| Library / Tipiṭaka / തിപിടക • Tipiṭaka / നേത്തിപ്പകരണപാളി • Nettippakaraṇapāḷi |
൧൪. അധിട്ഠാനഹാരസമ്പാതോ
14. Adhiṭṭhānahārasampāto
൭൬. തത്ഥ കതമോ അധിട്ഠാനോ ഹാരസമ്പാതോ?
76. Tattha katamo adhiṭṭhāno hārasampāto?
തസ്മാ രക്ഖിതചിത്തസ്സ, സമ്മാസങ്കപ്പഗോചരോതി ഗാഥാ. തസ്മാ രക്ഖിതചിത്തസ്സാതി ഏകത്തതാ. ചിത്തം മനോ വിഞ്ഞാണം, അയം വേമത്തതാ. സമ്മാസങ്കപ്പഗോചരോതി ഏകത്തതാ. നേക്ഖമ്മസങ്കപ്പോ അബ്യാപാദസങ്കപ്പോ അവിഹിംസാസങ്കപ്പോ അയം വേമത്തതാ. സമ്മാദിട്ഠിപുരേക്ഖാരോതി ഏകത്തതാ. സമ്മാദിട്ഠി നാമ യം ദുക്ഖേ ഞാണം ദുക്ഖസമുദയേ ഞാണം ദുക്ഖനിരോധേ ഞാണം ദുക്ഖനിരോധഗാമിനിയാ പടിപദായ ഞാണം മഗ്ഗേ ഞാണം ഹേതുമ്ഹി ഞാണം ഹേതുസമുപ്പന്നേസു ധമ്മേസു ഞാണം പച്ചയേ ഞാണം പച്ചയസമുപ്പന്നേസു ധമ്മേസു ഞാണം, യം തത്ഥ തത്ഥ യഥാഭൂതം ഞാണദസ്സനം അഭിസമയോ സമ്പടിവേധോ സച്ചാഗമനം, അയം വേമത്തതാ. ഞത്വാന ഉദയബ്ബയന്തി ഏകത്തതാ, ഉദയേന അവിജ്ജാപച്ചയാ സങ്ഖാരാ, സങ്ഖാരപച്ചയാ വിഞ്ഞാണം, ഏവം സബ്ബം സമുദയോ ഭവതി. വയേന അവിജ്ജാനിരോധാ സങ്ഖാരനിരോധോ, ഏവം സബ്ബം നിരോധോ ഹോതി, അയം വേമത്തതാ. ഥിനമിദ്ധാഭിഭൂ ഭിക്ഖൂതി ഏകത്തതാ, ഥിനം നാമ യാ ചിത്തസ്സ അകല്ലതാ അകമ്മനിയതാ, മിദ്ധം നാമ യം കായസ്സ ലീനത്തം, അയം വേമത്തതാ. സബ്ബാ ദുഗ്ഗതിയോ ജഹേതി ഏകത്തതാ, ദേവമനുസ്സേ വാ ഉപനിധായ അപായാ ദുഗ്ഗതി, നിബ്ബാനം വാ ഉപനിധായ സബ്ബാ ഉപപത്തിയോ ദുഗ്ഗതി, അയം വേമത്തതാ.
Tasmā rakkhitacittassa, sammāsaṅkappagocaroti gāthā. Tasmā rakkhitacittassāti ekattatā. Cittaṃ mano viññāṇaṃ, ayaṃ vemattatā. Sammāsaṅkappagocaroti ekattatā. Nekkhammasaṅkappo abyāpādasaṅkappo avihiṃsāsaṅkappo ayaṃ vemattatā. Sammādiṭṭhipurekkhāroti ekattatā. Sammādiṭṭhi nāma yaṃ dukkhe ñāṇaṃ dukkhasamudaye ñāṇaṃ dukkhanirodhe ñāṇaṃ dukkhanirodhagāminiyā paṭipadāya ñāṇaṃ magge ñāṇaṃ hetumhi ñāṇaṃ hetusamuppannesu dhammesu ñāṇaṃ paccaye ñāṇaṃ paccayasamuppannesu dhammesu ñāṇaṃ, yaṃ tattha tattha yathābhūtaṃ ñāṇadassanaṃ abhisamayo sampaṭivedho saccāgamanaṃ, ayaṃ vemattatā. Ñatvāna udayabbayanti ekattatā, udayena avijjāpaccayā saṅkhārā, saṅkhārapaccayā viññāṇaṃ, evaṃ sabbaṃ samudayo bhavati. Vayena avijjānirodhā saṅkhāranirodho, evaṃ sabbaṃ nirodho hoti, ayaṃ vemattatā. Thinamiddhābhibhū bhikkhūti ekattatā, thinaṃ nāma yā cittassa akallatā akammaniyatā, middhaṃ nāma yaṃ kāyassa līnattaṃ, ayaṃ vemattatā. Sabbā duggatiyo jaheti ekattatā, devamanusse vā upanidhāya apāyā duggati, nibbānaṃ vā upanidhāya sabbā upapattiyo duggati, ayaṃ vemattatā.
നിയുത്തോ അധിട്ഠാനോ ഹാരസമ്പാതോ.
Niyutto adhiṭṭhāno hārasampāto.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / നേത്തിപ്പകരണ-അട്ഠകഥാ • Nettippakaraṇa-aṭṭhakathā / ൧൪. അധിട്ഠാനഹാരസമ്പാതവണ്ണനാ • 14. Adhiṭṭhānahārasampātavaṇṇanā
