| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
৩. অধিপতিপচ্চযনিদ্দেসৰণ্ণনা
3. Adhipatipaccayaniddesavaṇṇanā
৩. ধুরন্তি ধুরগ্গাহং। জেট্ঠকন্তি সেট্ঠং। ছন্দাধিপতি ছন্দসম্পযুত্তকানন্তি এত্থ পুরিমছন্দস্স সমানরূপেন তদনন্তরং নিদ্দিট্ঠেন তংসম্বন্ধেন ছন্দসদ্দেনেৰ পচ্চযভূতস্স ছন্দস্স সম্পযুত্তকৰিসেসনভাৰো দস্সিতো হোতীতি ‘‘ছন্দাধিপতি সম্পযুত্তকান’’ন্তি অৰত্ৰা ‘‘ছন্দসম্পযুত্তকান’’ন্তি ৰুত্তন্তি দট্ঠব্বং। এস নযো ইতরেসুপি।
3. Dhuranti dhuraggāhaṃ. Jeṭṭhakanti seṭṭhaṃ. Chandādhipati chandasampayuttakānanti ettha purimachandassa samānarūpena tadanantaraṃ niddiṭṭhena taṃsambandhena chandasaddeneva paccayabhūtassa chandassa sampayuttakavisesanabhāvo dassito hotīti ‘‘chandādhipati sampayuttakāna’’nti avatvā ‘‘chandasampayuttakāna’’nti vuttanti daṭṭhabbaṃ. Esa nayo itaresupi.
গরুকারচিত্তীকারৰসেন ৰাতি কুসলাব্যাকতানং পৰত্তিং দস্সেতি। অলদ্ধং লদ্ধব্বং, লদ্ধং অৰিজহিতব্বং। যেন ৰা ৰিনা ন ভৰিতব্বং, তং লদ্ধব্বং, তস্সেৰত্থো অৰিজহিতব্বন্তি। অনৰঞ্ঞাতন্তি অৰঞ্ঞাতম্পি অদোসদস্সিতায অস্সাদনেন অনৰঞ্ঞাতং কত্ৰা।
Garukāracittīkāravasena vāti kusalābyākatānaṃ pavattiṃ dasseti. Aladdhaṃ laddhabbaṃ, laddhaṃ avijahitabbaṃ. Yena vā vinā na bhavitabbaṃ, taṃ laddhabbaṃ, tassevattho avijahitabbanti. Anavaññātanti avaññātampi adosadassitāya assādanena anavaññātaṃ katvā.
মিচ্ছত্তনিযতা অপ্পনাসদিসা মহাবলা ৰিনা অধিপতিনা নুপ্পজ্জন্তীতি ‘‘একন্তেনেৰা’’তি আহ। কম্মকিলেসাৰরণভূতা চ তে সগ্গাৰরণা চ মগ্গাৰরণা চ পচ্চক্খসগ্গানং কামাৰচরদেৰানম্পি উপ্পজ্জিতুং ন অরহন্তি, কো পন ৰাদো রূপারূপীনন্তি।
Micchattaniyatā appanāsadisā mahābalā vinā adhipatinā nuppajjantīti ‘‘ekantenevā’’ti āha. Kammakilesāvaraṇabhūtā ca te saggāvaraṇā ca maggāvaraṇā ca paccakkhasaggānaṃ kāmāvacaradevānampi uppajjituṃ na arahanti, ko pana vādo rūpārūpīnanti.
কামাৰচরাদিভেদতো পন তিৰিধো কিরিযারম্মণাধিপতি লোভসহগতাকুসলস্সেৰ আরম্মণাধিপতিপচ্চযো হোতীতি ইদং পরসন্তানগতানং সারম্মণধম্মানং ‘‘অজ্ঝত্তারম্মণো ধম্মো বহিদ্ধারম্মণস্স ধম্মস্স অধিপতিপচ্চযেন পচ্চযো’’তি এতস্স অভাৰতো ‘‘বহিদ্ধারম্মণো ধম্মো বহিদ্ধারম্মণস্সা’’তি এত্থ চ আরম্মণাধিপতিনো অনুদ্ধটত্তা অধিপতিপচ্চযতা নত্থীতি ৰিঞ্ঞাযমানেপি ‘‘বহিদ্ধা খন্ধে গরুং কত্ৰা অস্সাদেতী’’তিআদিৰচনং (পট্ঠা॰ ২.২০.৩১) নিস্সায অরহতো কিরিযধম্মা পুথুজ্জনাদীহি গরুং কত্ৰা অস্সাদিযন্তীতি ইমিনা অধিপ্পাযেন ৰুত্তন্তি দট্ঠব্বং। ‘‘সনিদস্সনসপ্পটিঘা খন্ধা’’তিআদীসু (পট্ঠা॰ ২.২২.৩০) ৰিয খন্ধসদ্দো রূপে এৰ ভৰিতুং অরহতীতি ৰিচারিতমেতং। পুথুজ্জনাদিকালে ৰা অনাগতে কিরিযধম্মে গরুং কত্ৰা অস্সাদনং সন্ধাযেতং ৰুত্তং। ‘‘নেৰৰিপাকনৰিপাকধম্মধম্মে খন্ধে গরুং কত্ৰা অস্সাদেতি অভিনন্দতী’’তিআদিৰচনতো (পট্ঠা॰ ১.৩.৯৬) কিরিযধম্মা রাগদিট্ঠীনং অধিপতিপচ্চযো হোন্তেৰ, তে চ ‘‘অতীতারম্মণে অনাগতে খন্ধে গরুং কত্ৰা অস্সাদেতী’’তিআদিৰচনতো (পট্ঠা॰ ২.১৯.২৩) অনাগতা তেভূমকাপি অধিপতিপচ্চযো হোন্তীতি। আৰজ্জনকিরিযসব্ভাৰতো পন ইদম্পি ৰিচারেতব্বং।
Kāmāvacarādibhedato pana tividho kiriyārammaṇādhipati lobhasahagatākusalasseva ārammaṇādhipatipaccayo hotīti idaṃ parasantānagatānaṃ sārammaṇadhammānaṃ ‘‘ajjhattārammaṇo dhammo bahiddhārammaṇassa dhammassa adhipatipaccayena paccayo’’ti etassa abhāvato ‘‘bahiddhārammaṇo dhammo bahiddhārammaṇassā’’ti ettha ca ārammaṇādhipatino anuddhaṭattā adhipatipaccayatā natthīti viññāyamānepi ‘‘bahiddhā khandhe garuṃ katvā assādetī’’tiādivacanaṃ (paṭṭhā. 2.20.31) nissāya arahato kiriyadhammā puthujjanādīhi garuṃ katvā assādiyantīti iminā adhippāyena vuttanti daṭṭhabbaṃ. ‘‘Sanidassanasappaṭighā khandhā’’tiādīsu (paṭṭhā. 2.22.30) viya khandhasaddo rūpe eva bhavituṃ arahatīti vicāritametaṃ. Puthujjanādikāle vā anāgate kiriyadhamme garuṃ katvā assādanaṃ sandhāyetaṃ vuttaṃ. ‘‘Nevavipākanavipākadhammadhamme khandhe garuṃ katvā assādeti abhinandatī’’tiādivacanato (paṭṭhā. 1.3.96) kiriyadhammā rāgadiṭṭhīnaṃ adhipatipaccayo honteva, te ca ‘‘atītārammaṇe anāgate khandhe garuṃ katvā assādetī’’tiādivacanato (paṭṭhā. 2.19.23) anāgatā tebhūmakāpi adhipatipaccayo hontīti. Āvajjanakiriyasabbhāvato pana idampi vicāretabbaṃ.
অধিপতিপচ্চযনিদ্দেসৰণ্ণনা নিট্ঠিতা।
Adhipatipaccayaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / (২) পচ্চযনিদ্দেসো • (2) Paccayaniddeso
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৩. অধিপতিপচ্চযনিদ্দেসৰণ্ণনা • 3. Adhipatipaccayaniddesavaṇṇanā
