| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၂. အဓိဝုတ္တိပဒသုတ္တဝဏ္ဏနာ
2. Adhivuttipadasuttavaṇṇanā
၂၂. ဒုတိယေ ယေ တေ ဓမ္မာတိ ယေ တေ ဒသဗလဉာဏံ သဗ္ဗညုတညာဏဓမ္မာ။ အဓိဝုတ္တိပဒာနန္တိ အဓိဝစနပဒာနံ, ခန္ဓာယတနဓာတုဓမ္မာနန္တိ အတ္ထော။ အဓိဝုတ္တိယောတိ ဟိ အဓိဝစနာနိ ဝုစ္စန္တိ, တေသံ ယေ ပဒဘူတာ ဒေသနာယ ပဒဋ္ဌာနတ္တာ။ အတီတာ ဗုဒ္ဓာပိ ဟိ ဧတေ ဓမ္မေ ကထယိံသု, အနာဂတာပိ ဧတေဝ ကထယိသ္သန္တိ။ တသ္မာ ခန္ဓာဒယော အဓိဝုတ္တိပဒာနိ နာမ။ တေသံ အဓိဝုတ္တိပဒာနံ။ အထ ဝာ ဘူတမတ္ထံ အဘိဘဝိတ္ဝာ ယထာသဘာဝတော အဂ္ဂဟေတ္ဝာ ဝတ္တနတော အဓိဝုတ္တိယောတိ ဒိဋ္ဌိယော ဝုစ္စန္တိ, အဓိဝုတ္တီနံ ပဒာနိ အဓိဝုတ္တိပဒာနိ, ဒိဋ္ဌိဒီပကာနိ ဝစနာနီတိ အတ္ထော။ တေသံ အဓိဝုတ္တိပဒာနံ ဒိဋ္ဌိဝောဟာရာနံ။ အဘိညာ သစ္ဆိကိရိယာယာတိ ဇာနိတ္ဝာ ပစ္စက္ခကရဏတ္ထာယ။ ဝိသာရဒောတိ ဉာဏသောမနသ္သပ္ပတ္တော။ တတ္ထာတိ တေသု ဓမ္မေသု တေသံ တေသံ တထာ တထာ ဓမ္မံ ဒေသေတုန္တိ တေသံ တေသံ ဒိဋ္ဌိဂတိကာနံ ဝာ ဣတရေသံ ဝာ အာသယံ ဉတ္ဝာ တထာ တထာ ဓမ္မံ ဒေသေတုံ။ ဟီနံ ဝာ ဟီနန္တိ ဉသ္သတီတိ ဟီနံ ဝာ ဓမ္မံ ‘‘ဟီနော ဓမ္မော’’တိ ဇာနိသ္သတိ။ ဉာတေယ္ယန္တိ ဉာတဗ္ဗံ။ ဒဋ္ဌေယ္ယန္တိ ဒဋ္ဌဗ္ဗံ။ သစ္ဆိကရေယ္ယန္တိ သစ္ဆိကာတဗ္ဗံ။ တတ္ထ တတ္ထ ယထာဘူတဉာဏန္တိ တေသု တေသု ဓမ္မေသု ယထာသဘာဝဉာဏံ။ ဣမိနာ သဗ္ဗညုတညာဏံ ဒသ္သေတိ။ ဧဝံ သဗ္ဗညုတညာဏံ ဒသ္သေတ္ဝာ ပုန ဒသဗလဉာဏံ ဒသ္သေန္တော ဒသယိမာနီတိအာဒိမာဟ။ ဒသဗလဉာဏမ္ပိ ဟိ တတ္ထ တတ္ထ ယထာဘူတဉာဏမေဝာတိ။
22. Dutiye ye te dhammāti ye te dasabalañāṇaṃ sabbaññutaññāṇadhammā. Adhivuttipadānanti adhivacanapadānaṃ, khandhāyatanadhātudhammānanti attho. Adhivuttiyoti hi adhivacanāni vuccanti, tesaṃ ye padabhūtā desanāya padaṭṭhānattā. Atītā buddhāpi hi ete dhamme kathayiṃsu, anāgatāpi eteva kathayissanti. Tasmā khandhādayo adhivuttipadāni nāma. Tesaṃ adhivuttipadānaṃ. Atha vā bhūtamatthaṃ abhibhavitvā yathāsabhāvato aggahetvā vattanato adhivuttiyoti diṭṭhiyo vuccanti, adhivuttīnaṃ padāni adhivuttipadāni, diṭṭhidīpakāni vacanānīti attho. Tesaṃ adhivuttipadānaṃ diṭṭhivohārānaṃ. Abhiññā sacchikiriyāyāti jānitvā paccakkhakaraṇatthāya. Visāradoti ñāṇasomanassappatto. Tatthāti tesu dhammesu tesaṃ tesaṃ tathā tathā dhammaṃ desetunti tesaṃ tesaṃ diṭṭhigatikānaṃ vā itaresaṃ vā āsayaṃ ñatvā tathā tathā dhammaṃ desetuṃ. Hīnaṃ vā hīnanti ñassatīti hīnaṃ vā dhammaṃ ‘‘hīno dhammo’’ti jānissati. Ñāteyyanti ñātabbaṃ. Daṭṭheyyanti daṭṭhabbaṃ. Sacchikareyyanti sacchikātabbaṃ. Tatthatattha yathābhūtañāṇanti tesu tesu dhammesu yathāsabhāvañāṇaṃ. Iminā sabbaññutaññāṇaṃ dasseti. Evaṃ sabbaññutaññāṇaṃ dassetvā puna dasabalañāṇaṃ dassento dasayimānītiādimāha. Dasabalañāṇampi hi tattha tattha yathābhūtañāṇamevāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. အဓိဝုတ္တိပဒသုတ္တံ • 2. Adhivuttipadasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂-၄. အဓိဝုတ္တိပဒသုတ္တာဒိဝဏ္ဏနာ • 2-4. Adhivuttipadasuttādivaṇṇanā
