| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৬. আদিত্তসুত্তৰণ্ণনা
6. Ādittasuttavaṇṇanā
২৮. গযানামিকায নদিযা অৰিদূরে পৰত্তো গামো গযা নাম, তস্সং গযাযং ৰিহরতীতি সমীপত্থে চেতং ভুম্মৰচনং। গযাগামস্স হি আসন্নে গযাসীসনামকে পিট্ঠিপাসাণে ভগৰা তদা ৰিহাসি। তেনাহ ‘‘ভগৰা তত্থ ৰিহরতী’’তি।
28. Gayānāmikāya nadiyā avidūre pavatto gāmo gayā nāma, tassaṃ gayāyaṃ viharatīti samīpatthe cetaṃ bhummavacanaṃ. Gayāgāmassa hi āsanne gayāsīsanāmake piṭṭhipāsāṇe bhagavā tadā vihāsi. Tenāha ‘‘bhagavā tattha viharatī’’ti.
তত্রাতি ‘‘ভিক্খূ আমন্তেসী’’তি যে ভিক্খূ আমন্তেসি, যথা চাযং দেসনা তেসং সপ্পাযা জাতা, তত্র তস্মিং অত্থদ্ৰযে ৰিভাৰেতব্বে অযং অনুপুব্বিকথা সমুদাগমতো পট্ঠায অনুপটিপাটিকথা। ইতোতি ইমস্মা কপ্পতো। কিরাতি অনুস্সৰনত্থে নিপাতো। পারমিতাপরিভাৰনায পরিপাকগতে। ঞাণেতি বোধিঞাণে। কনিট্ঠপুত্তো ৰেমাতিকভাতা ভগৰতো। ৰেল়ুভিত্তিকুটিকাহি পরিক্খিপিত্ৰা বহিদ্ধা, অন্তো পন পটসাণীহি।
Tatrāti ‘‘bhikkhū āmantesī’’ti ye bhikkhū āmantesi, yathā cāyaṃ desanā tesaṃ sappāyā jātā, tatra tasmiṃ atthadvaye vibhāvetabbe ayaṃ anupubbikathā samudāgamato paṭṭhāya anupaṭipāṭikathā. Itoti imasmā kappato. Kirāti anussavanatthe nipāto. Pāramitāparibhāvanāya paripākagate. Ñāṇeti bodhiñāṇe. Kaniṭṭhaputto vemātikabhātā bhagavato. Veḷubhittikuṭikāhi parikkhipitvā bahiddhā, anto pana paṭasāṇīhi.
সব্বেসং সত্তানং। পুঞ্ঞচেতনং অন্তো অব্ভন্তরে পৰেসেতি। ভগৰাপি তস্স পুত্তোতি কত্ৰা ‘‘অঞ্ঞে তযো পুত্তা’’তি ৰুত্তং। অৰিপ্পকিরিত্ৰাতি পরাজযেন অৰিপ্পকিরিয অপলাযিত্ৰা। পিদহীতি দাতুং ন সক্কোমীতি তথা অকাসি। সচ্চৰাদিতায গণ্হিংসূতি রাজকুলস্স সচ্চৰাদিতায অত্তনো ৰরং গণ্হিংসু।
Sabbesaṃ sattānaṃ. Puññacetanaṃ anto abbhantare paveseti. Bhagavāpi tassa puttoti katvā ‘‘aññe tayo puttā’’ti vuttaṃ. Avippakiritvāti parājayena avippakiriya apalāyitvā. Pidahīti dātuṃ na sakkomīti tathā akāsi. Saccavāditāya gaṇhiṃsūti rājakulassa saccavāditāya attano varaṃ gaṇhiṃsu.
ৰিনিৰত্তিতুন্তি পটিঞ্ঞায নিৰত্তিতুং। অন্তরাতি তুম্হেহি পরিচ্ছিন্নকালস্স অন্তরা এৰ মতা। অট্ঠৰীসতিহত্থট্ঠানং উসভং নাম। উসভে অট্ঠৰীসতিহত্থপ্পমাণে ঠানে। দানগ্গে ব্যাৰটোতি পসুতো।
Vinivattitunti paṭiññāya nivattituṃ. Antarāti tumhehi paricchinnakālassa antarā eva matā. Aṭṭhavīsatihatthaṭṭhānaṃ usabhaṃ nāma. Usabhe aṭṭhavīsatihatthappamāṇe ṭhāne. Dānagge byāvaṭoti pasuto.
সোতি ভগৰা। তথারূপঞ্হি বুদ্ধানং দেসনাপাটিহারিযং, যথা দেসনায গহিতো অত্থো পচ্চক্খতো ৰিভূতো হুত্ৰা উপট্ঠাতি। তেনাহ ‘‘ইমেসং…পে॰… দেসেস্সামী’’তি। সন্নিট্ঠানন্তি চিরকালপরিচিতাদিত্তঅগ্গিকানং আদিত্তপরিযাযদেসনাৰ সপ্পাযাতি নিচ্ছযমকাসি। পদিত্তন্তি পদীপিতং একাদসহি অগ্গীহি একজালীভূতং। তেনাহ ‘‘সম্পজ্জলিত’’ন্তি। দুক্খলক্খণং কথিতং চক্খাদীনং একাদসহি অগ্গীহি আদিত্তভাৰেন দুক্খমতায দুক্খস্স কথিতত্তা।
Soti bhagavā. Tathārūpañhi buddhānaṃ desanāpāṭihāriyaṃ, yathā desanāya gahito attho paccakkhato vibhūto hutvā upaṭṭhāti. Tenāha ‘‘imesaṃ…pe… desessāmī’’ti. Sanniṭṭhānanti cirakālaparicitādittaaggikānaṃ ādittapariyāyadesanāva sappāyāti nicchayamakāsi. Padittanti padīpitaṃ ekādasahi aggīhi ekajālībhūtaṃ. Tenāha ‘‘sampajjalita’’nti. Dukkhalakkhaṇaṃ kathitaṃ cakkhādīnaṃ ekādasahi aggīhi ādittabhāvena dukkhamatāya dukkhassa kathitattā.
আদিত্তসুত্তৰণ্ণনা নিট্ঠিতা।
Ādittasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৬. আদিত্তসুত্তং • 6. Ādittasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. আদিত্তসুত্তৰণ্ণনা • 6. Ādittasuttavaṇṇanā
