| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. அதோ⁴புப்பி²யத்தே²ரஅபதா³னவண்ணனா
4. Adhopupphiyattheraapadānavaṇṇanā
அபி⁴பூ⁴ நாம ஸோ பி⁴க்கூ²திஆதி³கங் ஆயஸ்மதோ அதோ⁴புப்பி²யத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ அனேகேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴ப்பத்தோ க⁴ராவாஸங் ஸண்ட²பெத்வா அபரபா⁴கே³ காமேஸு ஆதீ³னவங் தி³ஸ்வா தங் பஹாய இஸிபப்³ப³ஜ்ஜங் பப்³ப³ஜித்வா பஞ்சாபி⁴ஞ்ஞாஅட்ட²ஸமாபத்திலாபீ⁴ இத்³தீ⁴ஸு ச வஸீபா⁴வங் பத்வா ஹிமவந்தஸ்மிங் படிவஸதி. தஸ்ஸ ஸிகி²ஸ்ஸ ப⁴க³வதோ அபி⁴பூ⁴ நாம அக்³க³ஸாவகோ விவேகாபி⁴ரதோ ஹிமவந்தமக³மாஸி. அத² ஸோ தாபஸோ தங் அக்³க³ஸாவகத்தே²ரங் தி³ஸ்வா தே²ரஸ்ஸ டி²தபப்³ப³தங் ஆருஹந்தோ பப்³ப³தஸ்ஸ ஹெட்டா²தலதோ ஸுக³ந்தா⁴னி வண்ணஸம்பன்னானி ஸத்த புப்பா²னி க³ஹெத்வா பூஜேஸி. அத² ஸோ தே²ரோ தஸ்ஸானுமோத³னமகாஸி. ஸோபி தாபஸோ ஸகஸ்ஸமங் அக³மாஸி. தத்த² ஏகேன அஜக³ரேன பீளிதோ அபரபா⁴கே³ அபரிஹீனஜ்ஜா²னோ தேனேவ உபத்³த³வேன உபத்³து³தோ காலங் கத்வா ப்³ரஹ்மலோகபராயனோ ஹுத்வா ப்³ரஹ்மஸம்பத்திங் ச²காமாவசரஸம்பத்திஞ்ச அனுப⁴வித்வா மனுஸ்ஸேஸு மனுஸ்ஸஸம்பத்தியோ ச கே²பெத்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ வுத்³தி⁴ப்பத்தோ ப⁴க³வதோ த⁴ம்மங் ஸுத்வா பஸன்னமானஸோ பப்³ப³ஜித்வா நசிரஸ்ஸேவ அரஹா அஹோஸி. ஸோ அபரபா⁴கே³ அத்தனோ கதபுஞ்ஞனாமேன அதோ⁴புப்பி²யத்தே²ரோதி பாகடோ.
Abhibhū nāma so bhikkhūtiādikaṃ āyasmato adhopupphiyattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto sikhissa bhagavato kāle kulagehe nibbatto vuddhippatto gharāvāsaṃ saṇṭhapetvā aparabhāge kāmesu ādīnavaṃ disvā taṃ pahāya isipabbajjaṃ pabbajitvā pañcābhiññāaṭṭhasamāpattilābhī iddhīsu ca vasībhāvaṃ patvā himavantasmiṃ paṭivasati. Tassa sikhissa bhagavato abhibhū nāma aggasāvako vivekābhirato himavantamagamāsi. Atha so tāpaso taṃ aggasāvakattheraṃ disvā therassa ṭhitapabbataṃ āruhanto pabbatassa heṭṭhātalato sugandhāni vaṇṇasampannāni satta pupphāni gahetvā pūjesi. Atha so thero tassānumodanamakāsi. Sopi tāpaso sakassamaṃ agamāsi. Tattha ekena ajagarena pīḷito aparabhāge aparihīnajjhāno teneva upaddavena upadduto kālaṃ katvā brahmalokaparāyano hutvā brahmasampattiṃ chakāmāvacarasampattiñca anubhavitvā manussesu manussasampattiyo ca khepetvā imasmiṃ buddhuppāde ekasmiṃ kulagehe nibbatto vuddhippatto bhagavato dhammaṃ sutvā pasannamānaso pabbajitvā nacirasseva arahā ahosi. So aparabhāge attano katapuññanāmena adhopupphiyattheroti pākaṭo.
22. ஸோ ஏகதி³வஸங் அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அபி⁴பூ⁴ நாம ஸோ பி⁴க்கூ²திஆதி³மாஹ. தத்த² ஸீலஸமாதீ⁴ஹி பரே அபி⁴ப⁴வதீதி அபி⁴பூ⁴, க²ந்த⁴மாராதி³மாரே அபி⁴ப⁴வதி அஜ்ஜொ²த்த²ரதீதி வா அபி⁴பூ⁴, ஸஸந்தானபரஸந்தானக³தகிலேஸே அபி⁴ப⁴வதி விஹேஸேதி வித்³த⁴ங்ஸேதீதி வா அபி⁴பூ⁴. பி⁴க்க²னஸீலோ யாசனஸீலோதி பி⁴க்கு², சி²ன்னபி⁴ன்னபடத⁴ரோதி வா பி⁴க்கு². அபி⁴பூ⁴ நாம அக்³க³ஸாவகோ ஸோ பி⁴க்கூ²தி அத்தோ², ஸிகி²ஸ்ஸ ப⁴க³வதோ அக்³க³ஸாவகோதி ஸம்ப³ந்தோ⁴.
22. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento abhibhū nāma so bhikkhūtiādimāha. Tattha sīlasamādhīhi pare abhibhavatīti abhibhū, khandhamārādimāre abhibhavati ajjhottharatīti vā abhibhū, sasantānaparasantānagatakilese abhibhavati viheseti viddhaṃsetīti vā abhibhū. Bhikkhanasīlo yācanasīloti bhikkhu, chinnabhinnapaṭadharoti vā bhikkhu. Abhibhū nāma aggasāvako so bhikkhūti attho, sikhissa bhagavato aggasāvakoti sambandho.
27. அஜக³ரோ மங் பீளேஸீதி ததா²ரூபங் ஸீலஸம்பன்னங் ஜா²னஸம்பன்னங் தாபஸங் புப்³பே³ கதபாபேன வேரேன ச மஹந்தோ அஜக³ரஸப்போ பீளேஸி. ஸோ தேனேவ உபத்³த³வேன உபத்³து³தோ அபரிஹீனஜ்ஜா²னோ காலங் கத்வா ப்³ரஹ்மலோகபராயணோ ஆஸி. ஸேஸங் ஸப்³ப³த்த² உத்தானமேவாதி.
27.Ajagaro maṃ pīḷesīti tathārūpaṃ sīlasampannaṃ jhānasampannaṃ tāpasaṃ pubbe katapāpena verena ca mahanto ajagarasappo pīḷesi. So teneva upaddavena upadduto aparihīnajjhāno kālaṃ katvā brahmalokaparāyaṇo āsi. Sesaṃ sabbattha uttānamevāti.
அதோ⁴புப்பி²யத்தே²ரஅபதா³னவண்ணனா ஸமத்தா.
Adhopupphiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. அதோ⁴புப்பி²யத்தே²ரஅபதா³னங் • 4. Adhopupphiyattheraapadānaṃ
