| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
5. අගදඞ්‌ගපඤ්‌හො
5. Agadaṅgapañho
5. ‘‘භන්‌තෙ නාගසෙන, ‘අගදස්‌ස ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති. ‘‘යථා, මහාරාජ, අගදෙ කිමී න සණ්‌ඨහන්‌ති, එවමෙව ඛො, මහාරාජ, යොගිනා යොගාවචරෙන මානසෙ කිලෙසා න සණ්‌ඨපෙතබ්‌බා. ඉදං, මහාරාජ, අගදස්‌ස පඨමං අඞ්‌ගං ගහෙතබ්‌බං.
5. ‘‘Bhante nāgasena, ‘agadassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti. ‘‘Yathā, mahārāja, agade kimī na saṇṭhahanti, evameva kho, mahārāja, yoginā yogāvacarena mānase kilesā na saṇṭhapetabbā. Idaṃ, mahārāja, agadassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, අගදො දට්‌ඨඵුට්‌ඨදිට්‌ඨඅසිතපීතඛායිතසායිතං සබ්‌බං විසං පටිහනති, එවමෙව ඛො, මහාරාජ, යොගිනා යොගාවචරෙන රාගදොසමොහමානදිට්‌ඨිවිසං සබ්‌බං පටිහනිතබ්‌බං. ඉදං, මහාරාජ, අගදස්‌ස දුතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන –
‘‘Puna caparaṃ, mahārāja, agado daṭṭhaphuṭṭhadiṭṭhaasitapītakhāyitasāyitaṃ sabbaṃ visaṃ paṭihanati, evameva kho, mahārāja, yoginā yogāvacarena rāgadosamohamānadiṭṭhivisaṃ sabbaṃ paṭihanitabbaṃ. Idaṃ, mahārāja, agadassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘සඞ්‌ඛාරානං සභාවත්‌ථං, දට්‌ඨුකාමෙන යොගිනා;
‘‘‘Saṅkhārānaṃ sabhāvatthaṃ, daṭṭhukāmena yoginā;
අගදෙනෙව හොතබ්‌බං, කිලෙසවිසනාසනෙ’’’ති.
Agadeneva hotabbaṃ, kilesavisanāsane’’’ti.
අගදඞ්‌ගපඤ්‌හො පඤ්‌චමො.
Agadaṅgapañho pañcamo.
