| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. ஆதி⁴பதெய்யஸுத்தவண்ணனா
10. Ādhipateyyasuttavaṇṇanā
40. த³ஸமே அபி⁴ப⁴வித்வா பவத்தனட்டே²ன அதி⁴பதி யங் கிஞ்சி ஜெட்ட²கங் ந காரகங் அத்தானங் அதி⁴பதீதி கத்வா அத்தா ஏவ அதி⁴பதி, ததோ ஆக³தங் அத்தாதி⁴பதெய்யங். தேனாஹ ‘‘அத்தான’’ந்திஆதி³. லோகந்தி ஸத்தலோகங். ஸோ ச கோ² இத்³தி⁴விதா⁴தி³கு³ணவிஸேஸயுத்தோ அதி⁴ப்பேதோ அதி⁴பதிபா⁴வஸ்ஸ அதி⁴ப்பேதத்தா. நவவித⁴ங் லோகுத்தரத⁴ம்மந்தி உக்கட்ட²னித்³தே³ஸேன வுத்தங். இதி ப⁴வோதி ஏவங் ஸம்பத்திப⁴வோ, தத்த² ஏவங் அபி⁴வுத்³தீ⁴தி. ஸம்பத்திப⁴வஸ்ஸ ஹேதூதி தங்தங்ஸம்பத்திப⁴வஸ்ஸ தத்த² ச அபி⁴வுத்³தி⁴யா ஹேது. ஜாதினிமித்தஸ்ஸ கம்மப⁴வஸ்ஸ கதூபசிதத்தா ஜாதி அந்தோபவிட்டா². ஜராதீ³ஸுபி ஏஸேவ நயோ ஹேதுஸித்³தி⁴யா ப²லஸித்³தி⁴தோ.
40. Dasame abhibhavitvā pavattanaṭṭhena adhipati yaṃ kiñci jeṭṭhakaṃ na kārakaṃ attānaṃ adhipatīti katvā attā eva adhipati, tato āgataṃ attādhipateyyaṃ. Tenāha ‘‘attāna’’ntiādi. Lokanti sattalokaṃ. So ca kho iddhividhādiguṇavisesayutto adhippeto adhipatibhāvassa adhippetattā. Navavidhaṃ lokuttaradhammanti ukkaṭṭhaniddesena vuttaṃ. Iti bhavoti evaṃ sampattibhavo, tattha evaṃ abhivuddhīti. Sampattibhavassa hetūti taṃtaṃsampattibhavassa tattha ca abhivuddhiyā hetu. Jātinimittassa kammabhavassa katūpacitattā jāti antopaviṭṭhā. Jarādīsupi eseva nayo hetusiddhiyā phalasiddhito.
அஸல்லீனந்தி ந ஸங்கோசப்பத்தங். உபட்டி²தாதி காயாதி³ஸபா⁴வஸல்லக்க²ணவஸேன உபட்டி²தா. அஸம்முட்டா² ஸம்மோஸாபா⁴வதோ. அஸாரத்³தோ⁴தி ஸாரம்ப⁴ஸ்ஸ ஸாரம்ப⁴ஹேதூனஞ்ச விக்க²ம்ப⁴னேன அஸாரத்³தோ⁴. ஏகக்³க³ங் அனேகக்³க³பா⁴வஸ்ஸ தூ³ரஸமுஸ்ஸாபிதத்தா. நிம்மலங் கத்வாதி ராகா³தி³மலானங் அபனயனேன மலரஹிதங் கத்வா. கோ³பாயதீதி ஸங்கிலேஸானத்த²தோ ரக்க²தி. அயந்தி ஏவங்படிபன்னோ பி⁴க்கு². ஸுத்³த⁴மத்தானங் பரிஹரதி அஸுத்³த⁴பா⁴வஸ்ஸ கிலேஸஸ்ஸபி அபா⁴வதோ.
Asallīnanti na saṅkocappattaṃ. Upaṭṭhitāti kāyādisabhāvasallakkhaṇavasena upaṭṭhitā. Asammuṭṭhā sammosābhāvato. Asāraddhoti sārambhassa sārambhahetūnañca vikkhambhanena asāraddho. Ekaggaṃ anekaggabhāvassa dūrasamussāpitattā. Nimmalaṃ katvāti rāgādimalānaṃ apanayanena malarahitaṃ katvā. Gopāyatīti saṃkilesānatthato rakkhati. Ayanti evaṃpaṭipanno bhikkhu. Suddhamattānaṃ pariharati asuddhabhāvassa kilesassapi abhāvato.
அதிக்கமித்வா மஞ்ஞஸீதி அஸக்கி²ங் கத்வா மஞ்ஞஸி. தாய தண்ஹாய நிப்³ப³த்தோதி தம்மயோ, தண்ஹாவஸிகோ. தஸ்ஸ பா⁴வோ தம்மயதா, தஸ்ஸா தம்மயதாய அபா⁴வேன. ந ஹாயதி பஞ்ஞாதி³கு³ணவேபுல்லப்பத்தியா.
Atikkamitvāmaññasīti asakkhiṃ katvā maññasi. Tāya taṇhāya nibbattoti tammayo, taṇhāvasiko. Tassa bhāvo tammayatā, tassā tammayatāya abhāvena. Na hāyati paññādiguṇavepullappattiyā.
ஆதி⁴பதெய்யஸுத்தவண்ணனா நிட்டி²தா.
Ādhipateyyasuttavaṇṇanā niṭṭhitā.
தே³வதூ³தவக்³க³வண்ணனா நிட்டி²தா.
Devadūtavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. ஆதி⁴பதெய்யஸுத்தங் • 10. Ādhipateyyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. ஆதி⁴பதெய்யஸுத்தவண்ணனா • 10. Ādhipateyyasuttavaṇṇanā
