| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၆. အာဒိတ္တသုတ္တဝဏ္ဏနာ
6. Ādittasuttavaṇṇanā
၂၈. ဂယာနာမိကာယ နဒိယာ အဝိဒူရေ ပဝတ္တော ဂာမော ဂယာ နာမ, တသ္သံ ဂယာယံ ဝိဟရတီတိ သမီပတ္ထေ စေတံ ဘုမ္မဝစနံ။ ဂယာဂာမသ္သ ဟိ အာသန္နေ ဂယာသီသနာမကေ ပိဋ္ဌိပာသာဏေ ဘဂဝာ တဒာ ဝိဟာသိ။ တေနာဟ ‘‘ဘဂဝာ တတ္ထ ဝိဟရတီ’’တိ။
28. Gayānāmikāya nadiyā avidūre pavatto gāmo gayā nāma, tassaṃ gayāyaṃ viharatīti samīpatthe cetaṃ bhummavacanaṃ. Gayāgāmassa hi āsanne gayāsīsanāmake piṭṭhipāsāṇe bhagavā tadā vihāsi. Tenāha ‘‘bhagavā tattha viharatī’’ti.
တတ္ရာတိ ‘‘ဘိက္ခူ အာမန္တေသီ’’တိ ယေ ဘိက္ခူ အာမန္တေသိ, ယထာ စာယံ ဒေသနာ တေသံ သပ္ပာယာ ဇာတာ, တတ္ရ တသ္မိံ အတ္ထဒ္ဝယေ ဝိဘာဝေတဗ္ဗေ အယံ အနုပုဗ္ဗိကထာ သမုဒာဂမတော ပဋ္ဌာယ အနုပဋိပာဋိကထာ။ ဣတောတိ ဣမသ္မာ ကပ္ပတော။ ကိရာတိ အနုသ္သဝနတ္ထေ နိပာတော။ ပာရမိတာပရိဘာဝနာယ ပရိပာကဂတေ။ ဉာဏေတိ ဗောဓိဉာဏေ။ ကနိဋ္ဌပုတ္တော ဝေမာတိကဘာတာ ဘဂဝတော။ ဝေဠုဘိတ္တိကုဋိကာဟိ ပရိက္ခိပိတ္ဝာ ဗဟိဒ္ဓာ, အန္တော ပန ပဋသာဏီဟိ။
Tatrāti ‘‘bhikkhū āmantesī’’ti ye bhikkhū āmantesi, yathā cāyaṃ desanā tesaṃ sappāyā jātā, tatra tasmiṃ atthadvaye vibhāvetabbe ayaṃ anupubbikathā samudāgamato paṭṭhāya anupaṭipāṭikathā. Itoti imasmā kappato. Kirāti anussavanatthe nipāto. Pāramitāparibhāvanāya paripākagate. Ñāṇeti bodhiñāṇe. Kaniṭṭhaputto vemātikabhātā bhagavato. Veḷubhittikuṭikāhi parikkhipitvā bahiddhā, anto pana paṭasāṇīhi.
သဗ္ဗေသံ သတ္တာနံ။ ပုညစေတနံ အန္တော အဗ္ဘန္တရေ ပဝေသေတိ။ ဘဂဝာပိ တသ္သ ပုတ္တောတိ ကတ္ဝာ ‘‘အညေ တယော ပုတ္တာ’’တိ ဝုတ္တံ။ အဝိပ္ပကိရိတ္ဝာတိ ပရာဇယေန အဝိပ္ပကိရိယ အပလာယိတ္ဝာ။ ပိဒဟီတိ ဒာတုံ န သက္ကောမီတိ တထာ အကာသိ။ သစ္စဝာဒိတာယ ဂဏ္ဟိံသူတိ ရာဇကုလသ္သ သစ္စဝာဒိတာယ အတ္တနော ဝရံ ဂဏ္ဟိံသု။
Sabbesaṃ sattānaṃ. Puññacetanaṃ anto abbhantare paveseti. Bhagavāpi tassa puttoti katvā ‘‘aññe tayo puttā’’ti vuttaṃ. Avippakiritvāti parājayena avippakiriya apalāyitvā. Pidahīti dātuṃ na sakkomīti tathā akāsi. Saccavāditāya gaṇhiṃsūti rājakulassa saccavāditāya attano varaṃ gaṇhiṃsu.
ဝိနိဝတ္တိတုန္တိ ပဋိညာယ နိဝတ္တိတုံ။ အန္တရာတိ တုမ္ဟေဟိ ပရိစ္ဆိန္နကာလသ္သ အန္တရာ ဧဝ မတာ။ အဋ္ဌဝီသတိဟတ္ထဋ္ဌာနံ ဥသဘံ နာမ။ ဥသဘေ အဋ္ဌဝီသတိဟတ္ထပ္ပမာဏေ ဌာနေ။ ဒာနဂ္ဂေ ဗ္ယာဝဋောတိ ပသုတော။
Vinivattitunti paṭiññāya nivattituṃ. Antarāti tumhehi paricchinnakālassa antarā eva matā. Aṭṭhavīsatihatthaṭṭhānaṃ usabhaṃ nāma. Usabhe aṭṭhavīsatihatthappamāṇe ṭhāne. Dānagge byāvaṭoti pasuto.
သောတိ ဘဂဝာ။ တထာရူပဉ္ဟိ ဗုဒ္ဓာနံ ဒေသနာပာဋိဟာရိယံ, ယထာ ဒေသနာယ ဂဟိတော အတ္ထော ပစ္စက္ခတော ဝိဘူတော ဟုတ္ဝာ ဥပဋ္ဌာတိ။ တေနာဟ ‘‘ဣမေသံ။ပေ.။ ဒေသေသ္သာမီ’’တိ။ သန္နိဋ္ဌာနန္တိ စိရကာလပရိစိတာဒိတ္တအဂ္ဂိကာနံ အာဒိတ္တပရိယာယဒေသနာဝ သပ္ပာယာတိ နိစ္ဆယမကာသိ။ ပဒိတ္တန္တိ ပဒီပိတံ ဧကာဒသဟိ အဂ္ဂီဟိ ဧကဇာလီဘူတံ။ တေနာဟ ‘‘သမ္ပဇ္ဇလိတ’’န္တိ။ ဒုက္ခလက္ခဏံ ကထိတံ စက္ခာဒီနံ ဧကာဒသဟိ အဂ္ဂီဟိ အာဒိတ္တဘာဝေန ဒုက္ခမတာယ ဒုက္ခသ္သ ကထိတတ္တာ။
Soti bhagavā. Tathārūpañhi buddhānaṃ desanāpāṭihāriyaṃ, yathā desanāya gahito attho paccakkhato vibhūto hutvā upaṭṭhāti. Tenāha ‘‘imesaṃ…pe… desessāmī’’ti. Sanniṭṭhānanti cirakālaparicitādittaaggikānaṃ ādittapariyāyadesanāva sappāyāti nicchayamakāsi. Padittanti padīpitaṃ ekādasahi aggīhi ekajālībhūtaṃ. Tenāha ‘‘sampajjalita’’nti. Dukkhalakkhaṇaṃ kathitaṃ cakkhādīnaṃ ekādasahi aggīhi ādittabhāvena dukkhamatāya dukkhassa kathitattā.
အာဒိတ္တသုတ္တဝဏ္ဏနာ နိဋ္ဌိတာ။
Ādittasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၆. အာဒိတ္တသုတ္တံ • 6. Ādittasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. အာဒိတ္တသုတ္တဝဏ္ဏနာ • 6. Ādittasuttavaṇṇanā
