| Library / Tipiṭaka / திபிடக • Tipiṭaka / நெத்திப்பகரணபாளி • Nettippakaraṇapāḷi |
14. அதி⁴ட்டா²னஹாரஸம்பாதோ
14. Adhiṭṭhānahārasampāto
76. தத்த² கதமோ அதி⁴ட்டா²னோ ஹாரஸம்பாதோ?
76. Tattha katamo adhiṭṭhāno hārasampāto?
தஸ்மா ரக்கி²தசித்தஸ்ஸ, ஸம்மாஸங்கப்பகோ³சரோதி கா³தா². தஸ்மா ரக்கி²தசித்தஸ்ஸாதி ஏகத்ததா. சித்தங் மனோ விஞ்ஞாணங், அயங் வேமத்ததா. ஸம்மாஸங்கப்பகோ³சரோதி ஏகத்ததா. நெக்க²ம்மஸங்கப்போ அப்³யாபாத³ஸங்கப்போ அவிஹிங்ஸாஸங்கப்போ அயங் வேமத்ததா. ஸம்மாதி³ட்டி²புரெக்கா²ரோதி ஏகத்ததா. ஸம்மாதி³ட்டி² நாம யங் து³க்கே² ஞாணங் து³க்க²ஸமுத³யே ஞாணங் து³க்க²னிரோதே⁴ ஞாணங் து³க்க²னிரோத⁴கா³மினியா படிபதா³ய ஞாணங் மக்³கே³ ஞாணங் ஹேதும்ஹி ஞாணங் ஹேதுஸமுப்பன்னேஸு த⁴ம்மேஸு ஞாணங் பச்சயே ஞாணங் பச்சயஸமுப்பன்னேஸு த⁴ம்மேஸு ஞாணங், யங் தத்த² தத்த² யதா²பூ⁴தங் ஞாணத³ஸ்ஸனங் அபி⁴ஸமயோ ஸம்படிவேதோ⁴ ஸச்சாக³மனங், அயங் வேமத்ததா. ஞத்வான உத³யப்³ப³யந்தி ஏகத்ததா, உத³யேன அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணங், ஏவங் ஸப்³ப³ங் ஸமுத³யோ ப⁴வதி. வயேன அவிஜ்ஜானிரோதா⁴ ஸங்கா²ரனிரோதோ⁴, ஏவங் ஸப்³ப³ங் நிரோதோ⁴ ஹோதி, அயங் வேமத்ததா. தி²னமித்³தா⁴பி⁴பூ⁴ பி⁴க்கூ²தி ஏகத்ததா, தி²னங் நாம யா சித்தஸ்ஸ அகல்லதா அகம்மனியதா, மித்³த⁴ங் நாம யங் காயஸ்ஸ லீனத்தங், அயங் வேமத்ததா. ஸப்³பா³ து³க்³க³தியோ ஜஹேதி ஏகத்ததா, தே³வமனுஸ்ஸே வா உபனிதா⁴ய அபாயா து³க்³க³தி, நிப்³பா³னங் வா உபனிதா⁴ய ஸப்³பா³ உபபத்தியோ து³க்³க³தி, அயங் வேமத்ததா.
Tasmā rakkhitacittassa, sammāsaṅkappagocaroti gāthā. Tasmā rakkhitacittassāti ekattatā. Cittaṃ mano viññāṇaṃ, ayaṃ vemattatā. Sammāsaṅkappagocaroti ekattatā. Nekkhammasaṅkappo abyāpādasaṅkappo avihiṃsāsaṅkappo ayaṃ vemattatā. Sammādiṭṭhipurekkhāroti ekattatā. Sammādiṭṭhi nāma yaṃ dukkhe ñāṇaṃ dukkhasamudaye ñāṇaṃ dukkhanirodhe ñāṇaṃ dukkhanirodhagāminiyā paṭipadāya ñāṇaṃ magge ñāṇaṃ hetumhi ñāṇaṃ hetusamuppannesu dhammesu ñāṇaṃ paccaye ñāṇaṃ paccayasamuppannesu dhammesu ñāṇaṃ, yaṃ tattha tattha yathābhūtaṃ ñāṇadassanaṃ abhisamayo sampaṭivedho saccāgamanaṃ, ayaṃ vemattatā. Ñatvāna udayabbayanti ekattatā, udayena avijjāpaccayā saṅkhārā, saṅkhārapaccayā viññāṇaṃ, evaṃ sabbaṃ samudayo bhavati. Vayena avijjānirodhā saṅkhāranirodho, evaṃ sabbaṃ nirodho hoti, ayaṃ vemattatā. Thinamiddhābhibhū bhikkhūti ekattatā, thinaṃ nāma yā cittassa akallatā akammaniyatā, middhaṃ nāma yaṃ kāyassa līnattaṃ, ayaṃ vemattatā. Sabbā duggatiyo jaheti ekattatā, devamanusse vā upanidhāya apāyā duggati, nibbānaṃ vā upanidhāya sabbā upapattiyo duggati, ayaṃ vemattatā.
நியுத்தோ அதி⁴ட்டா²னோ ஹாரஸம்பாதோ.
Niyutto adhiṭṭhāno hārasampāto.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 14. அதி⁴ட்டா²னஹாரஸம்பாதவண்ணனா • 14. Adhiṭṭhānahārasampātavaṇṇanā
