| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៥. អាទិត្តវគ្គោ
5. Ādittavaggo
១. អាទិត្តសុត្តំ
1. Ādittasuttaṃ
៤១. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ អថ ខោ អញ្ញតរា ទេវតា អភិក្កន្តាយ រត្តិយា អភិក្កន្តវណ្ណា កេវលកប្បំ ជេតវនំ ឱភាសេត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ។ ឯកមន្តំ ឋិតា ខោ សា ទេវតា ភគវតោ សន្តិកេ ឥមា គាថាយោ អភាសិ –
41. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavato santike imā gāthāyo abhāsi –
‘‘អាទិត្តស្មិំ អគារស្មិំ, យំ នីហរតិ ភាជនំ;
‘‘Ādittasmiṃ agārasmiṃ, yaṃ nīharati bhājanaṃ;
តំ តស្ស ហោតិ អត្ថាយ, នោ ច យំ តត្ថ ឌយ្ហតិ។
Taṃ tassa hoti atthāya, no ca yaṃ tattha ḍayhati.
‘‘ឯវំ អាទិត្តកោ លោកោ, ជរាយ មរណេន ច;
‘‘Evaṃ ādittako loko, jarāya maraṇena ca;
នីហរេថេវ ទានេន, ទិន្នំ ហោតិ សុនីហតំ។
Nīharetheva dānena, dinnaṃ hoti sunīhataṃ.
‘‘ទិន្នំ សុខផលំ ហោតិ, នាទិន្នំ ហោតិ តំ តថា;
‘‘Dinnaṃ sukhaphalaṃ hoti, nādinnaṃ hoti taṃ tathā;
ចោរា ហរន្តិ រាជានោ, អគ្គិ ឌហតិ នស្សតិ។
Corā haranti rājāno, aggi ḍahati nassati.
‘‘អថ អន្តេន ជហតិ, សរីរំ សបរិគ្គហំ;
‘‘Atha antena jahati, sarīraṃ sapariggahaṃ;
ឯតទញ្ញាយ មេធាវី, ភុញ្ជេថ ច ទទេថ ច;
Etadaññāya medhāvī, bhuñjetha ca dadetha ca;
ទត្វា ច ភុត្វា ច យថានុភាវំ;
Datvā ca bhutvā ca yathānubhāvaṃ;
អនិន្ទិតោ សគ្គមុបេតិ ឋាន’’ន្តិ។
Anindito saggamupeti ṭhāna’’nti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. អាទិត្តសុត្តវណ្ណនា • 1. Ādittasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១. អាទិត្តសុត្តវណ្ណនា • 1. Ādittasuttavaṇṇanā
