| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
аад̣̇ид̇д̇абарияааяасуд̇д̇аван̣н̣анаа
Ādittapariyāyasuttavaṇṇanā
54. ид̣̇аани д̇асса бхигкусахассасса аад̣̇ид̇д̇абарияааяад̣̇зсанааяа арахад̇д̇аббад̇д̇им̣ д̣̇ассзд̇ум̣ ‘‘ат̇а ко бхаг̇аваа’’д̇иаад̣̇и аарад̣̇д̇хам̣. д̇ад̇т̇а г̇аяааяам̣ вихарад̇и г̇аяаасийсзд̇и г̇аяаанаамигааяа над̣̇ияаа авид̣̇уурз бхавад̇д̇аа г̇аамо г̇аяаа наама, д̇ассам̣ г̇аяааяам̣ вихарад̇и. самийбад̇т̇з жзд̇ам̣ бхуммаважанам̣. г̇аяааг̇аамасса хи авид̣̇уурз г̇аяаад̇и згаа богкаран̣ийби ад̇т̇и над̣̇ийби г̇аяаасийсанаамаго хад̇т̇игумбхасад̣̇исо бидтибаасаан̣оби. яад̇т̇а бхигкусахассасса огаасо баход̇и, бхаг̇аваа д̇ад̇т̇а вихарад̇и. д̇зна вуд̇д̇ам̣ ‘‘г̇аяаасийсз’’д̇и, г̇аяааг̇аамасса аасаннз г̇аяаасийсанаамагз бидтибаасаан̣з вихарад̇ийд̇и вуд̇д̇ам̣ ход̇и. бхигкуу ааманд̇зсийд̇и д̇зсам̣ саббааяад̇хаммад̣̇зсанам̣ вижинид̇ваа д̇ам̣ д̣̇зсзссаамийд̇и ааманд̇зси. бхаг̇аваа хи д̇ам̣ ид̣̇д̇химаяабад̇д̇ажийварад̇харам̣ саман̣асахассам̣ аад̣̇ааяа г̇аяаасийсам̣ г̇анд̇ваа д̇зна бариваарид̇о нисийд̣̇ид̇ваа ‘‘гад̇араа ну ко зд̇зсам̣ д̇хаммагат̇аа саббааяаа’’д̇и жинд̇знд̇о ‘‘имз сааяам̣ баад̇ам̣ аг̇г̇им̣ барижаранд̇и, имзсам̣ д̣̇ваад̣̇асааяад̇анаани аад̣̇ид̇д̇аани самбаж̇ж̇алид̇аани вияа гад̇ваа д̣̇ассзссаами, звам̣ имз арахад̇д̇ам̣ баабун̣ид̇ум̣ сагкиссанд̇ий’’д̇и саннидтаанамагааси. ат̇а нзсам̣ д̇ат̇аа д̣̇зсзд̇ум̣ ‘‘саб̣б̣ам̣, бхигкавз, аад̣̇ид̇д̇а’’нд̇иаад̣̇инаа имам̣ аад̣̇ид̇д̇абарияааяам̣ абхааси.
54. Idāni tassa bhikkhusahassassa ādittapariyāyadesanāya arahattappattiṃ dassetuṃ ‘‘atha khobhagavā’’tiādi āraddhaṃ. Tattha gayāyaṃ viharati gayāsīseti gayānāmikāya nadiyā avidūre bhavattā gāmo gayā nāma, tassaṃ gayāyaṃ viharati. Samīpatthe cetaṃ bhummavacanaṃ. Gayāgāmassa hi avidūre gayāti ekā pokkharaṇīpi atthi nadīpi gayāsīsanāmako hatthikumbhasadiso piṭṭhipāsāṇopi. Yattha bhikkhusahassassa okāso pahoti, bhagavā tattha viharati. Tena vuttaṃ ‘‘gayāsīse’’ti, gayāgāmassa āsanne gayāsīsanāmake piṭṭhipāsāṇe viharatīti vuttaṃ hoti. Bhikkhū āmantesīti tesaṃ sappāyadhammadesanaṃ vicinitvā taṃ desessāmīti āmantesi. Bhagavā hi taṃ iddhimayapattacīvaradharaṃ samaṇasahassaṃ ādāya gayāsīsaṃ gantvā tena parivārito nisīditvā ‘‘katarā nu kho etesaṃ dhammakathā sappāyā’’ti cintento ‘‘ime sāyaṃ pātaṃ aggiṃ paricaranti, imesaṃ dvādasāyatanāni ādittāni sampajjalitāni viya katvā dassessāmi, evaṃ ime arahattaṃ pāpuṇituṃ sakkhissantī’’ti sanniṭṭhānamakāsi. Atha nesaṃ tathā desetuṃ ‘‘sabbaṃ, bhikkhave, āditta’’ntiādinā imaṃ ādittapariyāyaṃ abhāsi.
д̇ад̇т̇а (сам̣. ни. адта. 3.4.23) саб̣б̣ам̣ наама жад̇уб̣б̣ид̇хам̣ саб̣б̣асаб̣б̣ам̣ ааяад̇анасаб̣б̣ам̣ саггааяасаб̣б̣ам̣ бад̣̇зсасаб̣б̣анд̇и. д̇ад̇т̇а –
Tattha (saṃ. ni. aṭṭha. 3.4.23) sabbaṃ nāma catubbidhaṃ sabbasabbaṃ āyatanasabbaṃ sakkāyasabbaṃ padesasabbanti. Tattha –
‘‘на д̇асса ад̣̇д̣̇идтамид̇хад̇т̇и гин̃жи;
‘‘Na tassa addiṭṭhamidhatthi kiñci;
ат̇о авин̃н̃аад̇амаж̇аанид̇аб̣б̣ам̣;
Atho aviññātamajānitabbaṃ;
саб̣б̣ам̣ абхин̃н̃ааси яад̣̇ад̇т̇и нзяяам̣;
Sabbaṃ abhiññāsi yadatthi neyyaṃ;
д̇ат̇ааг̇ад̇о д̇зна саманд̇ажагкуу’’д̇и (махаани. 156; жуул̣ани. д̇ход̇агамаан̣авабужчаанид̣̇д̣̇зса 32; бади. ма. 1.121) –
Tathāgato tena samantacakkhū’’ti (mahāni. 156; cūḷani. dhotakamāṇavapucchāniddesa 32; paṭi. ma. 1.121) –
ид̣̇ам̣ саб̣б̣асаб̣б̣ам̣ наама. ‘‘саб̣б̣ам̣ во, бхигкавз, д̣̇зсзссаами, д̇ам̣ сун̣аат̇аа’’д̇и (сам̣. ни. 4.23) ид̣̇ам̣ ааяад̇анасаб̣б̣ам̣ наама. ‘‘саб̣б̣ад̇хаммамуулабарияааяам̣ во, бхигкавз, д̣̇зсзссаамий’’д̇и (ма. ни. 1.1) ид̣̇ам̣ саггааяасаб̣б̣ам̣ наама. ‘‘саб̣б̣ад̇хаммзсу ваа батамасаманнаахааро уббаж̇ж̇ад̇и жид̇д̇ам̣ мано маанасам̣ д̇аж̇ж̇аа мановин̃н̃аан̣ад̇хаад̇уу’’д̇и ид̣̇ам̣ бад̣̇зсасаб̣б̣ам̣ наама. ид̇и бан̃жаарамман̣амад̇д̇ам̣ бад̣̇зсасаб̣б̣ам̣, д̇збхуумагаа д̇хаммаа саггааяасаб̣б̣ам̣, жад̇убхуумагаа д̇хаммаа ааяад̇анасаб̣б̣ам̣, яам̣ гин̃жи нзяяам̣ саб̣б̣асаб̣б̣ам̣. бад̣̇зсасаб̣б̣ам̣ саггааяасаб̣б̣ам̣ на баабун̣аад̇и д̇асса д̇збхуумагад̇хаммзсуби згад̣̇зсасса асан̇г̇ан̣ханад̇о. саггааяасаб̣б̣ам̣ ааяад̇анасаб̣б̣ам̣ на баабун̣аад̇и логуд̇д̇арад̇хаммаанам̣ асан̇г̇ан̣ханад̇о. ааяад̇анасаб̣б̣ам̣ саб̣б̣асаб̣б̣ам̣ на баабун̣аад̇и. гасмаа? яасмаа ааяад̇анасаб̣б̣зна жад̇убхуумагад̇хаммаава бариг̇г̇ахид̇аа , на лагкан̣абан̃н̃ад̇д̇ияод̇и. имасмим̣ бана суд̇д̇з ааяад̇анасаб̣б̣ам̣ ад̇хиббзд̇ам̣, д̇ад̇т̇ааби ид̇ха вибассанубаг̇ад̇хаммаава г̇ахзд̇аб̣б̣аа.
Idaṃ sabbasabbaṃ nāma. ‘‘Sabbaṃ vo, bhikkhave, desessāmi, taṃ suṇāthā’’ti (saṃ. ni. 4.23) idaṃ āyatanasabbaṃ nāma. ‘‘Sabbadhammamūlapariyāyaṃ vo, bhikkhave, desessāmī’’ti (ma. ni. 1.1) idaṃ sakkāyasabbaṃ nāma. ‘‘Sabbadhammesu vā paṭhamasamannāhāro uppajjati cittaṃ mano mānasaṃ tajjā manoviññāṇadhātū’’ti idaṃ padesasabbaṃ nāma. Iti pañcārammaṇamattaṃ padesasabbaṃ, tebhūmakā dhammā sakkāyasabbaṃ, catubhūmakā dhammā āyatanasabbaṃ, yaṃ kiñci neyyaṃ sabbasabbaṃ. Padesasabbaṃ sakkāyasabbaṃ na pāpuṇāti tassa tebhūmakadhammesupi ekadesassa asaṅgaṇhanato. Sakkāyasabbaṃ āyatanasabbaṃ na pāpuṇāti lokuttaradhammānaṃ asaṅgaṇhanato. Āyatanasabbaṃ sabbasabbaṃ na pāpuṇāti. Kasmā? Yasmā āyatanasabbena catubhūmakadhammāva pariggahitā , na lakkhaṇapaññattiyoti. Imasmiṃ pana sutte āyatanasabbaṃ adhippetaṃ, tatthāpi idha vipassanupagadhammāva gahetabbā.
жагкууд̇и (д̇ха. са. адта. 596; сам̣. ни. адта. 3.4.1) д̣̇вз жагкууни н̃аан̣ажагку жзва мам̣сажагку жа. д̇ад̇т̇а н̃аан̣ажагку бан̃жавид̇хам̣ б̣уд̣̇д̇хажагку д̇хаммажагку саманд̇ажагку д̣̇иб̣б̣ажагку бан̃н̃аажагкууд̇и. д̇зсу б̣уд̣̇д̇хажагку наама аасаяаанусаяан̃аан̣ан̃жзва инд̣̇рияабаробарияад̇д̇ан̃аан̣ан̃жа, яам̣ ‘‘б̣уд̣̇д̇хажагкунаа логам̣ вологзнд̇о’’д̇и (д̣̇ий. ни. 2.69; ма. ни. 1.283) ааг̇ад̇ам̣. д̇хаммажагку наама хздтимаа д̇аяо маг̇г̇аа д̇ийн̣и жа палаани, яам̣ ‘‘вираж̇ам̣ вийд̇амалам̣ д̇хаммажагкум̣ уд̣̇абаад̣̇ий’’д̇и (д̣̇ий. ни. 1.355; сам̣. ни. 5.1081) ааг̇ад̇ам̣. саманд̇ажагку наама саб̣б̣ан̃н̃уд̇ан̃н̃аан̣ам̣, яам̣ ‘‘баасаад̣̇амааруяха саманд̇ажагкуу’’д̇и (д̣̇ий. ни. 2.70; ма. ни. 1.282) ааг̇ад̇ам̣. д̣̇иб̣б̣ажагку наама аалогавад̣дханзна уббаннан̃аан̣ам̣, яам̣ ‘‘д̣̇иб̣б̣зна жагкунаа висуд̣̇д̇хзнаа’’д̇и (ма. ни. 1.148, 284) ааг̇ад̇ам̣. бан̃н̃аажагку наама жад̇усажжабарижчзд̣̇аган̃аан̣ам̣, яам̣ ‘‘жагкум̣ уд̣̇абаад̣̇ий’’д̇и (сам̣. ни. 5.1081; махаава. 15) ааг̇ад̇ам̣. мам̣сажагкуби д̣̇увид̇хам̣ сасамбхааражагку басаад̣̇ажагкууд̇и. д̇зсу явааяам̣ агкигуубагз агкибадалзхи бариваарид̇о мам̣сабин̣д̣о, яад̇т̇а жад̇ассо д̇хаад̇уяо ван̣н̣аг̇анд̇харасож̇аа самбхаво ж̇ийвид̇ам̣ бхааво жагкуббасаад̣̇о гааяаббасаад̣̇од̇и сан̇кзбад̇о д̇зраса самбхаараа хонд̇и, вид̇т̇аарад̇о бана жад̇ассо д̇хаад̇уяо ван̣н̣аг̇анд̇харасож̇аа самбхавод̇и имз нава жад̇усамудтаанавасзна чад̇д̇им̣са, ж̇ийвид̇ам̣ бхааво жагкуббасаад̣̇о гааяаббасаад̣̇од̇и имз гаммасамудтаанаа д̇аава жад̇д̇аарод̇и жад̇д̇аалийса самбхаараа хонд̇и, ид̣̇ам̣ сасамбхааражагку наама. яам̣ банзд̇т̇а сзд̇аман̣д̣алабарижчиннзна ган̣хаман̣д̣алзна бариваарид̇з д̣̇идтиман̣д̣алз саннивидтам̣ руубад̣̇ассанасамад̇т̇ам̣ басаад̣̇амад̇д̇ам̣, ид̣̇ам̣ басаад̣̇ажагку наама. д̇асса д̇ад̇о барзсан̃жа сод̇аад̣̇ийнам̣ вид̇т̇аарагат̇аа висуд̣̇д̇химаг̇г̇з (висуд̣̇д̇хи. 2.436) вуд̇д̇аава.
Cakkhūti (dha. sa. aṭṭha. 596; saṃ. ni. aṭṭha. 3.4.1) dve cakkhūni ñāṇacakkhu ceva maṃsacakkhu ca. Tattha ñāṇacakkhu pañcavidhaṃ buddhacakkhu dhammacakkhu samantacakkhu dibbacakkhu paññācakkhūti. Tesu buddhacakkhu nāma āsayānusayañāṇañceva indriyaparopariyattañāṇañca, yaṃ ‘‘buddhacakkhunā lokaṃ volokento’’ti (dī. ni. 2.69; ma. ni. 1.283) āgataṃ. Dhammacakkhu nāma heṭṭhimā tayo maggā tīṇi ca phalāni, yaṃ ‘‘virajaṃ vītamalaṃ dhammacakkhuṃ udapādī’’ti (dī. ni. 1.355; saṃ. ni. 5.1081) āgataṃ. Samantacakkhu nāma sabbaññutaññāṇaṃ, yaṃ ‘‘pāsādamāruyha samantacakkhū’’ti (dī. ni. 2.70; ma. ni. 1.282) āgataṃ. Dibbacakkhu nāma ālokavaḍḍhanena uppannañāṇaṃ, yaṃ ‘‘dibbena cakkhunā visuddhenā’’ti (ma. ni. 1.148, 284) āgataṃ. Paññācakkhu nāma catusaccaparicchedakañāṇaṃ, yaṃ ‘‘cakkhuṃ udapādī’’ti (saṃ. ni. 5.1081; mahāva. 15) āgataṃ. Maṃsacakkhupi duvidhaṃ sasambhāracakkhu pasādacakkhūti. Tesu yvāyaṃ akkhikūpake akkhipaṭalehi parivārito maṃsapiṇḍo, yattha catasso dhātuyo vaṇṇagandharasojā sambhavo jīvitaṃ bhāvo cakkhuppasādo kāyappasādoti saṅkhepato terasa sambhārā honti, vitthārato pana catasso dhātuyo vaṇṇagandharasojā sambhavoti ime nava catusamuṭṭhānavasena chattiṃsa, jīvitaṃ bhāvo cakkhuppasādo kāyappasādoti ime kammasamuṭṭhānā tāva cattāroti cattālīsa sambhārā honti, idaṃ sasambhāracakkhu nāma. Yaṃ panettha setamaṇḍalaparicchinnena kaṇhamaṇḍalena parivārite diṭṭhimaṇḍale sanniviṭṭhaṃ rūpadassanasamatthaṃ pasādamattaṃ, idaṃ pasādacakkhu nāma. Tassa tato paresañca sotādīnaṃ vitthārakathā visuddhimagge (visuddhi. 2.436) vuttāva.
д̇ад̇т̇а яад̣̇ид̣̇ам̣ басаад̣̇ажагку, д̇ан̃жа г̇ахзд̇ваа бхаг̇аваа ‘‘жагку аад̣̇ид̇д̇а’’нд̇иаад̣̇имааха. д̇ад̇т̇а аад̣̇ид̇д̇анд̇и бад̣̇ид̇д̇ам̣, самбаж̇ж̇алид̇ам̣ згаад̣̇асахи аг̇г̇ийхи згаж̇аалийбхууд̇анд̇и ад̇т̇о. жагкусанниссид̇ам̣ вин̃н̃аан̣ам̣ жагкувин̃н̃аан̣ам̣, жагкусса ваа гааран̣абхууд̇асса вин̃н̃аан̣ам̣ жагкувин̃н̃аан̣ам̣. гаамам̣ руубаалогаманасигаараад̣̇аяоби д̇асса вин̃н̃аан̣асса гааран̣ам̣, д̇з бана саад̇хааран̣агааран̣ам̣, жагку асаад̇хааран̣анд̇и асаад̇хааран̣агааран̣знааяам̣ нид̣̇д̣̇зсо яат̇аа ‘‘яаван̇гуро’’д̇и. сод̇авин̃н̃аан̣аад̣̇ийсуби зсзва наяо. жагкусанниссид̇о пассо жагкусампассо, жагкувин̃н̃аан̣асамбаяуд̇д̇апассассзд̇ам̣ ад̇хиважанам̣. сод̇асампассаад̣̇ийсуби зсзва наяо. жагкусампассабажжаяаа уббаж̇ж̇ад̇и взд̣̇аяид̇анд̇и жагкусампассам̣ муулабажжаяам̣ гад̇ваа уббаннаа самбадижчанасанд̇ийран̣аводтаб̣б̣анаж̇аванавзд̣̇анаа. жагкувин̃н̃аан̣асамбаяуд̇д̇ааяа бана взд̣̇анааяа жагкусампассасса бажжаяабхаавз вад̇д̇аб̣б̣амзва над̇т̇и. жагкусампассо хи сахаж̇аад̇ааяа взд̣̇анааяа сахаж̇аад̇аад̣̇ивасзна, асахаж̇аад̇ааяа убаниссаяаад̣̇ивасзна бажжаяо ход̇и. д̇знзва ‘‘жагкусампассабажжаяаа уббаж̇ж̇ад̇и взд̣̇аяид̇ам̣ сукам̣ ваа д̣̇угкам̣ ваа ад̣̇угкамасукам̣ ваа’’д̇и вуд̇д̇ам̣. сод̇ад̣̇вааравзд̣̇анаад̣̇ийсуби зсзва наяо. зд̇т̇а бана манод̇и бхаван̇г̇ажид̇д̇ам̣ манод̣̇ваарасса ад̇хиббзд̇ад̇д̇аа. д̇хаммаад̇и д̇хаммаарамман̣ам̣. мановин̃н̃аан̣анд̇и сахааваж̇ж̇анагам̣ ж̇аванам̣. маносампассод̇и бхаван̇г̇асахаж̇аад̇о пассо. взд̣̇аяид̇анд̇и ааваж̇ж̇анавзд̣̇анааяа сад̣̇д̇хим̣ ж̇аванавзд̣̇анаа. бхаван̇г̇асамбаяуд̇д̇ааяа бана взд̣̇анааяа г̇ахан̣з вад̇д̇аб̣б̣амзва над̇т̇и. ааваж̇ж̇анам̣ ваа бхаван̇г̇ад̇о аможзд̇ваа манод̇и сааваж̇ж̇анам̣ бхаван̇г̇ам̣ д̣̇адтаб̣б̣ам̣. д̇хаммаад̇и д̇хаммаарамман̣амзва. мановин̃н̃аан̣анд̇и ж̇аванавин̃н̃аан̣ам̣. маносампассод̇и бхаван̇г̇ааваж̇ж̇анасахаж̇аад̇о пассо. взд̣̇аяид̇анд̇и ж̇аванасахаж̇аад̇аа взд̣̇анаа, бхаван̇г̇ааваж̇ж̇анасахаж̇аад̇ааби ваддад̇иязва.
Tattha yadidaṃ pasādacakkhu, tañca gahetvā bhagavā ‘‘cakkhu āditta’’ntiādimāha. Tattha ādittanti padittaṃ, sampajjalitaṃ ekādasahi aggīhi ekajālībhūtanti attho. Cakkhusannissitaṃ viññāṇaṃ cakkhuviññāṇaṃ, cakkhussa vā kāraṇabhūtassa viññāṇaṃ cakkhuviññāṇaṃ. Kāmaṃ rūpālokamanasikārādayopi tassa viññāṇassa kāraṇaṃ, te pana sādhāraṇakāraṇaṃ, cakkhu asādhāraṇanti asādhāraṇakāraṇenāyaṃ niddeso yathā ‘‘yavaṅkuro’’ti. Sotaviññāṇādīsupi eseva nayo. Cakkhusannissito phasso cakkhusamphasso, cakkhuviññāṇasampayuttaphassassetaṃ adhivacanaṃ. Sotasamphassādīsupi eseva nayo. Cakkhusamphassapaccayā uppajjativedayitanti cakkhusamphassaṃ mūlapaccayaṃ katvā uppannā sampaṭicchanasantīraṇavoṭṭhabbanajavanavedanā. Cakkhuviññāṇasampayuttāya pana vedanāya cakkhusamphassassa paccayabhāve vattabbameva natthi. Cakkhusamphasso hi sahajātāya vedanāya sahajātādivasena, asahajātāya upanissayādivasena paccayo hoti. Teneva ‘‘cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā’’ti vuttaṃ. Sotadvāravedanādīsupi eseva nayo. Ettha pana manoti bhavaṅgacittaṃ manodvārassa adhippetattā. Dhammāti dhammārammaṇaṃ. Manoviññāṇanti sahāvajjanakaṃ javanaṃ. Manosamphassoti bhavaṅgasahajāto phasso. Vedayitanti āvajjanavedanāya saddhiṃ javanavedanā. Bhavaṅgasampayuttāya pana vedanāya gahaṇe vattabbameva natthi. Āvajjanaṃ vā bhavaṅgato amocetvā manoti sāvajjanaṃ bhavaṅgaṃ daṭṭhabbaṃ. Dhammāti dhammārammaṇameva. Manoviññāṇanti javanaviññāṇaṃ. Manosamphassoti bhavaṅgāvajjanasahajāto phasso. Vedayitanti javanasahajātā vedanā, bhavaṅgāvajjanasahajātāpi vaṭṭatiyeva.
рааг̇аг̇г̇инаад̇иаад̣̇ийсу рааг̇ова ануд̣̇аханадтзна аг̇г̇ийд̇и рааг̇аг̇г̇и. рааг̇о хи д̇икин̣ам̣ худ̇ваа уббаж̇ж̇амаано сад̇д̇з ануд̣̇ахад̇и жхаабзд̇и, д̇асмаа ‘‘аг̇г̇ий’’д̇и вужжад̇и. ид̇арзсуби д̣̇вийсу зсзва наяо. д̇ад̇римаани вад̇т̇ууни (д̣̇ий. ни. адта. 3.305; вибха. адта. 924) – згаа д̣̇ахарабхигкуний жид̇д̇алабаб̣б̣ад̇авихаарз убосат̇ааг̇аарам̣ г̇анд̇ваа д̣̇ваарабааларуубам̣ ологаяамаанаа тид̇аа. ат̇ассаа анд̇о рааг̇о д̇икин̣ад̇аро худ̇ваа уббанно, д̇асмаа д̇ам̣самудтаанаа д̇зж̇од̇хаад̇у ад̇ивияа д̇икин̣абхаавзна сад̣̇д̇хим̣ ад̇д̇анаа сахаж̇аад̇ад̇хаммзхи хад̣̇аяабад̣̇зсам̣ жхаабзси яат̇аа д̇ам̣ б̣аахираа д̇зж̇од̇хаад̇у санниссаяам̣, д̇зна саа бхигкуний жхааяид̇ваа гааламагааси. бхигкунияо г̇ажчамаанаа ‘‘аяам̣ д̣̇ахараа тид̇аа, баггосат̇а на’’нд̇и аахам̣су. згаа г̇анд̇ваа ‘‘гасмаа тид̇аасий’’д̇и хад̇т̇з г̇ан̣хи. г̇ахид̇амад̇д̇аа баривад̇д̇ид̇ваа бабад̇аа. ид̣̇ам̣ д̇аава рааг̇асса ануд̣̇аханад̇ааяа вад̇т̇у.
Rāgagginātiādīsu rāgova anudahanaṭṭhena aggīti rāgaggi. Rāgo hi tikhiṇaṃ hutvā uppajjamāno satte anudahati jhāpeti, tasmā ‘‘aggī’’ti vuccati. Itaresupi dvīsu eseva nayo. Tatrimāni vatthūni (dī. ni. aṭṭha. 3.305; vibha. aṭṭha. 924) – ekā daharabhikkhunī cittalapabbatavihāre uposathāgāraṃ gantvā dvārapālarūpaṃ olokayamānā ṭhitā. Athassā anto rāgo tikhiṇataro hutvā uppanno, tasmā taṃsamuṭṭhānā tejodhātu ativiya tikhiṇabhāvena saddhiṃ attanā sahajātadhammehi hadayapadesaṃ jhāpesi yathā taṃ bāhirā tejodhātu sannissayaṃ, tena sā bhikkhunī jhāyitvā kālamakāsi. Bhikkhuniyo gacchamānā ‘‘ayaṃ daharā ṭhitā, pakkosatha na’’nti āhaṃsu. Ekā gantvā ‘‘kasmā ṭhitāsī’’ti hatthe gaṇhi. Gahitamattā parivattitvā papatā. Idaṃ tāva rāgassa anudahanatāya vatthu.
д̣̇осасса бана ануд̣̇аханад̇ааяа манобад̣̇осигаа д̣̇зваа д̣̇адтаб̣б̣аа. д̇зсу (д̣̇ий. ни. адта. 1.47-48) гира зго д̣̇звабуд̇д̇о ‘‘нагкад̇д̇ам̣ гийл̣иссаамий’’д̇и сабаривааро рат̇зна вийт̇им̣ бадибаж̇ж̇ад̇и. ат̇ан̃н̃о нигкаманд̇о д̇ам̣ бурад̇о г̇ажчанд̇ам̣ д̣̇исваа ‘‘бхо аяам̣ габан̣о ад̣̇идтабуб̣б̣ам̣ вияа зд̇ам̣ д̣̇исваа бийд̇ияаа уд̣̇д̇хумаад̇о вияа бхиж̇ж̇амаано вияа жа г̇ажчад̇ий’’д̇и гуж̇жхад̇и. бурад̇о г̇ажчанд̇оби нивад̇д̇ид̇ваа д̇ам̣ гуд̣̇д̇хам̣ д̣̇исваа гуд̣̇д̇хаа наама сувиж̇аанаа хонд̇ийд̇и гуд̣̇д̇хабхаавамасса н̃ад̇ваа ‘‘д̇вам̣ гуд̣̇д̇хо маяхам̣ гим̣ гариссаси, аяам̣ самбад̇д̇и маяаа д̣̇аанасийлаад̣̇ийнам̣ васзна лад̣̇д̇хаа, на д̇уяхам̣ васзнаа’’д̇и бадигуж̇жхад̇и. згасмин̃хи гуд̣̇д̇хз ид̇аро агуд̣̇д̇хо рагкад̇и. гуд̣̇д̇хасса хи со год̇хо ид̇арасмим̣ агуж̇жханд̇з анубаад̣̇аано згаваарамзва уббад̇д̇ияаа анаасзвано жаавзд̇ум̣ на саггод̇и, уд̣̇агам̣ бад̇ваа аг̇г̇и вияа ниб̣б̣ааяад̇и, д̇асмаа агуд̣̇д̇хо д̇ам̣ жаванад̇о рагкад̇и. убхосу бана гуд̣̇д̇хзсу згасса год̇хо ид̇арасса бажжаяо ход̇и, д̇ассаби год̇хо ид̇арасса бажжаяо ход̇ийд̇и убхо ганд̣̇анд̇аанам̣язва ород̇хаанам̣ жаванд̇и. убхосу хи гуд̣̇д̇хзсу бхияяо бхияяо ан̃н̃аман̃н̃амхи баривад̣дханавасзна д̇икин̣асамуд̣̇аажааро ниссаяад̣̇аханарасо год̇хо уббаж̇ж̇амаано хад̣̇аяавад̇т̇ум̣ нид̣̇д̣̇аханд̇о ажжанд̇асукумаалам̣ гараж̇агааяам̣ винаасзд̇и, д̇ад̇о сагалоби ад̇д̇абхааво анд̇арад̇хааяад̇и. ид̣̇ам̣ д̣̇осасса ануд̣̇аханад̇ааяа вад̇т̇у.
Dosassa pana anudahanatāya manopadosikā devā daṭṭhabbā. Tesu (dī. ni. aṭṭha. 1.47-48) kira eko devaputto ‘‘nakkhattaṃ kīḷissāmī’’ti saparivāro rathena vīthiṃ paṭipajjati. Athañño nikkhamanto taṃ purato gacchantaṃ disvā ‘‘bho ayaṃ kapaṇo adiṭṭhapubbaṃ viya etaṃ disvā pītiyā uddhumāto viya bhijjamāno viya ca gacchatī’’ti kujjhati. Purato gacchantopi nivattitvā taṃ kuddhaṃ disvā kuddhā nāma suvijānā hontīti kuddhabhāvamassa ñatvā ‘‘tvaṃ kuddho mayhaṃ kiṃ karissasi, ayaṃ sampatti mayā dānasīlādīnaṃ vasena laddhā, na tuyhaṃ vasenā’’ti paṭikujjhati. Ekasmiñhi kuddhe itaro akuddho rakkhati. Kuddhassa hi so kodho itarasmiṃ akujjhante anupādāno ekavārameva uppattiyā anāsevano cāvetuṃ na sakkoti, udakaṃ patvā aggi viya nibbāyati, tasmā akuddho taṃ cavanato rakkhati. Ubhosu pana kuddhesu ekassa kodho itarassa paccayo hoti, tassapi kodho itarassa paccayo hotīti ubho kandantānaṃyeva orodhānaṃ cavanti. Ubhosu hi kuddhesu bhiyyo bhiyyo aññamaññamhi parivaḍḍhanavasena tikhiṇasamudācāro nissayadahanaraso kodho uppajjamāno hadayavatthuṃ niddahanto accantasukhumālaṃ karajakāyaṃ vināseti, tato sakalopi attabhāvo antaradhāyati. Idaṃ dosassa anudahanatāya vatthu.
мохасса бана ануд̣̇аханад̇ааяа кид̣д̣аабад̣̇осигаа д̣̇зваа д̣̇адтаб̣б̣аа. мохавасзна хи д̇зсам̣ сад̇исаммосо ход̇и, д̇асмаа кид̣д̣аавасзна аахаарагаалам̣ ад̇ивад̇д̇зд̇ваа гаалам̣ гаронд̇и. д̇з (д̣̇ий. ни. адта. 1.45-46) гира бун̃н̃ависзсаад̇хиг̇ад̇зна маханд̇зна ад̇д̇ано сиривибхавзна нагкад̇д̇ам̣ гийл̣анд̇аа д̇ааяа самбад̇д̇имаханд̇ад̇ааяа ‘‘аахаарам̣ барибхун̃ж̇имха, на барибхун̃ж̇имхаа’’д̇иби на ж̇аананд̇и. ат̇а згаахаараад̇иггаманад̇о бадтааяа ниранд̇арам̣ каад̣̇анд̇ааби биванд̇ааби жаванд̇иязва на д̇идтанд̇и. гасмаа? гаммаж̇ад̇зж̇асса б̣алавад̇ааяа. мануссаанан̃хи гаммаж̇ад̇зж̇о манд̣̇о, гараж̇агааяо б̣алаваа. д̇зсам̣ д̇зж̇асса манд̣̇ад̇ааяа гараж̇агааяасса б̣алавад̇ааяа сад̇д̇аахамби ад̇иггамид̇ваа ун̣ход̣̇агаажчаяааг̇уаад̣̇ийхи саггаа вад̇т̇ум̣ убад̇т̇амбхзд̇ум̣. д̣̇зваанам̣ бана д̇зж̇о б̣алаваа ход̇и ул̣аарабун̃н̃аниб̣б̣ад̇д̇ад̇д̇аа ул̣аараг̇арусинид̣̇д̇хасуд̇хаахаараж̇иран̣ад̇о жа, гараж̇ам̣ манд̣̇ам̣ муд̣̇усукумаалабхаавад̇о. д̇знзва хи бхаг̇аваа инд̣̇асаалаг̇ухааяам̣ багад̇ибат̇авияам̣ бад̇идтаад̇ум̣ асаггонд̇ам̣ саггам̣ д̣̇зварааж̇аанам̣ ‘‘ол̣ааригагааяам̣ ад̇хидтаахий’’д̇и ааха, д̇асмаа д̇з згам̣ аахааравзлам̣ ад̇иггамид̇ваа сан̣таад̇ум̣ на саггонд̇и. яат̇аа наама г̇имхаанам̣ маж̇жханхигз д̇ад̇д̇абаасаан̣з табид̇ам̣ бад̣̇умам̣ ваа уббалам̣ ваа сааяанхасамаяз гхадасад̇знаби син̃жияамаанам̣ баагад̇игам̣ на ход̇и винассад̇иязва, звамзва бажчаа ниранд̇арам̣ каад̣̇анд̇ааби биванд̇ааби жаванд̇иязва на д̇идтанд̇и.
Mohassa pana anudahanatāya khiḍḍāpadosikā devā daṭṭhabbā. Mohavasena hi tesaṃ satisammoso hoti, tasmā khiḍḍāvasena āhārakālaṃ ativattetvā kālaṃ karonti. Te (dī. ni. aṭṭha. 1.45-46) kira puññavisesādhigatena mahantena attano sirivibhavena nakkhattaṃ kīḷantā tāya sampattimahantatāya ‘‘āhāraṃ paribhuñjimha, na paribhuñjimhā’’tipi na jānanti. Atha ekāhārātikkamanato paṭṭhāya nirantaraṃ khādantāpi pivantāpi cavantiyeva na tiṭṭhanti. Kasmā? Kammajatejassa balavatāya. Manussānañhi kammajatejo mando, karajakāyo balavā. Tesaṃ tejassa mandatāya karajakāyassa balavatāya sattāhampi atikkamitvā uṇhodakaacchayāguādīhi sakkā vatthuṃ upatthambhetuṃ. Devānaṃ pana tejo balavā hoti uḷārapuññanibbattattā uḷāragarusiniddhasudhāhārajiraṇato ca, karajaṃ mandaṃ mudusukhumālabhāvato. Teneva hi bhagavā indasālaguhāyaṃ pakatipathaviyaṃ patiṭṭhātuṃ asakkontaṃ sakkaṃ devarājānaṃ ‘‘oḷārikakāyaṃ adhiṭṭhāhī’’ti āha, tasmā te ekaṃ āhāravelaṃ atikkamitvā saṇṭhātuṃ na sakkonti. Yathā nāma gimhānaṃ majjhanhike tattapāsāṇe ṭhapitaṃ padumaṃ vā uppalaṃ vā sāyanhasamaye ghaṭasatenapi siñciyamānaṃ pākatikaṃ na hoti vinassatiyeva, evameva pacchā nirantaraṃ khādantāpi pivantāpi cavantiyeva na tiṭṭhanti.
го бана д̇зсам̣ аахааро, гаа аахааравзлаад̇и? саб̣б̣зсамби гаамааважарад̣̇зваанам̣ суд̇хаа аахааро, со хздтимзхи хздтимзхи убаримаанам̣ убаримаанам̣ бан̣ийд̇ад̇амо ход̇и. д̇ам̣ яат̇аасагам̣ д̣̇ивасавасзна д̣̇ивасз д̣̇ивасз бхун̃ж̇анд̇и. гзжи бана ‘‘б̣ил̣аарабад̣̇аббамаан̣ам̣ суд̇хаахаарам̣ бхун̃ж̇анд̇и. со ж̇ивхааяа табид̇амад̇д̇о яаава гзсаг̇г̇анакаг̇г̇аа гааяам̣ парад̇и, д̇зсам̣язва д̣̇ивасавасзна сад̇д̇ад̣̇ивасам̣ яаабанасамад̇т̇ова ход̇ий’’д̇и вад̣̇анд̇и.
Ko pana tesaṃ āhāro, kā āhāravelāti? Sabbesampi kāmāvacaradevānaṃ sudhā āhāro, so heṭṭhimehi heṭṭhimehi uparimānaṃ uparimānaṃ paṇītatamo hoti. Taṃ yathāsakaṃ divasavasena divase divase bhuñjanti. Keci pana ‘‘biḷārapadappamāṇaṃ sudhāhāraṃ bhuñjanti. So jivhāya ṭhapitamatto yāva kesagganakhaggā kāyaṃ pharati, tesaṃyeva divasavasena sattadivasaṃ yāpanasamatthova hotī’’ti vadanti.
гз бана д̇з кид̣д̣аабад̣̇осигаа наама д̣̇зваад̇и? имз наамаад̇и адтагат̇ааяам̣ вижааран̣аа над̇т̇и, ‘‘гаммаж̇ад̇зж̇о б̣алаваа ход̇и, гараж̇ам̣ манд̣̇а’’нд̇и ависзсзна вуд̇д̇ад̇д̇аа бана яз гзжи габ̣ал̣ийгаараахааруубаж̇ийвино звам̣ гаронд̇и, д̇з звам̣ жаванд̇ийд̇и взд̣̇ид̇аб̣б̣аа. гзжи банааху ‘‘ниммаанарад̇ибараниммид̇авасавад̇д̇ино д̇з д̣̇зваа. кид̣д̣ааяа бад̣̇уссанамад̇д̇знзва хзд̇з кид̣д̣аабад̣̇осигаад̇и вуд̇д̇аа’’д̇и. манобад̣̇осигаа бана жаад̇умахаарааж̇игаад̇и адтагат̇ааяамзва вуд̇д̇ам̣. гзжи бана ‘‘кид̣д̣аабад̣̇осигааби жаад̇умахаарааж̇игааязваа’’д̇и вад̣̇анд̇и. звам̣ д̇аава рааг̇аад̣̇аяо д̇аяо ануд̣̇аханадтзна ‘‘аг̇г̇ий’’д̇и взд̣̇ид̇аб̣б̣аа. ж̇аад̇иаад̣̇ид̇д̇аяам̣ бана наанаббагаарад̣̇угкавад̇т̇убхаавзна ануд̣̇аханад̇о аг̇г̇и. согаад̣̇ийнам̣ ануд̣̇аханад̇аа баагадааязва. сзсамзд̇т̇а вуд̇д̇анаяамзва. ид̇и имасмим̣ суд̇д̇з д̣̇угкалагкан̣ам̣ гат̇ид̇ам̣ жагкаад̣̇ийнам̣ згаад̣̇асахи аг̇г̇ийхи аад̣̇ид̇д̇абхаавзна д̣̇угкамад̇ааяа д̣̇угкабхаавасса гат̇ид̇ад̇д̇аа.
Ke pana te khiḍḍāpadosikā nāma devāti? Ime nāmāti aṭṭhakathāyaṃ vicāraṇā natthi, ‘‘kammajatejo balavā hoti, karajaṃ manda’’nti avisesena vuttattā pana ye keci kabaḷīkārāhārūpajīvino evaṃ karonti, te evaṃ cavantīti veditabbā. Keci panāhu ‘‘nimmānaratiparanimmitavasavattino te devā. Khiḍḍāya padussanamatteneva hete khiḍḍāpadosikāti vuttā’’ti. Manopadosikā pana cātumahārājikāti aṭṭhakathāyameva vuttaṃ. Keci pana ‘‘khiḍḍāpadosikāpi cātumahārājikāyevā’’ti vadanti. Evaṃ tāva rāgādayo tayo anudahanaṭṭhena ‘‘aggī’’ti veditabbā. Jātiādittayaṃ pana nānappakāradukkhavatthubhāvena anudahanato aggi. Sokādīnaṃ anudahanatā pākaṭāyeva. Sesamettha vuttanayameva. Iti imasmiṃ sutte dukkhalakkhaṇaṃ kathitaṃ cakkhādīnaṃ ekādasahi aggīhi ādittabhāvena dukkhamatāya dukkhabhāvassa kathitattā.
аад̣̇ид̇д̇абарияааяасуд̇д̇аван̣н̣анаа нидтид̇аа.
Ādittapariyāyasuttavaṇṇanā niṭṭhitā.
урувзлабаадихаарияагат̇ааван̣н̣анаа нидтид̇аа.
Uruvelapāṭihāriyakathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 12. урувзлабаадихаарияагат̇аа • 12. Uruvelapāṭihāriyakathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / урувзлабаадихаарияагат̇ааван̣н̣анаа • Uruvelapāṭihāriyakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / урувзлабаадихаарияагат̇ааван̣н̣анаа • Uruvelapāṭihāriyakathāvaṇṇanā
