| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
অধিট্ঠাযাতি মাতিকাৰসেন আণত্তিকপযোগকথাৰণ্ণনা
Adhiṭṭhāyāti mātikāvasena āṇattikapayogakathāvaṇṇanā
এৰং ৰিজ্ঝাতি এৰং ধনুং কড্ঢেত্ৰা ৰিজ্ঝ। এৰং পহরাতি এৰং দল়্হং অসিং গহেত্ৰা পহর। এৰং ঘাতেহীতি এৰং কম্মকারণং কত্ৰা মারেহি। মজ্ঝেতি হত্থিনো পিট্ঠিমজ্ঝে। এতেনাতি ‘‘অধিট্ঠহিত্ৰা আণাপেতী’’তিআদিনা। তত্থাতি আণত্তিকপ্পযোগে।
Evaṃvijjhāti evaṃ dhanuṃ kaḍḍhetvā vijjha. Evaṃ paharāti evaṃ daḷhaṃ asiṃ gahetvā pahara. Evaṃ ghātehīti evaṃ kammakāraṇaṃ katvā mārehi. Majjheti hatthino piṭṭhimajjhe. Etenāti ‘‘adhiṭṭhahitvā āṇāpetī’’tiādinā. Tatthāti āṇattikappayoge.
কিঞ্চাপি কিরিযৰিসেসো অট্ঠকথাসু অনাগতো, পাল়িযং পন ‘‘এৰং ৰিজ্ঝ, এৰং পহর, এৰং ঘাতেহী’’তি কিরিযাৰিসেসস্স পরামট্ঠত্তা আচরিযপরম্পরায আভতং কিরিযাৰিসেসং পাল়িযা সংসন্দনতো গহেত্ৰা দস্সেন্তো ‘‘অপরো নযো’’তিআদিমাহ। ছেদনন্তি হত্থাদিছেদনং। ভেদনন্তি কুচ্ছিআদিফালনং। অথ ৰা উসুনা ৰিজ্ঝনং, অসিনা ছেদনং, মুগ্গরাদীহি সীসাদিভেদনন্তি এৰমেত্থ অত্থো দট্ঠব্বো। সঙ্খমুণ্ডকন্তি সঙ্খমুণ্ডকম্মকারণং। তং করোন্তা উত্তরোট্ঠউভতোকণ্ণচূল়িকগলৰাটকপরিচ্ছেদেন চম্মং ছিন্দিত্ৰা সব্বকেসে একতো গণ্ঠিং কত্ৰা দণ্ডকেন পলিৰেঠেত্ৰা উপ্পাটেন্তি, সহ কেসেহি চম্মং উট্ঠহতি, ততো সীসকটাহং থূলসক্খরাহি ঘংসিত্ৰা ধোৰন্তা সঙ্খৰণ্ণং করোন্তি। এৰমাদীতি আদি-সদ্দেন বিলঙ্গথালিকং রাহুমুখং জোতিমালিকং হত্থপজ্জোতিকং এরকৰত্তিকং চীরকৰাসিকং এণেয্যকং বল়িসমংসিকং কহাপণিকং খারাপতচ্ছিকং পলিঘপরিৰত্তিকং পলালপীঠকন্তি এৰমাদিং সব্বং কম্মকারণং সঙ্গণ্হাতি।
Kiñcāpi kiriyaviseso aṭṭhakathāsu anāgato, pāḷiyaṃ pana ‘‘evaṃ vijjha, evaṃ pahara, evaṃ ghātehī’’ti kiriyāvisesassa parāmaṭṭhattā ācariyaparamparāya ābhataṃ kiriyāvisesaṃ pāḷiyā saṃsandanato gahetvā dassento ‘‘aparo nayo’’tiādimāha. Chedananti hatthādichedanaṃ. Bhedananti kucchiādiphālanaṃ. Atha vā usunā vijjhanaṃ, asinā chedanaṃ, muggarādīhi sīsādibhedananti evamettha attho daṭṭhabbo. Saṅkhamuṇḍakanti saṅkhamuṇḍakammakāraṇaṃ. Taṃ karontā uttaroṭṭhaubhatokaṇṇacūḷikagalavāṭakaparicchedena cammaṃ chinditvā sabbakese ekato gaṇṭhiṃ katvā daṇḍakena paliveṭhetvā uppāṭenti, saha kesehi cammaṃ uṭṭhahati, tato sīsakaṭāhaṃ thūlasakkharāhi ghaṃsitvā dhovantā saṅkhavaṇṇaṃ karonti. Evamādīti ādi-saddena bilaṅgathālikaṃ rāhumukhaṃ jotimālikaṃ hatthapajjotikaṃ erakavattikaṃ cīrakavāsikaṃ eṇeyyakaṃ baḷisamaṃsikaṃ kahāpaṇikaṃ khārāpatacchikaṃ palighaparivattikaṃ palālapīṭhakanti evamādiṃ sabbaṃ kammakāraṇaṃ saṅgaṇhāti.
তত্থ (অ॰ নি॰ অট্ঠ॰ ২.২.১) বিলঙ্গথালিকন্তি কঞ্জিযউক্খলিককম্মকারণং। তং কম্মং করোন্তা সীসকপালং উপ্পাটেত্ৰা তত্তং অযোগুল়ং সণ্ডাসেন গহেত্ৰা তত্থ পক্খিপন্তি, তেন মত্থলুঙ্গং পক্কুথিত্ৰা উপরি উত্তরতি। রাহুমুখন্তি রাহুমুখকম্মকারণং। তং করোন্তো সঙ্কুনা মুখং ৰিৰরিত্ৰা অন্তোমুখে দীপং জালেন্তি, কণ্ণচূল়িকাহি ৰা পট্ঠায মুখং নিখাদনেন খণন্তি, লোহিতং পগ্ঘরিত্ৰা মুখং পূরেতি। জোতিমালিকন্তি সকলসরীরং তেলপিলোতিকায ৰেঠেত্ৰা আলিম্পেন্তি। হত্থপজ্জোতিকন্তি হত্থে তেলপিলোতিকায ৰেঠেত্ৰা দীপং ৰিয পজ্জালেন্তি। এরকৰত্তিকন্তি এরকৰত্তকম্মকারণং। তং করোন্তা হেট্ঠাগীৰতো পট্ঠায চম্মৰট্টে কন্তিত্ৰা গোপ্ফকে পাতেন্তি, অথ নং যোত্তেহি বন্ধিত্ৰা কড্ঢন্তি, সো অত্তনোৰ চম্মৰট্টে অক্কমিত্ৰা পততি। চীরকৰাসিকন্তি চীরকৰাসিককম্মকারণং। তং করোন্তা তথেৰ চম্মৰট্টে কন্তিত্ৰা কটিযং ঠপেন্তি, কটিতো পট্ঠায কন্তিত্ৰা গোপ্ফকেসু ঠপেন্তি, উপরিমেহি হেট্ঠিমসরীরং চীরকনিৰাসননিৰত্থং ৰিয হোতি। এণেয্যকন্তি এণেয্যকম্মকারণং। তং করোন্তা উভোসু কপ্পরেসু চ জণ্ণুকেসু চ অযৰলযানি দত্ৰা অযসূলানি কোট্টেন্তি, সো চতূহি অযসূলেহি ভূমিযং পতিট্ঠহতি, অথ নং পরিৰারেত্ৰা অগ্গিং করোন্তি, তং কালেন কালং সন্ধিতো সূলানি অপনেত্ৰা চতূহি অট্ঠিকোটীহিযেৰ ঠপেন্তি।
Tattha (a. ni. aṭṭha. 2.2.1) bilaṅgathālikanti kañjiyaukkhalikakammakāraṇaṃ. Taṃ kammaṃ karontā sīsakapālaṃ uppāṭetvā tattaṃ ayoguḷaṃ saṇḍāsena gahetvā tattha pakkhipanti, tena matthaluṅgaṃ pakkuthitvā upari uttarati. Rāhumukhanti rāhumukhakammakāraṇaṃ. Taṃ karonto saṅkunā mukhaṃ vivaritvā antomukhe dīpaṃ jālenti, kaṇṇacūḷikāhi vā paṭṭhāya mukhaṃ nikhādanena khaṇanti, lohitaṃ paggharitvā mukhaṃ pūreti. Jotimālikanti sakalasarīraṃ telapilotikāya veṭhetvā ālimpenti. Hatthapajjotikanti hatthe telapilotikāya veṭhetvā dīpaṃ viya pajjālenti. Erakavattikanti erakavattakammakāraṇaṃ. Taṃ karontā heṭṭhāgīvato paṭṭhāya cammavaṭṭe kantitvā gopphake pātenti, atha naṃ yottehi bandhitvā kaḍḍhanti, so attanova cammavaṭṭe akkamitvā patati. Cīrakavāsikanti cīrakavāsikakammakāraṇaṃ. Taṃ karontā tatheva cammavaṭṭe kantitvā kaṭiyaṃ ṭhapenti, kaṭito paṭṭhāya kantitvā gopphakesu ṭhapenti, uparimehi heṭṭhimasarīraṃ cīrakanivāsananivatthaṃ viya hoti. Eṇeyyakanti eṇeyyakammakāraṇaṃ. Taṃ karontā ubhosu kapparesu ca jaṇṇukesu ca ayavalayāni datvā ayasūlāni koṭṭenti, so catūhi ayasūlehi bhūmiyaṃ patiṭṭhahati, atha naṃ parivāretvā aggiṃ karonti, taṃ kālena kālaṃ sandhito sūlāni apanetvā catūhi aṭṭhikoṭīhiyeva ṭhapenti.
বল়িসমংসিকন্তি উভতোমুখেহি বল়িসেহি পহরিত্ৰা চম্মমংসনহারূনি উপ্পাটেন্তি। কহাপণিকন্তি সকলসরীরং তিখিণাহি ৰাসীহি কোটিতো পট্ঠায কহাপণমত্তং কহাপণমত্তং পাতেন্তা কোট্টেন্তি। খারাপতচ্ছিকন্তি সরীরং তত্থ তত্থ আৰুধেহি পহরিত্ৰা কোচ্ছেহি খারং ঘংসন্তি, চম্মমংসনহারূনি পগ্ঘরিত্ৰা অট্ঠিকসঙ্খলিকাৰ তিট্ঠতি। পলিঘপরিৰত্তিকন্তি একেন পস্সেন নিপজ্জাপেত্ৰা কণ্ণছিদ্দে অযসূলং কোট্টেত্ৰা পথৰিযা একাবদ্ধং করোন্তি, অথ নং পাদে গহেত্ৰা আৰিঞ্ছন্তি। পলালপীঠকন্তি ছেকো কারণিকো ছৰিচম্মং অচ্ছিন্দিত্ৰা নিসদপোতেহি অট্ঠীনি ভিন্দিত্ৰা কেসেসু গহেত্ৰা উক্খিপতি, মংসরাসিযেৰ হোতি, অথ নং কেসেহেৰ পরিযোনন্ধিত্ৰা গণ্হন্তা পলালৰট্টিং ৰিয কত্ৰা পলিৰেঠেন্তি।
Baḷisamaṃsikanti ubhatomukhehi baḷisehi paharitvā cammamaṃsanahārūni uppāṭenti. Kahāpaṇikanti sakalasarīraṃ tikhiṇāhi vāsīhi koṭito paṭṭhāya kahāpaṇamattaṃ kahāpaṇamattaṃ pātentā koṭṭenti. Khārāpatacchikanti sarīraṃ tattha tattha āvudhehi paharitvā kocchehi khāraṃ ghaṃsanti, cammamaṃsanahārūni paggharitvā aṭṭhikasaṅkhalikāva tiṭṭhati. Palighaparivattikanti ekena passena nipajjāpetvā kaṇṇachidde ayasūlaṃ koṭṭetvā pathaviyā ekābaddhaṃ karonti, atha naṃ pāde gahetvā āviñchanti. Palālapīṭhakanti cheko kāraṇiko chavicammaṃ acchinditvā nisadapotehi aṭṭhīni bhinditvā kesesu gahetvā ukkhipati, maṃsarāsiyeva hoti, atha naṃ keseheva pariyonandhitvā gaṇhantā palālavaṭṭiṃ viya katvā paliveṭhenti.
ৰত্থুং ৰিসংৰাদেত্ৰা ততো অঞ্ঞং মারেতীতি সম্বন্ধো। পুরিমপস্সাদীনম্পি ৰত্থুসভাগতো ৰত্থুগ্গহণেনেৰ গহণন্তি আহ ‘‘পুরতো পহরিত্ৰা’’তিআদি। চিত্তেন ‘‘পুরতো ৰা’’তি নিযমং কত্ৰা ৰা অকত্ৰা ৰা ‘‘পুরতো পহরিত্ৰা মারেহী’’তি ৰুত্তে সচে অঞ্ঞত্থ পহরিত্ৰা মারেতি, লেসং ওড্ডেত্ৰা অৰুত্তত্তা ৰিসঙ্কেতোৰ হোতি। চিত্তেন পন যত্থ কত্থচি পহরিত্ৰা মারণং ইচ্ছন্তোপি সচে ‘‘পুরতো পহরিত্ৰা মারেহী’’তি ৰদতি, তস্স লেসং ওড্ডেত্ৰা তথা ৰুত্তমত্থং ঠপেত্ৰা তেনেৰ চিত্তেন সমুট্ঠাপিতৰিঞ্ঞত্তিকত্তা মনুস্সৰিগ্গহপারাজিকতো পরিযাযেন অমুচ্চনতো ‘‘অঞ্ঞত্থ পহরিত্ৰা মারিতেপি নেৰত্থি ৰিসঙ্কেতো’’তি ৰদন্তি, কেচি পন তং ন ইচ্ছন্তি। ৰত্থুৰিসেসেনাতি মাতুআদিৰত্থুৰিসেসেন । কম্মৰিসেসোতি আনন্তরিযাদিকম্মৰিসেসো। আপত্তিৰিসেসোতি পারাজিকাদিআপত্তিৰিসেসো।
Vatthuṃ visaṃvādetvā tato aññaṃ māretīti sambandho. Purimapassādīnampi vatthusabhāgato vatthuggahaṇeneva gahaṇanti āha ‘‘purato paharitvā’’tiādi. Cittena ‘‘purato vā’’ti niyamaṃ katvā vā akatvā vā ‘‘purato paharitvā mārehī’’ti vutte sace aññattha paharitvā māreti, lesaṃ oḍḍetvā avuttattā visaṅketova hoti. Cittena pana yattha katthaci paharitvā māraṇaṃ icchantopi sace ‘‘purato paharitvā mārehī’’ti vadati, tassa lesaṃ oḍḍetvā tathā vuttamatthaṃ ṭhapetvā teneva cittena samuṭṭhāpitaviññattikattā manussaviggahapārājikato pariyāyena amuccanato ‘‘aññattha paharitvā māritepi nevatthi visaṅketo’’ti vadanti, keci pana taṃ na icchanti. Vatthuvisesenāti mātuādivatthuvisesena . Kammavisesoti ānantariyādikammaviseso. Āpattivisesoti pārājikādiāpattiviseso.
‘‘এতং গামে ঠিত’’ন্তি গামো পুগ্গলনিযমনত্থং ৰুত্তো, ন ওকাসনিযমনত্থং, তস্মা ওকাসং অনিযমেত্ৰা পুগ্গলস্সেৰ নিযমিতত্তা নত্থি ৰিসঙ্কেতো। ‘‘গামেযে ৰা’’তিআদীসু পন ওকাসস্স নিযমিতত্তা অঞ্ঞত্থ মারিতে ৰিসঙ্কেতো ৰুত্তো।
‘‘Etaṃ gāme ṭhita’’nti gāmo puggalaniyamanatthaṃ vutto, na okāsaniyamanatthaṃ, tasmā okāsaṃ aniyametvā puggalasseva niyamitattā natthi visaṅketo. ‘‘Gāmeye vā’’tiādīsu pana okāsassa niyamitattā aññattha mārite visaṅketo vutto.
তুণ্ডেনাতি খগ্গকোটিযা। থরুনাতি খগ্গমুট্ঠিনা।
Tuṇḍenāti khaggakoṭiyā. Tharunāti khaggamuṭṭhinā.
‘‘এতং গচ্ছন্ত’’ন্তি গমনেন পুগ্গলোৰ নিযমিতো, ন ইরিযাপথো। তেনাহ ‘‘নত্থি ৰিসঙ্কেতো’’তি। ‘‘গচ্ছন্তমেৰা’’তিআদিনা ইরিযাপথো নিযমিতো। তেনাহ ‘‘ৰিসঙ্কেতো হোতী’’তি।
‘‘Etaṃ gacchanta’’nti gamanena puggalova niyamito, na iriyāpatho. Tenāha ‘‘natthi visaṅketo’’ti. ‘‘Gacchantamevā’’tiādinā iriyāpatho niyamito. Tenāha ‘‘visaṅketo hotī’’ti.
‘‘দীঘং মারেহী’’তি ৰুত্তেপি দীঘসণ্ঠানানং বহুভাৰতো ইত্থন্নামং এৰরূপঞ্চ দীঘন্তি অঞ্ঞেসং অসাধারণলক্খণেন অনিদ্দিট্ঠত্তা ‘‘অনিযমেত্ৰা আণাপেতী’’তি ৰুত্তং। তেনেৰাহ ‘‘যং কিঞ্চি তাদিসং মারেতী’’তি। এত্থ চ ‘‘চিত্তেন বহূসু দীঘসণ্ঠানেসু একং নিযমেত্ৰা ৰুত্তেপি ৰাচায অনিযমিতত্তা অঞ্ঞস্মিং তাদিসে মারিতে নত্থি ৰিসঙ্কেতো’’তি ৰদন্তি। পরপাণিম্হি পাণসঞ্ঞিতালক্খণস্স অঙ্গস্স অভাৰতো নেৰত্থি পাণাতিপাতোতি আহ ‘‘আণাপকো মুচ্চতী’’তি। যদি এৰং ওকাসনিযমে সতি কথং পাণাতিপাতোতি? ওকাসং নিযমেন্তস্স তস্মিং ওকাসে নিসিন্নস্স জীৰিতিন্দ্রিযং আরম্মণং হোতীতি গহেতব্বং। ওকাসঞ্হি নিযমেত্ৰা নিদ্দিসন্তো তস্মিং ওকাসে নিসিন্নং মারাপেতুকামো হোতি, সযং পন তদা তত্থ নত্থি, তস্মা ওকাসেন সহ অত্তনো জীৰিতিন্দ্রিযং আরম্মণং ন হোতীতি ৰদন্তি।
‘‘Dīghaṃ mārehī’’ti vuttepi dīghasaṇṭhānānaṃ bahubhāvato itthannāmaṃ evarūpañca dīghanti aññesaṃ asādhāraṇalakkhaṇena aniddiṭṭhattā ‘‘aniyametvā āṇāpetī’’ti vuttaṃ. Tenevāha ‘‘yaṃ kiñci tādisaṃ māretī’’ti. Ettha ca ‘‘cittena bahūsu dīghasaṇṭhānesu ekaṃ niyametvā vuttepi vācāya aniyamitattā aññasmiṃ tādise mārite natthi visaṅketo’’ti vadanti. Parapāṇimhi pāṇasaññitālakkhaṇassa aṅgassa abhāvato nevatthi pāṇātipātoti āha ‘‘āṇāpako muccatī’’ti. Yadi evaṃ okāsaniyame sati kathaṃ pāṇātipātoti? Okāsaṃ niyamentassa tasmiṃ okāse nisinnassa jīvitindriyaṃ ārammaṇaṃ hotīti gahetabbaṃ. Okāsañhi niyametvā niddisanto tasmiṃ okāse nisinnaṃ mārāpetukāmo hoti, sayaṃ pana tadā tattha natthi, tasmā okāsena saha attano jīvitindriyaṃ ārammaṇaṃ na hotīti vadanti.
অধিট্ঠাযাতি মাতিকাৰসেন আণত্তিকপযোগকথাৰণ্ণনা নিট্ঠিতা।
Adhiṭṭhāyāti mātikāvasena āṇattikapayogakathāvaṇṇanā niṭṭhitā.
