| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
४. अधोपुप्फियत्थेरअपदानवण्णना
4. Adhopupphiyattheraapadānavaṇṇanā
अभिभू नाम सो भिक्खूतिआदिकं आयस्मतो अधोपुप्फियत्थेरस्स अपदानं। अयम्पि पुरिमबुद्धेसु कताधिकारो अनेकेसु भवेसु विवट्टूपनिस्सयानि पुञ्ञानि उपचिनन्तो सिखिस्स भगवतो काले कुलगेहे निब्बत्तो वुद्धिप्पत्तो घरावासं सण्ठपेत्वा अपरभागे कामेसु आदीनवं दिस्वा तं पहाय इसिपब्बज्जं पब्बजित्वा पञ्चाभिञ्ञाअट्ठसमापत्तिलाभी इद्धीसु च वसीभावं पत्वा हिमवन्तस्मिं पटिवसति। तस्स सिखिस्स भगवतो अभिभू नाम अग्गसावको विवेकाभिरतो हिमवन्तमगमासि। अथ सो तापसो तं अग्गसावकत्थेरं दिस्वा थेरस्स ठितपब्बतं आरुहन्तो पब्बतस्स हेट्ठातलतो सुगन्धानि वण्णसम्पन्नानि सत्त पुप्फानि गहेत्वा पूजेसि। अथ सो थेरो तस्सानुमोदनमकासि। सोपि तापसो सकस्समं अगमासि। तत्थ एकेन अजगरेन पीळितो अपरभागे अपरिहीनज्झानो तेनेव उपद्दवेन उपद्दुतो कालं कत्वा ब्रह्मलोकपरायनो हुत्वा ब्रह्मसम्पत्तिं छकामावचरसम्पत्तिञ्च अनुभवित्वा मनुस्सेसु मनुस्ससम्पत्तियो च खेपेत्वा इमस्मिं बुद्धुप्पादे एकस्मिं कुलगेहे निब्बत्तो वुद्धिप्पत्तो भगवतो धम्मं सुत्वा पसन्नमानसो पब्बजित्वा नचिरस्सेव अरहा अहोसि। सो अपरभागे अत्तनो कतपुञ्ञनामेन अधोपुप्फियत्थेरोति पाकटो।
Abhibhū nāma so bhikkhūtiādikaṃ āyasmato adhopupphiyattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto sikhissa bhagavato kāle kulagehe nibbatto vuddhippatto gharāvāsaṃ saṇṭhapetvā aparabhāge kāmesu ādīnavaṃ disvā taṃ pahāya isipabbajjaṃ pabbajitvā pañcābhiññāaṭṭhasamāpattilābhī iddhīsu ca vasībhāvaṃ patvā himavantasmiṃ paṭivasati. Tassa sikhissa bhagavato abhibhū nāma aggasāvako vivekābhirato himavantamagamāsi. Atha so tāpaso taṃ aggasāvakattheraṃ disvā therassa ṭhitapabbataṃ āruhanto pabbatassa heṭṭhātalato sugandhāni vaṇṇasampannāni satta pupphāni gahetvā pūjesi. Atha so thero tassānumodanamakāsi. Sopi tāpaso sakassamaṃ agamāsi. Tattha ekena ajagarena pīḷito aparabhāge aparihīnajjhāno teneva upaddavena upadduto kālaṃ katvā brahmalokaparāyano hutvā brahmasampattiṃ chakāmāvacarasampattiñca anubhavitvā manussesu manussasampattiyo ca khepetvā imasmiṃ buddhuppāde ekasmiṃ kulagehe nibbatto vuddhippatto bhagavato dhammaṃ sutvā pasannamānaso pabbajitvā nacirasseva arahā ahosi. So aparabhāge attano katapuññanāmena adhopupphiyattheroti pākaṭo.
२२. सो एकदिवसं अत्तनो पुब्बकम्मं सरित्वा सोमनस्सजातो पुब्बचरितापदानं पकासेन्तो अभिभू नाम सो भिक्खूतिआदिमाह। तत्थ सीलसमाधीहि परे अभिभवतीति अभिभू, खन्धमारादिमारे अभिभवति अज्झोत्थरतीति वा अभिभू, ससन्तानपरसन्तानगतकिलेसे अभिभवति विहेसेति विद्धंसेतीति वा अभिभू। भिक्खनसीलो याचनसीलोति भिक्खु, छिन्नभिन्नपटधरोति वा भिक्खु। अभिभू नाम अग्गसावको सो भिक्खूति अत्थो, सिखिस्स भगवतो अग्गसावकोति सम्बन्धो।
22. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento abhibhū nāma so bhikkhūtiādimāha. Tattha sīlasamādhīhi pare abhibhavatīti abhibhū, khandhamārādimāre abhibhavati ajjhottharatīti vā abhibhū, sasantānaparasantānagatakilese abhibhavati viheseti viddhaṃsetīti vā abhibhū. Bhikkhanasīlo yācanasīloti bhikkhu, chinnabhinnapaṭadharoti vā bhikkhu. Abhibhū nāma aggasāvako so bhikkhūti attho, sikhissa bhagavato aggasāvakoti sambandho.
२७. अजगरो मं पीळेसीति तथारूपं सीलसम्पन्नं झानसम्पन्नं तापसं पुब्बे कतपापेन वेरेन च महन्तो अजगरसप्पो पीळेसि। सो तेनेव उपद्दवेन उपद्दुतो अपरिहीनज्झानो कालं कत्वा ब्रह्मलोकपरायणो आसि। सेसं सब्बत्थ उत्तानमेवाति।
27.Ajagaro maṃ pīḷesīti tathārūpaṃ sīlasampannaṃ jhānasampannaṃ tāpasaṃ pubbe katapāpena verena ca mahanto ajagarasappo pīḷesi. So teneva upaddavena upadduto aparihīnajjhāno kālaṃ katvā brahmalokaparāyaṇo āsi. Sesaṃ sabbattha uttānamevāti.
अधोपुप्फियत्थेरअपदानवण्णना समत्ता।
Adhopupphiyattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ४. अधोपुप्फियत्थेरअपदानं • 4. Adhopupphiyattheraapadānaṃ
