| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၈. အာဒိတ္တပရိယာယသုတ္တဝဏ္ဏနာ
8. Ādittapariyāyasuttavaṇṇanā
၂၃၅. ကိလေသာနံ အနု အနု ဗ္ယဉ္ဇနတော ပရိဗ္ယတ္တိယာ ဥပ္ပတ္တိပစ္စယဘာဝတော အနုဗ္ယဉ္ဇနံ, ဟတ္ထပာဒာဒိအဝယဝာတိ အာဟ – ‘‘ဟတ္ထာ သောဘနာ’’တိအာဒိ။ နိမိတ္တဂ္ဂာဟောတိ ကိလေသုပ္ပတ္တိယာ နိမိတ္တဘူတော ဂာဟော။ သံသန္ဒေတ္ဝာ ဂဟဏန္တိ အဝယဝေ သမောဓာနေတ္ဝာ ‘‘ဣတ္ထိပုရိသော’’တိအာဒိနာ ဧကဇ္ဈံ ဂဟဏံ။ ဝိဘတ္တိဂဟဏန္တိ ဝိဘာဂေန အနဝသေသဂ္ဂဟဏံ။ ကုမ္ဘီလသဒိသောတိ ကုမ္ဘီလဂာဟသဒိသော။ တေနာဟ – ‘‘သဗ္ဗမေဝ ဂဏ္ဟာတီ’’တိ ဟတ္ထပာဒာဒီသု တံ တံ ကောဋ္ဌာသံ ဝိဘဇိတ္ဝာ ဂဟဏံ ရတ္တပာသဒိသော ဇလူကဂာဟသဒိသော။ ဧကဇဝနဝာရေပိ လဗ္ဘန္တီတိ ဣဒံ စက္ခုဒ္ဝာရာနုသာရေန ဥပ္ပန္နမနောဒ္ဝာရိကဇဝနံ သန္ဓာယ ဝုတ္တံ။
235. Kilesānaṃ anu anu byañjanato paribyattiyā uppattipaccayabhāvato anubyañjanaṃ, hatthapādādiavayavāti āha – ‘‘hatthā sobhanā’’tiādi. Nimittaggāhoti kilesuppattiyā nimittabhūto gāho. Saṃsandetvā gahaṇanti avayave samodhānetvā ‘‘itthipuriso’’tiādinā ekajjhaṃ gahaṇaṃ. Vibhattigahaṇanti vibhāgena anavasesaggahaṇaṃ. Kumbhīlasadisoti kumbhīlagāhasadiso. Tenāha – ‘‘sabbameva gaṇhātī’’ti hatthapādādīsu taṃ taṃ koṭṭhāsaṃ vibhajitvā gahaṇaṃ rattapāsadiso jalūkagāhasadiso. Ekajavanavārepi labbhantīti idaṃ cakkhudvārānusārena uppannamanodvārikajavanaṃ sandhāya vuttaṃ.
နိမိတ္တသ္သာဒေန ဂန္ထိတန္တိ ယထာဝုတ္တေ နိမိတ္တေ အသ္သာဒဂာဟေန ဂန္ထိတံ သမ္ဗဒ္ဓံ။ ဘဝင္ဂေနေဝာတိ မူလဘဝင္ဂေနေဝ။ ကိလေသဘယံ ဒသ္သေန္တောတိ တထာ ကိလေသုပ္ပတ္တိယာ သတိ အကုသလစိတ္တေန အန္တရိတံ စေ မရဏစိတ္တံ ဘဝေယ္ယ, ဧကန္တတော နိရယေ ဝာ တိရစ္ဆာနယောနိယာ ဝာ ဥပ္ပတ္တိ သိယာတိ ကိလေသာနံ ဘာယိတဗ္ဗံ ဒသ္သေန္တော။ ‘‘သမယဝသေန ဝာ ဧဝံ ဝုတ္တ’’န္တိ ဝတ္ဝာ တမတ္ထံ ဝိဝရန္တော ‘‘စက္ခုဒ္ဝာရသ္မိဉ္ဟီ’’တိအာဒိမာဟ။ ရတ္တစိတ္တံ ဝာတိ ရာဂဝသေန ရတ္တစိတ္တံ ဝာ။ ဒုဋ္ဌစိတ္တေန ကထံ အာရမ္မဏရသာနုဘဝနန္တိ? ဒောမနသ္သဝေဒနုပ္ပတ္တိ ဧဝ တသ္သ အာရမ္မဏရသာနုဘဝနံ ဒဋ္ဌဗ္ဗံ။ ဣမသ္သ သမယသ္သာတိ မရဏသမယသ္သ။
Nimittassādena ganthitanti yathāvutte nimitte assādagāhena ganthitaṃ sambaddhaṃ. Bhavaṅgenevāti mūlabhavaṅgeneva. Kilesabhayaṃ dassentoti tathā kilesuppattiyā sati akusalacittena antaritaṃ ce maraṇacittaṃ bhaveyya, ekantato niraye vā tiracchānayoniyā vā uppatti siyāti kilesānaṃ bhāyitabbaṃ dassento. ‘‘Samayavasena vā evaṃ vutta’’nti vatvā tamatthaṃ vivaranto ‘‘cakkhudvārasmiñhī’’tiādimāha. Rattacittaṃ vāti rāgavasena rattacittaṃ vā. Duṭṭhacittena kathaṃ ārammaṇarasānubhavananti? Domanassavedanuppatti eva tassa ārammaṇarasānubhavanaṃ daṭṭhabbaṃ. Imassa samayassāti maraṇasamayassa.
ဥဘိန္နံ နာသစ္ဆိဒ္ဒာနံ မဇ္ဈေ ဌိတ-အဋ္ဌိတုဒနံ သဟ ခုရဋ္ဌေန ဆိန္ဒနံ။ ဒဏ္ဍကဝာသီတိ ဒီဃဒဏ္ဍကာ မဟာဝာသိ။ နိပဇ္ဇိတ္ဝာ နိဒ္ဒောက္ကမနန္တိ ဣမိနာ ပစလာယိကနိဒ္ဒံ ပဋိက္ခိပတိ။ တတ္ထ ဟိ ကဒာစိ အန္တရာ မိစ္ဆာဝိတက္ကာနံ သလ္လကာနံ အဝသရော သိယာ, နတ္ထေဝ နိပဇ္ဇိတ္ဝာ မဟာနိဒ္ဒံ ဩက္ကန္တကာလေ။ ဝိတက္ကာနန္တိ မိစ္ဆာဝိတက္ကာနံ။
Ubhinnaṃ nāsacchiddānaṃ majjhe ṭhita-aṭṭhitudanaṃ saha khuraṭṭhena chindanaṃ. Daṇḍakavāsīti dīghadaṇḍakā mahāvāsi. Nipajjitvā niddokkamananti iminā pacalāyikaniddaṃ paṭikkhipati. Tattha hi kadāci antarā micchāvitakkānaṃ sallakānaṃ avasaro siyā, nattheva nipajjitvā mahāniddaṃ okkantakāle. Vitakkānanti micchāvitakkānaṃ.
အာဒိတ္တပရိယာယသုတ္တဝဏ္ဏနာ နိဋ္ဌိတာ။
Ādittapariyāyasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. အာဒိတ္တပရိယာယသုတ္တံ • 8. Ādittapariyāyasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. အာဒိတ္တပရိယာယသုတ္တဝဏ္ဏနာ • 8. Ādittapariyāyasuttavaṇṇanā
