| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
6. ආදිත්‌තසුත්‌තවණ්‌ණනා
6. Ādittasuttavaṇṇanā
28. ගයානාමිකාය නදියා අවිදූරෙ පවත්‌තො ගාමො ගයා නාම, තස්‌සං ගයායං විහරතීති සමීපත්‌ථෙ චෙතං භුම්‌මවචනං. ගයාගාමස්‌ස හි ආසන්‌නෙ ගයාසීසනාමකෙ පිට්‌ඨිපාසාණෙ භගවා තදා විහාසි. තෙනාහ ‘‘භගවා තත්‌ථ විහරතී’’ති.
28. Gayānāmikāya nadiyā avidūre pavatto gāmo gayā nāma, tassaṃ gayāyaṃ viharatīti samīpatthe cetaṃ bhummavacanaṃ. Gayāgāmassa hi āsanne gayāsīsanāmake piṭṭhipāsāṇe bhagavā tadā vihāsi. Tenāha ‘‘bhagavā tattha viharatī’’ti.
තත්‍රාති ‘‘භික්‌ඛූ ආමන්‌තෙසී’’ති යෙ භික්‌ඛූ ආමන්‌තෙසි, යථා චායං දෙසනා තෙසං සප්‌පායා ජාතා, තත්‍ර තස්‌මිං අත්‌ථද්‌වයෙ විභාවෙතබ්‌බෙ අයං අනුපුබ්‌බිකථා සමුදාගමතො පට්‌ඨාය අනුපටිපාටිකථා. ඉතොති ඉමස්‌මා කප්‌පතො. කිරාති අනුස්‌සවනත්‌ථෙ නිපාතො. පාරමිතාපරිභාවනාය පරිපාකගතෙ. ඤාණෙති බොධිඤාණෙ. කනිට්‌ඨපුත්‌තො වෙමාතිකභාතා භගවතො. වෙළුභිත්‌තිකුටිකාහි පරික්‌ඛිපිත්‌වා බහිද්‌ධා, අන්‌තො පන පටසාණීහි.
Tatrāti ‘‘bhikkhū āmantesī’’ti ye bhikkhū āmantesi, yathā cāyaṃ desanā tesaṃ sappāyā jātā, tatra tasmiṃ atthadvaye vibhāvetabbe ayaṃ anupubbikathā samudāgamato paṭṭhāya anupaṭipāṭikathā. Itoti imasmā kappato. Kirāti anussavanatthe nipāto. Pāramitāparibhāvanāya paripākagate. Ñāṇeti bodhiñāṇe. Kaniṭṭhaputto vemātikabhātā bhagavato. Veḷubhittikuṭikāhi parikkhipitvā bahiddhā, anto pana paṭasāṇīhi.
සබ්‌බෙසං සත්‌තානං. පුඤ්‌ඤචෙතනං අන්‌තො අබ්‌භන්‌තරෙ පවෙසෙති. භගවාපි තස්‌ස පුත්‌තොති කත්‌වා ‘‘අඤ්‌ඤෙ තයො පුත්‌තා’’ති වුත්‌තං. අවිප්‌පකිරිත්‌වාති පරාජයෙන අවිප්‌පකිරිය අපලායිත්‌වා. පිදහීති දාතුං න සක්‌කොමීති තථා අකාසි. සච්‌චවාදිතාය ගණ්‌හිංසූති රාජකුලස්‌ස සච්‌චවාදිතාය අත්‌තනො වරං ගණ්‌හිංසු.
Sabbesaṃ sattānaṃ. Puññacetanaṃ anto abbhantare paveseti. Bhagavāpi tassa puttoti katvā ‘‘aññe tayo puttā’’ti vuttaṃ. Avippakiritvāti parājayena avippakiriya apalāyitvā. Pidahīti dātuṃ na sakkomīti tathā akāsi. Saccavāditāya gaṇhiṃsūti rājakulassa saccavāditāya attano varaṃ gaṇhiṃsu.
විනිවත්‌තිතුන්‌ති පටිඤ්‌ඤාය නිවත්‌තිතුං. අන්‌තරාති තුම්‌හෙහි පරිච්‌ඡින්‌නකාලස්‌ස අන්‌තරා එව මතා. අට්‌ඨවීසතිහත්‌ථට්‌ඨානං උසභං නාම. උසභෙ අට්‌ඨවීසතිහත්‌ථප්‌පමාණෙ ඨානෙ. දානග්‌ගෙ බ්‍යාවටොති පසුතො.
Vinivattitunti paṭiññāya nivattituṃ. Antarāti tumhehi paricchinnakālassa antarā eva matā. Aṭṭhavīsatihatthaṭṭhānaṃ usabhaṃ nāma. Usabhe aṭṭhavīsatihatthappamāṇe ṭhāne. Dānagge byāvaṭoti pasuto.
සොති භගවා. තථාරූපඤ්‌හි බුද්‌ධානං දෙසනාපාටිහාරියං, යථා දෙසනාය ගහිතො අත්‌ථො පච්‌චක්‌ඛතො විභූතො හුත්‌වා උපට්‌ඨාති. තෙනාහ ‘‘ඉමෙසං…පෙ.… දෙසෙස්‌සාමී’’ති. සන්‌නිට්‌ඨානන්‌ති චිරකාලපරිචිතාදිත්‌තඅග්‌ගිකානං ආදිත්‌තපරියායදෙසනාව සප්‌පායාති නිච්‌ඡයමකාසි. පදිත්‌තන්‌ති පදීපිතං එකාදසහි අග්‌ගීහි එකජාලීභූතං. තෙනාහ ‘‘සම්‌පජ්‌ජලිත’’න්‌ති. දුක්‌ඛලක්‌ඛණං කථිතං චක්‌ඛාදීනං එකාදසහි අග්‌ගීහි ආදිත්‌තභාවෙන දුක්‌ඛමතාය දුක්‌ඛස්‌ස කථිතත්‌තා.
Soti bhagavā. Tathārūpañhi buddhānaṃ desanāpāṭihāriyaṃ, yathā desanāya gahito attho paccakkhato vibhūto hutvā upaṭṭhāti. Tenāha ‘‘imesaṃ…pe… desessāmī’’ti. Sanniṭṭhānanti cirakālaparicitādittaaggikānaṃ ādittapariyāyadesanāva sappāyāti nicchayamakāsi. Padittanti padīpitaṃ ekādasahi aggīhi ekajālībhūtaṃ. Tenāha ‘‘sampajjalita’’nti. Dukkhalakkhaṇaṃ kathitaṃ cakkhādīnaṃ ekādasahi aggīhi ādittabhāvena dukkhamatāya dukkhassa kathitattā.
ආදිත්‌තසුත්‌තවණ්‌ණනා නිට්‌ඨිතා.
Ādittasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 6. ආදිත්‌තසුත්‌තං • 6. Ādittasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. ආදිත්‌තසුත්‌තවණ්‌ණනා • 6. Ādittasuttavaṇṇanā
