| Library / Tipiṭaka / திபிடக • Tipiṭaka / நெத்திப்பகரணபாளி • Nettippakaraṇapāḷi |
14. அதி⁴ட்டா²னஹாரவிப⁴ங்கோ³
14. Adhiṭṭhānahāravibhaṅgo
46. தத்த² கதமோ அதி⁴ட்டா²னோ ஹாரோ? ‘‘ஏகத்ததாய த⁴ம்மா, யேபி ச வேமத்ததாய நித்³தி³ட்டா²’’தி.
46. Tattha katamo adhiṭṭhāno hāro? ‘‘Ekattatāya dhammā, yepi ca vemattatāya niddiṭṭhā’’ti.
யே தத்த² நித்³தி³ட்டா², ததா² தே தா⁴ரயிதப்³பா³.
Ye tattha niddiṭṭhā, tathā te dhārayitabbā.
‘‘து³க்க²’’ந்தி ஏகத்ததா. தத்த² கதமங் து³க்க²ங்? ஜாதி து³க்கா², ஜரா து³க்கா², ப்³யாதி⁴ து³க்கோ², மரணங் து³க்க²ங், அப்பியேஹி ஸம்பயோகோ³ து³க்கோ², பியேஹி விப்பயோகோ³ து³க்கோ², யம்பிச்ச²ங் ந லப⁴தி தம்பி து³க்க²ங், ஸங்கி²த்தேன பஞ்சுபாதா³னக்க²ந்தா⁴ து³க்கா², ரூபா து³க்கா², வேத³னா து³க்கா², ஸஞ்ஞா து³க்கா², ஸங்கா²ரா து³க்கா², விஞ்ஞாணங் து³க்க²ங். அயங் வேமத்ததா.
‘‘Dukkha’’nti ekattatā. Tattha katamaṃ dukkhaṃ? Jāti dukkhā, jarā dukkhā, byādhi dukkho, maraṇaṃ dukkhaṃ, appiyehi sampayogo dukkho, piyehi vippayogo dukkho, yampicchaṃ na labhati tampi dukkhaṃ, saṃkhittena pañcupādānakkhandhā dukkhā, rūpā dukkhā, vedanā dukkhā, saññā dukkhā, saṅkhārā dukkhā, viññāṇaṃ dukkhaṃ. Ayaṃ vemattatā.
‘‘து³க்க²ஸமுத³யோ’’தி ஏகத்ததா. தத்த² கதமோ து³க்க²ஸமுத³யோ? யாயங் தண்ஹா போனோப⁴விகா 1 நந்தீ³ராக³ஸஹக³தா தத்ரதத்ராபி⁴னந்தி³னீ. ஸெய்யதி²த³ங், காமதண்ஹா ப⁴வதண்ஹா விப⁴வதண்ஹா. அயங் வேமத்ததா.
‘‘Dukkhasamudayo’’ti ekattatā. Tattha katamo dukkhasamudayo? Yāyaṃ taṇhā ponobhavikā 2 nandīrāgasahagatā tatratatrābhinandinī. Seyyathidaṃ, kāmataṇhā bhavataṇhā vibhavataṇhā. Ayaṃ vemattatā.
‘‘து³க்க²னிரோதோ⁴’’தி ஏகத்ததா. தத்த² கதமோ து³க்க²னிரோதோ⁴? யோ தஸ்ஸாயேவ தண்ஹாய அஸேஸவிராக³னிரோதோ⁴ சாகோ³ படினிஸ்ஸக்³கோ³ முத்தி அனாலயோ. அயங் வேமத்ததா.
‘‘Dukkhanirodho’’ti ekattatā. Tattha katamo dukkhanirodho? Yo tassāyeva taṇhāya asesavirāganirodho cāgo paṭinissaggo mutti anālayo. Ayaṃ vemattatā.
‘‘து³க்க²னிரோத⁴கா³மினீ படிபதா³’’தி ஏகத்ததா. தத்த² கதமா து³க்க²னிரோத⁴கா³மினீ படிபதா³? அயமேவ அரியோ அட்ட²ங்கி³கோ மக்³கோ³. ஸெய்யதி²த³ங், ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயங் வேமத்ததா.
‘‘Dukkhanirodhagāminī paṭipadā’’ti ekattatā. Tattha katamā dukkhanirodhagāminī paṭipadā? Ayameva ariyo aṭṭhaṅgiko maggo. Seyyathidaṃ, sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ vemattatā.
‘‘மக்³கோ³’’தி ஏகத்ததா. தத்த² கதமோ மக்³கோ³? நிரயகா³மீ மக்³கோ³ திரச்சா²னயோனிகா³மீ மக்³கோ³ பெத்திவிஸயகா³மீ மக்³கோ³ அஸுரயோனியோ 3 மக்³கோ³ ஸக்³க³கா³மியோ மக்³கோ³ மனுஸ்ஸகா³மீ மக்³கோ³ நிப்³பா³னகா³மீ மக்³கோ³. அயங் வேமத்ததா.
‘‘Maggo’’ti ekattatā. Tattha katamo maggo? Nirayagāmī maggo tiracchānayonigāmī maggo pettivisayagāmī maggo asurayoniyo 4 maggo saggagāmiyo maggo manussagāmī maggo nibbānagāmī maggo. Ayaṃ vemattatā.
‘‘நிரோதோ⁴’’தி ஏகத்ததா. தத்த² கதமோ நிரோதோ⁴? படிஸங்கா²னிரோதோ⁴ அப்படிஸங்கா²னிரோதோ⁴ அனுனயனிரோதோ⁴ படிக⁴னிரோதோ⁴ மானநிரோதோ⁴ மக்க²னிரோதோ⁴ பளாஸனிரோதோ⁴ இஸ்ஸானிரோதோ⁴ மச்ச²ரியனிரோதோ⁴ ஸப்³ப³கிலேஸனிரோதோ⁴. அயங் வேமத்ததா.
‘‘Nirodho’’ti ekattatā. Tattha katamo nirodho? Paṭisaṅkhānirodho appaṭisaṅkhānirodho anunayanirodho paṭighanirodho mānanirodho makkhanirodho paḷāsanirodho issānirodho macchariyanirodho sabbakilesanirodho. Ayaṃ vemattatā.
47. த்³வீஹி ஆகாரேஹி தா⁴துயோ பரிக்³க³ண்ஹாதி ஸங்கே²பேன ச வித்தா²ரேன ச. கத²ங் வித்தா²ரேன தா⁴துயோ பரிக்³க³ண்ஹாதி? வீஸதியா ஆகாரேஹி பத²வீதா⁴துங் வித்தா²ரேன பரிக்³க³ண்ஹாதி, த்³வாத³ஸஹி ஆகாரேஹி ஆபோதா⁴துங் வித்தா²ரேன பரிக்³க³ண்ஹாதி, சதூஹி ஆகாரேஹி தேஜோதா⁴துங் வித்தா²ரேன பரிக்³க³ண்ஹாதி, ச²ஹி ஆகாரேஹி வாயோதா⁴துங் வித்தா²ரேன பரிக்³க³ண்ஹாதி.
47. Dvīhi ākārehi dhātuyo pariggaṇhāti saṅkhepena ca vitthārena ca. Kathaṃ vitthārena dhātuyo pariggaṇhāti? Vīsatiyā ākārehi pathavīdhātuṃ vitthārena pariggaṇhāti, dvādasahi ākārehi āpodhātuṃ vitthārena pariggaṇhāti, catūhi ākārehi tejodhātuṃ vitthārena pariggaṇhāti, chahi ākārehi vāyodhātuṃ vitthārena pariggaṇhāti.
கதமேஹி வீஸதியா ஆகாரேஹி பத²வீதா⁴துங் வித்தா²ரேன பரிக்³க³ண்ஹாதி? அத்தி² இமஸ்மிங் காயே கேஸா லோமா நகா² த³ந்தா தசோ, மங்ஸங் ந்ஹாரு அட்டி² அட்டி²மிஞ்ஜங் 9 வக்கங், ஹத³யங் யகனங் கிலோமகங் பிஹகங் பப்பா²ஸங், அந்தங் அந்தகு³ணங் உத³ரியங் கரீஸங் மத்த²கே மத்த²லுங்க³ந்தி இமேஹி வீஸதியா ஆகாரேஹி பத²வீதா⁴துங் வித்தா²ரேன பரிக்³க³ண்ஹாதி.
Katamehi vīsatiyā ākārehi pathavīdhātuṃ vitthārena pariggaṇhāti? Atthi imasmiṃ kāye kesā lomā nakhā dantā taco, maṃsaṃ nhāru aṭṭhi aṭṭhimiñjaṃ 10 vakkaṃ, hadayaṃ yakanaṃ kilomakaṃ pihakaṃ papphāsaṃ, antaṃ antaguṇaṃ udariyaṃ karīsaṃ matthake matthaluṅganti imehi vīsatiyā ākārehi pathavīdhātuṃ vitthārena pariggaṇhāti.
கதமேஹி த்³வாத³ஸஹி ஆகாரேஹி ஆபோதா⁴துங் வித்தா²ரேன பரிக்³க³ண்ஹாதி? அத்தி² இமஸ்மிங் காயே பித்தங் ஸெம்ஹங் புப்³போ³ லோஹிதங் ஸேதோ³ மேதோ³ அஸ்ஸு வஸா கே²ளோ ஸிங்கா⁴ணிகா லஸிகா முத்தந்தி இமேஹி த்³வாத³ஸஹி ஆகாரேஹி ஆபோதா⁴துங் வித்தா²ரேன பரிக்³க³ண்ஹாதி.
Katamehi dvādasahi ākārehi āpodhātuṃ vitthārena pariggaṇhāti? Atthi imasmiṃ kāye pittaṃ semhaṃ pubbo lohitaṃ sedo medo assu vasā kheḷo siṅghāṇikā lasikā muttanti imehi dvādasahi ākārehi āpodhātuṃ vitthārena pariggaṇhāti.
கதமேஹி சதூஹி ஆகாரேஹி தேஜோதா⁴துங் வித்தா²ரேன பரிக்³க³ண்ஹாதி? யேன ச ஸந்தப்பதி, யேன ச ஜீரீயதி 11, யேன ச பரிட³ய்ஹதி, யேன ச அஸிதபீதகா²யிதஸாயிதங் ஸம்மா பரிணாமங் க³ச்ச²தி, இமேஹி சதூஹி ஆகாரேஹி தேஜோதா⁴துங் வித்தா²ரேன பரிக்³க³ண்ஹாதி.
Katamehi catūhi ākārehi tejodhātuṃ vitthārena pariggaṇhāti? Yena ca santappati, yena ca jīrīyati 12, yena ca pariḍayhati, yena ca asitapītakhāyitasāyitaṃ sammā pariṇāmaṃ gacchati, imehi catūhi ākārehi tejodhātuṃ vitthārena pariggaṇhāti.
கதமேஹி ச²ஹி ஆகாரேஹி வாயோதா⁴துங் வித்தா²ரேன பரிக்³க³ண்ஹாதி? உத்³த⁴ங்க³மா வாதா, அதோ⁴க³மா வாதா, குச்சி²ஸயா வாதா, கொட்டா²ஸயா 13 வாதா, அங்க³மங்கா³னுஸாரினோ வாதா, அஸ்ஸாஸோ பஸ்ஸாஸோ இதி, இமேஹி ச²ஹி ஆகாரேஹி வாயோதா⁴துங் வித்தா²ரேன பரிக்³க³ண்ஹாதி.
Katamehi chahi ākārehi vāyodhātuṃ vitthārena pariggaṇhāti? Uddhaṅgamā vātā, adhogamā vātā, kucchisayā vātā, koṭṭhāsayā 14 vātā, aṅgamaṅgānusārino vātā, assāso passāso iti, imehi chahi ākārehi vāyodhātuṃ vitthārena pariggaṇhāti.
ஏவங் இமேஹி த்³வாசத்தாலீஸாய ஆகாரேஹி வித்தா²ரேன தா⁴துயோ ஸபா⁴வதோ உபலக்க²யந்தோ துலயந்தோ பரிவீமங்ஸந்தோ பரியோகா³ஹந்தோ பச்சவெக்க²ந்தோ ந கிஞ்சி க³ய்ஹூபக³ங் பஸ்ஸதி காயங் வா காயபதே³ஸங் வா, யதா² சந்த³னிகங் பவிசினந்தோ ந கிஞ்சி க³ய்ஹூபக³ங் பஸ்ஸெய்ய, யதா² ஸங்காரட்டா²னங் பவிசினந்தோ ந கிஞ்சி க³ய்ஹூபக³ங் பஸ்ஸெய்ய, யதா² வச்சகுடிங் பவிசினந்தோ ந கிஞ்சி க³ய்ஹூபக³ங் பஸ்ஸெய்ய, யதா² ஸிவதி²கங் 15 பவிசினந்தோ ந கிஞ்சி க³ய்ஹூபக³ங் பஸ்ஸெய்ய. ஏவமேவ இமேஹி த்³வாசத்தாலீஸாய ஆகாரேஹி ஏவங் வித்தா²ரேன தா⁴துயோ ஸபா⁴வதோ உபலக்க²யந்தோ துலயந்தோ பரிவீமங்ஸந்தோ பரியோகா³ஹந்தோ பச்சவெக்க²ந்தோ ந கிஞ்சி க³ய்ஹூபக³ங் பஸ்ஸதி காயங் வா காயபதே³ஸங் வா. தேனாஹ ப⁴க³வா யா சேவ கோ² பன அஜ்ஜ²த்திகா பத²வீதா⁴து 16, யா ச பா³ஹிரா பத²வீதா⁴து, பத²வீதா⁴துரேவேஸா. தங் ‘‘நேதங் மம, நேஸோஹமஸ்மி, ந மேஸோ அத்தா’’தி ஏவமேதங் யதா²பூ⁴தங் ஸம்மப்பஞ்ஞாய த³ட்ட²ப்³ப³ங், ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா பத²வீதா⁴துயா நிப்³பி³ந்த³தி, பத²வீதா⁴துயா சித்தங் விராஜேதி. யா சேவ கோ² பன அஜ்ஜ²த்திகா ஆபோதா⁴து, யா ச பா³ஹிரா ஆபோதா⁴து…பே॰… யா சேவ கோ² பன அஜ்ஜ²த்திகா தேஜோதா⁴து, யா ச பா³ஹிரா தேஜோதா⁴து…பே॰… யா சேவ கோ² பன அஜ்ஜ²த்திகா வாயோதா⁴து, யா ச பா³ஹிரா வாயோதா⁴து, வாயோதா⁴துரேவேஸா. தங் ‘‘நேதங் மம, நேஸோஹமஸ்மி, ந மேஸோ அத்தா’’தி ஏவமேதங் யதா²பூ⁴தங் ஸம்மப்பஞ்ஞாய த³ட்ட²ப்³ப³ங், ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா வாயோதா⁴துயா நிப்³பி³ந்த³தி, வாயோதா⁴துயா சித்தங் விராஜேதி. அயங் வேமத்ததா.
Evaṃ imehi dvācattālīsāya ākārehi vitthārena dhātuyo sabhāvato upalakkhayanto tulayanto parivīmaṃsanto pariyogāhanto paccavekkhanto na kiñci gayhūpagaṃ passati kāyaṃ vā kāyapadesaṃ vā, yathā candanikaṃ pavicinanto na kiñci gayhūpagaṃ passeyya, yathā saṅkāraṭṭhānaṃ pavicinanto na kiñci gayhūpagaṃ passeyya, yathā vaccakuṭiṃ pavicinanto na kiñci gayhūpagaṃ passeyya, yathā sivathikaṃ 17 pavicinanto na kiñci gayhūpagaṃ passeyya. Evameva imehi dvācattālīsāya ākārehi evaṃ vitthārena dhātuyo sabhāvato upalakkhayanto tulayanto parivīmaṃsanto pariyogāhanto paccavekkhanto na kiñci gayhūpagaṃ passati kāyaṃ vā kāyapadesaṃ vā. Tenāha bhagavā yā ceva kho pana ajjhattikā pathavīdhātu 18, yā ca bāhirā pathavīdhātu, pathavīdhāturevesā. Taṃ ‘‘netaṃ mama, nesohamasmi, na meso attā’’ti evametaṃ yathābhūtaṃ sammappaññāya daṭṭhabbaṃ, evametaṃ yathābhūtaṃ sammappaññāya disvā pathavīdhātuyā nibbindati, pathavīdhātuyā cittaṃ virājeti. Yā ceva kho pana ajjhattikā āpodhātu, yā ca bāhirā āpodhātu…pe… yā ceva kho pana ajjhattikā tejodhātu, yā ca bāhirā tejodhātu…pe… yā ceva kho pana ajjhattikā vāyodhātu, yā ca bāhirā vāyodhātu, vāyodhāturevesā. Taṃ ‘‘netaṃ mama, nesohamasmi, na meso attā’’ti evametaṃ yathābhūtaṃ sammappaññāya daṭṭhabbaṃ, evametaṃ yathābhūtaṃ sammappaññāya disvā vāyodhātuyā nibbindati, vāyodhātuyā cittaṃ virājeti. Ayaṃ vemattatā.
48. ‘‘அவிஜ்ஜா’’தி ஏகத்ததா. தத்த² கதமா அவிஜ்ஜா? து³க்கே² அஞ்ஞாணங், து³க்க²ஸமுத³யே அஞ்ஞாணங், து³க்க²னிரோதே⁴ அஞ்ஞாணங், து³க்க²னிரோத⁴கா³மினியா படிபதா³ய அஞ்ஞாணங், புப்³ப³ந்தே அஞ்ஞாணங், அபரந்தே அஞ்ஞாணங், புப்³ப³ந்தாபரந்தே அஞ்ஞாணங், இத³ப்பச்சயதாபடிச்சஸமுப்பன்னேஸு த⁴ம்மேஸு அஞ்ஞாணங், யங் ஏவரூபங் அஞ்ஞாணங் அத³ஸ்ஸனங் அனபி⁴ஸமயோ அனநுபோ³தோ⁴ அஸம்போ³தோ⁴ அப்படிவேதோ⁴ அஸல்லக்க²ணா அனுபலக்க²ணா அபச்சுபலக்க²ணா அஸமவெக்க²ணங் 19 அபச்சக்க²கம்மங் து³ம்மெஜ்ஜ²ங் பா³ல்யங் அஸம்பஜஞ்ஞங் மோஹோ பமோஹோ ஸம்மோஹோ அவிஜ்ஜா அவிஜ்ஜோகோ⁴ அவிஜ்ஜாயோகோ³ அவிஜ்ஜானுஸயோ அவிஜ்ஜாபரியுட்டா²னங் அவிஜ்ஜாலங்கீ³ மோஹோ அகுஸலமூலங். அயங் வேமத்ததா.
48. ‘‘Avijjā’’ti ekattatā. Tattha katamā avijjā? Dukkhe aññāṇaṃ, dukkhasamudaye aññāṇaṃ, dukkhanirodhe aññāṇaṃ, dukkhanirodhagāminiyā paṭipadāya aññāṇaṃ, pubbante aññāṇaṃ, aparante aññāṇaṃ, pubbantāparante aññāṇaṃ, idappaccayatāpaṭiccasamuppannesu dhammesu aññāṇaṃ, yaṃ evarūpaṃ aññāṇaṃ adassanaṃ anabhisamayo ananubodho asambodho appaṭivedho asallakkhaṇā anupalakkhaṇā apaccupalakkhaṇā asamavekkhaṇaṃ 20 apaccakkhakammaṃ dummejjhaṃ bālyaṃ asampajaññaṃ moho pamoho sammoho avijjā avijjogho avijjāyogo avijjānusayo avijjāpariyuṭṭhānaṃ avijjālaṅgī moho akusalamūlaṃ. Ayaṃ vemattatā.
‘‘விஜ்ஜா’’தி ஏகத்ததா. தத்த² கதமா விஜ்ஜா? து³க்கே² ஞாணங், து³க்க²ஸமுத³யே ஞாணங், து³க்க²னிரோதே⁴ ஞாணங், து³க்க²னிரோத⁴கா³மினியா படிபதா³ய ஞாணங், புப்³ப³ந்தே ஞாணங், அபரந்தே ஞாணங், புப்³ப³ந்தாபரந்தே ஞாணங், இத³ப்பச்சயதாபடிச்சஸமுப்பன்னேஸு த⁴ம்மேஸு ஞாணங், யா ஏவரூபா பஞ்ஞா பஜானநா விசயோ பவிசயோ த⁴ம்மவிசயோ ஸங்லக்க²ணா உபலக்க²ணா பச்சுபலக்க²ணா பண்டி³ச்சங் கோஸல்லங் நேபுஞ்ஞங் வேப⁴ப்³யா 21 சிந்தா உபபரிக்கா² பூ⁴ரீ மேதா⁴ பரிணாயிகா விபஸ்ஸனா ஸம்பஜஞ்ஞங் பதோதோ³ பஞ்ஞா பஞ்ஞிந்த்³ரியங் பஞ்ஞாப³லங் பஞ்ஞாஸத்த²ங் பஞ்ஞாபாஸாதோ³ பஞ்ஞாஆலோகோ பஞ்ஞாஓபா⁴ஸோ பஞ்ஞாபஜ்ஜோதோ பஞ்ஞாரதனங் அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்பொ³ஜ்ஜ²ங்கோ³ மக்³க³ங்க³ங் மக்³க³பரியாபன்னங். அயங் வேமத்ததா.
‘‘Vijjā’’ti ekattatā. Tattha katamā vijjā? Dukkhe ñāṇaṃ, dukkhasamudaye ñāṇaṃ, dukkhanirodhe ñāṇaṃ, dukkhanirodhagāminiyā paṭipadāya ñāṇaṃ, pubbante ñāṇaṃ, aparante ñāṇaṃ, pubbantāparante ñāṇaṃ, idappaccayatāpaṭiccasamuppannesu dhammesu ñāṇaṃ, yā evarūpā paññā pajānanā vicayo pavicayo dhammavicayo saṃlakkhaṇā upalakkhaṇā paccupalakkhaṇā paṇḍiccaṃ kosallaṃ nepuññaṃ vebhabyā 22 cintā upaparikkhā bhūrī medhā pariṇāyikā vipassanā sampajaññaṃ patodo paññā paññindriyaṃ paññābalaṃ paññāsatthaṃ paññāpāsādo paññāāloko paññāobhāso paññāpajjoto paññāratanaṃ amoho dhammavicayo sammādiṭṭhi dhammavicayasambojjhaṅgo maggaṅgaṃ maggapariyāpannaṃ. Ayaṃ vemattatā.
‘‘ஸமாபத்தீ’’தி ஏகத்ததா. தத்த² கதமா ஸமாபத்தி? ஸஞ்ஞாஸமாபத்தி அஸஞ்ஞாஸமாபத்தி, நேவஸஞ்ஞானாஸஞ்ஞாஸமாபத்தி. விபூ⁴தஸஞ்ஞாஸமாபத்தி நிரோத⁴ஸமாபத்தீதி. அயங் வேமத்ததா.
‘‘Samāpattī’’ti ekattatā. Tattha katamā samāpatti? Saññāsamāpatti asaññāsamāpatti, nevasaññānāsaññāsamāpatti. Vibhūtasaññāsamāpatti nirodhasamāpattīti. Ayaṃ vemattatā.
‘‘ஜா²யீ’’தி ஏகத்ததா. தத்த² கதமோ ஜா²யீ? அத்தி² ஸெக்கோ² ஜா²யீ, அத்தி² அஸெக்கோ² ஜா²யீ, நேவஸெக்க²னாஸெக்கோ² ஜா²யீ, ஆஜானியோ ஜா²யீ, அஸ்ஸக²லுங்கோ ஜா²யீ, தி³ட்டு²த்தரோ ஜா²யீ, தண்ஹுத்தரோ ஜா²யீ, பஞ்ஞுத்தரோ ஜா²யீ. அயங் வேமத்ததா.
‘‘Jhāyī’’ti ekattatā. Tattha katamo jhāyī? Atthi sekkho jhāyī, atthi asekkho jhāyī, nevasekkhanāsekkho jhāyī, ājāniyo jhāyī, assakhaluṅko jhāyī, diṭṭhuttaro jhāyī, taṇhuttaro jhāyī, paññuttaro jhāyī. Ayaṃ vemattatā.
‘‘ஸமாதீ⁴’’தி ஏகத்ததா. தத்த² கதமோ ஸமாதி⁴? ஸரணோ ஸமாதி⁴, அரணோ ஸமாதி⁴, ஸவேரோ ஸமாதி⁴, அவேரோ ஸமாதி⁴, ஸப்³யாபஜ்ஜோ 23 ஸமாதி⁴, அப்³யாபஜ்ஜோ ஸமாதி⁴, ஸப்பீதிகோ ஸமாதி⁴, நிப்பீதிகோ ஸமாதி⁴, ஸாமிஸோ ஸமாதி⁴, நிராமிஸோ ஸமாதி⁴, ஸஸங்கா²ரோ ஸமாதி⁴, அஸங்கா²ரோ ஸமாதி⁴, ஏகங்ஸபா⁴விதோ ஸமாதி⁴, உப⁴யங்ஸபா⁴விதோ ஸமாதி⁴, உப⁴யதோ பா⁴விதபா⁴வனோ ஸமாதி⁴, ஸவிதக்கஸவிசாரோ ஸமாதி⁴, அவிதக்கவிசாரமத்தோ ஸமாதி⁴, அவிதக்கஅவிசாரோ ஸமாதி⁴, ஹானபா⁴கி³யோ ஸமாதி⁴, டி²திபா⁴கி³யோ ஸமாதி⁴, விஸேஸபா⁴கி³யோ ஸமாதி⁴, நிப்³பே³த⁴பா⁴கி³யோ ஸமாதி⁴, லோகியோ ஸமாதி⁴, லோகுத்தரோ ஸமாதி⁴, மிச்சா²ஸமாதி⁴, ஸம்மாஸமாதி⁴. அயங் வேமத்ததா.
‘‘Samādhī’’ti ekattatā. Tattha katamo samādhi? Saraṇo samādhi, araṇo samādhi, savero samādhi, avero samādhi, sabyāpajjo 24 samādhi, abyāpajjo samādhi, sappītiko samādhi, nippītiko samādhi, sāmiso samādhi, nirāmiso samādhi, sasaṅkhāro samādhi, asaṅkhāro samādhi, ekaṃsabhāvito samādhi, ubhayaṃsabhāvito samādhi, ubhayato bhāvitabhāvano samādhi, savitakkasavicāro samādhi, avitakkavicāramatto samādhi, avitakkaavicāro samādhi, hānabhāgiyo samādhi, ṭhitibhāgiyo samādhi, visesabhāgiyo samādhi, nibbedhabhāgiyo samādhi, lokiyo samādhi, lokuttaro samādhi, micchāsamādhi, sammāsamādhi. Ayaṃ vemattatā.
‘‘படிபதா³’’தி ஏகத்ததா. தத்த² கதமா படிபதா³? ஆகா³ள்ஹபடிபதா³ 25, நிஜ்ஜா²மபடிபதா³, மஜ்ஜி²மபடிபதா³, அக்க²மா படிபதா³, க²மா படிபதா³, ஸமா படிபதா³, த³மா படிபதா³ , து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞாதி. அயங் வேமத்ததா.
‘‘Paṭipadā’’ti ekattatā. Tattha katamā paṭipadā? Āgāḷhapaṭipadā 26, nijjhāmapaṭipadā, majjhimapaṭipadā, akkhamā paṭipadā, khamā paṭipadā, samā paṭipadā, damā paṭipadā , dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññāti. Ayaṃ vemattatā.
‘‘காயோ’’தி ஏகத்ததா. தத்த² கதமோ காயோ? நாமகாயோ ரூபகாயோ ச. தத்த² கதமோ ரூபகாயோ? கேஸா லோமா நகா² த³ந்தா தசோ மங்ஸங் ந்ஹாரு 27 அட்டி² அட்டி²மிஞ்ஜங் வக்கங் ஹத³யங் யகனங் கிலோமகங் பிஹகங் பப்பா²ஸங் அந்தங் அந்தகு³ணங் உத³ரியங் கரீஸங் பித்தங் ஸெம்ஹங் புப்³போ³ லோஹிதங் ஸேதோ³ மேதோ³ அஸ்ஸு வஸா கே²ளோ ஸிங்கா⁴ணிகா லஸிகா முத்தங் மத்த²லுங்க³ந்தி – அயங் ரூபகாயோ. நாமகாயோ நாம வேத³னா ஸஞ்ஞா சேதனா சித்தங் ப²ஸ்ஸோ மனஸிகாரோதி – அயங் நாமகாயோதி. அயங் வேமத்ததா.
‘‘Kāyo’’ti ekattatā. Tattha katamo kāyo? Nāmakāyo rūpakāyo ca. Tattha katamo rūpakāyo? Kesā lomā nakhā dantā taco maṃsaṃ nhāru 28 aṭṭhi aṭṭhimiñjaṃ vakkaṃ hadayaṃ yakanaṃ kilomakaṃ pihakaṃ papphāsaṃ antaṃ antaguṇaṃ udariyaṃ karīsaṃ pittaṃ semhaṃ pubbo lohitaṃ sedo medo assu vasā kheḷo siṅghāṇikā lasikā muttaṃ matthaluṅganti – ayaṃ rūpakāyo. Nāmakāyo nāma vedanā saññā cetanā cittaṃ phasso manasikāroti – ayaṃ nāmakāyoti. Ayaṃ vemattatā.
ஏவங் யோ த⁴ம்மோ யஸ்ஸ த⁴ம்மஸ்ஸ ஸமானபா⁴வோ, ஸோ த⁴ம்மோ தஸ்ஸ த⁴ம்மஸ்ஸ ஏகத்ததாய ஏகீ ப⁴வதி. யேன யேன வா பன விலக்க²ணோ, தேன தேன வேமத்தங் க³ச்ச²தி. ஏவங் ஸுத்தே வா வெய்யாகரணே வா கா³தா²யங் வா புச்சி²தேன வீமங்ஸயிதப்³ப³ங், கிங் ஏகத்ததாய புச்ச²தி, உதா³ஹு வேமத்ததாயாதி. யதி³ ஏகத்ததாய புச்சி²தங், ஏகத்ததாய விஸஜ்ஜயிதப்³ப³ங். யதி³ வேமத்ததாய புச்சி²தங், வேமத்ததாய விஸஜ்ஜயிதப்³ப³ங். யதி³ ஸத்தாதி⁴ட்டா²னேன புச்சி²தங், ஸத்தாதி⁴ட்டா²னேன விஸஜ்ஜயிதப்³ப³ங். யதி³ த⁴ம்மாதி⁴ட்டா²னேன புச்சி²தங், த⁴ம்மாதி⁴ட்டா²னேன விஸஜ்ஜயிதப்³ப³ங். யதா² யதா² வா பன புச்சி²தங், ததா² ததா² விஸஜ்ஜயிதப்³ப³ங். தேனாஹ ஆயஸ்மா மஹாகச்சாயனோ ‘‘ஏகத்ததாய த⁴ம்மா’’தி.
Evaṃ yo dhammo yassa dhammassa samānabhāvo, so dhammo tassa dhammassa ekattatāya ekī bhavati. Yena yena vā pana vilakkhaṇo, tena tena vemattaṃ gacchati. Evaṃ sutte vā veyyākaraṇe vā gāthāyaṃ vā pucchitena vīmaṃsayitabbaṃ, kiṃ ekattatāya pucchati, udāhu vemattatāyāti. Yadi ekattatāya pucchitaṃ, ekattatāya visajjayitabbaṃ. Yadi vemattatāya pucchitaṃ, vemattatāya visajjayitabbaṃ. Yadi sattādhiṭṭhānena pucchitaṃ, sattādhiṭṭhānena visajjayitabbaṃ. Yadi dhammādhiṭṭhānena pucchitaṃ, dhammādhiṭṭhānena visajjayitabbaṃ. Yathā yathā vā pana pucchitaṃ, tathā tathā visajjayitabbaṃ. Tenāha āyasmā mahākaccāyano ‘‘ekattatāya dhammā’’ti.
நியுத்தோ அதி⁴ட்டா²னோ ஹாரோ.
Niyutto adhiṭṭhāno hāro.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 14. அதி⁴ட்டா²னஹாரவிப⁴ங்க³வண்ணனா • 14. Adhiṭṭhānahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 14. அதி⁴ட்டா²னஹாரவிப⁴ங்க³வண்ணனா • 14. Adhiṭṭhānahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 14. அதி⁴ட்டா²னஹாரவிப⁴ங்க³விபா⁴வனா • 14. Adhiṭṭhānahāravibhaṅgavibhāvanā
