| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. আধিপতেয্যসুত্তং
10. Ādhipateyyasuttaṃ
৪০. ‘‘তীণিমানি , ভিক্খৰে, আধিপতেয্যানি। কতমানি তীণি? অত্তাধিপতেয্যং, লোকাধিপতেয্যং, ধম্মাধিপতেয্যং। কতমঞ্চ, ভিক্খৰে, অত্তাধিপতেয্যং? ইধ, ভিক্খৰে, ভিক্খু অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা ইতি পটিসঞ্চিক্খতি – ‘ন খো পনাহং চীৰরহেতু অগারস্মা অনগারিযং পব্বজিতো। ন পিণ্ডপাতহেতু, ন সেনাসনহেতু, ন ইতিভৰাভৰহেতু অগারস্মা অনগারিযং পব্বজিতো। অপি চ খোম্হি ওতিণ্ণো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপরেতো। অপ্পেৰ নাম ইমস্স কেৰলস্স দুক্খক্খন্ধস্স অন্তকিরিযা পঞ্ঞাযেথাতি। অহঞ্চেৰ খো পন যাদিসকে 1 কামে ওহায অগারস্মা অনগারিযং পব্বজিতো তাদিসকে ৰা 2 কামে পরিযেসেয্যং ততো ৰা 3 পাপিট্ঠতরে, ন মেতং পতিরূপ’ন্তি। সো ইতি পটিসঞ্চিক্খতি – ‘আরদ্ধং খো পন মে ৰীরিযং ভৰিস্সতি অসল্লীনং, উপট্ঠিতা সতি অসম্মুট্ঠা, পস্সদ্ধো কাযো অসারদ্ধো, সমাহিতং চিত্তং একগ্গ’ন্তি। সো অত্তানংযেৰ অধিপতিং করিত্ৰা অকুসলং পজহতি, কুসলং ভাৰেতি, সাৰজ্জং পজহতি, অনৰজ্জং ভাৰেতি, সুদ্ধং অত্তানং পরিহরতি। ইদং ৰুচ্চতি, ভিক্খৰে, অত্তাধিপতেয্যং।
40. ‘‘Tīṇimāni , bhikkhave, ādhipateyyāni. Katamāni tīṇi? Attādhipateyyaṃ, lokādhipateyyaṃ, dhammādhipateyyaṃ. Katamañca, bhikkhave, attādhipateyyaṃ? Idha, bhikkhave, bhikkhu araññagato vā rukkhamūlagato vā suññāgāragato vā iti paṭisañcikkhati – ‘na kho panāhaṃ cīvarahetu agārasmā anagāriyaṃ pabbajito. Na piṇḍapātahetu, na senāsanahetu, na itibhavābhavahetu agārasmā anagāriyaṃ pabbajito. Api ca khomhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto. Appeva nāma imassa kevalassa dukkhakkhandhassa antakiriyā paññāyethāti. Ahañceva kho pana yādisake 4 kāme ohāya agārasmā anagāriyaṃ pabbajito tādisake vā 5 kāme pariyeseyyaṃ tato vā 6 pāpiṭṭhatare, na metaṃ patirūpa’nti. So iti paṭisañcikkhati – ‘āraddhaṃ kho pana me vīriyaṃ bhavissati asallīnaṃ, upaṭṭhitā sati asammuṭṭhā, passaddho kāyo asāraddho, samāhitaṃ cittaṃ ekagga’nti. So attānaṃyeva adhipatiṃ karitvā akusalaṃ pajahati, kusalaṃ bhāveti, sāvajjaṃ pajahati, anavajjaṃ bhāveti, suddhaṃ attānaṃ pariharati. Idaṃ vuccati, bhikkhave, attādhipateyyaṃ.
‘‘কতমঞ্চ, ভিক্খৰে, লোকাধিপতেয্যং? ইধ, ভিক্খৰে, ভিক্খু অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা ইতি পটিসঞ্চিক্খতি – ‘ন খো পনাহং চীৰরহেতু অগারস্মা অনগারিযং পব্বজিতো। ন পিণ্ডপাতহেতু, ন সেনাসনহেতু, ন ইতিভৰাভৰহেতু অগারস্মা অনগারিযং পব্বজিতো। অপি চ খোম্হি ওতিণ্ণো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপরেতো। অপ্পেৰ নাম ইমস্স কেৰলস্স দুক্খক্খন্ধস্স অন্তকিরিযা পঞ্ঞাযেথা’তি। অহঞ্চেৰ খো পন এৰং পব্বজিতো সমানো কামৰিতক্কং ৰা ৰিতক্কেয্যং, ব্যাপাদৰিতক্কং ৰা ৰিতক্কেয্যং, ৰিহিংসাৰিতক্কং ৰা ৰিতক্কেয্যং, মহা খো পনাযং লোকসন্নিৰাসো। মহন্তস্মিং খো পন লোকসন্নিৰাসে সন্তি সমণব্রাহ্মণা ইদ্ধিমন্তো দিব্বচক্খুকা পরচিত্তৰিদুনো। তে দূরতোপি পস্সন্তি, আসন্নাপি ন দিস্সন্তি, চেতসাপি চিত্তং পজানন্তি 7। তেপি মং এৰং জানেয্যুং – ‘পস্সথ, ভো, ইমং কুলপুত্তং সদ্ধা অগারস্মা অনগারিযং পব্বজিতো সমানো ৰোকিণ্ণো ৰিহরতি পাপকেহি অকুসলেহি ধম্মেহী’তি। দেৰতাপি খো সন্তি ইদ্ধিমন্তিনিযো দিব্বচক্খুকা পরচিত্তৰিদুনিযো। তা দূরতোপি পস্সন্তি, আসন্নাপি ন দিস্সন্তি, চেতসাপি চিত্তং জানন্তি। তাপি মং এৰং জানেয্যুং – ‘পস্সথ, ভো, ইমং কুলপুত্তং সদ্ধা অগারস্মা অনগারিযং পব্বজিতো সমানো ৰোকিণ্ণো ৰিহরতি পাপকেহি অকুসলেহি ধম্মেহী’তি। সো ইতি পটিসঞ্চিক্খতি – ‘আরদ্ধং খো পন মে ৰীরিযং ভৰিস্সতি অসল্লীনং, উপট্ঠিতা সতি অসম্মুট্ঠা, পস্সদ্ধো কাযো অসারদ্ধো, সমাহিতং চিত্তং একগ্গ’ন্তি। সো লোকংযেৰ অধিপতিং করিত্ৰা অকুসলং পজহতি, কুসলং ভাৰেতি, সাৰজ্জং পজহতি, অনৰজ্জং ভাৰেতি, সুদ্ধং অত্তানং পরিহরতি। ইদং ৰুচ্চতি, ভিক্খৰে, লোকাধিপতেয্যং।
‘‘Katamañca, bhikkhave, lokādhipateyyaṃ? Idha, bhikkhave, bhikkhu araññagato vā rukkhamūlagato vā suññāgāragato vā iti paṭisañcikkhati – ‘na kho panāhaṃ cīvarahetu agārasmā anagāriyaṃ pabbajito. Na piṇḍapātahetu, na senāsanahetu, na itibhavābhavahetu agārasmā anagāriyaṃ pabbajito. Api ca khomhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto. Appeva nāma imassa kevalassa dukkhakkhandhassa antakiriyā paññāyethā’ti. Ahañceva kho pana evaṃ pabbajito samāno kāmavitakkaṃ vā vitakkeyyaṃ, byāpādavitakkaṃ vā vitakkeyyaṃ, vihiṃsāvitakkaṃ vā vitakkeyyaṃ, mahā kho panāyaṃ lokasannivāso. Mahantasmiṃ kho pana lokasannivāse santi samaṇabrāhmaṇā iddhimanto dibbacakkhukā paracittaviduno. Te dūratopi passanti, āsannāpi na dissanti, cetasāpi cittaṃ pajānanti 8. Tepi maṃ evaṃ jāneyyuṃ – ‘passatha, bho, imaṃ kulaputtaṃ saddhā agārasmā anagāriyaṃ pabbajito samāno vokiṇṇo viharati pāpakehi akusalehi dhammehī’ti. Devatāpi kho santi iddhimantiniyo dibbacakkhukā paracittaviduniyo. Tā dūratopi passanti, āsannāpi na dissanti, cetasāpi cittaṃ jānanti. Tāpi maṃ evaṃ jāneyyuṃ – ‘passatha, bho, imaṃ kulaputtaṃ saddhā agārasmā anagāriyaṃ pabbajito samāno vokiṇṇo viharati pāpakehi akusalehi dhammehī’ti. So iti paṭisañcikkhati – ‘āraddhaṃ kho pana me vīriyaṃ bhavissati asallīnaṃ, upaṭṭhitā sati asammuṭṭhā, passaddho kāyo asāraddho, samāhitaṃ cittaṃ ekagga’nti. So lokaṃyeva adhipatiṃ karitvā akusalaṃ pajahati, kusalaṃ bhāveti, sāvajjaṃ pajahati, anavajjaṃ bhāveti, suddhaṃ attānaṃ pariharati. Idaṃ vuccati, bhikkhave, lokādhipateyyaṃ.
‘‘কতমঞ্চ, ভিক্খৰে, ধম্মাধিপতেয্যং? ইধ, ভিক্খৰে, ভিক্খু অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা ইতি পটিসঞ্চিক্খতি – ‘ন খো পনাহং চীৰরহেতু অগারস্মা অনগারিযং পব্বজিতো। ন পিণ্ডপাতহেতু, ন সেনাসনহেতু, ন ইতিভৰাভৰহেতু অগারস্মা অনগারিযং পব্বজিতো। অপি চ খোম্হি ওতিণ্ণো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপরেতো। অপ্পেৰ নাম ইমস্স কেৰলস্স দুক্খক্খন্ধস্স অন্তকিরিযা পঞ্ঞাযেথাতি। স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহীতি। সন্তি খো পন মে সব্রহ্মচারী জানং পস্সং ৰিহরন্তি। অহঞ্চেৰ খো পন এৰং স্ৰাক্খাতে ধম্মৰিনযে পব্বজিতো সমানো কুসীতো ৰিহরেয্যং পমত্তো, ন মেতং অস্স পতিরূপ’ন্তি। সো ইতি পটিসঞ্চিক্খতি – ‘আরদ্ধং খো পন মে ৰীরিযং ভৰিস্সতি অসল্লীনং, উপট্ঠিতা সতি অসম্মুট্ঠা, পস্সদ্ধো কাযো অসারদ্ধো, সমাহিতং চিত্তং একগ্গ’ন্তি। সো ধম্মংযেৰ অধিপতিং করিত্ৰা অকুসলং পজহতি, কুসলং ভাৰেতি, সাৰজ্জং পজহতি, অনৰজ্জং ভাৰেতি, সুদ্ধং অত্তানং পরিহরতি। ইদং ৰুচ্চতি, ভিক্খৰে, ধম্মাধিপতেয্যং। ইমানি খো, ভিক্খৰে, তীণি আধিপতেয্যানী’’তি।
‘‘Katamañca, bhikkhave, dhammādhipateyyaṃ? Idha, bhikkhave, bhikkhu araññagato vā rukkhamūlagato vā suññāgāragato vā iti paṭisañcikkhati – ‘na kho panāhaṃ cīvarahetu agārasmā anagāriyaṃ pabbajito. Na piṇḍapātahetu, na senāsanahetu, na itibhavābhavahetu agārasmā anagāriyaṃ pabbajito. Api ca khomhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto. Appeva nāma imassa kevalassa dukkhakkhandhassa antakiriyā paññāyethāti. Svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhīti. Santi kho pana me sabrahmacārī jānaṃ passaṃ viharanti. Ahañceva kho pana evaṃ svākkhāte dhammavinaye pabbajito samāno kusīto vihareyyaṃ pamatto, na metaṃ assa patirūpa’nti. So iti paṭisañcikkhati – ‘āraddhaṃ kho pana me vīriyaṃ bhavissati asallīnaṃ, upaṭṭhitā sati asammuṭṭhā, passaddho kāyo asāraddho, samāhitaṃ cittaṃ ekagga’nti. So dhammaṃyeva adhipatiṃ karitvā akusalaṃ pajahati, kusalaṃ bhāveti, sāvajjaṃ pajahati, anavajjaṃ bhāveti, suddhaṃ attānaṃ pariharati. Idaṃ vuccati, bhikkhave, dhammādhipateyyaṃ. Imāni kho, bhikkhave, tīṇi ādhipateyyānī’’ti.
‘‘নত্থি লোকে রহো নাম, পাপকম্মং পকুব্বতো।
‘‘Natthi loke raho nāma, pāpakammaṃ pakubbato;
অত্তা তে পুরিস জানাতি, সচ্চং ৰা যদি ৰা মুসা॥
Attā te purisa jānāti, saccaṃ vā yadi vā musā.
‘‘কল্যাণং ৰত ভো সক্খি, অত্তানং অতিমঞ্ঞসি।
‘‘Kalyāṇaṃ vata bho sakkhi, attānaṃ atimaññasi;
যো সন্তং অত্তনি পাপং, অত্তানং পরিগূহসি॥
Yo santaṃ attani pāpaṃ, attānaṃ parigūhasi.
‘‘পস্সন্তি দেৰা চ তথাগতা চ,
‘‘Passanti devā ca tathāgatā ca,
লোকস্মিং বালং ৰিসমং চরন্তং।
Lokasmiṃ bālaṃ visamaṃ carantaṃ;
লোকাধিপো চ নিপকো চ ঝাযী॥
Lokādhipo ca nipako ca jhāyī.
‘‘ধম্মাধিপো চ অনুধম্মচারী,
‘‘Dhammādhipo ca anudhammacārī,
ন হীযতি সচ্চপরক্কমো মুনি।
Na hīyati saccaparakkamo muni;
পসয্হ মারং অভিভুয্য অন্তকং,
Pasayha māraṃ abhibhuyya antakaṃ,
যো চ ফুসী জাতিক্খযং পধানৰা।
Yo ca phusī jātikkhayaṃ padhānavā;
সো তাদিসো লোকৰিদূ সুমেধো,
So tādiso lokavidū sumedho,
সব্বেসু ধম্মেসু অতম্মযো মুনী’’তি॥ দসমং।
Sabbesu dhammesu atammayo munī’’ti. dasamaṃ;
দেৰদূতৰগ্গো চতুত্থো।
Devadūtavaggo catuttho.
তস্সুদ্দানং –
Tassuddānaṃ –
ব্রহ্ম আনন্দ সারিপুত্তো, নিদানং হত্থকেন চ।
Brahma ānanda sāriputto, nidānaṃ hatthakena ca;
দূতা দুৰে চ রাজানো, সুখুমালাধিপতেয্যেন চাতি॥
Dūtā duve ca rājāno, sukhumālādhipateyyena cāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. আধিপতেয্যসুত্তৰণ্ণনা • 10. Ādhipateyyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. আধিপতেয্যসুত্তৰণ্ণনা • 10. Ādhipateyyasuttavaṇṇanā
