| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
১০. আধিপতেয্যসুত্তৰণ্ণনা
10. Ādhipateyyasuttavaṇṇanā
৪০. দসমে অভিভৰিত্ৰা পৰত্তনট্ঠেন অধিপতি যং কিঞ্চি জেট্ঠকং ন কারকং অত্তানং অধিপতীতি কত্ৰা অত্তা এৰ অধিপতি, ততো আগতং অত্তাধিপতেয্যং। তেনাহ ‘‘অত্তান’’ন্তিআদি। লোকন্তি সত্তলোকং। সো চ খো ইদ্ধিৰিধাদিগুণৰিসেসযুত্তো অধিপ্পেতো অধিপতিভাৰস্স অধিপ্পেতত্তা। নৰৰিধং লোকুত্তরধম্মন্তি উক্কট্ঠনিদ্দেসেন ৰুত্তং। ইতি ভৰোতি এৰং সম্পত্তিভৰো, তত্থ এৰং অভিৰুদ্ধীতি। সম্পত্তিভৰস্স হেতূতি তংতংসম্পত্তিভৰস্স তত্থ চ অভিৰুদ্ধিযা হেতু। জাতিনিমিত্তস্স কম্মভৰস্স কতূপচিতত্তা জাতি অন্তোপৰিট্ঠা। জরাদীসুপি এসেৰ নযো হেতুসিদ্ধিযা ফলসিদ্ধিতো।
40. Dasame abhibhavitvā pavattanaṭṭhena adhipati yaṃ kiñci jeṭṭhakaṃ na kārakaṃ attānaṃ adhipatīti katvā attā eva adhipati, tato āgataṃ attādhipateyyaṃ. Tenāha ‘‘attāna’’ntiādi. Lokanti sattalokaṃ. So ca kho iddhividhādiguṇavisesayutto adhippeto adhipatibhāvassa adhippetattā. Navavidhaṃ lokuttaradhammanti ukkaṭṭhaniddesena vuttaṃ. Iti bhavoti evaṃ sampattibhavo, tattha evaṃ abhivuddhīti. Sampattibhavassa hetūti taṃtaṃsampattibhavassa tattha ca abhivuddhiyā hetu. Jātinimittassa kammabhavassa katūpacitattā jāti antopaviṭṭhā. Jarādīsupi eseva nayo hetusiddhiyā phalasiddhito.
অসল্লীনন্তি ন সঙ্কোচপ্পত্তং। উপট্ঠিতাতি কাযাদিসভাৰসল্লক্খণৰসেন উপট্ঠিতা। অসম্মুট্ঠা সম্মোসাভাৰতো। অসারদ্ধোতি সারম্ভস্স সারম্ভহেতূনঞ্চ ৰিক্খম্ভনেন অসারদ্ধো। একগ্গং অনেকগ্গভাৰস্স দূরসমুস্সাপিতত্তা। নিম্মলং কত্ৰাতি রাগাদিমলানং অপনযনেন মলরহিতং কত্ৰা। গোপাযতীতি সংকিলেসানত্থতো রক্খতি। অযন্তি এৰংপটিপন্নো ভিক্খু। সুদ্ধমত্তানং পরিহরতি অসুদ্ধভাৰস্স কিলেসস্সপি অভাৰতো।
Asallīnanti na saṅkocappattaṃ. Upaṭṭhitāti kāyādisabhāvasallakkhaṇavasena upaṭṭhitā. Asammuṭṭhā sammosābhāvato. Asāraddhoti sārambhassa sārambhahetūnañca vikkhambhanena asāraddho. Ekaggaṃ anekaggabhāvassa dūrasamussāpitattā. Nimmalaṃ katvāti rāgādimalānaṃ apanayanena malarahitaṃ katvā. Gopāyatīti saṃkilesānatthato rakkhati. Ayanti evaṃpaṭipanno bhikkhu. Suddhamattānaṃ pariharati asuddhabhāvassa kilesassapi abhāvato.
অতিক্কমিত্ৰা মঞ্ঞসীতি অসক্খিং কত্ৰা মঞ্ঞসি। তায তণ্হায নিব্বত্তোতি তম্মযো, তণ্হাৰসিকো। তস্স ভাৰো তম্মযতা, তস্সা তম্মযতায অভাৰেন। ন হাযতি পঞ্ঞাদিগুণৰেপুল্লপ্পত্তিযা।
Atikkamitvāmaññasīti asakkhiṃ katvā maññasi. Tāya taṇhāya nibbattoti tammayo, taṇhāvasiko. Tassa bhāvo tammayatā, tassā tammayatāya abhāvena. Na hāyati paññādiguṇavepullappattiyā.
আধিপতেয্যসুত্তৰণ্ণনা নিট্ঠিতা।
Ādhipateyyasuttavaṇṇanā niṭṭhitā.
দেৰদূতৰগ্গৰণ্ণনা নিট্ঠিতা।
Devadūtavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. আধিপতেয্যসুত্তং • 10. Ādhipateyyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. আধিপতেয্যসুত্তৰণ্ণনা • 10. Ādhipateyyasuttavaṇṇanā
