| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༢. ཨདྷིཝུཏྟིཔདསུཏྟཝཎྞནཱ
2. Adhivuttipadasuttavaṇṇanā
༢༢. དུཏིཡེ ཡེ ཏེ དྷམྨཱཏི ཡེ ཏེ དསབལཉཱཎཾ སབྦཉྙུཏཉྙཱཎདྷམྨཱ། ཨདྷིཝུཏྟིཔདཱནནྟི ཨདྷིཝཙནཔདཱནཾ, ཁནྡྷཱཡཏནདྷཱཏུདྷམྨཱནནྟི ཨཏྠོ། ཨདྷིཝུཏྟིཡོཏི ཧི ཨདྷིཝཙནཱནི ཝུཙྩནྟི, ཏེསཾ ཡེ པདབྷཱུཏཱ དེསནཱཡ པདཊྛཱནཏྟཱ། ཨཏཱིཏཱ བུདྡྷཱཔི ཧི ཨེཏེ དྷམྨེ ཀཐཡིཾསུ, ཨནཱགཏཱཔི ཨེཏེཝ ཀཐཡིསྶནྟི། ཏསྨཱ ཁནྡྷཱདཡོ ཨདྷིཝུཏྟིཔདཱནི ནཱམ། ཏེསཾ ཨདྷིཝུཏྟིཔདཱནཾ། ཨཐ ཝཱ བྷཱུཏམཏྠཾ ཨབྷིབྷཝིཏྭཱ ཡཐཱསབྷཱཝཏོ ཨགྒཧེཏྭཱ ཝཏྟནཏོ ཨདྷིཝུཏྟིཡོཏི དིཊྛིཡོ ཝུཙྩནྟི, ཨདྷིཝུཏྟཱིནཾ པདཱནི ཨདྷིཝུཏྟིཔདཱནི, དིཊྛིདཱིཔཀཱནི ཝཙནཱནཱིཏི ཨཏྠོ། ཏེསཾ ཨདྷིཝུཏྟིཔདཱནཾ དིཊྛིཝོཧཱརཱནཾ། ཨབྷིཉྙཱ སཙྪིཀིརིཡཱཡཱཏི ཛཱནིཏྭཱ པཙྩཀྑཀརཎཏྠཱཡ། ཝིསཱརདོཏི ཉཱཎསོམནསྶཔྤཏྟོ། ཏཏྠཱཏི ཏེསུ དྷམྨེསུ ཏེསཾ ཏེསཾ ཏཐཱ ཏཐཱ དྷམྨཾ དེསེཏུནྟི ཏེསཾ ཏེསཾ དིཊྛིགཏིཀཱནཾ ཝཱ ཨིཏརེསཾ ཝཱ ཨཱསཡཾ ཉཏྭཱ ཏཐཱ ཏཐཱ དྷམྨཾ དེསེཏུཾ། ཧཱིནཾ ཝཱ ཧཱིནནྟི ཉསྶཏཱིཏི ཧཱིནཾ ཝཱ དྷམྨཾ ‘‘ཧཱིནོ དྷམྨོ’’ཏི ཛཱནིསྶཏི། ཉཱཏེཡྻནྟི ཉཱཏབྦཾ། དཊྛེཡྻནྟི དཊྛབྦཾ། སཙྪིཀརེཡྻནྟི སཙྪིཀཱཏབྦཾ། ཏཏྠ ཏཏྠ ཡཐཱབྷཱུཏཉཱཎནྟི ཏེསུ ཏེསུ དྷམྨེསུ ཡཐཱསབྷཱཝཉཱཎཾ། ཨིམིནཱ སབྦཉྙུཏཉྙཱཎཾ དསྶེཏི། ཨེཝཾ སབྦཉྙུཏཉྙཱཎཾ དསྶེཏྭཱ པུན དསབལཉཱཎཾ དསྶེནྟོ དསཡིམཱནཱིཏིཨཱདིམཱཧ། དསབལཉཱཎམྤི ཧི ཏཏྠ ཏཏྠ ཡཐཱབྷཱུཏཉཱཎམེཝཱཏི།
22. Dutiye ye te dhammāti ye te dasabalañāṇaṃ sabbaññutaññāṇadhammā. Adhivuttipadānanti adhivacanapadānaṃ, khandhāyatanadhātudhammānanti attho. Adhivuttiyoti hi adhivacanāni vuccanti, tesaṃ ye padabhūtā desanāya padaṭṭhānattā. Atītā buddhāpi hi ete dhamme kathayiṃsu, anāgatāpi eteva kathayissanti. Tasmā khandhādayo adhivuttipadāni nāma. Tesaṃ adhivuttipadānaṃ. Atha vā bhūtamatthaṃ abhibhavitvā yathāsabhāvato aggahetvā vattanato adhivuttiyoti diṭṭhiyo vuccanti, adhivuttīnaṃ padāni adhivuttipadāni, diṭṭhidīpakāni vacanānīti attho. Tesaṃ adhivuttipadānaṃ diṭṭhivohārānaṃ. Abhiññā sacchikiriyāyāti jānitvā paccakkhakaraṇatthāya. Visāradoti ñāṇasomanassappatto. Tatthāti tesu dhammesu tesaṃ tesaṃ tathā tathā dhammaṃ desetunti tesaṃ tesaṃ diṭṭhigatikānaṃ vā itaresaṃ vā āsayaṃ ñatvā tathā tathā dhammaṃ desetuṃ. Hīnaṃ vā hīnanti ñassatīti hīnaṃ vā dhammaṃ ‘‘hīno dhammo’’ti jānissati. Ñāteyyanti ñātabbaṃ. Daṭṭheyyanti daṭṭhabbaṃ. Sacchikareyyanti sacchikātabbaṃ. Tatthatattha yathābhūtañāṇanti tesu tesu dhammesu yathāsabhāvañāṇaṃ. Iminā sabbaññutaññāṇaṃ dasseti. Evaṃ sabbaññutaññāṇaṃ dassetvā puna dasabalañāṇaṃ dassento dasayimānītiādimāha. Dasabalañāṇampi hi tattha tattha yathābhūtañāṇamevāti.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༢. ཨདྷིཝུཏྟིཔདསུཏྟཾ • 2. Adhivuttipadasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢-༤. ཨདྷིཝུཏྟིཔདསུཏྟཱདིཝཎྞནཱ • 2-4. Adhivuttipadasuttādivaṇṇanā
