| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
১৪. অধিট্ঠানহারৰিভঙ্গো
14. Adhiṭṭhānahāravibhaṅgo
৪৬. তত্থ কতমো অধিট্ঠানো হারো? ‘‘একত্ততায ধম্মা, যেপি চ ৰেমত্ততায নিদ্দিট্ঠা’’তি।
46. Tattha katamo adhiṭṭhāno hāro? ‘‘Ekattatāya dhammā, yepi ca vemattatāya niddiṭṭhā’’ti.
যে তত্থ নিদ্দিট্ঠা, তথা তে ধারযিতব্বা।
Ye tattha niddiṭṭhā, tathā te dhārayitabbā.
‘‘দুক্খ’’ন্তি একত্ততা। তত্থ কতমং দুক্খং? জাতি দুক্খা, জরা দুক্খা, ব্যাধি দুক্খো, মরণং দুক্খং, অপ্পিযেহি সম্পযোগো দুক্খো, পিযেহি ৰিপ্পযোগো দুক্খো, যম্পিচ্ছং ন লভতি তম্পি দুক্খং, সংখিত্তেন পঞ্চুপাদানক্খন্ধা দুক্খা, রূপা দুক্খা, ৰেদনা দুক্খা, সঞ্ঞা দুক্খা, সঙ্খারা দুক্খা, ৰিঞ্ঞাণং দুক্খং। অযং ৰেমত্ততা।
‘‘Dukkha’’nti ekattatā. Tattha katamaṃ dukkhaṃ? Jāti dukkhā, jarā dukkhā, byādhi dukkho, maraṇaṃ dukkhaṃ, appiyehi sampayogo dukkho, piyehi vippayogo dukkho, yampicchaṃ na labhati tampi dukkhaṃ, saṃkhittena pañcupādānakkhandhā dukkhā, rūpā dukkhā, vedanā dukkhā, saññā dukkhā, saṅkhārā dukkhā, viññāṇaṃ dukkhaṃ. Ayaṃ vemattatā.
‘‘দুক্খসমুদযো’’তি একত্ততা। তত্থ কতমো দুক্খসমুদযো? যাযং তণ্হা পোনোভৰিকা 1 নন্দীরাগসহগতা তত্রতত্রাভিনন্দিনী। সেয্যথিদং, কামতণ্হা ভৰতণ্হা ৰিভৰতণ্হা। অযং ৰেমত্ততা।
‘‘Dukkhasamudayo’’ti ekattatā. Tattha katamo dukkhasamudayo? Yāyaṃ taṇhā ponobhavikā 2 nandīrāgasahagatā tatratatrābhinandinī. Seyyathidaṃ, kāmataṇhā bhavataṇhā vibhavataṇhā. Ayaṃ vemattatā.
‘‘দুক্খনিরোধো’’তি একত্ততা। তত্থ কতমো দুক্খনিরোধো? যো তস্সাযেৰ তণ্হায অসেসৰিরাগনিরোধো চাগো পটিনিস্সগ্গো মুত্তি অনালযো। অযং ৰেমত্ততা।
‘‘Dukkhanirodho’’ti ekattatā. Tattha katamo dukkhanirodho? Yo tassāyeva taṇhāya asesavirāganirodho cāgo paṭinissaggo mutti anālayo. Ayaṃ vemattatā.
‘‘দুক্খনিরোধগামিনী পটিপদা’’তি একত্ততা। তত্থ কতমা দুক্খনিরোধগামিনী পটিপদা? অযমেৰ অরিযো অট্ঠঙ্গিকো মগ্গো। সেয্যথিদং, সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং ৰেমত্ততা।
‘‘Dukkhanirodhagāminī paṭipadā’’ti ekattatā. Tattha katamā dukkhanirodhagāminī paṭipadā? Ayameva ariyo aṭṭhaṅgiko maggo. Seyyathidaṃ, sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ vemattatā.
‘‘মগ্গো’’তি একত্ততা। তত্থ কতমো মগ্গো? নিরযগামী মগ্গো তিরচ্ছানযোনিগামী মগ্গো পেত্তিৰিসযগামী মগ্গো অসুরযোনিযো 3 মগ্গো সগ্গগামিযো মগ্গো মনুস্সগামী মগ্গো নিব্বানগামী মগ্গো। অযং ৰেমত্ততা।
‘‘Maggo’’ti ekattatā. Tattha katamo maggo? Nirayagāmī maggo tiracchānayonigāmī maggo pettivisayagāmī maggo asurayoniyo 4 maggo saggagāmiyo maggo manussagāmī maggo nibbānagāmī maggo. Ayaṃ vemattatā.
‘‘নিরোধো’’তি একত্ততা। তত্থ কতমো নিরোধো? পটিসঙ্খানিরোধো অপ্পটিসঙ্খানিরোধো অনুনযনিরোধো পটিঘনিরোধো মাননিরোধো মক্খনিরোধো পল়াসনিরোধো ইস্সানিরোধো মচ্ছরিযনিরোধো সব্বকিলেসনিরোধো। অযং ৰেমত্ততা।
‘‘Nirodho’’ti ekattatā. Tattha katamo nirodho? Paṭisaṅkhānirodho appaṭisaṅkhānirodho anunayanirodho paṭighanirodho mānanirodho makkhanirodho paḷāsanirodho issānirodho macchariyanirodho sabbakilesanirodho. Ayaṃ vemattatā.
৪৭. দ্ৰীহি আকারেহি ধাতুযো পরিগ্গণ্হাতি সঙ্খেপেন চ ৰিত্থারেন চ। কথং ৰিত্থারেন ধাতুযো পরিগ্গণ্হাতি? ৰীসতিযা আকারেহি পথৰীধাতুং ৰিত্থারেন পরিগ্গণ্হাতি, দ্ৰাদসহি আকারেহি আপোধাতুং ৰিত্থারেন পরিগ্গণ্হাতি, চতূহি আকারেহি তেজোধাতুং ৰিত্থারেন পরিগ্গণ্হাতি, ছহি আকারেহি ৰাযোধাতুং ৰিত্থারেন পরিগ্গণ্হাতি।
47. Dvīhi ākārehi dhātuyo pariggaṇhāti saṅkhepena ca vitthārena ca. Kathaṃ vitthārena dhātuyo pariggaṇhāti? Vīsatiyā ākārehi pathavīdhātuṃ vitthārena pariggaṇhāti, dvādasahi ākārehi āpodhātuṃ vitthārena pariggaṇhāti, catūhi ākārehi tejodhātuṃ vitthārena pariggaṇhāti, chahi ākārehi vāyodhātuṃ vitthārena pariggaṇhāti.
কতমেহি ৰীসতিযা আকারেহি পথৰীধাতুং ৰিত্থারেন পরিগ্গণ্হাতি? অত্থি ইমস্মিং কাযে কেসা লোমা নখা দন্তা তচো, মংসং ন্হারু অট্ঠি অট্ঠিমিঞ্জং 9 ৰক্কং, হদযং যকনং কিলোমকং পিহকং পপ্ফাসং, অন্তং অন্তগুণং উদরিযং করীসং মত্থকে মত্থলুঙ্গন্তি ইমেহি ৰীসতিযা আকারেহি পথৰীধাতুং ৰিত্থারেন পরিগ্গণ্হাতি।
Katamehi vīsatiyā ākārehi pathavīdhātuṃ vitthārena pariggaṇhāti? Atthi imasmiṃ kāye kesā lomā nakhā dantā taco, maṃsaṃ nhāru aṭṭhi aṭṭhimiñjaṃ 10 vakkaṃ, hadayaṃ yakanaṃ kilomakaṃ pihakaṃ papphāsaṃ, antaṃ antaguṇaṃ udariyaṃ karīsaṃ matthake matthaluṅganti imehi vīsatiyā ākārehi pathavīdhātuṃ vitthārena pariggaṇhāti.
কতমেহি দ্ৰাদসহি আকারেহি আপোধাতুং ৰিত্থারেন পরিগ্গণ্হাতি? অত্থি ইমস্মিং কাযে পিত্তং সেম্হং পুব্বো লোহিতং সেদো মেদো অস্সু ৰসা খেল়ো সিঙ্ঘাণিকা লসিকা মুত্তন্তি ইমেহি দ্ৰাদসহি আকারেহি আপোধাতুং ৰিত্থারেন পরিগ্গণ্হাতি।
Katamehi dvādasahi ākārehi āpodhātuṃ vitthārena pariggaṇhāti? Atthi imasmiṃ kāye pittaṃ semhaṃ pubbo lohitaṃ sedo medo assu vasā kheḷo siṅghāṇikā lasikā muttanti imehi dvādasahi ākārehi āpodhātuṃ vitthārena pariggaṇhāti.
কতমেহি চতূহি আকারেহি তেজোধাতুং ৰিত্থারেন পরিগ্গণ্হাতি? যেন চ সন্তপ্পতি, যেন চ জীরীযতি 11, যেন চ পরিডয্হতি, যেন চ অসিতপীতখাযিতসাযিতং সম্মা পরিণামং গচ্ছতি, ইমেহি চতূহি আকারেহি তেজোধাতুং ৰিত্থারেন পরিগ্গণ্হাতি।
Katamehi catūhi ākārehi tejodhātuṃ vitthārena pariggaṇhāti? Yena ca santappati, yena ca jīrīyati 12, yena ca pariḍayhati, yena ca asitapītakhāyitasāyitaṃ sammā pariṇāmaṃ gacchati, imehi catūhi ākārehi tejodhātuṃ vitthārena pariggaṇhāti.
কতমেহি ছহি আকারেহি ৰাযোধাতুং ৰিত্থারেন পরিগ্গণ্হাতি? উদ্ধঙ্গমা ৰাতা, অধোগমা ৰাতা, কুচ্ছিসযা ৰাতা, কোট্ঠাসযা 13 ৰাতা, অঙ্গমঙ্গানুসারিনো ৰাতা, অস্সাসো পস্সাসো ইতি, ইমেহি ছহি আকারেহি ৰাযোধাতুং ৰিত্থারেন পরিগ্গণ্হাতি।
Katamehi chahi ākārehi vāyodhātuṃ vitthārena pariggaṇhāti? Uddhaṅgamā vātā, adhogamā vātā, kucchisayā vātā, koṭṭhāsayā 14 vātā, aṅgamaṅgānusārino vātā, assāso passāso iti, imehi chahi ākārehi vāyodhātuṃ vitthārena pariggaṇhāti.
এৰং ইমেহি দ্ৰাচত্তালীসায আকারেহি ৰিত্থারেন ধাতুযো সভাৰতো উপলক্খযন্তো তুলযন্তো পরিৰীমংসন্তো পরিযোগাহন্তো পচ্চৰেক্খন্তো ন কিঞ্চি গয্হূপগং পস্সতি কাযং ৰা কাযপদেসং ৰা, যথা চন্দনিকং পৰিচিনন্তো ন কিঞ্চি গয্হূপগং পস্সেয্য, যথা সঙ্কারট্ঠানং পৰিচিনন্তো ন কিঞ্চি গয্হূপগং পস্সেয্য, যথা ৰচ্চকুটিং পৰিচিনন্তো ন কিঞ্চি গয্হূপগং পস্সেয্য, যথা সিৰথিকং 15 পৰিচিনন্তো ন কিঞ্চি গয্হূপগং পস্সেয্য। এৰমেৰ ইমেহি দ্ৰাচত্তালীসায আকারেহি এৰং ৰিত্থারেন ধাতুযো সভাৰতো উপলক্খযন্তো তুলযন্তো পরিৰীমংসন্তো পরিযোগাহন্তো পচ্চৰেক্খন্তো ন কিঞ্চি গয্হূপগং পস্সতি কাযং ৰা কাযপদেসং ৰা। তেনাহ ভগৰা যা চেৰ খো পন অজ্ঝত্তিকা পথৰীধাতু 16, যা চ বাহিরা পথৰীধাতু, পথৰীধাতুরেৰেসা। তং ‘‘নেতং মম, নেসোহমস্মি, ন মেসো অত্তা’’তি এৰমেতং যথাভূতং সম্মপ্পঞ্ঞায দট্ঠব্বং, এৰমেতং যথাভূতং সম্মপ্পঞ্ঞায দিস্ৰা পথৰীধাতুযা নিব্বিন্দতি, পথৰীধাতুযা চিত্তং ৰিরাজেতি। যা চেৰ খো পন অজ্ঝত্তিকা আপোধাতু, যা চ বাহিরা আপোধাতু…পে॰… যা চেৰ খো পন অজ্ঝত্তিকা তেজোধাতু, যা চ বাহিরা তেজোধাতু…পে॰… যা চেৰ খো পন অজ্ঝত্তিকা ৰাযোধাতু, যা চ বাহিরা ৰাযোধাতু, ৰাযোধাতুরেৰেসা। তং ‘‘নেতং মম, নেসোহমস্মি, ন মেসো অত্তা’’তি এৰমেতং যথাভূতং সম্মপ্পঞ্ঞায দট্ঠব্বং, এৰমেতং যথাভূতং সম্মপ্পঞ্ঞায দিস্ৰা ৰাযোধাতুযা নিব্বিন্দতি, ৰাযোধাতুযা চিত্তং ৰিরাজেতি। অযং ৰেমত্ততা।
Evaṃ imehi dvācattālīsāya ākārehi vitthārena dhātuyo sabhāvato upalakkhayanto tulayanto parivīmaṃsanto pariyogāhanto paccavekkhanto na kiñci gayhūpagaṃ passati kāyaṃ vā kāyapadesaṃ vā, yathā candanikaṃ pavicinanto na kiñci gayhūpagaṃ passeyya, yathā saṅkāraṭṭhānaṃ pavicinanto na kiñci gayhūpagaṃ passeyya, yathā vaccakuṭiṃ pavicinanto na kiñci gayhūpagaṃ passeyya, yathā sivathikaṃ 17 pavicinanto na kiñci gayhūpagaṃ passeyya. Evameva imehi dvācattālīsāya ākārehi evaṃ vitthārena dhātuyo sabhāvato upalakkhayanto tulayanto parivīmaṃsanto pariyogāhanto paccavekkhanto na kiñci gayhūpagaṃ passati kāyaṃ vā kāyapadesaṃ vā. Tenāha bhagavā yā ceva kho pana ajjhattikā pathavīdhātu 18, yā ca bāhirā pathavīdhātu, pathavīdhāturevesā. Taṃ ‘‘netaṃ mama, nesohamasmi, na meso attā’’ti evametaṃ yathābhūtaṃ sammappaññāya daṭṭhabbaṃ, evametaṃ yathābhūtaṃ sammappaññāya disvā pathavīdhātuyā nibbindati, pathavīdhātuyā cittaṃ virājeti. Yā ceva kho pana ajjhattikā āpodhātu, yā ca bāhirā āpodhātu…pe… yā ceva kho pana ajjhattikā tejodhātu, yā ca bāhirā tejodhātu…pe… yā ceva kho pana ajjhattikā vāyodhātu, yā ca bāhirā vāyodhātu, vāyodhāturevesā. Taṃ ‘‘netaṃ mama, nesohamasmi, na meso attā’’ti evametaṃ yathābhūtaṃ sammappaññāya daṭṭhabbaṃ, evametaṃ yathābhūtaṃ sammappaññāya disvā vāyodhātuyā nibbindati, vāyodhātuyā cittaṃ virājeti. Ayaṃ vemattatā.
৪৮. ‘‘অৰিজ্জা’’তি একত্ততা। তত্থ কতমা অৰিজ্জা? দুক্খে অঞ্ঞাণং, দুক্খসমুদযে অঞ্ঞাণং, দুক্খনিরোধে অঞ্ঞাণং, দুক্খনিরোধগামিনিযা পটিপদায অঞ্ঞাণং, পুব্বন্তে অঞ্ঞাণং, অপরন্তে অঞ্ঞাণং, পুব্বন্তাপরন্তে অঞ্ঞাণং, ইদপ্পচ্চযতাপটিচ্চসমুপ্পন্নেসু ধম্মেসু অঞ্ঞাণং, যং এৰরূপং অঞ্ঞাণং অদস্সনং অনভিসমযো অননুবোধো অসম্বোধো অপ্পটিৰেধো অসল্লক্খণা অনুপলক্খণা অপচ্চুপলক্খণা অসমৰেক্খণং 19 অপচ্চক্খকম্মং দুম্মেজ্ঝং বাল্যং অসম্পজঞ্ঞং মোহো পমোহো সম্মোহো অৰিজ্জা অৰিজ্জোঘো অৰিজ্জাযোগো অৰিজ্জানুসযো অৰিজ্জাপরিযুট্ঠানং অৰিজ্জালঙ্গী মোহো অকুসলমূলং। অযং ৰেমত্ততা।
48. ‘‘Avijjā’’ti ekattatā. Tattha katamā avijjā? Dukkhe aññāṇaṃ, dukkhasamudaye aññāṇaṃ, dukkhanirodhe aññāṇaṃ, dukkhanirodhagāminiyā paṭipadāya aññāṇaṃ, pubbante aññāṇaṃ, aparante aññāṇaṃ, pubbantāparante aññāṇaṃ, idappaccayatāpaṭiccasamuppannesu dhammesu aññāṇaṃ, yaṃ evarūpaṃ aññāṇaṃ adassanaṃ anabhisamayo ananubodho asambodho appaṭivedho asallakkhaṇā anupalakkhaṇā apaccupalakkhaṇā asamavekkhaṇaṃ 20 apaccakkhakammaṃ dummejjhaṃ bālyaṃ asampajaññaṃ moho pamoho sammoho avijjā avijjogho avijjāyogo avijjānusayo avijjāpariyuṭṭhānaṃ avijjālaṅgī moho akusalamūlaṃ. Ayaṃ vemattatā.
‘‘ৰিজ্জা’’তি একত্ততা। তত্থ কতমা ৰিজ্জা? দুক্খে ঞাণং, দুক্খসমুদযে ঞাণং, দুক্খনিরোধে ঞাণং, দুক্খনিরোধগামিনিযা পটিপদায ঞাণং, পুব্বন্তে ঞাণং, অপরন্তে ঞাণং, পুব্বন্তাপরন্তে ঞাণং, ইদপ্পচ্চযতাপটিচ্চসমুপ্পন্নেসু ধম্মেসু ঞাণং, যা এৰরূপা পঞ্ঞা পজাননা ৰিচযো পৰিচযো ধম্মৰিচযো সংলক্খণা উপলক্খণা পচ্চুপলক্খণা পণ্ডিচ্চং কোসল্লং নেপুঞ্ঞং ৰেভব্যা 21 চিন্তা উপপরিক্খা ভূরী মেধা পরিণাযিকা ৰিপস্সনা সম্পজঞ্ঞং পতোদো পঞ্ঞা পঞ্ঞিন্দ্রিযং পঞ্ঞাবলং পঞ্ঞাসত্থং পঞ্ঞাপাসাদো পঞ্ঞাআলোকো পঞ্ঞাওভাসো পঞ্ঞাপজ্জোতো পঞ্ঞারতনং অমোহো ধম্মৰিচযো সম্মাদিট্ঠি ধম্মৰিচযসম্বোজ্ঝঙ্গো মগ্গঙ্গং মগ্গপরিযাপন্নং। অযং ৰেমত্ততা।
‘‘Vijjā’’ti ekattatā. Tattha katamā vijjā? Dukkhe ñāṇaṃ, dukkhasamudaye ñāṇaṃ, dukkhanirodhe ñāṇaṃ, dukkhanirodhagāminiyā paṭipadāya ñāṇaṃ, pubbante ñāṇaṃ, aparante ñāṇaṃ, pubbantāparante ñāṇaṃ, idappaccayatāpaṭiccasamuppannesu dhammesu ñāṇaṃ, yā evarūpā paññā pajānanā vicayo pavicayo dhammavicayo saṃlakkhaṇā upalakkhaṇā paccupalakkhaṇā paṇḍiccaṃ kosallaṃ nepuññaṃ vebhabyā 22 cintā upaparikkhā bhūrī medhā pariṇāyikā vipassanā sampajaññaṃ patodo paññā paññindriyaṃ paññābalaṃ paññāsatthaṃ paññāpāsādo paññāāloko paññāobhāso paññāpajjoto paññāratanaṃ amoho dhammavicayo sammādiṭṭhi dhammavicayasambojjhaṅgo maggaṅgaṃ maggapariyāpannaṃ. Ayaṃ vemattatā.
‘‘সমাপত্তী’’তি একত্ততা। তত্থ কতমা সমাপত্তি? সঞ্ঞাসমাপত্তি অসঞ্ঞাসমাপত্তি, নেৰসঞ্ঞানাসঞ্ঞাসমাপত্তি। ৰিভূতসঞ্ঞাসমাপত্তি নিরোধসমাপত্তীতি। অযং ৰেমত্ততা।
‘‘Samāpattī’’ti ekattatā. Tattha katamā samāpatti? Saññāsamāpatti asaññāsamāpatti, nevasaññānāsaññāsamāpatti. Vibhūtasaññāsamāpatti nirodhasamāpattīti. Ayaṃ vemattatā.
‘‘ঝাযী’’তি একত্ততা। তত্থ কতমো ঝাযী? অত্থি সেক্খো ঝাযী, অত্থি অসেক্খো ঝাযী, নেৰসেক্খনাসেক্খো ঝাযী, আজানিযো ঝাযী, অস্সখলুঙ্কো ঝাযী, দিট্ঠুত্তরো ঝাযী, তণ্হুত্তরো ঝাযী, পঞ্ঞুত্তরো ঝাযী। অযং ৰেমত্ততা।
‘‘Jhāyī’’ti ekattatā. Tattha katamo jhāyī? Atthi sekkho jhāyī, atthi asekkho jhāyī, nevasekkhanāsekkho jhāyī, ājāniyo jhāyī, assakhaluṅko jhāyī, diṭṭhuttaro jhāyī, taṇhuttaro jhāyī, paññuttaro jhāyī. Ayaṃ vemattatā.
‘‘সমাধী’’তি একত্ততা। তত্থ কতমো সমাধি? সরণো সমাধি, অরণো সমাধি, সৰেরো সমাধি, অৰেরো সমাধি, সব্যাপজ্জো 23 সমাধি, অব্যাপজ্জো সমাধি, সপ্পীতিকো সমাধি, নিপ্পীতিকো সমাধি, সামিসো সমাধি, নিরামিসো সমাধি, সসঙ্খারো সমাধি, অসঙ্খারো সমাধি, একংসভাৰিতো সমাধি, উভযংসভাৰিতো সমাধি, উভযতো ভাৰিতভাৰনো সমাধি, সৰিতক্কসৰিচারো সমাধি, অৰিতক্কৰিচারমত্তো সমাধি, অৰিতক্কঅৰিচারো সমাধি, হানভাগিযো সমাধি, ঠিতিভাগিযো সমাধি, ৰিসেসভাগিযো সমাধি, নিব্বেধভাগিযো সমাধি, লোকিযো সমাধি, লোকুত্তরো সমাধি, মিচ্ছাসমাধি, সম্মাসমাধি। অযং ৰেমত্ততা।
‘‘Samādhī’’ti ekattatā. Tattha katamo samādhi? Saraṇo samādhi, araṇo samādhi, savero samādhi, avero samādhi, sabyāpajjo 24 samādhi, abyāpajjo samādhi, sappītiko samādhi, nippītiko samādhi, sāmiso samādhi, nirāmiso samādhi, sasaṅkhāro samādhi, asaṅkhāro samādhi, ekaṃsabhāvito samādhi, ubhayaṃsabhāvito samādhi, ubhayato bhāvitabhāvano samādhi, savitakkasavicāro samādhi, avitakkavicāramatto samādhi, avitakkaavicāro samādhi, hānabhāgiyo samādhi, ṭhitibhāgiyo samādhi, visesabhāgiyo samādhi, nibbedhabhāgiyo samādhi, lokiyo samādhi, lokuttaro samādhi, micchāsamādhi, sammāsamādhi. Ayaṃ vemattatā.
‘‘পটিপদা’’তি একত্ততা। তত্থ কতমা পটিপদা? আগাল়্হপটিপদা 25, নিজ্ঝামপটিপদা, মজ্ঝিমপটিপদা, অক্খমা পটিপদা, খমা পটিপদা, সমা পটিপদা, দমা পটিপদা , দুক্খা পটিপদা দন্ধাভিঞ্ঞা, দুক্খা পটিপদা খিপ্পাভিঞ্ঞা, সুখা পটিপদা দন্ধাভিঞ্ঞা, সুখা পটিপদা খিপ্পাভিঞ্ঞাতি। অযং ৰেমত্ততা।
‘‘Paṭipadā’’ti ekattatā. Tattha katamā paṭipadā? Āgāḷhapaṭipadā 26, nijjhāmapaṭipadā, majjhimapaṭipadā, akkhamā paṭipadā, khamā paṭipadā, samā paṭipadā, damā paṭipadā , dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññāti. Ayaṃ vemattatā.
‘‘কাযো’’তি একত্ততা। তত্থ কতমো কাযো? নামকাযো রূপকাযো চ। তত্থ কতমো রূপকাযো? কেসা লোমা নখা দন্তা তচো মংসং ন্হারু 27 অট্ঠি অট্ঠিমিঞ্জং ৰক্কং হদযং যকনং কিলোমকং পিহকং পপ্ফাসং অন্তং অন্তগুণং উদরিযং করীসং পিত্তং সেম্হং পুব্বো লোহিতং সেদো মেদো অস্সু ৰসা খেল়ো সিঙ্ঘাণিকা লসিকা মুত্তং মত্থলুঙ্গন্তি – অযং রূপকাযো। নামকাযো নাম ৰেদনা সঞ্ঞা চেতনা চিত্তং ফস্সো মনসিকারোতি – অযং নামকাযোতি। অযং ৰেমত্ততা।
‘‘Kāyo’’ti ekattatā. Tattha katamo kāyo? Nāmakāyo rūpakāyo ca. Tattha katamo rūpakāyo? Kesā lomā nakhā dantā taco maṃsaṃ nhāru 28 aṭṭhi aṭṭhimiñjaṃ vakkaṃ hadayaṃ yakanaṃ kilomakaṃ pihakaṃ papphāsaṃ antaṃ antaguṇaṃ udariyaṃ karīsaṃ pittaṃ semhaṃ pubbo lohitaṃ sedo medo assu vasā kheḷo siṅghāṇikā lasikā muttaṃ matthaluṅganti – ayaṃ rūpakāyo. Nāmakāyo nāma vedanā saññā cetanā cittaṃ phasso manasikāroti – ayaṃ nāmakāyoti. Ayaṃ vemattatā.
এৰং যো ধম্মো যস্স ধম্মস্স সমানভাৰো, সো ধম্মো তস্স ধম্মস্স একত্ততায একী ভৰতি। যেন যেন ৰা পন ৰিলক্খণো, তেন তেন ৰেমত্তং গচ্ছতি। এৰং সুত্তে ৰা ৰেয্যাকরণে ৰা গাথাযং ৰা পুচ্ছিতেন ৰীমংসযিতব্বং, কিং একত্ততায পুচ্ছতি, উদাহু ৰেমত্ততাযাতি। যদি একত্ততায পুচ্ছিতং, একত্ততায ৰিসজ্জযিতব্বং। যদি ৰেমত্ততায পুচ্ছিতং, ৰেমত্ততায ৰিসজ্জযিতব্বং। যদি সত্তাধিট্ঠানেন পুচ্ছিতং, সত্তাধিট্ঠানেন ৰিসজ্জযিতব্বং। যদি ধম্মাধিট্ঠানেন পুচ্ছিতং, ধম্মাধিট্ঠানেন ৰিসজ্জযিতব্বং। যথা যথা ৰা পন পুচ্ছিতং, তথা তথা ৰিসজ্জযিতব্বং। তেনাহ আযস্মা মহাকচ্চাযনো ‘‘একত্ততায ধম্মা’’তি।
Evaṃ yo dhammo yassa dhammassa samānabhāvo, so dhammo tassa dhammassa ekattatāya ekī bhavati. Yena yena vā pana vilakkhaṇo, tena tena vemattaṃ gacchati. Evaṃ sutte vā veyyākaraṇe vā gāthāyaṃ vā pucchitena vīmaṃsayitabbaṃ, kiṃ ekattatāya pucchati, udāhu vemattatāyāti. Yadi ekattatāya pucchitaṃ, ekattatāya visajjayitabbaṃ. Yadi vemattatāya pucchitaṃ, vemattatāya visajjayitabbaṃ. Yadi sattādhiṭṭhānena pucchitaṃ, sattādhiṭṭhānena visajjayitabbaṃ. Yadi dhammādhiṭṭhānena pucchitaṃ, dhammādhiṭṭhānena visajjayitabbaṃ. Yathā yathā vā pana pucchitaṃ, tathā tathā visajjayitabbaṃ. Tenāha āyasmā mahākaccāyano ‘‘ekattatāya dhammā’’ti.
নিযুত্তো অধিট্ঠানো হারো।
Niyutto adhiṭṭhāno hāro.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ১৪. অধিট্ঠানহারৰিভঙ্গৰণ্ণনা • 14. Adhiṭṭhānahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ১৪. অধিট্ঠানহারৰিভঙ্গৰণ্ণনা • 14. Adhiṭṭhānahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ১৪. অধিট্ঠানহারৰিভঙ্গৰিভাৰনা • 14. Adhiṭṭhānahāravibhaṅgavibhāvanā
