| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
அதி⁴ட்டா²யாதி மாதிகாவஸேன ஆணத்திகபயோக³கதா²வண்ணனா
Adhiṭṭhāyāti mātikāvasena āṇattikapayogakathāvaṇṇanā
ஏவங் விஜ்ஜா²தி ஏவங் த⁴னுங் கட்³டெ⁴த்வா விஜ்ஜ². ஏவங் பஹராதி ஏவங் த³ள்ஹங் அஸிங் க³ஹெத்வா பஹர. ஏவங் கா⁴தேஹீதி ஏவங் கம்மகாரணங் கத்வா மாரேஹி. மஜ்ஜே²தி ஹத்தி²னோ பிட்டி²மஜ்ஜே². ஏதேனாதி ‘‘அதி⁴ட்ட²ஹித்வா ஆணாபேதீ’’திஆதி³னா. தத்தா²தி ஆணத்திகப்பயோகே³.
Evaṃvijjhāti evaṃ dhanuṃ kaḍḍhetvā vijjha. Evaṃ paharāti evaṃ daḷhaṃ asiṃ gahetvā pahara. Evaṃ ghātehīti evaṃ kammakāraṇaṃ katvā mārehi. Majjheti hatthino piṭṭhimajjhe. Etenāti ‘‘adhiṭṭhahitvā āṇāpetī’’tiādinā. Tatthāti āṇattikappayoge.
கிஞ்சாபி கிரியவிஸேஸோ அட்ட²கதா²ஸு அனாக³தோ, பாளியங் பன ‘‘ஏவங் விஜ்ஜ², ஏவங் பஹர, ஏவங் கா⁴தேஹீ’’தி கிரியாவிஸேஸஸ்ஸ பராமட்ட²த்தா ஆசரியபரம்பராய ஆப⁴தங் கிரியாவிஸேஸங் பாளியா ஸங்ஸந்த³னதோ க³ஹெத்வா த³ஸ்ஸெந்தோ ‘‘அபரோ நயோ’’திஆதி³மாஹ. சே²த³னந்தி ஹத்தா²தி³சே²த³னங். பே⁴த³னந்தி குச்சி²ஆதி³பா²லனங். அத² வா உஸுனா விஜ்ஜ²னங், அஸினா சே²த³னங், முக்³க³ராதீ³ஹி ஸீஸாதி³பே⁴த³னந்தி ஏவமெத்த² அத்தோ² த³ட்ட²ப்³போ³. ஸங்க²முண்ட³கந்தி ஸங்க²முண்ட³கம்மகாரணங். தங் கரொந்தா உத்தரொட்ட²உப⁴தோகண்ணசூளிகக³லவாடகபரிச்சே²தே³ன சம்மங் சி²ந்தி³த்வா ஸப்³ப³கேஸே ஏகதோ க³ண்டி²ங் கத்வா த³ண்ட³கேன பலிவேடெ²த்வா உப்பாடெந்தி, ஸஹ கேஸேஹி சம்மங் உட்ட²ஹதி, ததோ ஸீஸகடாஹங் தூ²லஸக்க²ராஹி க⁴ங்ஸித்வா தோ⁴வந்தா ஸங்க²வண்ணங் கரொந்தி. ஏவமாதீ³தி ஆதி³-ஸத்³தே³ன பி³லங்க³தா²லிகங் ராஹுமுக²ங் ஜோதிமாலிகங் ஹத்த²பஜ்ஜோதிகங் ஏரகவத்திகங் சீரகவாஸிகங் ஏணெய்யகங் ப³ளிஸமங்ஸிகங் கஹாபணிகங் கா²ராபதச்சி²கங் பலிக⁴பரிவத்திகங் பலாலபீட²கந்தி ஏவமாதி³ங் ஸப்³ப³ங் கம்மகாரணங் ஸங்க³ண்ஹாதி.
Kiñcāpi kiriyaviseso aṭṭhakathāsu anāgato, pāḷiyaṃ pana ‘‘evaṃ vijjha, evaṃ pahara, evaṃ ghātehī’’ti kiriyāvisesassa parāmaṭṭhattā ācariyaparamparāya ābhataṃ kiriyāvisesaṃ pāḷiyā saṃsandanato gahetvā dassento ‘‘aparo nayo’’tiādimāha. Chedananti hatthādichedanaṃ. Bhedananti kucchiādiphālanaṃ. Atha vā usunā vijjhanaṃ, asinā chedanaṃ, muggarādīhi sīsādibhedananti evamettha attho daṭṭhabbo. Saṅkhamuṇḍakanti saṅkhamuṇḍakammakāraṇaṃ. Taṃ karontā uttaroṭṭhaubhatokaṇṇacūḷikagalavāṭakaparicchedena cammaṃ chinditvā sabbakese ekato gaṇṭhiṃ katvā daṇḍakena paliveṭhetvā uppāṭenti, saha kesehi cammaṃ uṭṭhahati, tato sīsakaṭāhaṃ thūlasakkharāhi ghaṃsitvā dhovantā saṅkhavaṇṇaṃ karonti. Evamādīti ādi-saddena bilaṅgathālikaṃ rāhumukhaṃ jotimālikaṃ hatthapajjotikaṃ erakavattikaṃ cīrakavāsikaṃ eṇeyyakaṃ baḷisamaṃsikaṃ kahāpaṇikaṃ khārāpatacchikaṃ palighaparivattikaṃ palālapīṭhakanti evamādiṃ sabbaṃ kammakāraṇaṃ saṅgaṇhāti.
தத்த² (அ॰ நி॰ அட்ட²॰ 2.2.1) பி³லங்க³தா²லிகந்தி கஞ்ஜியஉக்க²லிககம்மகாரணங். தங் கம்மங் கரொந்தா ஸீஸகபாலங் உப்பாடெத்வா தத்தங் அயோகு³ளங் ஸண்டா³ஸேன க³ஹெத்வா தத்த² பக்கி²பந்தி, தேன மத்த²லுங்க³ங் பக்குதி²த்வா உபரி உத்தரதி. ராஹுமுக²ந்தி ராஹுமுக²கம்மகாரணங். தங் கரொந்தோ ஸங்குனா முக²ங் விவரித்வா அந்தோமுகே² தீ³பங் ஜாலெந்தி, கண்ணசூளிகாஹி வா பட்டா²ய முக²ங் நிகா²த³னேன க²ணந்தி, லோஹிதங் பக்³க⁴ரித்வா முக²ங் பூரேதி. ஜோதிமாலிகந்தி ஸகலஸரீரங் தேலபிலோதிகாய வேடெ²த்வா ஆலிம்பெந்தி. ஹத்த²பஜ்ஜோதிகந்தி ஹத்தே² தேலபிலோதிகாய வேடெ²த்வா தீ³பங் விய பஜ்ஜாலெந்தி. ஏரகவத்திகந்தி ஏரகவத்தகம்மகாரணங். தங் கரொந்தா ஹெட்டா²கீ³வதோ பட்டா²ய சம்மவட்டே கந்தித்வா கொ³ப்ப²கே பாதெந்தி, அத² நங் யொத்தேஹி ப³ந்தி⁴த்வா கட்³ட⁴ந்தி, ஸோ அத்தனோவ சம்மவட்டே அக்கமித்வா பததி. சீரகவாஸிகந்தி சீரகவாஸிககம்மகாரணங். தங் கரொந்தா ததே²வ சம்மவட்டே கந்தித்வா கடியங் ட²பெந்தி, கடிதோ பட்டா²ய கந்தித்வா கொ³ப்ப²கேஸு ட²பெந்தி, உபரிமேஹி ஹெட்டி²மஸரீரங் சீரகனிவாஸனநிவத்த²ங் விய ஹோதி. ஏணெய்யகந்தி ஏணெய்யகம்மகாரணங். தங் கரொந்தா உபோ⁴ஸு கப்பரேஸு ச ஜண்ணுகேஸு ச அயவலயானி த³த்வா அயஸூலானி கொட்டெந்தி, ஸோ சதூஹி அயஸூலேஹி பூ⁴மியங் பதிட்ட²ஹதி, அத² நங் பரிவாரெத்வா அக்³கி³ங் கரொந்தி, தங் காலேன காலங் ஸந்தி⁴தோ ஸூலானி அபனெத்வா சதூஹி அட்டி²கோடீஹியேவ ட²பெந்தி.
Tattha (a. ni. aṭṭha. 2.2.1) bilaṅgathālikanti kañjiyaukkhalikakammakāraṇaṃ. Taṃ kammaṃ karontā sīsakapālaṃ uppāṭetvā tattaṃ ayoguḷaṃ saṇḍāsena gahetvā tattha pakkhipanti, tena matthaluṅgaṃ pakkuthitvā upari uttarati. Rāhumukhanti rāhumukhakammakāraṇaṃ. Taṃ karonto saṅkunā mukhaṃ vivaritvā antomukhe dīpaṃ jālenti, kaṇṇacūḷikāhi vā paṭṭhāya mukhaṃ nikhādanena khaṇanti, lohitaṃ paggharitvā mukhaṃ pūreti. Jotimālikanti sakalasarīraṃ telapilotikāya veṭhetvā ālimpenti. Hatthapajjotikanti hatthe telapilotikāya veṭhetvā dīpaṃ viya pajjālenti. Erakavattikanti erakavattakammakāraṇaṃ. Taṃ karontā heṭṭhāgīvato paṭṭhāya cammavaṭṭe kantitvā gopphake pātenti, atha naṃ yottehi bandhitvā kaḍḍhanti, so attanova cammavaṭṭe akkamitvā patati. Cīrakavāsikanti cīrakavāsikakammakāraṇaṃ. Taṃ karontā tatheva cammavaṭṭe kantitvā kaṭiyaṃ ṭhapenti, kaṭito paṭṭhāya kantitvā gopphakesu ṭhapenti, uparimehi heṭṭhimasarīraṃ cīrakanivāsananivatthaṃ viya hoti. Eṇeyyakanti eṇeyyakammakāraṇaṃ. Taṃ karontā ubhosu kapparesu ca jaṇṇukesu ca ayavalayāni datvā ayasūlāni koṭṭenti, so catūhi ayasūlehi bhūmiyaṃ patiṭṭhahati, atha naṃ parivāretvā aggiṃ karonti, taṃ kālena kālaṃ sandhito sūlāni apanetvā catūhi aṭṭhikoṭīhiyeva ṭhapenti.
ப³ளிஸமங்ஸிகந்தி உப⁴தோமுகே²ஹி ப³ளிஸேஹி பஹரித்வா சம்மமங்ஸனஹாரூனி உப்பாடெந்தி. கஹாபணிகந்தி ஸகலஸரீரங் திகி²ணாஹி வாஸீஹி கோடிதோ பட்டா²ய கஹாபணமத்தங் கஹாபணமத்தங் பாதெந்தா கொட்டெந்தி. கா²ராபதச்சி²கந்தி ஸரீரங் தத்த² தத்த² ஆவுதே⁴ஹி பஹரித்வா கொச்சே²ஹி கா²ரங் க⁴ங்ஸந்தி, சம்மமங்ஸனஹாரூனி பக்³க⁴ரித்வா அட்டி²கஸங்க²லிகாவ திட்ட²தி. பலிக⁴பரிவத்திகந்தி ஏகேன பஸ்ஸேன நிபஜ்ஜாபெத்வா கண்ணசி²த்³தே³ அயஸூலங் கொட்டெத்வா பத²வியா ஏகாப³த்³த⁴ங் கரொந்தி, அத² நங் பாதே³ க³ஹெத்வா ஆவிஞ்ச²ந்தி. பலாலபீட²கந்தி சே²கோ காரணிகோ ச²விசம்மங் அச்சி²ந்தி³த்வா நிஸத³போதேஹி அட்டீ²னி பி⁴ந்தி³த்வா கேஸேஸு க³ஹெத்வா உக்கி²பதி, மங்ஸராஸியேவ ஹோதி, அத² நங் கேஸேஹேவ பரியோனந்தி⁴த்வா க³ண்ஹந்தா பலாலவட்டிங் விய கத்வா பலிவேடெ²ந்தி.
Baḷisamaṃsikanti ubhatomukhehi baḷisehi paharitvā cammamaṃsanahārūni uppāṭenti. Kahāpaṇikanti sakalasarīraṃ tikhiṇāhi vāsīhi koṭito paṭṭhāya kahāpaṇamattaṃ kahāpaṇamattaṃ pātentā koṭṭenti. Khārāpatacchikanti sarīraṃ tattha tattha āvudhehi paharitvā kocchehi khāraṃ ghaṃsanti, cammamaṃsanahārūni paggharitvā aṭṭhikasaṅkhalikāva tiṭṭhati. Palighaparivattikanti ekena passena nipajjāpetvā kaṇṇachidde ayasūlaṃ koṭṭetvā pathaviyā ekābaddhaṃ karonti, atha naṃ pāde gahetvā āviñchanti. Palālapīṭhakanti cheko kāraṇiko chavicammaṃ acchinditvā nisadapotehi aṭṭhīni bhinditvā kesesu gahetvā ukkhipati, maṃsarāsiyeva hoti, atha naṃ keseheva pariyonandhitvā gaṇhantā palālavaṭṭiṃ viya katvā paliveṭhenti.
வத்து²ங் விஸங்வாதெ³த்வா ததோ அஞ்ஞங் மாரேதீதி ஸம்ப³ந்தோ⁴. புரிமபஸ்ஸாதீ³னம்பி வத்து²ஸபா⁴க³தோ வத்து²க்³க³ஹணேனேவ க³ஹணந்தி ஆஹ ‘‘புரதோ பஹரித்வா’’திஆதி³. சித்தேன ‘‘புரதோ வா’’தி நியமங் கத்வா வா அகத்வா வா ‘‘புரதோ பஹரித்வா மாரேஹீ’’தி வுத்தே ஸசே அஞ்ஞத்த² பஹரித்வா மாரேதி, லேஸங் ஒட்³டெ³த்வா அவுத்தத்தா விஸங்கேதோவ ஹோதி. சித்தேன பன யத்த² கத்த²சி பஹரித்வா மாரணங் இச்ச²ந்தோபி ஸசே ‘‘புரதோ பஹரித்வா மாரேஹீ’’தி வத³தி, தஸ்ஸ லேஸங் ஒட்³டெ³த்வா ததா² வுத்தமத்த²ங் ட²பெத்வா தேனேவ சித்தேன ஸமுட்டா²பிதவிஞ்ஞத்திகத்தா மனுஸ்ஸவிக்³க³ஹபாராஜிகதோ பரியாயேன அமுச்சனதோ ‘‘அஞ்ஞத்த² பஹரித்வா மாரிதேபி நேவத்தி² விஸங்கேதோ’’தி வத³ந்தி, கேசி பன தங் ந இச்ச²ந்தி. வத்து²விஸேஸேனாதி மாதுஆதி³வத்து²விஸேஸேன . கம்மவிஸேஸோதி ஆனந்தரியாதி³கம்மவிஸேஸோ. ஆபத்திவிஸேஸோதி பாராஜிகாதி³ஆபத்திவிஸேஸோ.
Vatthuṃ visaṃvādetvā tato aññaṃ māretīti sambandho. Purimapassādīnampi vatthusabhāgato vatthuggahaṇeneva gahaṇanti āha ‘‘purato paharitvā’’tiādi. Cittena ‘‘purato vā’’ti niyamaṃ katvā vā akatvā vā ‘‘purato paharitvā mārehī’’ti vutte sace aññattha paharitvā māreti, lesaṃ oḍḍetvā avuttattā visaṅketova hoti. Cittena pana yattha katthaci paharitvā māraṇaṃ icchantopi sace ‘‘purato paharitvā mārehī’’ti vadati, tassa lesaṃ oḍḍetvā tathā vuttamatthaṃ ṭhapetvā teneva cittena samuṭṭhāpitaviññattikattā manussaviggahapārājikato pariyāyena amuccanato ‘‘aññattha paharitvā māritepi nevatthi visaṅketo’’ti vadanti, keci pana taṃ na icchanti. Vatthuvisesenāti mātuādivatthuvisesena . Kammavisesoti ānantariyādikammaviseso. Āpattivisesoti pārājikādiāpattiviseso.
‘‘ஏதங் கா³மே டி²த’’ந்தி கா³மோ புக்³க³லனியமனத்த²ங் வுத்தோ, ந ஓகாஸனியமனத்த²ங், தஸ்மா ஓகாஸங் அனியமெத்வா புக்³க³லஸ்ஸேவ நியமிதத்தா நத்தி² விஸங்கேதோ. ‘‘கா³மேயே வா’’திஆதீ³ஸு பன ஓகாஸஸ்ஸ நியமிதத்தா அஞ்ஞத்த² மாரிதே விஸங்கேதோ வுத்தோ.
‘‘Etaṃ gāme ṭhita’’nti gāmo puggalaniyamanatthaṃ vutto, na okāsaniyamanatthaṃ, tasmā okāsaṃ aniyametvā puggalasseva niyamitattā natthi visaṅketo. ‘‘Gāmeye vā’’tiādīsu pana okāsassa niyamitattā aññattha mārite visaṅketo vutto.
துண்டே³னாதி க²க்³க³கோடியா. த²ருனாதி க²க்³க³முட்டி²னா.
Tuṇḍenāti khaggakoṭiyā. Tharunāti khaggamuṭṭhinā.
‘‘ஏதங் க³ச்ச²ந்த’’ந்தி க³மனேன புக்³க³லோவ நியமிதோ, ந இரியாபதோ². தேனாஹ ‘‘நத்தி² விஸங்கேதோ’’தி. ‘‘க³ச்ச²ந்தமேவா’’திஆதி³னா இரியாபதோ² நியமிதோ. தேனாஹ ‘‘விஸங்கேதோ ஹோதீ’’தி.
‘‘Etaṃ gacchanta’’nti gamanena puggalova niyamito, na iriyāpatho. Tenāha ‘‘natthi visaṅketo’’ti. ‘‘Gacchantamevā’’tiādinā iriyāpatho niyamito. Tenāha ‘‘visaṅketo hotī’’ti.
‘‘தீ³க⁴ங் மாரேஹீ’’தி வுத்தேபி தீ³க⁴ஸண்டா²னானங் ப³ஹுபா⁴வதோ இத்த²ன்னாமங் ஏவரூபஞ்ச தீ³க⁴ந்தி அஞ்ஞேஸங் அஸாதா⁴ரணலக்க²ணேன அனித்³தி³ட்ட²த்தா ‘‘அனியமெத்வா ஆணாபேதீ’’தி வுத்தங். தேனேவாஹ ‘‘யங் கிஞ்சி தாதி³ஸங் மாரேதீ’’தி. எத்த² ச ‘‘சித்தேன ப³ஹூஸு தீ³க⁴ஸண்டா²னேஸு ஏகங் நியமெத்வா வுத்தேபி வாசாய அனியமிதத்தா அஞ்ஞஸ்மிங் தாதி³ஸே மாரிதே நத்தி² விஸங்கேதோ’’தி வத³ந்தி. பரபாணிம்ஹி பாணஸஞ்ஞிதாலக்க²ணஸ்ஸ அங்க³ஸ்ஸ அபா⁴வதோ நேவத்தி² பாணாதிபாதோதி ஆஹ ‘‘ஆணாபகோ முச்சதீ’’தி. யதி³ ஏவங் ஓகாஸனியமே ஸதி கத²ங் பாணாதிபாதோதி? ஓகாஸங் நியமெந்தஸ்ஸ தஸ்மிங் ஓகாஸே நிஸின்னஸ்ஸ ஜீவிதிந்த்³ரியங் ஆரம்மணங் ஹோதீதி க³ஹேதப்³ப³ங். ஓகாஸஞ்ஹி நியமெத்வா நித்³தி³ஸந்தோ தஸ்மிங் ஓகாஸே நிஸின்னங் மாராபேதுகாமோ ஹோதி, ஸயங் பன ததா³ தத்த² நத்தி², தஸ்மா ஓகாஸேன ஸஹ அத்தனோ ஜீவிதிந்த்³ரியங் ஆரம்மணங் ந ஹோதீதி வத³ந்தி.
‘‘Dīghaṃ mārehī’’ti vuttepi dīghasaṇṭhānānaṃ bahubhāvato itthannāmaṃ evarūpañca dīghanti aññesaṃ asādhāraṇalakkhaṇena aniddiṭṭhattā ‘‘aniyametvā āṇāpetī’’ti vuttaṃ. Tenevāha ‘‘yaṃ kiñci tādisaṃ māretī’’ti. Ettha ca ‘‘cittena bahūsu dīghasaṇṭhānesu ekaṃ niyametvā vuttepi vācāya aniyamitattā aññasmiṃ tādise mārite natthi visaṅketo’’ti vadanti. Parapāṇimhi pāṇasaññitālakkhaṇassa aṅgassa abhāvato nevatthi pāṇātipātoti āha ‘‘āṇāpako muccatī’’ti. Yadi evaṃ okāsaniyame sati kathaṃ pāṇātipātoti? Okāsaṃ niyamentassa tasmiṃ okāse nisinnassa jīvitindriyaṃ ārammaṇaṃ hotīti gahetabbaṃ. Okāsañhi niyametvā niddisanto tasmiṃ okāse nisinnaṃ mārāpetukāmo hoti, sayaṃ pana tadā tattha natthi, tasmā okāsena saha attano jīvitindriyaṃ ārammaṇaṃ na hotīti vadanti.
அதி⁴ட்டா²யாதி மாதிகாவஸேன ஆணத்திகபயோக³கதா²வண்ணனா நிட்டி²தா.
Adhiṭṭhāyāti mātikāvasena āṇattikapayogakathāvaṇṇanā niṭṭhitā.
