassa yaṃkiñci paccayehi samacca sambhuyya kataṃ, paṭiccasamuppannanti attho. Bhavo vā yattha labbhatīti yasmiṃ sattanikāye yo upapattibhavo labbhati. Sabbaṃ anissaraṃ etanti sabbametaṃ issararahitaṃ, na ettha kenaci ‘‘evaṃ hotū’’ti issariyaṃ vattetuṃ sakkā. Iti vuttaṃ mahesināti ‘‘sabbe dhammā anattā’’ti evaṃ vuttaṃ mahesinā sammāsambuddhena. Tasmā ‘‘anissaraṃ eta’’nti pajānanto maraṇasmiṃ na socatīti yojanā.
ন গণ্হাতি ভৰং কিঞ্চীতি যো অরিযসাৰকো ‘‘সব্বে সঙ্খারা অনিচ্চা’’তিআদিনা (ধ॰ প॰ ২৭৭) যথা বুদ্ধেন ভগৰতা দেসিতং, তথা তং ভৰত্তযং ৰিপস্সনাপঞ্ঞাসহিতায মগ্গপঞ্ঞায পজানাতি। সো যথা কোচি পুরিসো সুখকামো দিৰসং সন্তত্তং অযোগুল়ং হত্থেন ন গণ্হাতি, এৰং কিঞ্চি খুদ্দকং ৰা মহন্তং ৰা ভৰং ন গণ্হাতি, ন তত্থ তণ্হং করোতীতি অত্থো।
Nagaṇhāti bhavaṃ kiñcīti yo ariyasāvako ‘‘sabbe saṅkhārā aniccā’’tiādinā (dha. pa. 277) yathā buddhena bhagavatā desitaṃ, tathā taṃ bhavattayaṃ vipassanāpaññāsahitāya maggapaññāya pajānāti. So yathā koci puriso sukhakāmo divasaṃ santattaṃ ayoguḷaṃ hatthena na gaṇhāti, evaṃ kiñci khuddakaṃ vā mahantaṃ vā bhavaṃ na gaṇhāti, na tattha taṇhaṃ karotīti attho.
ন মে হোতি ‘‘অহোসি’’ন্তি ‘‘অতীতমদ্ধানং অহং ঈদিসো অহোসি’’ন্তি অত্তদিট্ঠিৰসেন ন মে চিত্তপ্পৰত্তি অত্থি দিট্ঠিযা সম্মদেৰ উগ্ঘাটিতত্তা, ধম্মসভাৰস্স চ সুদিট্ঠত্তা। ‘‘ভৰিস্স’’ন্তি ন হোতি মেতি ততো এৰ ‘‘অনাগতমদ্ধানং অহং এদিসো কথং নু খো ভৰিস্সং ভৰেয্য’’ন্তি এৰম্পি মে ন হোতি। সঙ্খারা ৰিগমিস্সন্তীতি এৰং পন হোতি ‘‘যথাপচ্চযং পৰত্তমানা সঙ্খারাৰ, ন এত্থ কোচি অত্তা ৰা অত্তনিযং ৰা, তে চ খো ৰিগমিস্সন্তি , ৰিনস্সিস্সন্তি, খণে খণে ভিজ্জিস্সন্তী’’তি। তত্থ কা পরিদেৰনাতি এৰং পস্সন্তস্স মাদিসস্স তত্থ সঙ্খারগতে কা নাম পরিদেৰনা।
Na me hoti ‘‘ahosi’’nti ‘‘atītamaddhānaṃ ahaṃ īdiso ahosi’’nti attadiṭṭhivasena na me cittappavatti atthi diṭṭhiyā sammadeva ugghāṭitattā, dhammasabhāvassa ca sudiṭṭhattā. ‘‘Bhavissa’’nti na hoti meti tato eva ‘‘anāgatamaddhānaṃ ahaṃ ediso kathaṃ nu kho bhavissaṃ bhaveyya’’nti evampi me na hoti. Saṅkhārā vigamissantīti evaṃ pana hoti ‘‘yathāpaccayaṃ pavattamānā saṅkhārāva, na ettha koci attā vā attaniyaṃ vā, te ca kho vigamissanti , vinassissanti, khaṇe khaṇe bhijjissantī’’ti. Tattha kā paridevanāti evaṃ passantassa mādisassa tattha saṅkhāragate kā nāma paridevanā.
সুদ্ধন্তি কেৰলং, অত্তসারেন অসম্মিস্সং। ধম্মসমুপ্পাদন্তি পচ্চযপচ্চযুপ্পন্নধম্মসমুপ্পত্তিং অৰিজ্জাদিপচ্চযেহি সঙ্খারাদিধম্মমত্তপ্পৰত্তিং। সঙ্খারসন্ততিন্তি কিলেসকম্মৰিপাকপ্পভেদসঙ্খারপবন্ধং। পস্সন্তস্স যথাভূতন্তি সহ ৰিপস্সনায মগ্গপঞ্ঞায যাথাৰতো জানন্তস্স।
Suddhanti kevalaṃ, attasārena asammissaṃ. Dhammasamuppādanti paccayapaccayuppannadhammasamuppattiṃ avijjādipaccayehi saṅkhārādidhammamattappavattiṃ. Saṅkhārasantatinti kilesakammavipākappabhedasaṅkhārapabandhaṃ. Passantassa yathābhūtanti saha vipassanāya maggapaññāya yāthāvato jānantassa.
তিণকট্ঠসমং লোকন্তি যথা অরঞ্ঞে অপরিগ্গহে তিণকট্ঠে কেনচি গয্হমানে অপরস্স ‘‘ময্হং সন্তকং অযং গণ্হতী’’তি ন হোতি, এৰং সো অসামিকতায তিণকট্ঠসমং সঙ্খারলোকং যদা পঞ্ঞায পস্সতি, সো তত্থ মমত্তং অসংৰিন্দং অসংৰিন্দন্তো অলভন্তো অকরোন্তো। নত্থি মেতি ‘‘অহু ৰত সোহং, তং মে নত্থী’’তি ন সোচতি।
Tiṇakaṭṭhasamaṃ lokanti yathā araññe apariggahe tiṇakaṭṭhe kenaci gayhamāne aparassa ‘‘mayhaṃ santakaṃ ayaṃ gaṇhatī’’ti na hoti, evaṃ so asāmikatāya tiṇakaṭṭhasamaṃ saṅkhāralokaṃ yadā paññāya passati, so tattha mamattaṃ asaṃvindaṃ asaṃvindanto alabhanto akaronto. Natthi meti ‘‘ahu vata sohaṃ, taṃ me natthī’’ti na socati.
উক্কণ্ঠামি সরীরেনাতি অসারকেন অভিনুদেন দুক্খেন অকতঞ্ঞুনা অসুচিদুগ্গন্ধজেগুচ্ছপটিক্কূলসভাৰেন ইমিনা কাযেন উক্কণ্ঠামি ইমং কাযং নিব্বিন্দন্তো এৰং তিট্ঠামি। ভৰেনম্হি অনত্থিকোতি সব্বেনপি ভৰেন অনত্থিকো অম্হি, ন কিঞ্চি ভৰং পত্থেমি। সোযং ভিজ্জিস্সতি কাযোতি অযং মম কাযো ইদানি তুম্হাকং পযোগেন অঞ্ঞথা ৰা অঞ্ঞত্থ ভিজ্জিস্সতি। অঞ্ঞো চ ন ভৰিস্সতীতি অঞ্ঞো কাযো ময্হং আযতিং ন ভৰিস্সতি, পুনব্ভৰাভাৰতো।
Ukkaṇṭhāmi sarīrenāti asārakena abhinudena dukkhena akataññunā asuciduggandhajegucchapaṭikkūlasabhāvena iminā kāyena ukkaṇṭhāmi imaṃ kāyaṃ nibbindanto evaṃ tiṭṭhāmi. Bhavenamhi anatthikoti sabbenapi bhavena anatthiko amhi, na kiñci bhavaṃ patthemi. Soyaṃ bhijjissati kāyoti ayaṃ mama kāyo idāni tumhākaṃ payogena aññathā vā aññattha bhijjissati. Añño ca na bhavissatīti añño kāyo mayhaṃ āyatiṃ na bhavissati, punabbhavābhāvato.
যং ৰো কিচ্চং সরীরেনাতি যং তুম্হাকং ইমিনা সরীরেন পযোজনং, তং করোথ যদিচ্ছথ, ইচ্ছথ চে। ন মে তপ্পচ্চযাতি, তং নিমিত্তং ইমস্স সরীরস্স তুম্হেহি যথিচ্ছিতকিচ্চস্স করণহেতু। তত্থাতি তেসু করোন্তেসু চ অকরোন্তেসু চ। দোসো পেমঞ্চ হেহিতীতি যথাক্কমং পটিঘো অনুনযো ন ভৰিস্সতি, অত্তনো ভৰে অপেক্খায সব্বসো পহীনত্তাতি অধিপ্পাযো। অঞ্ঞপচ্চযা অঞ্ঞত্থ চ পটিঘানুনযেসু অসন্তেসুপি তপ্পচ্চযা, ‘‘তত্থা’’তি ৰচনং যথাধিগতৰসেন ৰুত্তং।
Yaṃ vo kiccaṃ sarīrenāti yaṃ tumhākaṃ iminā sarīrena payojanaṃ, taṃ karotha yadicchatha, icchatha ce. Na me tappaccayāti, taṃ nimittaṃ imassa sarīrassa tumhehi yathicchitakiccassa karaṇahetu. Tatthāti tesu karontesu ca akarontesu ca. Doso pemañca hehitīti yathākkamaṃ paṭigho anunayo na bhavissati, attano bhave apekkhāya sabbaso pahīnattāti adhippāyo. Aññapaccayā aññattha ca paṭighānunayesu asantesupi tappaccayā, ‘‘tatthā’’ti vacanaṃ yathādhigatavasena vuttaṃ.
তস্সাতি অধিমুত্তত্থেরস্স। তং ৰচনন্তি ‘‘নত্থি চেতসিকং দুক্খ’’ন্তিআদিকং মরণে ভযাভাৰাদিদীপকং, ততো এৰ অব্ভুতং লোমহংসনং ৰচনং সুত্ৰা। মাণৰাতি চোরা। চোরা হি ‘‘মাণৰা’’তি ৰুচ্চন্তি ‘‘মাণৰেহি সহ গচ্ছন্তি কতকম্মেহি অকতকম্মেহিপী’’তিআদীসু (ম॰ নি॰ ২.১৪৯) ৰিয।
Tassāti adhimuttattherassa. Taṃ vacananti ‘‘natthi cetasikaṃ dukkha’’ntiādikaṃ maraṇe bhayābhāvādidīpakaṃ, tato eva abbhutaṃ lomahaṃsanaṃ vacanaṃ sutvā. Māṇavāti corā. Corā hi ‘‘māṇavā’’ti vuccanti ‘‘māṇavehi saha gacchanti katakammehi akatakammehipī’’tiādīsu (ma. ni. 2.149) viya.
কিং ভদন্তে করিত্ৰানাতি, ভন্তে, কিং নাম তপোকম্মং কত্ৰা। কো ৰা তৰ আচরিযো কস্স সাসনং, ওৰাদং নিস্সায অযং অসোকতা মরণকালে সোকাভাৰো লব্ভতীতি এতং অত্থং অব্রৰুং, পুচ্ছাৰসেন কথেসুং, ভাসিংসু।
Kiṃbhadante karitvānāti, bhante, kiṃ nāma tapokammaṃ katvā. Ko vā tava ācariyo kassa sāsanaṃ, ovādaṃ nissāya ayaṃ asokatā maraṇakāle sokābhāvo labbhatīti etaṃ atthaṃ abravuṃ, pucchāvasena kathesuṃ, bhāsiṃsu.
তং সুত্ৰা থেরো তেসং পটিৰচনং দেন্তো ‘‘সব্বঞ্ঞূ’’তিআদিমাহ। তত্থ সব্বঞ্ঞূতি পরোপদেসেন ৰিনা সব্বপকারেন সব্বধম্মাৰবোধনসমত্থস্স আকঙ্খাপটিবদ্ধৰুত্তিনো অনাৰরণঞাণস্স অধিগমেন অতীতাদিভেদং সব্বং জানাতীতি, সব্বঞ্ঞূ। তেনেৰ সমন্তচক্খুনা সব্বস্স দস্সনতো সব্বদস্সাৰী। যম্হি অনাৰরণঞাণং, তদেৰ সব্বঞ্ঞুতঞ্ঞাণং, নত্থেৰ অসাধারণঞাণপাল়িযা ৰিরোধো ৰিসযুপ্পত্তিমুখেন অঞ্ঞেহি অসাধারণভাৰদস্সনত্থং একস্সেৰ ঞাণস্স দ্ৰিধা ৰুত্তত্তা। যং পনেত্থ ৰত্তব্বং, তং ইতিৰুত্তকৰণ্ণনাযং (ইতিৰু॰ অট্ঠ॰ ৩৮) ৰিত্থারতো ৰুত্তমেৰাতি তত্থ ৰুত্তনযেনেৰ ৰেদিতব্বং। পঞ্চন্নম্পি মারানং ৰিজযতো জিনো, হীনাদিৰিভাগভিন্নে সব্বস্মিং সত্তনিকাযে অধিমুত্তৰুত্তিতায মহতিযা করুণায সমন্নাগতত্তা মহাকারুণিকো, দিট্ঠধম্মিকসম্পরাযিকপরমত্থেহি যথারহং ৰেনেয্যানং অনুসাসনতো সত্থা, ততো এৰ সব্বলোকস্স কিলেসরোগতিকিচ্ছনতো সব্বলোকতিকিচ্ছকো, সম্মাসম্বুদ্ধো আচরিযো মমাতি যোজনা। খযগামীতি নিব্বানগামী।
Taṃ sutvā thero tesaṃ paṭivacanaṃ dento ‘‘sabbaññū’’tiādimāha. Tattha sabbaññūti paropadesena vinā sabbapakārena sabbadhammāvabodhanasamatthassa ākaṅkhāpaṭibaddhavuttino anāvaraṇañāṇassa adhigamena atītādibhedaṃ sabbaṃ jānātīti, sabbaññū. Teneva samantacakkhunā sabbassa dassanato sabbadassāvī. Yamhi anāvaraṇañāṇaṃ, tadeva sabbaññutaññāṇaṃ, nattheva asādhāraṇañāṇapāḷiyā virodho visayuppattimukhena aññehi asādhāraṇabhāvadassanatthaṃ ekasseva ñāṇassa dvidhā vuttattā. Yaṃ panettha vattabbaṃ, taṃ itivuttakavaṇṇanāyaṃ (itivu. aṭṭha. 38) vitthārato vuttamevāti tattha vuttanayeneva veditabbaṃ. Pañcannampi mārānaṃ vijayato jino, hīnādivibhāgabhinne sabbasmiṃ sattanikāye adhimuttavuttitāya mahatiyā karuṇāya samannāgatattā mahākāruṇiko, diṭṭhadhammikasamparāyikaparamatthehi yathārahaṃ veneyyānaṃ anusāsanato satthā, tato eva sabbalokassa kilesarogatikicchanato sabbalokatikicchako, sammāsambuddho ācariyo mamāti yojanā. Khayagāmīti nibbānagāmī.
এৰং থেরেন সত্থু সাসনস্স চ গুণে পকাসিতে পটিলদ্ধসদ্ধা একচ্চে চোরা পব্বজিংসু, একচ্চে উপাসকত্তং পৰেদেসুং। তমত্থং দীপেন্তো ধম্মসঙ্গাহকা ‘‘সুত্ৰান চোরা’’তিআদিনা দ্ৰে গাথা অভাসিংসু। তত্থ ইসিনোতি অধিসীলসিক্খাদীনং এসনট্ঠেন ইসিনো, অধিমুত্তত্থেরস্স। নিক্খিপ্পাতি পহায। সত্থানি চ আৰুধানি চাতি অসিআদিসত্থানি চেৰ ধনুকলাপাদিআৰুধানি চ। তম্হা চ কম্মাতি ততো চোরকম্মতো।
Evaṃ therena satthu sāsanassa ca guṇe pakāsite paṭiladdhasaddhā ekacce corā pabbajiṃsu, ekacce upāsakattaṃ pavedesuṃ. Tamatthaṃ dīpento dhammasaṅgāhakā ‘‘sutvāna corā’’tiādinā dve gāthā abhāsiṃsu. Tattha isinoti adhisīlasikkhādīnaṃ esanaṭṭhena isino, adhimuttattherassa. Nikkhippāti pahāya. Satthāni ca āvudhāni cāti asiādisatthāni ceva dhanukalāpādiāvudhāni ca. Tamhā ca kammāti tato corakammato.
তে পব্বজিত্ৰা সুগতস্স সাসনেতি তে চোরা সোভনগমনতাদীহি সুগতস্স ভগৰতো সাসনে পব্বজ্জং উপগন্ত্ৰা। ভাৰনাৰিসেসাধিগতায ওদগ্যলক্খণায পীতিযা সমন্নাগমেন উদগ্গচিত্তা। সুমনাতি সোমনস্সপ্পত্তা। কতিন্দ্রিযাতি ভাৰিতিন্দ্রিযা। ফুসিংসূতি অগ্গমগ্গাধিগমেন অসঙ্খতং নিব্বানং অধিগচ্ছিংসু। অধিমুত্তো কির চোরে নিব্বিসেৰনে কত্ৰা, তে তত্থেৰ ঠপেত্ৰা, মাতু সন্তিকং গন্ত্ৰা, মাতরং আপুচ্ছিত্ৰা, পচ্চাগন্ত্ৰা তেহি সদ্ধিং উপজ্ঝাযস্স সন্তিকং গন্ত্ৰা, পব্বাজেত্ৰা উপসম্পদং অকাসি। অথ তেসং কম্মট্ঠানং আচিক্খি , তে নচিরস্সেৰ অরহত্তে পতিট্ঠহিংসু। তেন ৰুত্তং ‘‘পব্বজিত্ৰা…পে॰… অসঙ্খত’’ন্তি।
Te pabbajitvā sugatassa sāsaneti te corā sobhanagamanatādīhi sugatassa bhagavato sāsane pabbajjaṃ upagantvā. Bhāvanāvisesādhigatāya odagyalakkhaṇāya pītiyā samannāgamena udaggacittā. Sumanāti somanassappattā. Katindriyāti bhāvitindriyā. Phusiṃsūti aggamaggādhigamena asaṅkhataṃ nibbānaṃ adhigacchiṃsu. Adhimutto kira core nibbisevane katvā, te tattheva ṭhapetvā, mātu santikaṃ gantvā, mātaraṃ āpucchitvā, paccāgantvā tehi saddhiṃ upajjhāyassa santikaṃ gantvā, pabbājetvā upasampadaṃ akāsi. Atha tesaṃ kammaṭṭhānaṃ ācikkhi , te nacirasseva arahatte patiṭṭhahiṃsu. Tena vuttaṃ ‘‘pabbajitvā…pe… asaṅkhata’’nti.
অধিমুত্তত্থেরগাথাৰণ্ণনা নিট্ঠিতা।
Adhimuttattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ১. অধিমুত্তত্থেরগাথা • 1. Adhimuttattheragāthā
