| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๕. อคทงฺคปโญฺห
5. Agadaṅgapañho
๕. ‘‘ภเนฺต นาคเสน, ‘อคทสฺส เทฺว องฺคานิ คเหตพฺพานี’ติ ยํ วเทสิ, กตมานิ ตานิ เทฺว องฺคานิ คเหตพฺพานี’’ติฯ ‘‘ยถา, มหาราช, อคเท กิมี น สณฺฐหนฺติ, เอวเมว โข, มหาราช, โยคินา โยคาวจเรน มานเส กิเลสา น สณฺฐเปตพฺพาฯ อิทํ, มหาราช, อคทสฺส ปฐมํ องฺคํ คเหตพฺพํฯ
5. ‘‘Bhante nāgasena, ‘agadassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti. ‘‘Yathā, mahārāja, agade kimī na saṇṭhahanti, evameva kho, mahārāja, yoginā yogāvacarena mānase kilesā na saṇṭhapetabbā. Idaṃ, mahārāja, agadassa paṭhamaṃ aṅgaṃ gahetabbaṃ.
‘‘ปุน จปรํ, มหาราช, อคโท ทฎฺฐผุฎฺฐทิฎฺฐอสิตปีตขายิตสายิตํ สพฺพํ วิสํ ปฎิหนติ, เอวเมว โข, มหาราช, โยคินา โยคาวจเรน ราคโทสโมหมานทิฎฺฐิวิสํ สพฺพํ ปฎิหนิตพฺพํฯ อิทํ, มหาราช, อคทสฺส ทุติยํ องฺคํ คเหตพฺพํฯ ภาสิตเมฺปตํ, มหาราช, ภควตา เทวาติเทเวน –
‘‘Puna caparaṃ, mahārāja, agado daṭṭhaphuṭṭhadiṭṭhaasitapītakhāyitasāyitaṃ sabbaṃ visaṃ paṭihanati, evameva kho, mahārāja, yoginā yogāvacarena rāgadosamohamānadiṭṭhivisaṃ sabbaṃ paṭihanitabbaṃ. Idaṃ, mahārāja, agadassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘สงฺขารานํ สภาวตฺถํ, ทฎฺฐุกาเมน โยคินา;
‘‘‘Saṅkhārānaṃ sabhāvatthaṃ, daṭṭhukāmena yoginā;
อคเทเนว โหตพฺพํ, กิเลสวิสนาสเน’’’ติฯ
Agadeneva hotabbaṃ, kilesavisanāsane’’’ti.
อคทงฺคปโญฺห ปญฺจโมฯ
Agadaṅgapañho pañcamo.
