| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
১৪. অধিট্ঠানহারসম্পাতো
14. Adhiṭṭhānahārasampāto
৭৬. তত্থ কতমো অধিট্ঠানো হারসম্পাতো?
76. Tattha katamo adhiṭṭhāno hārasampāto?
তস্মা রক্খিতচিত্তস্স, সম্মাসঙ্কপ্পগোচরোতি গাথা। তস্মা রক্খিতচিত্তস্সাতি একত্ততা। চিত্তং মনো ৰিঞ্ঞাণং, অযং ৰেমত্ততা। সম্মাসঙ্কপ্পগোচরোতি একত্ততা। নেক্খম্মসঙ্কপ্পো অব্যাপাদসঙ্কপ্পো অৰিহিংসাসঙ্কপ্পো অযং ৰেমত্ততা। সম্মাদিট্ঠিপুরেক্খারোতি একত্ততা। সম্মাদিট্ঠি নাম যং দুক্খে ঞাণং দুক্খসমুদযে ঞাণং দুক্খনিরোধে ঞাণং দুক্খনিরোধগামিনিযা পটিপদায ঞাণং মগ্গে ঞাণং হেতুম্হি ঞাণং হেতুসমুপ্পন্নেসু ধম্মেসু ঞাণং পচ্চযে ঞাণং পচ্চযসমুপ্পন্নেসু ধম্মেসু ঞাণং, যং তত্থ তত্থ যথাভূতং ঞাণদস্সনং অভিসমযো সম্পটিৰেধো সচ্চাগমনং, অযং ৰেমত্ততা। ঞত্ৰান উদযব্বযন্তি একত্ততা, উদযেন অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণং, এৰং সব্বং সমুদযো ভৰতি। ৰযেন অৰিজ্জানিরোধা সঙ্খারনিরোধো, এৰং সব্বং নিরোধো হোতি, অযং ৰেমত্ততা। থিনমিদ্ধাভিভূ ভিক্খূতি একত্ততা, থিনং নাম যা চিত্তস্স অকল্লতা অকম্মনিযতা, মিদ্ধং নাম যং কাযস্স লীনত্তং, অযং ৰেমত্ততা। সব্বা দুগ্গতিযো জহেতি একত্ততা, দেৰমনুস্সে ৰা উপনিধায অপাযা দুগ্গতি, নিব্বানং ৰা উপনিধায সব্বা উপপত্তিযো দুগ্গতি, অযং ৰেমত্ততা।
Tasmā rakkhitacittassa, sammāsaṅkappagocaroti gāthā. Tasmā rakkhitacittassāti ekattatā. Cittaṃ mano viññāṇaṃ, ayaṃ vemattatā. Sammāsaṅkappagocaroti ekattatā. Nekkhammasaṅkappo abyāpādasaṅkappo avihiṃsāsaṅkappo ayaṃ vemattatā. Sammādiṭṭhipurekkhāroti ekattatā. Sammādiṭṭhi nāma yaṃ dukkhe ñāṇaṃ dukkhasamudaye ñāṇaṃ dukkhanirodhe ñāṇaṃ dukkhanirodhagāminiyā paṭipadāya ñāṇaṃ magge ñāṇaṃ hetumhi ñāṇaṃ hetusamuppannesu dhammesu ñāṇaṃ paccaye ñāṇaṃ paccayasamuppannesu dhammesu ñāṇaṃ, yaṃ tattha tattha yathābhūtaṃ ñāṇadassanaṃ abhisamayo sampaṭivedho saccāgamanaṃ, ayaṃ vemattatā. Ñatvāna udayabbayanti ekattatā, udayena avijjāpaccayā saṅkhārā, saṅkhārapaccayā viññāṇaṃ, evaṃ sabbaṃ samudayo bhavati. Vayena avijjānirodhā saṅkhāranirodho, evaṃ sabbaṃ nirodho hoti, ayaṃ vemattatā. Thinamiddhābhibhū bhikkhūti ekattatā, thinaṃ nāma yā cittassa akallatā akammaniyatā, middhaṃ nāma yaṃ kāyassa līnattaṃ, ayaṃ vemattatā. Sabbā duggatiyo jaheti ekattatā, devamanusse vā upanidhāya apāyā duggati, nibbānaṃ vā upanidhāya sabbā upapattiyo duggati, ayaṃ vemattatā.
নিযুত্তো অধিট্ঠানো হারসম্পাতো।
Niyutto adhiṭṭhāno hārasampāto.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ১৪. অধিট্ঠানহারসম্পাতৰণ্ণনা • 14. Adhiṭṭhānahārasampātavaṇṇanā
