| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៦. អាទិត្តសុត្តវណ្ណនា
6. Ādittasuttavaṇṇanā
២៨. គយានាមិកាយ នទិយា អវិទូរេ បវត្តោ គាមោ គយា នាម, តស្សំ គយាយំ វិហរតីតិ សមីបត្ថេ ចេតំ ភុម្មវចនំ។ គយាគាមស្ស ហិ អាសន្នេ គយាសីសនាមកេ បិដ្ឋិបាសាណេ ភគវា តទា វិហាសិ។ តេនាហ ‘‘ភគវា តត្ថ វិហរតី’’តិ។
28. Gayānāmikāya nadiyā avidūre pavatto gāmo gayā nāma, tassaṃ gayāyaṃ viharatīti samīpatthe cetaṃ bhummavacanaṃ. Gayāgāmassa hi āsanne gayāsīsanāmake piṭṭhipāsāṇe bhagavā tadā vihāsi. Tenāha ‘‘bhagavā tattha viharatī’’ti.
តត្រាតិ ‘‘ភិក្ខូ អាមន្តេសី’’តិ យេ ភិក្ខូ អាមន្តេសិ, យថា ចាយំ ទេសនា តេសំ សប្បាយា ជាតា, តត្រ តស្មិំ អត្ថទ្វយេ វិភាវេតព្ពេ អយំ អនុបុព្ពិកថា សមុទាគមតោ បដ្ឋាយ អនុបដិបាដិកថា។ ឥតោតិ ឥមស្មា កប្បតោ។ កិរាតិ អនុស្សវនត្ថេ និបាតោ។ បារមិតាបរិភាវនាយ បរិបាកគតេ។ ញាណេតិ ពោធិញាណេ។ កនិដ្ឋបុត្តោ វេមាតិកភាតា ភគវតោ។ វេឡុភិត្តិកុដិកាហិ បរិក្ខិបិត្វា ពហិទ្ធា, អន្តោ បន បដសាណីហិ។
Tatrāti ‘‘bhikkhū āmantesī’’ti ye bhikkhū āmantesi, yathā cāyaṃ desanā tesaṃ sappāyā jātā, tatra tasmiṃ atthadvaye vibhāvetabbe ayaṃ anupubbikathā samudāgamato paṭṭhāya anupaṭipāṭikathā. Itoti imasmā kappato. Kirāti anussavanatthe nipāto. Pāramitāparibhāvanāya paripākagate. Ñāṇeti bodhiñāṇe. Kaniṭṭhaputto vemātikabhātā bhagavato. Veḷubhittikuṭikāhi parikkhipitvā bahiddhā, anto pana paṭasāṇīhi.
សព្ពេសំ សត្តានំ។ បុញ្ញចេតនំ អន្តោ អព្ភន្តរេ បវេសេតិ។ ភគវាបិ តស្ស បុត្តោតិ កត្វា ‘‘អញ្ញេ តយោ បុត្តា’’តិ វុត្តំ។ អវិប្បកិរិត្វាតិ បរាជយេន អវិប្បកិរិយ អបលាយិត្វា។ បិទហីតិ ទាតុំ ន សក្កោមីតិ តថា អកាសិ។ សច្ចវាទិតាយ គណ្ហិំសូតិ រាជកុលស្ស សច្ចវាទិតាយ អត្តនោ វរំ គណ្ហិំសុ។
Sabbesaṃ sattānaṃ. Puññacetanaṃ anto abbhantare paveseti. Bhagavāpi tassa puttoti katvā ‘‘aññe tayo puttā’’ti vuttaṃ. Avippakiritvāti parājayena avippakiriya apalāyitvā. Pidahīti dātuṃ na sakkomīti tathā akāsi. Saccavāditāya gaṇhiṃsūti rājakulassa saccavāditāya attano varaṃ gaṇhiṃsu.
វិនិវត្តិតុន្តិ បដិញ្ញាយ និវត្តិតុំ។ អន្តរាតិ តុម្ហេហិ បរិច្ឆិន្នកាលស្ស អន្តរា ឯវ មតា។ អដ្ឋវីសតិហត្ថដ្ឋានំ ឧសភំ នាម។ ឧសភេ អដ្ឋវីសតិហត្ថប្បមាណេ ឋានេ។ ទានគ្គេ ព្យាវដោតិ បសុតោ។
Vinivattitunti paṭiññāya nivattituṃ. Antarāti tumhehi paricchinnakālassa antarā eva matā. Aṭṭhavīsatihatthaṭṭhānaṃ usabhaṃ nāma. Usabhe aṭṭhavīsatihatthappamāṇe ṭhāne. Dānagge byāvaṭoti pasuto.
សោតិ ភគវា។ តថារូបញ្ហិ ពុទ្ធានំ ទេសនាបាដិហារិយំ, យថា ទេសនាយ គហិតោ អត្ថោ បច្ចក្ខតោ វិភូតោ ហុត្វា ឧបដ្ឋាតិ។ តេនាហ ‘‘ឥមេសំ…បេ.… ទេសេស្សាមី’’តិ។ សន្និដ្ឋានន្តិ ចិរកាលបរិចិតាទិត្តអគ្គិកានំ អាទិត្តបរិយាយទេសនាវ សប្បាយាតិ និច្ឆយមកាសិ។ បទិត្តន្តិ បទីបិតំ ឯកាទសហិ អគ្គីហិ ឯកជាលីភូតំ។ តេនាហ ‘‘សម្បជ្ជលិត’’ន្តិ។ ទុក្ខលក្ខណំ កថិតំ ចក្ខាទីនំ ឯកាទសហិ អគ្គីហិ អាទិត្តភាវេន ទុក្ខមតាយ ទុក្ខស្ស កថិតត្តា។
Soti bhagavā. Tathārūpañhi buddhānaṃ desanāpāṭihāriyaṃ, yathā desanāya gahito attho paccakkhato vibhūto hutvā upaṭṭhāti. Tenāha ‘‘imesaṃ…pe… desessāmī’’ti. Sanniṭṭhānanti cirakālaparicitādittaaggikānaṃ ādittapariyāyadesanāva sappāyāti nicchayamakāsi. Padittanti padīpitaṃ ekādasahi aggīhi ekajālībhūtaṃ. Tenāha ‘‘sampajjalita’’nti. Dukkhalakkhaṇaṃ kathitaṃ cakkhādīnaṃ ekādasahi aggīhi ādittabhāvena dukkhamatāya dukkhassa kathitattā.
អាទិត្តសុត្តវណ្ណនា និដ្ឋិតា។
Ādittasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៦. អាទិត្តសុត្តំ • 6. Ādittasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦. អាទិត្តសុត្តវណ្ណនា • 6. Ādittasuttavaṇṇanā
