| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
५. आदित्तवग्गो
5. Ādittavaggo
१. आदित्तसुत्तवण्णना
1. Ādittasuttavaṇṇanā
४१. सीसन्ति देसनापदेसो, देसनाय अञ्ञेसुपि वत्तब्बेसु कस्सचिदेव सीसभागेन अपदिसनं। तेनाह ‘‘रागादीही’’तिआदि। दानेनाति अत्तनो सन्तकस्स परेसं परिच्चजनेन। तं पन परिच्चजनं चेतनाय होतीति आह ‘‘दानचेतनाया’’ति दानपुञ्ञचेतनाति दानमया पुञ्ञचेतना दायकस्सेव होति तंसन्ततिपरियापन्नत्ता। नीहतभण्डकन्ति आदित्तगेहतो बहि निक्खामितं भण्डकं। एतन्ति ‘‘दिन्नं होती’’तिआदिवचनं। अदिन्नेति दानमुखे अनियुञ्जिते भोगे। ‘‘अन्तेना’’ति जीवितस्स अन्तो अधिप्पेतोति आह ‘‘मरणेना’’ति। ममाति परिग्गहितत्ता परिग्गहा, भोगा। तेपि केनचि आकारेन विनासं अनुपगता मरणेन पहीयन्ति नामाति वुत्तं ‘‘चोरादीनं वसेन अविनट्ठभोगे’’ति। सोभना अग्गभूता रूपादयो एत्थाति सग्गो, तं सग्गं।
41.Sīsanti desanāpadeso, desanāya aññesupi vattabbesu kassacideva sīsabhāgena apadisanaṃ. Tenāha ‘‘rāgādīhī’’tiādi. Dānenāti attano santakassa paresaṃ pariccajanena. Taṃ pana pariccajanaṃ cetanāya hotīti āha ‘‘dānacetanāyā’’ti dānapuññacetanāti dānamayā puññacetanā dāyakasseva hoti taṃsantatipariyāpannattā. Nīhatabhaṇḍakanti ādittagehato bahi nikkhāmitaṃ bhaṇḍakaṃ. Etanti ‘‘dinnaṃ hotī’’tiādivacanaṃ. Adinneti dānamukhe aniyuñjite bhoge. ‘‘Antenā’’ti jīvitassa anto adhippetoti āha ‘‘maraṇenā’’ti. Mamāti pariggahitattā pariggahā, bhogā. Tepi kenaci ākārena vināsaṃ anupagatā maraṇena pahīyanti nāmāti vuttaṃ ‘‘corādīnaṃ vasena avinaṭṭhabhoge’’ti. Sobhanā aggabhūtā rūpādayo etthāti saggo, taṃ saggaṃ.
आदित्तसुत्तवण्णना निट्ठिता।
Ādittasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १. आदित्तसुत्तं • 1. Ādittasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १. आदित्तसुत्तवण्णना • 1. Ādittasuttavaṇṇanā
