| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
८. आदित्तपरियायसुत्तवण्णना
8. Ādittapariyāyasuttavaṇṇanā
२३५. किलेसानं अनु अनु ब्यञ्जनतो परिब्यत्तिया उप्पत्तिपच्चयभावतो अनुब्यञ्जनं, हत्थपादादिअवयवाति आह – ‘‘हत्था सोभना’’तिआदि। निमित्तग्गाहोति किलेसुप्पत्तिया निमित्तभूतो गाहो। संसन्देत्वा गहणन्ति अवयवे समोधानेत्वा ‘‘इत्थिपुरिसो’’तिआदिना एकज्झं गहणं। विभत्तिगहणन्ति विभागेन अनवसेसग्गहणं। कुम्भीलसदिसोति कुम्भीलगाहसदिसो। तेनाह – ‘‘सब्बमेव गण्हाती’’ति हत्थपादादीसु तं तं कोट्ठासं विभजित्वा गहणं रत्तपासदिसो जलूकगाहसदिसो। एकजवनवारेपि लब्भन्तीति इदं चक्खुद्वारानुसारेन उप्पन्नमनोद्वारिकजवनं सन्धाय वुत्तं।
235. Kilesānaṃ anu anu byañjanato paribyattiyā uppattipaccayabhāvato anubyañjanaṃ, hatthapādādiavayavāti āha – ‘‘hatthā sobhanā’’tiādi. Nimittaggāhoti kilesuppattiyā nimittabhūto gāho. Saṃsandetvā gahaṇanti avayave samodhānetvā ‘‘itthipuriso’’tiādinā ekajjhaṃ gahaṇaṃ. Vibhattigahaṇanti vibhāgena anavasesaggahaṇaṃ. Kumbhīlasadisoti kumbhīlagāhasadiso. Tenāha – ‘‘sabbameva gaṇhātī’’ti hatthapādādīsu taṃ taṃ koṭṭhāsaṃ vibhajitvā gahaṇaṃ rattapāsadiso jalūkagāhasadiso. Ekajavanavārepi labbhantīti idaṃ cakkhudvārānusārena uppannamanodvārikajavanaṃ sandhāya vuttaṃ.
निमित्तस्सादेन गन्थितन्ति यथावुत्ते निमित्ते अस्सादगाहेन गन्थितं सम्बद्धं। भवङ्गेनेवाति मूलभवङ्गेनेव। किलेसभयं दस्सेन्तोति तथा किलेसुप्पत्तिया सति अकुसलचित्तेन अन्तरितं चे मरणचित्तं भवेय्य, एकन्ततो निरये वा तिरच्छानयोनिया वा उप्पत्ति सियाति किलेसानं भायितब्बं दस्सेन्तो। ‘‘समयवसेन वा एवं वुत्त’’न्ति वत्वा तमत्थं विवरन्तो ‘‘चक्खुद्वारस्मिञ्ही’’तिआदिमाह। रत्तचित्तं वाति रागवसेन रत्तचित्तं वा। दुट्ठचित्तेन कथं आरम्मणरसानुभवनन्ति? दोमनस्सवेदनुप्पत्ति एव तस्स आरम्मणरसानुभवनं दट्ठब्बं। इमस्स समयस्साति मरणसमयस्स।
Nimittassādena ganthitanti yathāvutte nimitte assādagāhena ganthitaṃ sambaddhaṃ. Bhavaṅgenevāti mūlabhavaṅgeneva. Kilesabhayaṃ dassentoti tathā kilesuppattiyā sati akusalacittena antaritaṃ ce maraṇacittaṃ bhaveyya, ekantato niraye vā tiracchānayoniyā vā uppatti siyāti kilesānaṃ bhāyitabbaṃ dassento. ‘‘Samayavasena vā evaṃ vutta’’nti vatvā tamatthaṃ vivaranto ‘‘cakkhudvārasmiñhī’’tiādimāha. Rattacittaṃ vāti rāgavasena rattacittaṃ vā. Duṭṭhacittena kathaṃ ārammaṇarasānubhavananti? Domanassavedanuppatti eva tassa ārammaṇarasānubhavanaṃ daṭṭhabbaṃ. Imassa samayassāti maraṇasamayassa.
उभिन्नं नासच्छिद्दानं मज्झे ठित-अट्ठितुदनं सह खुरट्ठेन छिन्दनं। दण्डकवासीति दीघदण्डका महावासि। निपज्जित्वा निद्दोक्कमनन्ति इमिना पचलायिकनिद्दं पटिक्खिपति। तत्थ हि कदाचि अन्तरा मिच्छावितक्कानं सल्लकानं अवसरो सिया, नत्थेव निपज्जित्वा महानिद्दं ओक्कन्तकाले। वितक्कानन्ति मिच्छावितक्कानं।
Ubhinnaṃ nāsacchiddānaṃ majjhe ṭhita-aṭṭhitudanaṃ saha khuraṭṭhena chindanaṃ. Daṇḍakavāsīti dīghadaṇḍakā mahāvāsi. Nipajjitvā niddokkamananti iminā pacalāyikaniddaṃ paṭikkhipati. Tattha hi kadāci antarā micchāvitakkānaṃ sallakānaṃ avasaro siyā, nattheva nipajjitvā mahāniddaṃ okkantakāle. Vitakkānanti micchāvitakkānaṃ.
आदित्तपरियायसुत्तवण्णना निट्ठिता।
Ādittapariyāyasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ८. आदित्तपरियायसुत्तं • 8. Ādittapariyāyasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ८. आदित्तपरियायसुत्तवण्णना • 8. Ādittapariyāyasuttavaṇṇanā
