| Library / Tipiṭaka / তিপিটক • Tipiṭaka / নেত্তিপ্পকরণ-টীকা • Nettippakaraṇa-ṭīkā |
১৪. অধিট্ঠানহারৰিভঙ্গৰণ্ণনা
14. Adhiṭṭhānahāravibhaṅgavaṇṇanā
৪৬. ধারযিতব্বাতি উপধারেতব্বা, উপলক্খিতব্বাতি অত্থো। ৰুত্তমেৰ ‘‘সামঞ্ঞৰিসেসকপ্পনায ৰোহারভাৰেন অনৰট্ঠানতো’’তিআদিনা (নেত্তি॰ অট্ঠ॰ ১৪)।
46.Dhārayitabbāti upadhāretabbā, upalakkhitabbāti attho. Vuttameva ‘‘sāmaññavisesakappanāya vohārabhāvena anavaṭṭhānato’’tiādinā (netti. aṭṭha. 14).
তং তং ফলন্তি নিরযাদিং তং তং ফলং। অঞ্চিতাতি গতা। যোনীতি একজাতি। সমানৰসেন মিস্সীভৰতি এতাযাতি হি যোনি, উপপত্তি। পেচ্চাতি মরিত্ৰা। উস্সন্নতাযাতি ৰিতক্কবহুলতায। ‘‘উস্সন্নত্তা’’তিপি ৰদন্তি। সস্সতাদীহি ৰা উস্সন্নত্তা। অসুরজাতিযা নিব্বত্তাপনকো অসুরজাতিনিব্বত্তনকো।
Taṃ taṃ phalanti nirayādiṃ taṃ taṃ phalaṃ. Añcitāti gatā. Yonīti ekajāti. Samānavasena missībhavati etāyāti hi yoni, upapatti. Peccāti maritvā. Ussannatāyāti vitakkabahulatāya. ‘‘Ussannattā’’tipi vadanti. Sassatādīhi vā ussannattā. Asurajātiyā nibbattāpanako asurajātinibbattanako.
সঙ্খাতি পঞ্ঞা। পঞ্ঞাপধানা চ ভাৰনাতি আহ ‘‘পটিসঙ্খায পটিপক্খভাৰনাযা’’তি।
Saṅkhāti paññā. Paññāpadhānā ca bhāvanāti āha ‘‘paṭisaṅkhāya paṭipakkhabhāvanāyā’’ti.
৪৭. পত্থটভাৰেন পথৰী। সভাৰধারণট্ঠেন, নিস্সত্তনিজ্জীৰট্ঠেন চ ধাতু। আপীযতি, অপ্পাযতীতি ৰা আপো। তেজনৰসেন তিক্খতাৰসেন, দহনৰসেন ৰা তেজো। ৰাযনৰসেন ৰেগগমনৰসেন, সমুদীরণৰসেন ৰা ৰাযো। ৰীসতি আকারাতি কেসাদযো ৰীসতি কোট্ঠাসা, পকারা ৰা। কক্খল়লক্খণাধিকতায কেসাদী কক্খল়লক্খণা ৰুত্তা।
47. Patthaṭabhāvena pathavī. Sabhāvadhāraṇaṭṭhena, nissattanijjīvaṭṭhena ca dhātu. Āpīyati, appāyatīti vā āpo. Tejanavasena tikkhatāvasena, dahanavasena vā tejo. Vāyanavasena vegagamanavasena, samudīraṇavasena vā vāyo. Vīsati ākārāti kesādayo vīsati koṭṭhāsā, pakārā vā. Kakkhaḷalakkhaṇādhikatāya kesādī kakkhaḷalakkhaṇā vuttā.
পাটিযেক্কো পথৰীধাতুকোট্ঠাসোতি পথৰীকোট্ঠাসমত্তো, অত্তসুঞ্ঞধম্মমত্তোতি অত্থো। সন্তপ্পতীতি এত্থ সরীরপকতিমতিক্কমিত্ৰা উণ্হভাৰো সন্তাপো, সরীরদহনৰসেন পৰত্তো মহাদাহো, অযমেতেসং ৰিসেসো। যেন চ জীরীযতীতি একাহিকাদিজরারোগেন জরীযতীতি চ অত্থো যুজ্জতি। ‘‘সতৰারং তাপেত্ৰা তাপেত্ৰা উদকে পক্খিপিত্ৰা উদ্ধটসপ্পি সতধোতসপ্পী’’তি ৰদন্তি। রসরুধিরমংসমেদন্হারুঅট্ঠিঅট্ঠিমিঞ্জা রসাদযো। কেচি ন্হারুং অপনেত্ৰা সুক্কং সত্তমং ধাতুং ৰদন্তি। ৰিৰেকন্তি ৰিসুংভাৰং, ৰিসদিসভাৰন্তি অত্থো। ৰত্থুসঙ্খাতো হি আহারো পরিণামং গচ্ছন্তো পাণভক্খগহণিপদনিয মুত্তকরীসভাৰেহি ৰিয অত্তনাপি ৰিসদিসরসসঙ্খাতং ৰিসুংভাৰং নিব্বত্তেন্তো তব্ভাৰং গচ্ছতীতি ৰুচ্চতি, তথা রসাদযোপি রুধিরাদিকোট্ঠাসং। তেনাহ ‘‘রসাদিভাৰেন ৰিৰেকং গচ্ছতী’’তি।
Pāṭiyekko pathavīdhātukoṭṭhāsoti pathavīkoṭṭhāsamatto, attasuññadhammamattoti attho. Santappatīti ettha sarīrapakatimatikkamitvā uṇhabhāvo santāpo, sarīradahanavasena pavatto mahādāho, ayametesaṃ viseso. Yena ca jīrīyatīti ekāhikādijarārogena jarīyatīti ca attho yujjati. ‘‘Satavāraṃ tāpetvā tāpetvā udake pakkhipitvā uddhaṭasappi satadhotasappī’’ti vadanti. Rasarudhiramaṃsamedanhāruaṭṭhiaṭṭhimiñjā rasādayo. Keci nhāruṃ apanetvā sukkaṃ sattamaṃ dhātuṃ vadanti. Vivekanti visuṃbhāvaṃ, visadisabhāvanti attho. Vatthusaṅkhāto hi āhāro pariṇāmaṃ gacchanto pāṇabhakkhagahaṇipadaniya muttakarīsabhāvehi viya attanāpi visadisarasasaṅkhātaṃ visuṃbhāvaṃ nibbattento tabbhāvaṃ gacchatīti vuccati, tathā rasādayopi rudhirādikoṭṭhāsaṃ. Tenāha ‘‘rasādibhāvena vivekaṃ gacchatī’’ti.
সভাৰলক্খণতোতি অসুচিভাৰেন লক্খিতব্বতো।
Sabhāvalakkhaṇatoti asucibhāvena lakkhitabbato.
৪৮. যাথাৰসরসলক্খণন্তি রসিতব্বোতি রসো, পটিৰিজ্ঝিতব্বো সভাৰো, অত্তনো রসো সরসো, যাথাৰো সরসো, যাথাৰসরসো যাথাৰসরসো এৰ লক্খিতব্বত্তা লক্খণন্তি যাথাৰসরসলক্খণং। অথ ৰা যাথাৰসরসলক্খণন্তি অৰিপরীতং অত্তনো পৰত্তিসঙ্খাতং কিচ্চঞ্চেৰ পীল়নসঙ্খাতং লক্খণঞ্চ। ‘‘ইদং কিচ্চং, ইদং লক্খণ’’ন্তি অৰিজ্জাহেতু ঞাতুং ন সক্কোতি, তব্বিসযঞাণুপ্পত্তিং নিৰারেন্তী ছাদেত্ৰা পরিযোনন্ধিত্ৰা তিট্ঠতীতি ৰুত্তা। তেন ৰুত্তং ‘‘জানিতুং পটিৰিজ্ঝিতুং ন দেতী’’তি। তযিদমস্সা কিচ্চন্তি কিচ্চতো কথিতা। কথিতাতি চ ৰুত্তা, যতো চ অৰিজ্জা অসম্পটিৰেধরসাতি ৰুচ্চতি। জাযতি এত্থাতি জাতি, উপ্পত্তিট্ঠানং। যদিপি নিরোধমগ্গে অৰিজ্জা আরম্মণং ন করোতি, তে পন জানিতুকামস্স তপ্পটিচ্ছাদনৰসেন অনিরোধমগ্গেসু নিরোধমগ্গগ্গহণস্স কারণভাৰেন পৰত্তমানা তত্থ উপ্পজ্জতীতি ৰুচ্চতি, তেসম্পি অৰিজ্জায উপ্পত্তিট্ঠানতা হোতি, ইতরেসং আরম্মণভাৰেন চাতি।
48.Yāthāvasarasalakkhaṇanti rasitabboti raso, paṭivijjhitabbo sabhāvo, attano raso saraso, yāthāvo saraso, yāthāvasaraso yāthāvasaraso eva lakkhitabbattā lakkhaṇanti yāthāvasarasalakkhaṇaṃ. Atha vā yāthāvasarasalakkhaṇanti aviparītaṃ attano pavattisaṅkhātaṃ kiccañceva pīḷanasaṅkhātaṃ lakkhaṇañca. ‘‘Idaṃ kiccaṃ, idaṃ lakkhaṇa’’nti avijjāhetu ñātuṃ na sakkoti, tabbisayañāṇuppattiṃ nivārentī chādetvā pariyonandhitvā tiṭṭhatīti vuttā. Tena vuttaṃ ‘‘jānituṃ paṭivijjhituṃ na detī’’ti. Tayidamassā kiccanti kiccato kathitā. Kathitāti ca vuttā, yato ca avijjā asampaṭivedharasāti vuccati. Jāyati etthāti jāti, uppattiṭṭhānaṃ. Yadipi nirodhamagge avijjā ārammaṇaṃ na karoti, te pana jānitukāmassa tappaṭicchādanavasena anirodhamaggesu nirodhamaggaggahaṇassa kāraṇabhāvena pavattamānā tattha uppajjatīti vuccati, tesampi avijjāya uppattiṭṭhānatā hoti, itaresaṃ ārammaṇabhāvena cāti.
অত্থানত্থন্তি হিতাহিতং। সম্মোহৰিনোদনিযং পন ‘‘অত্থত্থ’’ন্তি (ৰিভ॰ অট্ঠ॰ ২২৬) ৰুত্তং, তত্থ অত্থো এৰ অত্থত্থোতি অত্থস্স অৰিপরীততাদস্সনত্থং দুতিযেন অত্থসদ্দেন ৰিসেসনং। ন হি ঞাণং অনত্থে ‘‘অত্থো’’তি গণ্হাতীতি। কারণাকারণন্তি এত্থাপি এৰং দট্ঠব্বং। অত্থত্থন্তি ৰা আমেডিতৰচনং সব্বেসং অত্থানং পাকটকরণভাৰপ্পকাসনত্থং, ফলং ফলন্তি অত্থো, হিতপরিযাযেপি এসেৰ নযো। ন্তি অত্থানত্থাদিকং। আকারন্তি অত্থাদিকারণমেৰ।
Atthānatthanti hitāhitaṃ. Sammohavinodaniyaṃ pana ‘‘atthattha’’nti (vibha. aṭṭha. 226) vuttaṃ, tattha attho eva atthatthoti atthassa aviparītatādassanatthaṃ dutiyena atthasaddena visesanaṃ. Na hi ñāṇaṃ anatthe ‘‘attho’’ti gaṇhātīti. Kāraṇākāraṇanti etthāpi evaṃ daṭṭhabbaṃ. Atthatthanti vā āmeḍitavacanaṃ sabbesaṃ atthānaṃ pākaṭakaraṇabhāvappakāsanatthaṃ, phalaṃ phalanti attho, hitapariyāyepi eseva nayo. Nti atthānatthādikaṃ. Ākāranti atthādikāraṇameva.
পটিৰিদ্ধস্স পুন অৰেক্খনা পচ্চৰেক্খণা। দুচিন্তিতচিন্তিতাদিলক্খণস্স বালস্স ভাৰো বাল্যং। সম্পজানাতীতি সমং পকারেহি জানাতি। বলৰমোহো পমোহো। সমন্ততো মোহনং সম্মোহো। দুগ্গতিগামিকম্মস্স ৰিসেসপচ্চযত্তা অৰিন্দিযং। ৰিন্দতীতি লভতি। অনৰজ্জধম্মানং ৰিজ্জা ৰিয ৰিসেসপচ্চযো ন হোতীতি ৰিন্দিযং ন ৰিন্দতি। অযং অৰিজ্জায ৰেমত্ততাতি অযং ‘‘দুক্খে অঞ্ঞাণ’’ন্তিআদিনা কিচ্চজাতিলক্খণেহি ৰুত্তো অৰিজ্জায অৰিসেসো। ৰিজ্জাতিআদীনং ৰুত্তনযানসারেন অত্থো ৰেদিতব্বো।
Paṭividdhassa puna avekkhanā paccavekkhaṇā. Ducintitacintitādilakkhaṇassa bālassa bhāvo bālyaṃ. Sampajānātīti samaṃ pakārehi jānāti. Balavamoho pamoho. Samantato mohanaṃ sammoho. Duggatigāmikammassa visesapaccayattā avindiyaṃ. Vindatīti labhati. Anavajjadhammānaṃ vijjā viya visesapaccayo na hotīti vindiyaṃ na vindati. Ayaṃ avijjāya vemattatāti ayaṃ ‘‘dukkhe aññāṇa’’ntiādinā kiccajātilakkhaṇehi vutto avijjāya aviseso. Vijjātiādīnaṃ vuttanayānasārena attho veditabbo.
পাসাণসক্খরৰালিকাৰিরহিতা ভূমি সণ্হাতি ‘‘সণ্হট্ঠেনা’’তি ৰুত্তং।
Pāsāṇasakkharavālikāvirahitā bhūmi saṇhāti ‘‘saṇhaṭṭhenā’’ti vuttaṃ.
তত্তকমেৰ কালন্তি পঞ্চকপ্পসতানি। ৰিভূতং সমত্তিক্কন্তং রূপসঞ্ঞাসঙ্খাতং রূপং এতাযাতি ৰিভূতরূপং, সমাপত্তিন্তি পদত্থো। ন হি কাচি অরূপসমাপত্তি রূপসঞ্ঞাসহগতা পৰত্তীতি। নিরোধসমাপত্তিযং ৰত্তব্বমেৰ নত্থি, তত্থ নেৰসঞ্ঞানাসঞ্ঞাযতনসমাপত্তিযা ৰিসুং গহিতত্তা ৰুত্তং ‘‘সেসারুপ্পসমাপত্তিযো’’তি।
Tattakamevakālanti pañcakappasatāni. Vibhūtaṃ samattikkantaṃ rūpasaññāsaṅkhātaṃ rūpaṃ etāyāti vibhūtarūpaṃ, samāpattinti padattho. Na hi kāci arūpasamāpatti rūpasaññāsahagatā pavattīti. Nirodhasamāpattiyaṃ vattabbameva natthi, tattha nevasaññānāsaññāyatanasamāpattiyā visuṃ gahitattā vuttaṃ ‘‘sesāruppasamāpattiyo’’ti.
দমথং অনুপগচ্ছন্তো দুট্ঠস্সো খলুঙ্কস্সো। উত্তরিদমথাযাতি অরিযমগ্গদমথায।
Damathaṃ anupagacchanto duṭṭhasso khaluṅkasso. Uttaridamathāyāti ariyamaggadamathāya.
ইতরোতি দুক্খাপটিপদো খিপ্পাভিঞ্ঞো, সুখাপটিপদো চ খিপ্পাভিঞ্ঞো। উভযতোভাগেহীতি রূপকাযনামকাযভাগেহি। উভযতোতি ৰিক্খম্ভনসমুচ্ছেদৰিমুত্তিৰসেন।
Itaroti dukkhāpaṭipado khippābhiñño, sukhāpaṭipado ca khippābhiñño. Ubhayatobhāgehīti rūpakāyanāmakāyabhāgehi. Ubhayatoti vikkhambhanasamucchedavimuttivasena.
অনেকোপীতি সভাৰেন অনেকোপি। একসদ্দাভিধেয্যতাযাতি সামঞ্ঞসদ্দাভিধেয্যতায।
Anekopīti sabhāvena anekopi. Ekasaddābhidheyyatāyāti sāmaññasaddābhidheyyatāya.
অধিট্ঠানহারৰিভঙ্গৰণ্ণনা নিট্ঠিতা।
Adhiṭṭhānahāravibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ১৪. অধিট্ঠানহারৰিভঙ্গো • 14. Adhiṭṭhānahāravibhaṅgo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ১৪. অধিট্ঠানহারৰিভঙ্গৰণ্ণনা • 14. Adhiṭṭhānahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ১৪. অধিট্ঠানহারৰিভঙ্গৰিভাৰনা • 14. Adhiṭṭhānahāravibhaṅgavibhāvanā
