| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၅. အဂဒင္ဂပဉ္ဟော
5. Agadaṅgapañho
၅. ‘‘ဘန္တေ နာဂသေန, ‘အဂဒသ္သ ဒ္ဝေ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒ္ဝေ အင္ဂာနိ ဂဟေတဗ္ဗာနီ’’တိ။ ‘‘ယထာ, မဟာရာဇ, အဂဒေ ကိမီ န သဏ္ဌဟန္တိ, ဧဝမေဝ ခော, မဟာရာဇ, ယောဂိနာ ယောဂာဝစရေန မာနသေ ကိလေသာ န သဏ္ဌပေတဗ္ဗာ။ ဣဒံ, မဟာရာဇ, အဂဒသ္သ ပဌမံ အင္ဂံ ဂဟေတဗ္ဗံ။
5. ‘‘Bhante nāgasena, ‘agadassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti. ‘‘Yathā, mahārāja, agade kimī na saṇṭhahanti, evameva kho, mahārāja, yoginā yogāvacarena mānase kilesā na saṇṭhapetabbā. Idaṃ, mahārāja, agadassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, အဂဒော ဒဋ္ဌဖုဋ္ဌဒိဋ္ဌအသိတပီတခာယိတသာယိတံ သဗ္ဗံ ဝိသံ ပဋိဟနတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ရာဂဒောသမောဟမာနဒိဋ္ဌိဝိသံ သဗ္ဗံ ပဋိဟနိတဗ္ဗံ။ ဣဒံ, မဟာရာဇ, အဂဒသ္သ ဒုတိယံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝာတိဒေဝေန –
‘‘Puna caparaṃ, mahārāja, agado daṭṭhaphuṭṭhadiṭṭhaasitapītakhāyitasāyitaṃ sabbaṃ visaṃ paṭihanati, evameva kho, mahārāja, yoginā yogāvacarena rāgadosamohamānadiṭṭhivisaṃ sabbaṃ paṭihanitabbaṃ. Idaṃ, mahārāja, agadassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘သင္ခာရာနံ သဘာဝတ္ထံ၊ ဒဋ္ဌုကာမေန ယောဂိနာ။
‘‘‘Saṅkhārānaṃ sabhāvatthaṃ, daṭṭhukāmena yoginā;
အဂဒေနေဝ ဟောတဗ္ဗံ၊ ကိလေသဝိသနာသနေ’’’တိ။
Agadeneva hotabbaṃ, kilesavisanāsane’’’ti.
အဂဒင္ဂပဉ္ဟော ပဉ္စမော။
Agadaṅgapañho pañcamo.
