| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[175] 5. аад̣̇ижжубадтаанаж̇аад̇агаван̣н̣анаа
[175] 5. Ādiccupaṭṭhānajātakavaṇṇanā
саб̣б̣зсу гира бхууд̇зсууд̇и ид̣̇ам̣ сад̇т̇аа ж̇зд̇аванз вихаранд̇о згам̣ гухагабхигкум̣ аараб̣бха гат̇зси. вад̇т̇у хздтаа гат̇ид̇асад̣̇исамзва.
Sabbesukira bhūtesūti idaṃ satthā jetavane viharanto ekaṃ kuhakabhikkhuṃ ārabbha kathesi. Vatthu heṭṭhā kathitasadisameva.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о гаасирадтз б̣раахман̣агулз ниб̣б̣ад̇д̇ид̇ваа ваяаббад̇д̇о д̇аггасилааяам̣ саб̣б̣асиббаани уг̇г̇ан̣хид̇ваа исибаб̣б̣аж̇ж̇ам̣ баб̣б̣аж̇ид̇ваа абхин̃н̃аа жа самаабад̇д̇ияо жа ниб̣б̣ад̇д̇зд̇ваа махаабаривааро г̇ан̣асад̇т̇аа худ̇ваа химаванд̇з ваасам̣ габбзси. со д̇ад̇т̇а жирам̣ васид̇ваа лон̣амб̣иласзванад̇т̇ааяа баб̣б̣ад̇аа оруяха бажжанд̇з згам̣ г̇аамам̣ ниссааяа бан̣н̣асаалааяам̣ ваасам̣ убаг̇ан̃чи. ат̇зго лоламаггадо исиг̇ан̣з бхигкаажаарам̣ г̇ад̇з ассамабад̣̇ам̣ ааг̇анд̇ваа бан̣н̣асаалаа уд̇д̇ин̣н̣аа гарод̇и, баанийяагхадзсу уд̣̇агам̣ чад̣д̣зд̇и, гун̣д̣игам̣ бхинд̣̇ад̇и, аг̇г̇исаалааяам̣ важжам̣ гарод̇и. д̇аабасаа вассам̣ васид̇ваа ‘‘ид̣̇аани химаванд̇о бубпапаласамид̣̇д̇хо раман̣ийяо, д̇ад̇т̇зва г̇амиссаамаа’’д̇и бажжанд̇аг̇аамаваасигз аабужчим̣су. мануссаа ‘‘свз, бханд̇з, маяам̣ бхигкам̣ г̇ахзд̇ваа ассамабад̣̇ам̣ ааг̇амиссаама, д̇ам̣ барибхун̃ж̇ид̇ваава г̇амиссат̇аа’’д̇и вад̇ваа д̣̇уд̇ияад̣̇ивасз бахууд̇ам̣ каад̣̇анийяабхож̇анийяам̣ г̇ахзд̇ваа д̇ад̇т̇а аг̇амам̣су. д̇ам̣ д̣̇исваа со маггадо жинд̇зси – ‘‘гохан̃н̃ам̣ гад̇ваа мануссз аараад̇хзд̇ваа маяхамби каад̣̇анийяабхож̇анийяам̣ аахараабзссаамий’’д̇и. со д̇аабасажаран̣ам̣ жаранд̇о вияа сийлаваа вияа жа худ̇ваа д̇аабасаанам̣ авид̣̇уурз суурияам̣ намассамаано адтааси. мануссаа д̇ам̣ д̣̇исваа ‘‘сийлаванд̇аанам̣ санд̇игз васанд̇аа сийлаванд̇аа хонд̇ий’’д̇и вад̇ваа батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente bodhisatto kāsiraṭṭhe brāhmaṇakule nibbattitvā vayappatto takkasilāyaṃ sabbasippāni uggaṇhitvā isipabbajjaṃ pabbajitvā abhiññā ca samāpattiyo ca nibbattetvā mahāparivāro gaṇasatthā hutvā himavante vāsaṃ kappesi. So tattha ciraṃ vasitvā loṇambilasevanatthāya pabbatā oruyha paccante ekaṃ gāmaṃ nissāya paṇṇasālāyaṃ vāsaṃ upagañchi. Atheko lolamakkaṭo isigaṇe bhikkhācāraṃ gate assamapadaṃ āgantvā paṇṇasālā uttiṇṇā karoti, pānīyaghaṭesu udakaṃ chaḍḍeti, kuṇḍikaṃ bhindati, aggisālāyaṃ vaccaṃ karoti. Tāpasā vassaṃ vasitvā ‘‘idāni himavanto pupphaphalasamiddho ramaṇīyo, tattheva gamissāmā’’ti paccantagāmavāsike āpucchiṃsu. Manussā ‘‘sve, bhante, mayaṃ bhikkhaṃ gahetvā assamapadaṃ āgamissāma, taṃ paribhuñjitvāva gamissathā’’ti vatvā dutiyadivase pahūtaṃ khādanīyabhojanīyaṃ gahetvā tattha agamaṃsu. Taṃ disvā so makkaṭo cintesi – ‘‘kohaññaṃ katvā manusse ārādhetvā mayhampi khādanīyabhojanīyaṃ āharāpessāmī’’ti. So tāpasacaraṇaṃ caranto viya sīlavā viya ca hutvā tāpasānaṃ avidūre sūriyaṃ namassamāno aṭṭhāsi. Manussā taṃ disvā ‘‘sīlavantānaṃ santike vasantā sīlavantā hontī’’ti vatvā paṭhamaṃ gāthamāha –
49.
49.
‘‘саб̣б̣зсу гира бхууд̇зсу, санд̇и сийласамаахид̇аа;
‘‘Sabbesu kira bhūtesu, santi sīlasamāhitā;
басса саакамиг̇ам̣ ж̇аммам̣, аад̣̇ижжамубад̇идтад̇ий’’д̇и.
Passa sākhamigaṃ jammaṃ, ādiccamupatiṭṭhatī’’ti.
д̇ад̇т̇а санд̇и сийласамаахид̇аад̇и сийлзна саманнааг̇ад̇аа сам̣виж̇ж̇анд̇и, сийлаванд̇аа жа самаахид̇аа жа згаг̇г̇ажид̇д̇аа сам̣виж̇ж̇анд̇ийд̇иби ад̇т̇о. ж̇амманд̇и лаамагам̣. аад̣̇ижжамубад̇идтад̇ийд̇и суурияам̣ намассамаано д̇идтад̇и.
Tattha santi sīlasamāhitāti sīlena samannāgatā saṃvijjanti, sīlavantā ca samāhitā ca ekaggacittā saṃvijjantītipi attho. Jammanti lāmakaṃ. Ādiccamupatiṭṭhatīti sūriyaṃ namassamāno tiṭṭhati.
звам̣ д̇з мануссз д̇асса г̇ун̣ам̣ гат̇знд̇з д̣̇исваа б̣од̇хисад̇д̇о ‘‘д̇умхз имасса лоламаггадасса сийлаажаарам̣ аж̇аанид̇ваа авад̇т̇усмим̣язва басаннаа’’д̇и вад̇ваа д̣̇уд̇ияам̣ г̇аат̇амааха –
Evaṃ te manusse tassa guṇaṃ kathente disvā bodhisatto ‘‘tumhe imassa lolamakkaṭassa sīlācāraṃ ajānitvā avatthusmiṃyeva pasannā’’ti vatvā dutiyaṃ gāthamāha –
50.
50.
‘‘наасса сийлам̣ виж̇аанаат̇а, анан̃н̃ааяа басам̣сат̇а;
‘‘Nāssa sīlaṃ vijānātha, anaññāya pasaṃsatha;
аг̇г̇ихуд̇д̇ан̃жа уханнам̣, д̣̇вз жа бхиннаа гаман̣д̣алуу’’д̇и.
Aggihuttañca uhannaṃ, dve ca bhinnā kamaṇḍalū’’ti.
д̇ад̇т̇а анан̃н̃ааяаад̇и аж̇аанид̇ваа. уханнанд̇и иминаа баабамаггадзна уухад̣̇ам̣. гаман̣д̣алууд̇и гун̣д̣игаа. ‘‘д̣̇вз жа гун̣д̣игаа д̇зна бхиннаа’’д̇и звамасса аг̇ун̣ам̣ гат̇зси.
Tattha anaññāyāti ajānitvā. Uhannanti iminā pāpamakkaṭena ūhadaṃ. Kamaṇḍalūti kuṇḍikā. ‘‘Dve ca kuṇḍikā tena bhinnā’’ti evamassa aguṇaṃ kathesi.
мануссаа маггадасса гухагабхаавам̣ н̃ад̇ваа лзд̣д̣ун̃жа яадтин̃жа г̇ахзд̇ваа бот̇зд̇ваа балаабзд̇ваа исиг̇ан̣асса бхигкам̣ ад̣̇ам̣су. исаяоби химаванд̇амзва г̇анд̇ваа абарихийнаж̇жхаанаа б̣рахмалогабарааяан̣аа ахзсум̣.
Manussā makkaṭassa kuhakabhāvaṃ ñatvā leḍḍuñca yaṭṭhiñca gahetvā pothetvā palāpetvā isigaṇassa bhikkhaṃ adaṃsu. Isayopi himavantameva gantvā aparihīnajjhānā brahmalokaparāyaṇā ahesuṃ.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа маггадо аяам̣ гухаго бхигку ахоси, исиг̇ан̣о б̣уд̣̇д̇хабарисаа, г̇ан̣асад̇т̇аа бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā makkaṭo ayaṃ kuhako bhikkhu ahosi, isigaṇo buddhaparisā, gaṇasatthā pana ahameva ahosi’’nti.
аад̣̇ижжубадтаанаж̇аад̇агаван̣н̣анаа бан̃жамаа.
Ādiccupaṭṭhānajātakavaṇṇanā pañcamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 175. аад̣̇ижжубадтаанаж̇аад̇агам̣ • 175. Ādiccupaṭṭhānajātakaṃ
