| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. ஆதி³த்தபரியாயஸுத்தவண்ணனா
8. Ādittapariyāyasuttavaṇṇanā
235. அட்ட²மே அனுப்³யஞ்ஜனஸோ நிமித்தக்³கா³ஹோதி ‘‘ஹத்தா² ஸோப⁴னா பாதா³ ஸோப⁴னா’’தி ஏவங் அனுப்³யஞ்ஜனவஸேன நிமித்தக்³கா³ஹோ. நிமித்தக்³கா³ஹோதி ஹி ஸங்ஸந்தெ³த்வா க³ஹணங், அனுப்³யஞ்ஜனக்³கா³ஹோதி விப⁴த்திக³ஹணங். நிமித்தக்³கா³ஹோ கும்பீ⁴லஸதி³ஸோ ஸப்³ப³மேவ க³ண்ஹாதி, அனுப்³யஞ்ஜனக்³கா³ஹோ ரத்தபாஸதி³ஸோ விப⁴ஜித்வா ஹத்த²பாதா³தீ³ஸு தங் தங் கொட்டா²ஸங். இமே பன த்³வே கா³ஹா ஏகஜவனவாரேபி லப்³ப⁴ந்தி, நானாஜவனவாரே வத்தப்³ப³மேவ நத்தி².
235. Aṭṭhame anubyañjanaso nimittaggāhoti ‘‘hatthā sobhanā pādā sobhanā’’ti evaṃ anubyañjanavasena nimittaggāho. Nimittaggāhoti hi saṃsandetvā gahaṇaṃ, anubyañjanaggāhoti vibhattigahaṇaṃ. Nimittaggāho kumbhīlasadiso sabbameva gaṇhāti, anubyañjanaggāho rattapāsadiso vibhajitvā hatthapādādīsu taṃ taṃ koṭṭhāsaṃ. Ime pana dve gāhā ekajavanavārepi labbhanti, nānājavanavāre vattabbameva natthi.
நிமித்தஸ்ஸாத³க³தி²தந்தி நிமித்தஸ்ஸாதே³ன க³ந்தி²தங் ப³த்³த⁴ங். விஞ்ஞாணந்தி கம்மவிஞ்ஞாணங். தஸ்மிங் சே ஸமயே காலங் கரெய்யாதி ந கோசி ஸங்கிலிட்டே²ன சித்தேன காலங் கரொந்தோ நாம அத்தி². ஸப்³ப³ஸத்தானஞ்ஹி ப⁴வங்கே³னேவ காலகிரியா ஹோதி. கிலேஸப⁴யங் பன த³ஸ்ஸெந்தோ ஏவமாஹ. ஸமயவஸேன வா ஏவங் வுத்தங். சக்கு²த்³வாரஸ்மிஞ்ஹி ஆபாத²க³தே ஆரம்மணே ரத்தசித்தங் வா து³ட்ட²சித்தங் வா மூள்ஹசித்தங் வா ஆரம்மணரஸங் அனுப⁴வித்வா ப⁴வங்க³ங் ஓதரதி, ப⁴வங்கே³ ட²த்வா காலகிரியங் கரோதி. தஸ்மிங் ஸமயே காலங் கரொந்தஸ்ஸ த்³வேவ க³தியோ பாடிகங்கா², இமஸ்ஸ ஸமயஸ்ஸ வஸேனேதங் வுத்தங்.
Nimittassādagathitanti nimittassādena ganthitaṃ baddhaṃ. Viññāṇanti kammaviññāṇaṃ. Tasmiṃ ce samaye kālaṃ kareyyāti na koci saṃkiliṭṭhena cittena kālaṃ karonto nāma atthi. Sabbasattānañhi bhavaṅgeneva kālakiriyā hoti. Kilesabhayaṃ pana dassento evamāha. Samayavasena vā evaṃ vuttaṃ. Cakkhudvārasmiñhi āpāthagate ārammaṇe rattacittaṃ vā duṭṭhacittaṃ vā mūḷhacittaṃ vā ārammaṇarasaṃ anubhavitvā bhavaṅgaṃ otarati, bhavaṅge ṭhatvā kālakiriyaṃ karoti. Tasmiṃ samaye kālaṃ karontassa dveva gatiyo pāṭikaṅkhā, imassa samayassa vasenetaṃ vuttaṃ.
இமங் க்²வாஹங், பி⁴க்க²வே, ஆதீ³னவந்தி இமங் அனேகானி வஸ்ஸஸதஸஹஸ்ஸானி நிரயே அனுப⁴விதப்³ப³ங் து³க்க²ங் ஸம்பஸ்ஸமானோ ஏவங் வதா³மி தத்தாய அயோஸலாகாய அக்கீ²னி அஞ்ஜாபேதுகாமோதி. இமினா நயேன ஸப்³ப³த்த² அத்தோ² வேதி³தப்³போ³. அயோஸங்குனாதி அயஸூலேன. ஸம்பலிமட்ட²ந்தி த்³வேபி கண்ணச்சி²த்³தா³னி வினிவிஜ்ஜி²த்வா பத²வியங் ஆகோடனவஸேன ஸம்பலிமட்ட²ங்.
Imaṃ khvāhaṃ, bhikkhave, ādīnavanti imaṃ anekāni vassasatasahassāni niraye anubhavitabbaṃ dukkhaṃ sampassamāno evaṃ vadāmi tattāya ayosalākāya akkhīni añjāpetukāmoti. Iminā nayena sabbattha attho veditabbo. Ayosaṅkunāti ayasūlena. Sampalimaṭṭhanti dvepi kaṇṇacchiddāni vinivijjhitvā pathaviyaṃ ākoṭanavasena sampalimaṭṭhaṃ.
ததியவாரே ஸம்பலிமட்ட²ந்தி நக²ச்சே²த³னங் பவேஸெத்வா உக்கி²பித்வா ஸஹது⁴னட்டே²ன சி²ந்தி³த்வா பாதனவஸேன ஸம்பலிமட்ட²ங். சதுத்த²வாரே ஸம்பலிமட்ட²ந்தி ப³ந்த⁴னமூலங் செ²த்வா பாதனவஸேன ஸம்பலிமட்ட²ங். பஞ்சமவாரே ஸம்பலிமட்ட²ந்தி திகி²ணாய ஸத்தியா காயபஸாத³ங் உப்பாடெத்வா பதனவஸேன ஸம்பலிமட்ட²ங். ஸத்தியாதி எத்த² மஹதீ த³ண்ட³கவாஸி வேதி³தப்³பா³. ஸொத்தந்தி நிபஜ்ஜித்வா நித்³தோ³க்கமனங். யதா²ரூபானங் விதக்கானங் வஸங் க³தோ ஸங்க⁴ங் பி⁴ந்தெ³ய்யாதி இமினா விதக்கானங் யாவ ஸங்க⁴பே⁴தா³ பாபகம்மாவஹனதா த³ஸ்ஸிதா. ஸேஸமெத்த² உத்தானமேவ.
Tatiyavāre sampalimaṭṭhanti nakhacchedanaṃ pavesetvā ukkhipitvā sahadhunaṭṭhena chinditvā pātanavasena sampalimaṭṭhaṃ. Catutthavāre sampalimaṭṭhanti bandhanamūlaṃ chetvā pātanavasena sampalimaṭṭhaṃ. Pañcamavāre sampalimaṭṭhanti tikhiṇāya sattiyā kāyapasādaṃ uppāṭetvā patanavasena sampalimaṭṭhaṃ. Sattiyāti ettha mahatī daṇḍakavāsi veditabbā. Sottanti nipajjitvā niddokkamanaṃ. Yathārūpānaṃ vitakkānaṃ vasaṃ gato saṅghaṃ bhindeyyāti iminā vitakkānaṃ yāva saṅghabhedā pāpakammāvahanatā dassitā. Sesamettha uttānameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ஆதி³த்தபரியாயஸுத்தங் • 8. Ādittapariyāyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. ஆதி³த்தபரியாயஸுத்தவண்ணனா • 8. Ādittapariyāyasuttavaṇṇanā
